1, 2. ¿Kasa püsakirüinjatka anain pujuʼitapa suluʼujee tü iküleesia nnojotkat shiimain? ¿Jamüsü anaka maʼin püsakirüle sünain tia?

PÜTÜJAALE saaʼu sojotunüin wanee kasa ouktasiroʼu süʼütpaʼa pipia, ayuuire wayuu sutuma otta eere süpüla ayuulin pia sutuma, ¿kaseerü paainjaka? Eesüjaʼa süpüla pülateʼerüin pipia suulia. Akatsaʼa eein süpüla pümüin: «¿Ayuuitaaka taya maʼaka naaʼin na waneeinnua?».

² Müsia tü iküleesia nnojotkat shiimain. Saashin tü Wiwüliakat yarüttüsü maʼin tü shikirajakalü anain (2 Corinto 6:17). Makalaka anain pujuʼitüle suluʼujee ‹Babilonia tü Miyoʼusükat›, kayaakuayaaka süpüshuaʼa tü iküleesia nnojotkat shiimain (Alateetkat Mapeena 18:2, 4). ¿Paainjüirü tia? Müle shia, talatüshii waya sutuma. Nnojotsü ojuʼitünajatüin neʼe oulia shia. Püsakira paaʼin: «¿Taainjayülia süpüshi tü kasa saainjakat?». Wekirajaa sünain süpüshi tia.

3. (1) ¿Jamüsü sünüiki tü Wiwüliakat süchiki tü ayaakuaa aʼwaajünakat? ¿Jamüsü mojuka namüin na wayuukana tü nümakat Maleiwa süchiki tü ayaakuaakat? (2) ¿Kasa paainjainjatka süka tü kasa sünainpünaakat tü iküleesia nnojotkat shiimain?

³ Eeshii eeka kamaʼanain tü ayaakuaa aʼwaajünakat.  ¿Eesü shia pümaʼana? Müle shia, eesü mojule pümüin paashajaain nümaa Maleiwa sümaa nnojoluin pümaʼana wanee ayaakuaa. Eesü aire shia püpüla. Akaisaʼa Maleiwa, nia aküjaka wamüin tü waainjainjatkat süpüla waʼwaajüin nia. Saashin tü Wiwüliakat, mojusü wamaʼanale tia ayaakuaakat (paashajeʼera Aluwataaushikana 17:29; Alateetkat Mapeena 9:20; 1 Corinto 12:2; 1 Juan 5:21). Süpüla suluʼuin pia tü iküleesia shiimainkat, paʼaja süpüshuaʼa tü kasa sünainpünaakat tü iküleesia nnojotkat shiimain eeka pümaʼana. Püleraja shia maʼaka ‹nülerajüin shia Jeʼwaa› (Deuteronomio 27:15, TNM).

4. (1) ¿Jamüsü amülaka neʼe waʼwaajüin na wapüshi ouktakana? (2) ¿Jamüshii nüchiaaka Jeʼwaa na israeliitakana suulia aaʼinraa tü naaʼinrakat na ooʼulaküliikana?

⁴ Tü wanee naainjakat na suluʼukana tü iküleesia nnojotkat shiimain shia naʼwaajüin na napüshi ouktakana. Süpülapünaa nekirajaain na wayuukana sünain tü Wiwüliakat, nanoujapuʼu anainrü katüin noʼu na ouktüshiikana eere saaʼinpülee tü ouktüsükalüirua, akaaliinjüshii jee aainjashii kasa mojusü sümüin wayuu naashin. Eesü  paainjapuʼule wainma kasa süpüla nnojoluin naainjain kasa mojusü pümüin na püpüshi ouktakana. Maʼaka pikirajaain suluʼu ekirajaaya 6, nnojotsü oʼunüin tü naaʼinkat eemüin saaʼinpülee tü ouktüsükalüirua. Makalaka amülain neʼe waashajaain namaa. Waapüle nanüiki na wapüshi ouktakana, nanüiki shia na yolujaakana. Sutuma tia, nüchiaain Jeʼwaa na israeliitakana suulia naashajaain namaa na ouktüshiikana otta suulia naaʼinrüin tü naaʼinrakat na ooʼulaküliikana (paashajeʼera Deuteronomio 18:10-12).

5. ¿Kaseerü paainjaka puʼwaajüle ayaakuaa otta na ouktüshiikana?

⁵ ¿Kaseerü paainjaka suʼwaajünüle ayaakuaa otta tü ouktüsükalüirua suluʼu tü iküleesia kaluʼukat pia? Paashajeʼera tü Wiwüliakat sümaa jülüjain paaʼin tü nümakat Maleiwa süchiki tia. Paashajaa nümaa Jeʼwaa weinshi; püküja nümüin suluʼuweein pia tü iküleesia shiimainkat otta wanaaweein paaʼin nümaa (Isaías 55:9).

6, 7. (1) ¿Jamüsü saainjünaka miʼiraa 25 tisienpüroʼu? ¿Naainjain shia na nikirajüinkana Jesuu? (2) ¿Jara aainjünapuʼuka amüin miʼiraa saaʼu shikeraajüin nouyase?

⁶ Yarütteerü nümüin Jeʼwaa wanoula sünainpünaale waya tü miʼiraa saainjakat tü iküleesia nnojotkat shiimain. Wekirajaa sünain tü aainjünakat 25 tisienpüroʼu. Saashin wayuu jemeishi Jesukürisüto otta aainjashii miʼiraa soʼu kaʼikat tia. Nnojotsü eein wanee kasa eeʼiyataka naainjain miʼiraa na nikirajüinkana Jesuu soʼu kaʼikat tia. Müsü tü karalouktakat Los orígenes sagrados de las cosas profundas: «200 juya süchikijee jemein Kürisüto, nnojotsü jaralüin atüjaain aaʼu tü kaʼi jemeikat oʼu nia otta palitchon na jülüjakana aaʼin tia».

⁷ Jaʼitakajaʼa natüjaale saaʼu tü kaʼi jemeikat oʼu Jesuu  na nikirajüinkana, nnojoliishii aainjain miʼiraa saaʼu. ¿Jamüsü? Shia süka «naainjapuʼuin shia na manoujainsaliikana» (Las cosas nuestras de cada día). Piamashii wayuu manoujainsalii aainjaka miʼiraa saaʼu shikeraajüin nouyase saashin tü Wiwüliakat (Génesis 40:20; Marcos 6:21). Aainjünapuʼusü tia namüin na maleiwayaashiikana. Na kepiakana Roma, aainjapuʼushii miʼiraa 24 maayoʼu saaʼu shikeraajüin suuyase Diana wanee maleiwayaasü, waneemüin kaʼi aainjünapuʼusü saaʼu nuuyase Apolo, chi Kaʼi maleiwayaashikai. Makalaka tü aainjaakat miʼiraa saaʼu shikeraajüin ouyasee, nnojotsü naainjapuʼuin na anoujashiikana sükajee saainjünapuʼuin namüin na maleiwayaashiikana.

8. ¿Jamüsü nanainpünaaka na ooʼulaküliikana tü aainjünakat saaʼu shikeraajüin ouyasee?

⁸ Nnojotka naainjain miʼiraa saaʼu shikeraajüin nuuyase Jesuu na nikirajüinkana shia süka sünainpünaain shia tü naaʼinrakat na ooʼulaküliikana. Naashin na chajanakana Grecia otta Roma, aaʼinmajünüsü wayuu nutuma wanee meʼrujusai otta eeshi nia jemeipa naya. «Aleewashi chia meʼrujusaikai nümaa chi maleiwa ekeraajakai ouyasee wanaa namaa na wayuukana.» (The Lore of Birthdays [Shikeraajia ouyasee].) Nnojotsü nücheküin Jeʼwaa wanee miʼiraa eere niʼitaanüin Jesuu sünainpünaa tü naaʼinrakat na ooʼulaküliikana (Isaías 65:11, 12). Sutuma tia, ¿jamakaʼa saainjaka miʼiraa wayuu 25 tisienpüroʼu?

9. ¿Jamüsü süneekünaka 25 tisienpüroʼu süpüla saainjünüin miʼiraa saaʼu jemein Jesuu?

⁹ Süchikijee yaajachin Jesuu Mmapaʼa, aneekünüsü 25 tisienpüroʼu süpüla saainjünüin miʼiraa saaʼu jemein nia. Akaisaʼa nia, nnojoishi jemein tisienpüroʼu. * Jemeishi  oʼutuupüroʼu. ¿Jamüsü süneekünaka 25 tisienpüroʼu? Shia süka naʼwanajaweein na anoujayaakana «tü miʼiraa naainjakat na manoujainsaliikana sümaa tü naainjakat na anoujashiikana. [...] Chaaʼaya Roma aainjashii miʼiraa na manoujainsaliikana 25 tisienpüroʼu saaʼu niweetia chi ‹Kaʼikai› » (Enciclopedia de la Religión Católica). Aipa maʼin jemiai otta nnojoipa jaʼin chi Kaʼikai, aainjashii miʼiraa süpüla nüleʼejüin chi Kaʼikai, jaʼin otta alin walatshi nutuma. Naashin, aleʼejüshi chi Kaʼikai 25 tisienpüroʼu. Süpüla nanoujinnüin na manoujainsaliikana natuma na shikiipuʼukana tü iküleesiakalüirua, naʼwanajaain tia miʼiraakat süpüla müinjatüin aka tü naainjakat na «anoujashiikana». *

10. ¿Jamüsü nnojotka saainjapuʼuin wayuu tü miʼiraa aainjünakat 25 tisienpüroʼu?

¹⁰ Kakaliairü atüjaanüin aaʼu naainjalain na manoujainsaliikana tü miʼiraa aainjünakat 25 tisienpüroʼu. Sükajee tia, achiaanüshii suulia naainjain shia na kepiakana Inglaterra otta napüshi na kepiakana Estados Unidos soʼutpünaa tü juyakat 1600. Na eekana makatüin suulia naʼyataain 25 tisienpüroʼu, achekajünüsü namüin. Mapa aainjünüsü tia miʼiraakat süchikuaʼa otta eʼitaanüsü sooʼomüin. Aainjünüsü maʼin shia maaʼulu sainküin tü mmakat. Akanasaʼa na talateekana atuma Maleiwa, natüjaa aaʼu sünainpünaain  shia tü iküleesia nnojotkat shiimain. Nnojotsü naainjain shia otta tü waneeirua miʼiraa naainjakat na manoujainsaliikana. *

11. ¿Jamüshii naainjaka miʼiraa na wayuukana? ¿Kasa kojutüinjatka wamüin?

¹¹ Eeshii wayuu eeka natüjaain saaʼu saainjalain tü iküleesia nnojotkat shiimain tü miʼiraa aainjünakat 25 tisienpüroʼu. Akatsaʼa nnojoluin mojuin aainjaa tia naashin. Süka nakotchojiraain wayuu sümaa napüshi soʼu kaʼikat tia otta nnojotsü jaralüin müin: «sünainpünaasü shia tü iküleesia nnojotkat shiimain». ¿Müsia shia saaʼin pümüin? Müle shia, tü nnojotkat pikeroteein atuma suluʼumüin tü iküleesia shiimainkat shia sutuma alin püpüla püpüshi nnojotsü shiain sutuma pücheküin suluʼuin pia tü iküleesia nnojotkat shiimain. Keeʼireesü naaʼin Jeʼwaa aneein pia sümaa püpüshi (Éfeso 3:14, 15, TNM). Akatsaʼa eein wanee sukuwaʼipa süpüla puuntuin shia otta talatüin Maleiwa putuma. Müsü nünüiki Pablo süchiki tü kojutüinjatkat wamüin: ‹Jiyaawata saaʼu tü nüchekakat chi Senyotkai süpüla jaaʼinrüinjatüin shia› (Éfeso 5:10).

12. ¿Kasa shiyaawaseka süpüla wakayalaain suulia tü akuwaʼipaa otta tü miʼiraa yarüttüsükat?

¹² Saaʼin pümüin, tü miʼiraa aainjünakat maaʼulu eesü nnojorüle müin aka tü aainjünakat sümaiwa. ¿Anasüche watüjaale saaʼu jamakuwaʼipalüin tia? Aa. Piʼrüle palasütüin wanee ponpon saʼaka yarütshii, ¿pikeetche tü ponponkot? Nnojo, yarüttüsü. Eesü miʼiraa eeka müin aka saaʼin tia ponponkot, anayaasü, akatsaʼa saʼakajeejatüin shia yarütshii. Suluʼuweere waya tü iküleesia shiimainkat,  meesü wanüiki maʼaka naaʼin Pablo. Müshi nia namüin na aʼyataakana nümüin Maleiwa: «Nnojo jaapaain kasa yarüttüsü» (2 Corinto 6:17, 18).

13. ¿Kaseerü alataka pümüin puuʼulaale suulia wanee miʼiraa eeka mojuin?

¹³ Eesü sülatüle pümüin wainma kasa mojusü sutuma puuʼulaain suulia wanee miʼiraa eeka mojuin. ¿Jameerü pünüiki nasakirüle pia na aʼyataakana pümaa? ¿Kaseerü paainjaka püsülajünüle amüin wanee kasa 25 tisienpüroʼu? ¿Mojusüche paapaale shia? ¿Kaseerü paainjaka nnojorüle wanaawain punoula nümaa puʼwayuuse jee sümaa puʼwayuuse? ¿Kaseerü paainjaka süpüla nnojoluin mojuin naaʼin püchonnii sutuma nnojoluin sünainpünaain naya miʼiraa eeka mojuin?

14, 15. ¿Kaseerü paainjaka pipelisitaajünüle otta püsülajünüle amüin kasa sünain wanee miʼiraa eeka mojuin?

¹⁴ Kekiinjana waya süpüla watüjaain saaʼu tü waainjainjatkat sülatüle wamüin eeka müin aka tia. Pipelisitaajünüle sünain wanee miʼiraa eeka mojuin nümüin Jeʼwaa, eesü süpüla paapüin neʼe tü analuʼutkat. Naainjale shia na aʼyataakana pümaa, püküja namüin sooʼomüin tü punoujakalü anain. Piyaawata pünüiki püküjapa shia. Müsü tü Wiwüliakat: ‹Anakaja kemeʼeriale jünüiki sümüin wayuu sümaa kamaneein maʼin jia namüin süpüla yapainjanain jia süpüla asouktaa namüin› (Colosas 4:6). Piyaawata pünüiki süpüla nnojoluin mojuin saaʼin wayuu putuma püküjapa namüin tü punoujakalü anain. Püküja namüin anain asülajaa, outkajawaa. Akatsaʼa paainjain shia soʼu wanee kaʼi naata.

¹⁵ ¿Jama süsülajüneerü pümüin wanee kasa? Jülüjainjatü paaʼin jamüin süsülajüneeka pümüin. Eesü süpüla sümüin wayuu pümüin: «Tatüjaa aaʼu nnojoluin  pia sünainpünaain tü miʼiraakat. Akatsaʼa, tasülajeein pümüin tüü». Eesü süpüla paapaain shia sümaa nnojoluin sünainpünaain pia tia miʼiraakat. Akatsaʼa, nnojorüle natüjaain saaʼu tü punoujakalü anain, eesü süpüla püküjain namüin nnojoluin sünainpünaain pia tia miʼiraakat otta jamüin nnojotka püsülajüin kasa shiiʼiraka. Eeshii eeka nasülajüin pümüin süpüla nnojoluin paainjain tü punoujakalü anain. Müle shia eesü süpüla nnojoluin paapaain shia.

16. ¿Kasa paainjainjatka süpüla nnojoluin püʼülüjiraain namaa püpüshi sutuma tü miʼiraa naainjakat?

¹⁶ ¿Kaseerü paainjaka nnojorüle nanoujain pümaa püpüshi? Nnojo püʼülüjiraain namaa sutuma tü akuwaʼipaa otta tü miʼiraa naainjeekat. Kojutü pümüin nanüiki maʼaka kojuteein pünüiki namüin (paashajeʼera Mateo 7:12). Jülüja paaʼin tü paainjakat süpüla nnojoluin sünainpünaain pia tü miʼiraa naainjakat. Paainja waneepia tü kasa nnojotkat mojuin atuma paaʼin (paashajeʼera 1 Timoteo 1:18, 19).

17. ¿Kaseerü paainjaka süpüla nnojoluin mojuin naaʼin püchonnii sutuma nnojoluin sünainpünaain naya tü miʼiraa mojukat?

¹⁷ ¿Kaseerü paainjaka süpüla nnojoluin mojuin naaʼin püchonnii sutuma nnojoluin sünainpünaain naya tü miʼiraa mojukat? Paainja wainma kasa namaa. Eeshii eeka naneeküin kaʼi süpüla nasülajüin kasa namüin nachonnii. Tü asülajuushi anakat maʼin shia akatalaa kaʼi napüla otta alin naya apülaa.

18. ¿Kasa paainjainjatka süpüla suluʼuin pia tü iküleesia shiimainkat?

¹⁸ Süpüla talatüin Maleiwa putuma, piyoukta tü iküleesia nnojotkat shiimain otta suluʼu pia tü shiimainkat.  ¿Kasa paainjainjatka süpüla tia? Müsü tü Wiwüliakat: ‹Shia anaka jutkatiraale waya süpüla wachecherüin waaʼin sünain anoujaa süka sülüʼülüin nükalia chi Senyotkai› (Hebreokana 10:24, 25). Tü outkajawaakat süpülajatü aʼwaajaa Maleiwa maʼaka nücheküin shia (Hebreokana 2:12). Otta müsia ‹akaaliinjiraashii waya süpüla wachecherüin waaʼin sünain wanoula› (Roma 1:12).

19. ¿Jamüsü anaka püküjüle sümüin wayuu tü pikirajaakalü anain suluʼujee tü Wiwüliakat?

¹⁹ Tü wanee paainjainjatkat shia püküjüin süchiki tü pikirajaakalü anain suluʼujee tü Wiwüliakat. Wainma wayuu ‹mojuka maʼin aaʼin› sutuma tü kasa mojusü eekat mmapaʼa (2 Pedro 2:7, 8). Eesü piʼraajüle wayuu eeka mojuin maʼin naaʼin sutuma tia. Püküja namüin süchiki tü alatajatkat mapeena otta puutkajaa waneepia suluʼu tü iküleesia shiimainkat. Müle shia putuma, nnojoleerü paainjeein tü miʼiraa saainjakat tü iküleesia nnojotkat shiimain. Suluʼule pia tü iküleesia shiimainkat, talateerü maʼin paaʼin otta naapeerü Maleiwa pümüin wainma kasa anasü (Malaquías 3:10).