1, 2. Ɣef wacu ara tmeyyzeḍ mbeɛd mi d-​teffɣeḍ si ddin n lekdeb? Ɛlaḥsab-​ik, ayɣer i glaq aţ-​ţmeyyzeḍ akka?

XAYEL lukan a d-​terreḍ s lexbaṛ belli yella walbeɛḍ i gessefsden aman n lxezna n taddart mi gessenɣel s tuffra ssem ɣer daxel. Tagi d liḥala i gzemren a d-​tawi lemḍerra tameqrant. Acu ara txedmeḍ? Bla ccekk, aţ-​ţekkreḍ din din aţ-​ţqellbeḍ ɣef lɛinṣer anda i zeddigit waman. Lameɛna, ɣas txedmeḍ ayagi, ahat a k-​d-​yeqqim dima wugur w’a s-​teqqareḍ: ‘Ḥader kan amar swiɣ si ssem-​nni!’

² Tella liḥala yecban tagi deg wayen yeɛnan ddin n lekdeb. Adlis Iqedsen yesselmad belli leɛbada n lekdeb tefsed si lefɛayel n diri d uselmed ur neṣfi ara. (2 Ikurintiyen 6:17) Ɣef lǧal n wannect-​a i glaq a d-​teffɣeḍ si ‘Babil Tameqrant’, yeɛni ddyanat n lekdeb s lǧemla. (Aweḥḥi 18:2, 4) D ayen i txedmeḍ? Ma yella txedmeḍ akka, testahleḍ ccekṛan. Lameɛna, ma yella ţ-​ţuffɣa kan i d-​teffɣeḍ si ddin n lekdeb, drus. Ilaq-​ak mbeɛd aţ-​ţeţmeyyizeḍ w’a s-​teqqareḍ: ‘Ḥader kan amar yeqqim-​ed deg-​i lateṛ n leɛbada n lekdeb!’ Err lbal-​ik tura ɣer kra n lemtul.

3. a) Acu i d-​yeqqar Wedlis Iqedsen ɣef wayen yeɛnan asexdem n lmeṣnuɛat? Ayɣer i gewɛeṛ i kra n medden a ten-​ţwalin akken i ten-​iţwali Ṛebbi? b) Acu i glaq aţ-​ţxedmeḍ i leḥwayeǧ akk i tesɛiḍ i gcudden ɣer leɛbada n lekdeb?

³ Kra sɛan deg yexxamen-​nsen lmeṣnuɛat akk-​d leḥwayeǧ nniḍen swayes i ţţeɛbaden Ṛebbi seg wacḥal aya. Ahat tesɛiḍ ula d kečč leḥwayeǧ am tigi. Ihi, yezmer a k-​d-​iban belli diri aţ-​ţẓalleḍ i Ṛebbi bla ma tessexdmeḍ-​tent. Yezmer lḥal daɣen tḥemmleḍ kra si leḥwayeǧ-​agi. Lameɛna, d Ṛebbi kan ara d-​yinin amek i glaq a t-​neɛbed. Yerna, Adlis Iqedsen yesselmad belli Ṛebbi ur yebɣi ara a nessexdem lmeṣnuɛat. (Ɣer-​ed Tuffɣa 20:4, 5; Ahellil 115:4-8; Icɛaya 42:8; 1 Yuḥenna 5:21) Bac aţ-​ţedduḍ ihi si lǧiha n leɛbada n ṣṣeḥ, ilaq aţ-​ţemḥuḍ leḥwayeǧ akk i tesɛiḍ, i gcudden ɣer leɛbada n lekdeb. Ɣur Yahwa, leḥwayeǧ-​agi “d leḥṛam.” Ihi, akken yebɣu yili lḥal, nadi a tent-​teţwaliḍ akken i tent-​iţwali Yahwa.—Asmekti 27:15.

4. a) Amek i neẓra belli ulac nnfeɛ deg weɛbad n lejdud? b) Ayɣer i gḥeṛṛem Yahwa i wegdud-​is ayen akk icudden ɣer ssḥur?

⁴ Deg waṭas n ddyanat n lekdeb, llan wid yeţţeɛbaden  lejdud-​nsen yemmuten. Uqbel ad issinen kra n lɛibad tideţ yellan deg Wedlis Iqedsen, llan ţţamnen belli wid yemmuten ţkemmilen ţɛicen deg yiwen n wemḍiq ur d-​neţban ara. Ţţamnen daɣen belli lmeggtin-​agi zemren ad ɛiwnen wid yeddren neɣ a ten-​ḍurren. Ahat telliḍ teţɛeţţibeḍ iman-​ik akken aţ-​ţesseṛtiḥeḍ lejdud-​ik yemmuten. Acu kan, akken i t-​twalaḍ deg yixef wis 6, lmeggtin tekfa fell-​asen temɛict; dayen, ur d-​ţţarran ara s lexbaṛ. Ur teḥwaǧeḍ ara ihi aţ-​ţnadiḍ aţ-​ţhedṛeḍ yid-​sen. Lexbaṛ ara k-​d-​ibanen amzun yusa-​d sɣur walbeɛḍ i tḥemmleḍ i gemmuten, di tin n ṣṣeḥ yusa-​d sɣur leǧnun (ccwaṭen). Ɣef wayagi i gḥeṛṛem Yahwa i wat Isṛayil ad ɛerḍen ad hedṛen i lmeggtin neɣ ad xedmen ayen akk nniḍen icudden ɣer ssḥur.—Ɣer-​ed Asmekti 18:10-12.

5. Acu i tzemreḍ aţ-​ţxedmeḍ ma yella twulfeḍ tessexdameḍ lmeṣnuɛat neɣ teţţeɛbadeḍ lejdud?

⁵ Ma yella di ddin-​ik ssexdamen lmeṣnuɛat neɣ ţţeɛbaden lejdud, acu i tzemreḍ aţ-​ţxedmeḍ? Ɣer yerna meyyez ɣef yefyar yellan deg Wedlis Iqedsen i d-​iqqaren amek i geḥseb Ṛebbi leḥwayeǧ-​agi. Ţẓalla i Yahwa kul ass, theddṛeḍ-​as ɣef lebɣi i tebɣiḍ aţ-​ţedduḍ si lǧiha n leɛbada n ṣṣeḥ. Ḍleb-​as daɣen a k-​iɛiwen akken aţ-​ţeţxemmimeḍ am neţţa.—Icɛaya 55:9.

6, 7. a) D acu-​ţ lɛid iwumi qqaren Nuwal? Di lqern amenzu, llan ţɛeggiden-​ţ inelmaden n Ɛisa? b) Amek i ţwaḥesbent leɛyud n tlalit di lweqt n inelmaden imezwura n Ɛisa?

⁶ Ass-​a llan wid yeţţeɛbaden Ṛebbi s leɛyud yeţwassnen mliḥ di ddunit. Acu kan, aɛbad-​agi yezmer ad yili yessefsed-​it ddin n lekdeb. A d-​nebder lemtel n Nuwal. Lɛid-​agi teţwaxdem akken aţ-​ţili zzeɛma d asmekti n tlalit n Ɛisa Lmasiḥ, yerna amur ameqran n ddyanat i geqqaren ţ-​ţimasiḥiyin i llant xeddment-​eţ. Meɛna, ulac ţţbut ara d-​ibeyynen belli inelmaden n Ɛisa llan ţɛeggiden Nuwal di lqern amenzu. Teqqar-​ed yiwet n tektabt yuran s teglizit:  “Di sin leqrun i d-​itebɛen talalit n Lmasiḥ, ḥedd ur yeẓri swaswa melmi i d-​ilul, yerna drus n medden i gecɣeb wayagi.”

⁷ Di lqern amenzu, ɣas lukan di ɛlimen inelmaden n Ɛisa s wass ideg i d-​ilul, d lmuḥal ad ɛeggden ass n tlalit-​is. Acimi? Axaṭer, akken i t-​id-​yessefhem yiwen umawal (The World Book Encyclopedia), imasiḥiyen imezwura “ḥesben aɛegged n wass n tlalit d yiwet si leɛwayed n wid yeţţeɛbaden iṛebbiten.” Adlis Iqedsen ibder-​ed lɛid n tlalit (amulli) n sin kan n yemḍebbren ur nelli ara ţţeɛbaden Yahwa. (Laṣel n ddunit 40:20; Marqus 6:21) Zik, llan daɣen wid yeţɛeggiden talalit n iṛebbiten. Di lemtel, ass n 24 si maggu, Iṛumaniyen ţɛeggiden ass n tlalit n tṛebbiţ Dyana; azekka-​nni, d ass n uṛebbit-​nsen iṭij, yeţţusemman Abulu. Nezmer a d-​nini ihi belli leɛyud n tlalit kkant-​ed si ddyanat ideg i ţɛebbiden iṛebbiten, mačči si ddin amasiḥi.

8. Ssefhem-​ed lɛalaqa yellan ger wass n tlalit akk-​d lfal.

⁸ Tella ssebba nniḍen ɣef waydeg i nezmer a d-​nini belli imasiḥiyen n lqern amezwaru ur llin ara ţɛeggiden talalit n Ɛisa. Ad yili ẓran belli aɛegged n wass n tlalit yesɛa lɛalaqa akk-​d lfal (asfillet). Aṭas n Iyunaniyen akk-​d Iṛumaniyen i gellan ţţamnen belli kul m’ara d ilal wemdan, iḥeddeṛ yiwen n ṛṛuḥ, mbeɛd yeţḥarab fell-​as ayen akk ara yekk di ddunit-​is. Taktabt iţţusemman Leɛwayed n imulliyen (s teglizit) tenna-​d: “Ṛṛuḥ-​agi yesɛa lɛalaqa ur nban d acu-​ţ akk-​d yiwen uṛebbit. Lɛid n tlalit n uṛebbit-​agi tɣelli-​d deg wass n tlalit n wemdan-​nni.” Yahwa ur ifeṛṛeḥ ara s tmeɣra ara yesdukklen Ɛisa akk-​d lfal. (Icɛaya 65:11, 12) Amek ihi armi ţɛeggiden wannect-​a n lɛibad Nuwal?

9. Amek almi i geţwaḥseb wass n 25 bujambeṛ d ass n tlalit n Ɛisa?

⁹ Almi d asmi ɛeddan xilla n leqrun segmi i gɛac Ɛisa ɣef lqaɛa i bdan lɣaci ţɛeggiden talalit-​ines ass n 25 si bujambeṛ. Lameɛna, mačči ass-​nni i d-​ilul; akken i d-​iban, ilul-​ed di  ccheṛ n tubeṛ. * Ayɣer ihi i xtaṛen ass n 25 si bujambeṛ? Izmer lḥal, mi gɛedda lweqt, kra seg wid i d-​yeqqaren d imasiḥiyen i llan “bɣan a d-​yeṣbeḥ wass-​nni swaswa akk-​d lɛid i llan xeddmen-​ţ Iṛumaniyen, yeɛni lɛid n ‘tlalit n yiṭij ur neţwaɣleb.’” (The New Encyclopædia Britannica) Di ccetwa, ideg ulac aṭas n yiṭij, lɛibad yellan ţɛebbiden iṛebbiten, ssewǧaden-​d lficṭat (timeɣriwin) iwakken a d-​yeqqel zzeɛma yiṭij-​agi i gɣaben. Nwan-​as belli 25 si bujambeṛ d ass ideg i gbeddu yeţţuɣal-​ed. Lɛulama n ddin qeblen lɛid-​agi yerna xedmen ţţawil iwakken a ţ-​id-​sbeggnen amzun d lɛid n imasiḥiyen, bac a d-​awin ɣer ddin-​nsen wid yeţɛebbiden iṛebbiten. *

10. Ayɣer, zik, kra ur ţɛeggiden ara Nuwal?

¹⁰ Steɛṛfen medden si zik belli Nuwal yewwi-​d aẓar si ddyanat n wid iţţeɛbaden iṛebbiten. Imi ur d-​tekki ara lɛid-​agi seg Wedlis Iqedsen, di lqern wis 17 tella teţţuḥeṛṛem di tmurt n Legliz akk-​d kra n imeḍqan i testeɛmeṛ di Marikan. Kra n win ur nṛuḥ ara ɣer lxedma ass n Nuwal, bessif fell-​as ad ixelleṣ lexṭiyya. Acu kan, ur ɛeṭṭlent ara qqlent-​ed leɛwayed-​nni n zik, uyerna rnant-​ed ɣur-​sent tejdidin. Umbeɛd, Nuwal yuɣal d lɛid meqqren; ula d ass-​a akka i geţwaḥseb di geddac n tmura. Meɛna, imi i gcudd ɣer ddin n lekdeb, widak yebɣan ad ɛeǧben i Ṛebbi ur t-​ţɛeggiden ara; ur xeddmen  ula d yiwet si leɛyudat i d-​yewwin aẓar si ddyanat n wid iţţeɛbaden iṛebbiten. *

11. Iwacu i xeddmen kra leɛyudat, meɛna d acu i glaqen ad yili d anezgum-​nneɣ akk ameqran?

¹¹ Ass-​a, llan wid i gesteɛṛfen belli kra n leɛyudat, am tin n Nuwal, kkant-​ed si ddyanat ideg i ţɛebbiden iṛebbiten. Meɛna, ar ɣur-​sen, ulac deg-​s ma yella nɛegged-​itent. Qqaren-​as belli azgen ameqran seg wid ixeddmen leɛyud-​agi ur ţxemmimen ara ɣer leɛbada n lekdeb. Uyerna, leɛyud am tigi ţţakent tagniţ i iɛeggalen n twacult akken ad sseǧhden lɛalaqat-​nsen. D ayen i teţxemmimeḍ keččini? Ma d ayen i teţxemmimeḍ, bla ccekk, ţ-​ţawacult-​ik i tḥemmleḍ, mačči d ddin n lekdeb, daymi i k-​d-​iban iwɛeṛ aţ-​ţedduḍ si lǧiha n leɛbada n ṣṣeḥ. Ɣas tḥeqqeq belli Yahwa, i d-​ixelqen tawacult, yebɣa aţ-​ţiliḍ di lehna kečč d yeqriben-​ik. (Ifasusiyen 3:14, 15) Lameɛna, tzemreḍ aţ-​ţqerrbeḍ mliḥ ɣer twacult-​ik s ţţawilat i gɛeǧben i Ṛebbi. Amceggeɛ Bulus ihdeṛ-​ed ɣef wayen i glaqen ad yili d anezgum-​nneɣ akk ameqran, yenna-​d: “Muqlet ayen yeţţeɛǧaben Ssid.”—Ifasusiyen 5:10.

12. Ssefhem-​ed s yiwen n lemtel acuɣer ur ilaq ara a netbeɛ leɛwayed neɣ a nexdem leɛyudat i d-​yekkan seg wayen n diri.

¹² Ahat teqqareḍ-​as belli laṣel n leɛyudat-​agi ur icudd ara mliḥ ɣer wamek i tent-​ţɛeggiden ass-​a. Iwulem ihi a nẓer ansi i d-​kkant? Anɛam ih! A d-​nefk lemtel: lukan aţ-​ţwaliḍ taḥlawaţ deg ugudu, a ţ-​id-​tjemɛeḍ a ţ-​teččeḍ? Awwah xaṭi, temsex! Am teḥlawaţ-​agi, kra n leɛyudat zemrent a ɣ-​d-​banent amzun d lɛali-​tent, meɛna “ţwajemɛent-​ed” seg imukan ineǧsen (iɛefnen). Ma nebɣa a neddu si lǧiha n leɛbada n ṣṣeḥ, ilaq-​aɣ a neţxemmim akken yella yeţxemmim nnbi Icɛaya. Yenna i wid yeţţeɛbaden Ṛebbi s ṣṣeḥ: “Ur ţnalet acemma n wayen ineǧsen!”—Icɛaya 52:11.

13. Acu-​ten wuguren ara d-​temmagreḍ ahat m’ur tcurkeḍ ara di leɛyud?

¹³ Izmer lḥal a d-​temmagreḍ uguren ass ideg ara tqesdeḍ ur teţcarakeḍ ara di leɛyud. Wid ukud i txeddmeḍ ad nadin ahat ad fehmen ayɣer ur tţekkayeḍ ara yid-​sen di kra n leḥwayeǧ yeɛnan leɛyud-​agi. Acu ara txedmeḍ lukan a k-​d-​fken lehdeyya di Nuwal? D ayen n diri ma yella teṭṭfeḍ-​ţ? Ma yella tzewǧeḍ, acu ara txedmeḍ m’ur teɛdilem ara deg wayen is i teţţamnem? Acu i glaqen a t-​txedmeḍ iwakken ur ţḥussun ara warraw-​ik belli yella d acu i ten-​ixuṣṣen imi ur txeddmeḍ ara kra n leɛyud?

14, 15. Acu i tzemreḍ aţ-​ţxedmeḍ lukan a k-​d-​yesserbeḥ walbeɛḍ Nuwal neɣ lukan a k-​d-​teţţunefk lehdeyya?

¹⁴ Ilaq a nessexdem leɛqel-​nneɣ bac a nefhem amek i glaq aţ-​ţili tikli-​nneɣ di mkul liḥala. Ɣef lemtel, ma yenna-​yak-​d walbeɛḍ: ‘Mebṛuk Nuwal-​inek’, tzemreḍ kan a s-​tiniḍ ṣaḥḥit. Meɛna, lukan d albeɛḍ i tezgiḍ tẓerreḍ neɣ d win ukud i txeddmeḍ, yewwi-​d lḥal a s-​d-​tessefhmeḍ akteṛ. Di mkul liḥala, issin amek ara thedṛeḍ. Adlis Iqedsen yeţweṣṣi-​yaɣ, yeqqar-​aɣ-​d: “Sɛut awal aẓidan, imelḥen, iwakken aţ-​ţissinem amek ara teţţarram i mkul yiwen.” (Ikulusiyen 4:6) Ɣur-​ek kan aţ-​ţekkseḍ leqder ɣef wiyaḍ. Heddeṛ-​asen ɣef wayen is i teţţamneḍ s leḥder. Ssefham-​asen belli mačči ţ-​ţikciwin ur k-​neɛǧib ara neɣ d amlili ur tebɣiḍ ara aţ-​ţemlileḍ d wiyaḍ; ini-​yasen kan teţḥibbiḍ leḥwayeǧ-​agi di teswiɛin nniḍen.

¹⁵ Tura, lemmer ad yebɣu walbeɛḍ a k-​d-​yefk lehdeyya, acu ara txedmeḍ? Leǧwab i westeqsi-​yagi icudd mliḥ ɣer teswiɛt ideg ara k-​d-​teţţunefk. Xayel lukan a k-​d-​yini: “Ɛelmeɣ belli ur teţɛeggideḍ ara, meɛna bɣiɣ kan a k-​d-​fkeɣ lehdeyya.” Ahat a ţ-​teṭṭfeḍ, axaṭer ur k-​d-​iţban ara am wakken tcerkeḍ di lɛid-​agi. Ma yella d ḥedd ur neẓri ara ayen is i teţţamneḍ i k-​d-​ifkan lehdeyya, tzemreḍ a s-​tiniḍ belli ur txeddmeḍ ara lɛid-​agi. Akka aţ-​ţessiwḍeḍ a s-​tessefhmeḍ ayɣer i tqebleḍ tikci-​ines yerna ayɣer kečč ur s-​teţţakeḍ ara  lehdeyya deg wass-​nni. Lameɛna, ur yelhi ara aţ-​ţqebleḍ tikci sɣur walbeɛḍ i gebɣan a d-​ibeggen belli ur tţedduḍ ara ɛlaḥsab n wayen is i teţţamneḍ, neɣ i gebɣan a d-​ibeggen belli tzemreḍ aţ-​ţnekreḍ liman-​ik ɣef nnfeɛ-​ik.

16. Amek i glaq aţ-​ţili tikli-​inek deg wayen akk yeɛnan leɛyudat?

¹⁶ Acu ara txedmeḍ ma yella iɛeggalen n twacult-​ik ur ţţamnen ara am kečč? Akken i t-​nwala yakan, issin amek ara thedṛeḍ. Ur teḥwaǧeḍ ara aţ-​ţemjadaleḍ yid-​sen mkul m’ara tebɛen yiwet n lɛadda neɣ ara xedmen yiwet n lɛid. Akken i tebɣiḍ ad ţqadaren ixemmimen-​ik, ţqadar ula d kečč ixemmimen-​nsen. (Ɣer-​ed Matta 7:12.) Ur xeddem acemma swayes ara tcerkeḍ di lɛid-​agi; meɛna, sɛu lmizan iwakken aţ-​ţɛeqleḍ ayen i gcudden d wayen ur ncudd ara ɣur-​es. Ayen akk ara txedmeḍ, xdem-​it akken ara yeqqim lxaṭer-​ik dima yethedden.—Ɣer-​ed 1 Timutawus 1:18, 19.

17. Acu i tzemreḍ aţ-​ţxedmeḍ iwakken ur ţḥussun ara warraw-​ik belli ixuṣṣ-​iten kra m’ara ẓerren wiyaḍ ţɛeggiden kra n leɛyudat?

¹⁷ Acu i tzemreḍ aţ-​ţxedmeḍ iwakken ur ţḥussun ara warraw-​ik belli ixuṣṣ-​iten kra imi ur ţcaraken ara di leɛyud ur yeqbil ara Wedlis Iqedsen? Lfeṛḥ-​nsen icudd mliḥ ɣer wayen ara txeddmeḍ deg wussan nniḍen. Ɣef lemtel, kra n imawlan ţjaben-​d tiswiɛin anda i ţţaken lehdeyyat i dderya-​nsen. Lehdeyyat icebḥen akk i tzemreḍ a sen-​tefkeḍ d lweqt, ţ-​ţameẓẓuɣt akk-​d leḥmala.

18. Ma yella tḥeddṛeḍ i inejmuɛen imasiḥiyen, amek ara k-​iɛiwen waya aţ-​ţedduḍ si lǧiha n leɛbada n ṣṣeḥ?

¹⁸ Bac akken aţ-​ţɛeǧbeḍ i Ṛebbi, ilzem aţ-​ţexḍuḍ i leɛbada n lekdeb w’aţ-​ţedduḍ si lǧiha n leɛbada n ṣṣeḥ. Acu i d lmeɛna n waya? Yenna-​d Wedlis Iqedsen: “An-​neţţemḥadar ihi gar-​aneɣ, wa ad isseḥṛac wa ɣer leḥmala akw-​d lefɛayel  yelhan. Ur ilaq ara an-​nettixxeṛ seg unejmaɛ-​nneɣ, akken uɣen tannumi kra; lameɛna an-​nţemyenhu gar-​aneɣ, ladɣa mi teţwalim a d-​iţqerrib wass.” (Iɛebṛaniyen 10:24, 25) Inejmuɛen imasiḥiyen ţ-​ţiswiɛin ara k-​isemmḥen aţ-​ţɛebdeḍ Ṛebbi di lfeṛḥ yerna akken i s-​yeɛǧeb. (Ahellil 22:23; 122:1) Ţţaken daɣen tagniţ i imasiḥiyen unṣiḥen akken ad ‘ţţemseǧhaden wway gar-​asen.’—Iṛumaniyen 1:12.

19. Acimi i glaq aţ-​ţheddṛeḍ i wid i k-​d-​yezzin ɣef wayen i d-​tlemmdeḍ deg Wedlis Iqedsen?

¹⁹ Bac a d-​tbeggneḍ diɣen belli teddiḍ si lǧiha n leɛbada n ṣṣeḥ, ţmeslay i wid i k-​d-​yezzin ɣef wayen i d-​tlemmdeḍ di leqraya-​inek n Wedlis Iqedsen akk-​d Inagan n Yahwa. Aṭas n lɣaci i d-​iggaren nnhati yerna ţnazaɛen imi teɛmeṛ ddunit-​agi d cceṛ. Izmer lḥal tessneḍ kra si lɣaci-​yagi. Acu ara tiniḍ lukan a sen-​thedṛeḍ ɣef usirem i tufiḍ deg Wedlis Iqedsen? Simmal teţɛacaṛeḍ imasiḥiyen n ṣṣeḥ yerna teţmeslayeḍ ɣef tideţ yetɛeddan i d-​tlemmdeḍ, simmal tbeqquḍ aţ-​ţexḍuḍ i leɛwayed n leɛbada n lekdeb i d-​mazal ahat deg wul-​ik. Ɣas tḥeqqeq belli, ma yella teddiḍ si lǧiha n leɛbada n ṣṣeḥ, aţ-​ţfeṛḥeḍ nezzeh yerna aţ-​ţeţţubarkeḍ ayendin.—Malaxi 3:10.