1, 2. Паши һиштьна һʹәбандьна нәрʹаст, тӧ гәрәке чь пьрсе бьди хԝә у бь тʹәхмина тә чьрʹа фәрз ә кӧ әве пьрсе бьди хԝә?

БЬДӘ һʹәсабе хԝә, кӧ кәсәк дьзикава жәʹр кьрийә канийа ава тә. У ньһа гәлә хоф ә тӧ әве аве вәхԝи. Тӧйе чь бьки? Һьлбәт тӧйе дәстпеки бьгәри канийа авейә тʹәмьз. Ле дьбәк жи паши ԝе йәке тӧйе пьрсе бьди хԝә: ‹Дьбәк ида жәʹр гьһиштийә мьн у әз ида нәхԝәш кʹәтьм ә?›

² Әве йәке әм дькарьн дәрһәԛа һʹәбандьна нәрʹаст жи бежьн. Дь Кʹьтеба Пирозда те готьне кӧ һʹәбандьна нәрʹаст бь һинкьрьн у әʹйд-ԛәйдед нә тʹәмьз һатийә ләвьтандьне (2 Корьнтʹи 6:17). Аһан чьрʹа ӧса фәрз ә, ԝәки әм жь «Бабилона Мәзьн», кӧ һәйә тʹәшкиләта һʹәму һʹәбандьнед нәрʹаст, дәрен (Әʹйанти 18:2, 4). Ле тә ида әв йәк кьрийә? Һәрге бәле, гәлә баш ә, тӧ һежайи пәсьна. Ле сәва кӧ тӧ жь һʹәбандьна нәрʹаст дәреий, лазьм ә һе зедә тьшт бьки. Фәрз ә ԝәки тӧ дьшьрмиш би: ‹Гәло әз жь ԝан һʹәму тьшта чь кӧ бь һʹәбандьна нәрʹаства гьредайи йә, аза бумә?› Ԝәрә әм бьньһерʹьн чәнд мәсәла.

3. (а) Чь дьбежә Кʹьтеба Пироз дәрһәԛа хәбьтандьна шькьла, у чьрʹа сәва һьнәка чәтьн ә әве һинкьрьне ԛәбул кьн? (б) Чь тӧ гәрәке бьки тʹәви ԝан һʹәму тьшта, йед кӧ һʹәбандьна ԛәлпва гьредайи нә?

³ Гәләк мәрьв бь гәләк сала дь малед хԝәда хԝәй дькьн тьштед сәва һʹәбандьне. Мәсәлә һьнәк шькьла хԝәй дькьн, һьнәк жи тьштед зийарәтийә майин, у бәр ван тьшта сәре хԝә датиньн. Һьнәк жи тʹалисма хԝәва дькьн, ԝәки чʹәʹв ԝан нәкʹәвьн. Дьбәк әԝана ван тьшта ида гәләки ԛимәт дькьн. Ле бь рʹастийе тʹәне Хԝәде дькарә сафи кә, кӧ ча мәрьв гәрәке ԝи бьһʹәбинә. Кʹьтеба Пироз дьбежә кӧ Хԝәде нахԝазә ԝәки ԝи бь сайа шькьла бьһʹәбиньн (Бьхунә Дәркʹәтьн 20:4, 5; Зәбур 115:4-8; Ишайа 42:8; 1 Йуһʹәнна 5:21). Ләма жи һәрге тӧ дьхԝази хԝә ль һʹәбандьна рʹаст бьгьри, тӧ гәрәке әԝ һʹәму тьштед кӧ һʹәбандьна ԛәлпва гьредайи нә, кʹӧта ки. Әм гәрәке ль сәр ван тьшта ӧса бьньһерʹьн ча Йаһоԝа дьньһерʹә. Йаһоԝа ван тьшта һʹәрам һʹәсаб дькә (Ԛануна Дӧщари 27:15).

4, 5. (а) Жь кʹӧ әм заньн кӧ нәрʹаст ә мьрийа бьһʹәбиньн? (б) Чьрʹа Йаһоԝа изьн нәдьда щьмәʹта Исраели, ԝәки әԝана бьщерʹьбиньн тʹәви мьрийа хәбәр дьн?

⁴ Мәрийед жь гәләк религийа мьрийа дьһʹәбиньн. Һьнәк мәрьв пешийа кӧ дәстпекьрана һин буна Кʹьтеба Пироз,  баԝәр дькьрьн кӧ мьри дьжин у дькарьн йан кʹаре, йане жи зийане бьдьнә мәрийа. Дьбәк тӧ жи гәләк щәфа дькʹьшини, ԝәки мьрийед хԝә рʹази ки. Чахе кәсәки мә дьмьрә, тʹәбийәти йә кӧ әм шина ԝи бькьн у бона ԝи бьгьрин. Мәсәлә, чахе жьна Бьраһим пʹехәмбәр, Сәра мьр, «Бьраһим һат сәр Сәрайе гьрийа у шина ԝе кьр» (Дәстпебун 23:1, 2, ПКʹМ). Чахе Аԛуб пʹехәмбәр мьр, кӧрʹе ԝи Усьв «әʹмьр ль хӧламед хԝәйә һʹәким кьрьн, кӧ баве ԝи зьмьр кьн» у гьшк «һʹәфте рʹожи шина ԝи кьрьн». «Тʹәмамийа мала Усьв у бьрайед ԝи» дьхԝәстьн кӧ Аԛуб бь ԛәдьр бе дәфьн кьрьне, әԝана һаԛас гьрийан у кьрьн ԛарʹә-ԛарʹ, ԝәки һәла һе хәлԛед дор-бәр жи дәрһәԛа шина Аԛуб пеһʹәсийан (Дәстпебун 50:1-11, ПКʹМ). Ӧса жи, бәре мәри паши дәфьнкьрьне жи дьчунә ль сәр мәзәл у шина мьрийед хԝә дькьрьн (Йуһʹәнна 11:31).

⁵ Ча те кʹьфше, дь ван йәкада тьштәки хьраб тʹӧнә кӧ әм шина мьрийед хԝә бькьн, бь ԛәдьр дәфьн кьн у паши дәфьнкьрьне жи бенә ль сәр мәзәл. Ле дь сәре 6-да әм ӧса жи пеһʹәсийан, ԝәки чахе мәрьв дьмьрә, әԝ ида нажи. Ләма набә кӧ әм тʹәви мьрийа хәбәр дьн у әԝ мә бьбьһен. Дьбәк жи тӧ ньһа дьшьрмиш дьби: «Ле ԝәки ӧса нә, әв әʹламәти кӧ мә тʹьре жь мьрийед мә нә, жь ки нә?» Бь рʹастийе әв әʹламәти жь щьна тен. Ләма Йаһоԝа изьн нәдьда щьмәʹта Исраели, ԝәки әԝана бьщерʹьбиньн тʹәви мьрийа хәбәр дьн, у гьредана тʹәви щьна тʹӧ щурʹәйи изьн тʹӧнә бу. (Бьхунә Ԛануна Дӧщари 18:10-12.)

6. Һәрге тә тʹьме бь шькьла Хԝәде дьһʹәбанд, йан жи тә тʹьме мьри дьһʹәбандьн, ньһа чь тӧ гәрәке бьки?

⁶ Ле һәрге тә тʹьме бь шькьла Хԝәде дьһʹәбанд, йан жи тә тʹьме мьри дьһʹәбандьн, ньһа чь тӧ гәрәке бьки? Бьхунә у дьшьрмиш бә дәрһәԛа ԝан һинкьрьнед Кʹьтеба Пироз, йед кӧ нишан дькьн ԝәки Хԝәде ча дьньһерʹә ль сәр ван тьшта. Һәр рʹож дӧа бькә Йаһоԝа Хԝәдерʹа у дәрһәԛа хԝәстьна хԝәйә ль сәр алийе һʹәбандьна рʹаст бьсәкьни, ԝирʹа бежә. Дь дӧакьрьнеда ӧса жи жь Хԝәде бьхԝазә, ԝәки әԝ али тә бькә тӧ бькарьби ль сәр тьшта ӧса бьньһерʹи, ча әԝ дьньһерʹә (Ишайа 55:9).

7-9. (а) Жь кʹидәре тен әʹйда Сәре Сале у Нәԝроз? (б) Чьрʹа ԛӧльхкʹаред Йаһоԝа Хԝәде гәрәке тʹәви ԝан әʹйд-ԛәйда нибьн, йед кӧ тʹәви әʹйда Сәре Сале у Нәԝрозе гьредайи йә?

⁷ Һьнәк мәри бьһаре әʹйда Сәре Сале дәрбаз дькьн. Ԝи чахи щьмәʹт тʹоп дьбьн у дәстпека Сала Тʹәзә кʹьфш дькьн. Ле зани әв әʹйд жь кʹидәре те? Зандар әве йәке бь щурʹә-щурʹә шьровәдькьн. Мәсәлә кʹьтеба: «Езди-Дине ԝан, у Мьләт» ӧса дьбежә: «Ча мифоложийа Ездийа дьбежә, рʹожа әʹйда Сәре Сале хԝәдан жь әʹзмана пәйа дьбьн ль сәр әʹрде. Ԝе еваре Хԝәде рʹудьне сәр тʹәхте хԝә, дор-бәре ԝи хԝәданед дьн (мьлйакʹәт) дьсәкьньн, ԝәки шьхӧлед тʹәви әʹрде гьредайи сафи кьн . . . у ԝи чахи әԝана сафи дькьн кӧ дь сала тʹәзәда, бәхте мәрийа ԝе чаԝа бә». Паше дь ве кʹьтебеда те шьровәкьрьне һьнә ԛәйдед дәрбазкьрьна ве әʹйде, у хьлазийе ӧса те ньвисар: «Ԛәйдед дәрбазкьрьна әʹйда Сәре Сале мина йе әʹйда Сала Тʹәзә нә, йед кӧ дь Бабилона бәреда дьһатә дәрбазкьрьне».

⁸ Әʹйда Нәԝроз жи йед кӧ дь гәләк ԝәлатада те дәрбазкьрьн, мина әʹйда Сәре Сале йә. Ле гәло Нәԝроз жь кʹидәре һатийә? Дь кʹьтеба «Леколинкьрьна Әʹйд-Ԛәйдед Фарьса» рʹупʹела 217-да ӧса те готьне: «Мәсәла лапә бәре, бона дәрбазкьрьна Сала Тʹәзә, дь Азийайә Рʹоавада һатийә дитьне у әв әʹйд гьредайи буйә тʹәви малбәта пʹадшайе пешьн дь шәһәре Урда. Ԝәʹде ве әʹйде дәʹԝата хԝәдане аве у бәрдарийе дәрбаз дьбу . . . әв әйд паше бь Бабилонийа һатә хԝәйкьрьне». Һьнә Антрополог баԝәр дькьн, кӧ әʹйда Нәԝроз сәре-серида әʹйда щоткʹарийе бу. Дь ве кʹьтебеда те готьне, кӧ әв әʹйд «гьредайи йә тʹәви ‹мьрьна› хԝәдане Шумерийа Думуз [йан Тамуз]. Әв хԝәдан һәр хьлазийа сале дьһатә кӧштьне, у дәстпека саледа дьһатә сахкьрьне. Сахбуна ԝи, йан чь, дьбу мәʹни кӧ һʹәму тьшт шин бә, ләма мәрьв ша дьбун у әʹйд дькьрьн».

⁹ Ле чь әм дькарьн бежьн дәрһәԛа чекьрьна Клочʹ, ԝәʹде әʹйда Сәре Сале? Ча кʹьтеба «Езди-Дине ԝан, у Мьләт» дьбежә әва ԛәйда һане «һатә зедәкьрьне религийа Ездийада бь һʹӧкӧма мьләтед дьн. . . . Мәсәлә дьбәк жи жь  мьләте Щьһу, йед кӧ ԝәʹде щәжьна дәрбазбуне, демәк щәжьна Нане Шкәва, нане пироз чедькьрьн . . . йан дьбәк жи жь щәжьна Нане Шкәва, йа мәсиһийа һатә һьлдане, ԝәʹде кʹижани тотька чедькьн». Фьрԛи тʹӧнә мәʹни чь бу кӧ мәрийа әʹйда Сәре Сале у Нәԝроз дькьрьн, сәва мә әʹйан ә кӧ ԛәйдед дәрбазкьрьна ԝан әʹйда гьредайи нә тʹәви религийед ԛәлп, у тʹәви һинкьрьна нәрʹаст дәрһәԛа әʹмьре паши мьрьне. Ләма жи пьрс пешда те: ‹Изьн ә ԝәки ԛӧльхкʹаред Хԝәде Йаһоԝа тʹәви ԝан әʹйд-ԛәйда бьн?›

10. (а) Шагьртед Исайә бәре, ча дьньһерʹин ль сәр әʹйда рʹожа буйине? (б) Шьровәкә, чьда әʹйда рʹожа буйине тʹәви баԝәрийед нәрʹаст гьредайи йә.

¹⁰ Ле ча Йаһоԝа дьньһерʹә ль сәр әʹйда рʹожа буйине? «Әнсиклопедийа Кʹьтеба Дьнйайе» дьбежә, кӧ мәсиһийед бәре «әʹйда рʹожа буйина кәсәки дьданә һʹәсабе ча әʹйда пʹутпʹарьста». Дь Кʹьтеба Пирозда дәрһәԛа әʹйда рʹожа буйине, тʹәне дӧ щара һатийә ньвисаре у һәр дӧ жи рʹожа буйина ԝан пʹадша бу, йед кӧ Йаһоԝа Хԝәдерʹа ԛӧльх нәдькьрьн (Дәстпебун 40:20; Марԛос 6:21). Әʹйда рʹожа буйине ӧса жи гьредайи йә тʹәви һӧрмәткьрьна хԝәданед пʹутпʹарьста. Мәсәлә, 24 мәһа Гӧлане мьләте Рʹомайи әʹйда рʹожа буйина хԝәдане Диана дәрбаз дькьрьн. Рʹожа дьне жи, ԝана әʹйда рʹожа буйина Аполло дәрбаз дькьрьн, йе кӧ хԝәдане тәʹве дьһатә һʹәсабе. Әʹйда рʹожа буйине ӧса жи гьредайи йә тʹәви баԝәрийа нәрʹаст. Мәсәлә, Рʹомайед у Йунанийед бәре баԝәр дькьрьн кӧ ԝәʹде буйина һәр мәрики рʹӧһʹәк те, ԝәки нава тʹәмамийа әʹмьре ԝи ле хԝәй кә. Дь кʹьтебәкеда, йе кӧ дәрһәԛа әʹйда рʹожа буйине дьбежә, һатийә ньвисаре кӧ «әв рʹӧһʹ гьредайи йә тʹәви хԝәданәки, йе кӧ рʹожа буйина ԝи мәрьви һатийә буйине» («Тһе Lorе of  Birthdays»). Йаһоԝа тʹӧ щар ԝе ԛәбул нәкә ԝан ԛәйда, йед кӧ тʹәви баԝәрийа нәрʹаст гьредайи нә (Ишайа 65:11, 12). *

11. Чьрʹа һьнә мәрьв әʹйда дәрбаз дькьн, ле чь сәва мә гәрәке һе фәрз бә?

¹¹ Һьнә мәрьв ԛайил дьбьн кӧ әʹйда Клочʹа Сәре Сале у Нәԝроз жь религийед ԛәлп тен, ле йәкә бәрдәԝам дькьн ԝан әʹйда бькьн. Әԝана дина хԝә надьнә ԝе йәке, кӧ гәләк әʹйд у щәжьн тʹәви религийед ԛәлп гьредайи нә. Әʹйд у щәжьн сәва ԝан мәщаләкә баш ә, ԝәки тʹәви нәфәред мале у бьра-пьсмама тʹоп бьн. Тӧ жи ӧса дьшьрмиш дьби? Һәрге бәле, демәк нә кӧ һʹьзкьрьн һьмбәри религийа ԛәлп рʹийа тә дьгьрә, ԝәки тӧ ль сәр рʹийа рʹаст бьсәкьни, ле һʹьзкьрьн һьндава малбәта тә. Ле баԝәр кә ԝәки Хԝәдайе кӧ малбәт саз кьрийә, дьхԝазә ԝәки ортʹа тә у нәферед мала тә баш бә (Әфәси 3:14, 15). Бь рʹастийе тӧ дькари һәләԛәтийа хԝә тʹәви малбәта хԝә жи ԛәԝи ки, у мьԛабьли ԛанунед Хԝәде жи дәрнәкʹәви. Паԝлосе шанди гот, кӧ әм тʹьме гәрәке дьшьрмиш бьн, ԝәки «бьзаньбьн кӧ чь ль Хӧдан хԝәш те» (Әфәси 5:10).

12. Бь мәсәлә нишан кә кӧ чьрʹа әм гәрәке жь ԝан әʹйд-ԛәйда хԝә дур бьгьрьн, йед кӧ жь нәтʹәмьзайийе дәркʹәтьн ә?

¹² Дьбәк тӧ дьшьрмиш дьби кӧ рʹожа иройин әʹйда бь щурʹәки майин дәрбаз дькьн у мәʹна ван әʹйда ӧса нинә ча бәре. Ле гәло фәрз ә бьзаньбьн кӧ әв әʹйд жь кʹӧ тен? Бәле фәрз ә! Ԝәрә әм мәсәләке биньн. Бьдә һʹәсабе хԝә ԝәки тә дәрва ава гәнида ширьнайик дит. Тәйе әв ширьнайи һьлда у бьхԝара? Фәʹмдари йә на, чьмки әв ширьнайи ԛьрʹеж ә. Әве йәке әм дькарьн бәрамбәри әʹйда бькьн. Мина ве ширьнайийе әԝана дькарьн сәва мә һәԝԝас у хԝәш бенә кʹьфше, ле бь рʹастийе әв әʹйд жь нәтʹәмьзайе дәркʹәтьн ә. Һәрге әм дьхԝазьн хԝә ль һʹәбандьна рʹаст бьгьрьн, ньһерʹандьна мә гәрәке мина ньһерʹандьна Ишайа пʹехәмбәр бә, йе кӧ ԛӧльхкʹаред Хԝәдейи рʹастрʹа гот: «Ль тьштед һʹәрам нәкʹәвьн» (2 Корьнтʹи 6:17; Ишайа 52:11).

13. Һәрге тә сафи кьр кӧ әʹйд-ԛәйда дәрбаз нәки, жь бо ве йәке тӧ рʹасти кʹижан чәтьнайийа дькари бейи?

¹³ Әԝ йәк кӧ тӧ әʹйда дәрбаз наки, дькарә сәва тә бьбә щерʹьбандьн. Мәсәлә, бьра-пьсмамед тә дькарьн әʹщебмайи бьминьн кӧ чьрʹа тӧ тʹәви ԝана әʹйда дәрбаз наки. Йан жи кәсәк дькарә хера мьрийа бинә мала тә. Ԝи чахи тӧйе чь бьки? Гәло ԝе рʹаст бә әве хере һьлди? Ле те чь бьки һәрге мере тә, йан жьна тә ӧса Хԝәде наһʹәбинә ча тӧ дьһʹәбини? Ча тӧ дькари али зарʹед хԝә бьки, ԝәки әԝана дьшьрмиш нәбьн кӧ тьштәк жь ԝана кем дьбә рʹийе ве йәкеда, кӧ тӧ ван әʹйд-ԛәйда дәрбаз наки?

14, 15. Тӧ чь гәрәке бьки һәрге кәсәк жь бо щәжьне тә бьмбарәк дькә, йан жи пʹешкʹешәке дьдә тә?

¹⁴ Лазьм ә әм дь һʹәму дәрәщада сәрԝахт у маԛул бьн. Һәрге ньшкева кәсәк жь бо щәжьне тә бьмбарәк дькә у ԛәнщийе тәрʹа дьхԝазә, тӧ дькари тʹәне рʹазибуна хԝә жерʹа әʹлам ки. Ле һәрге мәрикә кӧ тәрʹа рʹьнд нас ә, йан жи һәвале тәйә ль сәр хәбате, тә бьмбарәк дькә, дь ве дәрәщеда дьбәк тӧ сафи ки һьнәк зедә тьшт әʹлами ԝи ки. Чь жи һәбә, дь һʹәму дәрәщада фәсал у маԛул бә. Кʹьтеба Пироз ширәт дькә: «Бьра хәбәрдана ԝә мәʹрифәти у хԝекьри бә у бьзаньбьн кӧ чаԝа щайиз ә щаба һәр кәси бьдьн» (Колоси 4:6). Фәсал бә ԝәки тʹәви мәрийа бе ԛәдьр ниби. Дәԝсе бь маԛултийе дәрһәԛа ньһерʹандьна хԝә ԝанарʹа шьровәкә. У зәлал кә, ԝәки тӧ мьԛабьли ԝе йәке нини кӧ ԛәдьре мьрийа бьгьрьн, йан жи тʹәви мәрьвед хԝәйә незик тʹоп бьн, ле тә сафи кьрийә әве йәке дь ԝәʹдәки дьнда бьки.

¹⁵ Ле тӧ чь дькари бьки һәрге кәсәк дьхԝазә жь бо әʹйдәке пʹешкʹешәке бьдә тә? Дь ве пьрседа гәләк тьшт дәрәщева гьредайи йә. Әԝ, кʹи кӧ тәрʹа пʹешкʹеше дьдә дькарә ӧса бежә: «Әз заньм ԝәки тӧ әʹйда рʹожа буйине дәрбаз наки. Әз тʹәне дьхԝазьм ԝәки әве пʹешкʹеше һьлди . Дьбә тӧ сафи ки кӧ һәрге әве пʹешкʹеше һьлди әв ԝе нәйе һʹәсабе кӧ тӧ әʹйде дәрбаз дьки. Ле һәрге әԝ мәри дәрһәԛа ньһерʹандьна тә ньзанә, тӧ дькари бежи кӧ әве әʹйде дәрбаз наки. Әв йәк ԝе али тә бькә мәрийарʹа шьровәки кӧ чьрʹа тӧ жи пʹешкʹеша  нади ԝан. Алийе дьнва жи ԝе бь аԛлайи бә, кӧ әве пʹешкʹеше һьлнәди һәрге зани, ԝәки әв мәри әве пʹешкʹеше дьдә сәва кӧ избат кә, ԝәки тӧ һьндава баԝәрийа хԝә амьн нини, йан жи кʹара хԝә дьгәрʹи.

16. Ча тӧ дькари шәһрәзә би, чахе пьрс әʹйд-ԛәйдава тʹәв гьредай ә?

¹⁶ Ле тӧ чь гәрәке бьки һәрге һʹәбандьна нәфәред малбәта тә у йа тә нә йәкә? Һьндава малбәта хԝә жи шәһрәза бә. Нә лазьм ә ԝәки тӧ сәва һәр әʹйд-ԛәʹйдәке тʹәви нәфәред мала хԝә шәрʹ бьки. Чьмки изьна ԝан һәйә бь щурʹе хԝә дьшьрмиш бьн у сафи кьн. Һәрге дьхԝази ԝәки нәфәред мала тә ԛәдьре изьна тәйә сафикьрьне бьгьрьн, тӧ жи гәрәке ԛәдьре изьна ԝанә сафикьрьне бьгьри. (Бьхунә Мәтта 7:12.) Хԝә жь ԝан һʹәму тьшта дур бьгьрә, чь кӧ дькарә тә текә нава шьхӧлед әʹйд-ԛәйдед религийава гьредайи. Ле сәрԝахт бә чахе пьрс дәрһәԛа тьштед ӧса ньн кӧ әʹйд-ԛәйдед религийава гьредайи ниньн. Бәле, тӧ гәрәке тʹьме ӧса бьки ԝәки исафа тә тʹәмьз бьминә. (Бьхунә 1 Тимотʹейо 1:18, 19.)

17. Ча тӧ дькари али зарʹед хԝә бьки, ԝәки чахе әԝана дьбиньн кӧ дор-бәред ԝан әʹйд-ԛәйда дәрбаз дькьн, жь бо ве йәке дьшьрмиш нәбьн кӧ тьштәк жь ԝана кем дьбә?

¹⁷ Чь тӧ дькари бьки, ԝәки зарʹед тә дьшьрмиш нәбьн кӧ тьштәк щәм ԝан кем ә рʹийе ве йәкеда, ԝәки ван әʹйд-ԛәйда дәрбаз накьн, йед кӧ нә ль сәр һʹиме Кʹьтеба Пироз ьн? Гәлә тьшт гьредайи йә тʹәви ве йәке, һәла ԝәʹде дьн нава сале тӧ чь бона ԝан дьки. Һьнә де-бав сафи дькьн ԝәки ԝәʹдәки дьн пʹешкʹеша бьдьнә зарʹед хԝә. Ле пʹешкʹешәкә лапә баш йа кӧ тӧ дькари зарʹед хԝәрʹа бьди, әв һәйә гӧһдайин у ԝәʹде тә.

18. Ча щьватед мәсиһийа дькарьн али тә бькьн, кӧ хԝә ль һʹәбандьна рʹаст бьгьри?

¹⁸ Сәва кӧ дьле Хԝәде ша бьки, лазьм ә ԝәки тӧ жь һʹәбандьна нәрʹаст дәркʹәви у бьсәкьни ль алийе һʹәбандьна рʹаст. Әв чь те һʹәсабе? Дь Кʹьтеба Пирозда ньвисар ә: «Бьра әм бона һәвдӧ хәм бькьн, ԝәки һʹзкьрьне у ԛәнщикьрьнеда  һелана бьдьнә һәв. Бьра әм дәст жь ль һәвщьвине нәкʹьшиньн, чаԝа кӧ һьнәка хԝәрʹа кьрийә хәйсәт, ле әм дьл бьдьнә һәв у һе зедә, чьмки әм дьбиньн кӧ Рʹожа Ахрәте незик дьбә» (Ибрани 10:24, 25). Щьватед мәсиһийа мәщаләкә баш дьдьн, кӧ бькарьби ӧса Хԝәдерʹа ԛӧльх ки чаԝа әԝ ԛәбул дькә (Зәбур 22:22; 122:1). Ль сәр ван щьвата, мәсиһийед рʹаст дьл дьдьнә «бәр һәв» (Рʹомайи 1:12).

19. Чьрʹа ӧса фәрз ә кӧ хәбәрди тʹәви мәрийа дәрһәԛа ве йәке, чь кӧ тӧ жь Кʹьтеба Пироз пеһʹәсийайи?

¹⁹ Хԝә ль һʹәбандьна рʹаст бьгьри, әв ӧса жи те һʹәсабе ԝәки хәбәр ди тʹәви мәрийа дәрһәԛа ԝе йәке, чь кӧ тӧ пеһʹәсийайи жь һинбуна Кʹьтеба Пироз тʹәви Шәʹдед Йаһоԝа. Иро һʹәчʹи зәʹф жь мәрийа «дьнальн», чахе дьбиньн кӧ дьнйайеда чьԛас зӧлми һәйә (Һәзәԛел 9:4). Дьбә тӧ жи мәрьвед ӧса нас дьки. Хәбәр дә тʹәви ԝан мәрийа дәрһәԛа ахьрикә баш, йе кӧ Кʹьтеба Пироз соз дьдә. Һәрге тӧ тʹәви мәсиһийед рʹаст незик би у мәрийарʹа гьли ки дәрһәԛа рʹастийа һʹәԝас жь Кʹьтеба Пироз, тӧйе бьбини ԝәки һеди-һеди жь ԝан әʹйд-ԛәйдед нәрʹаст дур дькʹәви, йед кӧ дьле тәда мабун. Баԝәр кә һәрге тӧ хԝә ль һʹәбандьна рʹаст бьгьри, тӧйе бь рʹастийе жи бәхтәԝар би у гәлә кʹәрәма бьстини (Малахи 3:10).