1, 2. Us kwɛstyɔn yu fɔ aks yusɛf we yu dɔn kɔmɔt insay lay lay rilijɔn? Wetin mek dat impɔtant?

WETIN yu go du if yu kam no se pɔsin dɔn put pɔyzin pan di wata we una de yuz na una eria, ɛn sɔm pipul dɛn dɔn bigin fɔ sik? Yu nɔ go fɛn ɔdasay fɔ gɛt klin wata? Bɔt afta dat sɛf, yu go stil de wɔnda if di pɔyzin dɔn du ɛnitin to yu.

² Na di sem tin bɔt lay lay rilijɔn. Di Baybul se di tin dɛn we dɛn biliv ɛn we dɛn de du, dɔn dɔti di we aw dɛn de wɔship Gɔd. (Sɛkɛn Lɛta To Kɔrint 6:​17) Na dat mek i fayn fɔ mek yu kɔmɔt kwik kwik wan insay lay lay rilijɔn. (Rɛvɛleshɔn 18:​2, 4) Yu dɔn du dat? If yu dɔn du dat, yu dɔn rili tray. Bɔt nɔto fɔ jɔs kɔmɔt na lay lay rilijɔn ɔ rayt lɛta to dɛn se yu nɔ de de igen. Ivin we yu dɔn kɔmɔt de, yu fɔ aks yusɛf se, ‘A stil gɛt ɛnitin ɔ de du ɛnitin we de insay lay lay rilijɔn?’ Lɛ wi tɔk bɔt sɔm ɛgzampul dɛn.

3. (a) Wetin di Baybul tɔk bɔt krɔs ɛn dɛn ɔda tin dɛn we pipul dɛn de yuz fɔ wɔship Gɔd? Wetin mek i nɔ kin izi fɔ sɔm pipul dɛn fɔ du wetin Gɔd se? (b) Wetin yu fɔ du if yu gɛt ɛnitin we dɛn de yuz na lay lay rilijɔn?

³ Sɔm pipul dɛn dɔn gɛt krɔs, Meri in pikchɔ ɔ ɔda tin dɛn na dɛn os fɔ lɔng tɛm. Yu gɛt dɛn kayn tin dɛn de na yu os? If yu gɛt dɛn, sɔntɛm yu go de fil se yu nɔ go ebul fɔ pre to Gɔd if yu nɔ yuz dɛn tin dɛn de. Sɔntɛm, yu go lɛk sɔm pan dɛn tin ya. Bɔt na Gɔd fɔ sho wi aw fɔ wɔship am, ɛn di Baybul se i nɔ want mek wi yuz tin dɛn lɛk krɔs fɔ wɔship am. (Rid Ɛksodɔs 20:​4, 5; Sam 115:​4-8; Ayzaya 42:​8; Jɔn In Fɔs Lɛta 5:​21) So yu go sho se yu rɛdi fɔ wɔship Gɔd di rayt we, we yu pwɛl ɔl di tin dɛn we yu gɛt ɛn we yu bin de yuz insay lay lay rilijɔn. Jiova et dɛn tin dɛn de bad bad wan. So yusɛf fɔ et dɛn.—Ditarɔnɔmi 27:​15.

4. (a) Aw wi no se na fɔ natin pipul dɛn kin wɔship di wan dɛn we dɔn day? (b) Wetin mek Jiova bin se mek di Izrɛlayt dɛn nɔ put an pan juju biznɛs?

⁴ Wan ɔda tin we bɔku insay lay lay rilijɔn na di wɔship  we dɛn de wɔship di wan dɛn we dɔn day. Bifo sɔm pipul dɛn lan di tru tin we de na di Baybul, dɛn bin biliv se di wan dɛn we dɔn day, de liv na ɔda wɔl ɛn dɛn ebul fɔ ɛp ɔ du bad to di wan dɛn we gɛt layf. Sɔntɛm yusɛf bin biliv dat ɛn bin de du bɔku tin fɔ mek yu fambul we dɔn day, nɔ vɛks pan yu. Bɔt insay Chapta 6, wi bin lan se we pɔsin dɔn day, i nɔ no natin ɛn i nɔ de go liv ɔdasay. So, na fɔ natin pipul dɛn kin tray fɔ tɔk to di wan dɛn we dɔn day. Ɛni mɛsej we dɛn se yu fambul we dɔn day sɛn to yu, nɔto yu fambul sɛn am, bɔt na di dɛbul dɛn sɛn am. Na dat mek Jiova bin se mek di Izrɛlayt dɛn nɔ tray fɔ tɔk to di wan dɛn we dɔn day ɔ fɔ put an pan ɛnitin we na juju biznɛs.—Rid Ditarɔnɔmi 18:​10-12.

5. Wetin yu fɔ du, if yu bin de yuz krɔs, Meri in pikchɔ ɔ ɔda tin dɛn fɔ wɔship Gɔd, ɔ if yu bin de wɔship di wan dɛn we dɔn day?

⁵ Wetin yu fɔ du, if yu bin de yuz krɔs, Meri in pikchɔ ɔ ɔda tin dɛn fɔ wɔship Gɔd, ɔ if yu bin de wɔship di wan dɛn we dɔn day? Na fɔ rid ɛn tink gud gud wan bɔt di skripchɔ dɛn we sho aw Gɔd de si dɛn tin dɛn de. Go de pre to Jiova ɛvride. Tɛl am se yu want fɔ wɔship am di rayt we ɛn beg am lɛ i ɛp yu fɔ tink di we aw i de tink.—Ayzaya 55:​9.

6, 7. (a) Wetin mek pipul dɛn kin sɛlibret Krismas? Krismas na tin we di apɔsul dɛn ɛn di ɔda Kristian dɛn bin de sɛlibret? (b) Uskayn pipul dɛn bin de mek batde di tɛm we di apɔsul dɛn ɛn di ɔda Kristian dɛn bin de?

⁶ Lay lay rilijɔn go dɔti di wɔship we pɔsin de wɔship Gɔd bikɔs di wan dɛn we de de, de put an pan ɔlide dɛn we plɛnti pipul dɛn de du tide. Lɛ wi tɔk bɔt wan ɛgzampul we na Krismas. Pipul dɛn se dɛn de sɛlibret Krismas fɔ mɛmba di de we Jizɔs Krays bɔn. Plɛnti pan di pipul dɛn we se dɛn na Kristian, de sɛlibret Krismas. Bɔt natin nɔ de we de sho se di  apɔsul dɛn ɛn di ɔda Kristian dɛn bin de sɛlibret dis ɔlide. Dɛn rayt na wan buk we dɛn kɔl Sacred Origins of Profound Things se: “Fɔ tu ɔndrɛd ia afta dɛn bɔn Krays, nɔbɔdi nɔ bin no di rayt tɛm we i bɔn, ɛn na wan wan pipul dɛn bin want fɔ no.”

⁷ Ilɛksɛf Jizɔs in disaypul dɛn bin no di rayt tɛm we dɛn bɔn Jizɔs, dɛn nɔ bin fɔ stil sɛlibret in batde. Wetin mek wi se so? Na bikɔs wan ɔda buk we dɛn kɔl The World Book Encyclopedia bin se, di apɔsul dɛn ɛn di ɔda Kristian dɛn “bin fil se fɔ mek pɔsin in batde na tin we pegan dɛn de du.” Na tu batde nɔmɔ di Baybul tɔk bɔt. Dɛn batde ya na bɔt tu kiŋ dɛn we nɔ bin de wɔship Jiova. (Jɛnɛsis 40:​20; Mak 6:​21) Apat frɔm dat, pipul dɛn bin de mek batde fɔ wɔship lay lay gɔd dɛn. Fɔ ɛgzampul, insay Me 24 ɛvri ia, di pipul dɛn na Rom bin de mek batde fɔ wan pan dɛn gɔd dɛn we nem Dayana. Di nɛks de, dɛn bin de mek batde bak fɔ wan ɔda gɔd we dɛn kɔl Apolo. So, nɔto Kristian dɛn bin de mek batde. Na pegan dɛn bin de mek am.

8. Wetin mek batde na lay lay tichin we Setan de mek pipul dɛn biliv?

⁸ Ɔda tin bin de we mek di apɔsul dɛn ɛn di ɔda Kristian dɛn nɔ bin de mek Jizɔs in batde. I go bi se, dɛn bin no se batde na lay lay tichin we Setan de mek pipul dɛn biliv. Fɔ ɛgzampul, di pipul dɛn trade trade we bin de na Gris ɛn Rom bin biliv se wan spirit kin de we dɛn de bɔn pɔsin, ɛn da spirit de kin mek shɔ se bad nɔ mit di pɔsin te i day. Wan buk we dɛn kɔl The Lore of Birthdays bin tɔk se “dis spirit bin gɛt majik biznɛs wit di gɔd we bin bɔn di sem de we dɛn bɔn di pɔsin.” Jiova nɔ go gladi if pɔsin tek sɔntin we pipul dɛn we nɔ de sav am de du, ɛn se na fɔ Jizɔs i de du am. (Ayzaya 65:​11, 12, NW) So usay Krismas kɔmɔt?

9. Wetin mek pipul dɛn bigin sɛlibret Jizɔs in batde insay Disɛmba 25?

⁹ We Jizɔs day, i tek lɛk 300 ia so, bifo pipul dɛn bigin mek in batde. Dɛn kin mek in batde insay Disɛmba 25. Bɔt nɔtɔ da de de dɛn bɔn Jizɔs. * So, wetin mek pipul dɛn pik Disɛmba 25? Sɔm pipul dɛn we se dɛn na Kristian “bin want lɛ di de [fɔ Jizɔs in batde], bi di sem de we di pipul dɛn na Rom bin de gɛt wan ɔlide” fɔ sɛlibret di san in batde. Dɛn biliv se di san na gɔd. (The New Encyclopædia Britannica) Insay wan sizin na dɛn ovasi kɔntri, di ples kin kol pasmak ɛn di san nɔ kin shayn bɛtɛ. Di pegan pipul dɛn bin biliv se di san kin go patrol. So dɛn kin mek pati so dat di ples go bigin wam, ɛn di san go bigin shayn bak. Dɛn biliv se na Disɛmba 25 di san kin bigin fɔ kam bak. So, fɔ mek dɛn pipul ya bi Kristian, di bigman dɛn pan Gɔd biznɛs tek dis ɔlide ɛn tray fɔ mek am lɛk se na “Kristian” ɔlide. *

10. Trade trade, wetin mek sɔm pipul dɛn nɔ bin de sɛlibret Krismas?

¹⁰ I dɔn te we pipul dɛn no se Krismas na ɔlide we kɔmɔt insay lay lay rilijɔn. Trade trade, dɛn bin put lɔ na Ingland ɛn na sɔm pat dɛn na Amɛrika se nɔbɔdi nɔ fɔ sɛlibret Krismas, bikɔs na tin we nɔ de insay di Baybul. Dɛn bin ivin de mek pɔsin pe  mɔni ɔ pɔnish ɛnibɔdi we sidɔm na os ɛn nɔ go wok Krismas de. Bɔt i nɔ te, pipul dɛn kam bak wit dis ɔlide ɛn ɔda nyu wan dɛn. So, pipul dɛn na plɛnti say dɛn na di wɔl bigin sɛlibret Krismas bak. Bɔt bikɔs Krismas kɔmɔt na lay lay rilijɔn, ɛnibɔdi we want fɔ du wetin Gɔd want, nɔ fɔ sɛlibret Krismas ɔ ɛni ɔda ɔlide we kɔmɔt na lay lay rilijɔn. *

11. Wetin mek sɔm pipul dɛn de sɛlibret ɔlide dɛn? Wetin fɔ bi di men tin we wi fɔ du?

¹¹ Pan ɔl we sɔm pipul dɛn biliv se Krismas ɛn ɔda ɔlide dɛn kɔmɔt na lay lay rilijɔn, dɛn stil tink se i nɔ bad fɔ sɛlibret dɛn. Infakt, bɔku pipul dɛn nɔ kin tink bɔt lay lay rilijɔn we dɛn kin sɛlibret ɔlide dɛn. Dɛn ɔlide ya kin mek famili dɛn ebul fɔ kam togɛda. Na so yusɛf kin fil? If na so, i go bi se yu de sɛlibret di ɔlide bikɔs yu lɛk yu fambul dɛn. Ɛn dis kin mek i nɔ izi fɔ mek yu sho se yu rɛdi fɔ wɔship Gɔd di rayt we; i nɔ min se yu lɛk lay lay rilijɔn. Bɔt na fɔ no se Jiova want mek yu de togɛda wit yu fambul dɛn. Ɛn yu kin stil ebul fɔ du dat di we aw i want. Di apɔsul Pɔl sho wi wetin na di men tin we wi fɔ du. I se: “Una tray fɔ lan wetin di Masta want una fɔ du.”—Lɛta Fɔ Ɛfisɔs 5:​10.

12. Gi ɛgzampul fɔ sho wetin mek wi fɔ lɛf ɔlide ɛn ɔda tin dɛn we nɔ kɔmɔt na di Baybul.

¹² Pɔsin go tink se di say we di ɔlide dɛn kɔmɔt nɔ gɛt natin fɔ du wit di we aw dɛn de sɛlibret dɛn naw. Yu tink se di say we ɔlide dɛn kɔmɔt, impɔtant? Yɛs, i impɔtant! Fɔ ɛgzampul, if pɔsin si lɔlipɔp insay gɔta, yu tink se i go tek am ɛn it am? Nɔ, i nɔ go du dat bikɔs di lɔlipɔp dɔti. Ɔlide dɛn tan lɛk da lɔlipɔp. I kin tan lɛk se dɛn fayn, bɔt di say we dɛn kɔmɔt, dɔti. Fɔ sho se wi rɛdi fɔ wɔship Gɔd di rayt  we, wi fɔ du wetin di apɔsul Pɔl bin tɛl in kɔmpin Kristian dɛn. I bin se: “Una nɔ fɔ gɛt natin fɔ du wit ɛnitin we nɔ klin.”—Sɛkɛn Lɛta Fɔ Kɔrint 6:​17.

13. Wetin mek i nɔ kin izi fɔ de wit pipul dɛn we de sɛlibret ɔlide dɛn we yu nɔ de put an pan?

¹³ I nɔ kin izi fɔ de wit pipul dɛn we de sɛlibret ɔlide dɛn we yu nɔ de put an pan. Fɔ ɛgzampul, yu wokmet dɛn go want fɔ no wetin mek yu nɔ kin jɔyn dɛn pan ɔlide dɛn. Wetin yu go du if dɛn gi yu Krismas gift? Yu tink se i bad fɔ tek am? Wetin yu go du if yu ɛn di pɔsin we yu mared nɔ de wɔship Gɔd togɛda? Wetin yu go du fɔ mek yu pikin dɛn nɔ fil se dɛn nɔ de ɛnjɔy we dɛn nɔ de sɛlibret ɔlide dɛn?

14, 15. Wetin yu go du if pɔsin grit yu di we aw dɛn kin grit insay ɔlide tɛm? Wetin yu go du if pɔsin want fɔ gi yu gift insay ɔlide tɛm?

¹⁴ Yu fɔ tink gud so dat yu go no wetin fɔ du bifo di tin apin. If dɛn grit yu lɛk aw dɛn kin grit insay ɔlide tɛm, na fɔ jɔs tɛl di pɔsin tɛnki. Bɔt if na pɔsin we yu de si ɔ wok wit ɔltɛm, yu gɛt fɔ tɛl am mɔ. Bɔt i fayn fɔ tek tɛm we yu de tɔk to di pɔsin. Di Baybul tɛl wi se: “Wɛn una de tɔk wit pipul, una fɔ tɛl dɛn tin we go mek dɛn gladi fɔ yɛri wetin una de tɔk ɛn we go mek dɛn want fɔ yɛri mɔ, ɛn una fɔ no aw fɔ ansa ɔlman.” (Lɛta Fɔ Kɔlɔse 4:​6) Mek shɔ se yu nɔ tɔk bad to ɔda pipul dɛn. Na fɔ tek tɛm ɛksplen to dɛn wetin yu biliv. Mek dɛn no klia wan se yu kin gi gift to pɔsin ɛn yu kin go pan pati, bɔt nɔto ɔlide tɛm yu kin du dɛn tin ya.

¹⁵ Wetin yu go du if pɔsin want fɔ gi yu gift? Na fɔ tink bɔt wetin mek di pɔsin want fɔ gi yu di gift. Sɔntɛm di pɔsin go se: “A no se yu nɔ de sɛlibret di ɔlide, bɔt a jɔs want fɔ gi yu dis gift.” Na yu fɔ disayd, if yu go tek di gift ɔ yu nɔ go tek am. Ɛn i lɛf to yu fɔ no, if dat go min se yu dɔn jɔyn dɛn fɔ sɛlibret di ɔlide ɔ yu nɔ jɔyn dɛn. Bɔt if di pɔsin nɔ no wetin yu biliv, na fɔ tɛl am se yu nɔ de sɛlibret di ɔlide. Dis go mek di pɔsin no wetin mek yu de tek di gift, bɔt yu  nɔ de gi am gift da tɛm de. Bɔt i nɔ go fayn fɔ tek ɛni gift if di pɔsin we de gi yu am de tray fɔ tɛst yu, fɔ no if yu de du wetin yu biliv.

16. Wetin yu go du fɔ mek yu fambul dɛn nɔ vɛks pan yu we yu nɔ de sɛlibret di ɔlide dɛn?

¹⁶ Aw yu go tɔk to yu fambul dɛn we nɔ biliv wetin yu biliv? I fayn fɔ mek yu tek tɛm tɔk to dɛn. Bɔt nɔtɔ ɛni af tin we dɛn put an pan, yu fɔ tɔk bad bɔt. Na fɔ no se dɛnsɛf gɛt rayt fɔ disayd wetin dɛn want fɔ du. So, na fɔ rɛspɛkt dat, lɛk aw yusɛf want mek dɛn rɛspɛkt wetin yu biliv. (Rid Matyu 7:​12.) Nɔ du ɛnitin we go mek yu put an pan di ɔlide dɛn. Bɔt stil, yu nɔ go se yu nɔ de put an pan ɔda tin dɛn we nɔ de pan di ɔlide. I fayn mek yu du wetin rayt ɔltɛm.—Rid Fɔs Lɛta To Timoti 1:​18, 19.

17. Wetin yu fɔ du fɔ yu pikin dɛn so dat dɛn nɔ go fil bad we dɛn nɔ de sɛlibret di ɔlide dɛn?

¹⁷ If yu na pɔsin we gɛt pikin, wetin yu fɔ du so dat yu pikin dɛn nɔ go fil bad we dɛn nɔ de sɛlibret ɛni ɔlide we nɔ de na di Baybul? Ɔda tɛm dɛn insay di ia, i fayn fɔ mek yu go de du fayn fayn tin dɛn fɔ yu pikin dɛn, so dat dɛn nɔ go fil bad we dɛn nɔ de sɛlibret di ɔlide dɛn. Sɔm mama ɛn papa dɛn kin fɛn tɛm we dɛn kin gi gift to dɛn pikin dɛn. Wan pan di bɛst gift we yu go gi yu pikin, na fɔ spɛn tɛm wit am ɛn sho am se yu lɛk am.

18. Aw di mitin dɛn go ɛp yu fɔ wɔship Gɔd di rayt we?

¹⁸ Fɔ mek Gɔd gladi fɔ yu, na fɔ pul an pan ɛnitin we de insay lay lay rilijɔn, ɛn sho se yu rɛdi fɔ wɔship Gɔd di rayt we. Aw yu go ebul du dis? Di Baybul se: “Una lɛ wi tink aw wi go ɛp wisɛf mek wi go lɛk wi kɔmpin dɛn ɛn du gud to dɛn. Una lɛ wi nɔ tap fɔ de mit, lɛ wi nɔ fala dɛn pipul  we nɔ de gri fɔ go mitin. Bɔt una lɛ wi de kɔrej wi kɔmpin dɛn, mɔ igen we wi no se di De we wi Masta go kam bak de kam jisnɔ.” (Di Ibru Pipul Dɛn 10:​24, 25) We yu jɔyn Gɔd in pipul dɛn na dɛn mitin dɛn, go ɛp yu fɔ wɔship Gɔd di rayt we. (Sam 22:​22; 122:​1) Insay dɛn mitin ya, Kristian dɛn kin ɛp dɛn kɔmpin dɛn fɔ kam nia Gɔd.—Lɛta Fɔ Rom 1:​12.

19. Wetin mek i fayn fɔ tɔk to ɔda pipul dɛn bɔt di tin dɛn we yu de lan na di Baybul?

¹⁹ Di ɔda we aw yu go sho se yu rɛdi fɔ wɔship Gɔd di rayt we, na we yu de tɛl ɔda pipul dɛn bɔt wetin yu dɔn lan na di Baybul. Bɔku pipul dɛn de we de blo kan dɔŋ ɛn pini fɔseka ɔl dɛn bad bad tin we de apin na di wɔl. Sɔntɛm yu no pipul dɛn we de fil da sem we de. Na fɔ tɛl dɛn bɔt di fayn fayn tin dɛn we yu dɔn lan na di Baybul se go apin tumara bambay. Di mɔ we yu de jɔyn Gɔd in pipul dɛn fɔ wɔship am ɛn tɛl ɔda pipul dɛn bɔt di fayn fayn tin dɛn we yu de lan, na di mɔ yu go si se smɔl smɔl yu go de pul an pan ɛnitin we de insay lay lay rilijɔn. Yu go gladi ɛn yu go gɛt bɔku blɛsin we yu wɔship Gɔd di rayt we.—Malakay 3:​10.