1, 2. Rilidian kuninkira wina dakwi takisi, dia ba aman luki kaikaia sma, bara dia muni baha ra lukaia sma ki?

NAHA RA luki kais: Pangkisma liwahntika ra upla kum mita puisin mangkan, bara taunkam uplika ailal ba puisin alkan sturka walma kaka, dia daukma ki? Rayakam ba pât ra dimaia sip sa. Rait apia plis wala ra pangkaia wama? Sakuna, baku daukma sin, diara kum lika luki kama: “Yang ra sin puisin ai alkan ki?”.

² Baibil wi ba kat, rilidian kuninkira laka ra sim baku takisa, kan smalkanka bara lukanka taski ni bangkisa wisa (2 Korint 6:17). Baha mita, “Babilun Tara ba” wina, —wibia sa kaka, rilidian kuninkira ba wina— dakwi takaia ba pulaia dukya apia sa (Param marikan [Reveleshan] 18:2, 4). Man pat dakwi takram ki? Pat dakwi takram kaka, uba lilia mai kaikisa. Wauhtaya kum dingki, rilidian kuninkira wina dakwi takisma ulbi wiaia ba pain sa, sakuna kau daukaia sa. Man selp mamkabi wals: “Rilidian kuninkira smalkanka yuika kum rayaki ra takaskan sa ki?”. Kaisa naha laka ra tanka kum kum laki kaikaia.

3. a) Aidul yus munaia dukyara Baibil ba dia smalkisa ki, bara Gâd mita aidul mapara dia luki ba, dia muni upla kum kum ba alki brih daukras sa ki? b)Mayunra kuninkira dukya kum brisma kaka, dia daukaia sma ki?

³ Upla kum kum aihwa wina ai watla bilara altar kum, apia kaka aidul nani brisa. Bara man, brisma ki? Brisma kaka, ban kra baha dukya nani apu Gâd ra mayunaia ba man aihka kaikisma. Sip sa kra, baha dukya nani man latwan sin kaikisma. Ban sakuna, Gâd bui witin ra nahki mayunaia ba wan smalkisa. Bara Baibil bila, Gâd want apia sa yawan aidul yus munbia (Impakan sturka 20:4, 5; Lawana 115:4-8; Aiseya 42:8; 1 Jan 5:21). Baku bamna, mayunra rait aihwa ba ta baikaia dukyara, mayunra kuninkira dukya nani brisma ba sut sauhki tikaia sma. Tanka ba sika, Jehova naha dukya nani ra saura kaiki ba baku yawan sin “saura” kaikaia sa (Kli smalkan 27:15).

4. a) Dia muni wan damika pruan nani ra mayunaia ba bahki man sa? b)Jehova mita dia muni Israel uplika nani ra sukia laka warkka daukbia apia win?

⁴ Rilidian kuninkira daukanka wala kum ba sika, wan  damika prahki nani ra mayunaia. Baibil tanka kasak ba lan takras kainara, upla kum kum mapara, pruan nani ba upla sip kaikras pliska kum ra iwi, raya nani ra help munaia, apia kaka saura munaia sip sa luki kan. Ban kra man sin, uplikam pruan help munaia trai kaiki kapram. Sakuna saptika 6 ra lan takram baku, pruan nani ba plis kumira sin raya kapras. Baha mita, witin nani wal aisaia trai kaikaia ba, bahki man sa. Pruan kum mai aisisa baku walma kaka, lasa nani mita daukisa. Baha taka, Jehova mita Israel uplika nani ra, pruan nani wal aisaia trai kaikaia, apia kaka sukia laka warkka daukbia apia sin win (Kli smalkan 18:10-12).

5. Aidul yus munaia bara wan damika prahki nani ra mayunaia lan kapram kaka, dia daukaia sma ki?

⁵ Wi kapram rilidianka ra, aidul yus munaia, bara wan damika prahki nani ra mayunaia lan mai daukan kaka, dia daukaia sma ki? Baha daukanka nani ba mapara Gâd dia lukisa sapa, Baibil ra turbi aman laki kais. Yu bani Jehova ra puram suni, mayunra rait aihwa ra kaia want sma ba wis, bara witin luki ba baku man sin lukaia want sma ba makas (Aiseya 55:9).

6, 7. a) Diaura ai kupia kraukaia wisi Krismis dauki ba, bara pas kristianka nani ba Krismis kulki kan sapa sin tanka aisas. b)Jisas disaipelka pas nani pyua ra, upla kum kum diaura kulkaia wisi aisubanka yua liliaka dauki kan ki?

⁶ Liliaka yua kum kum upla kulki ba yawan sin kulkbia kaka, rilidian kuninkira wal aiblakwaia sip sa. Naha tanka ra, Krismis ra luki kais: Kristian sa wi rilidianka aihkika nani ba, Krismis kulkisa, bara Jisas Kraist ba Krismis ra aisubi takan wisa. Ban sakuna, Jisas disaipelka pas nani ba, Krismis kulki kan ba dukyara, ulbi swin tanka kumi sin apu sa. Buk kum nina Los orígenes sagrados de las cosas profundas ba, naku wisa: “Jisas aisubi takan wina, mani 200 luan ningkara, witin ani yua pali ra aisubi takan sapa upla kumi sin nu apu kan, bara nu takaia sin plikras kan”.

 ⁷ Bara ani yua pali ra Jisas aisuban ba nu takan kata sin, disaipelka nani ba mita ai aisubanka yua ba kulkras kaia kan. Dia muni? Kan The World Book Encyclopedia ra wi ba baku, pas kristianka nani ba “naha liliaka nani ra [...], idan liliaka kum baku kulkan”. Bara Baibil ra aisubanka yua liliaka wal baman dukyara aisi ba idan uplika mita daukan (Blasi sturka 40:20; Mark 6:21). Naha sat liliaka nani ba, idan gâdka nani kulkaia dukyara sin dauki kan. Naha tanka ra, Lih Mairin [mayo] katka yua 24 ra, Rom uplika ba mita, Diana gâdka mairin aisubanka yua ba kulki kan. Bara yua 25 ra, Lapta gâdka Apolo makan aisubanka yua ba sin kulki kan. Baku bamna, aisubanka yua nani kulkaia ba, kristian uplika wina balras, idan gâdka nani ra mayunra yaban ba wina balisa.

8. Aisubanka yua liliaka ba, wihki isingni nani ra sibriaia laka wal, dia prakanka bri ba tanka mariks.

⁸ Sakuna, pas kristianka nani ba, diara wala tawan sin Jisas aisubanka yua ba kulkaia apia kan. Witin nani nu kan kaia sa, aisubanka yua kulkaia ba, isingni nani ra sibriaia laka wina bal takan. Naha tanka ra, patitara Grîk bara Rom uplika lukanka ra, upla bani aisubi kan yua ba wina ai rayaka aiskara kat sin spirit kum uplika ra main kaiki bri kan luki kan. The Lore of Birthdays [Aisubanka yua nani daukanka] bukka ba naku wisa: “Upla aisubi kan yua ra ani gâdka mani alki kan ba, spiritka na asla, wal kumi baku praki kaiki kan”. Jisas ra isingni kum wal praki kaiki liliaka kum kulkaia ba, Jehova laik kaikbia lukisma? Apia pali! (Aiseya 65:11, 12.) Naha sut laki kaikisi, diakan upla ailal Krismis ba kulkisa ki?

9. Jisas aisubanka yua kulkaia wisi, dia muni diciembre katka yua 25 ba saki brin?

⁹ Jisas tasba ra balan wina mani 300 pura luan ningkara, ai aisubanka yua ba kulkaia wisi, Trisu [diciembre] katka  yua 25 ba saki brin. Sakuna, Jisas ba diciembre katka ra aisubi takras kan, * Waupasa [octubre] katka ra lika aisubi takan talia sa. Baku bamna, dia muni diciembre katka yua 25 ba saki brin? Kaikbia sa kaka, Enciclopedia de la Religión Católica wi ba baku, kristian sa wi kan uplika mita “idan liliaka yua nani wihki kristian liliaka yua nani wal kumi blakaia want kan. Kan Rom kuntrika ra, idan nani mita diciembre katka yua 25 ba ra ‘Lapta ra sip pura luras’ aisubanka yua ba kulki kan”. Bara li pyua ra, Lapta karnika ba mayara alahwan taim, idan nani mita Lapta ba plis laiura wina bal, bitni bara ingni yabia wisi liliaka yua nani dauki kan. Witin nani sinska ra diciembre katka yua 25 ba, Lapta ba taui bali kan luki kan. Idan nani ba kristian laka ra taubia wisi, rilidian ta uplika nani bui idan liliaka na alki “kristian” liliaka kum baku sakan. *

10. Dia muni pyu luan uplika kum kum ba Krismis kulkras kan ki?

¹⁰ Krismis ba idan wina bal takan ba dukyara aihwa wina kakaira sa. Baibil lâka kat apia ba mita, 1600 manka lamara, Inglan bara Miriki tasbaia pliska kum kum nani ra sin, Krismis kulkaia adar apu kan. Krismis liliaka daukaia wisi, ya ai watla ra takaski kan ba, mana kum aibapaia kan. Ban sakuna, pyu kunhku bilara, kanra nahki dauki kan ba baku kli dauki kan, bara  daukanka wala nani sin pura prakan. Krismis ba kli liliaka tara kum takan, bara ban naiwa pyua kat sin kulki bangwisa. Sakuna ya Gâd kupia laka daukaia want ba, Krismis bara ani liliaka idan mayunra wina bal taki ba sin kulkaia apia sa, kan rilidian kuninkira wina aula. *

11. Dia muni upla kum kum ba liliaka nani kulkisa sapa, bara dia dukya yawan kau tara kulkaia ba tanka sin mariks.

¹¹ Upla kum kum ba, Krismis bara liliaka wala nani sin idan wina bal takan ba nu sa, sakuna diara saura kum baku lika kulkras. Witin nani bila, upla aihkika ba liliaka kum dauki pyua ra, mayunra kuninkira ra lika lukras wisa. Bara baku sin, pamali sut ba asla takaia pyua kum sa wisa. Man sin baku lukisma ki? Baku sa kaka, pamalikam ra latwan kaikisma ba mita, mayunra rait aihwa ra dutki bapi bui kaia karna mai munisa. Rilidian kuninkira latwanka mita lika apia sa. Baku bamna, diara kum lika pain nu bas, Jehova Gâd want sa tamya nani aikuki asla kupia kumi laka ra iwma, kan witin pamali ba paskan (Epesus 3:14, 15). Sakuna, Gâd kupia laka kat dauki tamya aikuki kupia kumi laka ra iwaia sin sip sma. Yawan dia dukya kau tara kulkaia sa ki? Apastil Pâl ba naku win: “Trai kais, Dawan dia brin dauki ba lan takaia” (Epesus 5:10).

12. Liliaka nani plis saura kum wina bal takan, yawan tnayara tauaia sa marikaia dukyara, dia wal praki kaikaia sip sa ki?

¹² Ban kra man wima patitara pyua liliaka nani ba, naiwa pyua ra liliaka dauki ba wal, sim lukanka ni daukras sa. Baha liliaka nani ani wina bal takan sapa, yawan lukaia nit sa ki? Misar lukaia sa! Kumpiti kum taski ra kauhwan kaka, wahbi dama ki? Apia pali! Kan taski sa. Baha kumpitika ba baku, liliaka kum kum nani ba painkira baku kaikisa, sakuna plis taski kum wina bal takan sa. Mayunra  rait aihwa ra yawan dutki bapi bui kaia want sa kaka, prapit Aiseya baku lukaia sa. Witin mita, Gâd ra kasak kat mayuni kan uplika nani ra ‘diara taski ba kangbia apia’ win (Aiseya 52:11).

13. Liliaka nani daukras sma ba mita, dia trabilka nani mampara buaia sip sa?

¹³ Liliaka kum kum nani swima taim, ban kra trabil luma. Naha ra luki kais: Wark pamnika nani mita, dia muni man liliaka nani ra dimras mai walbia kaka, dia daukma ki? Bara Krismis prisantka kum maikbia kaka? Brima ba, saura kabia ki? Bara maîam ba, Baibil lukanka kat wapras sa kaka? Baku sin, man baha liliaka nani daukras sma ba mita, luhpiam nani saura ai dara walbia apia dukyara, dia daukaia sma ki?

14, 15. Upla kum “Krismis lilia lus” mai wibia, apia kaka prisant kum maikaia want sa kaka, man dia daukaia sma ki?

¹⁴ Baha kumi bani mapara tanka kat daukaia dukyara, sinska yamni nit sma. Upla kum lamkula wisi “Krismis lilia lus” mai wibia kaka, man pana “Tingki” wiaia sip sma. Sakuna, pat pat kaikisma uplika kum, wark pamnika kum sapa “Krismis lilia lus” mai wibia kaka, ban kra tanka ba kau param smalkaia sma. Nahki kabia kra sin aman kaiki aisas. Baibil bila: “Sturi nani aisisma ba sut sin pain bara auhni kabia, bara kaiki bangwi kaia sma, dia upla ra pana aisaia sma ba” (Kolosi 4:6). Lukankam ba upla kupia sauhkraskira tanka wal aisas. Bara yu wala ra lika prisant yabaia, bara upla wal lilia takaia ba saura kaikras sma ba param wis.

¹⁵ Bara upla kum mita prisant kum maikaia want sa kaka? Baku taim lika, dia lukanka ni prisantka maiki ba laki kaikaia sma. Ban kra nan mai wibia: “Yang nu sna man naha liliaka na kulkras sma ba, ban sakuna, prisantka na maikaia want sna”. Baha lukanka ni maikisa kaka, man liliaka ra dimras sma luki prisantka brima kaia sa. Sakuna, upla kum man Baibil lâka kat dia lukisma ba nu apu sa  kaka, man baha liliaka ba kulkras sma wiaia sip sma. Baku lika, dia muni man prisantka brih muni pana wala yabras sma ba ai tanka bribia. Sakuna upla wala mita prisantka kum briaia dukyara Gâd lâka krikaia wilin sma wisi, apia kaka Gâd lâka alki brih daukras sma damhra sakaia wisi, prisantka kum maikbia kaka, man prisantka ba brima apia bitar sa.

16. Upla ai liliaka nani dauki taim, nahki aman kaiki aisi daukaia sip sma ki?

¹⁶ Bara tamya nani ba, Baibil lukanka kat wapras kaka? Kli aman kaiki aisi daukaia sma. Witin nani liliaka kum daukaia want sa kaka, pana man blahwaia nit apia sma. Lukankam rispik munbia want sma kaka, upla lukanka rispik muni bas (Matyu 7:12). Sakuna, liliaka ra mai blakaia sip dukya nani lika man daukpara. Ban sakuna, diara kum liliaka ra mai blaki baku apia sa kaka, kupia kumi laka ra bas. Nahki kabia sin, man kupiam dara walanka yamni kum bri kama kat dauks (1 Timoti 1:18, 19).

17. Luhpiam nani, upla wala liliaka nani dauki ba kaiki saura ai dara walbia apia dukyara, man dia daukaia sma ki?

¹⁷ Gâd lâka mapara liliaka nani daukras sma ba mita, luhpiam nani saura ai dara walbia apia dukyara, man dia daukaia sma ki? Luhpiam nani wal mani bilara dia daukaisma ba luki kaikaia sma. Aisa yapti kum kum ba, ai luhpia nani ra prisantka yabaia dukyara pyua wala kum plikisa. Prisantka kau tara ba sika, ai luhpia nani ra latwan laka mariki witin nani wal taim luaia.

18. Nahki kristian asla aidrubanka nani mita, mayunra rait aihwa ra dutki bapi buma dukyara tam baikisa ki?

¹⁸ Gâd yamni mai kaikbia dukyara, mayunra kuninkira wina man tnayara taki, mayunra rait aihwa ra dutki bapi bui kaia sma. Nahki muni daukma ki? Baibil bila: “Yawan  pana pana wan walka nani ra help munaia trai kaikaia sa, latwan laka bri kaia bara diara yamni nani sin dauki kaia. Yawan asla aidrubi laka dauki ba swiaia apia sa, upla tila nani dauki ba baku. Baku daukaia watlika ra, yawan pana pana wan walka nani aikuki wan ta baikaia sa, bara kau pali nanara Dawan yua ba pat baila kan kaiki ba” (Hibru nani 10:24, 25). Kristian asla aidrubanka nani ra, Gâd yamni kaiki ba kat wan kupia liliakira ni mayunisa (Lawana 22:22; 122:1). Asla aidrubanka nani na ra ‘pana pana wan ta baikaia sa’ (Rom 1:12).

19. Dia muni Baibil wina lan takisma ba dukyara aisaia sma ki?

¹⁹ Mayunra rait aihwa ra dutki bapi bui kaia tnatka wala ba sika, Jehova Witniska nani ba wal Baibil stadi taki dia lan takram ba smalkaia. Tasba ra saurka tara ba mita upla ailal “sari bri” bangwisa (Isikiel 9:4). Sari ai dara wali uplika nani kaikisma ki? Kaina pyua dukyara Baibil wina bila kaikanka brisma ba, witin nani wal aisaia sip sma ki? Baibil tanka pranakira ba dukyara ban aisi bas, bara kristian asla aidrubanka nani sin dakpara. Baku daukma kaka, rilidian kuninkira liliaka nani ra diman mai daukras kabia. Au sika! Mayunra rait aihwa ra dutki bapi buma kaka lika, lilia kama bara yamnika sin ailal brima (Malakai 3:10).