1, 2. Ki pregunta bo tin cu puntra bo mes despues di a bandona religion falso, y dicon bo ta kere esaki ta importante?

SUPONE cu bo a haya sa cu henter bo bario ta contamina. Un hende secretamente tawata dump sushi venenoso den e area, y awor e situacion ta forma un peliger pa bida di hende. Kico lo bo haci? Sin duda, lo bo muda bai for di einan si ta posibel. Pero despues di haci esei, toch lo bo keda cu e pregunta serio aki: ‘Acaso mi a ser venena?’

² Un situacion similar ta surgi relaciona cu religion falso. Bijbel ta siña cu tal adoracion ta contamina cu siñansanan y practicanan impuro. (2 Corintionan 6:17) Ta pesei ta importante pa bo sali for di ‘Babilonia e Grandi’, e imperio mundial di religion falso. (Revelacion 18:2, 4) Bo a haci esaki caba? Si ta asina, bo ta merece un compliment pa esei. Pero djis separa bo mes di un religion falso of kita bo nomber no ta basta. Ora bo caba di haci esei, bo tin cu puntra bo mes: ‘Acaso mi a keda cu cualkier rastro di adoracion falso?’ Considera algun ehempel.

3. (a) Kico Bijbel ta bisa tocante uzo di imagen, y pakico Dios su punto di bista lo por ta dificil pa algun hende acepta? (b) Kico bo mester haci cu imagen- of articulonan cu bo tin cu ta conecta cu adoracion falso?

³ Algun hende pa añanan tin imagen of altar den nan cas. Abo tambe tin nan? Si ta asina, kisas bo ta sinti cu ta straño of robes pa resa na Dios sin tal yudansa visibel. Podise bo ta sinti bo asta hopi pega na algun di e imagen- of articulonan aki. Pero ta Dios ta esun cu ta bisa con mester ador’e, y Bijbel ta siña cu e no kier pa nos uza imagen. (Exodo 20:4, 5; Salmo 115:4-8; Isaias 42:8; 1 Huan 5:21) Pues bo por para firme pa adoracion berdadero door di destrui cualkier imagen of articulo cu bo tin cu ta conecta cu adoracion falso. Siña mira nan en todo caso manera Yehova ta mira nan, esta, como un “abominacion.”—Deuteronomio 27:15.

4. (a) Con bin nos sa cu adoracion di antepasado ta en vano? (b) Dicon Yehova a prohibi su pueblo di participa den cualkier forma di spiritismo?

⁴ Un otro cos comun den hopi religion falso ta adoracion di antepasado. Prome cu algun hende a siña e berdad di  Bijbel, nan tawata kere cu e defuntonan ta conciente den un region invisibel y cu nan por yuda of perhudica hende bibo. Podise abo tawatin custumber di haci bo maximo esfuerso pa calma bo antepasadonan morto. Pero manera bo a siña den Capitulo 6 di e buki aki, e mortonan no ta na bida ningun caminda. Pues, intentonan pa comunica cu nan ta en vano. Cualkier mensahe cu ta parce di ta bin di un ser keri cu a muri en realidad ta origina di e demoñonan. Pesei Yehova a prohibi e Israelitanan di purba papia cu e mortonan of participa den cualkier otro forma di spiritismo.—Deuteronomio 18:10-12.

5. Kico bo por haci si uzo di imagen of e practica di adora antepasado tawata parti di bo religion anterior?

⁵ Si e uzo di imagen of e practica di adora antepasado tawata parti di bo forma di adora na antes, kico bo por haci? Lesa y medita riba partinan di Bijbel cu ta mustra bo con Dios ta mira e cosnan aki. Papia cu Yehova tur dia den oracion tocante bo deseo di para firme pa adoracion berdadero, y pidie yuda bo pensa manera e ta pensa.—Isaias 55:9.

6, 7. (a) Supuestamente Pasco ta conmemora kico, y Hesus su siguidonan di prome siglo a celebr’e? (b) Celebracion di hacimento di aña tawata conecta cu kico durante e tempo di e prome disipelnan di Hesus?

⁶ Un persona su adoracion por ta contamina door di religion falso pa loke ta trata dianan di fiesta popular. Tuma por ehempel Pasco. Supuestamente Pasco ta conmemora e nacemento di Hesucristo, y casi tur religion cu ta pretende di ta cristian ta celebr’e. Sinembargo, no tin ningun prueba cu Hesus su disipelnan di prome siglo a celebra un dia di fiesta asina. E buki Sacred Origins of Profound Things (Origen Sagrado di Cosnan Profundo) ta declara: “Durante dos siglo despues di Cristo su nacemento, ningun hende no  tawata sa, y poco hende tawata interesa pa sa, ki dia precis el a nace.”

⁷ Asta si e disipelnan di Hesus tawata sa e fecha exacto di su nacemento, nan lo no a celebr’e. Dicon? Pasobra, manera The World Book Encyclopedia ta bisa, e cristiannan di prome “a considera e celebracion di cualkier hende su nacemento un custumber pagano.” E unico celebracionnan di hacimento di aña menciona den Bijbel ta di dos gobernante cu no tawata adora Yehova. (Genesis 40:20; Marco 6:21) Tambe hende a tene celebracion di hacimento di aña na honor di diosnan pagano. Por ehempel, riba 24 di mei e Romanonan a celebra e hacimento di aña di e diosa Diana. Riba e dia siguiente, nan a celebra e hacimento di aña di nan dios di solo, Apolo. Pues anto, celebracion di hacimento di aña tawata conecta cu paganismo, no cu cristianismo.

8. Splica e conexion entre celebracion di hacimento di aña y supersticion.

⁸ Tin un motibo mas pakico cristiannan di prome siglo lo no a celebra e hacimento di aña di Hesus. Su disipelnan probablemente tawata sa cu celebracion di hacimento di aña tawata conecta cu supersticion. Por ehempel, hopi Griego y Romano di tempo antiguo tawata kere cu un spirito a asisti na e nacemento di cada hende y a proteha e persona ei atrabes di su bida. E buki The Lore of Birthdays (E Tradicion di Hacimento di Aña) ta bisa: “E spirito aki tawatin un relacion magico cu e dios riba kende su dia e persona a nace.” Yehova sigur lo no a keda contento cu ningun celebracion cu lo a conecta Hesus cu supersticion. (Isaias 65:11, 12) Pues con bin anto cu asina tanto hende ta celebra Pasco?

9. Con 25 di december a bira e dia pa celebra e nacemento di Hesus?

⁹ Tawata un 300 aña despues cu Hesus a biba riba tera cu hende a cuminsa conmemora su nacemento dia 25 di december. Pero esei no tawata e fecha cu Hesus a nace,  pasobra evidentemente el a nace den october. * Pakico anto a scohe 25 di december? Algun hende cu despues a pretende di ta cristian probablemente tawata “desea pa e fecha cai pareu cu e fiesta pagano Romano cu a marca e ‘dia di nacemento di solo invicto.’” (The New Encyclopædia Britannica) Den winter, ora cu solo tawata parce menos potente, paganonan tawata tene ceremonianan pa pone solo—cu ta duna calor y lus—bolbe for di su biahenan leu. Nan tawata kere cu dia 25 di december solo a cuminsa cu su biahe di regreso. Den un intento pa comberti e paganonan, lidernan religioso a tuma e fiesta aki over y a purba lag’e parce “cristian.” *

10. Dicon antes algun hende no a celebra Pasco?

¹⁰ For di hopi tempo pasa hende a reconoce e origen pagano di Pasco. Debi na su origen cu a bai contra di e Scritura, Pasco tawata prohibi na Inglatera y den algun di e colonianan Mericano durante siglo 17. Ken cu a djis keda cas sin bai traha riba dia di Pasco tawatin cu paga un boet. Pero no a tarda hopi cu e custumbernan bieu a bolbe bira popular, y nan a agrega algun custumber nobo. Pasco un biaha mas a bira un dia di fiesta importante, y te ainda e ta asina den hopi pais. Sinembargo, debi na Pasco su conexion cu religion falso, hende  cu kier agrada Dios no ta celebr’e ni nan no ta celebra ningun otro dia di fiesta cu ta origina di adoracion pagano. *

11. Dicon algun hende ta celebra dia di fiesta, pero kico mester ta nos precupacion principal?

¹¹ Tin hende ta di acuerdo cu dianan di fiesta manera Pasco ta di origen pagano, pero toch nan ta haya cu no ta algo malo pa celebra nan. De echo, mayoria hende no ta pensa riba adoracion falso ora nan ta celebra dianan di fiesta. E ocasionnan aki ta duna famianan chens di bin hunto. Esei ta loke abo ta pensa? Si ta asina, probablemente ta bo amor pa famia, no amor pa religion falso, ta loke ta pone cu para firme pa adoracion berdadero ta parce dificil. Bo por ta sigur cu Yehova, kende a origina famia, kier pa bo tin un bon relacion cu bo famianan. (Efesionan 3:14, 15) Pero bo por fortalece e lasonan di famia den maneranan cu Dios ta aproba. Apostel Pablo a skirbi tocante kico mester ta nos precupacion principal: ‘Trata di siña [of, “haci sigur di”, NW] loke ta agradabel na Señor.’—Efesionan 5:10.

12. Duna un ehempel cu ta mustra dicon nos mester evita custumber y celebracion cu tin mal origen.

¹² Kisas bo ta haya cu e origen di dianan di fiesta tin masha tiki di aber cu e manera cu hende ta celebra nan awe. E origen realmente ta importa? Si! Un ehempel: Supone cu bo a mira un mangel benta abou canto di caminda. Lo bo coi e mangel ei y com’e? Claro cu no! E mangel ta sushi. Mescos cu e mangel ei, dianan di fiesta por parce dushi, pero hende a coi nan for di luganan sushi, impuro. Pa nos para firme pa adoracion berdadero, nos mester tin e mesun punto di bista cu profeta Isaias, kende a bisa adoradonan berdadero: “No mishi cu nada impuro.”—Isaias 52:11.

13. Ki retonan por surgi ora cu bo no ta participa den dianan di fiesta?

¹³ Ora cu bo dicidi di no participa den dianan di fiesta por surgi varios reto. Por ehempel, bo coleganan lo por ta puntra nan mes dicon bo no ta participa den cierto actividadnan di dia di fiesta caminda bo ta traha. Kico si nan ofrece bo un regalo di Pasco? Lo ta robes pa acept’e? Kico si bo casa no ta comparti bo creencianan? Con bo por haci sigur cu bo yiunan no ta sinti cu nan ta perde algo door di no celebra dianan di fiesta?

14, 15. Kico lo bo por haci si un hende desea bo felis dia di fiesta of si un hende kier duna bo un regalo?

¹⁴ Nos mester di bon huicio pa distingui con pa trata cada situacion. Si un hende cu bo topa di paso desea bo un felis dia di fiesta, bo por djis bis’e danki. Pero supone cu ta trata di un hende cu bo ta mira of traha cu ne riba un base regular. Den tal caso, lo bo por dicidi di bisa mas. Den tur caso, uza tacto. Bijbel ta conseha: “Laga boso palabranan ta semper cu gracia, sasona cu salo, pa boso por sa con boso mester contesta cada persona.” (Colosensenan 4:6) Tene cuidou pa bo no mustra falta di respet pa otro hende. Mas bien, cu tacto splica nan bo posicion. Mustra bon cla cu bo no ta contra dunamento di regalo ni reunionnan social pero cu bo ta prefera di participa den e actividadnan aki na un otro momento.

¹⁵ Kico si un hende kier duna bo un regalo? Ta depende hopi di e circunstancia. E dunado kisas ta bisa: “Mi sa cu bo no ta celebra e dia di fiesta. Pero toch mi kier duna bo esaki.” Bo por dicidi cu si bo acepta e regalo bou di e circunstancia ei, lo no ta mescos cu tuma parti den e dia di fiesta. Claro cu si e dunado no ta conoci cu bo creencianan, lo bo por bis’e cu bo no ta celebra e dia di fiesta. Esaki lo yuda splica dicon bo ta acepta un regalo pero no ta duna un  regalo na e ocasion ei. Di otro banda, no ta sabi pa acepta un regalo si ta bisto cu e ta ser duna cu e intencion pa mustra cu bo no ta pega na bo creencianan of pa mustra cu lo bo compromete bo posicion djis pa haya cos material.

16. Con bo por demostra tacto ora di trata cu asuntonan relaciona cu dia di fiesta?

¹⁶ Kico si miembronan di famia no ta comparti bo creencianan? Un biaha mas, demostra tacto. Bo no tin nodi forma un cuestion riba cada custumber of celebracion cu bo famianan ta dicidi di tene. Mas bien, respeta nan derecho di tin nan propio punto di bista, mescos cu bo kier pa nan respeta bo derecho di tin bo punto di bista. (Mateo 7:12) Evita cualkier accion cu lo por haci bo un participante den e dia di fiesta. Pero toch sea rasonabel den asuntonan cu no ta relaciona cu e celebracion mes. Claro cu semper bo mester actua den un manera cu ta laga bo cu un bon consenshi.—1 Timoteo 1:18, 19.

17. Con bo por yuda bo yiunan pa nan no sinti cu nan ta perde algo ora nan ta mira otro hende celebra dianan di fiesta?

¹⁷ Kico bo por haci pa asina bo yiunan no sinti cu nan ta perde algo pasobra nan no ta celebra dianan di fiesta cu ta bai contra e Scritura? Esei ta depende hopi di loke bo ta haci na otro momentonan durante aña. Tin mayor ta aparta tempo special pa duna regalo na nan yiunan. Un di e mihor regalonan cu bo por duna bo yiunan ta bo tempo y atencion amoroso.

18. Con asistencia na reunionnan cristian por yuda bo para firme pa adoracion berdadero?

¹⁸ Pa agrada Dios, bo tin cu rechasa adoracion falso y para firme pa adoracion berdadero. Kico esaki ta encera? Bijbel ta declara: “Laga nos considera con pa stimula otro pa stima y haci bon obra, y no laga di asisti na nos mes reunionnan,  manera ta custumber di algun, ma curasha otro; y mucho mas ainda, ora boso ta mira cu e dia ta yegando serca.” (Hebreonan 10:24, 25) Reunionnan cristian ta ocasionnan felis pa bo adora Dios den e manera cu e ta aproba. (Salmo 22:22; 122:1) Na e reunionnan ei, cristiannan fiel ta “curasha” otro.—Romanonan 1:12.

19. Dicon ta importante pa bo papia cu otro hende tocante e cosnan cu bo a siña for di Bijbel?

¹⁹ Un otro manera cu bo por para firme pa adoracion berdadero ta door di papia cu otro hende tocante e cosnan cu bo a siña for di bo estudio di Bijbel cu Testigonan di Yehova. Hopi hende realmente ta “suspira y keha” debi na e maldad cu ta tumando luga den mundo awe. (Ezekiel 9:4) Podise bo conoce algun hende cu ta suspira y keha. Pakico bo no ta papia cu nan tocante bo speransa pa futuro cu ta basa riba Bijbel? Segun cu bo ta asocia cu cristiannan berdadero y ta papia cu otro hende tocante e maraviyoso berdadnan biblico cu bo a siña, lo bo ripara cu cualkier deseo pa e custumbernan di adoracion falso cu kisas tawatin ainda den bo curason, pocopoco lo disparce. Bo por ta sigur cu lo bo ta masha felis y lo haya hopi bendicion si bo para firme pa adoracion berdadero.—Malakias 3:10.