1, 2. Chiʼ kaya kan ri qastzij taj kojonem, ¿jas pregunta rajawaxik kabʼano, xuqujeʼ jasche kabʼij che rajawaxik kbʼan wariʼ?

CHACHOMAJAMPEʼ che kariq jun winaq che chelaqʼal tajin keʼukʼaq tzʼil taq mes che kkamisanik naqaj che ri awachoch. Ronojel ri tinamit jachiʼ at kʼo wi kʼo wajun tzʼil mes riʼ, xuqujeʼ ri akʼaslemal kʼo pa kʼax. ¿Jas kabʼano? Weneʼ kajal awachoch. Tekʼuriʼ patneʼ katel bʼi chilaʼ, rajawaxik kabʼan wajun pregunta riʼ: «¿La xok ri ruxlabʼ wajun tzʼil mes riʼ pa nubʼaqil?».

² Junam rukʼ wariʼ kbʼan rukʼ ri qastzij taj kojonem. Ri Biblia kukʼutu che ri e qastzij taj kojonem kitzʼilom kibʼ rukʼ tzʼil taq kʼutunik xuqujeʼ rukʼ ri kkibʼano (2 Corintios 6:17). Rumal laʼ rajawaxik che kojel pa ri «Nimalaj Babilonia», ri konojel ri qastzij taj kojonem che e kʼo cho ri uwach Ulew (Apocalipsis 18:2, 4). ¿La abʼanom chi at? We je wariʼ, sibʼalaj utz wariʼ. Tekʼuriʼ xaq xiw ta rajawaxik che kaya kan ri qastzij taj kojonem o katzʼibʼaj bʼi jun wuj che kubʼij che katbʼe ta chik pa wajun kojonem riʼ. Xuqujeʼ rajawaxik che kabʼan wajun pregunta riʼ: «¿La kʼo na jastaq rech ri qastzij taj kojonem pa ri nukʼaslemal?». Chqilaʼ nikʼaj kʼutbʼal re.

3. a) Chabʼij ri kubʼij ri Biblia chrij ukojik e tyox xuqujeʼ jasche kʼax kkibʼan ri winaq che uchomaxik chrij ri kubʼij ri Dios chrij ukojik e tyox. b) We kʼo jastaq awukʼ rech ri kojonem che qastzij taj, ¿jas rajawaxik kabʼan chke?

³ E kʼo winaq che qʼaxinaq chi kʼi junabʼ che e kʼo tyox o wachbʼal pa taq kachoch. ¿La kʼo wariʼ pa awachoch at? We je wariʼ, weneʼ utz ta kawilo che kʼot jun tyox kakojo chiʼ kabʼan achʼawem che ri Dios. Weneʼ kʼo jujun jastaq che sibʼalaj kaloqʼoqʼej. Tekʼuriʼ, are ri Dios ri kbʼin chqe ri kqabʼan che uyaʼik uqʼij, xuqujeʼ ri Biblia kukʼutu che ri Dios kraj taj che keqakoj e tyox (chasikʼij uwach Éxodo 20:4, 5; Salmo 115:4-8; Isaías 42:8; 1 Juan 5:21). Rumal laʼ, rech katkʼojiʼ pa ri qastzij kojonem, rajawaxik kasachisaj uwach ronojel ri jastaq che kʼo awukʼ che kʼo ubʼanik rukʼ ri qastzij taj kojonem. Chawilaʼ junam rukʼ rilik kubʼan ri Jehová: wariʼ are jun jastaq che «xawebʼal» chuwach (Deuteronomio 27:15).

4. a) ¿Jasche utz taj kqaya uqʼij qatiʼt qamam? b) ¿Jasche ri Jehová xutaq ri utinamit Israel che kubʼan ta ri jalajoj kichak ajqʼijabʼ?

⁴ Jun chik che kukʼut ri qastzij taj kojonem are uyaʼik kiqʼij  qatiʼt qamam. E kʼo winaq che, chiʼ majaʼ kketaʼmaj ri qastzij chrij ri Biblia, kkichomaj che ri kaminaqibʼ e kʼasal pa jun kʼolbʼal che kiltaj taj xuqujeʼ che kekunik kkitoʼ ri winaq che e kʼaslik o kkibʼan kʼax chke. Weneʼ kakoj nim achuqʼabʼ rech ri awatiʼt amam kʼot kkibʼan chawe. Tekʼuriʼ, xawetaʼmaj pa ri kʼutunem 6 rech wajun wuj riʼ, che ri kaminaqibʼ e kʼasal ta pa jun chik kʼolbʼal. Rumal laʼ utz taj che kchʼaw jun kukʼ. Ronojel ri chʼabʼal pachaʼ rech ri kaminaq are qas kech ri itzel taq uxlabʼal. Rumal laʼ, Jehová xutaq ri utinamit Israel che kkibʼan ta nijun uwach kichak ajqʼijabʼ xuqujeʼ che kekichʼabʼej ta ri kaminaqibʼ (chasikʼij uwach Deuteronomio 18:10-12).

5. ¿Jas kabʼano we e kʼo tyox awukʼ o kaya kiqʼij ri awatiʼt amam?

⁵ ¿Jas katkunik kabʼano we ri kojonem ri at kʼo wi nabʼe keʼukoj tyox o kuya kiqʼij qatiʼt qamam? Rajawaxik katchoman chrij ri kukʼut ri Biblia chrij ri uchomanik ri Dios chrij ri e jastaq riʼ. Ronojel taq qʼij chabʼanaʼ achʼawem che ri Jehová; chabʼij che kawaj katkʼojiʼ pa ri qastzij kojonem xuqujeʼ chabʼij che, che katutoʼ rech ri achomanik kubʼan junam rukʼ ri uchomanik areʼ (Isaías 55:9).

6, 7. a) Chabʼij jas kkibʼij ri winaq che kkinaʼtasaj ri Navidad xuqujeʼ, ¿la xkibʼan ri nabʼe Cristianos? b) ¿Jas rukʼ kjunamisax wi ri cumpleaños pa taq kiqʼij ri e nabʼe rajtijoxelabʼ ri Jesús?

⁶ Ri qaqʼijilanik ktzʼilobʼ rukʼ ri qastzij taj kojonem we kqabʼan jujun chke ri nimaqʼij che konojel ri winaq ketaʼm xuqujeʼ kkibʼano. Jun kʼutbʼal re are ri Navidad. Kkibʼij che wajun nimaqʼij riʼ kunaʼtasaj ri ralaxbʼal ri Jesucristo, xuqujeʼ kʼi chke ri e kojonem che kkibʼij che e kojonelabʼ kkibʼan wajun nimaqʼij riʼ. Tekʼuriʼ, kʼot etal che kukʼutu che ri nabʼe rajtijoxelabʼ ri Jesús xkibʼan wariʼ. Ri wuj ubʼiʼ Los orígenes sagrados de las cosas profundas kubʼij: «Chiʼ qʼaxinaq chi 200 junabʼ che xalax ri Cristo kʼot nijun retaʼm, xuqujeʼ xa e jujun chke xkaj xketaʼmaj jampaʼ qas xalax ri Jesús».

 ⁷ Wet ri rajtijoxelabʼ ri Jesús xketaʼmaj jampaʼ xalaxik, xuqujeʼ xkibʼan ta nimaqʼij chiʼ xtzʼaqat ujunabʼ. ¿Jasche? Rumal che ri nabʼe e cristianos «kkil wa taq nimaqʼij riʼ [...] che xa uchʼaqapil ri qastzij taj kojonem», kchaʼ ri wuj (Las cosas nuestras de cada día). Ri Biblia xaq xiw kubʼij kebʼ cumpleaños kech kebʼ ajawinelabʼ che xkiya ta uqʼij ri Jehová (Génesis 40:20; Marcos 6:21). Ri e nimaqʼij riʼ xuqujeʼ kbʼan che uyaʼik kiqʼij ri e tyox. Jun kʼutbʼal re, ri romanos kkibʼan nimaqʼij pa 24 rech mayo rumal ri ralaxbʼal jun tyox ubʼiʼ Diana xuqujeʼ pa ri qʼij 25 kkibʼan rech ri Apolos, ri tyox rech ri Qʼij. Qastzij laʼ kqilo che ri cumpleaños kʼot ubʼanik rukʼ ri qastzij kojonem, are kʼo ubʼanik rukʼ uyaʼik kiqʼij e tyox.

8. Chabʼij jas kraj kubʼij ri cumpleaños rukʼ ri e qastzij taj etaʼmanik.

⁸ Ri nabʼe cristianos xkibʼan ta ucumpleaños ri Jesús rumal jun bʼantajik: weneʼ ketaʼm che ri cumpleaños kʼo ubʼanik rukʼ ri e qastzij taj etaʼmabʼal (o superstición). Kʼi chke ri griegos xuqujeʼ romanos ojer, kkichomaj che chiʼ kalax jun winaq kʼo jun uxlabʼal che kuchajij pa ronojel ri ukʼaslemal. «Wajun uxlabʼal riʼ kʼo ubʼanik rukʼ ri tyox che ktzʼaqat ujunabʼ junam rukʼ ri qʼij che ktzʼaqat ujunabʼ ri winaq.» (The Lore of Birthdays [La tradición de los cumpleaños].) Ri Jehová utz ta krilo che kbʼan jun nimaqʼij che ri Jesús, che kʼo ubʼanik rukʼ ri e qastzij taj etaʼmabʼal (Isaías 65:11, 12). Junam che qilom chik, ¿jasche kʼi chke ri winaq kkibʼan ri nimaqʼij rech ri Navidad?

9. ¿Jasche are xchaʼ ri qʼij 25 rech diciembre rech knaʼtax ri ralaxbʼal ri Jesús?

⁹ Chiʼ qʼaxinaq chi kʼi junabʼ che xpe ri Jesús cho ri uwach Ulew, xchaʼ ri qʼij 25 rech diciembre rech kkinaʼtasaj ri ralaxik. Tekʼuriʼ Jesús xalax ta pa diciembre, * ronojel kukʼutu che xalax pa octubre. Rumal laʼ ¿jasche xchaʼ wajun qʼij riʼ? Rumal che jujun chke ri winaq che kkibʼij che e kojonelabʼ xkaj «kkikʼex ri nimaqʼij rech ri qastzij taj kojonem rukʼ ri  qastzij. Pa Roma ri e kojonelabʼ taj kkibʼan nim che ri qʼij 25 rech diciembre rech kkinaʼtasaj ri ralaxbʼal ri ‹Qʼij nim uchuqʼabʼ›» (Enciclopedia de la Religión Católica). Pa ri qʼalaj, chiʼ kqaj ri uchuqʼabʼ ri Qʼij, ri e qastzij taj kojonelabʼ kkibʼan kʼi chʼabʼal rech kkibʼan che ri Qʼij ktzalij lo pa naj uviaje xuqujeʼ rech kuya ri usaqil chke xuqujeʼ ri uqʼaqʼil. Kkichomaj che ri 25 rech diciembre ktzalij lo ri Qʼij. Ri e ajkʼamal bʼe rech ri e kojonem kkaj che ri winaq che kkipatanej ta ri Dios kkibʼan kojonelabʼ, xkaj xkibʼan che wajun nimaqʼij che kkaʼy che «cristiana». *

10. ¿Jasche xkibʼan ta ri Navidad nikʼaj winaq ojer?

¹⁰ Ojer chik etaʼm che ri Navidad petinaq chke ri qastzij taj kojonem. Rumal che elinaq ta chupam ri Biblia, pa Inglaterra xuqujeʼ nikʼaj chik alaj taq tinamit rech norteamerica xyaʼ ta chke ri winaq che kkibʼan wajun nimaqʼij riʼ pa ri junabʼ 1600. Ronojel ri winaq che kopan ta pa uchak rech kkanaj kan pa rachoch ri qʼij rech ri Navidad ktaʼ pwaq che rech kkʼajisax uwach. Tekʼuriʼ, naj taj xuchʼij wariʼ xtzalij chi lo ubʼanik ri Navidad, xuqujeʼ xebʼan chi nikʼaj. Ri Navidad xubʼan chi jumul jun nimalaj nimaqʼij xuqujeʼ je tajin kbʼan pa kʼi tinamit. Tekʼuriʼ ri winaq che kkaj kkikikotemaj ri Dios ketaʼm che wariʼ kʼo ubʼanik rukʼ ri qastzij taj kojonem xuqujeʼ kkibʼan ta wajun nimaqʼij riʼ  xuqujeʼ nikʼaj chik che petinaq chke ri winaq che kkipatanej ta ri Dios. *

11. Chabʼij jasche kkibʼan ri winaq jujun chke ri nimaqʼij riʼ xuqujeʼ ri sibʼalaj nim ubʼantajik chqawach.

¹¹ E kʼo winaq ketaʼm che ri e nimaqʼij, jun chke are ri Navidad, petinaq che ri qastzij taj kojonem, tekʼuriʼ kkichomaj che kʼot kubʼano we kkibʼano. Kkibʼij che kʼot nijun kubʼij che petinaq che ri qastzij taj kojonem, xuqujeʼ kkibʼij che xa che wajun qʼij riʼ kekunik kkimulij kibʼ ri familia. ¿La je kachomaj at? We je wariʼ, are ri aloqʼoqʼenik che ri afamilia, are ta che ri qastzij taj kojonem, are wariʼ ri kubʼano che katkʼojiʼ ta pa ri qastzij kojonem. Tekʼuriʼ, masach pa ajolom che ri Jehová, ri xbʼanow ri familia, kraj che utz kabʼan rukʼ ri afamilia (Efesios 3:14, 15). Tekʼuriʼ kʼo chi nikʼaj che kojkunik kqabʼano xuqujeʼ kojkunik kqakikotemaj ri Dios. Ri apóstol Pablo xubʼij ri sibʼalaj nim kqilo: «Chiwetaʼmaj bʼaʼ jachike jastaq ri keqaj chuwach ri Dios» (Efesios 5:10).

12. ¿Jas rukʼ kkʼut wi che rajawaxik che kqabʼan ta ri e nimaqʼij che petinaq che ri qastzij taj kojonem?

¹² Weneʼ kachomaj che kimik ri e nimaqʼij kbʼan ta chi junam che xbʼan kan ojer, rech uyaʼik kiqʼij e tyox. ¿La rajawaxik kqetaʼmaj jachiʼ xpe wi? Rajawaxik. Chachomajampeʼ che kawil jun kabʼ pa jun xaqʼoʼl. ¿La katijo? Katij taj; rumal che tzʼil. Junam rukʼ wariʼ, kʼo e nimaqʼij che weneʼ kilitajik che sibʼalaj utz kekaʼyik, tekʼuriʼ e petinaq che jun kʼolbʼal che tzʼil. We kqaj kojkʼojiʼ pa ri qastzij kojonem, rajawaxik che kubʼan ri qachomanik junam rukʼ ri uchomanik ri ajqʼaxal tzij Isaías. Chke ri winaq che kkipatanej ri Dios rukʼ kanimaʼ, xubʼij wariʼ: «Mebʼinaq chi tzʼil taq jastaq» (Isaías 52:11).

13. ¿Jas kʼax weneʼ kariqo we kabʼan ta chi ri e nimaqʼij?

¹³ Chiʼ kawaj kaya kan nikʼaj taq nimaqʼij weneʼ kpe kʼi kʼax chawij. Jun kʼutbʼal re, ¿jas kabʼano we ri e awachiʼl rech ri achak kkun ta che retaʼmaxik jasche kabʼan ta ri e nimaqʼij? Xuqujeʼ we kʼo jun winaq che kuya jun sipanik rech Navidad chawe. ¿La utz che kakʼamo? ¿Jas kabʼano we ri awachajil o awixoqil xaq ta junam ri ukojonem awukʼ? ¿Jas katkunik kabʼano rech ri awalkʼwal kkichomaj taj che xa tajin kkiya kan ubʼanik jun utzalaj jastaq chiʼ kkibʼan ta ri e nimaqʼij riʼ?

14, 15. ¿Jas kabʼano we kʼo jun winaq kraj kuya jun sipanik chawe pa ri e nimaqʼij riʼ?

¹⁴ Rajawaxik che kʼo nim qanojibʼal rech kqetaʼmaj ri kqabʼano chiʼ ri winaq kechʼaw chrij ri e nimaqʼij. Tekʼuriʼ, we ri winaq che kubʼij wariʼ chawe amaqʼel kawilo, weneʼ jun awachiʼl rech achak, weneʼ kawaj kaya ubʼixik che, jasche kabʼan taj. Apachike tane, rajawaxik che nabʼe kachomaj ri kabʼij. Ri Biblia kubʼij wariʼ: «Utz chixtzijon kukʼ konojel ri winaq, qas chinaʼ na ri kixchʼawik, rajawaxik kiwetaʼmaj jas kibʼan che utzalixik uwach kitzij ri winaq chkijujunal» (Colosenses 4:6). Chatchʼaw chrij ri akojonem rukʼ utz taq tzij kabʼij ta rukʼ yoqʼonik. Chakʼutuʼ che kʼot kubʼano che kyaʼ sipanik xuqujeʼ che kmulix ibʼ, tekʼuriʼ chabʼij che kawaj kabʼan wariʼ che jun qʼij chik.

¹⁵ We kʼo jun winaq kraj kuya jun sipanik chawe are rajawaxik che kawilo jasche kraj kuya chawe. Weneʼ kubʼij chawe: «Wetaʼm chik che kabʼan ta wajun nimaqʼij riʼ, tekʼuriʼ kwaj kinsipaj wariʼ chawe». Weneʼ kachomaj che ukʼamik ri sipanik kubʼij taj che tajin kabʼan wajun nimaqʼij riʼ. Tekʼuriʼ we ri winaq retaʼm ta ri akojonem, at katkunik kabʼij che, che kabʼan ta wajun nimaqʼij riʼ. Wariʼ kubʼij jasche katzalij ta ukʼaxel ri sipanik kuya chawe. Tekʼuriʼ  weneʼ kkitzujuj taq jastaq chawe rech kkaj kkikʼutu che xa at sukʼ ta che ri akojonem o rumal ri jastaq kabʼan ta ri uchomanik ri Dios. We je kkichomaj wariʼ are utz che kakʼam ta ri kkiya chawe.

16. ¿Jas kabʼano rech katchʼaw rukʼ utz taq tzij chrij ri jastaq che kʼo ubʼanik rukʼ ri e nimaqʼij?

¹⁶ ¿Jas kkʼulmatajik we xaq ta junam ri akojonem rukʼ ri afamilia? Junam che qilom chik, rajawaxik kabʼij rukʼ utz taq tzij. Rajawaxik ta che katchʼojin chrij ri jastaq che kkibʼan ri winaq o ri nimaqʼij che kkaj kkibʼano. Katchʼaw ta chrij ri kikojonem rukʼ itzel taq tzij, junam che at kawaj taj che kechʼaw rukʼ itzel taq tzij chrij ri akojonik (chasikʼij uwach Mateo 7:12). Tekʼuriʼ kʼot jastaq kabʼano rech kukʼutu che kabʼan wajun nimaqʼij riʼ. Xuqujeʼ chachomaj ri kabʼano chiʼ kʼo jun bʼantajik che rech ta ri e nimaqʼij riʼ. Rumal waʼ, rajawaxik che qas kabʼano ri kubʼij ri retaʼmabʼal akʼuʼx rech kʼax ta kanaʼo (chasikʼij uwach 1 Timoteo 1:18, 19).

17. ¿Jas katkunik kabʼano rech ri awalkʼwal kkibʼij taj che tajin kkiya kan ubʼanik jun utzalaj jastaq chiʼ kkibʼan ta nimaqʼij?

¹⁷ ¿Jas katkunik kabʼano rech ri awalkʼwal kkichomaj taj che xa tajin kkiya kan ubʼanik jun utzalaj jastaq chiʼ kkibʼan ta ri nimaqʼij che kʼo ta chupam ri Biblia? Wariʼ kʼo kubʼij chrij ri kabʼan pa ronojel ri junabʼ. E kʼo tat nan che kkichaʼ jun qʼij rech kkiya sipanik chke ri kalkʼwal. Jun chke ri sipanik che sibʼalaj nim ubʼanik are che kajam aqʼij rech katkʼojiʼ kukʼ xuqujeʼ keʼaloqʼoqʼej.

18. ¿Jas kubʼan ri e riqbʼal ibʼ rech katutoʼ che katkʼojiʼ pa ri qastzij kojonem?

¹⁸ Rech kakikotemaj ri Dios, rajawaxik che kaxutuj ri qastzij taj kojonem xuqujeʼ chatok pa ri qastzij kojonem.  ¿Jas kabʼan che ubʼanik? Ri Biblia kubʼij: «Qas chqilaʼ qibʼ, chqapixbʼela qibʼ che ri loqʼoqʼebʼal jujun, xaneʼ chqapixbʼela qibʼ. Qas kʼu chujok na il rumal rech chi kaqilo chi kanaqajin ri qʼij re ri Dios» (Hebreos 10:24, 25). Ri e riqbʼal ibʼ kuya kikotemal chqe rumal che kojkunik kqaya uqʼij ri Dios junam che kraj areʼ (Salmo 22:22; 122:1). Chupam ri e riqbʼal ibʼ riʼ kojkunik «kqaya qachuqʼabʼ chbʼil taq qibʼ» ri oj sukʼ cristianos (Romanos 1:12).

19. ¿Jasche rajawaxik che kabʼij chke ri winaq ri xawetaʼmaj chrij ri Biblia?

¹⁹ Jun chik ubʼanik rech katkʼojiʼ pa ri qastzij kojonem are chiʼ kabʼij ri kawetaʼmaj chrij ri Biblia kukʼ ri testigos rech Jehová. Kʼi winaq sibʼalaj kakinaʼ bʼis xuqujeʼ kʼaxkʼobʼik rumal ri itzelal kʼo pa ri uwach Ulew. Weneʼ awetaʼm kiwach winaq che je kkinaʼo. Chabʼij chke ri kubʼsal kʼuʼx kuya ri Biblia chrij ri petinaq. Mayaʼ kan ubʼixik ri utz taq kʼutunik che xawetaʼmaj pa ri Biblia xuqujeʼ kaya ta kan ri riqbʼal ibʼ kukʼ ri qastzij cristianos. We je kabʼan wariʼ, kawilo che utz ta chik kawil ri e nimaqʼij che kʼo chupam ri qastzij taj kojonem. Kubʼan ta kebʼ akʼuʼx: we katkʼojiʼ pa ri qastzij kojonem sibʼalaj kariq kikotemal xuqujeʼ kyaʼ kʼi tewchibʼal chawe (Malaquías 3:10).