1, 2. Mmubuzyo nzi ngomweelede kulibuzya mwamana kuzwa mucikombelo cakubeja, alimwi ino muyeeya kuti nkaambo nzi ncociyandika eeci?

AMWEEZYEEZYE kuti mwazyiba kuti busena bumuzingulukide boonse bwasofwaazyigwa. Imuntu umwi cakusisikizya wali kusowa misamu iijaya mubusena momukkala, alimwi lino busena bwabijila limwi cakuti bantu bali muntenda. Ino ncinzi ncomunga mwacita? Cakutadooneka inga mwalonga ikuti kamukonzya. Pele mwamana kulonga mucinoolibuzya mubuzyo ooyu uuyandika wakuti, ‘Sena ambebo ndilijatikizyidwe?’

² Mbobubede bukkale kujatikizya bukombi bwakubeja. Ibbaibbele liyiisya kuti ibukombi oobo bulisofwaazyidwe anjiisyo zitasalali amicito. (2 Ba-Korinto 6:17) Nkakaambo kaako, cilayandika kapati kuti muzwe muli “Babuloni mupati,” ibulelo bwanyika bwabukombi bwakubeja. (Ciyubunuzyo 18:2, 4) Sena mwakacita kale oobo? Ikuti naa mwakacita, nkokuti mwakacita kabotu. Pele nzinji zijatikizyidwe, teensyi buyo kulizandula naa kuzwa mucikombelo cimwi cakubeja. Mwamana kucita boobo, mweelede kulibuzya kuti, ‘Sena ndicijisi tumpenda twabukombi bwakubeja?’ Amulange-lange zikozyanyo zimwi.

3. (a) Ncinzi Bbaibbele ncolyaamba kujatikizya kubelesya zikozyanyo, alimwi ino nkaambo nzi ncocinga cabayumina bamwi kuzumina mbwazilanga zintu Leza? (b) Ncinzi ncomweelede kucita kujatikizya zintu zili zyoonse nzyomujisi iziswaangene abukombi bwakubeja?

³ Kuli bamwi ibajisi zikozyanyo naa zilyango muminzi yabo kwamyaka minji. Sena anywebo mulijisi zikozyanyo naa zilyango amunzi wanu? Ikuti naa mboobo, inga mwalimvwa kuti cilakatazya naa taciluzi kupaila kuli Leza kakunyina zintu eezyo zilibonya. Alimwi mane inga mwalimvwa kuti tamukonzyi kulyaandaanya kuzintu eezyi zimwi. Pele Leza nguuwamba mbwayelede kukombwa, alimwi Bbaibbele lituyiisya kuti tayandi kuti katubelesya zikozyanyo. (Amubale Kulonga 20:4, 5; Intembauzyo 115:4-8; Isaya 42:8; 1 Johane 5:21) Aboobo mulakonzya kukakatila kubukombi bwakasimpe kwiinda mukunyonyoona zintu zyoonse nzyomujisi iziswaangene abukombi bwakubeja. Amubone kuti mwazibona mbuli mbwazilanga Jehova—kuti “[nci]sesemyo.”—Deuteronomo 27:15.

4. (a) Mbuti mbotuzyi kuti kukomba basikale takugwasyi? (b) Nkaambo nzi Jehova ncaakabakasya bantu bakwe kujatikizyigwa mukusyoma mizimo iili yoonse?

⁴ Ikukomba basikale akwalo kulidumide kapati muzikombelo  zinji zyakubeja. Kabatanaiya kasimpe kamu Bbaibbele, ibamwi bakali kusyoma kuti bafwide balapona mubusena bwamyuuya alimwi akuti balakonzya kubagwasya naa kubapenzya ibacipona. Ambweni mwakali kusoleka kapati kucita zimwi kutegwa mubakkomanisye basikale banu bafwide. Pele mbubwenya mbomwakaiya mu Cibalo 6 mubbuku lino, bafwide kunyina kubusena kumbi nkobali baumi pe. Aboobo ikusoleka kubandika ambabo tacigwasyi pe. Imilumbe iili yoonse iilibonya mbuli kuti izwa kumuyandwa uufwide mubwini izwa kumadaimona. Aboobo Jehova wakabakasya bana Israyeli ikusola kubandika abafwide naa kutola lubazu mukusyoma mizimo iili yoonse.—Amubale Deuteronomo 18:10-12.

5. Ncinzi ncomunga mwacita ikuti kubelesya zikozyanyo naa kukomba basikale nenzila mbomwakali kukomba kaindi?

⁵ Ikuti kubelesya zikozyanyo naa kukomba basikale cakali cibeela cabukombi bwanu bwakaindi, ino ncinzi ncomweelede kucita? Amubale akuzinzibala kuyeeya zibalo zyamu Bbaibbele izimutondezya mbwazibona zintu eezyi Leza. Amupaile kuli Jehova abuzuba kujatikizya kulombozya kwanu kwakuyanda kukakatila kubukombi bwakasimpe, alimwi amumulombe kuti amugwasye kuyeeya mbwayeeya.—Isaya 55:9.

6, 7. (a) Ino pobwe lya Kkilisimasi lyaambwa kuti ndyakuyeeya nzi, alimwi sena basikutobela Jesu bamumwaanda wamyaka wakusaanguna bakali kulisekelela? (b) Ino mapobwe aajatikizya buzuba bwakuzyalwa akaswaanganizyidwe kunzi kuciindi cabasikwiiya ba Jesu bakusaanguna?

⁶ Ibukombi bwamuntu bulakonzya kusofwaazyigwa abukombi bwakubeja mumakani aajatikizya mazuba aakulyookezya aadumide. Mucikozyanyo amulange-lange kujatikizya zya Kkilisimasi. Kkilisimasi waambwa kuti mbuzuba nokuyeeyegwa kuzyalwa kwa Jesu Kristo, alimwi bunji bwazikombelo izilitaminina kuti zitobela Bunakristo, zilabusekelela. Nokuba boobo, kunyina bumboni buliko bwakuti basikwiiya ba Jesu bamumwaanda wamyaka wakusaanguna bakali kububikkila maanu buzuba bwakulyookezya oobo. Ibbuku litegwa Sacred Origins of Profound Things lyaamba kuti: “Kwamyaanda yamyaka yobile kuzwa ciindi Kristo naakazyalwa,  kunyina wakazyi alimwi mbasyoonto buyo ibakajisi luyandisisyo lwakuzyiba ciindi cini naakazyalwa.”

⁷ Alimwi buya basikwiiya ba Jesu nobakali buzyi buzuba bwini mbwaakazyalwa, kunyina nobakali kunga babusekelela. Nkaambo nzi? Nkaambo mbubwenya bbuku lya The World Book Encyclopedia mbolyaamba, Banakristo bakusaanguna “bakali kubona kusekelela kuzyalwa kwamuntu uuli woonse kuti ncilengwa cabantu batamuzyi Leza.” Ikusekelela mazuba aakuzyalwa kulikke kwaambwa mu Bbaibbele kujatikizya beendelezi bobile ibatakali kukomba Jehova. (Matalikilo 40:20; Marko 6:21) Ikusekelela buzuba bwakuzyalwa alimwi kwakali kucitwa nokulemekwa baleza bakubeja. Mucikozyanyo, mu May 24 ibana Roma bakali kusekelela kuzyalwa kwaleza mwanakazi uutegwa Diana. Ibuzuba bwakatobela, bakali kusekelela kuzyalwa kwaleza wabo wazuba uutegwa Apollo. Aboobo imapobwe aajatikizya buzuba bwakuzyalwa akaswaangene abantu batakombi Leza ikutali Banakristo pe.

8. Amupandulule mapobwe aakusekelela buzuba bwakuzyalwa mbwaaswaangene amasalamuzi.

⁸ Kuli kaambo kambi kakapa kuti Banakristo bamumwaanda wamyaka wakusaanguna kabatasekeleli buzuba bwakuzyalwa bwa Jesu. Kulangilwa kuti basikwiiya bakwe bakalizyi kuti imapobwe aajatikizya buzuba bwakuzyalwa akaswaangene amasalamuzi. Mucikozyanyo, iba Giliki aba Roma banji kaindi bakali kusyoma kuti kwakali muzimo wakali kujanika muntu aumwi azyalwa alimwi muzimo ooyo wakali kumugwasya mubuumi bwakwe boonse. Ibbuku litegwa The Lore of Birthdays lyaamba kuti: “Imuzimo ooyu wakaliswaangene munzila yamasalamuzi aleza wakazyalwa mubuzuba oobo bwazyalwa muntu ooyo.” Masimpe Jehova inga tanaakkomana apobwe liswaanganya Jesu kumasalamuzi. (Isaya 65:11, 12) Aboobo ino nkaambo nzi bantu banji ncobasekelela Kkilisimasi?

9. Mbuti buzuba bwamu December 25 mbobwakasalwa kuba buzuba busekelelwa kuzyalwa kwa Jesu?

⁹ Kwakaindide myaanda-myaanda yamyaka kuzwa ciindi Jesu naakali anyika bantu nobakatalika kuyeeya kuzyalwa kwakwe mu December 25. Pele buzuba oobo tiibwakali mbobuzuba Jesu  naakazyalwa, mbwaanga walo ulangilwa kuti wakazyalwa mu October. * Aboobo ino nkaambo nzi buzuba bwamu December 25 ncobwakasalilwa? Bamwi kumbele ibakalyaamba kuti Mbanakristo cakutadooneka “bakalombozya buzuba bwakali kweendelana apobwe lyabantu batakombi Leza bana Roma lyakali lyakusekelela ‘kuzyalwa kwazuba litakonzyeki kuzunda.’” (The New Encyclopædia Britannica) Lyamupeyo, eelyo zuba nolyakali kulibonya kuti talikwe nguzu kapati, bantu batamuzyi Leza bakali kuba amapobwe kutegwa zuba ikwakali kuzwa kukasaala alimwi amumuni lipiluke kuzwa kooko kule nkolyakabede. Ibuzuba bwamu December 25 bwakayeeyegwa kuti mbobuzuba izuba nolyakatalika kupiluka. Mukusoleka kusandula bantu batamuzyi Leza, basololi bazikombelo bakazumina pobwe eeli akusoleka kulicita mbuli kuti ndya “Bunakristo.” *

10. Ino nkaambo nzi bantu bamwi kaindi ncobatakali kusekelela Kkilisimasi?

¹⁰ Imakani aakuti Kkilisimasi ndipobwe liswaangene abantu batamuzyi Leza alizyibidwe kwaciindi cilamfwu kapati. Akaambo kakuti taliyeeme amagwalo, ipobwe lya Kkilisimasi lyakalesyegwa ku England alimwi azisi zimwi zyaku Amelika mumwaanda wamyaka wa 17. Kufwumbwa muntu wakali kulovwa kumilimo lyabuzuba bwa Kkilisimasi wakali kubbadela. Nokuba boobo, tiilyakalampa pe izilengwa zyakaindi zyakaduma alimwi, alimwi izilengwa zipya zimwi zyakayungizyigwa. Kkilisimasi alimwi bwakaba buzuba bwakulyookezya budumide kapati, alimwi bucidumide kapati asunu  muzisi zinji. Pele akaambo kakuti ipobwe lya Kkilisimasi liswaangene abukombi bwakubeja, aabo ibayanda kukkomanisya Leza tabalisekeleli pe naa buzuba bumbi bwakulyookezya ibuswaangene abukombi bwabantu batamuzyi Leza. *

11. Nkaambo nzi bantu bamwi ncobasekelela mazuba aakulyookezya, pele ino ncinzi ncotweelede kubona kuti nceciyandika kapati?

¹¹ Bamwi balazuminizya kuti imazuba aakulyookezya mbuli bwa Kkilisimasi akatalika abantu batamuzyi Leza, pele balimvwa kuti tacilubide pe ikwaasekelela. Mubwini, ibunji bwabantu tabayeeyi bukombi bwakubeja eelyo nobasekelela mazuba aakulyookezya aaya. Imapobwe aaya alimwi apa kuti mikwasyi ijane ciindi cakuswaangana. Sena mbomulimvwa oobu? Ikuti naa mbomulimvwa, cakutadooneka nduyando ndomujisi kujatikizya mukwasyi, ikutali kuyanda bukombi bwakubeja icipa kuti kukakatila kubukombi bwakasimpe cilibonye kuti nciyumu. Amusyomezyegwe kuti Jehova iwakatalisya mukwasyi uyanda kuti kamumvwana abasazinyoko. (Ba-Efeso 3:14, 15) Pele mulakonzya kuyumya cilongwe canu munzila nzyakkomanina Leza. Ikujatikizya makani ngotweelede kubikkila maanu kapati kwiinda zyoonse, imwaapostolo Paulo wakalemba kuti: “Amusunkulule, kuti muzibisye zintu zibotezya Mwami.”—Ba-Efeso 5:10.

12. Amupe cikozyanyo kujatikizya kaambo ncotweelede kutantamuka zilengwa amapobwe aajisi matalikilo aasofweede?

¹² Ambweni mulimvwa kuti matalikilo aamazuba aakulyookezya tatuli ntotwaambo tupa kuti kaasekelelwa sunu. Sena kuli makani kujatikizya mbwaakatalika? Inzya! Mucikozyanyo: Amweezyeezye kuti mwabona nswiti ansi aali tombe. Sena inga mwiibweza nswiti eeyo akwiilya? Peepe! Inswiti eeyo ilaatombe. Mbubwenya mbuli nswiti eeyo, imazuba aakulyookezya alakonzya kaakkomanisya, pele matalikilo aangawo alisofweede. Ikutegwa tukakatile kubukombi bwakasimpe, zintu tweelede kuzilanga mbwaakali kuzilanga musinsimi Isaya iwakaambila bakombi  bakasimpe kuti: “Mutaampi cintu niciba cimwi cisofweede.”—Isaya 52:11.

13. Ino mbuyumuyumu nzi mbomunga mwaba ambubo ikuti kamutatoli lubazu mumapobwe aamazuba aakulyookezya?

¹³ Kulakonzya kuba buyumuyumu nomusala kutatola lubazu mumapobwe aamazuba aakulyookezya. Mucikozyanyo, mbomubeleka limwi balakonzya kugambwa ncomutajatikizyigwi muzintu zimwi zicitwa kujatikizya mazuba aakulyookezya kumilimo nkomubeleka. Ncinzi ncomunga mwacita ikuti mwapegwa cipego ca Kkilisimasi? Sena inga calubila ikuti mwacitambula? Ino kuti ngomukwetene limwi tasyomi nzyomusyoma? Ncinzi ncomunga mwacita kutegwa bana banu batalimvwi kuti kuli ncobaindwa akaambo kakutasekelela mazuba aakulyookezya?

14, 15. Ncinzi ncomunga mwacita ikuti mwaanzyigwa kujatikizya buzuba bwakulyookezya naa ikuti umwi kayanda kumupa cipego?

¹⁴ Muyandika bupampu kutegwa muzyibe mbomunga mweendelezya bukkale abumwi. Ikuti naa mwaanzyigwa amuntu ngomutazyibene kabotu kujatikizya buzuba bwakulyookezya bumwi, mulakonzya kwiile kwiingula cabupampu. Pele ino mbuti kuti mwaanzyigwa amuntu ngomubonana lyoonse naa ngomubeleka limwi? Nocili boobo, inga mwayanda kubandika zinji. Mumbazu zyoonse zyobile, amubone kuti tiimwamufwumpula pe. Ibbaibbele lilailila kuti: “Kwaamba kwanu kulweezegwe amunyo wakulumba, kuti mube abusongo bwakutyaba kabotu kubantu boonse bamubuzya makani.” (Ba-Kolose 4:6) Amucenjele kapati kuti mutatondezyi kuti tamubalemeki bantu. Muciindi caboobo, cabusongo amupandulule nzyomusyoma. Amupandulule kabotu-kabotu kuti cili buyo kabotu kulindinywe kupana zipego alimwi akubungana lyamapobwe, pele inga mwalombozya kutola lubazu muzintu eezyo mubuzuba bumbi.

¹⁵ Ino mbuti kuti muntu umwi wayanda kumupa cipego? Ibukkale mbobuyooyendelezya ncomuyoocita. Sikucipa ulakonzya kwaamba kuti: “Ndilizyi kuti tamusekeleli buzuba bwakulyookezya. Nokuba boobo, ndiyanda kumupa cintu eeci.” Mulakonzya kuyeeya kuti ikutambula cipego mubukkale buli boobo taceelene akutola lubazu mupobwe lyabuzuba bwakulyookezya. Ee, ikuti  sikupa katazizyi nzyomusyoma, inga mwamwaambila kuti tamusekeleli buzuba bwakulyookezya. Eeci inga cagwasya kupandulula ncomuzumina kupegwa zipego, pele ncomutapi zipego buzuba oobo. Kulubazu lumbi, inga caba camaanu ikucikaka cipego ikuti cabonwa kuti sikucipa ujisi makanze aakutondezya kuti tamukakatili kuzintu nzyomusyoma naa kuti inga mwajokoloka akaambo kakuyanda kupegwa cipego.

16. Mbuti mbomunga mwabelesya bupampu nomweendelezya makani aajatikizya mazuba aakulyookezya?

¹⁶ Ino mbuti kuti banamukwasyi tabasyomi nzyomusyoma? Alimwi amucenjele, mutabafwumpuli pe. Tamweelede kukazyanya kujatikizya cilengwa naa pobwe limwi eelyo basazinyoko ndyobasekelela. Muciindi caboobo, amubalemeke kujatikizya kulanga zintu nkobajisi mbubwenya anywebo mbomuyanda kuti bamulemeke kujatikizya mbomuzilanga zintu. (Amubale Matayo 7:12) Amutantamuke zintu zinga zyamupa kubonwa kuti mutola lubazu mupobwe lyabuzuba bwakulyookezya. Nokuba boobo, amuzyeendelezye cabusongo zintu caboola kumakani aatajatikizyi kusekelela kwini. Ee, lyoonse mweelede kucita zintu munzila iiyoomupa kuzumanana amanjezyeezya aali kabotu.—Amubale 1 Timoteo 1:18, 19.

17. Mbuti mbomunga mwagwasya bana banu kutalimvwa kuti baindwa akaambo kakubona kuti bamwi bali mukusekelela mazuba aakulyookezya?

¹⁷ Ncinzi ncomunga mwacita ikutegwa bana banu batalimvwi kuti baindwa akaambo kakuti tabasekeleli mazuba aakulyookezya aateendelani amagwalo? Izinji ziyeeme azintu nzyomucita muziindi zimbi zyamwaka. Bazyali bamwi bacita bubambe bwakuba aciindi cakupa zipego kubana babo. Icipego cimwi cibotu kapati ncomunga mwapa bana banu nkuba ambabo alimwi akubalanganya caluyando.

18. Mbuti kujanika kumiswaangano ya Bunakristo mbokunga kwamugwasya kukakatila kubukombi bwakasimpe?

¹⁸ Ikutegwa mukkomanisye Leza, mweelede kukaka bukombi bwakubeja alimwi akukakatila kubukombi bwakasimpe. Ino eeci  cibikkilizya nzi? Ibbaibbele lyaamba kuti: “Katunga katuyeeyana, katubusyanya-busyanya mukuyandana akucita milimo mibotu. Tutanoonga katuleka kulibunga-bunga, mbuli bamwi mbubaleka, anu kamucenjezyanya twaambo, kamucita obuya lyoonse mbomukubwene kuti buzuba bwa-Kristo buli afwaafwi.” (Ba-Hebrayo 10:24, 25) Imiswaangano ya Bunakristo nziindi zyalukkomano zyakuti mukombe Leza munzila njakkomanina. (Intembauzyo 22:22; 122:1) Lyamiswaangano iili boobo, kuli ‘kuyumizyanya mulusyomo’ akati ka Banakristo basyomeka.—Ba-Roma 1:12.

19. Nkaambo nzi ncociyandika kapati kuti mwaambile abambi zintu nzyomwaiya mu Bbaibbele?

¹⁹ Inzila imbi mbomunga mwakakatila kubukombi bwakasimpe nkwiinda mukwaambila bamwi zintu nzyomwazyiba kwiinda mukwiiya Bbaibbele a Bakamboni ba Jehova. Mmasimpe bantu banji ‘balalila akutongela’ akaambo kabubi bucitika munyika sunu. (Ezekieli 9:4) Ambweni kuli bantu mbomuzyi ibalila akutongela. Amubaambile zintu nzyomulangila izyaambwa mu Bbaibbele. Mbomuyanzana a Banakristo bakasimpe alimwi akwaambila bambi kujatikizya njiisyo zibotu alimwi zyakasimpe zili mu Bbaibbele nzyomwaiya, muyoojana kuti ikulombozya zilengwa zyabukombi bwakubeja koonse nkomwakacijisi mumoyo kunooyaabumana. Amusinizyigwe kuti munookkomene cini-cini alimwi muyoolongezyegwa kapati ikuti mwakakatila kubukombi bwakasimpe.—Malaki 3:10.