1, 2. Bihain long yu lusim lotu giaman, yu mas mekim wanem askim long yu yet? Yu ting bilong wanem dispela em i bikpela samting?

SAPOS yu painimaut olsem wanpela man i bin putim marasin nogut long hap yu save kisim wara long en, na nau wara i go nogut olgeta na inap kilim i dai ol man. Bai yu mekim wanem? Hariap bai yu go painim gutpela wara long narapela hap. Tasol bihain long dispela bai yu tingting yet long wanpela bikpela askim, ‘Marasin nogut i bagarapim mi pinis?’

² Wankain samting i kamap long ol samting bilong lotu giaman. Baibel i tok ol tok na pasin i no klin i stap insait long lotu giaman. (2 Korin 6:17) Olsem na em i bikpela samting long yu mas lusim ‘Bikpela Babilon,’ em olgeta lotu giaman long graun. (KTH 18:​2, 4) Olsem wanem? Yu mekim pinis dispela samting? Sapos yu bin mekim, dispela em i gutpela samting tru. Tasol pasin bilong lusim o rausim nem bilong yu yet long wanpela lotu giaman i no inap. Bihain long yu mekim olsem, yu mas askim yu yet, ‘Sampela tingting o pasin bilong lotu giaman i stap yet long mi?’ Tingim sampela samting olsem.

3. (a) Baibel i tok wanem long pasin bilong yusim ol imis? Bilong wanem sampela inap hatwok long kisim tingting bilong God long dispela samting? (b) Yu mas mekim wanem long ol samting yu holim em ol i bilong mekim lotu giaman long en?

³ Sampela i gat ol imis long haus bilong ol inap planti yia  pinis. Olsem wanem? Yu gat sampela imis long haus bilong yu? Sapos yu gat, ating yu pilim olsem i no gutpela na i no stret long beten long God sapos yu no mekim wok long ol imis. Ating yu laikim tru sampela bilong ol dispela imis. Tasol God yet i tokim yumi long pasin yumi mas lotuim em long en, na Baibel i tok em i no laik bai yumi yusim ol imis. (Kisim Bek 20:​4, 5; Song 115:​4-8; Aisaia 42:8; 1 Jon 5:21) Olsem na yu ken strong long bihainim lotu i tru long rot bilong bagarapim ol samting yu holim em ol i bilong mekim lotu giaman long en. Yu mas kisim wankain tingting long ol dispela samting olsem Jehova i gat​—ol i samting nogut tru.​—Lo 27:15.

4. (a) Olsem wanem yumi ken save olsem pasin bilong lotuim ol tumbuna i no inap helpim yumi liklik? (b) Bilong wanem Jehova i tambuim lain bilong em long no ken traim long toktok wantaim ol man i dai pinis?

⁴ Insait long planti lotu giaman ol i save lotuim ol tumbuna. Paslain long ol i bin kisim save long tok i tru, sampela i bilip olsem ol man i dai pinis ol i stap long wanpela ples spirit na ol inap helpim o nogutim ol man i stap laip yet. Ating bipo yu bin mekim planti samting bilong amamasim ol tumbuna i dai pinis. Tasol olsem yu lainim long Sapta 6 bilong dispela buk, ol man i dai pinis ol i no save long wanpela  samting. Olsem na pasin bilong traim long toktok wantaim ol i no inap helpim yu liklik. Sapos i luk olsem sampela tok i kam long wanpela long famili i dai pinis, dispela tok i kam long ol spirit nogut. Olsem na Jehova i tambuim ol Israel long traim long toktok wantaim ol man i dai pinis o long insait long ol samting bilong ol spirit nogut.​—Lo 18:​10-12.

5. Yu ken mekim wanem sapos bipo yu bin insait long pasin bilong yusim ol imis o lotuim ol tumbuna?

⁵ Sapos bipo yu bin insait long lotu i save yusim ol imis o lotuim ol tumbuna, orait yu inap mekim wanem? Ritim na skelim long bel ol tok bilong Baibel i kamapim tingting bilong God long ol dispela samting. Beten long Jehova long olgeta de na tokim em long laik bilong yu long bihainim lotu i tru, na askim em long helpim yu long kisim wankain tingting olsem em.​—Aisaia 55:9.

6, 7. (a) Ol man i tok ol i mekim Krismas bilong tingim wanem samting? Ol disaipel bilong Jisas long bipo i mekim dispela samting? (b) Long taim bilong ol disaipel bilong Jisas long bipo, ol man i ting ol betde pati em pasin bilong husat?

⁶ Pasin bilong man long mekim lotu inap kamap doti sapos em i insait long ol bikpela de em lotu giaman i save mekim. Tingim Krismas. Ol man i tok ol i mekim Krismas bilong tingim de mama i karim Jisas Krais, na klostu olgeta lotu i gat nem Kristen i save mekim Krismas. Tasol i no gat wanpela samting i soim olsem ol disaipel bilong Jisas long bipo i bin tingim dispela bikpela de. Wanpela buk (Sacred Origins of Profound Things) i tok: “Inap 200 yia bihain long mama i karim Jisas, i no gat wanpela man i save, na i no gat planti man i tingim liklik, de stret mama i bin karim em.”

⁷ Maski sapos ol disaipel bilong Jisas i bin save long de stret mama i karim em, ol bai i no mekim bung bilong tingim dispela. Bilong wanem? Long wanem, olsem wanpela buk (The World Book Encyclopedia) i tok, ol Kristen bilong pastaim “i  ting pasin bilong tingim betde bilong man i wanpela pasin bilong ol haiden.” Baibel i stori long tupela betde pati tasol, em bilong tupela bikman i no lotuim Jehova. (Stat 40:20; Mak 6:21) Na tu, ol haiden i bin mekim ol betde pati bilong litimapim nem bilong ol god bilong ol. Olsem: Long Me 24 ol Rom i amamasim betde bilong god meri Diana. Long de bihain, ol i mekim betde pati bilong god bilong san, Apolo. Olsem na ol betde pati em samting bilong ol haiden, na i no samting bilong ol Kristen.

8. Stori long olsem wanem ol betde pati na bilip giaman i poroman wantaim.

⁸ I gat narapela as na ol Kristen long taim bilong ol aposel i no tingim betde bilong Jisas. Ol disaipel i save ol bilip giaman i insait long ol betde pati. Olsem: Planti man bilong Grik na Rom bilong bipo i bilip olsem wanpela spirit i stap taim mama i karim pikinini na dispela spirit i lukautim dispela pikinini long olgeta de em i stap laip. Wanpela buk (The Lore of Birthdays) i tok: “Dispela spirit i was long pikinini, em i poroman wantaim dispela god i gat betde long seim det olsem pikinini.” Jehova bai no amamas long ol pasin i kirapim ol man long ting Jisas i insait long ol bilip giaman. (Aisaia 65:​11, 12) Olsem na bilong wanem planti man i save mekim Krismas?

9. Olsem wanem ol man i bin kirap tingim Disemba 25 olsem de mama i bin karim Jisas?

⁹ Inap sampela handet yia bihain long taim Jisas i stap long graun, ol man i kirap tingim olsem de mama i bin karim Jisas em Disemba 25. Tasol mama i no bin karim Jisas long dispela de, i luk olsem mama i bin karim em long Oktoba. * Olsem na bilong wanem ol i makim Disemba 25? Sampela man em bihain ol i tok ol i Kristen, ol i “laik bai det mama i bin karim Jisas i wankain olsem det bilong ol haiden bilong Rom long  mekim bung bilong tingim ‘betde bilong san.’ ” (The New Encyclopædia Britannica) Long taim bilong kol, em taim i luk olsem san i no gat bikpela strong, ol haiden i mekim ol bung bilong kirapim san i save hatim skin na givim lait, long kam bek long longpela raun bilong en. Ol i ting Disemba 25 em i de san i kirap long kam bek. Bilong kirapim ol haiden long kamap Kristen, ol bikman bilong lotu i kirap mekim dispela bung na ol i traim long mekim dispela bung i kamap olsem samting bilong ol Kristen. *

10. Bilong wanem sampela man i no bin mekim Krismas long bipo?

¹⁰ Inap longpela taim pinis, ol man i save olsem ol haiden i as bilong Krismas. Baibel i no as bilong Krismas, olsem na sampela haptaim namel long yia 1600 i go 1700, ol i bin tambuim Krismas long Inglan na long sampela hap bilong Amerika em Inglan i bin bosim. Man i stap long haus na i no go wok long de Krismas, em i mas baim kot. Tasol i no longtaim na ol man i kirap bihainim gen ol olpela pasin bilong Krismas, na ol i kisim sampela nupela pasin tu. Krismas i kamap gen olsem wanpela bikpela de, na long nau tu em i wanpela bikpela de long planti kantri. Tasol Krismas em samting bilong lotu giaman, olsem na ol man i laik mekim ol samting God i laikim, ol i no mekim Krismas o sampela arapela bikpela de em lotu haiden i as bilong en. *

11. Bilong wanem sampela man i save amamasim ol bikpela de? Yumi mas ting wanem samting i nambawan bikpela samting?

¹¹ Sampela i wanbel long tok olsem ol haiden i as bilong sampela bikpela de olsem Krismas, tasol ol i no ting i gat rong long amamasim ol dispela de. Planti man i no tingting long lotu giaman taim ol i mekim ol bung bilong tingim ol bikpela de. Na tu, ol dispela bung i opim rot long ol famili i ken bung wantaim. Yu save tingting olsem tu? Sapos olsem, ating pasin bilong laikim tru famili, na i no pasin bilong laikim lotu giaman, i mekim na i hatwok long yu long kirap bihainim lotu i tru. Tasol yu ken bilip tru olsem Jehova​—as bilong famili​—em i laik bai yu pas gut wantaim ol wanblut bilong yu. (Efesus 3:​14, 15) Tasol yu inap mekim ol samting bilong pas gut wantaim famili long ol rot God i orait long en. Aposel Pol i tok long samting yumi mas ting em i nambawan bikpela samting, em i tok: “Yupela i mas trai long kisim save long ol pasin Bikpela i save laikim.”​—Efesus 5:10.

12. Kamapim tok piksa i soim bilong wanem yumi mas abrusim ol pasin na bikpela de em as tru bilong en i nogut.

¹² Ating yu pilim olsem as tru bilong bikpela de i no kirapim ol man long amamasim ol dispela de long nau. Olsem wanem? As tru bilong ol bikpela de i bikpela samting? Yes, em i bikpela samting! Olsem: Tingim olsem yu lukim wanpela loli i slip long graun. Bai yu kisim dispela loli na kaikai? Nogat, bai yu no mekim olsem! Dispela loli i doti. Olsem dispela loli, i luk olsem ol bikpela de i gutpela samting, tasol ol i kam long ol ples i doti. Bilong bihainim lotu i tru, yumi mas i gat wankain tingting olsem profet Aisaia, em i tokim ol man i lotu tru long God, olsem: “Lukaut gut, nogut yupela i pas long ol samting i no klin.”​—Aisaia 52:11.

13. Wanem sampela hevi inap kamap taim yu no insait long ol amamas bilong ol bikpela de?

¹³ Sampela hevi inap kamap taim yu no laik insait long ol  amamas bilong ol bikpela de. Olsem: Ating ol wanwok i laik save long as na yu no laik insait long pati samting i kamap long ples wok bilong amamasim sampela bikpela de. Olsem wanem sapos wanpela i laik givim Krismas presen long yu? I gat rong sapos yu kisim dispela presen? Olsem wanem sapos poroman marit bilong yu i no gat wankain bilip olsem yu? Yu ken mekim wanem na bai ol pikinini bilong yu i no ting ol i lus long sampela gutpela samting, long wanem, ol i no insait long ol amamas bilong ol bikpela de?

14, 15. Yu inap mekim wanem sapos wanpela i tok ‘Hepi Krismas’ samting long yu o i laik givim wanpela presen long yu?

¹⁴ Yu mas bihainim gutpela tingting taim yu makim ol samting yu bai mekim. Sapos wanpela i tok ‘Hepi Krismas’ samting, yu ken tok tenkyu tasol. Tasol olsem wanem sapos em i wanpela man yu save lukim em oltaim o wok wantaim em? Long kain man olsem, ating yu laik mekim sampela tok moa. Tasol oltaim yu mas toktok long gutpela pasin. Baibel i tok: “Oltaim yupela i mas mekim gutpela tok tasol, em olkain tok ol man i save laik long harim. Yupela i mas tingting gut na traim long bekim gut tok bilong olgeta man.” (Kolosi 4:6) Soim rispek long ol narapela. Long gutpela pasin stori gut long bilip bilong yu. Kamapim klia olsem yu no gat tok long pasin bilong givim ol presen na bung wantaim ol narapela, tasol yu laik mekim ol dispela samting long narapela taim.

¹⁵ Olsem wanem sapos wanpela i laik givim presen long yu? Yu mas skelim ol samting i kamap long dispela taim. Man i laik givim presen inap tok: “Mi save yu no save amamasim dispela bikpela de. Tasol mi laik givim dispela presen long yu.” Yu inap ting sapos yu kisim presen long kain taim olsem, dispela i no makim olsem yu insait long pasin bilong tingim dispela bikpela de. Tasol sapos man bilong givim presen i no save long bilip bilong yu, orait yu inap tokim em olsem yu no save amamasim dispela bikpela de. Dispela bai helpim man long save long as na yu orait long kisim presen, tasol yu yet i no givim wanpela presen long dispela taim. Tasol i no gutpela long kisim presen sapos as na man i givim presen em bilong soim  olsem yu no save bihainim ol bilip bilong yu o yu redi long lusim bilip sapos yu inap kisim sampela samting bilong skin.

16. Olsem wanem yu ken bihainim gutpela tingting taim yu skelim ol samting bilong ol bikpela de?

¹⁶ Olsem wanem sapos sampela long famili i no gat wankain bilip olsem yu? Toktok long gutpela pasin. I no gat wok long toktok planti long olgeta kastam o bikpela de ol wanblut bilong yu i laik bihainim. Yu mas rispektim rait bilong ol long bihainim tingting bilong ol, wankain olsem yu laik bai ol i rispektim rait bilong yu long bihainim tingting bilong yu. (Matyu 7:12) Abrusim olgeta kain wok samting i makim olsem yu insait long pasin bilong tingim bikpela de. Tasol yu no ken strong tumas long sakim ol wok samting i no insait long pasin bilong tingim bikpela de. Oltaim yu mas mekim ol samting i stret wantaim maus bilong bel bilong yu.​—1 Timoti 1:​18, 19.

17. Yu ken mekim wanem na bai ol pikinini bilong yu i no ting ol i lus long sampela gutpela samting taim ol i lukim ol narapela i amamas long ol bikpela de?

¹⁷ Yu ken mekim wanem na bai ol pikinini bilong yu i no ting ol i lus long sampela gutpela samting, long wanem, ol i no insait long amamas bilong ol bikpela de em Baibel i no as bilong ol? Ol samting yu mekim long ol narapela taim bilong yia i bikpela samting. Sampela papamama i save makim taim bilong givim ol presen long ol pikinini. Wanpela gutpela presen tru yu inap givim long ol pikinini bilong yu, em taim bilong yu na gutpela pasin bilong yu long tingim na laikim tru ol.

18. Olsem wanem pasin bilong go long ol miting Kristen i ken helpim yu long strong long bihainim lotu i tru?

¹⁸ Bilong God i ken amamas long yu, yu mas sakim lotu giaman na strong long bihainim lotu i tru. Wanem ol samting i insait long dispela? Baibel i tok: “Yumi wan wan i mas tingting tu long ol arapela manmeri bilong God, na painim rot  bilong kirapim ol long laikim ol arapela na mekim ol gutpela pasin long ol. Na yumi ol manmeri bilong God i no ken lusim pasin bilong bung wantaim, olsem sampela man i save mekim. Nogat. Yupela i save, De bilong Krais em i kam klostu. Olsem na yumi wan wan i mas wok strong moa long strongim bel bilong ol arapela.” (Hibru 10:​24, 25) Long ol miting Kristen yu ken amamas long lotuim God long rot em i orait long en. (Song 22:22; 122:1) Long ol dispela miting, ol Kristen i save “strongim bel” bilong narapela narapela.​—Rom 1:12.

19. Bilong wanem em i bikpela samting long yu tokim ol narapela man long ol samting yu kisim save long en long Baibel?

¹⁹ Narapela rot bilong bihainim lotu i tru, em pasin bilong tokim ol narapela man long ol samting yu bin lainim taim yu stadi long Baibel wantaim ol Witnes Bilong Jehova. Planti man i “bel nogut na i wari” long ol pasin nogut i wok long kamap long dispela graun long nau. (Esekiel 9:4) Ating yu save long sampela manmeri i wari olsem. Gutpela sapos yu tokim ol long ol gutpela samting yu wetim bai kamap bihain em Baibel i as bilong en. Taim yu bung wantaim ol trupela Kristen na tokim ol narapela man long ol gutpela tok i tru bilong Baibel yu bin lainim, bai yu lukim olsem laik bilong yu long insait long ol pasin bilong lotu giaman bai pinis isi isi. Yu ken save olsem yu bai amamas tru na kisim planti blesing sapos yu strong long bihainim lotu i tru.​—Malakai 3:10.