1, 2. Меге шажындан ойталаан соонда чүнүң дугайында боданыр болза эки база ол чүге чугула?

 СЭЭҢ ижип турар кудууңда сугну бир-ле кижи хораннап каапкан дижик. Чүнү канчаар сен? Дүрген-не өске арыг суглуг кудук дилээрин кызыдар боор сен. Ынчалза-даа ооң соонда мага-бодуң хораннанган бе дээрзин, база хынаар апаар сен.

² Ол-ла дүрүм меге шажынга база хамааржыр. Ол арыг эвес өөредиглер болгаш ёзулалдар-биле хораннанган деп Библияда чугаалаан (2 Коринфичилерге 6:17). Ынчангаш «улуг хоорай Вавилондан» — делегей чергелиг меге шажынның ниити бөлүүнден үнери дыка чугула (Ажыдыышкын 18:2, 4). Ол базымны кылдың бе? Кылган болзуңза, эр хей-дир сен. Ынчалзажок меге шажындан аңгыланыр дизе, оон-даа хөй чүүл негеттинер. Меге шажын-биле холбашкан бүгү-ле чүүлден хосталган мен бе? — деп шыңгыы боданыры чугула. Каш чижектен сайгарып көрээлем.

3. а) Дүрзү-хевирлерге чүдүүрүнүң дугайында Библияда чүнү чугаалаан база чамдык улуска Бурганның көрүжүн хүлээп алыры чүге берге бооп турар? б) Меге шажын-биле холбашкан шупту эдилелдерни канчаар болза эки?

³ Хөй улус чыл-чылы-биле бажыңында шажынга хамаарышкан дүрзү-хевирлерни болгаш ыдыктыг эдилелдерни  шыгжап чоруур. Сенде ындыг эдилелдер бар бе? Олар чокта Бурганга мөргүүрү болдунмас деп, бодап турар чадавас сен. Ол эдилелдерниң чамдыызы сеңээ ылаңгыя эргим боор чадавас. Ынчалза-даа Бурганга канчаар чүдүүрүн чүгле Бурган боду шиитпирлээр. Дүрзү-хевирлер дузазы-биле аңаа чүдүүрүн Бурган күзевес деп, Библия өөредип турар (Хосталыышкын 20:4, 5; Ырлар 113:12—16; Исаия 42:8; 1 Иоанның 5:21). Ынчангаш алыс шын шажынның оруун шилип алыры дээрге, сенде бар меге шажын-биле холбашкан шупту эдилелдерни узуткаары-дыр. Ол эдилелдерге хамаарылгавыс Иегованың дег болур ужурлуг, а ол ону «чүдек-бужар чүүл» кылдыр санап турар (Хоойлу 27:15).

4. а) Өлген улустар-биле харылзажыры утка чок деп, кайыын билир бис? б) Иегова бодунуң чонунга илби-шиди кылырындан, төлге салырындан база караң көрнүрүнүң шупту хевирлерин ажыглаарын чүге хоруп кааныл?

⁴ Меге шажыннарның хөй кезиинде кижилер өлген улуска мөгейип турар. Чамдык улус библейжи алыс шынны билип алырының мурнунда, кижилер өлген соонда, сүнезин болу бергеш, дириг кижилерге дузалажыр, чок болза хора чедирер деп бүзүреп турган. Калган ада-өгбелерниң сүннезиннериниң аайынга кирер дээш, ооң мурнунда хөйнү кылып турган  чадавас сен. Ынчалза-даа өлүм соонда чуртталга чок деп 6-гы эгеден билип алдывыс. Ынчангаш өлген улустар-биле харылзажыры утка чок. Өлген улустан дамчыткан деп санаттынар кандыг-даа медээлер херек кырында буктардан кээп турар. Ол дээш Иегова израильчилерге өлген улустуң сүннезиннерин кыйгырып база илби-шиди кылырындан, төлге салырындан база караң көрнүрүнүң шупту хевирлерин ажыглаарын хоруп каан (Хоойлу 18:10—12).

5. Бир эвес дүрзү-хевирлер азы өлген улуска мөгеери чүдүлгеңниң кезии турган болза, чүнү канчап болур-дур?

⁵ Бир эвес дүрзү-хевирлерге азы өлген улуска мөгеери сээң чүдүлгеңниң кезии турган болза, чүнү канчап болур сен? Бурганның ындыг өөредиглерге хамаарылгазының дугайында чугаалап турар библейжи шүлүктерни номчу база ханы бодан. Алыс шын шажынның оруун шилип алыр күзелиңни Иеговага хүнүң-не мөргүп чугаала. Үзел-бодалың Бурган-биле дөмей болур кылдыр оон дузадан диле (Исаия 55:9).

6, 7. а) Рождествону кымга тураскааткан база ол байырлалды Иисустуң бир дугаар өөреникчилери демдеглеп турган бе? б) Төрүттүнген хүннер байырлалы бурунгу үеде чүнүң-биле холбаалыг турган?

⁶ Дыка хөй байырлалдар меге шажын-биле холбаалыг. Оларның бирээзи — Рождество-дур. Ол байырлал Иисус Христостуң төрүттүнген хүнү дээш демдеглеттинип турар, база барык шупту христиан шажыннар ол байырлалды эрттирип турар. Иисус Христостуң бир дугаар өөреникчилери Рождествону демдеглеп турган деп бодаар кандыг-даа барымдаа чок. «Бирги болгаш ийиги векте Христостуң төрүттүнген ай-хүнү колдуунда улустуң сагыжынга кирбес турган; улуска ол билдинмес турган» деп шажын чаңчылдарының тывылганының дугайында номда чугаалаан («Sacred Origins of Profound Things»).

⁷ Бир эвес Иисустуң өөреникчилери ооң төрүттүнген хүнүн билир турган-даа болза, олар ону дөмей-ле байырлавас турган. Чүге? «Уорлд бук» деп энциклопедияда чугаалап  турары-биле алырга, бирги христианнар «төрүттүнген хүн байырлаарын, хөй бурганныг шажындан укталган чаңчыл деп санап турган». Иеговага бараалгавайн турган чагырыкчыларга тураскаадып эрттирген, чүгле ийи төрүттүнген хүн дугайында Библияда чугаалаан (Эге дөс 40:20; Марктың 6:21). Оон аңгыда, төрүттүнген хүн байырлаары хөй бурганнарга чүдүүрү-биле база холбаалыг турган. Чижээ, май 24-те бурунгу римчилер Диана деп кыс бурганның төрүттүнген хүнүн байырлап турган. А май 25-те хүн бурганының — Аполлоннуң. Ынчаарга төрүттүнген хүн байырлаары христиан шажынның эвес, а хөй бурганныг шажынның кезээ турган деп көскү-дүр.

8. Төрүттүнген хүн байырлаары бүдүүлүк чорук-биле канчаар холбашканыл?

⁸ Бир дугаар христианнар Иисустуң төрүттүнген хүнүн байырлавайн турганының база бир чылдагааны бар. Төрүттүнген хүн байырлаары бүдүүлүк чорук-биле холбаалыг турганын Иисустуң өөреникчилери билир турган боор. Чижээ, бурунгу гректер болгаш римчилер кижи бүрүзүнде камгалакчы көзүлбес чаяалга бар деп бүзүреп чораан. Ол көзүлбес чаяалга кижи төрүттүнүп турда, ооң-биле кады төрүттүннүп кээр болгаш ону бүгү назынында камгалап, карактаар деп бодап турганнар. «Төрүттүнген хүн байырлаарының үнген дөзү» деп номда чугаалаан: «Кижиниң төрүттүнген хүнүнде төрүттүнген турган бурган-биле ол көзүлбес чаяалга бир-ле кайгамчык арга-биле харылзаалыг деп санаттынар турган» («The Lore of Birthdays»). Оглунуң адын бүдүүлүк чорук-биле холуп турар байырлалдар Иегованың сеткилинге таарышпас болуру чугаажок (Исаия 65:11, 12). Ындыг болза, Рождество канчап ындыг нептереңгей апарганыл?

9. Иисустуң төрүттүнген хүнүн чүге декабрь 25-те демдеглеп турар?

⁹ Иисус Христостуң өлүмүнүң соонда, мырыңай чүс-чүс чылдар эрткенде, ооң төрүттүнген хүнүн декабрь 25-те демдеглеп эгелээн a. Ынчалзажок ол Иисустуң төрүттүнген  хүнү эвес-тир, чүге дээрге ол октябрьда төрүттүнген чадавас b. Ындыг болза, чүге декабрь 25 шилиттингенил? Боттарын христианнар деп санап турган улус «ол хүннү „тиилеттирбес Хүн-бурганының төрүттүнген хүнү“ деп хөй бурганныг рим шажын байырлалы-биле дүүштүрерин» күзээн («Чаа британ энциклопедия»). Кыжын, кажан хүн дурту кыска турда, хөй бурганныг шажынга чүдүүр улус, чылыгның болгаш чырыктың үндезини болур, хүн ырак аян-чоруктан эглип кээрин идегеп, тускай байырлалдар эрттирип чораан. Ооң эглир үези декабрь 25-те эгелээр деп санаттынып турган. Хөй бурганныг шажынга чүдүүр улусту бодунуң бүзүрелинче ээлдирерин күзээш, шажын башкарыкчылары ол байырлалды хоойлужуткаш, аңаа «христиан» хевир киирерин оралдашкан c.

10. Бурунгу үеде чамдык улус Рождествону чүге байырлавайн турган?

¹⁰ Рождество хөй бурганныг шажындан укталган деп шагда-ла билдингир турган. Рождество Библияга үндезилетинмээн боорга, XVII-ги векте ону байырлаарын Англияга болгаш ооң американ колонияларынга хоруп каан турган. Ол хүн ажылче үнмейн, бажыңга артып калган улуска торгаал онаап турган. Ынчалзажок удаваанда кижилерниң амыдыралынче катап бурунгу чаңчылдар эглип келген, база оларга хөй чаа чаңчылдар немешкен. Рождество катап ниити байырлал апарган, ынчангаш хөй чурттарда ол ам-даа нептереңгей хевээр. Бурганның сеткилин өөртүрүн күзээр улус Рождествону база хөй бурганныг  шажындан укталган меге шажын-биле харылзаалыг байырлалдарны эрттирбейн турар d.

11. Чүге чамдык улус байырлалдарны демдеглеп турар, а бисти бир дугаарында чүү дүвүредир ужурлуг?

¹¹ Чамдык улус Рождествону Библиядан укталбаан деп чөпшээрежип турар-даа болза, дөмей-ле ону байырлап турар. Дыка хөй байырлалдар меге шажын-биле харылзаалыг-даа болза, кижилерниң хөй кезии ону херекке албас. Ол дээрге оларга өг-бүлези-биле анаа-ла чыглыр чылдагаан бооп турар. Сен база ынча деп бодаар-дыр сен бе? Бир эвес ийе болза, алыс шынның оруунче туруп алырынга меге шажынга ынакшыл эвес, а өг-бүлезин хомудатпас күзел сеңээ шаптыктаар боор. Ынчалзажок өг-бүлениң Үндезилекчизи, Иегова, төрелдериң-биле хамаарылгаң эки болуп артсын деп күзеп турарынга бичии-даа чигзинме (Ефесчилерге 3:14, 15). Бурганның дүрүмнерин үревейн төрелдер-биле харылзааны быжыглап болур. Бисти бир дугаарында дүвүредир ужурлуг чүүл дугайында Павел элчин бижээн: «Дээрги-Чаяакчыга таарымчалыг чүүлдү тодарадып аарын оралдажыңар» (Ефесчилерге 5:10)

12. Хөй бурганныг шажындан укталган чаңчылдардан болгаш байырлалдардан чүге ойталаар болза эки, чижекке көргүзем.

¹² Бөгүн байырлалдарның утказынче ооң мурнунда дег, кичээнгей салбайн турар деп, бодаар чадавас сен. Байырлалдарның үнген дөзүнче кичээнгей салган херээ бар бе? Ийе! Чижээ, боданып көрем, хирлиг шалбаага конфета көрүп кааш, канчаар сен? Көдүргеш, чиир сен бе? Чок, болбайн! Ол хирлиг болгай! Байырлалдар амданныг конфета дег, күзенчиг болур, ынчалзажок оларның үнген дөзү хирлиг. Алыс шын шажынның оруун шилип алыр дизе, Исаия медээчи ышкаш хөөннүг болур ужурлуг бис. Ол алыс шын Бурганның бараалгакчыларын кыйгырып турган: «Арыг эвес чүүлге дегбеңер» (Исаия 52:11; 2 Коринфичилерге 6:17).

13. Байырлалдарны демдеглевейн баар болзуңза, кандыг бергелер тургустунуп кээп болур?

¹³ Байырлалдар демдеглевес деп шиитпирлеп алгаш, бергелерге таваржып болур сен. Чижээ, байырлалдарга киришпезиңге кады ажылдап турар өөрүң элдепсине берип болур. Рождество дээш сеңээ белек сунар болза, канчаар сен? Ону хүлээп ап болур бе? А бир эвес ашааң азы кадайың чүдүлгеңни деткивейн турар болза, канчаарыл? Нептереңгей байырлалдарны өг-бүле демдеглевейн турар болза, ажы-төл байырлал чок арткан бис дээш муңгаравас кылдыр, оларга канчаар дузалап болур?

14, 15. Бир эвес сеңээ байырлал таварыштыр байыр чедирер азы белек сунар болза, чүнү канчаар болза эки?

¹⁴ Таварылга бүрүзүнде бодамчалыг болуру негеттинер. Бир эвес чай кадында байыр чедирген болза, кичээнгей салганы дээш, кижиге анаа четтиргенин илередип болур. А бир эвес сеңээ бо-ла ужуражыр азы кады ажылдап турар кижи байыр чедирген болза, канчаар сен? Ындыг таварылгада, бодуңнуң үзел-бодалыңны тайылбырлаарын шиитпирлеп болур сен. Чүү-даа болур болза, хүндүткелдиг чугаалажырын кызыт. «Кижи бүрүзүнге херектиг харыы тудуп шыдаар кылдыр, чугааңар үргүлчү чедингир болгаш чечен-мерген болзун» — деп, Библия сүмелеп турар (Колоссчуларга 4:6). Бодуңну хүндүткел чок алдынарындан кичээнип чор. Бодуңнуң үзел-бодалыңны хүндүткелдиг тайылбырлаарын кызыт. Чогум белектерге болгаш кады чыглырынга удур эвес сен деп, ол кижини бүзүрет, чүгле ол байырлалды демдеглевейн турарыңны чугаала.

¹⁵ Бир эвес сеңээ белек сунар болза, чүнү канчаарыл? Дыка хөй чүве үениң байдалындан хамааржыр. Бир-ле кижи мынча деп болур: «Байырлалдар эрттирбейн турарыңны билир мен. Ынчалза-даа мону сеңээ белек кылдыр бериксеп тур мен». Бо таварылгада белекти хүлээп алыры — байырлалга киришкен болур дивээни ол деп, шиитпирлээр чадавас сен. Бир эвес сээң үзел-бодалыңны ол кижи билбес болза, байырлалды чүге демдеглевейн турарыңны чугаалап болур сен.  Ынчан удур чүге белек сунмайн турарыңны тайылбырлаары сеңээ белен болур. Бир талазында, сени бачыт кылырынче күткүүр дээш белекти берип турар болза, азы хууда ажыын бодап турар болзуңза, белекти албайн баары мерген угаанныг болур.

16. Байырлалдарга хамаарышкан айтырыглар тургустунуп кээрге, бодун канчаар эптиг-чымчак алдынарыл?

¹⁶ Бир эвес чоок улузуң сээң үзел-бодалыңны деткивейн турар болза, канчаарыл? Дөмей-ле эптиг-чымчак бол. Өг-бүлениң ёзу-чаңчылы азы байырлал бүрүзү дээш, маргышкан ажыы чок. Сээң саналыңны чоок улузуң хүндүлезин деп бодаар болзуңза, оларның саналын хүндүлээрин кызыт (Матфейниң 7:12). Сени байырлалга киириштирип болур бүгү чүүлден ойтала. Кажан айтырыг байырлалга дорту-биле хамаарышпас болза, бодамчалыг бол. Арын-нүүрүң үргүлчү арыг артар кылдыр, бодуңну шын алдынарын кызыт (1 Тимофейниң 1:18, 19).

17. Өг-бүле нептереңгей байырлалдарны демдеглевейн турар болза, ажы-төл муңгаравас кылдыр, оларга канчаар дузалап болурул?

¹⁷ Өг-бүле библейжи алыс шынга чөрүшкек байырлалдарны демдеглевейн турар болза, ажы-төл байырлал чок арткан бис дээш муңгаравас кылдыр, оларга канчаар дузалап болур? Бүдүн чыл дургузунда чүнү кылып турарыңдан хөй чүве хамааржыр. Чамдык ада-иелер ажы-төлүнге белектерни өске хүннерде албан-биле бээрин кызып турар. Эң-не эки дээн белектерниң бирээзи — үе болгаш кичээнгей-дир.

18. Алыс шынның оруун шилип алырынга христиан хуралдарже баары канчалдыр дузалаар-дыр?

¹⁸ Бурганны өөртүр деп бодаар болза, меге шажын-биле харылзааны үскеш, алыс шынның оруун шилип алыры чугула. Ол чүү дээни ол? Библияда чугаалаан: «Бот-боттарывыска сагыш човаңгыр бооп, ынакшылче база буянныг херектерже бот-боттарывысты ыдалап көрээли. Чыглып, аралажырындан ойталаваалы (чамдык улус аңгыланып  чаңчыга берген болгай), харын бот-боттарывысты деткип көрээли, сөөлгү хүннүң чоокшулап орарын көргеш, улам күштүг деткижээли» (Еврейлерге 10:24, 25). Бурганга тааржыр кылдыр, чүдүүр кайгамчыктыг арганы христиан хуралдар берип турар (Ырлар 21:23; 121:1). Ол хуралдарга шынчы христианнар бот-бодун «удур-дедир деткижип» турар (Римчилерге 1:12).

19. Библиядан билип алган билиглериң-биле үлежири чүге чугула?

¹⁹ Алыс шын шажынның оруун шилип алыры дээрге, Иегованың Херечилери-биле Библияны өөренип тура, билип алган билиглериң-биле үлежири-дир. Делегейде ынча хөй каржының тергиидеп турарын көргеш, хөй улус муңгарап, хомудап турар (Иезекииль 9:4). Сен база ындыг кижилерни таныыр боор сен. Ол улуска Библияның берип турар идегелиниң дугайында чугаалап берзе, кандыгыл? Бир эвес Библияның кайгамчык медээзи-биле долгандыр турар кижилер-биле үлежип, алыс шын христианнар-биле харылзажыр болзуңза, ынчан сээң чүрээңге эргим турган меге шажынның ёзу-чаңчылдарындан чоорту адырлып ап шыдаар сен. Алыс шынның оруун шилип алыр болзуңза, дыка хөй йөрээлдерни алгаш, ёзулуг аас-кежикти чедип алыр сен деп, чигзинме! (Малахия 3:10).