KAPITE HOGOFULU-MA-ONO
Koutou Mulimuli Ki Te Tauhi Mo’oni
Koteā ’aē ’e ako’i mai ’i te Tohi-Tapu ’o ’uhiga mo te faka’aoga’i ’o te ’u fakatātā?
Koteā te manatu ’a te kau Kilisitiano ’o ’uhiga mo te ’u ’aho lalahi faka lotu?
E feafea’i hakotou fakamahino faka’ete’ete ki te haha’i, te ’u me’a ’aē ’e koutou tui kiai?
KOTEĀ ’aē ka koutou fai, mo kapau ’e koutou ’ilo’i ne’e ’ulihi e he tahi te tane vai ’o tokotou kolo, pea ’e mamate anai te haha’i he ne’e nātou ’inu te vai ’aia? ’E mahino ia, ’e koutou ’olo anai ki he tahi kolo, mo kapau ’e feala. Kae ’i takotou ’osi mavae, ’e ’i ai te fehu’i ’e koutou fai: ‘Ne’e kua au pikisia koa ’i taku ’inu te vai ’aia ne’e ’ulihi?’
2 ’E hoko te ’alu’aga ’aia ’i te lotu hala. ’E ako’i mai ’i te Tohi-Tapu ko te tauhi ’aia ’e ’uli ’uhi ko te ’u akonaki hala pea mo te ’u aga he’ema’a. (2 Kolonito 6:17) Koia ’aē ’e ma’uhiga ai ke koutou mavae mai ia “Papiloni Lahi,” te kautahi faka malamanei ’o te ’u lotu hala. (Apokalipesi 18:2, 4, MN) Kua koutou fai koa te fa’ahi ’aia? Kapau kua koutou fai, pea ’e ko he me’a lelei. Kae ’e mole tonu ke gata ’aki pe takotou mavae mai te lotu hala, he’e ’osi ’aia pea ’e tonu ke koutou fai te fehu’i ’aenī kiā koutou: ‘’E kei au mulimuli koa ki he ’u fa’ahi ’o te tauhi hala?’ Tou vaka’i he ’u ’alu’aga ’o ’uhiga mo te fa’ahi ’aia.
TE ’U FAKATĀTĀ PEA MO TE TAUHI KI TE ’U KUI
3 Ko ’ihi talu mai fualoa ’e nātou taupau ’iō nātou te ’u ’aletale pea mo te ’u fakatātā. ’E ’i ai koa hakotou ’u fakatātā pe’e ko hakotou ’aletale? Kapau koia, pea ’e lagi mata faikehe kiā koutou pe’e koutou kovi’ia hakotou faikole ki te ’Atua kae mole koutou faka’aoga’i he ’u ’aletale pe’e ko he ’u fakatātā. ’E lagi ko he ’u me’a ’e ma’uhiga ’aupito kiā koutou. Kae ko te ’Atua ’aē ’e tonu ke ina fakahinohino mai te fa’ahiga tauhi ’aē ’e tonu ke tou fai kiā te ia, pea ’e ako’i mai ’i te Tohi-Tapu ’e mole loto ia ke tou faka’aoga’i te ’u fakatātā. (Ekesote 20:4, 5; Pesalemo 115:4-8; Isaia 42:8; 1 Soane 5:21) Koia ’e feala hakotou mulimuli ki te tauhi mo’oni mo kapau ’e koutou maumau’i te ’u me’a ’aia ’aē ’e pipiki ki te tauhi hala. Koutou manatu ohage ko Sehova, ’aē ’e “fakalialia” ki te ’u me’a aia.—Teutalonome 27:15.
4 Ko te tauhi ki te ’u kui ’e ko te tahi ’aia fa’ahi ’e tau fai ’i te ’u lotu hala. ’I mu’a ’o tanatou ako ia te mo’oni, ko ’ihi ne’e nātou faka tui ’e mā’u’uli te kau mate ’i he potu fakalaumālie, pea ’e feala ke tokoni age te kau mate ’aia, pe’e nātou fai he me’a kovi ki te haha’i mā’u’uli. Ne’e lagi lahi he ’u me’a ne’e koutou fai mo’o faka fīmālie’i takotou ’u kui ’aē kua mamate. Kae ohage ko te me’a ’aē ne’e koutou ako ’i te Kapite 6 ’o te tohi ’aenī, ko te kau mate ’e mole kei nātou ’ilo’i he me’a, pea ’e mole he potu ’e nātou mā’u’uli ai. Koia ’e mole hona fua mo kapau ’e koutou faiga ke koutou palalau mo nātou. ’I tona fakahagatonu, ko te ’u logo ’aē ’e hage ’e ha’u mai he tahi kua mate kae ne’e koutou ’ofa ai, ’e ko he ’u logo ia mai te kau temonio. Ne’e tapu’i e Sehova ki te kau Iselaele tanatou palalau mo te kau mate, pe’e ko tanatou kau ki te ’u me’a fai fakalau’akau.—Teutalonome 18:10-12.
5 Koteā ’aē ’e feala ke koutou fai, mo kapau ’i takotou tauhi ’āfea, ne’e koutou tauhi ki te ’u fakatātā pe’e koutou tauhi ki te ’u kui? Koutou lau pea mo metitāsio ki te ’u vaega Tohi-Tapu ’aē ’e fakahā ai te manatu ’a te ’Atua ’o ’uhiga mo te ’u tauhi ’aia. Koutou faikole kiā Sehova ’o ’uhiga mo takotou fia mulimuli ki te tauhi mo’oni, pea mo kole age kiā te ia ke tokoni atu ke koutou manatu tahi mo ia.—Isaia 55:9.
NE’E MOLE FAI TE PŌ TAPU E TE KAU ’ULUAKI KILISITIANO
6 Ne’e lagi ’ulihi e te lotu hala te tauhi ’a he tahi, ’aki tana ’u ’aho lalahi faka lotu, ohage la ko te Pō Tapu. ’E ’ui ko te Pō Tapu ’e ko he fakamanatu ’o te ’aho tupu ’a Sesu Kilisito, pea ’e fakafiafia ’i te ’aho lahi ’aia ia te ’u teitei lotu fuli ’aē ’e nātou lau ’e nātou tui kiā Kilisito. Kae ’e mole ma’u he fakamo’oni ne’e taupau te ’aho lahi ’aia e te kau tisipulo ’a Sesu ’o te ’uluaki sēkulō. ’E ’ui fēnei ’i te tohi Sacred Origins of Profound Things: “Lolotoga sēkulō e lua ’i te ’osi tupu ’a Sesu, ne’e mole he tahi ne’e ina ’ilo’i tona ’aho tupu, pea ’e mole haha’i ia nātou ’aē ne’e nātou fia ’ilo’i te ’aho tonu ’aē ne’e tupu ai.”
7 Tatau aipe pe ne’e ’ilo’i e te ’u tisipulo ’a Sesu tona ’aho tupu, kae ne’e mole nātou fakamanatu’i te ’aho ’aia. Koteā tona tupu’aga? He’e ’ui ’i te tohi The World Book Encyclopedia, “[ma’a te kau ’uluaki Kilisitiano] ko te fakamanatu ’o he ’aho tupu, ne’e ko he fakafiafia faka pagani.” ’I te Tohi-Tapu ’e talanoa pe ia ki te ’u fakamanatu ’o te ’u ’aho tupu e lua, ’o te ’u hau ne’e mole nā atolasio kiā Sehova. (Senesi 40:20; Maleko 6:21) Ko te ’u fakafiafia ’i te ’u ’aho tupu ne’e toe fai foki mo’o fakafeta’i ki te ’u ’atua pagani. Ohage la, ’i te ’aho 24 ’o Maio, ne’e fakamanatu e te kau Loma te ’aho tupu ’o te ’atua fafine ko Diane. ’I te ’aho ’aē ne’e hoa kiai, ne’e nātou fakamanatu te ’aho tupu ’o tonatou ’atua ’o te la’ā, ia Apollon. Koia ko te ’u fakamanatu ’o te ’aho tupu, ne’e ko he ’u fakafiafia faka pagani, kae ne’e mole ko he ’u fakafiafia faka Kilisitiano.
8 ’E ’i ai te tahi tupu’aga ’o te mole fakamanatu’i e te kau ’uluaki Kilisitiano, ia te ’aho tupu ’a Sesu. Ne’e lagi ’ilo’i e tana ’u tisipulo ko te ’u ’aho tupu ne’e ’i ai tonatou pikipikiga mo te ’u me’a fakatemonio. Ohage la, tokolahi ’i te kau Keleka pea mo te kau Loma ’o te temi mu’a, ne’e nātou faka tui ’e ’i ai te laumālie le’ole’o ’a te tagata takitokotahi, ’e puipui kiā ia talu mai tona tupu ’o hoko atu ’i tona ma’uli kātoa. ’E ’ui ’i te tohi The Lore of Birthdays (Te ’u Talatisio ’o ’Uhiga Mo Te ’u ’Aho Tupu): “Ko te laumālie le’ole’o ’aia ne’e faka misitelio tana ’u felogoi mo te ’atua ne’e tō tonu tona ’aho tupu pea mo te ’aho tupu ’a te tagata.” ’E mahino ia, ’e mole fiafia anai ia Sehova mo kapau ’e tou fai he to’oto’oga ’e ina fakapipiki ai ia Sesu ki he ’u me’a fakatemonio. (Isaia 65:11, 12) Kae he ko’e kua fai e te tokolahi te lafeti ’o te Pō Tapu?
TE TAFITO’AGA ’O TE PŌ TAPU
9 Ne’e kamata fai e te haha’i te fakamanatu ’o te ’aho tupu ’o Sesu ’i te ’aho 25 ’o Tesepeli, ’i te hili ’o te ’u ta’u ’e lau’i teau ’i te ’osi mavae ’a Sesu ’i te kele. Kae ne’e mole ko te ’aho tupu ’aia ’o Sesu, he ne’e lagi tupu Sesu ’i te māhina ’o ’Oketopeli.* Kae he ko’e ne’e fili te ’aho 25 ’o Tesepeli? He’e mahino mai, ’i he ’u ta’u ki muli age, ko te ’u haha’i ne’e nātou ’ui ko te kau Kilisitiano, “ne’e nātou loto ke fakatō tahi te ’aho ’aia mo te ’aho lahi ’o Loma” ko te ’aho tupu ’o te la’ā. (The New Encyclopædia Britannica) ’I te temi nive, mokā hage ’e mole kei mū mālohi ia te la’ā, ne’e fai e te kau pagani te ’u to’oto’oga ke toe liliu mai te la’ā, matapuna ’o te mālama mo te faka māfana, ’aē kua fakamama’o ’i te kele. Ne’e nātou manatu ko te ’aho 25 ’o Tesepeli, ne’e ko te ’aho ’aia ne’e kamata ai te toe liliu mai ’a te la’ā. Mo’o fakatafoki te kau pagani, ne’e tali e te kau takitaki lotu te ’aho ’aia, pea nātou faiga’i ke hage ko he ’aho lahi “faka Kilisitiano.”#
10 Kua ’ilo’i talu mai fualoa, ko te Pō Tapu ’e ko he ’aho lahi faka pagani. ’Uhi ko tana mole tu’u ’i te Tohi-Tapu, ne’e tapu’i te Pō Tapu ’i Pilitania, pea mo ’ihi kolo ’o Amelika lolotoga te 17 sēkulō. Ne’e fakatū’a ia ia ’aē ne’e mole ’alu ’o gāue ’i te ’aho ’o te Pō Tapu. Kae ne’e mole fualoa, pea toe faka’aoga’i e te haha’i te ’u ’aho fakafiafia ’āfea ’aia, pea mo hilifaki kiai te tahi ’u fakafiafia fo’ou. Kua toe liliu te Pō Tapu ko he ’aho lahi ma’uhiga, pea ’e lahi te ’u fenua ’e kei nātou taupau ia te ’aho lahi ’aia. Kae ko te Pō Tapu ’e ’i ai tona pikipikiga mo te lotu hala, koia ko nātou ’aē ’e nātou fia taupau te tauhi ’aē ’e lelei’ia e te ’Atua, ’e mole nātou fakamanatu anai ia te ’aho lahi ’aia pe’e ko he tahi age ’aho lahi ’e ’i ai hona pikipikiga mo te tauhi faka pagani.%
’E MA’UHIGA KOA KE TOU TOKAGA’I TE TAFITO’AGA ’A TE ’U LAFETI ’AIA?
11 ’E ’ilo’i e ’ihi ko te ’u ’aho lalahi ohage ko te Pō Tapu ’e ko he ’u fakafiafia pagani, kae kiā nātou ’e mole he kovi ’o te fakafiafia ’i te ’u ’aho lalahi ’aia. He’e ma’a te tokolahi, ka nātou fakafiafia ’i te ’u ’aho lalahi ’aia, ’e mole nātou faka ’uhiga ki te tauhi hala, kae ’e ko he ’u temi faigamālie ’aia ma’a te ’u famili ke nātou fakatahitahi. ’E koutou manatu feiā koa? Kapau ’e feiā, pea ’e faigata’a anai hakotou mulimuli ki te tauhi mo’oni, ’uhi he’e mole ko takotou pipiki ki te lotu hala ’aē ’e takimu’a, kae ko takotou ’ofa ’aē ki tokotou famili. Kae koutou tui papau, ko Sehova te Tupu’aga ’o te famili, ’e ina faka’amu ke koutou felogoi lelei mo takotou ’u famili. (Efeso 3:14, 15) Pea ’e feala ke koutou felogoi lelei mo takotou famili, ’o koutou mulimuli ki te ’u me’a ’aē ’e lelei’ia e te ’Atua. ’O ’uhiga mo te fa’ahi ’aē ’e tonu ke ma’uhiga kiā tatou, ne’e tohi fēnei e te ’apositolo ko Paulo: “Koutou vakai te mea ae e lelei ki te Aliki.”—Efeso 5:10.
12 Lagi ma’a koutou, ko te ’u fakafiafia ’aia ’e mole kei fai iā ’aho nei ’o mulimuli ki tonatou ’u tafito’aga faka pagani. Kae ’e ma’uhiga koa ke tou tokaga’i te tafito’aga ’o te ’u ’aho lalahi ’aia? Ei. Tou fakatā mu’a ia te ’alu’aga ’aia: Kapau ’e koutou sio ki he fo’i lole ’e tuku ’i te kanivo, ’e koutou to’o anai koa ’o kai? Kailoa, he’e ’uli te fo’i lole ’aia. Ohage ko te fo’i lole ’aia, ’e hage ’e lelei te ’u ’aho lalahi ’aia, kae ’e ’uli tonatou ’u tafito’aga. Kapau ’e tou fia mulimuli ki te tauhi ma’a, pea ’e tonu ke tou ma’u te manatu ’a te polofeta ko Isaia, ’aē ne’e ina ’ui fēnei ki te kau atolasio mo’oni: “’Aua na’a koutou fāfā ki he me’a ’e he’ema’a.”—Isaia 52:11.
KOUTOU MA’U TE FAKASIOSIO TONU ’I TAKOTOU ’U FELOGOI MO TE HAHA’I
13 ’E feala ke hoko he ’u fihifihia mo kapau ’e koutou fakafisi ki te ’u fakafiafia ’i te ’u ’aho lalahi ’aia. Ohage la, ’i tokotou fale gāue, ’e lagi mata faikehe ki takotou ’u kaugā gāue takotou mole kau ’i ’ihi fakafiafia. ’E feafea’i anai mo kapau ’e foaki atu hakotou me’a ’ofa ’i te Pō Tapu? ’E kovi koa hona tali? E feafea’i mo kapau ko tokotou ’ohoana ’e mole tauhi kiā Sehova? Koteā ’aē ’e feala ke koutou fai ke mole lotomamahi takotou fānau he’e mole nātou kau ki te ’u ’aho lalahi ’aia?
14 ’E ma’ua ke koutou fakasiosio tonu ’i te ’u ’alu’aga ’aia. Kapau ’e fai atu e he tahi hana ’u poapoaki ’ofa ’o ’uhiga mo te Pō Tapu, ’e feala hakotou fakamālo age ki ai. Kae kapau ’e ko he tahi ’e koutou sio tu’uma’u ki ai pea mo gāue tu’uma’u mo ia, pea ’e feala anai hakotou fakamahinohino lelei age, ’aki he aga faka’ete’ete. ’E tuku mai te tokoni ’aenī ’i te Tohi-Tapu: “Koutou fai ke lelei tu’uma’u takotou ’u palalau pea ke konakona’i ’aki te māsima, ke koutou ’ilo’i te tali ’aē ’e tonu ke koutou fai ki te haha’i takitokotahi.” (Kolose 4:6, MN) Koutou tōkakaga ’o aga faka’apa’apa ki te haha’i, ’o koutou faka’ete’ete ’i takotou fakamahino kiā nātou te tupu’aga ’o takotou mole fakafiafia ’i te ’aho lalahi ’aia. Koutou fakahā lelei age ’e mole koutou kovi’ia te ’u me’a ’ofa pea mo te ’u fakafiafia, kae ’e koutou lelei’ia age ia te ’u fa’ahi ’aia mo kapau ’e fai ’i he tahi lakaga.
15 Kae kapau ’e fia foaki atu e he tahi he me’a ’ofa? ’E fakalogo pe ki te ’u ’alu’aga ’aē ’e foaki atu ai te me’a ’ofa ’aia. ’E feala ke ’ui atu e ia ’aē ’e ina foaki atu te me’a ’ofa: “’E au ’ilo’i ’e mole ke taupau te Pō Tapu, kae ’e au faka’amu ’e ke tali pe anai ia te me’a ’ofa ’aenī.” ’E feala pe hakotou manatu ko takotou tali te me’a ’ofa ’aia, ’e mole tatau mo hakotou kau ki te fakafiafia ’o te Pō Tapu. Kae kapau ko ia ’aē ’e ina foaki atu te me’a ’ofa ’e mole mahino ki takotou lotu, ’e feala hakotou fakamahino age ’e mole koutou taupau ia te ’aho lahi ’aia. ’E faigafua ai anai hakotou fakamahino age pe ko’e ’e koutou tali te me’a ’ofa, kae ’e mole koutou foaki age hana me’a ’ofa. ’I te tahi fa’ahi, ’e lagi lelei age hatatou mole tali he me’a ’ofa, mo kapau ’e foaki mai ’aki te fakatu’utu’u ’aē ke fakahā ’e mole tou mulimuli lelei ki tatatou lotu, pe’e tou tali te me’a ’ofa ’aia he’e tou mānumānu koloā.
TE ’U FELOGOI MO TE FAMILI
16 Kae e feafea’i mo kapau ’e mole tauhi tokotou famili kiā Sehova? ’O toe feiā aipe, ’e tonu ke koutou aga faka’ete’ete. ’Aua na’a koutou valoki te ’u ’aho lalahi ’aē ’e fia taupau e takotou ’u famili, kae ke koutou faka’apa’apa ki tanatou ’u manatu, ohage pe ko takotou loto ’aē ke nātou faka’apa’apa atu ki takotou ’u manatu. (Mateo 7:12) ’Aua na’a koutou fai he me’a ’e tupu ai anai hakotou kau ki tanatou ’u ’aho lalahi, kae ’e feala hakotou fakafuafua lelei mo kapau ’e koutou sio ko he ’u fakafiafia ’e mole honatou pikipikiga mo te ’u ’aho lalahi ’aia. Koutou tōkakaga tu’uma’u ke lelei tokotou le’o ’o loto.—1 Timoteo 1:18, 19.
17 Koteā ’aē ’e feala ke koutou fai ke mole lotomamahi takotou fānau he’e mole nātou fakafiafia ’i te ’u ’aho lalahi ’aia ’aē ’e mole tu’u ’i te Tohi-Tapu? ’E fakalogo te fa’ahi ’aia ki te ’u me’a ’aē ’e koutou fai ’i te tahi ’u lakaga ’o te ta’u. Ko ’ihi mātu’a, kua nātou fakatu’utu’u he ’u temi ke nātou foaki ai he ’u me’a ’ofa ki tanatou fānau. ’I te ’u me’a ’ofa lelei ’aē ’e feala ke koutou foaki ki takotou fānau, ’e ko tokotou temi pea mo tokotou ’ofa.
KOUTOU MA’ULI’I TE TAUHI MO’ONI
18 Ke feala he tali ’o koutou e te ’Atua, ’e tonu ke koutou lītu’a ki te tauhi hala kae ke koutou mulimuli ki te tauhi mo’oni. Koteā ’aē ’e tonu ke koutou fai? ’E ’ui fēnei ’i te Tohi-Tapu: “Tou fetokaga’aki ke tou uga ia tatou ki te ’ofa pea mo te ’u gāue matalelei, ’o mole tou tuku tatatou ’u fakatahi, ohage ko te agamāhani ’a ’ihi, kae ke tou fefakaloto mālohi’aki, tāfito la he kua koutou sio ki te fakaōviōvi mai ’o te ’aho.” (Hepeleo 10:24, 25, MN) Ko te ’u fono faka Kilisitiano, ’e ko he ’u lakaga fakafiafia ke koutou tauhi ai ki te ’Atua ’o mulimuli ki te fa’ahiga tauhi ’aē ’e ina tali. (Pesalemo 22:22; 122:1) ’I te ’u fono ’aia, ’e ma’u ai he ’u “fefakaloto mālohi’aki” ’i te kau Kilisitiano agatonu.—Loma 1:12, MN.
19 Ko te tahi fa’ahi ’aē ’e feala ai ke koutou mulimuli ki te tauhi mo’oni, ’e ko takotou palalau ki te haha’i ’o ’uhiga mo te ’u me’a ’aē ’e koutou ako ’i te Tohi-Tapu mo te kau Fakamo’oni ’a Sehova. ’E mo’oni ko te tokolahi ’e nātou “to’eto’e pea mo lotomamahi” ’uhi ko te ’u me’a kovi ’aē ’e hoko iā ’aho nei ’i te malamanei. (Esekiele 9:4) E lagi koutou ’ilo’i he ’u haha’i ’e nātou tau mo te ’u faigata’a’ia ’aia. He ko’e ’e mole koutou palalau age ’o ’uhiga mo te ’amanaki ’aē ’e koutou ako ’i te Tohi-Tapu ’o ’uhiga mo te ka ha’u? Kapau ’e koutou fakatahi mo te kau Kilisitiano mo’oni, pea mo palalau ki te haha’i ’o ’uhiga mo te ’u mo’oni taulekaleka ’aē ne’e koutou ako ’i te Tohi-Tapu, ’e koutou sisio anai ki te puli māmālie ’i tokotou loto takotou fia fai ki te ’u fakafiafia ’o te tauhi hala. Koutou tui papau ’e koutou fiafia ’aupito anai pea mo koutou ma’u anai he ’u tu’uga tapuakina, mo kapau ’e koutou mulimuli ki te tauhi mo’oni.—Malakia 3:10.
KOTEĀ ’AĒ ’E AKO’I MAI ’I TE TOHI-TAPU?
- ’I te tauhi mo’oni, ’e mole fai te tauhi ki te ’u fakatātā, pe’e ko te tauhi ki te ’u kui.—Ekesote 20:4, 5; Teutalonome 18:10-12.
- ’E mole lelei hatatou kau ki he ’u fakafiafia ’e ’i ai hona ’u tafito’aga faka pagani.—Efeso 5:10.
- ’E tonu ke aga faka’ete’ete te kau Kilisitiano mo’oni mokā nātou fakamahino te ’u me’a ’aē ’e nātou tui kiai.—Kolose 4:6.
* Vaka’i ia Te Tahi ’u Fakamahino.
# Ne’e toe fili te ’aho 25 ’o Tesepeli ’uhi ko te ’aho lahi ’o te ’u Saturnales. Ko te ’aho lahi ’aia ma’a te ’atua Loma ’o te ’u gāue’aga, ne’e fai ’i te vāha’a kātoa mai te ’aho 17 ’o Tesepeli ’o a’u ki te ’aho 24. Lolotoga te fakafiafia ’aia, ko te haha’i ne’e nātou fai kātoaga, mo fakafiafia pea mo nātou fefoaki’aki te ’u me’a ’ofa.
% Kapau ’e koutou fia ma’u he tahi ’u fakamahino ki te manatu ’a te kau Kilisitiano mo’oni ’o ’uhiga mo te ’u ’aho lalahi ’aia, koutou vaka’i ia Te Tahi ’u Fakamahino.
Te ’u Fehu’i Ako
1, 2. ’I takotou ’osi mavae mai te lotu hala, ko te fehu’i fea ’aē ’e tonu ke koutou fai kiā koutou, pea ’i takotou manatu he ko’e ’e ma’uhiga te fehu’i ’aia?
3. (a) Koteā ’aē ’e ’ui ’i te Tohi-Tapu ’o ’uhiga mo te faka’aoga’i ’o te ’u fakatātā, pea he ko’e ’e lagi faigata’a ma’a ’ihi hanatou tali te manatu ’a te ’Atua? (b) Koteā ’aē ’e tonu ke koutou fai ’o ’uhiga mo te ’u me’a ’aē ’e pikipikiga mo te tauhi hala?
4. (a) He ko’e ’e tou ’ilo’i ’e mole hona fua ke tou tauhi ki te ’u kui? (b) He ko’e ne’e tapu’i e Sehova ki tana haha’i ke mole nātou kau ki te ’u me’a fai fakalau’akau?
5. Koteā ’aē ’e feala ke koutou fai mo kapau ’i takotou tauhi ’āfea, ne’e koutou tauhi ki te ’u fakatātā pe’e koutou tauhi ki te ’u kui?
6, 7. (a) ’E ’ui ko te Pō Tapu ’e ina fakamanatu’i te ’aho fea, pea ne’e taupau koa te ’aho lahi ’aia e te kau tisipulo ’a Sesu ’o te ’uluaki sēkulō? (b) ’I te temi ’o te kau ’uluaki tisipulo ’a Sesu, ko ai ’aē ne’e nātou taupau te ’u ’aho tupu?
8. Koutou fakamahinohino ia te pikipikiga ’o te fakafiafia ’o te ’aho tupu pea mo te ’u me’a fakatemonio.
9. He ko’e ne’e liliu ia te ’aho 25 ’o Tesepeli ko te ’aho lahi ’o te ’aho tupu ’o Sesu?
10. ’I te temi mu’a, he ko’e ko ’ihi haha’i ne’e mole nātou fai ia te Pō Tapu?
11. He ko’e ko ’ihi haha’i ’e nātou fakafiafia ’i te ’u ’aho lalahi, kae koteā ’aē ’e tonu ke ma’uhiga kiā tatou?
12. Koutou tuku mai he fakatā mo’o fakahā pe ko’e ’e tonu ke tou fakafisi ki te ’u fakafiafia pea mo te ’u ’aho lalahi ’aē ’e kovi tonatou ’u tafito’aga.
13. Koteā te ’u fihifihia ’aē ’e feala ke hoko mo kapau ’e koutou fakafisi ki te ’u ’aho lalahi ’aia?
14, 15. Koteā ’aē ’e tonu ke koutou fai mo kapau ’e fai atu e he tahi he ’u poapoaki ’ofa ’o ’uhiga mo te Pō Tapu, pe’e kapau ’e fia foaki atu e he tahi he me’a ’ofa?
16. E feafea’i hakotou aga faka’ete’ete ’o ’uhiga mo te ’u ’aho lalahi?
17. Koteā ’ae ’e feala ke koutou fai ke mole lotomamahi takotou fānau ’i tanatou sio ki te haha’i ’e nātou fakafiafia ’i te ’u ’aho lalahi?
18. ’E lava tokoni feafea’i kiā koutou te ’u fono faka Kilisitiano ke feala hakotou mulimuli ki te tauhi mo’oni?
19. He ko’e ’e ma’uhiga ke koutou palalau ki te haha’i ’o ’uhiga mo te ’u me’a ’aē ne’e koutou ako ’i te Tohi-Tapu?