1, 2. ¿Xí galrranabdiitz raquiin gonylo órni ma bisianlo religión falz, né xigony ronylo pensary que ndeʼ nigolú rasac?

BUNYSI pensary goyoʼ toib buñ goloʼ venen lainy tank ro xidal buñ racaʼ nís, né buñ ni ran láani radzuiby gaity. ¿Xí non ñonylo ór cú? Nánno que looy nayopylo ni maca stoib lagary ro diti goloʼyibu venen. Ná ma bunylo ndeʼ raquiin guicapylo galrranabdiitz reʼ: «¿Ma gooya nís venen cú la?».

² Scúca rac né religión falz. La Biblia rasuidy que religión falz nap galrrasuidy né costumbre ni diti rioladx Dios (2 Corintios 6:17). Por ngú raquiin guireʼno o galsitno de «Babilonia la Grande» ndeʼ nac guirá religión falz ni noʼ ló Gudxlio (Revelación 18:2, 4). ¿Ma bunylo ndeʼ la? Pal ma bunylo láani, rabaladxdo. Per diti nosi galsitlo de religión falz o guiniʼlo que ma bisianlo religión reʼ. Láaca non guinabdiitzlo, ¿ma bisiana cós ni rony religión falz la? Guibiʼno tipnésni.

3. a) ¿Xí rasuidy la Biblia ni buñ raquiin dioxh, né xigony tipnés buñ nagann rac par layibu gonyibu pensary ni Jehová rony pensary de dioxh? b) Pal naplo toib cós ni radzak né religión falz, ¿xí raquiin gonylo né láani?

³ Noʼ buñ ni nap dioxh o bidaʼ laniolidx, ma xidzú íz  de goló napyibu láani. ¿Naplo toibtica de láani lidxlo la? Pal scú láani, sigory radziguiaʼlo que mal láani diti guiquiinno xitcal par gony adorarno Dios. Sigory láaca ronladxlo dioxh ni naplo lidxlo. Per Dios ngú ni raniʼ ximod gony adorarno láabu, né la Biblia rasuidy que diti rioladxbu guiquiinno dioxh (bíil Éxodo 20:4, 5; Salmo 115:4-8; Isaías 42:8; 1 Juan 5:21). Scú láani, par tzólo xilad religión ni rasuidy xinés, non guinitlólo guirá dioxh ni naplo ni radzak né religión falz. Bibiʼ láani xomod rabiʼ Jehová láani: xomod toib cós ni «raladzab» (Deuteronomio 27:15).

4. a) ¿Xigony diti noʼ pu raquiin gony adorarno xfamilno ni ma xidzú goity? b) ¿Xigony Jehová goniʼ que gudx Israel diti gacyibu buñ chiser o buñ bruj?

⁴ Noʼ stoib cós ni xidal religión falz rony. Láani ngú ni rony adoraryibu xfamilyibu ni ma xidzú goity. Antes ni guisuidybu ni merpa rasuidy la Biblia tipnés buñ buny crer que gueʼet nabany toib lagary ro nacyibu espíritu né labúu gacnéyibu o gonyibu mal buñ ni nabany. Sigory looy biyopylo mod par guiguaʼdzu  xfamilylo ni ma xidzú goity. Per xomod ma bisuidylo ló capítulo 6 de libro reʼ, gueʼet diti nabany stoib lagary. Por ngú diti raquiin guiyopyno mod guininéno layibu. Guirá diitz ni sieed de buñ ni nadxiʼno ni ma goity rieedni de demony. Por ngú, Jehová goniʼ que gudx Israel diti guiyopyibu mod guininéyibu gueʼet o gacyibu buñ chiser o buñ bruj (bíil Deuteronomio 18:10-12).

5. ¿Xí labúu gonylo pal nigoreʼ raquiinlo dioxh o rony adorarlo buñ ni ma xidzú goity?

⁵ ¿Xí labúu gonylo pal religión ni nóolo lad nigoreʼ raquiin dioxh o rony adorar buñ ni ma xidzú goity? Bíil né cuá cuidad ni rasuidy la Biblia ni raslooy ximod rabiʼ Dios guirá cós mal reʼ. Goniné Dios guirá dzú né góoch láabu que raniiny tzólo xilad religión ni rasuidy xinés, né gonab láabu gacnébu gonylo pensary xomod láabu (Isaías 55:9).

6, 7. a) Golexa xí pensary rony buñ órni ronyibu Laninin, né pal herman ni goyoʼ ló primer siglo buny láani. b) ¿Xí láani bidzak cumpleany ni góc ló xtzú buñ ni cuanal Jesús?

⁶ Mod rony adorarno Dios labúu guiotzni né mod rony religión falz. Xomod Laninin, buñ rony pensary que Laninin rasetnaladx dzú gool Jesucristo, né casi guirá religión ni raniʼ que racanal Jesús rony láani. Per diti noʼ prueby que buñ ni cuanal Jesús ló xtzúbu buny Laninin. Toib libro ni laa, Los orígenes sagrados de las cosas profundas ná: «Ló chop siglos después ni gool Jesús ni toib buñ gon né diti goloʼyibu cuent pu dzú merpa gool Jesús».

⁷ Ná buñ ni cuanal Jesús ñan xí dzú merpa golbu diti ñonyibu cumpleany xtuny Jesús. ¿Xigony? Portín herman ni goyoʼ ló xtzú Jesús «bibiʼyibu lanii reʼ [...]  xomod cós ni rony buñ pagan» (Las cosas nuestras de cada día). Nosi cumpleany ni rasetlaa la Biblia nacní xtuny chop buñ ni buny mandary ni diti buny adorar Jehová (Génesis 40:20; Marcos 6:21). Láaca bunyibu láani par buny adoraryibu dioxh pagan. Guibiʼno ximod, romanos buny lanii 24 de may dzú gool toib dioxh gonaʼ ni góc laa Diana, né raraa stoib gueʼel ronyibu lanii xtuny Apolo ni nac dioxh xtuny Govitz. Scú, cumpleany ni goyoʼ diti bidzakni religión ni bisian Jesús, láani bizakni dioxh pagan.

8. Golexa ximod toibsi radzak cumpleany né superstición.

⁸ Buñ ni cuanal a Jesús diti ñonyibu cumpleany xtuny Jesús por stoib razón: sigory layibu gonyibu que cumpleany radzakni superstición. Xidal griegos né romanos biluladxyibu que cada buñ nap toib espíritu ni ran ni goyoʼ dzú ni gool buñ, né espíritu reʼ ran buñ laʼga nabany. «Espíritu reʼ bidzakni dioxh ni rasaʼ íz toibsi dzú né buñ ni rál dzúcu.» (The Lore of Birthdays [Costumbre xtuny cumpleany].) Jehová dipa sioladx que gonyno Laninin ni radzak religión falz (Isaías 65:11, 12). Por ni ma bisuidyno, ¿xigony nogoluʼ buñ ni rony Laninin?

9. ¿Xigony golú buñ 25 beʼo diciembre par guisetnaladx dzú gool Jesús?

⁹ Godudy xidal íz de goló bieed Jesús ló Gudxlio buñ golú 25 beʼo diciembre par guisetnaladx dzú golbu. Per Jesús diti golbu beʼo diciembre, * ralooypani golbu beʼo octubre. Per ¿xigony golú buñ dzúcu? Sigory portín goyoʼ buñ ni goniʼ que nacyibu ni racanal Jesús né «goniiny layibu que gac lanii pagan  reʼ xalagary gonyibu ni ná Dios. [...] Ló gudx Roma buñ pagan buny que 25 beʼo diciembre gac toib dzú de lanii [...] dzú gool Govitz ni diti rac gann» (Enciclopedia de la Religión Católica). Ló invierno, órni Govitz ralooypani diti ragoxidzaʼni, buñ pagan rony lanii par Govitz guibiguet guiduidy guii né galnadzaʼ layibu. Buñ biluladx que 25 beʼo diciembre Govitz rasaló rabiguet. Guirá buñ ni gosanir ló religión buny lanii reʼ né biyopy mod par gacni «cristian», bunyibu ndeʼ par que buñ pagan guidzak né layibu. *

10. ¿Xigony tipnés buñ ni goyoʼ diti bunyibu Laninin?

¹⁰ Ma xidal íz de goló nann buñ que Laninin golainyni ló crenys pagan. La Biblia diti rasetlaa lanii reʼ né por ngú buñ de gudx Inglaterra diti buny láani né láaca stipnés ranch xtuny norteamerica ló siglo XVII. Guirá buñ ni diti riée dxiin né riaʼan lidx par gony Laninin raguiixyibu xtolni. Per después bunyibu costumbre reʼ stoib né láaca goyoʼ stipnés costumbres. Laninin bidxin góc toib lanii rodann ló xidal gudxrop né ló naareʼ scúca nacní. Per buñ ni ná gony que guibaladx xcalnabany Dios nann que Laninin radzakni religión  falz, né diti ronyibu ndeʼ né stipnés lanii ni ralainy ló crenys pagan. *

11. Golexa xigony buñ rony lanii né xí ni guisac más par lóono.

¹¹ Noʼ buñ ni raduidy cuent que noʼ lanii xomod Laninin ni golainy ló crenys pagan, per par layibu diti mal láani. Ronyibu pensary que casi diti noʼ buñ ni ratzak láani né religión falz, né láaca nacní toib tiemp ro radop guirá family. ¿Scúca nac xpensarylo de lanii reʼ la? Pal nacní scú, ni ronylo lanii reʼ nacní portín nadxiʼlo xfamilylo, né diti nacní por religión falz ni cayony que gac nagann par looy tzólo xilad religión ni rasuidy xinés. Scú, gop fe que Jehová ni bisaʼ family raniiny que looy guidzaklo sacró xfamilylo (Efesios 3:14, 15). Per noʼ stipnés mod ni labúu guidzaklo xfamilylo né láaca gonylo que guibaladx xcalnabany Jehová. Pablo goniʼ xí ngú ni más guisac par lóono: «Colgony por gonyto ni racacuent Señor» (Efesios 5:10).

12. Bislooy xigony galsitno de costumbre né stipnés lanii ni sieed de crenys pagan.

¹² Sigory ronylo pensary que lanii ni rony buñ ló naareʼ diti racni mod buny pensary buñ nírcu. ¿Rasac ganno pu lagary golainy guiráni la? Scú láani. Buny pensary nabiʼlo toib dxinpalet ló beenyotz. ¿Nalíslo né ñolo láani la? Yaca, portín ma góos been laidyni. Xomodca dxinpalet reʼ, noʼ lanii ni ralooypani sacroyen nac, per sieetni de lagary buidy. Pal raniiny lóono tzóno xilad religión ni rasuidy xinésni, non gonyno pensary xomod Isaías ni bicaʼ profecía. Buñ ni buny  adorar Dios né guidopy xcalnabany, Isaías góoch layibu: «¡Diti cannto cós buidy!» (Isaías 52:11).

13. ¿Xí galnagan labúu guicalólo pal diti gonylo lanii?

¹³ Sigory sacalólo galnagan órni guisianlo guirá lanii reʼ. Per ¿xí ñonylo pal buñ ni ronynélo dxiin diti ñen xigony diti ronylo lanii? Pal noʼ toib ni nascad looy cós ló Laninin, ¿mal nacaʼlo láani la? ¿Ximod ñonylo pal tzeʼel lo diti raluladx ni looy raluladxlo? ¿Xí labúu gonylo par xiinlo diti guiluladx que noʼ cós buen ni rasnitbu ni diti ronyibu lanii?

14, 15. ¿Xí labúu gonylo pal noʼ ni gaiby looy goyoʼ nakit ló lanii o ná guiscad toib cós looy?

¹⁴ Raquiin tzó xcalrrienlo par gannlo xí non gonylo. Guibiʼno ximod. Pal noʼ ni raiby looy goyoʼ nakit ló xilaniilo, looy nosi labúu gaibylo láabu, guixquixi looy. Per pal nacbu toib buñ ni rabiʼlo guirá dzú, sigory labúu gaibylo láabu xigony diti ronylo lanii. Órni gonylo láani biyopy mod gaibylo láani láabu. La Biblia ralitz: «Diitz ni guiniʼto gacni né mod, gacni né suudy, par ganto ximod guicapyto tigaaga buñ» (Colosenses 4:6). Biyopy mod golexa ni looy ronylo crer né diti guininálo. Góoch layibu que par looy diti mal láani guiscadlo cós né guidoplo né xfamilylo per nainy looy gacni stoib dzú.

¹⁵ Per ¿pal noʼ ni ná guiscad looy toib cós? Sigory noʼ buñ ni gaiby looy: «Naʼ naana que diti ronylo lanii reʼ per nainy naʼ guiscad ndeʼ looy». Sigory ronylo pensary que pal guicaʼlo ni cascadbu looy diti raslooyni que nóolo lad xilaniibu. Pal buñreʼ diti rimbu ni ronylo crer, looy labúu gaibylo láabu xigony diti ronylo lanii reʼ. Láabu siembu xigony racaʼlo galrrascad reʼ  né xigony diti noʼ xí radxiguetlo láabu. Per noʼ buñ ni ná guiscad cós looy par guislooybu que diti nacloʼ fiel ni looy ronylo crer o por cós ni rasac looy labúu guisianlo guisoblo ni ná la Biblia. Ór cú diti galán guicaʼlo ni cadudybu looy.

16. ¿Ximod guiniʼlo né mod órni xfamilylo rony invitar looy gony compañerlo layibu ló toib lanii?

¹⁶ ¿Xí gonylo pal xfamilylo diti rony crer ni looy ronylo crer? Raquiin guiyopylo mod gonylo láani. Diti raquiin tíil lo né láabu por costumbre né lanii ni ná gony stipnés. Buny respetar ni ronyibu pensary xomodca nainy looy que stipnés gony respetar ni looy ronylo pensary (bíil Mateo 7:12). Per diti gonylo xitcal ni gony que tzólo lad lanii. Láaca raquiin tzólo ló razón órni noʼ xí cós cayac per diti rientzaayni que toib lanii láani. Noʼ ni non gonylo par que xpensarylo tzóni sacró (bíil 1 Timoteo 1:18, 19).

17. ¿Xí labúu gonylo par que xiinlo guibaladx né diti guioladxyibu lanii ni rony stipnés buñ?

¹⁷ ¿Xí labúu gonylo par diti guiluladx xiinlo que noʼ cós buen ni casnitbu ni diti ronyibu lanii ni Dios diti rioladx? Rasac ni gonylo ló guidopy íz. Noʼ buñ ni rayopy stipnés dzú par guiscad cós xiin. Toib galrrascad ni más rasac láani ngú cué buñ tiemp né gonladx xiin.

18. ¿Ximod gacné reunión ni rac guirá xomal par tzólo xilad religión ni rasuidy xinés?

¹⁸ Par guibaladx xcalnabany Dios raquiin galsitlo de religión falz né tzólo lad religión ni rasuidy xinésni. ¿Ximod labúu gonylo láani? La Biblia racapy: «Né guibiʼno saʼno par guichiin lóono gandxiʼ saʼno más né gonyno dxiin ni nac galán, dipa guisianno de  guidopno, xomod rony tipnés, xalagary ngú gacnéno saʼno, né máspa órni guibiʼto dzú ma cabigax» (Hebreos 10:24, 25). Reunión ni rac, nacní toib ór ni raguaʼno sacroyen par gony adorarno Dios xomod ranabbu lóono (Salmo 22:22; 122:1). Ló reunión reʼ, racnéno saʼno ni nap fe xomod lóono (Romanos 1:12).

19. ¿Xigony rasac gaibylo stipnés ni cayenlo ni rasuidy la Biblia?

¹⁹ Stoib mod ni tzólo xilad religión ni rasuidy xinés láani ngú guiniʼlo ni casuidylo de la Biblia né testigos xtuny Jehová. Xidal buñ «cagobladx né cacalas rudx» por guirá cós mal ni cayac ló Gudxlio (Ezequiel 9:4). Sigory rimbulo buñ ni rasac scú. ¿Xigony diti rooylo diitz né layibu né raibylo layibu ni cabéslo ni Dios gony dzú ni sietra? Diti guisianlo guiniʼlo de guirá cós sacroyen ni ma bienlo ni ná la Biblia né diti guisian guidoplo né testigos xtuny Jehová. Pal ronylo láani saduidylo cuent que guirá costumbre ni noʼ ló religión falz ma diti sioladxlo láani. Non guiluladxlo: pal rioʼlo xilad religión ni rasuidy xinés nigolú sabanylo sacroyen né sacaʼlo xiroʼ xilaay Jehová (Malaquías 3:10).