1, 2. Taano ta maninigo niatong mansayon an pamibi bilang sarong dakulang pribilehio, asin taano ta kaipuhan niatong maaraman an itinotokdo kan Biblia manongod dian?

KUN ikokomparar sa mahiwason na uniberso, an daga saditon. Sa katunayan, para ki Jehova, “an Kaggibo kan langit asin daga,” an mga nasyon kan katawohan garo sadit na toro nin tubig sa timba. (Salmo 115:15; Isaias 40:15) Pero, an Biblia nagsasabi: “Si Jehova harani sa gabos na nag-aarang sa saiya, sa gabos na nag-aarang sa saiya sa katotoohan. Ootobon nia an mawot kan mga natatakot sa saiya, asin dadangogon nia an agrangay ninda na tabangan.” (Salmo 145:18, 19) Isip-isipon na sana an boot sabihon kaiyan! An makakamhan sa gabos na Kaglalang harani sa sato asin dadangogon kita kun kita “nag-aarang sa saiya sa katotoohan.” Kanigoan nanggad kadakulang pribilehio na kita makadolok sa Dios sa pamibi!

² Minsan siring, kun gusto niatong hinanyogon ni Jehova an satong mga pamibi, dapat kitang mamibi sa saiya sa paagi na aprobado nia. Paano niato magigibo ini kun dai niato nasasabotan an itinotokdo kan Biblia manongod sa pamibi? Mahalagang marhay na maaraman niato an sinasabi kan Kasuratan sa temang ini, huli ta an pamibi nakakatabang sato na orog na rumani ki Jehova.

3. Ano an sarong mahalagang dahelan kun taano ta maninigo kitang mamibi ki Jehova?

³ An sarong mahalagang dahelan kun taano ta maninigo kitang mamibi ki Jehova iyo na inaagda nia kitang gibohon iyan.  Ineenkaminar kita kan saiyang Tataramon: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.” (Filipos 4:6, 7) Sierto nanggad na dai niato gugustohon na ignorohon an siring na maboot na probisyon na itinao sato kan Supremong Namamahala kan uniberso!

4. Paanong an regular na pamibi ki Jehova nagpapakosog sa satong relasyon sa saiya?

⁴ An saro pang dahelan na mamibi iyo na an regular na pamimibi ki Jehova sarong paagi tanganing parigonon an satong relasyon sa saiya. An tunay na mga magkakatood dai sana nagkokomunikar kun may kaipuhan sinda. Imbes, an marahay na magkakatood interesado sa lambang saro, asin an saindang pagkakatood orog na nagkokosog mantang suelto nindang ipinapahayag an saindang mga nasa isip, kapurisawan, asin saboot. Sa nagkapirang bagay, an situwasyon kaagid kaiyan pag-abot sa satong relasyon ki Jehova Dios. Sa tabang kan librong ini, dakol an nanodan nindo manongod sa itinotokdo kan Biblia mapadapit ki Jehova, sa saiyang personalidad, asin sa saiyang mga katuyohan. Namidbid nindo sia bilang sarong tunay na persona. An  pamibi nagtatao sa saindo nin oportunidad na ipahayag an saindong mga nasa isip asin kairairaroming mga saboot sa saindong langitnon na Ama. Mantang ginigibo nindo iyan, orog kamong napaparani ki Jehova.​—Santiago 4:8.

5. Ano an nagpapaheling na si Jehova dai naghihinanyog sa gabos na pamibi?

⁵ Naghihinanyog daw si Jehova sa gabos na pamibi? Estudyare an sinabi nia sa rebeldeng mga Israelita kan kaaldawan ni propeta Isaias: “Dawa pa namimibi kamo nin dakol, dai ako naghihinanyog; pano nin pagpabolos nin dugo an saindong mga kamot.” (Isaias 1:15) Kaya may mga gawe-gawe na nagpapangyari na an Dios dai maghinanyog sa satong mga pamibi. Kun siring, tanganing hinanyogon nin Dios na may pag-oyon an satong mga pamibi, dapat niatong aboton an nagkapirang pundamental na kahagadan.

6. Tanganing hinanyogon nin Dios an satong mga pamibi, ano an pangenot na kahagadan, asin paano niato iyan maaabot?

⁶ An sarong pangenot na kahagadan iyo na kita magtubod. (Marcos 11:24) Si apostol Pablo nagsurat: “Kun dai nin pagtubod imposible na [an Dios] mapanigoan na gayo, huli ta an minadolok sa Dios kaipuhan na magtubod na sia iyo nanggad asin na sia nagigin an parabalos sa mga maigot na naghahanap sa saiya.” (Hebreo 11:6) An pagkaigwa nin tunay na pagtubod bako sanang pakaaram na an Dios nag-eeksister asin na sia nagdadangog asin nagsisimbag sa mga pamibi. An pagtubod napapatunayan paagi sa satong mga gibo. Dapat kitang magtao nin malinaw na ebidensia na igwa kita nin pagtubod paagi sa satong pamumuhay sa aroaldaw.​—Santiago 2:26.

7. (a) Taano ta maninigo kitang magin magalang kun nakikipag-olay ki Jehova sa pamibi? (b) Kun namimibi sa Dios, paano niato ikakapaheling an kapakumbabaan asin sinseridad?

⁷ Hinahagad man ni Jehova na an mga minadolok sa saiya sa pamibi dapat na gibohon iyan na may kapakumbabaan asin sinseridad. Bako daw na may dahelan nanggad kita na magin mapakumbaba kun nakikipag-olay ki Jehova? Kun an mga tawo nagkakaoportunidad na makipag-olay sa sarong hade o presidente, parate na ginigibo ninda iyan sa magalang na paagi, na  rinerekonoser an halangkaw na posisyon kan namamahala. Lalo na nanggad na maninigo kitang magin magalang kun minadolok ki Jehova! (Salmo 138:6) Total, sia an “Dios na Makakamhan sa Gabos.” (Genesis 17:1) Kun kita namimibi sa Dios, maninigong ipaheling kan paagi nin pagdolok niato sa saiya na mapakumbaba niatong minimidbid an satong kamugtakan sa atubangan nia. An siring na kapakumbabaan mapahiro man sato na odok sa pusong mamibi na may sinseridad, na linilikayan an pinagkatodan, paorootrong mga pamibi.​—Mateo 6:7, 8.

8. Paano kita makakahiro kaoyon kan satong ipinapamibi?

⁸ An saro pang kahagadan tanganing dangogon nin Dios iyo na kita humiro kaoyon kan satong mga pamibi. Linalaoman ni Jehova na gigibohon niato an bilog niatong makakaya tanganing mangyari an satong ipinapamibi. Halimbawa, kun kita namimibi na, “Itao mo samo ngonyan an samong tinapay para sa aldaw na ini,” kita dapat na magmahigos nanggad sa ano man na trabahong yaon na kaya niatong gibohon. (Mateo 6:11; 2 Tesalonica 3:10) Kun kita nag-aarang nin tabang na pangganahan an sarong kaluyahan sa laman, dapat kitang magin mapagmaan na likayan an mga sirkonstansia asin situwasyon na puedeng magdara sato sa sugot. (Colosas 3:5) Apuera sa pundamental na mga kahagadan na ini, may mga hapot manongod sa pamibi na kaipuhan na masimbag para sa sato.

9. Kiisay kita maninigong mamibi, asin paagi kiisay?

⁹ Kiisay kita maninigong mamibi? Tinokdoan ni Jesus an saiyang mga parasunod na mamibi sa ‘Ama niato na nasa langit.’ (Mateo 6:9) Kun siring, an satong mga pamibi dapat na para sana ki Jehova Dios. Minsan siring, hinahagad ni Jehova na midbidon niato an posisyon kan saiyang bugtong na Aki, si Jesu-Cristo. Siring kan nanodan niato sa Kapitulo 5, si Jesus isinugo sa daga tanganing magserbing pantubos na mabalukat sa sato sa kasalan asin kagadanan. (Juan 3:16; Roma 5:12) Sia an ninombrahan na Halangkaw na Saserdote asin Hokom. (Juan 5:22; Hebreo 6:20) Huli kaini, dinidirehiran kita kan Kasuratan na ipaabot an satong  mga pamibi paagi ki Jesus. Sia mismo nagsabi: “Ako iyo an dalan asin an katotoohan patin an buhay. Mayo nin makakaduman sa Ama kun bakong huli sa sako.” (Juan 14:6) Tanganing dangogon an satong mga pamibi, dapat na mamibi sana kita ki Jehova paagi sa saiyang Aki.

10. Taano ta mayo nin espesipikong posisyon o postura na hinahagad kun kita namimibi?

¹⁰ Dapat daw na may espesyal na posisyon o postura kita kun namimibi? Dai. Si Jehova dai naghahagad nin ano man na espesipikong posisyon, magsalang nin mga kamot o kan bilog na hawak. An Biblia nagtotokdo na puedeng mamibi sa dakol na laen-laen na posisyon. Kaiba digdi an pagtukaw, pagduko, pagluhod, asin pagtindog. (1 Cronica 17:16; Nehemias 8:6; Daniel 6:10; Marcos 11:25) An mahalaga talaga, bakong an espesyal na postura na naheheling nin iba, kundi an tamang kamugtakan nin puso. Sa katunayan, durante kan mga aktibidad niato sa aroaldaw o kun kita napapaatubang sa emerhensia, puede kitang mamibi nin silensio dawa yaon kita saen. Nadadangog ni Jehova an siring na mga pamibi dawa iyan biyong dai naririsa kan mga nasa palibot niato.​—Nehemias 2:1-6.

11. Anong personal na mga kapurisawan an angay na magin tema nin pamibi?

¹¹ Ano an puede niatong ipamibi? An Biblia nagpapaliwanag: “Minsan ano an satong hagadon segun sa saiyang kabotan, dinadangog nia [ni Jehova] kita.” (1 Juan 5:14) Kaya puede kitang mamibi para sa ano man na bagay na kaoyon kan kabotan nin Dios. Kabotan daw nia na mamibi kita manongod sa personal na mga kapurisawan? Iyo nanggad! An pagpamibi ki Jehova puedeng magin kaagid nanggad nin pakikipag-olay sa sarong dayupot na katood. Puede kitang magtaram nin prangka, na ‘biyong ipinapahayag sa Dios an laog kan satong puso.’ (Salmo 62:8) Angay para sa sato na humagad nin banal na espiritu, huli ta iyan matabang sato na gibohon an tama. (Lucas 11:13) Makakahagad man kita nin paggiya sa paggibo nin madonong na mga desisyon asin nin kosog sa mapangganang pag-atubang sa mga problema. (Santiago 1:5) Kun kita nagkakasala, maninigo kitang humagad nin kapatawadan basado sa atang ni Cristo. (Efeso 1: 3, 7) Siempre, bako sanang personal na mga bagay an maninigong magin tema kan satong mga pamibi. Maninigo niatong pahiwason an satong mga pamibi na iinaayon an ibang tawo​—an mga kapamilya siring man an mga kapwa parasamba.​—Gibo 12:5; Colosas 4:12.

12. Paano niato matatawan nin pangenot na importansia sa satong mga pamibi an mga bagay na may labot sa satong langitnon na Ama?

¹² An mga bagay na may koneksion ki Jehova Dios maninigong tawan nin pangenot na importansia sa satong mga pamibi. Tunay nanggad na may dahelan kita na magpahayag nin odok sa pusong pag-omaw asin pasasalamat sa saiya huli sa gabos niang karahayan. (1 Cronica 29:10-13) Itinao ni Jesus an modelong pamibi, na nakasurat sa Mateo 6:9-13, na dian tinokdoan nia kitang mamibi na santipikaron logod an ngaran nin Dios, an boot sabihon, ibilang na sagrado, o banal. An sunod na nasambitan iyo an dumatong logod an Kahadean nin Dios asin na gibohon logod an kabotan nia digdi sa daga kun paano sa langit. Pakatapos sanang masambitan an mahalagang mga bagay na ini na may koneksion ki Jehova na nagtaong atension si Jesus sa personal na intereses. Kun an Dios tinatawan ta man kan pinakamahalagang lugar sa satong mga pamibi, ipinapaheling niato na interesado kita bako sanang sa sadiri tang ikakarahay.

13. Ano an ipinaparisa kan Kasuratan manongod sa lawig nin maaakong mga pamibi?

¹³ Gurano an maninigong magin lawig kan satong mga pamibi? An Biblia dai nagtatao nin limite sa kun gurano an maninigong magin lawig nin pribado o pampublikong mga pamibi. Iyan puedeng poon sa halipot na pamibi bago magkakan sagkod sa halawig na pribadong pamibi na dian biyo niatong ipinapahayag ki Jehova an laog kan satong puso. (1 Samuel 1:12, 15) Minsan siring, kinondenar ni Jesus an nagpapakangmatanos na mga indibiduwal na namimibi nin halawig asin mapagpasikat sa atubangan nin iba. (Lucas 20:46, 47) An siring na mga pamibi dai nagpapahanga ki Jehova. An mahalaga iyo na kita mamibi nin odok sa puso. Huli kaini, an lawig nin maaakong mga pamibi puedeng nagkakalaenlaen segun sa mga pangangaipo asin sirkonstansia.

14. Ano an boot sabihon kan Biblia sa pag-enkaminar kaiyan sato na “padagos na mamibi,” asin ano an nakakaranga manongod digdi?

 ¹⁴ Gurano kaparate kita maninigong mamibi? Ineenkaminar kita kan Biblia na “padagos na mamibi,” ‘magmaigot sa pamimibi,’ asin “mamibi nin daing ontok.” (Mateo 26:41; Roma 12:12; 1 Tesalonica 5:17) Siempre, an mga tataramon na ini dai nangangahulogan na kita dapat mamibi ki Jehova sa gabos na segundo kan aldaw. Imbes, sinasadol kita kan Biblia na regular na mamibi, na padagos na pinapasalamatan si Jehova huli sa karahayan nia sa sato asin inaarang an saiyang paggiya, pagranga, asin kosog. Bako daw na nakakarangang maaraman na si Jehova dai nagbubugtak nin limite sa kun gurano kalawig o kun gurano kaparate kitang makakapakipag-olay sa saiya sa pamibi? Kun talagang pinapahalagahan niato an pribilehiong mamibi, makakanompong kita nin dakol na oportunidad na mamibi sa satong langitnon na Ama.

15. Taano ta maninigo kitang magsabi nin “Amen” sa katapusan nin personal asin pampublikong mga pamibi?

¹⁵ Taano ta maninigo kitang magsabi nin “Amen” sa katapusan kan pamibi? An terminong “amen” nangangahulogan nin “iyo nanggad,” o “mangyari logod.” Ipinapaheling kan mga halimbawa sa Kasuratan na angay na magsabi nin “Amen” pakatapos nin personal asin pampublikong mga pamibi. (1 Cronica 16:36; Salmo 41:13) Paagi sa pagsabing “Amen” sa katapusan kan satong sadiring pamibi, kinokompirmar niato na sinsero an satong mga kapahayagan. Kun kita nagsasabi nin “Amen”​—baga man saboot sana o makosog—​sa katapusan kan pampublikong pamibi nin iba, ipinaparisa niato na kita minaoyon sa mga ideyang ipinahayag.​—1 Corinto 14:16.

16. Puede kitang magkaigwa nin anong kompiansa mapadapit sa pamibi?

¹⁶ Sinisimbag daw talaga ni Jehova an mga pamibi? Iyo nanggad! Igwa kita nin marigon na basehan na magkompiar na sinisimbag kan “Paradangog nin pamibi” an sinserong mga pamibi nin minilyon na tawo. (Salmo 65:2) An simbag ni Jehova sa satong mga pamibi puedeng dumatong sa laen-laen na paagi.

17. Taano ta masasabing ginagamit nin Dios an saiyang mga anghel asin an saiyang mga lingkod sa daga tanganing simbagon an satong mga pamibi?

 ¹⁷ Ginagamit ni Jehova an saiyang mga anghel asin an saiyang mga lingkod sa daga tanganing simbagon an mga pamibi. (Hebreo 1:13, 14) Dakol na an eksperyensia nin mga indibiduwal na namibi sa Dios para sa tabang na masabotan an Biblia asin dai nahaloy pakatapos kaiyan nakaolay kan saro sa mga lingkod ni Jehova. An siring na mga eksperyensia nagtatao nin ebidensia na ginigiyahan nin mga anghel an paghuhulit kan Kahadean. (Kapahayagan 14:6) Tanganing simbagon an satong mga pamibi sa panahon nin grabeng pangangaipo, tibaad motibaron ni Jehova an sarong Kristiano na tabangan kita.​—Talinhaga 12:25; Santiago 2:16.

18. Paano ginagamit ni Jehova an saiyang banal na espiritu asin an saiyang Tataramon tanganing simbagon an mga pamibi kan saiyang mga lingkod?

 ¹⁸ Ginagamit man ni Jehova Dios an saiyang banal na espiritu asin an saiyang Tataramon, an Biblia, tanganing simbagon an mga pamibi kan saiyang mga lingkod. Puede niang simbagon an satong mga pamibi para sa tabang na makaya an mga pagbalo paagi sa pagtao sato nin paggiya asin kosog paagi sa saiyang banal na espiritu. (2 Corinto 4:7) Sa parate an simbag sa satong mga pamibi para sa paggiya naggigikan sa Biblia, na dian si Jehova nagtatao sato nin tabang sa paggibo nin madonong na mga desisyon. An nakakatabang na mga teksto tibaad makua durante kan satong personal na pag-adal sa Biblia asin mantang binabasa niato an Kristianong mga publikasyon, siring kan librong ini. An sono sa Kasuratan na mga punto na kaipuhan niatong estudyaran tibaad iapod sa atension niato paagi sa sinabi sa Kristianong pagtiripon o paagi sa komento nin sarong nagmamalasakit na magurang sa kongregasyon.​—Galacia 6:1.

19. Ano an maninigo niatong girumdomon kun an satong mga pamibi kun beses garo baga dai sinisimbag?

¹⁹ Kun garo baga pinapahaloy ni Jehova an pagsimbag sa satong mga pamibi, ini nungkang huli ta dai nia kayang simbagon iyan. Imbes, dapat niatong girumdomon na sinisimbag ni Jehova an mga pamibi segun sa saiyang kabotan asin sa saiyang itinalaan na panahon. Aram nia an satong mga pangangaipo asin kun paano iyan aasikasohon nin orog nanggad kisa aram niato. Sa parate tinotogotan nia kita na ‘padagos na maghagad, maghanap,  asin magtuktok.’ (Lucas 11:5-10) An siring na pagmamaigot nagpapaheling sa Dios na an satong pagmawot makosog nanggad asin na an satong pagtubod tunay. Dugang pa, tibaad simbagon ni Jehova an satong mga pamibi sa paaging dai niato naririsa. Halimbawa, tibaad simbagon nia an satong pamibi mapadapit sa sarong partikular na pagbalo, bakong paagi sa paghale kan problema, kundi paagi sa pagtao sato kan kosog na matagalan iyan.​—Filipos 4:13.

20. Taano ta maninigo niatong aprobetsaran nin lubos an mahalagang marhay na pribilehiong mamibi?

²⁰ Nagpapasalamat nanggad kita na an Kaglalang kan mahiwason na unibersong ini harani sa gabos na nag-aarang sa saiya nin tama sa pamibi! (Salmo 145:18) Aprobetsaran logod niato nin lubos an mahalagang marhay na pribilehiong mamibi. Kun gigibohon niato iyan, makakamtan niato an magayagayang oportunidad na orog pa nganing rumani ki Jehova, an Paradangog nin pamibi.