1, 2. Amu jé bia yiane yene na meye’elane me ne beta jam asu dangan, a amu jé é ne mfi na bi yeme jôme Kalate Zambe a ye’ele mfa’a te?

SI É ne angôndô ya tyôtyoé éyoñe bia ve’e je a émo minlañ ése. Nde fe mise me Yéhôva, “nyô a nga té yôp a si,” meyoñe mese ya si me ne ane atoé mendime ya nlônga. (Besam 115:15; Ésaïe 40:15) Ve Kalate Zambe a jô na: “Yéhôva a ne bebé be ba bese b’aloene nye, ba bese b’aloene nye a benya mejôô. A ye jalé nkômbane ya ba b’ako nye woñ; a ye fe wô’ô ñyône wop, a nyii be.” (Besam 145:18, 19) Tame simesan avale nalé a tinan! Nté biôm bise a ne ngul ése a ne bebé a bia, a a ye wô’ô bia nge bi “aloene nye a benya mejôô.” A ne beta duma asu dangan amu bi bili ngule ya subu Zambe bebé a zene ya meye’elan.

² Nge bia yi na Yéhôva a wô’ô meye’elane mangan, bia yiane ye’elane nye aval a kañese. Nde bi ne bo nalé aya nge bi nji tu’a wô’ô jôme Kalate Zambe a ye’ele mfa’a ya meye’elan? É ne beta mfi na bi yeme jôme Mintilan mi ajô é lat a nlô ajô ôte, amu meye’elane ma volô bia na bi subu Yéhôva bebé.

3. Beta amu wua a tindi bia na bi ye’elane Yéhôva a ne mbé?

³ Beta amu ôsu a bo na bi ye’elane Yéhôva a ne na émien a jô bia na bi ye’elane nye. Nkobô wé wo tindi bia avale di: “Te tyelane minleme yôp a jam éziñ; ve mfa’a ya jam ese, mam mi asili me kateba’ane be Zambe a meye’elan a nja’an a mvean akéva. A mvo’é Zambe, nje éte je adañ fe’ ése, ja ye ba’ale minlem mienan a minsimesane mienan be Krist Yésus.” (Bephilippien 4:6, 7) Nde ñhe, bi nji kômbô bo ane nge bi nji yene beta ma’a Njô a Dañ émo minlañ ése a nga mane ta’a nyi asu dangan!

4. Aval avé mbane meye’elan wo bo na bi subu Yéhôva bebé?

⁴ Amu mfe a ne na, éyoñ bia ye’elane Yéhôva mban, bia yemete minkañe mi ne zañe bia be nye. Nya mvôé a nji yene mvôé jé fo’o ve éyoñ a yi jôm éziñ. Ve mvôé ése ja fas mame mvôé jé fok; éyoñe te fe amvôé dap da tu’a lame minkañ ôte’ete’ ôte’etek amu ba folan asimesan, a mame ma fombô be. Bi ne fe jô a zen éziñe na, amvôé dangan a Yéhôva Zambe é ne avale da. A zene ya kalate nyi, ô nga yé’é abui mam Kalate Zambe a ye’ele mfa’a  Yéhôva; avale môt a né, a nsôñane wé. Ô yé’éya na a ne môte mia nye mi ne bo amvôé. Meye’elane m’ ave wo fane ya kate Ésa wôé ya yôp été ômômo’o asimesane dôé, a mimfasane mi ne wo nsolane nlem été. Éyoñ wo bo nalé, wo subu Yéhôva bebé.​—Jacques 4:8.

5. Jé ja liti na Yéhôva a nji wô’ô meye’elane mese?

⁵ Ye Yéhôva a wô’ô meye’elane mese? Bi tame yene jame a nga jô bebo melo ya Israël melu me nkulu mejô Ésaïe: “Éyoñ mi abo meye’ elan abui, m’ aye bo te vô’ ôlô: mo menan me nto metyi ne lut!” (Ésaïe 1:15) Nde mam méziñ bia bo me ne bo na Zambe a bo te wô’ô meye’elane mangan. Asu ya na Zambe a wô’ô meye’elane mangan, bia yiane jalé bone be mam béziñ.

6. Asu ya na Zambe a wô’ô meye’elane mangan, jam ôsu bia yiane bo é ne avé, a da ye yené aya?

⁶ Jam ôsu bia yiane jalé é ne na bia yiane bi mbunan. (Marc 11:24) Nlômane Paul a nga tili na: “A mbunane momo, môt a vo’o bo nya mvo’é mise [Me Zambe]; amu nyô a zu be Zambe a yiane fo’o buni na, a ne, a na, a ne ñya’ane ya ba be ajeñe nye.” (Behébreu 11:6) E bi nya mbunane a nji tinane ve na bi yeme na Zambe a ne, a na, a wô’ô meye’elane mangan a yalane me. Bia liti mbunan a zene ya mimboan. Bia yiane liti nne ngeññ na bi bili mbunan a zene ya mam bia bo môs ôse.​—Jacques 2:26.

7. (a) Amu jé bia yiane liti ésemé éyoñe bia ye’elane Yéhôva? (b) Éyoñe bia ye’elane Zambe aval avé bi ne sulu biabebiene si a yoé nleme wongan?

⁷ Yéhôva a yi fe na bôte ba subu nye bebé a zene ya meye’elane be sulu bebiene si, a be kuli mame me ne be nlem été. Ye bi nji yiane sulu biabebiene si éyoñ bia ye’elane Yéhôva? Éyoñ bôte béziñ be bili fane ya kobô a njô bôt éziñe ya si, be wô’ô de bo a abui ésemé, amu ba  yem abime nté nkôñe yôp ôvé njô bôt ate a né. Tame ñhe simesan abime abui ésemé bia yiane liti éyoñ bia ye’elane Yéhôva! (Besam 138:6) Nge bi vaa mam mese ma, a ne “Zambe ya Ngul Ése.” (Metata’a 17:1) Éyoñ bia ye’elane Zambe, bia yiane liti a fatane meye’elane jangan na bia sulu biabebiene si, a yemelane na bi ne zezé mise mé. Nge bia sulu biabebiene si avale te, nalé ate a ye volô na bi yoé nleme wongan éyoñ bia ye’elan, bi sa’ale kobô avale mame da, a avale meye’elane da. Yésus a nga jô na: “Éyoñe mia ye’elan, te jôane avale mam da éyoñ ése.”​—Matthieu 6:7, 8, NW.

8. Nne bi ne bo aya na meye’elane mangan me tôban a mam bia bo?

⁸ Atiñ avo’o bia yiane jalé asu na Zambe a vô’ôlô meye’elane mangan é ne na bi bo mam bia sili nye meye’elan été. Yéhôva a yi na mam mese bia sili nye biabebien bi taté jôm ése bi ne ngule ya bo asu na bi bi mam mete. Bi tame nyoñ éve’an, nge bia ye’elane na: “Va’a bia bidi bi ayiane bia môse ya den,” biabebien bia yiane saé a ngul ése, aval ésaé ése bia yen, bia yiane jibi bo je. (Matthieu 6:11; 2 Bethessalonicien 3:10) Nge bia ye’elane na bia yi mvolane ya dañe jam éziñe da tya’a bia nlem, bia yiane tabe ntyele na bi sa’ale mam me ne bo na bi tôbane meve’ele. (Becolossien 3:5) Nge ô va’a mintene mi mame bi ndôme mane yene le, bia yiane yalane minsili miziñ mi wô’ô bômbô mi fômbô’ô meye’elan.

9. Bia yiane ye’elane za, a zene ya éyôlé za?

⁹ Za bia yiane ye’elane nye? Yésus a nga ye’ele beyé’é bé be ye’elane na: “A Tate wongan a ne yôp.” (Matthieu 6:9) Bia yiane ye’elane fo’o ve Yéhôva Zambe étam. Ve jame da Yéhôva a yi na bi ye’elan éyôlé Mone wé, Yésus Krist. Amu jé? Amu avale bi nga yene Kabetôlô 5, Yésus a nga  so si na a zu ve ntañ, a kôté bia abé a awu. (Jean 3:16; Beromain 5:12) Zambe a nga telé nye Beta Prêtre a Ntyi’i Mejô. (Jean 5:22; Behébreu 6:20) Mintilane mia jô bia na bia yiane ye’elan bi tyi’i mvuse be Yésus. Nye émien a nga jô na: “Ma me ne zen, me ne fe benya mejôô, a ényiñ: te ke môt a zu be Tate, ve amu ma.” (Jean 14:6) Mfa’a ya na meye’elane mangane me wô’é, bia yiane ye’elane fo’o ve Yéhôva a zene ya Mone wé.

10. Amu jé ngum aval été éziñ ô nji sili éyoñe bia ye’elan?

¹⁰ Ye bia yiane tebe ngum aval été éziñ éyoñe bia ye’elan? Momo. Yéhôva a nji jô na mo mangan nge nyôl jangan bia yiane bi ngum aval été éziñ. Kalate Zambe a ye’ele na bi ne ye’elan bi tele bité mevale meva. Bi ne ye’elane nye tetoo, kukuu, tetele nge ke bi kute meboñ. (1 Minkañete 17:16; Nehémie 8:6; Daniel 6:10) Jôme ja dañe mfi é ne, sa ke ngume aval été na bi bo minyéné, ve mbamba ôsimesane bi bili nlem été. Éyoñe bia ke bia bo mam mangan, nge ke éyoñe bia tôbane mbia be mam, bi ne ye’elane nlem été vôm ase bi né. Yéhôva a wô’ô avale meye’elane te, to’o bôte be ne wo fefele be nji yeme na wo ye’elan.​—Nehémie 2:1-6.

11. Mam mevé ma fombô biabebien bi ne futi meye’elane mangan été?

¹¹ Mam mevé bi ne sili éyoñe bia ye’elan? Kalate Zambe a timi na: “Nge bi asili jam éziñ aval ane nkômbane wé, a [Yéhôva] wô’ô bia.” (1 Jean 5:14) Nde bi ne ye’elane asu avale jam ése da tôban a nkômbane Zambe. Ye nkômbane wé ô ne na bi ye’elan asu mam ma fombô biabebien? Ôwé! E ye’elane Yéhôva a ne ane nge bia laan a mvôé jangan. Bi nji yiane solé nye mam méziñ, bia yiane ‘kulane mam me ne bia minlem’ mise me Zambe. (Besam 62:8) É ne mvaé asu dangan na bi sili mbamba nsisim, amu a ye volô bia na bi bo mam me ne zôsô. (Luc 11:13)  Bi ne fe sili mvolane ya nyoñe mbamba miñtyi’ane mfa’a ya bi ngule ya dañe minju’u bia tôbane mie. (Jacques 1:5) Éyoñe bi boya abé, bia yiane sili njaman, bi to mebun a metuna’a Yésus a nga ve. (Beéphésien 1:3, 7) Bi nji yiane ye’elane fo’o ve asu mam ma fombô bia. Bi ne fe ye’elan asu bôte befe​—bôte ya nda bôte jangan, nge Bekristen bevok.​—Mam minlôman 12:5; Becolossien 4:12.

12. Mam m’Ésa wongane ya yôp été, me ne tebe ôsu meye’elane mangan été aya?

¹² Mam ma fombô Yéhôva Zambe ma yiane tebe ôsu meye’elane mangan été. Bi bili b’amu ya ve Zambe duma a akéva amu mvam jé. (1 Minkañete 29:10-13) Yésus a nga ve éve’ela meye’elan bi ne yene kalate Matthieu 6:9-13. Meye’elane mete été, a nga ye’ele bia na bi ye’elane na jôé Zambe é bo mfuban, é bo étyi; na Éjôé Zambe é zu, a bo na nkômbane wé ô bobane si aval ane wo bobane yôp, nne éfuse j’ake ôsu a kobô nalé. Fo’o ve éyoñe beta be mam ma fombô Yéhôva mete me maneya totebane nje Yésus a nga kobô mame ma fombô nye émien. Éyoñe bia ve Zambe beta éto meye’elane mangan été, bia liti na sa ke ve mam mangan étam mme bia nyoñe ngap.

13. Jé Mintilan mi aliti mfa’a ya nté meye’elan wo yian?

¹³ Meye’elan mangan me ne bo nté ôvé? Kalate Zambe a nji ve nté meye’elane ma yiane bo; to’o ma ya bôt été, to’o ma ya bi ne étam. Bi ne bo étune meye’elan ôsusua na bia di; ve bi ne ye’elan ayap, éyoñe bi ne étam a yoé Yéhôva nleme wongan. (1 Samuel 1:12, 15) Ve jame da, Yésus a nga komekane bôte be mbe be nye’e ayabe meye’elan vôme bôte be loo be, ndembene be yené ane ba dañe zôsô. (Luc 20:46, 47) Avale meye’elane te, Yéhôva a nji kame me. Jôm é ne mfi abui é ne aval asimesan bi bili nleme wongan été. Nté meye’elan ô tii a miñyian a aval été bi tele.

14. Jé Kalate Zambe a yi na a jô éyoñ a tindi bia na bi “bo melu mese ve ye’elan,” amu jé nalé a bôé bia nleme si?

 ¹⁴ Bia yiane ye’elan biyoñe biambé? Kalate Zambe a jô bia na bi “bo melu mese ve ye’elan,” “mi bo’ane mbane meye’elan été,” “mi ye’elan te jô’é.” (Luc 18:1; Beromain 12:12; 1 Bethessalonicien 5:17) Yaa, bifia bi bi nji tinane na bia yiane ye’elane Yéhôva ngum nté môs teke vebe. Akusa bo na Kalate Zambe a jô bia na bi ye’elan éyoñ ése, bia ye ke ôsu a ve Yéhôva akéva amu mvame jé a melep a ve bia, a ngule a ve bia nyul. Ye nlem ô nji bo bia avak, éyoñ bia yeme na, Yéhôva a nji ve ngumba nté meye’elane mangan ma yiane bo? Nge bia nye’e bi ye’elane nye, bia ye bi abui biyoñe ya ye’elan a Ésa wongan a ne yôp.

15. Amu jé bia yiane jô “Amen” éyoñe biabebien nge ki môte mfe a mane ye’elan?

¹⁵ Amu jé bia yiane jô “Amen” éyoñe meye’elane ma man? Éfia “amen” je a tinane na “é bo’o avale wo jô,” nge “nalé a boba’an.” Bive’ane ya Mintilan bi aliti na é ne mvo’é ya jô “Amen” éyoñe môt a mane meye’elan. (1 Minkañete 16:36; Besam 41:13) Éyoñe bia jô “Amen” memane ya meye’elane mangan, bia liti na mam bi ndeme mane jô ma so bia nlem été. Éyoñe bia jô “Amen”​—e si si, nge yôp été​—éyoñe môte mfe a mane ye’elan, bia liti na bia kañese mam a te mane jô.​—1 Becorinthien 14:16.

16. Ndi nleme fé bi bili mfa’a ya meye’elane mangan?

¹⁶ Ye Yéhôva a yalane fo’o meye’elan? Ôwé! Bi bili nya amu a tindi bia bi buni na “Nyô a wô’ô meye’elan” a yalane meye’elane ma so betoyini be bôte nlem été. (Besam 65:2) Yéhôva a ne yalane meye’elane mangan mevale meval.

17. Amu jé bi ne jô na Zambe a belane beéngele a bebo bisaé bé be to si na a yalane meye’elane mangan?

 ¹⁷ Yéhôva a belane beéngele a bebo bisaé bé ya si asu na a yalane meye’elan. (Behébreu 1:13, 14) Abui minlañe mi aliti na bôte be nga ye’elane Zambe asu na a ve be ngule ya wô’ô Kalate Zambe; ane mvuse ya été, mbo ésaé Yéhôva a nga zu volô be. Avale minlañe te de a yemete na beéngele be a su’ ésaé nkañetane mbamba foé ya Éjôé. (Nlitan 14:6) Asu na a yalane meye’elane mangan éyoñe bia yi jôm éziñ, Yéhôva a ne lôme Kristen éziñe na a zu  volô bia.​—Minkana 12:25; Jacques 2:16.

18. Aval avé Yéhôva a belane mbamba nsisime wé a Mejô mé na a yalane bebo bisaé bé?

¹⁸ Yéhôva Zambe a belane fe mbamba nsisime wé a Mejô mé, Kalate Zambe, asu na a yalane meye’elane bebo bisaé bé. Nge bia sili nye ngule ya dañe meve’ele bia tôbane me, a ne liti bia zene ya nyoñ, a a ne ve bia ngule ja yian a zene ya mbamba nsisime wé. (2 Becorinthien 4:7) Biyoñ abui, éyalane ya jam bia te sili é wô’ô so Kalate Zambe été; été wôé nye Yéhôva a volô bia na bi nyoñe mbamba mintyi’an. Bi ne yene bifuse bi ne volô bia éyoñ bia yé’é Kalate Zambe étam, a éyoñ bia lañe bekalate ya Bengaa be Yéhôva ba tili, bebé ane nyi. Miñye’elan miziñ ya Mintilan bia kômbô tu’a wôk mi ne vebane bisulan, a éyoñe bia vô’ôlô biyalane bevendé be ne ntyele akônda été ba ve.​—Begalate 6:1.

19. Jé bia yiane ba’ale nge biyoñ biziñ, bi lôô ane nge meye’elane mangan me nji bi éyalan?

¹⁹ Nge d’ayené ane nge Yéhôva a nji ji’a yalane meye’elane mangan, nalé a nji ve’ele tinane na a se ngule ya yalane bia. Bia yiane ba’ale na Yéhôva a ve biyalan aval ane nkômbane wé ô né a éyoñ ja yian. A yeme miñyiane miangan a aval avé ane jalé mie alôté biabebien. Biyoñ biziñ, a wô’ô kañese na bi ke ôsu a ‘ja’é, e jeñ, a kute  mbé.’ (Luc 11:5-10) Avale mbane te d’aye liti Zambe na nkômbane wongan ô ne édok, a na bi bili ndi nleme na a ye yalane meye’elane mangan. Jam afe bia yiane yem é ne na, Yéhôva a ne ve bia éyalane ya meye’elane mangan biabebien bi teke yeme na éyalane le. Bi ne nyoñ éve’an, nge bia tôbane nju’ éziñ, a ne bo te vaa nju’u te, ve jame da a ve bia ngule ya jibi wô.​—Bephilippien 4:13.

20. Amu jé bia yiane yene meye’elan ane jôm é ne dia?

²⁰ Angôndô ya mbamba jam bi bili na Nté biôm ya si a yôp a ne bebé a bôte bese ba ye’elane nye avale da yian! (Besam 145:18) Nde ñhe bia yiane belane ma’a bi bili na bia ye’elan a Yéhôva. Nge bia bo nalé, b’aye bi ava’a ya subu Yéhôva bebé, “Nyô a wô’ô meye’elan.”