1, 2. Mɛni hewɔ esa akɛ wɔbu sɔlemɔ akɛ hegbɛ kpele ni wɔná lɛ, ni mɛni hewɔ ehe hiaa ní wɔle nɔ ni Biblia lɛ tsɔɔ yɛ sɔlemɔ he lɛ?

KƐ́ AKƐ shikpɔŋ lɛ to jeŋ muu lɛ fɛɛ he lɛ, anaa akɛ shikpɔŋ lɛ edaaa kwraa. Yɛ anɔkwale mli lɛ, yɛ Yehowa ni ji “ŋwɛi kɛ shikpɔŋ feelɔ lɛ” hiɛ lɛ, jeŋmaji lɛ tamɔ nu kuli yɛ blage he. (Lala 115:15; Yesaia 40:15) Kɛlɛ, Biblia lɛ kɛɔ akɛ: “Yehowa ebɛŋkɛɔ mɛi fɛɛ ni tsɛɔ lɛ lɛ, mɛi fɛɛ ni tsɛɔ lɛ yɛ anɔkwale mli lɛ. Mɛi ni sheɔ lɛ gbeyei lɛ, efeɔ nɔ ni amɛtaoɔ ehaa amɛ, eboɔ amɛbolɔmɔ toi.” (Lala 145:18, 19) Bo lɛ susumɔ nɔ ni no tsɔɔ lɛ he okwɛ! Jeŋ muu fɛɛ Bɔlɔ lɛ bɛŋkɛɔ wɔ ni eboɔ wɔ toi kɛ́ ‘wɔtsɛ lɛ yɛ anɔkwale mli.’ Kwɛ hegbɛ ni wɔná akɛ wɔɔbɛŋkɛ Nyɔŋmɔ yɛ sɔlemɔ mli!

² Shi kɛlɛ, kɛ́ wɔmiisumɔ ni Yehowa abo wɔsɔlemɔi atoi lɛ, esa akɛ wɔsɔle wɔha lɛ yɛ gbɛ ni ekpɛlɛɔ nɔ lɛ nɔ. Ja wɔnu nɔ ni Biblia lɛ tsɔɔ yɛ sɔlemɔ he lɛ shishi dani wɔbaanyɛ wɔtsu enɛ he nii? Ehe miihia ní wɔle nɔ ni Ŋmalɛi lɛ kɛɔ yɛ sane nɛɛ he, ejaakɛ sɔlemɔ yeɔ ebuaa wɔ koni wɔtsi wɔbɛŋkɛ Yehowa.

3. Mɛni ji yiŋtoo titri kome hewɔ ni esa akɛ wɔsɔle wɔha Yehowa lɛ?

³ Yiŋtoo titri kome hewɔ ni esa akɛ wɔsɔle wɔha Yehowa  ji akɛ, lɛ diɛŋtsɛ ewoɔ wɔ hewalɛ koni wɔfee nakai. E-Wiemɔ lɛ woɔ wɔ hewalɛ akɛ: “Nyɛkahaoa yɛ nɔ ko nɔ ko he, shi moŋ nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsia nyɛtutɔmɔi lɛ atã yɛ Nyɔŋmɔ hiɛ; ni Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Kristo Yesu mli!” (Filipibii 4:6, 7) Yɛ anɔkwale mli lɛ, esaaa akɛ wɔkuɔ wɔhiɛ wɔfɔɔ gbɛjianɔ ni tamɔ nɛkɛ ni jeŋ muu fɛɛ Nɔyelɔ ni Nɔ Kwɔ Fe Fɛɛ lɛ jɛ mlihilɛ mli eto eha wɔ lɛ nɔ!

4. Mɛɛ gbɛ nɔ sɔlemɔ ni wɔsɔleɔ daa wɔhaa Yehowa lɛ tsɔɔ ewajeɔ wɔkɛ lɛ teŋ wekukpãa lɛ?

⁴ Yiŋtoo kroko hewɔ ni esa akɛ wɔsɔle ji akɛ, sɔlemɔ ni wɔsɔleɔ wɔhaa Yehowa daa lɛ ji gbɛ ko ni wɔtsɔɔ nɔ wɔkɛwajeɔ wɔkɛ lɛ teŋ wekukpãa lɛ. Jeee be mli ni nɔ ko he miihia anɔkwa nanemɛi pɛ ni amɛgbaa sane. Yɛ no najiaŋ lɛ, anɔkwa nanemɛi kɛ amɛhe fɔɔ sanegbaa, ni beni amɛyaa nɔ amɛjieɔ amɛsusumɔi, naagbai, kɛ henumɔi akpo amɛtsɔɔ amɛhe lɛ, ehaa amɛnaanyobɔɔ lɛ mli waa. Yɛ gbɛ̀i komɛi anɔ lɛ, shihilɛ lɛ bafeɔ tamɔ nakai nɔŋŋ yɛ wɔkɛ Yehowa Nyɔŋmɔ teŋ wekukpãa lɛ mli. Wolo nɛɛ eye ebua bo ni okase nibii babaoo yɛ nɔ ni Biblia lɛ tsɔɔ yɛ Yehowa he, esui, kɛ eyiŋtoi ahe lɛ he. Obale lɛ akɛ eji mɔ ko ni yɔɔ diɛŋtsɛ. Sɔlemɔ haa onáa hegbɛ  koni ojie osusumɔi kɛ omligbɛ henumɔi akpo otsɔɔ oŋwɛi Tsɛ lɛ. Be mli ni ofeɔ nakai lɛ, ehaa obɛŋkɛɔ Yehowa.—Yakobo 4:8.

5. Mɛni tsɔɔ akɛ Yehowa booo sɔlemɔi fɛɛ atoi?

⁵ Ani Yehowa boɔ sɔlemɔi fɛɛ atoi? Susumɔ nɔ ni ekɛɛ Israelbii atuatselɔi ni hi shi yɛ Yesaia gbii lɛ amli lɛ he okwɛ: “Ni kɛ nyɛsɔle babaoo tete lɛ, miboŋ nyɛ toi: nyɛniji ahe eyimɔ kɛ lá!” (Yesaia 1:15) No hewɔ lɛ nifeemɔi komɛi baanyɛ aha Nyɔŋmɔ akabo wɔsɔlemɔi atoi. No hewɔ lɛ, bɔni afee ni Nyɔŋmɔ abo wɔsɔlemɔi atoi lɛ, esa akɛ wɔtsu taomɔ nibii komɛi ni he hiaa lɛ ahe nii.

6. Mɛɛ taomɔ nii ni he hiaa waa baaha Nyɔŋmɔ abo wɔsɔlemɔi atoi, ni te wɔɔfee tɛŋŋ wɔtsu he nii lɛ?

⁶ Taomɔ nii ko ni he hiaa waa ji ni wɔná hemɔkɛyeli. (Marko 11:24) Bɔfo Paulo ŋma akɛ: “Kɛ hemɔkɛyeli bɛ lɛ, anyɛŋ Nyɔŋmɔ hiɛ asa; ejaakɛ mɔ ni baa Nyɔŋmɔ ŋɔɔ lɛ, ja ehe eye akɛ eyɛ ni eji mɛi ni taoɔ esɛɛ gbɛ lɛ anyɔmɔwolɔ hu.” (Hebribii 11:6) Anɔkwa hemɔkɛyeli ni aaaná lɛ biɔ babaoo fe le kɛkɛ ni aaale akɛ Nyɔŋmɔ yɛ shihilɛ mli, eboɔ wɔsɔlemɔi atoi ni ehaa hetoo. Wɔkɛ wɔnifeemɔ hu tsɔɔ akɛ wɔyɛ hemɔkɛyeli. Esa akɛ wɔkɛ bɔ ni wɔhiɔ shi daa gbi wɔhaa lɛ atsɔɔ faŋŋ akɛ wɔyɛ hemɔkɛyeli.—Yakobo 2:26.

7. (a) Mɛni hewɔ esa akɛ wɔjie bulɛ kpo beni wɔkɛ Yehowa wieɔ yɛ sɔlemɔ mli lɛ? (b) Mɛɛ gbɛ nɔ wɔbaanyɛ wɔjie heshibaa kɛ anɔkwayeli kpo beni wɔsɔleɔ wɔhaa Nyɔŋmɔ lɛ?

⁷ Yehowa kpaa gbɛ hu akɛ mɛi ni bɛŋkɛɔ lɛ yɛ sɔlemɔ mli lɛ kɛ heshibaa kɛ anɔkwayeli baafee nakai. Ani wɔbɛ yiŋtoo ko ni wɔɔdamɔ nɔ wɔba wɔhe shi kɛji akɛ wɔkɛ Yehowa miiwie? Kɛ́ gbɔmɛi ná hegbɛ akɛ amɛkɛ maŋtsɛ ko loo nɔyelɔ ko awie lɛ, bei pii lɛ amɛkɛ bulɛ feɔ nakai, ejaakɛ amɛkpɛlɛɔ gbɛhe ni nɔ kwɔ ni nɔyelɔ lɛ yɔɔ lɛ nɔ. Belɛ kwɛ bɔ ni esa jogbaŋŋ akɛ wɔjie bulɛ kpo beni wɔbɛŋkɛɔ Yehowa lɛ! (Lala 138:6) Yɛ anɔkwale mli lɛ, lɛ ji “Mawu Ofe” lɛ. (1 Mose 17:1) Kɛji wɔmiisɔle  wɔha Nyɔŋmɔ lɛ, esa akɛ gbɛ ni wɔtsɔɔ nɔ wɔbɛŋkɛɔ lɛ lɛ atsɔɔ akɛ wɔkɛ heshibaa kpɛlɛɔ gbɛhe ni wɔyɔɔ kɛ akɛto enɔ̃ lɛ he lɛ nɔ. Heshibaa ni tamɔ nɛkɛ lɛ hu baatsirɛ wɔ koni wɔjɛ wɔtsui mli wɔkɛ anɔkwayeli asɔle, ni wɔtsi wɔhe kɛjɛ sɔlemɔ kome too lɛ nɔŋŋ ni wɔɔti mli wɔkɛɛ daa lɛ he.—Mateo 6:7, 8.

8. Te wɔɔfee tɛŋŋ wɔha wɔnifeemɔi kɛ nibii ni wɔsɔleɔ yɛ he lɛ akpã gbee?

⁸ Taomɔ nii kroko hu ni baaha Nyɔŋmɔ abo wɔ toi ji ni wɔfee wɔnii yɛ wɔsɔlemɔi lɛ kɛ gbeekpãmɔ naa. Yehowa miikpa gbɛ akɛ wɔbaafee bɔ fɛɛ bɔ ni wɔɔnyɛ kɛtsu nɔ ni wɔsɔleɔ yɛ he lɛ he nii. Ákɛ nɔkwɛmɔnɔ lɛ, kɛ́ wɔsɔle akɛ, “Ha wɔ ŋmɛnɛ wɔdaa ŋmãa” lɛ, esa akɛ wɔkɛ wɔnyɛmɔ fɛɛ atsu nitsumɔ fɛɛ nitsumɔ ni hi ni wɔnine aaashɛ nɔ lɛ waa. (Mateo 6:11; 2 Tesalonikabii 3:10) Kɛ́ wɔsɔle kɛha yelikɛbuamɔ koni wɔnyɛ wɔye heloonaa gbɔjɔmɔ ko nɔ kunim lɛ, esa akɛ wɔkɛ henɔkwɛmɔ akpoo shihilɛi kɛ nifeemɔi fɛɛ ni baanyɛ eha wɔkɛ wɔhe awo kaa mli lɛ. (Kolosebii 3:5) Yɛ taomɔ nii ni he hiaa nɛɛ asɛɛ lɛ, sanebimɔi krokomɛi yɛ ni kɔɔ sɔlemɔ he ní ebaabi ni wɔha hetoo.

9. Namɔ esa akɛ wɔsɔle wɔha, ni namɔ nɔ esa akɛ wɔsɔle kɛtsɔ?

⁹ Namɔ esa akɛ wɔsɔle wɔha? Yesu tsɔɔ esɛɛnyiɛlɔi lɛ koni amɛsɔle amɛha “Wɔtsɛ ni yɔɔ ŋwɛi” lɛ. (Mateo 6:9) Belɛ, esa akɛ wɔsɔle wɔha Yehowa Nyɔŋmɔ pɛ. Shi kɛlɛ, Yehowa miikpá gbɛ akɛ wɔkpɛlɛ hegbɛ ni e-Bi koome Yesu Kristo yɔɔ lɛ nɔ. Taakɛ wɔkase yɛ wolo nɛɛ Yitso 5 lɛ mli lɛ, atsu Yesu kɛba shikpɔŋ lɛ nɔ akɛ kpɔmɔnɔ koni ebakpɔ wɔ kɛjɛ esha kɛ gbele mli. (Yohane 3:16; Romabii 5:12) Lɛ ji Osɔfonukpa kɛ Kojolɔ ni ahala lɛ. (Yohane 5:22; Hebribii 6:20) No hewɔ lɛ, Ŋmalɛi lɛ fãa wɔ koni wɔkɛ wɔsɔlemɔi lɛ atsɔ Yesu nɔ. Yesu diɛŋtsɛ kɛɛ akɛ: “Mi nɔŋŋ ji gbɛ lɛ kɛ anɔkwale lɛ kɛ wala lɛ; mɔ ko baaa tsɛ lɛ ŋɔɔ, akɛ ja etsɔ minɔ.” (Yohane 14:6) Bɔni afee ni  abo wɔsɔlemɔi atoi lɛ, esa akɛ wɔsɔle wɔha Yehowa kɛtsɔ e-Bi lɛ nɔ.

10. Mɛni hewɔ bɔ ni wɔdamɔɔ shi loo wɔkulaa shi wɔhaa lɛ he ehiaaa kɛ́ wɔmiisɔle lɛ?

¹⁰ Ani esa akɛ wɔdamɔ shi loo wɔkula shi yɛ gbɛ krɛdɛɛ ko nɔ kɛ́ wɔmiisɔle? Dabi. Yehowa biii ni gbɔmɔtso muu lɛ fɛɛ loo niji lɛ ahi shihilɛ pɔtɛɛ ko mli. Biblia lɛ tsɔɔ akɛ wɔbaanyɛ wɔha wɔgbɔmɔtso lɛ shikãmɔ ahi gbɛ̀i srɔtoi babaoo amli ni wɔsɔle. Enɛɛmɛi ekomɛi ji shitamɔ, shikotomɔ, shikulamɔ, kɛ shidaamɔ. (1 Kronika 17:16; Nehemia 8:6; Daniel 6:11; Marko 11:25) Jeee bɔ ni gbɔmɔtso lɛ shikãmɔ yɔɔ ha yɛ gbɛ krɛdɛɛ ko nɔ ní mɛi krokomɛi baana lɛ ji nɔ ni he hiaa, shi moŋ tsui kpakpa ni mɔ aaahiɛ lɛ ji nɔ ni he hiaa. Yɛ anɔkwale mli lɛ, wɔbaanyɛ wɔsɔle yɛ dioofeemɔ mli yɛ he fɛɛ he yɛ wɔdaa gbi nifeemɔi amli, loo beni wɔkɛ hiamɔ shihilɛ ko ekpe. Eyɛ mli akɛ mɛi ni yɔɔ wɔmasɛi lɛ yɔseee moŋ, shi Yehowa boɔ sɔlemɔi ni tamɔ nakai lɛ atoi.—Nehemia 2:1-6.

11. Mɛɛ nibii komɛi ni he hiaa wɔ wɔbaanyɛ wɔsɔle yɛ he?

¹¹ Mɛni wɔbaanyɛ wɔbi kɛ́ wɔmiisɔle? Biblia lɛ tsɔɔ mli akɛ: “Kɛji wɔba nɔ ko yɛ esuɔmɔ naa lɛ, [Yehowa] eboɔ wɔ toi.” (1 Yohane 5:14) No hewɔ lɛ wɔbaanyɛ wɔsɔle wɔbi nɔ fɛɛ nɔ ni kɛ Nyɔŋmɔ suɔmɔnaa nii kpãa gbee lɛ. Ani eji esuɔmɔnaa nii akɛ wɔsɔle yɛ nibii ni he hiaa wɔ lɛ ahe? Hɛɛ! Yehowa ni asɔleɔ ahaa lɛ lɛ baanyɛ afee tamɔ sanegbaa ni miiya nɔ yɛ mɔ kɛ enaanyo ni esumɔɔ esane waa lɛ teŋ. Wɔbaanyɛ wɔwie saji ni haoɔ wɔ lɛ fɛɛ, ‘ni wɔfɔse wɔtsui wɔshwie’ Nyɔŋmɔ hiɛ. (Lala 62:9) Ehi jogbaŋŋ akɛ wɔɔbi ni aha wɔ mumɔ krɔŋkrɔŋ lɛ, ejaakɛ no baaye abua wɔ koni wɔfee nɔ ni ja. (Luka 11:13) Wɔbaanyɛ wɔbi gbɛtsɔɔmɔ hu ni baaha wɔkpɛ wɔyiŋ yɛ nilee mli, kɛ hewalɛ hu koni wɔnyɛ wɔkpee shihilɛi ni mli wawai anaa. (Yakobo 1:5) Kɛji akɛ wɔtɔ̃ lɛ, esa akɛ wɔdamɔ Kristo kpɔmɔ afɔleshaa lɛ nɔ wɔbi eshaifaa. (Efesobii 1:3, 7) Yɛ anɔkwale mli lɛ esaaa akɛ saji ni kɔɔ wɔhe lɛ pɛ feɔ nibii ni wɔbaawie he yɛ wɔsɔlemɔi lɛ amli. Esa akɛ wɔsɔle wɔha mɛi  krokomɛi hu—wɔweku lɛ mli bii kɛ wɔnanemɛi jálɔi hu.—Bɔfoi lɛ Asaji 12:5; Kolosebii 4:12.

12. Mɛɛ gbɛ nɔ wɔbaanyɛ wɔtsɔ wɔkɛ saji ni kɔɔ wɔŋwɛi Tsɛ lɛ he lɛ aye klɛŋklɛŋ gbɛhe yɛ wɔsɔlemɔi amli?

¹² Esa akɛ wɔkɛ saji ni kɔɔ Yehowa Nyɔŋmɔ he lɛ aye klɛŋklɛŋ gbɛhe yɛ wɔsɔlemɔi amli. Ekã shi faŋŋ akɛ wɔyɛ yiŋtoo ni wɔɔdamɔ nɔ wɔjɛ wɔtsuiŋ wɔkɛ yijiemɔ kɛ shidaa aha lɛ yɛ ejurɔ fɛɛ ni efeɔ ehaa wɔ lɛ hewɔ. (1 Kronika 29:10-13) Yesu tsɔɔ wɔ yɛ sɔlemɔ he nɔkwɛmɔnɔ ni aŋma yɛ Mateo 6:9-13 lɛ mli akɛ wɔsɔle koni atse Nyɔŋmɔ gbɛi lɛ he, ni tsɔɔ akɛ, abu gbɛi lɛ akɛ nɔ ni yɔɔ krɔŋkrɔŋ. No sɛɛ lɛ, etsĩ tã ákɛ Nyɔŋmɔ Maŋtsɛyeli lɛ aba ni afee esuɔmɔnaa nii yɛ shikpɔŋ lɛ nɔ taakɛ afeɔ yɛ ŋwɛi lɛ. Yesu wie saji ni he hiaa waa ni kɔɔ Yehowa he nɛɛ ahe dani egbala jwɛŋmɔ kɛba saji ni kɔɔ mɔ aŋkro lɛ he lɛ anɔ. Kɛji wɔ hu wɔkɛ Nyɔŋmɔ ye klɛŋklɛŋ gbɛhe yɛ wɔsɔlemɔi amli lɛ, wɔkɛ nakai feemɔ tsɔɔ akɛ wɔsusuuu wɔ pɛ wɔhilɛ-kɛhamɔ he.

13. Mɛni Ŋmalɛi lɛ tsɔɔ yɛ sɔlemɔi asɛɛkɛlɛ he?

¹³ Be enyiɛ esa akɛ wɔsɔlemɔi ahé? Biblia lɛ etsɔɔɔ bei abɔ ni esa akɛ wɔ diɛŋtsɛ wɔsɔlemɔi loo sɔlemɔi yɛ mɛi ahiɛ lɛ ahé. Ebaanyɛ efee sɔlemɔ ni yɔɔ kuku ni asɔleɔ dani ayeɔ niyenii, loo wɔ diɛŋtsɛ wɔsɔlemɔi ni sɛɛ kɛ́lɛ ni wɔtsɔɔ nɔ wɔfɔseɔ wɔtsuiŋ susumɔi wɔshwieɔ Yehowa hiɛ. (1 Samuel 1:12, 15) Shi kɛlɛ, Yesu bu aŋkroaŋkroi ni buɔ amɛhe jalɔi ni sɔleɔ kakadaŋŋ yɛ mɛi ahiɛ, ní amɛkɛgbala mɛi ajwɛŋmɔ kɛba amɛnɔ lɛ fɔ́. (Luka 20:46, 47) Sɔlemɔi ni tamɔ nɛkɛ lɛ esaaa Yehowa hiɛ. Nɔ ni he hiaa ji ni wɔsɔle kɛjɛ wɔtsui mli. No hewɔ lɛ, hiamɔ nii kɛ shihilɛi amli ni ayɔɔ lɛ baanyɛ aha sɔlemɔ ni akpɛlɛɔ nɔ lɛ sɛɛkɛlɛ afee srɔtoisrɔtoi.

14. Mɛni Biblia lɛ tsɔɔ beni ewoɔ wɔ hewalɛ koni ‘wɔya nɔ wɔsɔle’ lɛ, ni mɛɛ miishɛɛ enɛ haa anáa?

¹⁴ Shii enyiɛ esa akɛ wɔsɔle? Biblia lɛ woɔ wɔ hewalɛ koni ‘wɔya nɔ wɔsɔle,’ ‘ni wɔhiɛ sɔlemɔ mli daa,’ koni ‘wɔkafɔ̃ɔ sɔlemɔ.’ (Mateo 26:41; Romabii 12:12; 1 Tesalonikabii 5:17) Yɛ anɔkwale mli lɛ, wiemɔi nɛɛ etsɔɔɔ akɛ esa akɛ wɔsɔle wɔha  Yehowa yɛ hiŋmɛitswaa fɛɛ hiŋmɛitswaa mli yɛ gbi lɛ mli. Yɛ no najiaŋ lɛ Biblia lɛ miiwo wɔ hewalɛ koni wɔsɔle daa, ni wɔya nɔ wɔda Yehowa shi yɛ ejurɔ ni efee eha wɔ lɛ hewɔ, koni wɔbi lɛ ni eha wɔ gbɛtsɔɔmɔ, miishɛjemɔ, kɛ hewalɛ. Ani ejeee miishɛjemɔ akɛ wɔɔle akɛ Yehowa ejeee husu ewooo bei sɛɛkɛlɛ loo shii abɔ ni wɔbaanyɛ wɔkɛ lɛ awie yɛ sɔlemɔ mli lɛ he? Kɛji akɛ wɔhiɛ sɔɔ sɔlemɔ hegbɛ ni wɔyɔɔ lɛ lɛɛlɛŋ lɛ, no lɛ wɔbaatao hegbɛi babaoo koni wɔkɛsɔle wɔha wɔŋwɛi Tsɛ lɛ.

15. Mɛni hewɔ esa akɛ wɔkɛɛ “Amen” yɛ wɔ diɛŋtsɛ wɔsɔlemɔi kɛ mɛi ahiɛ sɔlemɔi anaagbee mli lɛ?

¹⁵ Mɛni hewɔ esa akɛ wɔkɛɛ “Amen” yɛ sɔlemɔ ko naagbee lɛ? Wiemɔ ni ji “amen” lɛ shishi ji “aba mli.” Ŋmalɛ mli nɔkwɛmɔnii tsɔɔ akɛ esa akɛ akɛɛ “Amen” yɛ mɔ diɛŋtsɛ sɔlemɔi kɛ mɛi pii ahiɛ sɔlemɔi anaagbee. (1 Kronika 16:36; Lala 41:14) Kɛji wɔkɛɛ “Amen” yɛ wɔ diɛŋtsɛ wɔsɔlemɔi anaagbee lɛ, wɔkɛmaa nɔ mi akɛ wɔwiemɔi lɛ ji anɔkwale. Kɛji akɛ wɔkɛɛ “Amen”—yɛ dioofeemɔ mli loo wɔwie lɛ waa—beni mɔ ko esɔle yɛ mɛi ahiɛ egbe naa sɛɛ lɛ, wɔtsɔɔ akɛ wɔkpɛlɛɔ nibii ni ewie he lɛ anɔ.—1 Korintobii 14:16.

16. Mɛɛ hekɛnɔfɔɔ wɔbaanyɛ wɔná yɛ sɔlemɔi ahe?

¹⁶ Ani Yehowa haa wɔsɔlemɔi ahetoo lɛɛlɛŋ? Hɛɛ, ehaa hetoo! Wɔyɛ nɔdaamɔ nɔ ni yɔɔ shiŋŋ ni wɔkɛaaná hekɛnɔfɔɔ akɛ ‘sɔlemɔi a-Toibolɔ’ lɛ haa anɔkwa sɔlemɔi ni adesai akpekpei abɔ sɔleɔ lɛ ahetoo. (Lala 65:3) Yehowa baanyɛ aha wɔsɔlemɔi lɛ ahetoo yɛ gbɛ̀i srɔtoi anɔ.

17. Mɛni hewɔ abaanyɛ akɛɛ akɛ Nyɔŋmɔ kɛ ebɔfoi kɛ etsuji ni yɔɔ shikpɔŋ nɔ lɛ tsuɔ nii kɛhaa wɔsɔlemɔi ahetoo lɛ?

¹⁷ Yehowa kɛ ebɔfoi lɛ kɛ etsuji ni yɔɔ shikpɔŋ nɔ lɛ tsuɔ nii kɛhaa sɔlemɔi ahetoo. (Hebribii 1:13, 14) Niiashikpamɔi babaoo yɛ ni kɔɔ aŋkroaŋkroi ni sɔle amɛha Nyɔŋmɔ koni eye ebua amɛ ni amɛnu Biblia lɛ shishi, ni no sɛɛ etsɛɛɛ nɔŋŋ ni  Yehowa tsuji lɛ ateŋ mɔ ko tee amɛŋɔɔ lɛ ahe. Niiashikpamɔi ni tamɔ nɛkɛ tsɔɔ akɛ ŋwɛibɔfoi kudɔɔ Maŋtsɛyeli shiɛmɔ nitsumɔ lɛ. (Kpojiemɔ 14:6) Kɛji akɛ Yehowa miisumɔ koni eha wɔsɔlemɔi lɛ ahetoo beni wɔyaje fimɔ shihilɛ diɛŋtsɛ mli lɛ, ebaanyɛ ekanya Kristofonyo ko koni ebaye ebua wɔ.—Abɛi 12:25; Yakobo 2:16.

18. Mɛɛ gbɛ nɔ Yehowa kɛ emumɔ krɔŋkrɔŋ lɛ kɛ e-Wiemɔ lɛ tsuɔ nii kɛhaa etsuji asɔlemɔi ahetoo?

¹⁸ Yehowa Nyɔŋmɔ kɛ emumɔ krɔŋkrɔŋ lɛ kɛ e-Wiemɔ ni ji Biblia lɛ hu tsuɔ nii kɛhaa etsuji asɔlemɔi ahetoo.  Ekolɛ ebaaha sɔlemɔi ni wɔkɛbiɔ edɛŋ yelikɛbuamɔ koni wɔnyɛ wɔkpee kaai anaa lɛ ahetoo kɛtsɔ gbɛtsɔɔmɔ kɛ hewalɛ ni ebaatsɔ emumɔ krɔŋkrɔŋ lɛ nɔ ekaha wɔ lɛ nɔ. (2 Korintobii 4:7) Bei pii lɛ hetoo ni akɛhaa wɔsɔlemɔi ni wɔkɛbiɔ gbɛtsɔɔmɔ lɛ baa kɛjɛɔ Biblia lɛ mli, he ni Yehowa kɛ yelikɛbuamɔ haa wɔ yɛ koni wɔnyɛ wɔkpɛ wɔyiŋ yɛ nilee mli lɛ. Wɔbaanyɛ wɔna ŋmalɛi ni baanyɛ aye abua wɔ lɛ yɛ wɔ diɛŋtsɛ wɔ Biblia nikasemɔ mli, kɛ be mli ni wɔkaneɔ Kristofoi awoji, tamɔ wolo nɛɛ nɛkɛ lɛ. Ekolɛ nɔ ni akɛɔ yɛ Kristofoi akpeei ashishi loo hetoo ko ni asafoŋ onukpa ko ni yɔɔ wɔhilɛ-kɛhamɔ he miishɛɛ lɛ haa lɛ baagbala wɔjwɛŋmɔ kɛba Ŋmalɛ mli otii ni ebaabi ni wɔsusu he lɛ anɔ.—Galatabii 6:1.

19. Mɛni esa akɛ wɔha ehi wɔjwɛŋmɔ mli kɛji wɔsɔlemɔi yafee tamɔ nɔ ni ahaaa hetoo lɛ?

¹⁹ Kɛ́ etamɔ nɔ ni Yehowa sɛɛ etsɛ kɛ wɔsɔlemɔi lɛ ahetoohamɔ lɛ, enɛ etsɔɔɔ akɛ ebɛ nyɛmɔ ni ekɛaaha hetoo. Yɛ no najiaŋ lɛ, esa akɛ wɔkai akɛ Yehowa haa sɔlemɔi ahetoo yɛ esuɔmɔnaa nii kɛ gbeekpamɔ naa, kɛ agbɛnɛ hu yɛ ebe ni eto lɛ mli. Ele wɔhiamɔ nii kɛ gbɛ nɔ ni eeetsɔ etsu amɛhe nii kwraa fe bɔ ni wɔle. Bei pii lɛ eŋmɛɔ wɔ gbɛ koni ‘wɔya nɔ wɔbi, wɔtao, ni wɔshi.’ (Luka 11:5-10) Hiɛmiamɔ ni tamɔ nɛkɛ lɛ haa Nyɔŋmɔ naa akɛ nɔ ni wɔshweɔ lɛ he miihia wɔ waa ni ákɛ wɔhemɔkɛyeli lɛ yɛ krɔŋŋ. Kɛfata he lɛ, ekolɛ Yehowa  baaha wɔsɔlemɔi lɛ ahetoo yɛ gbɛ ni wɔyɔseee nɔ. Ákɛ nɔkwɛmɔnɔ lɛ, ekolɛ ebaaha wɔsɔlemɔ ko ni kɔɔ kaa pɔtɛɛ ko he lɛ hetoo, jeee kɛtsɔ naagba lɛ ni eeejie lɛ nɔ, shi moŋ kɛtsɔ hewalɛ ni ekɛaaha wɔ koni wɔnyɛ wɔŋmɛ wɔtsui shi yɛ mli lɛ nɔ.—Filipibii 4:13.

20. Mɛni hewɔ esa akɛ wɔkɛ hegbɛ ni nɔ bɛ ni wɔná akɛ wɔɔsɔle lɛ atsu nii kɛmɔ shi lɛ?

²⁰ Kwɛ bɔ ni wɔbaanyɛ wɔda shi babaoo akɛ Mɔ ni Bɔ jeŋ muu fɛɛ ni da nɛɛ bɛŋkɛɔ mɛi fɛɛ ni tsɛɔ lɛ yɛ sɔlemɔ mli yɛ gbɛ kpakpa nɔ lɛ! (Lala 145:18) Eba akɛ wɔkɛ hegbɛ ni jara wa ni wɔná akɛ wɔɔsɔle lɛ baatsu nii kɛmɔ shi. Kɛji akɛ wɔfee nakai lɛ, wɔbaaná gbɛkpamɔ ni miishɛɛ yɔɔ mli akɛ wɔɔbɛŋkɛ Yehowa ni ji sɔlemɔi a-Toibolɔ lɛ kpaakpa.