1, 2. ¿Jamüsü anaka maʼin aashajawaa nümaa Maleiwa? ¿Jamüsü watüjaainjatka saaʼu tü shikirajakat tü Wiwüliakat süchiki tü aashajawaakat nümaa Maleiwa?

JOʼUUCHON maʼin tü Mmakat suulia tü kasakat süpüshuaʼa. Wayakana nümüin ‹chi Kakumalakai tü sirumatuʼukat otta tü Mmakat›, müshii aka saaʼin wanee wüin yootchon maʼin suluʼu wanee waatte (Aluwataaushikana 4:24; Isaías 40:15). Akatsaʼa, saashin tü Wiwüliakat ‹pejeshi Jeʼwaa nanain na aʼwaajakana nia süka tü shiimainkat, nikeraajeerü tü nachekakat otta naapeerü nanüiki› (Salmo 145:18, 19, TNM). Jülüja paaʼin jamaluʼuluin tia pütchikat. Pejeshi wanain chi Maleiwa pülashikai maʼin otta naapeerü wanüiki waʼwaajüle nia süka tü shiimainkat. ¡Anakatche maʼin aashajawaa nümaa Maleiwa!

² Süpüla naapüin Jeʼwaa wanüiki, achuntajana waya pansaa sümaa tü nüchekakat. Akatsaʼa, watüjaainjatü saaʼu tü shikirajakat tü Wiwüliakat süchiki tü aashajawaakat nümaa Jeʼwaa süka warütkaain nünainmüin sutuma.

3. ¿Jamüshii waashajaainjanaka nümaa Jeʼwaa?

³ Aashajaainjana waya nümaa Jeʼwaa süka nuchuntüin  shia wamüin. Müsü tü Nünüikikat: ‹Nnojo jüshapataain aaʼin sooʼopünaa wanee kasa. Juchunta nümüin Maleiwa sooʼopünaa kasa süpüshuaʼa. Jüküja nümüin tü shapaakalü atuma jaaʼin. Nnojo motuin jaaʼin aapaa analuʼut nümüin› (Filipos 4:6, 7). Nnojotsü wayouktüinjatüin tü nümakat wamüin.

4. ¿Jamüshii aleewaka maʼin waya nümaa Jeʼwaa waashajaale nümaa weinshi?

⁴ Waashajaale nümaa Jeʼwaa weinshi aleeweena maʼin waya nümaa. Wayuu aleewajiraaka, nnojoishii aashajaain neʼe choʼujaale kasa namüin, aashajaashii weinshi süka nakaaliinjiraweein. Naashajaale süchiki tü jülüjakat naaʼin otta tü shapaakalü atuma naaʼin, aleewashii maʼin. Müshia waya nümaa Jeʼwaa. Sutuma karalouktakat tüü, pütüjaa aaʼu wainma kasa süchiki tü shikirajakat tü Wiwüliakat nüchiki Jeʼwaa, tü nukuwaʼipakat otta tü naainjainjatkat. Pütüjaaitpa aaʼu shiimain eein nia. Püküjüin nümüin tü jülüjakat otta tü suluʼukat paaʼin. Sutuma tia, pürütkaa maʼin anainmüinchi nia (Santiago 4:8).

5. ¿Jamüsü watüjaaka saaʼu nnojoluin naapüin Jeʼwaa nanüiki napüshuaʼa na wayuukana?

⁵ ¿Naapüin Jeʼwaa nanüiki napüshuaʼa na wayuukana? Jülüja paaʼin tü nümakat namüin na israeliita eʼrüliikana wayumüin soʼu nükalia Isaías: «Jaʼitaina achuntüin maʼin jia tamüin, nnojoleerü taapüin jünüiki sükajee juʼutuliin saaʼin wayuu» (Isaías 1:15, TNM). Waainjale kasa eeka mojuin, nnojoleerü naapüin wanüiki Maleiwa. Süpüla naapüin shia, eesü waneeirua kasa waainjainjatka.

6. ¿Kasa waainjainjatka süpüla naapüin Maleiwa wanüiki? ¿Kasa weeʼiyataka aka shiimainre wanoujain?

⁶ Tü waainjainjatkat shia wanoujainjanain maʼin (paashajeʼera Marcos 11:24). Müshi Pablo: ‹Kamaneeshi chi Maleiwakai namüin na anoujakana nünain sünain niain Maleiwain› (Hebreokana 11:6). Shiimainre wanoujain, nnojotsü shiainjatüin neʼe watüjaain aaʼu eein Maleiwa otta naapüin wanüiki. Weeʼiyatüinjatü süka wakuwaʼipa otta tü waainjakat (Santiago 2:26).

7. (1) ¿Jamüshi kojutüinjachika Jeʼwaa watuma waashajaapa nümaa? (2) ¿Kasa weeʼiyatajatka aka nnojoluin yaletayaain waaʼin otta shiimain wanüiki?

⁷ Tü wanee waainjainjatkat shia nnojoluinjatüin yaletayaain waaʼin otta waküjüinjatü tü shiimainkat. Wainma tü kasa nnojoluinjatkat yaletayaain atuma waaʼin waashajaapa nümaa Maleiwa. Naashajaale na wayuukana nümaa wanee sülaüla mma, kojutüshi nia namüin. Kojutüinjachi maʼin Jeʼwaa wamüin waashajaapa nümaa (Salmo 138:6). Waainjainjatü tia süka niain chi Maleiwa «Pülashikai maʼin» (Génesis 17:1). Sükajee tü wanüikikat weeʼiyatüinjatü nnojoluin wanaawain waya nümaa Maleiwa. Sutuma tia, waküjüinjatü tü shiimainkat, nnojoluinjatü weitirakuu wamüin wanüiki (Mateo 6:7, 8).

8. ¿Kasa waainjainjatka wachuntüle nümüin Maleiwa wanee kasa?

⁸ Tü wanee kasa waainjainjatkat süpüla naapüin Maleiwa  wanüiki shia waainjainjatüin tü wachuntakat nümüin. Wachuntüle nümüin Jeʼwaa «weküin», aʼyataainjana waya sünain aʼyatawaa eeka wousütüin (Mateo 6:11; 2 Tesalónica 3:10). Akaʼaya wachuntüle nümüin süpüla nnojoluin waainjain wanee kasa mojusü eeka waainjapuʼuin, nnojoluinjana waya sünainpünaain wanee kasa eeka süpüla waainjain shia sutuma (Colosas 3:5). Süchikijee wekirajaain sünain tü waainjainjatkat, watüjaainjatü aaʼu süsouktia waneeirua asakiraa süchiki tü aashajawaakat nümaa Maleiwa.

9. ¿Jara waashajaainjachika amaa? ¿Jara waashajaainjachika akajee?

⁹ ¿Jara waashajaainjachika amaa? Naashin Jesuu müinjana na nikirajüinkana: «Taata Maleiwa [chi] chakai iipünaa» (Mateo 6:9). Sutuma tia, nia neʼe Jeʼwaa waashajaainjachika amaa. Keeʼireesü naaʼin kojutüin wamüin tü naainjakat Jesukürisüto. Maʼaka wekirajaain suluʼu ekirajaaya 5, nüjütüin Jesuu Mmapaʼamüin süpüla naakajirüin waya suulia waainjala jee ouktaa (Juan 3:16; Roma 5:12). Jee müshia nia Laülaashi napüleerua na sacerdotekana otta süsalainjatü saainjala wayuu nutuma (Juan 5:22; Hebreokana 6:19, 20). Saashin tü Wiwüliakat achuntajana waya nükajee Jesuu. Müshi nia: ‹Taya chi süntajachikai akajee wayuu nünainmüin Maleiwa, chi eeʼiyatakai tü shiimüinkat› (Juan 14:6). Süpüla naapüin Jeʼwaa wanüiki, nia neʼe waashajaainjachika amaa nükajee chi Nüchonkai.

10. ¿Joyotüinjana otta wasapainkainjana waya waashajaapa nümaa Maleiwa?

¹⁰ ¿Joyotüinjana otta wasapainkainjana waya waashajaapa nümaa Maleiwa? Nnojo. Nnojotsü nuchuntüin wamüin Jeʼwaa tü sukuwaʼipainjatkat wajapü jee watapaʼa waashajaapa nümaa. Wainma tü wakuwaʼipainjatkat  saashin tü Wiwüliakat. Maʼaka saaʼin joyotüin, wejepülaain, wasapainkain jee shaʼwatüin waya (1 Crónicas 17:16; Mateo 26:39; Lucas 22:41; Marcos 11:25, TNM). Tü anakat maʼin nümüin Maleiwa shia kojutüle nia wamüin otta nnojorüle yaletayaain waaʼin. Eeshii süpüla waashajaain nümaa Maleiwa suluʼu waaʼin otta eepünaale waya maʼaka sünain aʼyatawaa jee sülatüle wamüin kasa mojusü. Jaʼitairü nnojoluin sütüjaain aaʼu wayuu, naapüin Jeʼwaa wanüiki (Nehemías 2:1-6).

11. ¿Kasa wachuntajatka nümüin Maleiwa?

¹¹ ¿Kasa wachuntajatka nümüin Maleiwa? Müsü tü Wiwüliakat: ‹Wachuntüle nümüin tü nüchekakat wapüleerua, jaʼitairü wachuntüin kasa eekai eein, naapüin wanüiki› (1 Juan 5:14). Wachunta nümüin Maleiwa tü kasa nüchekakat wapüleerua. ¿Nücheküinche waküjüin nümüin tü shapaakalü atuma waaʼin? Aa. Aashajawaa nümaa Jeʼwaa müsü aka saaʼin aashajawaa nümaa wanee waʼaleewain maʼin. Eesü süpüla ‹waküjüin nümüin süpüshuaʼa tü suluʼukat waaʼin› (Salmo 62:8, TNM). Anasü wachuntüle nümüin tü nütchinkat süpüla waainjain kasa anasü (Lucas 11:13). Wachunta nümüin süpüla anain tü kasa waainjainjatkat otta süpüla katchin waaʼin suʼunnaa müliaa  (Santiago 1:5). Waainjale kasa mojusü, wachunta nümüin süpüla motuin naaʼin shia sutuma weʼitaain waaʼin sünain naapajiraain nikii Kürisüto waaʼu (Éfeso 1:3, 7). Akatsaʼa, nnojo wachuntüin neʼe wapüleerua, wachunta napüleerua wapüshi otta wawalayuu (Aluwataaushikana 12:5; Colosas 4:12).

12. ¿Kasa waainjainjatka süpüla kojutüin maʼin wamüin tü nünainpünaakat Jeʼwaa wachuntapa nümüin?

¹² Wachuntapa nümüin Jeʼwaa, kojutüinjatü maʼin wamüin tü kasa nünainpünaakat. Wainma kasa waʼwaajüinjachika anainjee nia otta waapüinjatü tü analuʼutkat  nümüin süka süpüshuaʼa waaʼin sükajee anain maʼin nia (Alateetka Mapeena 4:11). Suluʼu Mateo 6:9-13 wousütüin nünüiki Jesuu wanaa sümaa nuchuntüin nümüin Maleiwa (paashajeʼera). Tia shikirajüin waya sünain achuntaa saaʼu wuleinjatüin nünülia Maleiwa. Süchikijee, wachuntajatü saaʼu Nuluwataaya Maleiwa süpüla süntüin otta saainjünüin tü keeʼireekat naaʼin mmapaʼa maʼaka chaaʼaya sirumatuʼu. Süchikijee nuchuntüin Jesuu saaʼu tü kasa nünainpünaakat Jeʼwaa, achuntüshi nia saaʼu tü kasa choʼujaakat nümüin. Wachuntüle palajana saaʼu tü kasa nünainpünaakat Maleiwa, weeʼiyatüin nnojoluin jülüjain neʼe waaʼin wakuwaʼipa.

13. ¿Kamaʼainjana waya waashajaapa nümaa Jeʼwaa saashin tü Wiwüliakat?

¹³ ¿Kamaʼainjana waya waashajaapa nümaa Jeʼwaa? Nnojotsü süküjüin tü Wiwüliakat kamaʼainjanain jee motsomüinjanain waya waashajaapa nümaa Jeʼwaa wamüiwaʼa otta suʼupala wayuu. Eeshii süpüla waashajaain nümaa Maleiwa motsomüin süpülapünaa weküin otta kamaʼain waya waküjapa nümüin süpüshuaʼa tü suluʼukat waaʼin (1 Samuel 1:12, 15). Mojusü nünüiki Jesuu nachiki na karalouktamaajanakana süka kamaʼain maʼin naya sünain aashajawaa nümaa Maleiwa süpüla neʼnnüin sutuma wayuu (Lucas 20:46, 47). Mojusü tia nümüin Jeʼwaa. Tü anakat nümüin shia shiimainre wanüiki. Süpüla kamaʼain jee motsomüin waya sünain aashajawaa, jülüjainjatü waaʼin tü choʼujaakat jee tü alatakat wamüin.

14. ¿Jamaluʼulu tü ‹achuntaakat waneepia nümüin Maleiwa›? ¿Kasa tü anakat maʼin süpüla waainjain?

¹⁴ ¿Jeʼratuainjana waya aashajaain nümaa Maleiwa? Müsü tü Wiwüliakat: «jüchunta waneepia nümüin Maleiwa» otta ‹ayata jia sünain achuntaa nümüin Maleiwa› (Lucas 18:1; Roma 12:12; 1 Tesalónica 5:17). Tia  nnojotsü shiain walatirajatüin kaʼi sünain aashajawaa nümaa Maleiwa. Tü münakat wamüin shia wachuntajanain nümüin Maleiwa weinshi süpüla waapüin tü analuʼutkat saaʼu anain nia wamüin, süpüla nüküjüin wamüin tü waainjainjatkat, nümüliajüin waya otta süpüla katchin waaʼin nutuma. ¡Anakatche maʼin tia! Nücheküin Jeʼwaa waashajaain waneepia nümaa, jaʼitairü kamaʼain jee motsomüin wanüiki. Waainjeerü tia waneepia kojutüle wamüin tü aashajawaakat nümaa Maleiwa.

15. ¿Jamüshii «amén» wamüinjanaka sajaʼttapa wanüiki wamüiwaʼa otta suʼupala wayuu?

¹⁵ ¿Jamüshii «amén» wamüinjanaka sajaʼttapa wanüiki? Pütchikat tia, «shiimain tia» maluʼulu. Süküjüin tü Wiwüliakat anain süpüla «amén» wamüin sajaʼttapa wanüiki wamüiwaʼa otta suʼupala wayuu (1 Crónicas 16:36; Salmo 41:13). «Amén» wamapa wamüiwaʼa, weeʼiyatüin shiimain wanüiki. «Amén» wamapa suluʼu waaʼin otta emeturüle shia watuma suʼupala wayuu, weeʼiyatüin anain wamüin tü achuntünakat (1 Corinto 14:16).

16. ¿Kasa wanoujainjatka anain wachuntapa nümüin Maleiwa?

¹⁶ Asouktüshi Jeʼwaa shiʼipajee wanüiki. Wainma tü kasa wanoujakalü atuma naainjain shia ‹chi Aapakai wanüiki› (1 Juan 5:14, 15). Wainma süsouktia nutuma Jeʼwaa wanüiki.

17. ¿Jamüsü watüjaaka saaʼu nusouktüin Jeʼwaa shiʼipajee wanüiki nakajee na aapieekana otta na wayuukana?

¹⁷ Asouktüshi Jeʼwaa shiʼipajee wanüiki nakajee na aapieekana otta na wayuu aʼyataakana nümüin (Hebreokana 1:13, 14). Wainma wayuu nükaaliinjaka Maleiwa nükajee wanee aʼyataai nümüin süchikijee nachuntüin  nümüin süpüla natüjaain saaʼu tü sümakat tü Wiwüliakat. Tia shiiʼiyatüin shikiipuʼuin tü aküjaakat pütchi na aapieekana (Alateetkat Mapeena 14:6). Otta müsia, choʼujaale wamüin wanee kasa, eeshi Jeʼwaa süpüla nusouktüin shiʼipajee wanüiki nükajee wanee wawala akaaliinjaka waya (Proverbios 12:25; Santiago 2:16).

18. ¿Jamüsü nüsouktia Jeʼwaa wamüin sükajee tü nütchinkat otta tü Wiwüliakat?

¹⁸ Otta müshia Jeʼwaa asouktüshi shiʼipajee wanüiki  sükajee tü nütchinkat otta tü Wiwüliakat. Wachuntüle nümüin wanaa sümaa sülatüin kasa mojusü wamüin, nüküjeerü tü waainjainjatkat otta naapeerü tü nütchinkat süpüla katchin waaʼin (2 Corinto 4:7). Waashajaale nümaa Maleiwa süpüla anain tü waainjainjatkat, eeshi nusouktüle wamüin sükajee tü Wiwüliakat. Wekirajaale wamüiwaʼa, eesü wousütüle pütchi eeka anain wamüin suluʼu tü Wiwüliakat otta suluʼu tü karaloukta ayuʼnnakat sünainjee, maʼaka saaʼin karalouktakat tüü. Eesü süküjünüle wamüin tü pütchi jülüjainjatkat waaʼin suluʼujee tü Wiwüliakat sünain tü outkajawaakat otta nükajee wanee laülaashi suluʼu tü outkajaaleekat (Galacia 6:1).

19. ¿Kasa jülüjainjatka waaʼin nnojorüle nusouktüin saaʼin wamüin Jeʼwaa shiʼipajee wanüiki?

¹⁹ Eeshi kamaʼale Jeʼwaa süpüla nusouktüin shiʼipajee wanüiki, tia nnojotsü shiain sutuma isain nüchiki shia. Soto waaʼin nusoukteechin Jeʼwaa wamüin nüchekapa shia wapüleerua. Nütüjaa aaʼu tü choʼujaakat wamüin otta naapeerü shia wamüin. Eeshii nuuʼulaale waya ‹wachuntüin waneepia otta wachajaain shia› (Lucas 11:5-10). Müle shia watuma, weeʼiyatüin keeʼireein maʼin waaʼin nükaaliinjain waya otta shiimain wanoula.  Eeshi nüsouktüle Jeʼwaa shiʼipajee wanüiki sümaa nnojoluin weʼrüin shia. Waashajaale nümaa sutuma sülatüin wamüin kasa mojusü, eesü nnojorüle nüsünneʼerüin shia woulia, shia naapaka wamüin tü nütchinkat süpüla wachecherüin waaʼin suʼunnaa (paashajeʼera Filipos 4:13, TNM).

20. ¿Jamüshii waashajaainjanaka waneepia nümaa Maleiwa?

²⁰ Waapüin tü analuʼutkat nümüin Jeʼwaa sükajee pejein nia nanain na aʼwaajakana nia sümaa naashajaain nümaa pansaa sümaa tü nüchekakat (paashajeʼera Salmo 145:18). Waashajaa waneepia nümaa Maleiwa. Waainjale shia, talateena waya sükajee warütkaain maʼin nünainmüin Jeʼwaa, «chi Aapakai wanüiki».