1, 2. ¿Ñobätä orasion rabadre ütiäte ni kräke, aune dre drieta Bibliakwe orasion yebätä ye ñobätä nikwe mikadre gare jai?

KÄ KWINTA ye bäri kri, kä tibien ne kräke. Erametre, Jehová “kä kwinta aune kä tibien Sribekä” ye kräke, nitre kwati kä tibienbätä ye ñö chi kubote ye kwrere (Salmo 115:15; Isaías 40:15). Akwa Biblia tä niere, “nitre jökrä tä ja di kärere Jehovai ye ken niara tä, nitre jökrä tä ja di kärere erametre ie ye ken niara tä”, aune “nitre tä niara jürä ngwen jabätä tö dre dre ie [...] aune tätre ja di kärere ie ye niarakwe kukwe nuai” (Salmo 145:18, 19). Töbike kukwe nebätä. Ngöbö ni Sribekä dite krubäte ye tä ni ken aune ‘nikwe ja di käräi erametre ie’ angwane ni kukwe nuai kwe. ¡Nita orare niarai ye ütiäte krubäte ni kräke!

² Jehovakwe orasion nikwe ye kukwe nuadre ie ni tö angwane, ni rabadre orare tä nuainmana ye erere. Akwa, dre drieta Bibliakwe orasion yebätä ñaka gare nie angwane, ¿nikwe dre nuaindre? Ütiäte krubäte ye mikadre gare jai, ñobätä ñan aune ni raba nökrö Jehová ken orasion yebiti.

3. Ñobätä ütiäte krubäte nikwe oradre Jehovai ye mä raba niere.

³ Jehová tä ni nübaire orare jai, yebätä ütiäte krubäte nikwe oradre ie. Niara Kukwei tä niere: “Munkwe ñan töbika ngwarbe dikaro, [...] munkwe blita Ngöböbe jakrä amne, kukwe jökrä mik[a] gare ie munkwe amne, ja di käräre kwärä munkwe kuin nie Ngöböye arato. Munkwe nuend[i] kore angwane, Ngöbökwe kä jäme jakwe mikadi mun motobtä [...]. Käkwe mun moto amne mun töi ngibiadibti kuin Kristo Jesu köböire” (Filipenses 4:6, 7). Erametre, Gobran Kri kä kwinbiti töi kwin krubäte tä ni nübaire ye ni tö kain ngäbiti.

4. ¿Ñobätä mä raba niere nikwe oradre käre ye köböre ni raba ja kete bäri Jehovabe?

⁴ Kukwe ketebukärebätä nikwe oradre ye abokän nikwe nuaindi käre angwane, nikwe ja mäkäi bäri Jehovabe. Nitre ja kete kwin ye ñaka blite jabe kukwe tä nemen kisete ye aibe näire, ñakare aune kä jökrä ngwane, ñobätä ñan aune niaratre töita ja di mikabätä kwärikwäri. Niaratre töita ño, dreta mike töbike aune ja nemen ruin ño ie, ye tätre mike gare töi jämebiti jai kwärikwäri angwane, tätre nemen ja kete bäri. Ye erere arato, tä nemen bare nita ja mäke Jehovabe yebe. Jehová töi ño aune töita dre nuainbätä mikata gare Bibliakwe, ye namanina gare krubäte mäi tärä ne köböire. Ngöbö ye niena tuin mäi ni nire metre ye erere. Ne madakäre, mä töita ño aune ja ruin ño mäi ye mä raba mike gare mä Rün kä kwinbiti ie orasion yebiti. Aune ye köböire mä rökrai bäri niara ken (Santiago 4:8).

5. Jehová ñaka orasion jökrä kukwe nuin, ¿ye ñokänti gare nie?

⁵ ¿Jehovata orasion jökrä kukwe nuin? Isaías ni Ngöbö kukwei niekä näire nitre Israel töi käme nämene nüne ye ie dre niebare Jehovakwe mike ñärärä: “Munkwe orasion nuaindre krubäte, akwa ti ñaka tä kukwe nuin, mun kise ngite krubäte ni mada därie yebätä” (Isaías 1:15). Nikwe ja ngwain käme Ngöbö okwäkänti angwane, niarakwe ñaka orasion nikwe ye kukwe nuai. Ye medenbätä, ni rabadre kukwe ruäre ütiäte nuainne ne kwe niarakwe orasion kukwe nuadre.

6. Ngöbökwe orasion nikwe kukwe nuadre gäre, ¿ütiäte krubäte dre tädre nikwe, aune ye bämikadre ño?

⁶ Tödeka rabadre nikwe ye abokän ütiäte krubäte (ñakädre Marcos 11:24 yebätä). Apóstol Pablo käkwe niebare: “Nita tödeke ñakare Ngöböbti angwane, ni ñan raba Ngöbö moto mike nuäre jire chi, ñobtä ñan angwane ni [...] [jämi] krötö Ngöbö ken,  känenkri [...] Ngöbö tärä, ye [...] nikwe mikadre era [jai], abti nikwe krötadre Ngöbö ken, amne nita niara känene abko ütiä biandi kwe nie” (Hebreos 11:6). Akwa, tödeka metre rabadre nikwe ye abokän, Ngöbö tärä, niara tä ni kukwe nuin aune nita dre kärere ie ye erere tä bien nie ye ñan aibe mikadre gare jai. Jondron nuainta nikwe yebiti tödeka bämikata. Nita nüne ño yebiti rabadre gare metre, tödeka tärä nikwe (Santiago 2:26).

7. a) Nikwe blitadre Jehovabe ye ngwane, ¿ñobätä nikwe mikadre ütiäte jai? b) ¿Ni töi bobre aune brukwä tätebiti nita kukwe niere ye bämikadre ño nita orare ngwane?

⁷ Kukwe mada Jehová tä nuainmana nie, ye abokän nikwe orasion nuaindre töi bobrebiti aune ja brukwä tätebiti. Kukwe keta kabrebätä nikwe ja töi mikadre bobre blitakäre Ngöböbe, ¿ñan ererea? Nitre tä blite rei o gobran yebe angwane, tä mike ütiäte jai tä blite ben ye ngwane, ñobätä ñan aune ni ye kädekani kri gare ie yebätä. Ye erere, nikwe blitadre Jehovabe angwane nikwe niara mikadre bäri ütiäte jai (Salmo 138:6). Niara ye aibe, “Ngöbö Di[te] Kri” (Génesis 17:1, JK). Nita blite ño niarabe yebiti nikwe mikai gare töi bobrebiti, niara ye bäri dite ni kräke. Arato, ni töi bobre ye käkwe ni mikai orasion nuainne ja brukwä tätebiti niarai, aune nikwe ñaka käre kukwe arabe kädekaite bati bobu (Mateo 6:7, 8).

8. ¿Orasion nuainta nikwe ye ererebätä ni raba ja ngwen ño?

⁸ Ngöbökwe ni kukwe nuadre gäre nikwe kukwe ketamäkäre nuaindre, ye abokän orasion nuainta nikwe ye ererebätä nikwe ja ngwandre. Ñodre, Jehovakwe “mrö bian[dre] nünankrä n[i]ye mtare” nikwe kärädre ie angwane, sribi meden kwandre nie  yekänti käre nikwe sribidre ja dibiti (Mateo 6:11; 2 Tesalonicenses 3:10). Ye erere arato, niarakwe ni dimikadre ne kwe nikwe ñaka ja mikadre ngite ye nikwe kärädre ie angwane, kukwe ruäre raba ni töi mike ja mike ngite yekänti ni ñaka tädre jire (Colosenses 3:5). Kukwe ütiäte nibi gare nie orasion nuainkäre Ngöböi, akwa kukwe ruäre ngwantarita orasion yebätä ye nikwe mikadre gare jai arato.

9. ¿Nirei nikwe oradre, aune nuaindre nire käbiti?

⁹ ¿Nirei nikwe oradre? Nitre ja tötikaka käkwe oradre ne kwrere niebare Jesukwe: “Nun Rün kä käinbti” (Mateo 6:9). Ye medenbätä, nikwe oradre Ngöbö Jehová aibe ie. Akwa niara Monsoi mubai, Jesukristo, ye kisete sribi meden tä ye nikwe mikadre gare jai ie niara tö. Nikwe mikaba gare jai kapitulo 5, Jehovakwe Jesús juani Kä tibienbätä ja nire bien ni mikakäre kwäre ngite aune gata yebätä (Juan 3:16, TNM; Romanos 5:12). Ne madakäre, kädekani kwe Sacerdote bäri Kri aune ni Kukwe ükatekä (Juan 5:22; Hebreos 6:20). Ye medenbätä Biblia tä niere nie, nikwe oradre Jesús ye käbiti. Niara arabe käkwe niebare: “Ti abko ji ngöräbe, [...] amne ti aibe abko kukwe era [...] amne ti aibe abko ni mikaka nire kärekäre, aisete ti ne aibe köböire ni rabadre ti Rün känti” (Juan 14:6). Nikwe orasion ye nuaindre Jehovai niara Monsoi ye aibe käbiti, ne kwe niarakwe kukwe nuadre.

10. ¿Ni ja mikadre ño orasion nuainkäre ye ñobätä ñaka bäri ütiäte?

¹⁰ ¿Nikwe ja mikadre ño orasion nuainkäre ye drieta  nie? Ñakare. Nikwe ja ngrabare o ja kise ye mikadre ño orasion nuainkäre ye Jehová ñaka ribere nie. Ni raba ja mike ño orasion nuainkäre ye Biblia tä mike gare. Ñodre, ni raba nemen täkäni tibien, dokwä mikani kuintubu, ngükodokwäre o nünaninkä krö (1 Crónicas 17:16; Nehemías 8:6; Daniel 6:10; Marcos 11:25). Nikwe ja mikadre ño orasion nuainkäre ye ñan bäri ütiäte, ñakare aune ja töi mikadre metre nuainkäre. Ni raba orare käbube ja brukwäte bätä kä jökrä yekänti, ni tädre sribire bätä kukwe tare rabadre bare ye ngwane. Ni tädre orare ye ñaka gadre ni madakwe, akwa Jehová abokän tä ni kukwe nuin (Nehemías 2:1-6).

11. ¿Kukwe meden jeñe nikwe abokän ni raba kädekete orasion yete?

¹¹ ¿Dre dre ni raba kädekete orasion nikwe yete? Biblia tä niere: “Ngöbö [Jehová] tö dreye [...] abko erere nita kärere ie, ye ngwane tä ni kukwei kaen ngäbti” (1 Juan 5:14). Kukwe jökrä kwin Ngöbö kräke ye erere ni raba kädekete orasion yete. Ñodre, ¿kukwe meden tä ni mike töbike ye nikwe niedre niarai ie tö? ¡Jän, ye erere! Nita orare Jehovai ye abokän nita blite ja ketamuko tare nikwe ben ye erere. Ja ruin ño nie ye ni raba mike gare ie töi jämebiti (Salmo 62:8). Niarakwe ni dimikadre üai deme kwe yebiti kukwe kwin nuainkäre ribedre ie arato (Lucas 11:13). Ne madakäre, niarakwe ni jie ngwandre ja töi mike kukwe kwin nuainne aune ja di biandre kwe nie kä ngwankäre nüke jai kukwe tare yebätä nikwe ribedre ie (Santiago 1:5). Nikwe ja mikadre ngite ye ngwane, niarakwe ngite ye juandre ta nibiti nikwe  kärädre ie, aune Kristo käkwe ja nire biani ni ütiäre ye ie nikwe tödekadre (Efesios 1:3, 7, TNM). Akwa nikwe ñaka oradre ja aibe kräke, ñakare aune ni mada kräke arato, ñodre, ni mräkä o ja mräkätre kukwebätä nibe kräke nikwe oradre (Hechos 12:5; Colosenses 4:12).

12. ¿Kukwe ni Rün kä kwinbiti kwe ye bäri ütiäte ni kräke ni raba bämike ño orasion yete?

¹² Orasion nuaindre nikwe yete ni rabadre kukwe Ngöbö Jehovakwe ye kädekete bäri. Kukwe keta kabrebätä nikwe niara käikitadrekä aune debe biandre ie brukwä tätebiti, töi kwin krubäte ni kräke yebätä (1 Crónicas 29:10-13). Ngöbö kä ye mikadre deme nikwe kärädre niebare Jesukwe Mateo 6:9-13 yekänti (ñäkädrebätä). Ye bitikäre, nikwe Gobran Ngöbökwe kärädre aune Ngöbö tö dre nuaindi ye rabadre bare Kä tibienbätä tä nemen bare kä kwinbiti ye erere, nikwe ribedre arato. Jesukwe kukwe Jehovakwe ütiäte ye kädekaninte käne, ye bitikäre kukwe jakwe kädekaninte kwe. Orasion nikwe yete nikwe Ngöbö kädekaite bäri angwane, nikwe bämikai ni töita ñaka kukwe nikwe ye aibebätä.

13. ¿Orasion nuainta ye käkwe nuadre nuäi drieta Bibliakwe?

¹³ ¿Orasion nuaindre nikwe ye käkwe nuadre nuäi? Orasion nuaindre kaibe o ni jökrä okwä känti, ye käkwe nuadre nuäi ye Biblia ñaka niere. Nuainta mrö kweta jämi känenkri ye erere, nuain raba jötrö o nita kukwe nikwe mike gare kaibe Jehovai ye ngwane nuain raba raire (1 Samuel 1:12, 15). Akwa, nitre bikaka deme nämene orare raire tuadre nitre madai, ye  ie Jesukwe ñäkäbare (Lucas 20:46, 47). Ye ñan nemen ütiäte Jehová kräke. Oradre brukwä tätebiti ye bäri ütiäte. Ye medenbätä, dre ribeta jai aune kukwe meden tä nemen bare ye ererebätä ni raba orare jötrö ngwarbe o raire.

14. “Munkwe blita [...] janknu Ngöböbe” nieta ye abokän dre gärätä aune dre kwin tä nemen nikwe ye mä raba niere.

¹⁴ ¿Bäbe nikwe oradre? Biblia tä niere nie: “Munkwe blita jakrä Ngöböbe”, “munkwe blita [...] janknu Ngöböbe” aune “käre munkwe blita Ngöböbe” (Mateo 26:41; Romanos 12:12; 1 Tesalonicenses 5:17). Ne ñan aibätä nikwe oradre rare aune dibire. Ñakare aune, ni tädre mantre jetebe orasion nuainne Jehovai debe biankäre ie töi kwin ni kräke yebätä aune ni jie ngwandre kwe bätä ni töi mikadre jäme kwe aune ja di biandre kwe nie nikwe ribedre ie. ¡Kukwe kwin krubäte! Jehová tä ni tuenmetre orare jai kä jökrä ngwane aune käre. Nita blite ni Rün kä kwinbiti ben ye ütiäte ni kräke angwane, ni törbadi nuaindi kä jökrä ngwane.

15. ¿Ñobätä ni rabadre orasion nikwe aune ni jökrä kräke ye mike krüte kukwe “amén” yebiti?

¹⁵ ¿Ñobätä nikwe kukwe “amén” ye niedre mrä? Kukwe “amén” abokän “ye erere rabadre bare”o “ye metre” meden gärätä. Biblia tä mike gare, ütiäte krubäte orasion nikwe aune nuainta ni jökrä kräke ye mikadre krüte kukwe “amén” yebiti (1 Crónicas 16:36; Salmo 41:13). Nita “amén” ye niere kaibe ja kräke ye ngwane, nita mike gare kukwe nieta nikwe ye metre. Ni mada tä niere ye ngwane, nita niere arato (ja töite o juruadre ni jökrä ie), yebiti nita mike gare  kukwe nieta ni madakwe ye nemen debe ni kräke (1 Corintios 14:16, TNM).

16. Nita orare Ngöböi ye ngwane, ¿drei nikwe tö ngwandre?

¹⁶ ¿Erametre Jehová tä orasion nikwe ye kain ngäbiti? ¡Jän, ye erere! Ni kwati krubäte tä orasion nuainne brukwä tätebiti ye abokän Ngöbö “orasion  Kukwe Nuaka” tä kain ngäbiti ie nikwe tö ngwandre (Salmo 65:2). Aune tä kain ngäbiti ye raba bämike kukwe keta kabrebiti.

17. ¿Jehovata orasion nikwe kain ngäbiti ño angeletre aune nitre kä tibienbätä yebiti?

¹⁷ Ñodre, angeletre aune nitre kä tibienbätä niara mikaka täte yebiti Jehová tä orasion nikwe ye kain ngäbiti (Hebreos 1:13, 14). Nitre kwati tä orare, yete tä ja di kärere Biblia mikakäre nüke gare jai ye bitikäre nitre Jehová mikaka täte tä nemen niaratre tuinbiti. Kukwe ne tä mike gare, Gobran Ngöbökwe kukwei drieta ye angeletre tä jie ngwen (Apocalipsis 14:6). Ne madakäre, nita nemen jondron ribere jai ye ngwane, Jehová raba ni kristiano iti töi mike ni dimikakäre (Proverbios 12:25; Santiago 2:16).

18. ¿Nita dre ribere jai orasionte ye Jehová tä mike gare ño nie üai deme aune Biblia yebiti?

¹⁸ Nita dre ribere jai ye Ngöbö Jehová tä bien nie, üai deme aune Biblia yebiti arato. Nikwe ja di kärädre ie ja tuakäre kukwe ruäre ben ye ngwane, niara raba ni jie ngwen aune ni mike dite üai deme kwe  yebiti (2 Corintios 4:7). Aune nita orare ie töbikakäre kwin metre jondron nuainkäre ye ngwane, niara tä ni dimike Biblia yebiti. Ñodre, ni tädre ja tötike kaibe Bibliabätä o tärä ne erere nitre testiko Jehovakwe yebätä ni tädre ñäke angwane, bersikulo kwin krubäte raba kwen nie. Ne madakäre, texto Bibliabätä mikadre täte nikwe ye raba nüke törö nie. Ñodre, nita nemen gätäbätä o ni umbre iti konkrekasionte tö ni dimikai käkwe mäträdre nibätä ye ngwane, kukwe ne raba nemen bare (Gálatas 6:1).

19. Ngöbö ñaka rabadre orasion nikwe kukwe nuin rabadre ruin nie ye ngwane, ¿dre ngwandre törö jai?

¹⁹ Ruäre ngwane, Jehová ñaka orasion nikwe kain ngäbiti jötrö ngwarbe rabadre ruin nie, akwa yebätä niara ñaka raba orasion nikwe kukwe nuin ni ñaka raba nütüre. Nita dre ribere jai ye Jehovakwe biain nie niara törbadi nuaindi ye erere ngwane, ye nikwe ngwandre törö jai. Nita dre ribere jai ye gare kwin ie aune niarakwe biandre ño nie ye gare bäri kwin ie ni ngwä. Ruäre ngwane tä ni tuenmetre jankunu jondron ‘kärere’, ‘känene’ aune ‘jukwe mete’ (Lucas 11:5-10). Nikwe nuaindi ye erere angwane, ni tö jondron ie krubäte aune nita tödeke erametre ye nikwe bämikai niarai. Ne madakäre, Jehová raba orasion nikwe ye kain ngäbiti akwa nuaindre ño kwe ye ñaka raba nemen gare nie. Ñodre, kukwe tare ben nikwe ja tuadre ye ngwane  nikwe oradre Ngöböi, akwa kukwe tare ye ñaka diandrekä kwe nibätä, ñakare aune raba ja di bien nie kä ngwankäre nüke jai (ñäkädre Filipenses 4:13 yebätä).

20. Nikwe oradre, ¿ye ñobätä ütiäte krubäte?

²⁰ Nita debe bien krubäte Ngöbö kä kwinta kri krubäte Sribekä ye ie, ñobätä ñan aune ni jökrä tä orasion yebiti ja di kärere ie niara tä nuainmana erere, nitre ye ken niara tä (ñäkädre Salmo 145:18 yebätä). * Ütiäte krubäte nikwe orasion ye nuaindre. Nikwe nuaindi ye erere angwane, kä rabai nemen juto nibätä, ñobätä ñan aune ni rökrai bäri Jehová orasion Kukwe Nuaka ye ken.