1, 2. Dahaka dainai Dirava ita guriguri henia be hahenamo badana, bona dahaka dainai Baibel ese guriguri ia herevalaia dalana ita diba be namo?

TANOBADA be iunives ida ita hahegeregerea neganai, ia be maragi herea. Iehova ese “guba bona tanobada ia karaia,” bona ia dekenai tanobada besedia be ranu ena hetuturu tamona bamona. (Salamo 115:15; Isaia 40:15) To Baibel ia gwau: “Lohiabada be ia dekenai idia boiboi taudia dekenai ia noho. Idia boiboi henia mai edia momokani danu taudia dekenai, Lohiabada be idia kahirakahira ia noho. Ia dekenai idia gari taudia dekenai, idia ura henia gaudia ia henia noho. Edia taitai ia kamonai.” (Salamo 145:​18, 19) Unai hereva ena anina mani oi laloa! Siahu Ibounai Diravana be ita kahirakahira ia noho bona iseda guriguri do ia kamonai, bema ita ‘boiboi henia mai eda momokani danu.’ Dirava ita guriguri henia be hahenamo badana!

² To, bema ita ura Iehova ese iseda guriguri ia kamonai henia, namona be ia abia dae dalanai ia ita guriguri henia. Unai ita karaia totona, namona be Baibel ese guriguri ia herevalaia dalana ita lalopararalaia, ani? Unai do ita diba be gau badana, badina unai amo Iehova kahirakahira ita lao diba.

3. Iehova ita guriguri henia ena badina badana ta be dahaka?

³ Iehova ita guriguri henia ena badina badana ta be, Ia  ese ita ia boiria unai bamona ita karaia totona. Baibel ese ita ia hagoadaia: “Gau ta totona do umui laloa hekwarahi lasi. To umui dekenai hegeregere lasi gaudia do umui abia totona, Dirava do umui noia. Bona umui noia negadia ibounai, mai tanikiu danu do umui guriguri henia. Dirava ena maino ese taunimanima edia diba ia hanaia momokani. Keriso Iesu umui danu ia hakapua tamona dainai, inai maino ese emui laloa gaudia, bona emui kudouna idia mamia gaudia ibounai do ia gimaia namonamo.” (Filipi 4:​6, 7) Oibe, ita ura lasi tanobada bona guba ena Atai Herea Lohiana ese ia ita hereva henia totona ia karaia dalana ita dadaraia!

4. Iehova guriguri henia hanaihanai karana ese edena bamona iseda hetura karana Iehova ida ia hagoadaia?

⁴ Ita guriguri ena badina ma ta be, nega ibounai Iehova guriguri henia karana ese iseda hetura karana ia ida ia hagoadaia. Tura korikori be gau ta idia ura negana sibona ai idia herevahereva lasi. To ta ta idia laloa bada, bona ta ta dekenai edia lalohadai, edia lalohekwarahi bona edia hemami idia gwauraia neganai, edia hetura karana idia hagoadaia. Iseda hetura karana Iehova Dirava ida be unai bamona. Inai buka ena heduru amo, Baibel ese Iehova, ena kara bona ena ura dekenai ia hadibaia gaudia oi dibaia. Oi  diba ia be lauma tauna korikorina. Guriguri ese dala ia kehoa emu guba tamana dekenai emu lalohadai bona hemami korikorina oi gwauraia totona. Unai bamona oi karaia neganai, Iehova kahirakahira do oi lao.​—Iamesi 4:8.

5. Dahaka ese ia hahedinaraia Iehova be guriguri ibounai ia kamonai henia lasi?

⁵ Iehova ese guriguri ibounai ia kamonai, a? Peroveta tauna Isaia ena nega ai, Iehova ese gwau-edeede Israela taudia dekenai ia gwauraia herevana mani ita laloa: “Guriguri momo do umui gwauraia, to lau be do lau kamonai lasi, badina emui imadia be rara dekenai idia honu vadaeni.” (Isaia 1:15) Oibe, iseda kara haida dainai Dirava ese iseda guriguri do ia kamonai henia lasi. Unai dainai, Dirava ese iseda guriguri ia kamonai henia totona, namona be gau haida ita karaia.

6. Dirava ese iseda guriguri ia kamonai henia totona, dahaka be gau badana, bona edena bamona ita hahedinaraia diba?

⁶ Gau badana be ita be mai iseda abidadama. (Mareko 11:24) Aposetolo Paulo ia gwau: “Tau ta bema Dirava ia abidadama henia lasi neganai, ia hegeregere lasi Dirava ena ura do ia badinaia. Badina be bema tau ta be Dirava kahirakahira ia ura lao neganai, ia ese Dirava do ia abidadama henia guna, Dirava be ia mauri noho. Bona unai tau ena abidadama be inai bamona: Dirava idia tahua taudia ibounai, be davana namona Dirava ese do ia henidia.” (Heberu 11:6) Ita diba Dirava ia noho bona ia ese iseda guriguri ia kamonai henia bona haerelaia, to unai sibona be abidadama momokani karana lasi. Namona be iseda kara ese iseda abidadama ia hamomokania. Bona iseda noho dalana amo ita hamomokania ita be mai eda abidadama.​—Iamesi 2:26.

7. (a) Dahaka dainai mai hemataurai ida Iehova ita guriguri henia be namo? (b) Edena dala ai mai manau bona kudou-maoro ida Iehova ita guriguri henia diba?

⁷ Danu, Iehova ia ura ia idia guriguri henia taudia be mai  manau bona kudou-maoro ida idia guriguri. Dahaka dainai mai manau ida Iehova ita guriguri henia be namo? Bema taunimanima be mai edia dala praiminista idia hereva henia totona, idia ese ena dagi idia laloa dainai mai hemataurai ida ia do idia hereva henia. Unai dainai, mai hemataurai ida Iehova ita guriguri henia be namo! (Salamo 138:6) Badina Ia be “Siahu Ibounai Dirava.” (Genese 17:1) Unai dainai ia ita guriguri henia neganai, namona be ita manau. Unai manau karana ese ita do ia hagoadaia mai kudou-maoro ida Iehova ita guriguri henia, bona guriguri tamona do ita gwauraia loulou lasi.​—Mataio 6:​7, 8.

8. Edena dala ai iseda guriguri hegeregerena ita kara diba?

⁸ Dirava ese iseda guriguri ia kamonai henia totona, namona be ita gaukara goada iseda guriguri hegeregerena ita kara totona. Hegeregere, bema inai bamona ita guriguri, “Hari dina aiemai aniani mani oi henia ai dekenai,” namona be ita hekwarahi gaukara ta ita karaia totona, unai amo ita sibona ita durua diba. (Mataio 6:11; 2 Tesalonika 3:10) Bema Dirava ita noia, ita do ia durua tauanina ena manoka kara ta ita haheaukalaia totona, namona be ita idia dibagania karadia ita dadaraia. (Kolose 3:5) Unai gaudia sibona lasi, to guriguri dainai idia vara henanadai haida edia haere ita diba be namo.

9. Daika do ita guriguri henia, bona daika dekena amo?

⁹ Daika dekenai ita guriguri be namo? Iesu ese ena murinai idia raka taudia ia hadibaia, “Aiemai Tamana e, guba dekenai oi noho” do idia guriguri henia. (Mataio 6:9) Unai dainai Iehova Dirava sibona ita guriguri henia be namo. To, Iehova ia ura ia sibona ia havaraia Natuna tamona, Iesu Keriso, ena dagi ita diba. Karoa 5 dekenai ita dibaia bamona, Dirava ese Iesu be tanobada dekenai ia siaia, mauri davana ia henia bona unai dala ai kara dika bona mase amo ita ia ruhaia. (Ioane 3:16; Roma 5:12) Iesu be Hahelaga Tauna Badana  bona Diadi. (Ioane 5:22; Heberu 6:20) Baibel ia gwau iseda guriguri be Iesu ena ladanai ita gwauraia. Iesu ia gwau: “Dala be lau, hereva momokani be lau, mauri danu lau. Tamana dekenai do idia lao taudia ibounai edia dala ta be lasi, lau sibona.” (Ioane 14:6) Iehova ese iseda guriguri ia kamonai henia totona, namona be Iehova sibona ita guriguri henia ena Natuna ena ladanai.

10. Ita guriguri neganai, ita gini, helai eiava ita tui diho be gau badana, a?

¹⁰ Ita guriguri neganai ita gini eiava ita tui diho be gau badana, a? Lasi. Iehova ia gwau lasi ita gini eiava helai, eiava kara ma haida be eda imana amo do ita karaia. Baibel ia gwau ita guriguri neganai, ita helai, tui diho eiava ita gini diba. (1 Sivarai 17:16; Nehemia 8:6; Daniela 6:10; Mareko 11:​25, BHğ) Ita gini eiava helai be mai anina bada lasi, to mai anina bada gauna be, mai momokani ida ita guriguri. Dina ta ta ena gaukara ita karaia, eiava dika badana ta ia vara neganai, herevana edeseniai ita noho iseda lalona dekenai guriguri ita gwauraia diba. Ena be taunimanima ese idia itaia lasi, to Iehova ese unai bamona guriguri ia kamonai.​—Nehemia 2:​1-6.

11. Dahaka gaudia haida dainai ita guriguri diba?

¹¹ Dahaka do ita gurigurilaia? Baibel ia gwau: “Gau ta iena ura hegeregerena ita noia neganai, ia [Iehova] ese ita dekenai do ia kamonai.” (1 Ioane 5:14) Unai dainai Dirava ena ura hegeregerena ia ita guriguri henia diba. Ia ura ita lalohekwarahilaia gaudia dainai ia ita guriguri henia, a? Oibe! Iehova ita guriguri henia karana be iseda tura namona ta ita hereva henia karana hegeregerena. Dirava dekenai iseda “kudouna edia ura gaudia” ibounai ita gwauraia diba. (Salamo 62:8) Lauma helaga totona Ia ita noia be maoro, badina lauma helaga ese ita do ia durua kara maorodia ita karaia totona. (Luka 11:13) Dirava ena hakaua dalana ita noia diba abia hidi maorona ita karaia bona goada do ia henia hekwakwanai ita hanaia totona. (Iamesi 1:5) Ita kara dika neganai, namona be  Dirava ita noia Keriso ena boubou gauna amo iseda dika ia gwauatao totona. (Efeso 1:​3, 7) Oibe, namo lasi ita ura gaudia sibona totona ita guriguri. Ita guriguri neganai ma haida ita laloa be namo​—iseda ruma bese bona tomadiho tamona taudia.​—Kara 12:5; Kolose 4:12.

12. Ita guriguri neganai, edena bamona iseda guba Tamana ena ura gaudia do ita atoa guna?

¹² Iseda guriguri dekenai, Iehova Dirava ena ura gaudia ita atoa guna be gau badana. Iena kara namodia dainai mai kudouna ibounai ida Ia do ita tanikiu henia. (1 Sivarai 29:​10-13) Mataio 6:​9-13 ai, Iesu ese ita dekenai guriguri gwauraia dalana ia hadibaia, ia gwau ita guriguri neganai Dirava ena ladana do ita hahelagaia. Unai murinai, ia gwau Dirava ena Basileia do ia mai bona ena ura tanobada dekenai do ia karaia guba dekenai ia karaia bamona. Iesu ese unai mai anina bada gaudia ia gwauraia murinai, ita laloa bada gaudia ia gwauraia danu. Bema iseda guriguri dekenai Dirava ena ura gaudia ita atoa guna, ita hahedinaraia ita ese siboda eda namo ita laloa lasi.

13. Dirava ese ia kamonai henia guriguridia edia lata be Baibel ese ia gwauraia, a?

¹³ Iseda guriguri ena lata be edena bamona? Baibel be sibona ita gwauraia guriguridia eiava taunimanima vairanai ita gwauraia guriguridia edia lata ia gwauraia lasi. Reana ita do aniani lasi neganai guriguri kwadogina ita gwauraia, to guriguri latana ita gwauraia bema ita ura iseda lalohekwarahi gaudia be Iehova dekenai ita gwauraia. (1 Samuela 1:​12, 15) To, taunimanima vairanai sibodia edia kara maoromaoro idia heagilaia taudia, edia guriguri latadia be Iesu ese ia gwauraia dika. (Luka 20:​46, 47) Iehova be unai bamona guriguri ia moalelaia lasi. Ita guriguri neganai, gau badana be mai iseda kudouna ibounai ida ita guriguri. Iseda dabu gaudia bona noho dalana hegeregerena ita gwauraia guriguridia be Dirava ese do ia kamonai henia, herevana idia be lata eiava kwadogi.

14. Baibel ia gwau Dirava do ita “guriguri henia noho” neganai, ena anina be dahaka, bona dahaka dainai ita moale be namo?

 ¹⁴ Nega hida ita guriguri be namo? Baibel ia gwau namona be “guriguri do [ita] goadalaia,” “nega ibounai do [ita] guriguri” bona Dirava do ita “guriguri henia noho.” (Roma 12:12; 1 Tesalonika 5:17; 1 Timoteo 5:5) Unai siri dainai ita laloa lasi dina ta ena miniti ta ta lalonai Iehova do ita guriguri henia. To, Baibel be ita ia hagoadaia nega ibounai ita guriguri totona, Iehova ese ita dainai ia karaia kara namodia dainai ia ita tanikiu henia, bona ia ita noia ita do ia hakaua bona hagoadaia. Ita moale badina Iehova ese guriguri ena lata bona nega hida ia ida ita herevahereva ena hetoana ia atoa lasi, ani? Bema guriguri ena namo ita laloa bada, nega idauidau ai iseda guba Tamana do ita guriguri henia diba.

15. Sibona ita gwauraia guriguri bona ma haida ese idia gwauraia guriguri edia dokonai, dahaka dainai “Amen” ita gwauraia?

¹⁵ Guriguri ta ena dokonai, dahaka dainai “Amen” ita gwauraia? Inai hereva “amen” ena anina be “momokani,” eiava “unai bamona do ia vara.” Baibel ese ia hahedinaraia sibona dekenai ita gwauraia guriguri bona haida ese idia gwauraia guriguri edia dokonai “Amen” ita gwauraia be maoro. (1 Sivarai 16:36; Salamo 41:13) Sibona iseda guriguri ena dokonai “Amen” ita gwauraia neganai, ita hahedinaraia ita gwauraia herevadia be mai momokani ida ita gwauraia. Ma ta ese ia gwauraia gurigurina ena dokonai, iseda lalona dekenai “Amen” ita gwauraia, eiava ita gwauraia badabada neganai, ita hahedinaraia ia gwauraia herevadia ida ita lalotamona.​—1 Korinto 14:16.

16. Guriguri dekenai, dahaka ita diba momokani?

¹⁶ Iehova ese iseda guriguri ia haerelaia, a? Oibe! Ita diba momokani Iehova ese kudou-maoro taudia milioni momo edia guriguri ia kamonai henia. (Salamo 65:2) Dala idauidau ai Iehova ese iseda guriguri ia haerelaia.

17. Dahaka dainai ita gwau diba, Iehova ese aneru bona ena tanobada hesiai taudia ia gaukaralaia iseda guriguri ia haerelaia totona?

 ¹⁷ Iehova ese ena aneru bona tanobada hesiai taudia ia gaukaralaia iseda guriguri ia haerelaia totona. (Heberu 1:​13, 14) Ekspiriens momo ese idia hahedinaraia, haida be Baibel idia lalopararalaia totona Iehova ena heduru idia noia neganai, daudau lasi idia be Iehova ena hesiai tauna ta ese ia vadivadi henia. Unai bamona ekspiriens ese idia hahedinaraia aneru ese Basileia harorolaia gaukarana idia hakaua. (Apokalupo 14:6) Heduru totona ita guriguri neganai, Iehova ese  Keristani tauna ta ia siaia diba ita ia durua totona.​—Aonega Herevadia 12:25; Iamesi 2:16.

18. Edena dala ai Iehova ese lauma helaga bona Baibel ia gaukaralaia iena hesiai taudia edia guriguri ia haerelaia totona?

¹⁸ Bona Iehova Dirava ese ena lauma helaga bona Baibel ia gaukaralaia ena hesiai taudia edia guriguri ia haerelaia totona. Hahetoho idauidau ita haheaukalaia totona heduru ita noia neganai, ena lauma helaga ia gaukaralaia diba ita ia hakaua bona hagoadaia totona. (2 Korinto 4:7) Bema Iehova ita noia ita ia hakaua totona, nega momo Baibel amo hakaua hereva namodia ia henia, abia hidi maorodia ita karaia totona. Baibel bona Baibel bukadia, hegeregere inai buka ita stadilaia neganai, ita idia durua siridia ita davaria diba. Keristani hebou dekenai idia gwauraia herevadia eiava kongrigeisen lalonai elda tauna ta ese ia henia hereva ta lalonai, reana ita ia durua Baibel siri haida do ita davaria.​—Galatia 6:1.

19. Iehova ese iseda guriguri ia haerelaia haraga lasi neganai, dahaka ita laloatao be namo?

¹⁹ Bema Iehova ese iseda guriguri ia haerelaia haraga lasi, anina be ia hegeregere lasi iseda guriguri ia haerelaia totona, a? Lasi. Namona be ita laloatao, Iehova be ena ura hegeregerena ita gwauraia guriguridia ia haerelaia bona ena nega korikori ai unai ia karaia. Iseda dabu gaudia bona ita durua dalana ia diba. Nega momo dala ia kehoa ita ‘noinoi, tahua bona pidipidi’ noho totona. (Luka 11:​5-10) Bema  mai haheauka ida unai bamona ita karaia noho, Dirava do ia diba ita gurigurilaia gaudia ita laloa bada bona Ia ita abidadama henia. Bona, reana dala ma ta ai Iehova ese iseda guriguri ia haerelaia diba. Hegeregere, hahetoho ta ita haheaukalaia totona ena heduru ita noia neganai, unai hahetoho ia kokia lasi, to ita dekenai goada ia henia unai hahetoho ita haheaukalaia totona.​—Filipi 4:13.

20. Dahaka dainai nega ibounai Iehova ita guriguri henia be namo?

²⁰ Guba bona tanobada ia Havaraia Tauna be guriguri amo ia dekenai idia boiboi taudia kahirakahira ia noho dainai, ia ita tanikiu henia be namo! (Salamo 145:18) Iehova ita guriguri henia be hahenamo badana, unai dainai nega ibounai ia ita guriguri henia be namo. Bema unai bamona ita karaia, Iehova, guriguri Kamonai Henia Tauna, kahirakahira do ita lao.