1, 2. Mukonda diahi tua tokala ku mona o musambu kála ujitu ua dikota, ni mukonda diahi tua tokala kuijiia, se ihi i longa o Bibidia ia lungu ni maka iá?

MU KU SOKESA ni ngongo, o ixi ia tolo. Mu kidi, Jihova, ‘ua Bhange o diulu ni ixi,’ o ifuxi ioso iala kála dibêbe dia menha mu disanga. (Jisálamu 115:15; Izaia 40:15) Kienhiki-phe, o Bibidia izuela: “Jihova ua zukama kua ió a dikola kua muene, oso a dikola kua muene mu kidi. Muene u bhanga o vondadi ia ió oso a mu kala ni uoma; uívua nzongo iâ, ia kudikola, hé u a bhulula.” (Jisálamu 145:18, 19) Xinganeka ngó se íii ijimbulula ihi! O Mubhangi muteni-a-ioso ua tu zukama, iu ua-nda tu ívua se tu “dikola kua muene mu kidi.” Ujitu ua dikota u tuala nau, ua ku zukama kua Nzambi mu musambu!

² Se tua mesena kuila Jihova uivua o misambu ietu, tua tokala ku mu sambela mu ukexilu ua mu uabhela. Tu tena ku bhanga kiki, mu kuijiia ioso i longa o Bibidia ia lungu ni musambu, ki kiene? Kia beta-kota kuijiia se ihi izuela o Mikanda Ikôla ia lungu ni maka iá, o musambu u tu kuatekesa ku zukama kua Jihova.

3. Mukonda diahi tua tokala kusamba kua Jihova?

³ Tuene mu samba kua Jihova, mukonda muéne ua mesena kuila tu bhanga kiki. O Kizuelu kiê ki tu suínisa: “Ki mu kale ni hele ia kima, ki mu ile bhidibhidi, maji ima ioso-phe iiza-ku, mu ila ni kusamba ni kudionda, kumoxi ni kusakidila, mu ende ni kubhinga kua Nzambi ioso i mua mesena. Bheniobho o kutululuka kua Nzambi kua somboka o kitongoluelu kioso kia muthu, kuanda ku mi bateka mixima ni ilunji, mu ukamba ni Kristu Jezú.” (Filipe 4:6, 7) Mu kidi, etu ki tua-ndala ku bhanga poko ia ujitu iú, ua tu bhana nau o Nguvulu ia Dikota ia ngongo!

4. Kiebhi o kusamba izuua ioso kua Jihova ku kolokotesa o ukamba uetu ni muéne?

⁴ Lua mukuá, tuene mu samba mukonda, o kusamba izuua ioso kua Jihova, u kolokotesa o ukamba uetu ni muéne. O makamba a kidi ka di zuelesa ngó kioso kia mesena kima. Maji, ene a mesena o mbote mudiâ, o ukamba uâ u uabha dingi kioso ene a di zuelesa mu ibanzelu iâ, ni ibhindamu iâ. Kiki kia difu ué ni ukamba uetu ni Jihova  Nzambi. Ni kikuatekesu kia divulu didi, eie ua di longo kiavulu se ihi i longa o Bibidia ia lungu ni Jihova, ni ídifua iê, ni vondadi iê. Eie ua muijiia kála muthu ua kidi. O musambu u ku kuatekesa kuzuela ioso iala ku muxima uê, kua Tat’ê ia diulu. Kioso ki u bhanga kiki, ua-nda zukama dingi kua Jihova.—Tiiaku 4:8.

5. Ihi idikisa kuila Jihova kene mu kuívua o misambu ioso?

⁵ O kuila Jihova uivua o misambu ioso? Xinganeka ia zuela muéne ku akua Izalaiele, a bhukumukine mu izuua ia polofeta Izaia: “Kioso ki mu vudisa o misambu ienu eme ki ngi ivu, mukonda o maku’enu ezala manhinga.” (Izaia 1:15) Kienhiki, saí ibhangelu i tena ku fudisa Nzambi kuívua o misambu ietu. Kiki-phe, phala Nzambi kuívua o misambu ietu, saí ijila i tua tokala ku belesela.

6. Kijila kiahi kia dianga, ki tua tokala ku belesela phala Nzambi kuívua o misambu ietu, ni kiebhi ki tu tena ku bhanga kiki?

⁶ O kijila kia dianga, tua tokala tu kala ni kixikinu. (Tanga Marku 11:24.) O poxolo Phaulu ua soneka: “Muthu-phe ua kambe o kuxikana ka tena kuuabhela Nzambi. Kuma uoso uiza kua Nzambi ki kala u xikana kuila sai-ku Nzambi, kuma muène mukua kubhandulula oso a mu sota ni muanu.” (Jihebeleu 11:6) Ku kala ni kixikinu kia kidi kia beta dingi, o kuijiia ngó kuila kuala Nzambi, ni kuijiia kuila muéne uivua, ni u tambuijila ué o misambu, ndenge. O kixikinu a kidikisa mu ima i tu bhanga. Tu tena kuidikisa kuila tuala ni kixikinu, mu ima i tu bhanga izuua ioso.—Tiiaku 2:26.

7. (a) Mukonda diahi tua tokala ku kala ni ujitu kioso ki tu zuela ni Jihova mu musambu? (b) Kioso ki tu samba kua Nzambi, kiebhi ki tu tena kuidikisa ku lenduka ni kidi kioso?

⁷ Jihova ua mesena ué kuila oso u mu sambela, ua tokala u ki bhanga ni ku lenduka ni kidi kioso. Mu kidi, ki  tua tokala muene ku lenduka kioso ki tu zuela ni Jihova? Kioso athu kiene mu kala ni kithangana kia kuzuela ni sobha mba mukulundi (Presidente), ene a zuela ni ujitu, mu kuijiia o kididi kiê, kia dikota. Kioso ki tu zukama kua Jihova, tua tokala ku ki bhanga ni ujitu uoso! (Jisálamu 138:6) Mukonda muéne “Nzambi, Muteni-a-Ioso.” (Dimatekenu 17:1) Kioso ki tu samba kua Nzambi, tua tokala ku bhanga ni ku lenduka kuoso, mu kuijiia kuma etu ku pholo iê tu utuma. O ku lenduka kuku, kua-nda tu bhangesa kusamba ni kidi kioso, ni muxima ni kueha o ku tumbula o ima imoxi ngó izuua ioso mu misambu.—Matesu 6:7, 8.

8. Kiebhi ki tu tena ku bhanga ioso i tu bhinga mu musambu?

⁸ O kijila kia mukuá, ki bhangesa Nzambi ku tu ívua, o ku bhanga o ima i tu bhinga mu misambu ietu. Jihova ua mesena kuila tu bhanga ioso i tu tena, ia lungu ni musambu uetu. Mu kifika, se tu samba, “Kúdia kuetu kua nzala ia kizuua ni kizuua, tu bhane-ku lelu.” Tua tokala ku kalakala mu kikalakalu kioso-kioso ki tu tena ku bhanga. (Matesu 6:11; 2 Tesalonika 3:10) Se tu bhinga kikuatekesu mu musambu phala ku dibhana ni iluezu ia xitu, tua tokala ku dilanga ni kueha o ima i tu bhangesa ku lueza. (Kolose 3:5) Mu ijila íii, muala dingi ibhuidisu ia lungu ni musambu a tokala ku itambuijila.

9. Kua nanhi tua tokala kusamba, ni mu kaxi ka nanhi?

⁹ Tua tokala kusamba kua nanhi? Jezú ua longo o akaiedi’ê kusamba kua “Tata ietu uene mu diulu.” (Matesu 6:9) Kienhiki, tua tokala ku sambela ngó kua Jihova Nzambi. Jihova ua mesena kuila tuijiie o kididi kia tokala Mon’ê, umoxi-élele Jezú Kristu. Kála ki tua di longo kiá mu Kibatulu 5, Jezú a mu tumikisa mu ixi phala ku tu kula ni ku tu bhulula ku ituxi ni kufuá. (Nzuá 3:16; Loma 5:12) Muéne  a mu bhange Mukunji ua Dikota ni Mufundixi. (Nzuá 5:22; Jihebeleu 6:20) Kienhiki, o Mikanda ikôla i tu suínisa kusamba mu kaxi ka Jezú. Mu kiki muéne uambe: “Eme ngi njila, ngi kidi, ngi muenhu. Kana muthu u bhixila kua Tata, ua kambe kuijila ko kuami.” (Nzuá 14:6) Phala o misambu ietu a ivue, tua tokala ku sambela ngó Jihova, mu kaxi ka Mon’ê.

10. Mukonda diahi ki kua bhingi ku kala ni ukexilu umoxi ngó phala kusamba?

¹⁰ Tua tokala ku kala ni ukexilu umoxi ngó ua kusamba? Kana. Jihova ka mesena ngó ukexilu umoxi, ua kusamba. O Bibidia i longa kuma, kima kiambote kusamba mu ukexilu ua vulu. Mu kusamba ki kale ku xikama, ku bhetama, ku fukama, mba kuimana. (1 Malunda 17:16, NW; Nehemiia 8:6; Daniiele 6:10; Marku 11:25) Mu kidi, ki kua bhingi ku kala ni ukexilu umoxi ua kusamba phala ku tu mona ku athu, maji o ukexilu uambote ua muxima. Mu kidi mu ikalakalu ietu ia kizuua ni kizuua, kioso ki tu dibhana ni ibhidi, etu tu tena kusamba mu kasuekele mu kididi kioso-kioso. Jihova uivua o misambu íii, né muéne kioso athu ala ku mbandu ietu ka mu ívua.—Nehemiia 2:1-6.

11. Maka ahi u tua tokala ku bhinga mu musambu?

¹¹ Ihi i tua tokala ku bhinga mu musambu? O Bibidia ijimbulula: “Kima kioso ki tu mu bhinga, se kia xikina mu vondadi iê, muène [Jihova] u tu ivua.” (1 Nzuá 5:14) Kienhiki, tu tena ku bhinga ima ioso ixikana Nzambi. O kuila tu tena kusamba ia lungu ni ibhindamu ietu? Tu tena! Mukonda o kusamba kua Jihova, kua difu kála o kuzuela ni kamba dietu dia kazola. Etu tu tena kuzuela sé hele, mu ku ‘lundula o muxima uetu’ kua Nzambi. (Jisálamu 62:8) Tua tokala ku bhinga o nzumbi ikôla, ia-nda tu kuatekesa ku bhanga o ima iambote. (Luka 11:13) Etu ué tu tena ku bhinga o kikuatekesu phala ku bhanga kiambote o ima ni  ku dibhana kiambote ni ibhidi. (Tiiaku 1:5) Kioso ki tu ta o kituxi, tua tokala ku bhinga o muloloki mu sata ia Kristu. (Efezo 1:3, 7) Mu kidi, o maka metu, ka tokala ku kala ku pholo mu misambu ietu. Mu misambu ietu tua tokala ué ku tumbula—o muiji uetu, ni jiphange jetu ja ubhezelu.—Ikalakalu 12:5; Kolose 4:12.

12. Kiebhi ki tu tena ku ta ku pholo o maka a Tat’etu ia diulu mu misambu ietu?

¹² O maka alungu ni Jihova Nzambi, a tokala ku kala ku pholo mu misambu ietu. Mu kidi, etu tua tokala ku mu ximana, ni ku mu sakidila ni muxima uetu, o henda iê. (1 Malunda 29:10-13) Jezú ua xisa o phangu ia lungu ni musambu iosoneke mu divulu dia Matesu 6:9-13 (Tanga), mu musambu uê ua tu longo ku bhinga phala o dijina dia Nzambi a di xila ni a di ximane. Ua bhingi ué kuila, o Utuminu ua Nzambi uize, o vondadi iê a i bhange bhoxi kála kiala ku i bhanga ku diulu. Jezú kioso kia zubha kuzuela o ima ioso íii ia beta-kota ia lungu ni Jihova, kiene ngó kia zuela ia lungu ni ibhindamu ietu ni maka a mukuá. Kioso ki tu ta o maka a Nzambi ku pholo mu misambu ietu, tu idikisa kuma ki tua mesene’tu ngó o mbote ietu.

13. Ihi i zuela o Mikanda ikôla ia lungu ni kithangana kia misambu?

¹³ O kuila o misambu ia bhingi kithangana kia vulu? O Bibidia ki izuela se ithangana ikuxi ia bhingi, kioso ki tu samba mu ubheka, mba mu kaxi ka athu. O musambu a tena ku u bhanga mu ithangana iofele ande dia kúdia, mba mu ithangana ia vulu, kioso ki tu lundulula o muxima uetu kua Jihova. (1 Samuuele 1:12, 15) Jezú ua fudisile o misambu ia makutu ia athu akexile mu bhanga phala ku di londekesa ngó ku pholo ia akuâ. (Luka 20:46, 47) O misambu íii, ki ia uabhela Jihova. O kima kia beta-kota, o kusamba mu muxima. O kithangana kia misambu ki kiene mu difua, o ibhindamu iene i bhangesa kulebha mu ithangana.

14. Ihi ilombolola o Bibidia kioso ki tu suínisa mu kusamba “izuua ioso,” ni mukonda diahi kuijiia kiki ki tu kolokotesa?

 ¹⁴ Mu veji jikuxi tua tokala kusamba? O Bibidia i tu suínisa “sambenu izuua ioso” “kolokotenu mu kusamba” “sambenu sé kufula.” (Matesu 26:41, NW; Loma 12:12; 1 Tesalonika 5:17) Kiki ki kilombolola kuila tua tokala kusamba mu ithangana ioso ia kizuua. Maji o Bibidia, i tu suínisa kusamba izuua ioso kua Jihova, ni ku mu sakidila o ima ioso iambote iene mu tu bhana, ni ku bhinga o kikuatekesu, o kikolesu ni nguzu iê. Ki kia uabha kuijiia kuma tu tena kuzuela ni Jihova mu ithangana ioso sé hele? Se tua uabhela o ujitu iú ua kusamba, tua-nda samba izuua ioso kua Tata ietu ia diulu.

15. Mukonda diahi tua tokala kuzuela “Amém!” mu disukilu dia misambu?

¹⁵ Mukonda diahi tua tokala kuzuela “Amém!” mu disukilu dia musambu? O kizuelu “amém!” kilombolola kuila ‘tua xikina.’ O jiphangu ji tu sanga mu Mikanda ikôla, jidikisa kuila ki fuama kuzuela “Amém!” mu disukilu dia misambu ia ubheka ni mu kaxi ka athu. (1 Malunda 16:36, NW; Jisálamu 41:13) Kioso ki tu zuela “Amém!” mu disukilu dia musambu uetu, kilombolola kuma, tua zuela muene ni kidi kioso. Kioso ki tu zuela “Amém!”—ku muxima uetu, mba ni dízui dia suína—mu disukilu dia musambu ua muthu, mu kaxi ka athu, mu ku bhanga kiki, tu londekesa kuila tua xikana o musambu.—1 Kolindo 14:16.

16. Kidielelu kiahi ki tokala ku kala na-kiu kia lungu ni musambu?

¹⁶ O kuila Jihova u tambuijila muene o misambu ietu? U tambuijila! Etu tuala ni kidielelu kuma o ‘Mukua kuívua o musambu’ u tambuijila o misambu ia kidi ua jimidi ja athu. (Jisálamu 65:2) Jihova u tambuijila o musambu uetu mu ukexilu ua vulu.

17. Mukonda diahi tu tena kuzuela kuila Nzambi, u tambuijila o misambu ietu mu kaxi ka ji-anju ni jiselevende jê?

 ¹⁷ Jihova u tambuijila o misambu ietu mu kaxi ka ji-anju, ni jiselevende jê mu ixi. (Jihebeleu 1:13, 14) Kuene misoso ia vulu, ia athu a sambela kua Nzambi mu ku bhinga kikuatekesu phala ku tendela o Bibidia, a a tambuijila mu ku a kenga ku jiselevende ja Jihova. O misoso íii idikisa kuila, o kikalakalu kia kuboka kiala ni kikuatekesu kia ji-anju. (Dijingunuinu 14:6) Phala ku tambuijila o misambu mu ithangana ia tokala, Jihova u tena ku tumikisa o Kidistá  phala ku tu kuatekesa.—Jisabhu 12:25; Tiiaku 2:16.

18. Kiebhi Jihova kia tambuijila o misambu ia jiselevende jê, mu kaxi ka nzumbi iê ikôla ni mu Maka mê?

¹⁸ Jihova Nzambi u tambuijila ué o misambu ia jiselevende jê, mu kaxi ka nzumbi ikôla, ni mu Maka mê, o Bibidia. Muéne u tena ku tambuijila o misambu ietu, mu ku tu kuatekesa ku dibhana kiambote ni ibhidi, ni ku tu kolesa mu kaxi ka nzumbi iê ikôla. (2 Kolindo 4:7) O itambuijilu ia misambu ietu i tunda mu Bibidia, muene muala o kikuatekesu kia Jihova phala tu dibhana kiambote ni maka. O kikuatekesu kia mikanda ikôla tu ki sanga kioso ki tu di longa o Bibidia ubheka uetu, ni kioso ki tu tanga o madivulu a Kidistá, kála o divulu didi. O ki kuatekesu ki tua mesena, tu tena ku ki sanga mu iônge ia Jikidistá, mba mu izuelu ia adiakimi a kilunga.—Ngalásia 6:1.

19. Ihi i tua tokala ku banza se o misambu ietu nange i moneka kála ka mu i tambuijila?

¹⁹ Se tu mona kuila Jihova ua mu laleka mu ku tambuijila o misambu ietu, kiki, ki kilombolola kuila muéne ka tena ku i tambuijila. Mu veji dia kiki, tua tokala ku lembalala kuila Jihova u tambuijila o misambu mu vondadi iê, ni mu kithangana kiê. Muéne ua beta-kota kuijiia o ibhindamu ietu, ni kiebhi kia tu kuatekesa kiambote ku dibhana  na-iu. Muéne u tu ambela ‘bhingenu, sotenu, bundenu.’ (Luka 11:5-10) O ku kolokota kuku, kuidikisa kua Nzambi, kuila vondadi ietu ia kidi muene. Jihova u tena ku tambuijila mu ukexilu, u tu kamba ku kijiia. Mu kifika, muéne u tena ku tambuijila o musambu uetu ua lungu ni ibhidi, sé muene ku i katula, maji mu ku tu bhana o nguzu, phala ku kolokota.—Tanga Filipe 4:13.

20. Mukonda diahi tua tokala ku tambula mbote mu ujitu ua kusamba?

²⁰ Kisakidilu kia dikota mu kuijiia kuila o Mubhangi ua ngongo ioso, ua zukama ku athu a dikola kua muéne mu musambu! (Tanga Jisálamu 145:18.) Tu tena ku kala ni mbote mu ujitu iú, ua kusamba. Se tu bhanga kiki, tua-nda kala dingi ni kisangusangu, mu ku zukama kua Jihova, o Mukua kuívua o misambu.