1, 2. Wetin mek prea na big blɛsin? Wetin mek i fayn fɔ no wetin di Baybul tɔk bɔt prea?

WE WI luk di wɔl ɛn di sta dɛn we de na di skay, yu go si se di wɔl rili smɔl. Infakt, Jiova “we mek ɛvin ɛn di wanol wɔl,” de si ɔl di pipul dɛn we de na di wɔl lɛk se dɛn na wan drɔp wata insay bɔkɛt. (Sam 115:​15; Ayzaya 40:​15) Bɔt pan ɔl dat, di Baybul se: “Jiova de nia di wan dɛn we de kɔl am fɔ mek i ɛp dɛn, ɔl dɛn wan we de kɔl am wit ɔl dɛn at. I de gi di wan dɛn we de fred am, wetin dɛn want. Dɔn i de yɛri we dɛn kray to am, ɛn i de sev dɛn.” (Sam 145:​18, 19, NW) Jɔs tink wetin dat min! Di Pɔsin we mek wi ɛn we gɛt pawa pas ɔltin, de nia wi ɛn i go ansa we wi ‘kɔl am wit ɔl wi at.’ Yu nɔ tink se na big blɛsin wi gɛt so fɔ pre to Gɔd?

² Bɔt if wi want mek Jiova lisin to wi prea, wi fɔ pre to am di we aw i want. Aw wi go ebul pre di we aw i want, if wi nɔ no wetin di Baybul tɔk bɔt prea? I rili impɔtant fɔ mek wi sabi wetin di Baybul tɔk bɔt prea, bikɔs prea go ɛp wi fɔ kam nia Gɔd.

3. Wetin na wan impɔtant rizin we mek wi fɔ pre to Jiova?

³ Wi fɔ pre to Jiova bikɔs na in tɛl wi fɔ pre to am. Gɔd in Wɔd tɛl wi se: “Una nɔ fɔ mek ɛnitin wɔri una, bɔt una fɔ de pre bɔt ɔltin. Wɛn una de pre, una fɔ aks Gɔd fɔ ɛnitin we una want ɛn una fɔ tɛl am tɛnki. Gɔd go gi una kol at, we mɔtalman nɔ ebul ɔndastand, we nɔ go mek ɛnitin wɔri una, bikɔs una gɛt wanwɔd wit Jizɔs Krays.” (Lɛta Fɔ Filipay 4:​6, 7) Yu nɔ tink se wi fɔ du wetin di Pɔsin we de oba di wan ol wɔl want lɛ wi du?

4. We wi de pre to Jiova ɔltɛm, aw dat go mek wi padi biznɛs wit am tayt mɔ ɛn mɔ?

⁴ Wan ɔda tin we mek i fayn fɔ pre, na dat we wi de pre to Jiova ɔltɛm, i go mek wi padi biznɛs wit am tayt mɔ ɛn mɔ. Pipul dɛn we na tayt padi nɔ kin tɔk to dɛnsɛf nɔmɔ we dɛn want sɔntin. Bɔt dɛn kin want fɔ no aw dɛn kɔmpin de du. Ɛn dɛn padi biznɛs go tayt we dɛn go de tɔk bɔt wetin dɛn de tink, aw dɛn de fil,  ɛn wetin dɛn want. Wi go se na so wi padi biznɛs wit Jiova Gɔd tan lɛk. Dis buk dɔn ɛp yu fɔ lan bɔku tin bɔt wetin di Baybul de tich bɔt Jiova, di kayn pɔsin we i bi, ɛn di tin dɛn we i want fɔ du. Yu dɔn kam fɔ sabi am lɛk tru tru Pɔsin. Prea de gi yu di chans fɔ tɔk to yu Papa na ɛvin wetin yu de tink ɛn aw yu de fil insay yu at. As yu go de du dis, na so yu go de kam nia Jiova mɔ ɛn mɔ.—Jems 4:​8.

5. Aw wi no se nɔto ɔl prea Jiova de lisin?

⁵ Na ɔl prea Jiova de lisin? Lɛ wi si wetin Jiova tɛl Ayzaya fɔ tɛl di Izrɛlayt dɛn we dɛn bin de du wetin i nɔ lɛk. I se: “We una tret una an dɛn to mi, a go kɔba mi yay lɛ a nɔ si, i lɛk we una pre bɔku bɔku prea a nɔ go lisin; na so so blɔd de na una an.” (Ayzaya 1:​15) So dat min se, sɔm tin dɛn de we wi kin du, kin mek Gɔd nɔ lisin to wi we wi de pre. If wi want mek Gɔd ansa wi prea, sɔm tin dɛn de we wi fɔ du.

6. Fɔ mek Gɔd ansa wi prea, wetin na di fɔs tin we wi fɔ du? Aw wi go du am?

⁶ Di fɔs tin we wi fɔ du na fɔ biliv se Gɔd de ansa wi prea. (Rid Mak 11:​24.) Di apɔsul Pɔl bin rayt se: “If pɔsin nɔ biliv Gɔd, i nɔ go ebul pliz am. Pɔsin lɛkɛ dat nɔ go kam klos [to] Gɔd pas i biliv se Gɔd de ɛn i de du gud to dɛn pipul we de pre to am ɔltɛm.” (Di Ibru Pipul Dɛn 11:​6) Fɔ no se Gɔd de ɛn i de lisin to prea, nɔ min se wi biliv am. Bɔt na di tin dɛn we wi de du go sho se wi rili biliv Gɔd. Di we aw wi de liv wi layf fɔ sho klia wan se wi rili biliv Gɔd.—Jems 2:​26.

7. (a) Wetin mek wi fɔ tɔk wit rɛspɛkt we wi de pre to Jiova? (b) Aw wi go sho se wi de put wisɛf dɔŋ ɛn tɔk wetin de na wi at we wi de pre to Gɔd?

 ⁷ Di ɔda tin we wi fɔ du fɔ mek Jiova ansa wi prea, wi fɔ put wisɛf dɔŋ ɛn pul wetin wi de tɔk na wi at. Wetin mek wi fɔ put wisɛf dɔŋ we wi de pre to Jiova? We pipul dɛn kin gɛt chans fɔ tɔk to prɛsidɛnt, dɛn kin tɔk to am wit rɛspɛkt, bikɔs dɛn no se in na bigman na di kɔntri. Yu nɔ tink se wi fɔ gi Jiova mɔ rɛspɛkt we wi de pre to am? (Sam 138:​6) Apat frɔm dat, in na “GƆD Ɔlmayti.” (Sam 84:​8) We wi de pre to Gɔd, di we aw wi de tɔk to am fɔ sho se wi no se wi smɔl na in yay. We wi put wisɛf dɔŋ we wi de pre, go mek wi tɔk wetin de na wi at, ɛn i go mek wi nɔ tɔk di sem tin ɔltɛm, ɔ pul wi prea na preabuk.—Matyu 6:​7, 8.

8. Aw wi go ebul fɔ gɛt wetin wi de pre fɔ?

⁸ Di ɔda tin we go mek Gɔd yɛri wi prea, na we wi du di tin dɛn we go mek wi gɛt wetin wi de pre fɔ. Jiova want mek wi du ɔl wetin wi ebul fɔ du fɔ mek di tin we wi de pre fɔ, apin. Fɔ ɛgzampul, if wi de pre se, “Gi wi wetin wi fɔ it tide,” wi fɔ wok tranga wan pan ɛni wok we wi gɛt. (Matyu 6:​11; Sɛkɛn Lɛta Fɔ Tɛsalonayka 3:​10) If wi de pre fɔ mek Gɔd ɛp wi fɔ lɛf ɛni bad abit, wi nɔ fɔ du sɔntin ɔ de sɔnsay we go mek wi want fɔ du am. (Lɛta Fɔ Kɔlɔse 3:​5) Apat frɔm dɛn tin ya we wi dɔn tɔk bɔt, kwɛstyɔn dɛn de bɔt prea we wi nid fɔ fɛn di ansa dɛn.

9. Na to udat wi fɔ pre? Na tru udat wi fɔ pre?

⁹ Na to udat wi fɔ pre? Jizɔs bin tich in disaypul dɛn fɔ pre to “Papa Gɔd we de na ɛvin.” (Matyu 6:​9) So na  to Jiova nɔmɔ wi fɔ pre. Bɔt Jiova want lɛ wi pre to am tru Jizɔs. Wetin mek? Na bikɔs wi bin lan na Chapta 5 se Jizɔs bin kam na di wɔl fɔ kam day fɔ wi so dat i go sev wi frɔm sin ɛn day. (Jɔn 3:​16; Lɛta Fɔ Rom 5:​12) Gɔd dɔn pik Jizɔs fɔ bi Ay Prist ɛn Jɔj. (Jɔn 5:​22; Di Ibru Pipul Dɛn 6:​20) Na dat mek di Baybul se wi fɔ pre tru Jizɔs. Jizɔs insɛf bin tɔk se: “Mi na di rod we fɔ pas go to Gɔd, na mi de tɛl pipul wetin tru bɔt Gɔd, na mi de gi pipul di tru layf; nɔbɔdi nɔ go kam to mi Papa pas di pɔsin pas tru mi.” (Jɔn 14:​6) Di tin we go mek Jiova ansa wi prea, na we wi pre to in wan ɛn pre to am tru in Pikin.

10. Wetin mek no spɛshal we nɔ de fɔ mek we wi de pre?

¹⁰ Ɛni spɛshal we de aw wi fɔ mek we wi de pre? Nɔ, Jiova nɔ tɛl wi aw wi fɔ mek wi an ɔ wi bɔdi we wi de pre to am. Di Baybul tɔk bɔt difrɛn difrɛn we dɛn we pipul dɛn bin de mek we dɛn bin de pre. Dɛn bin de sidɔm, butu, nil dɔŋ, ɛn tinap. (Fɔs Krɔnikul 17:​16; Nɛimaya 8:​6; Daniɛl 6:​10) We wi de pre, di tin we impɔtant nɔto di spɛshal we aw wi mek wi an ɔ bɔdi. Bɔt wetin impɔtant na we wi tɔk wetin de na wi at. Ɛn wi kin ivin pre to Gɔd na wi at ɛnisay we wi de ɛn ɛnitɛm. Jiova de yɛri dɛn kayn prea dɛn de, ilɛksɛf pipul dɛn nɔ de yɛri wetin wi de se.—Nɛimaya 2:​1-6.

11. Wetin na sɔm tin dɛn we wi fɔ pre bɔt?

¹¹ Wetin wi fɔ pre fɔ? Di Baybul se: “Wi biliv se wɛn wi kam bifo Gɔd ɛn aks am fɔ ɛnitin, i go yɛri wi ɛn gi wi, if na dat in want.” (Jɔn In Fɔs Lɛta 5:​14) So wi fɔ pre fɔ ɛnitin we go ɛp wi fɔ du wetin Gɔd want. Yu tink se i bad fɔ pre bɔt tin dɛn we de mɔna wi? Nɔ, i nɔ bad atɔl! We wi de pre to Jiova tan lɛk we wi de tɔk to wi tayt padi. We wi de pre, wi fɔ ‘opin wi at to  am.’ (Sam 142:​2) I fayn fɔ mek wi pre fɔ di oli spirit so dat i go ɛp wi fɔ du wetin rayt na Gɔd in yay. (Lyuk 11:​13) We wi de pre, wi fɔ aks Gɔd mek i sho wi wetin fɔ du ɛn lɛ i ɛp wi fɔ bia wit wi prɔblɛm dɛn. (Jems 1:​5) Wi fɔ pre bak mek Gɔd fɔgiv wi. (Lɛta Fɔ Ɛfisɔs 1:​3, 7) Bɔt nɔto wi yon biznɛs nɔmɔ wi fɔ de pre to Jiova bɔt. I fayn fɔ pre fɔ ɔda pipul dɛn, lɛk wi fambul dɛn ɛn wi kɔmpin Kristian dɛn.—Di Apɔsul Dɛn Wok [Akt] 12:​5; Lɛta Fɔ Kɔlɔse 4:​12.

12. Aw wi go sho se wi de put Gɔd in biznɛs fɔs we wi de pre?

¹² We wi de pre, na Jiova in biznɛs wi fɔ put fɔs bifo ɛni ɔda tin. Wi fɔ prez Gɔd frɔm wi at, ɛn tɛl am tɛnki fɔ ɔl di gud tin dɛn we i de du fɔ wi. (Fɔs Krɔnikul 29:​10-13) Di we aw Jizɔs tich wi fɔ pre de na Matyu 6:​9-13 (Rid). Insay da prea de, i se, mek wi ɔna Gɔd in nem. Dat min se wi fɔ mek Gɔd in nem oli. Di ɔda tin we i se wi fɔ pre bɔt, na fɔ mek Gɔd in Kiŋdɔm bigin rul, ɛn mek wetin Gɔd want, bi na di wɔl lɛk aw i de bi na ɛvin. Na we Jizɔs dɔn tɔk bɔt dɛn impɔtant tin ya, na in i bigin tɔk bɔt di tin dɛn we wi want. So, we wi pre bɔt Gɔd in biznɛs fɔs, wi de sho se nɔto wi yon biznɛs nɔmɔ wi bisin bɔt.

13. Aw lɔng wi fɔ pre fɔ mek Gɔd ansa wi?

¹³ Aw lɔng wi fɔ pre? Di Baybul nɔ sho aw lɔng wi fɔ pre we wi de pre wi wan ɔ we wi de pre wit ɔda pipul dɛn. Wi kin pre shɔt wan bifo wi it ɔ lɔng wan we wi de tɛl Jiova wetin de na wi at. (Fɔs Samiɛl 1:​12, 15) Bɔt Jizɔs bin se i nɔ fayn fɔ pre lɔng lɔng prea jɔs fɔ mek pipul dɛn si wi ɛn tɔk se wi sabi Gɔd. (Lyuk 20:​46, 47) Jiova nɔ lɛk dɛn kayn prea dɛn de. Wetin impɔtant na we wi tɔk wetin de na wi at. So na di tin  we wi de pre fɔ ɛn di say we wi de, go mek wi prea go lɔng ɔ shɔt.

14. Wetin di Baybul min we i ɛnkɔrej wi “fɔ de pre ɔltɛm”? Wetin mek dat na fayn tin?

¹⁴ Ɔmɔs tɛm wi fɔ pre? Di Baybul ɛnkɔrej wi “fɔ de pre ɔltɛm.” (Lyuk 18:​1) Dis skripchɔ nɔ min se wi fɔ de pre to Jiova ol de. Bɔt i min se wi fɔ de pre to Gɔd fas fas, fɔ tɛl am tɛnki fɔ di gud tin dɛn we i de du fɔ wi. (Lɛta Fɔ Rom 12:​12; Fɔs Lɛta Fɔ Tɛsalonayka 5:​17) Di Baybul tɛl wi fɔ de pre to Gɔd so dat i go gayd wi, kɔrej wi, ɛn gi wi di pawa fɔ ebul du ɛnitin. I fayn fɔ no se Jiova nɔ sho aw lɔng wi prea fɔ bi ɛn ɔmɔs tɛm wi fɔ pre to am, bifo i ansa wi prea. If wi rili gladi fɔ de pre to Gɔd, wi go fɛn tɛm fɔ pre to am ɔltɛm.

15. Wetin mek wi fɔ se “Emɛn”: (a)  we wi dɔn pre? (b) we ɔda pɔsin pre dɔn?

¹⁵ Wetin mek wi fɔ se “Emɛn” we wi pre dɔn? Di wɔd “emɛn,” min “fɔ tru” ɔ “lɛ i bi so.” Di Baybul gi wi sɔm ɛgzampul dɛn we sho se i kɔrɛkt fɔ se “Emɛn” we wi de pre wi wan, ɔ wit ɔda pipul dɛn. (Fɔs Krɔnikul 16:​36; Sam 72:​19) We wi se “Emɛn,” wi de sho se wetin wi tɔk kɔmɔt na wi at. If na ɔda pɔsin de pre, we wi se “Emɛn,” wi de sho se wi gri wit wetin di pɔsin pre bɔt.—Fɔs Lɛta Fɔ Kɔrint 14:​16.

16. Wetin wi biliv bɔt prea?

¹⁶ Jiova kin rili ansa prea dɛn? Yɛs, i kin ansa prea dɛn. Wi biliv tranga wan se di Pɔsin we de lisin to wi prea, kin ansa wi prea dɛn if i kɔmɔt na wi at. (Sam 65:​2) Jiova kin ansa wi prea dɛn difrɛn difrɛn we.

17. Aw Gɔd de yuz enjɛl dɛn ɛn in savant dɛn na di wɔl fɔ ansa wi prea dɛn?

 ¹⁷ Jiova de yuz in enjɛl dɛn ɛn in savant dɛn na di wɔl, fɔ ansa prea dɛn. (Di Ibru Pipul Dɛn 1:​13, 14) Difrɛn difrɛn pipul dɛn stori dɛn dɔn sho se dat na tru. We dɛn kin pre fɔ mek Gɔd ɛp dɛn fɔ lan di Baybul, i nɔ kin tu te Jiova Witnɛs dɛn kin kam prich to dɛn. Dɛn kayn stori dɛn de, de sho se enjɛl dɛn kin ɛp di wan dɛn we de prich. (Rɛvɛleshɔn 14:​6) We  wi pre to Jiova bɔt sɔntin we wi rili nid, i kin mek wi kɔmpin Kristian kam ɛp wi.—Prɔvabs 12:​25; Jems 2:​16.

18. Aw Jiova de yuz in oli spirit ɛn di Baybul fɔ ansa in savant dɛn prea?

¹⁸ Jiova Gɔd kin yuz in oli spirit ɛn di Baybul fɔ ansa in savant dɛn prea. We wi pre to am fɔ ɛp wi fɔ bia wit sɔntin we de mɔna wi, i go yuz in spirit fɔ sho wi wetin fɔ du, ɛn gi wi trɛnk fɔ du am. (Sɛkɛn Lɛta Fɔ Kɔrint 4:​7) Bɔku tɛm, Gɔd kin yuz di Baybul fɔ ansa wi prea. Insay de, wi kin rid bɔt sɔntin we wi dɔn pre to am fɔ. Wi kin si dɛn skripchɔ ya we wi de stɔdi di Baybul, ɔ we wi de rid di magazin ɔ ɔda buk dɛn, lɛk dis wan ya. Sɔntɛnde we wi kam na di mitin wi kin si sɔm skripchɔ dɛn we kin rili ɛp wi. Ɔ, wan ɛlda we bisin bɔt wi, go yuz sɔm skripchɔ dɛn fɔ ɛp wi.—Lɛta Fɔ Galeshya 6:​1.

19. Wetin wi fɔ mɛmba if wi fil se Jiova nɔ de ansa wi prea?

¹⁹ If wi fil se Jiova de westɛm fɔ ansa wi prea, dat nɔ min se i nɔ ebul fɔ du wetin wi pre fɔ. Bɔt wi fɔ mɛmba se Jiova de ansa prea di we aw i want ɛn di tɛm we i want. I sabi wetin wi want ɛn aw fɔ gi wi dɛn. Bɔku tɛm, i kin want mek wi kɔntinyu  fɔ ‘aks, fɔ luk gud, ɛn fɔ kɔnk.’ (Lyuk 11:​5-10) We wi de kɔntinyu fɔ du dis, wi de sho Gɔd se wi rili want di tin we wi de pre fɔ ɛn wi biliv se i go ansa wi prea. Bɔt nɔto ɔltɛm wi go no se Jiova dɔn ansa wi prea. Fɔ ɛgzampul, wi go de pre to am bɔt sɔntin we de mɔna wi. I nɔ go mek di tin lɛf fɔ mɔna wi, bifo dat, i go gi wi di pawa fɔ bia wit am.—Rid Lɛta Fɔ Kɔlɔse 1:​11.

20. Wetin mek wi fɔ gladi fɔ pre ɔltɛm?

²⁰ Wi gladi bikɔs di Wan we mek di wan ol wɔl de nia di wan dɛn we de pre to am wit ɔl dɛn at. (Rid Sam 145:​18.) I fayn fɔ pre ɔltɛm, ɛn dat na big blɛsin fɔ wi bikɔs dis go mek wi ebul kam nia Jiova we de ansa wi prea.