1, 2. Le yɛɛ naŋ nɔ yɛ miŋ che piɛileŋ o Mɛlɛka lo maa kioo le cho ni? Nduyɛ, Le yɛɛ o bɛnda yɛ miŋ sina nyɛ Baabuiyo pɛɛku a piɛileŋ okɔɔ wo?

TE O yɔŋ pɛ miŋ tuu choo choo a lɛŋndeŋ, ŋ dimi maa lɛŋndeŋ le cho bɔɔ nyɛ taaniŋ. Baabuiyo dimi maa chuauwaa ŋwaŋndachiee kpou o chieeŋndo choo cho Chɛhowa, Mɛlɛka toosiaa choo choo a lɛŋndeŋndo o hɔl, mɛɛ toŋtoŋndeŋ le del naa o baawaa niŋ yɛ. (Sam 115:​15; Aisaya 40:​15) Kɛ a koŋ kpou, Baabuiyo dimi a Chɛhowa okɔɔ aa, ‘O cho o bɛɛndiaŋ le teleŋ o teleŋ le wanaa nyuna ndu diom nda malaa, wanaa nyuna ndu diom o tonyaa choo wa. Wanaa nɔ bɛɛleŋ le ndu wa, mbo ke nda nyɛ o nyɛ nda hau ba, nduyɛ mbo tuei piɛile ndaleŋ.’ (Sam 145:​18, 19) Yiyaŋndɔ a hei okɔɔ, maa Mɛlɛka toosiaa nyɛ o nyɛ fee wo cho naa ikɛi kpɛɛlaŋ. Maa te ŋ piɛi ndu pɛ o sandei choo o tuɛi naa diom. Kioo kpeekpei naŋ sɔla hoo ni le suɛi naa Mɛlɛka cha o piɛileŋ niŋ.

² Te ŋ yeema pɛ mi Chɛhowa yaŋ piɛile naaleŋ nilaŋ, mɛɛ miŋ piɛi ndu o nɛi o chɛllo choo. Le sinaa mɛɛ Mɛlɛka yeema miŋ piɛi ndu yɛ, mɛɛ miŋ yaasiaa nyɛ Baabuiyo pɛɛku a piɛileŋ okɔɔ wo. Le yɛɛ o bɛnda yɛ miŋ sina nyɛ Baabuiyo pɛɛku a piɛileŋ okɔɔ wo? Kanifuule, piɛileŋ le tosa ni miŋ sɔɔŋguu Chɛhowa Mɛlɛka ikɛi kpɛɛluŋ.

3. Sabu sɔwɛ tase kuɛɛ naŋ nɔ yɛ le piɛileŋ o Chɛhowa lo?

³ Sabu sɔwɛ tasoo cho ni maa, Chɛhowa pila dimul naa ni maa naŋ wa piɛileŋ o ndu lo. Diom ndɔɔ dɛɛniaa naa aa, “La nɔ buulaŋ o isɔɔ o isɔɔ niŋ te. Nduyɛ, isɔɔ o isɔɔ nya wa Mɛlɛka piɛiyo le ndi pɛ, la chɔm ndu nyɛ nya hau ba le ndu wo. Nduyɛ, pɛŋgu o pɛŋgu nya wa ndu nyunaa le nyɛ o nyɛ pɛ, la mel ndu balikaa. O koŋ kɔɔli, kɔl nyulu Mɛlɛka yɔŋgu wo o wana chiee nɔla mbo sina bɛɛ pɛŋgu le wo o nɔla mbo manda kɔlta nyalaŋ, a yiyaŋnda nyalaŋ, kani fuule, le mɛɛ nya cho o diom pilɔɔ niŋ a Chiisu Kiliti yɛ.” (Filipiaŋnda 4:​6, 7) Kɛndɛi Kpeekpei Mɛlɛka naa choo choo tosal naa hei ni. Nduyɛ, ŋ nɔ miŋ bii kɛndɛi waa naa a bala tiɔɔŋ.

4. Vɛɛ piɛileŋ o Chɛhowa lo lɔɔlɔɔ kindi yɛ chaŋyɛi nɛi a ndu?

⁴ Sabu cheleŋ cho vɛlɛ. Ndu cho ni maa, piɛileŋ o Chɛhowa lo lɔɔlɔɔ mala naa mi chaŋyɛi nɛi kendu naa tɛɛŋ a Chɛhowa Mɛlɛka. Wanaa cho kpeekpei o chaŋyɛi niŋnda, o cho ko teleŋ bahawɛiyo le nda suukaŋ te, lende le? Kɛ, wanaa cho o chaŋyɛi niŋnda nɔ yeemɛi le o pilɛ a o cheleŋndo. O hei niŋ, chaŋyɛi ndɛi kiandu poŋ te a wa pɛ suukaŋndo, yeemaŋ vɛlɛ a bahawɛila ndalaŋ chɔmnaŋndo. Chaŋyɛi nɛi a Chɛhowa, icho maa chaŋyɛi wanachiee le. Kɛ o nɛilaŋ lapum niŋ, ŋ dimi maa lende chaŋyɛi nɛi cho a Chɛhowa ni. Yau ŋ cho hoo pɛɛkoo wo mala num ma sina wana suu  Chɛhowa cho wo, suiliŋnda ndɔlaŋ, vɛlɛ a sabula ndɔlaŋ. Yauwo hoo mala num ma sina maa Mɛlɛka yoomaa kpeekpei Chɛhowa cho ni. Piɛileŋ le mala num ma chɔm bahawɛila cho num o kɔl kpou laŋ o Finya naa cho hoo choo choo wo lo. Te a wa pɛ piɛileŋ lɔɔlɔɔ, le mala num le sɔɔŋgoo Chɛhowa ikɛi kpɛɛluŋ.—Chemisi 4:​8.

5. Yɛɛ chɔm yɛ maa o cho piɛile kɛ kɛ fee le Mɛlɛka yaŋ nilaŋ te?

⁵ Baa piɛile kɛ kɛ fee Chɛhowa yaŋ nilaŋ ni? Yiyaŋndɔ a nyɛ o dimul Isɔluɛitiiyaa nila kaluaa o teleŋ Aisaya wo niŋndo. Mbo dimi aa, “Mɛɛ mɛɛ nya piɛi ya, I muli nya diom te, kani fondole, bala nyalaŋ la cho la lindɛi kpou a kooma waŋnda chieeya.” (Aisaya 1:​15) Hei cho kpendekele. Kaala naalaŋ lapum la tosa Mɛlɛka yeŋ piɛile naaleŋ nilaŋ te. Le mi Mɛlɛka yaŋ nilaŋ o piɛile naaleŋ nyɛkɛndɛi, mɛɛ miŋ tosa nyɛ o dimul naa wo.

6. Le mi Mɛlɛka yaŋ piɛile naaleŋ nilaŋ, yɛɛ fɛŋ naŋ nɔ yɛ miŋ tosa? Nduyɛ, vɛɛ naŋ looku yɛ hei tosa?

⁶ Laalaŋndo dɔuwɔɔ o Mɛlɛka niŋ, ndu cho nyɛ tase naŋ nɔ miŋ tosa wo ni. (Nuawɔ Maki 11:​24.) Mi kiilanɔɔ Pɔɔl poonyiaa aa, “Le wana o wana ma nɔla ma nɛŋi Mɛlɛka kɔl mɛɛ ma nɔ tiindaŋndo o ndu niŋ. Kanifuule, lɔɔpa mi waŋndo muliŋ naa Mɛlɛka chua mɛɛ mbo nɔ tiindaŋndo kpeekpei maa Mɛlɛka cho a tonya, nduyɛ, mbo nɔ tiindaŋndo maa wanaa huŋ naa Mɛlɛka chua wa Mɛlɛka cho nda hunɔɔ fandaa ke.” (Hibuluiya 11:​6) O cho ko dimioo a sondo maa Mɛlɛka cho nduyɛ maa o tuɛi piɛile naaleŋ te cho laalaŋndo kpou le. Kɛ, ŋ nɔ miŋ dɔu laalaŋ naa o wali niŋ. Lɔɔlɔɔ, kaa naa nɔ mbo chɔm acheleŋnda kpendekele maa, ŋ nɔ laalaŋndo o Mɛlɛka niŋ.—Chemisi 2:​26.

7. (a) Te ŋ wa pɛ suɛi o Chɛhowa lo o piɛileŋ niŋ, le yɛɛ o bɛnda yɛ miŋ chɔm ndu bɛɛleŋ? (b) Vɛɛ naŋ chɔm yɛ kaa tuisiaŋndo te ŋ wa pɛ piɛileŋ o Mɛlɛka lo, nduyɛ vɛɛ hei mala yɛ naa miŋ piɛi a kɔllo kpou?

⁷ Chɛhowa Mɛlɛka dimi vɛlɛ maa, wana o wana wa pɛ piɛiyo o ndu lo, o nɔ mbo tuisiŋ toolo nduyɛ mbo wa a kɔllo kpou. Te ŋ wa pɛ suɛi o Chɛhowa lo, ŋ nɔ miŋ tuisiŋ, vɛ lende le? Le tamaseliiyo, te waŋndo wa pɛ suɛi naa masa lelɛŋndo cha, a bɛɛleŋ o suaa o  ndu lo ni. Kanifuule, o sina maa o foofo sɔwɛɔ pila o cho ni. Vɛɛ naŋ dimi yɛ niŋ a Chɛhowa Mɛlɛka? Ŋ nɔ miŋ tuisiŋ tɔ a lediiŋ te ŋ wa pɛ suɛi o ndu lo. (Sam 138:​6) Le yɛɛ? Kanifuule, ndu cho “Mɛlɛka Kpuluŋguma Bɛndoo ni.” (Chɛnɛsee 17:​1) Te ŋ wa pɛ suɛi o Mɛlɛka lo o piɛileŋ niŋ, mɛɛ naŋ suaa o ndu lo yɛ nɔ mbo chɔm maa, nyɛ taaniŋ naŋ cho ndu o hɔl ni. Tuisiŋ waa naa mala naa miŋ piɛi o ndu lo a kɔllo kpede. Tuisiŋ waa naa mala naa vɛlɛ miŋ piɛi o ndu lo lɔɔlɔɔ. Nduyɛ, o kɛɛlu naa piɛile miŋgiaa sondo choo leŋ.—Maatiu 6:​7, 8.

8. Te ŋ piɛi pɛ o Mɛlɛka lo, vɛɛ naŋ tosa yɛ wallo le nyɛ naŋ piɛi le ndu wo?

⁸ Le mi Mɛlɛka muli piɛile naaleŋ, nyɛ yeemaŋ vɛlɛ wo cho wallo tosaa le nyɛ naŋ piɛiyo ni. Le tamaseliiyo, te ŋ piɛi pɛ Chɛhowa aa, “tosa a sabu mi ŋ sɔla nyɛ diaa naa ŋ diaa paale hauleŋ ndo,” ŋ lo ichali miŋ sɔla ndu le. Mɛɛ miŋ tosa wali o wali yoomuma naŋ ma nɔla tosaa, halikpeŋ miŋ sɔla o diaa. (Maatiu 6:​11; Tɛsaloniaŋ Diiŋ Ndɔɔ 3:​10) Chɛhowa yeema naa miŋ tosa wallo a yoomuma naŋ kpede le nyɛ naŋ piɛi le ndu wo. Te ŋ piɛi pɛ o Mɛlɛka lo le mbo mala naa miŋ faŋaŋ yeemɛi wanachieeyɛi nɛi kɔɔli, mɛɛ miŋ kpeeŋaŋ nyɛ o nyɛ yaa naa o yaŋɔɔ le leŋ niŋ. (Kolosiaŋnda 3:​5) Nyɔɔŋ muŋ tosaa mala mi Mɛlɛka tuei piɛile naaleŋ. O fulawɔ ko o nyɔɔŋ muŋ kɔɔli, nyunalaŋ la cho a piɛileŋ okɔɔ. Nduyɛ, o bɛnda miŋ sɔla mulilaŋ le nyunalaŋ ndaŋ.

9. O nɛɛnɛ lo naŋ nɔ yɛ miŋ piɛi? Nduyɛ, o diola nɛɛnɛ niŋ sanaa naŋ nɔ yɛ miŋ keeku piɛile naaleŋ?

⁹ O nɛɛnɛ lo naŋ nɔ yɛ miŋ piɛi? Mi Chiisu pɛɛku buɛiyaa nduaa le ma piɛi o “Mɛlɛka Finya naa . . . cho hoo ɛchɛnɛ wo” lo. (Maatiu 6:​9) Hei chɔm ni maa, ŋ nɔ miŋ piɛi o Chɛhowa Mɛlɛka lo kinɛi. O wa bɛɛ lende ni, Chɛhowa yeema naa miŋ ke foofo Po ndɔ pilɔɔ hoo kpe bɛɛleŋ. Po ndɔ koŋ cho yɛ Chiisu Kiliti ni. A mɛɛ naŋ pɛɛku o Buŋgɛi 5 o yauwo hoo niŋ yɛ, Mɛlɛka vem Chiisu Kiliti o chieeŋndo hoo choo ni. Le yɛɛ? Le mbo huŋ baŋa waŋndachieeya o haki piɔmndo niŋ. (Chɔŋ 3:​16; Luomaŋnda 5:​12) Mi Mɛlɛka yulu ndu iso maa ndu cho masa wanaa soliaa salaa ni. Nduyɛ maa, ndu cho vɛlɛ wana kɔɔsaa ŋwaŋndachiee ni. (Chɔŋ 5:​22; Hibuluiya 6:​20) Le hei, Baabuiyo dimi maa, te ŋ wa pɛ piɛileŋ naa  Mɛlɛka cha, mɛɛ miŋ keeku leŋ sanaa o diola Chiisu Kiliti laŋ niŋ. Mi Chiisu pila dimi aa, “Ya cho nɛiyo ni, a tonyaa, a yoomoo. Wana o wana nɔla mbo fuuluu naa Mɛlɛka Finyaa cha le mɛɛ o sabu nuu niŋ.” (Chɔŋ 14:​6) Le mi piɛile naaleŋ le sɔla mulioo, mɛɛ miŋ piɛi o Chɛhowa lo kinɛi nduyɛ, miŋ keeku leŋ sanaa o diola Chiisu Kiliti laŋ niŋ.

10. Tɛɛsiaa wɔ. Sawaa cho pa a fondaa vɛlɛ a mɛɛ naŋ nɔ miŋ sim yɛ te ŋ wa pɛ Mɛlɛka piɛiyo?

¹⁰ Te ŋ wa pɛ piɛileŋ, ŋ nɔ pa miŋ kɛɛsiaa fonda naŋ nɔ miŋ piɛiyo vɛlɛ a mɛɛ naŋ nɔ miŋ sim yɛ? Sako bɛɛ. Chɛhowa chɔm naa fonda naŋ nɔ miŋ piɛi ndu wo le. Nduyɛ, o chɔm naa mɛɛ naŋ nɔ miŋ sim kpeekpei yɛ le. O chɔm naa vɛlɛ mɛɛ naŋ nɔ miŋ tosa balaŋ yɛ le, kɛlɛŋgaa dialloŋ. Baabuiyo dimi maa, o naŋ miŋ piɛi o nɛila yɛ yɛlaŋ choo. Nɛilaŋ ndaŋ lapum la cho ni, ŋ piɛi ichali, ŋ baŋ wulaŋ, ŋ sim, te ŋ yeema pɛ. (Koloniko Tasoo 17:​16; Nɛhimaya 8:​6; Daaniɛɛ 6:​10; Maki 11:​25) O cho nyɔɔŋ muŋ tosaa le mi waŋnda che naa le cho nyɛ sɔwɛ Mɛlɛka o hɔl te. Kɛ mɛɛ kɔl naa cho sakpo o Mɛlɛka lo yɛ cho nyɛ sɔwɛɔ ni. O dimi niŋ, lepum mi suɛi bahawɛiye komal naa chɔ chɔ. Naa naa naŋ cho pɛ o boondii keŋ niŋ, ŋ piɛi o kɔl niŋ. Mi che bɛɛ naa wanaa cho naa ikɛiya tui nyɛ naŋ dimi o Mɛlɛka lo wo le, kɛ Mɛlɛka ndu tuɛi piɛile waa lende.—Nɛhimaya 2:​1-6.

11. A bahawɛila kuɛɛ okɔɔ naŋ nɔ yɛ miŋ piɛi Mɛlɛka?

¹¹ A yɛɛ okɔɔ naŋ nɔ yɛ miŋ piɛi? Baabuiyo pila muli aa, “Pɛŋgu o pɛŋgu te ŋ nyuna ndu [Chɛhowa] le nyɛ o nyɛ pɛ, nduyɛ mbo wa o hɛnaŋ ndɔɔ niŋ pɛ, nilaŋ o yaŋ naa ni.” (Chɔŋ Tasoo 5:​14) Lelaŋ, ŋ piɛi a nyɛ o nyɛ cho a hɛnaŋ Mɛlɛka wo okɔɔ. Te ŋ piɛi pɛ a bahawɛila naalaŋ okɔɔ, baa hɛnaŋ Mɛlɛka wo pa icho ni? O kpeekpei niŋ, piɛileŋ o Chɛhowa lo cho ko maa suukaŋndo nya chaaŋ num kɛndɔɔ. Ŋ chɔm Mɛlɛka bahawɛila naalaŋ. Ŋ suaa o ndu lo a nyɛ o nyɛ cho naa o lakɔl. (Sam 62:​8) O bɛnda vɛlɛ miŋ piɛi ndu le nyina ndɔ diandaa, kanifuule, o mala naa miŋ tosa nyɛ cho o kɛndɛ Mɛlɛka o hɔllo. (Luku 11:​13) Ŋ piɛi vɛlɛ le mi Mɛlɛka ke naa nɛi chɔmaa le kɛɛsiaa kɛndɔɔ tosaa o yoomu naa niŋ. Ŋ piɛi le mbo mala naa miŋ biunuŋ kpɔkɔsila komal naalaŋ. (Chemisi 1:​5) Te o yɔŋ pɛ miŋ tosa hakioo, ŋ nyuna Mɛlɛka o piɛileŋ niŋ le malɔɔ hakioo o sala soliaŋ Chiisoo niŋ. (Ɛfisiaŋnda 1:​3, 7) Kɛsiŋ  hei o kɔl. O cho ko le bahawɛila naalaŋ suee le naŋ nɔ miŋ piɛi Mɛlɛka le. Ŋ piɛi le bahawɛila wanaa cheleŋnda. Ŋ piɛi vɛlɛ le wanaa naŋ cho o yuŋgoo niŋnda, wanayaŋ naŋ, vɛlɛ a chaaŋaa naa laalaŋnda.—Walta Wanaa Chiisuaa 12:​5; Kolosiaŋnda 4:​12.

12. Vɛɛ naŋ handu yɛ sɔɔŋ cho a Mɛlɛka okɔɔ woŋ nyɛm tase o piɛile naaleŋ niŋ?

¹² Nyɛ o nyɛ cho pɛ a Chɛhowa okɔɔ, le ndu fɛŋ naŋ nɔ miŋ nyuna ndu o piɛileŋ niŋ. Ŋ nɔ sabulaŋ tau le Mɛlɛka balikaa mello a kɔl naa kpou le kɛndɛi o cho naa tosallo ve. (Koloniko Tasoo 29:​10-13) Mi Chiisu chɔm naa mɛɛ naŋ nɔ miŋ piɛi yɛ o Baabuiyo niŋ. Nuawɔ Maatiu 6:​9-13. O bolle Baabui leŋ niŋ, mbo dimi maa naŋ nɔ miŋ piɛi le mi diola Mɛlɛka laŋ la sɔla diondɔɔ, ndu cho ni, mi waŋnda ke laŋ bɛɛleŋ. Sɔɔŋ o dimi vɛlɛ woŋ cho ni maa, ŋ nɔ miŋ piɛi le mi Masale Mɛlɛkaleŋ le hiŋ. Nduyɛ, mi hɛnaŋ ndɔɔ yɔŋnuŋ o chieeŋndo choo a mɛɛ o yɔŋnuŋ o choo choo niŋ yɛ. Mɛɛ Chiisu chii buɛiyaa nduaa piɛileŋ pɛɛku a sɔɔŋ cho a Mɛlɛka okɔɔ woŋ, mbo dimi niko a bahawɛila naapilalaŋ okɔɔ. Naa bɛɛ lende koni naŋ nɔ ni miŋ piɛi. Te ŋ wa pɛ Mɛlɛka piɛiyo, sɔɔŋ cho a ndu okɔɔ woŋ fɛŋ naŋ nɔ miŋ dimi o piɛile naaleŋ niŋ. Te ŋ tosa pɛ hei, mɛɛ koŋ chɔm ni maa ŋ nɔ yeemɛi o sɔɔŋ cho a Mɛlɛka okɔɔ woŋ niŋ mbo hiau bahawɛila naalaŋ.

13. Vɛɛ Baabuiyo soo yɛ a mɛɛ kpɛ piɛile Mɛlɛka chɛlteŋ le nɔ mi le bandu yɛ?

¹³ Vɛɛ kpɛ piɛile naaleŋ le nɔ yɛ mi le bandu? O wa aa le faŋgaa naŋ cho piɛiyo ni, te koŋ te le naapila, Baabuiyo chɔm mɛɛ kpɛ le nɔ mi le bandu yɛ le. Naapum ŋ piɛi o biŋgi le nyɛdiaa dioo. Te ŋ wa pɛ piɛileŋ le naapila, ŋ dimul Chɛhowa nyɛ o nyɛ cho naa o kɔl. Hei tosa ni mi le wa le vilɛi. (Saamiɛɛ Tasoo 1:​12, 15) Boondii Chiisu wa o chieeŋndo hoo choo ve, mbo pɛɛsa wanaa ndaa sim piɛileŋ faŋgaa o hɔl o luŋnda. Le yɛɛ Chiisu pɛɛsa yɛ nda? Kanifuule, ndaa yeema ma chɔm faŋgaa maa, nda pilɛ kpe cho wanaa sakpo Mɛlɛka o hɔl ni. Nduyɛ maa, a chaa bɔɔ piɛileŋ. (Luku 20:​46, 47) Chɛhowa hini kɔl kposoŋ a wanaa piɛi piɛile waa naa wa le. Piɛile o piɛile fula pɛ waŋndo o kɔl, leŋ Chɛhowa hini kɔl ni. Piɛileŋ le wa le vilɛi, le wa le biŋgi, o cho ndu le cho nyɛ sɔwɛ o Mɛlɛka lo le. Kɛ a nyɛ naŋ cho piɛiyo a ndu okɔɔ wo, nduyɛ, a teleŋ naŋ cho Mɛlɛka nyuna o piɛileŋ niŋndo, cho nyɛ sɔwɛɔ ni.

14. Te Baabuiyo dimul naa pɛ aa naŋ ‘piɛi teleŋ o teleŋ’, yɛɛ o yiyaŋ yɛ? Nduyɛ, le yɛɛ icho yɛ suɛi kɔl dɛɛniaa le hei sinaa?

 ¹⁴ A teleŋ nda kuɛɛ naŋ nɔ yɛ miŋ piɛi? Baabuiyo dɛɛniaa naa aa, “La hiou lachi a Mɛlɛka piɛiyo le teleŋ o teleŋ.” (Maatiu 26:​41; Luomaŋnda 12:​12; Tɛsaloniaŋ Tasoo 5:​17) Hei chɔm naa maa o biɔŋɔɔ o biɔŋɔɔ bɛŋgu, ŋ nɔ miŋ piɛi o Mɛlɛka lo le. Kɛ, Baabuiyo cho naa dɛɛniaa le miŋ piɛi Mɛlɛka lɔɔlɔɔ. Ndu cho ni maa, mello ndu balika le kɛndɛi o cho naa tosallo ve, nyunaa ndu le nɛi chɔmaa o yoomu naa niŋ, nyunaa ndu le mbo ke naa kɔl dɛɛniaa vɛlɛ a yoomuaŋ. Ŋ nɔ miŋ naŋ kɔl tau. Le yɛɛ? Kanifuule, Chɛhowa hendu sawa a mɛɛ piɛile naaleŋ le nɔ mi le bandu yɛ le. Nduyɛ, o chɔm naa mɛɛ naŋ nɔ miŋ piɛi ndu o paaleŋ niŋ yɛ le. Te o yɔŋ pɛ kpeekpei miŋ naŋ kɔl le di naŋ sɔla hoo le Chɛhowa piɛiyo wo, mɛɛ ŋ nɔ miŋ tofa le teleŋndo le Finya naa hoo choo choo balikaa mello.

15. Te ŋ wa pɛ piɛiyo le naapila te koŋ te mi waŋndo piɛi le naa, le yɛɛ naŋ nɔ yɛ miŋ dimi aa “Amiina” o mɛɛlulaŋ?

¹⁵ Le yɛɛ naŋ dimi yɛ aa “Amiina” o piɛileŋ mɛɛlulaŋ? Hivi diomndo hoo “Amiina” cho ni, “o wa lende fɔ,” te koŋ te, “i yɔŋnuŋ lende fɔ.” Tamasilaŋ o Baabuiyo niŋ chɔm naa maa, te ŋ wa pɛ piɛileŋ le faŋgaa, te koŋ te, le naapila, icho suɛi sɔwɛ le dimioo aa “Amiina” o mɛɛlulaŋ. (Koloniko Tasoo 16:​36; Sam 41:​13) Te ŋ dimi pɛ aa “Amiina” o piɛile naa le naapila leŋ mɛɛlulaŋ, mɛɛ koŋ chɔm ni maa, a kɔl naa kpede naŋ piɛi ni. Te waŋndo piɛi pɛ le naa miŋ dimi aa “Amiina” o mɛɛlulaŋ, o wa bɛɛ aa choo choo naŋ dimi ni, te koŋ te toolo, koŋ chɔm ni maa ŋ chɛl nyɛ wana koŋ dimi o piɛile leŋ niŋndo.—Kɔliŋtiaŋ Tasoo 14:​16.

16. Tiindaŋ yɛɛ naŋ nɔ yɛ le piɛiyo o Mɛlɛka lo?

¹⁶ Baa Chɛhowa muli pa piɛile naŋ piɛi o ndulo leŋ? Lekɛndɛi, mbo muli. Ŋ nɔ tiindaŋndo kpeekpei maa “Wana muli piɛileŋ ndo” muli piɛile waŋnda o miiliɔŋndaŋ niŋ piɛi o ndulo a kɔl  ndaa kpou wo. (Sam 65:​2) Chɛhowa muli piɛile naaleŋ o nɛila bɔɔbɔɔ niŋ.

17. Le yɛɛ naŋ dimi yɛ maa Chɛhowa soliŋ maalikɛiya vɛlɛ a buɛiyaa nduaa kpeku le piɛile naaleŋ mulioo?

¹⁷ Chɛhowa soliŋ maalikɛiyaa nduaa kpeku vɛlɛ a chaaŋaa naa laalaŋnda o chieeŋndo hoo choo le piɛileŋ mulioo. (Hibuluiya 1:​13, 14) Tamaseliilaŋ la cho tau a hei okɔɔ. Wanaa bɔɔbɔɔ piɛi niŋ o Mɛlɛka lo le mbo mala nda ma bii nyɛ cho o Baabuiyo niŋndo bila. O viu bɛɛ le ma chiikaŋ nda Seiyaa Chɛhowaa. Tamaseliila waa naa cho chɔmndo maa, Chɛhowa cho maalikɛiya  soliŋndo kpeku le buɛiyaa nduaa nɛiyo chɔmndo o wali dimiaa yooŋgu Mɛlɛkaa niŋ. (Sɔɔŋ Chɔɔmaŋndoŋ 14:​6) Te ŋ wa pɛ o bahawɛi kala kala niŋ, Chɛhowa soliŋ chaaŋ naa laalaŋndo kpeku le naa malaa.—Kɔliŋtiaŋ Diiŋ Ndɔɔ 1:​3, 4; Chemisi 2:​16.

18. Vɛɛ Chɛhowa soliŋ yɛ nyina ndɔ diandaa vɛlɛ a Diom ndɔɔ kpeku le piɛile buɛiyaa nduaa mulioo?

¹⁸ Chɛhowa soliŋ vɛlɛ nyina ndɔ diandaa kpeku vɛlɛ a Diom ndɔɔ, ndu cho yɛ Baabuiyo ni, le piɛile buɛiyaa nduaa mulioo. Te ŋ nyuna ndu pɛ le malaa le simultaŋ biuwɔŋndo, o soliŋ nyina ndɔ diandaa kpeku le naa nɛiyo chɔmndo a naa yoomuaŋ kioo. (Kɔliŋtiaŋ Diiŋ Ndɔɔ 4:​7) Te o yɔŋ pɛ miŋ piɛi le nɛi chɔmaa, lepum o Baabuiyo niŋ naŋ sɔla muli ndɔɔ ni. Kanifuule, loŋ Chɛhowa ke naa nɛi chɔmaa ni le kɛɛsiaa kɛndɔɔ tosaa o yoomu naa niŋ. Te ŋ wa pɛ Baabuiyo pɛɛkoo a ba naa, te koŋ te, miŋ wa nuaa o yaula kɔɔna naa toosiaa laŋ niŋ, mɛɛ yau ŋ cho hoo pɛɛkoo wo cho naa yɛ, a saaluŋ bolii Baabui mala numnde leniŋ. O chuuŋgiaŋnda naala leKilisiɔŋndaŋ, mi bolii Baabuiye yaasiaŋ, i mala naa miŋ sina nyɛ naŋ nɔ miŋ tosa wo. Naapum, mulila bɛnduaa chua chilaŋ o kundaa niŋnda dɛɛniaa naa miŋ tosa hei.—Kaleesiaŋnda 6:​1.

19. Te ŋ yiyaŋ pɛ maa Chɛhowa cho bɔɔ viouwɔɔ le piɛile naaleŋ mulioo, yɛɛ naŋ nɔ yɛ miŋ kɛsiŋ o kɔl?

¹⁹ Teleŋ ndaŋ lapum, miŋ yiyaŋ maa Chɛhowa cho bɔɔ viouwɔɔ le piɛile naaleŋ mulioo. Kɛ koŋ chɔm naa maa o tiuba mbo muli leŋ te le. Loonuŋ maa Chɛhowa muli piɛileŋ a teleŋ o hɛnaŋndo. O sina yeemaŋ naŋ, vɛlɛ a bahawɛila naalaŋ,  mbo hiau naapila. Nduyɛ o sina mɛɛ o soli laŋ yɛ. Teleŋ ndaŋ lapum, o yeema naa miŋ lambaŋ nyunaa, dioo kundɔɔ, vɛlɛ a nuuviaa. (Luku 11:​5-10) Te ŋ lambaŋ pɛ hei tosaa, keŋ cho Mɛlɛka chɔm maa ŋ hau ba kpeekpei le nyɛ naŋ cho ndu nyunaa le ndu wo. Nduyɛ maa, ŋ nɔ laalaŋ kpeekpeiyo o ndu niŋ. Le handɔɔ lechoo, Mɛlɛka muli naapum piɛile naaleŋ o nɛi naŋ ve kɔl te wo choo. Le tamaseliiyo, te kpɔkɔsioo komal naa pɛ miŋ piɛi o ndu lo, o feŋa naa kpɔkɔsi koŋ choo le, kɛ o ke naa yoomuaŋ le miŋ biunuŋ ndu.—Nuawɔ Filipiaŋnda 4:​13.

20. Le yɛɛ naŋ nɔ yɛ miŋ soliŋ di Mɛlɛka ke naa le ndu piɛiyo wo kpeku?

²⁰ Ŋ nɔ miŋ mel Mɛlɛka toosiaa chieeŋndo kpou wo balika le mɛɛ o cho wanaa piɛi ndu o sandei choo wa ikɛi kpɛɛluŋ yɛ! (Nuawɔ Sam 145:​18.) Lelaŋ, ŋ nɔ miŋ soliŋ di Mɛlɛka ke naa hoo le ndu piɛiyo wo kpeku. Te ŋ tosa pɛ hei, ŋ cho sɔɔŋguu Mɛlɛka tuɛi piɛileŋndo ikɛi kpɛɛluŋ.