1, 2. Morwasinke natu tarera ekanderero asi situmbukiro sosinene, ntani morwasinke twa hepera kudiva eyi azi rongo Bibeli kuhamena kwalyo?

MOKULIHETAKANESA kumwe noyisitwa nayinye, evhu alyo enunu unene. Mousili, kwaJehova, “ogu ga sita eguru nevhu,” nomuhoko dovantu kapi da pitakana eta lyomema. (Episarome 115:15; Jesaya 40:15) Nye, Bibeli kuuyunga asi: “Age kwa kara pepi nava navenye ava mu zigida, ava ava mu zigida mousili. Age kuhepurura maruhepo gava ava mu tjira; age kuzuvha nkugo zawo.” (Episarome 145:18, 19) Gazara tupu eyi ayi tanta oyo! Musiti gomunankondo nadinye age pepi nose ntani nga tu zuvha nsene tu “mu zigida mousili.” Situmbukiro musi twa kara naso mokuhedera Karunga mekanderero!

² Nampili ngoso, nsene tuna hara Jehova a purakene komakanderero getu, twa hepa kukanderera kwendi monkedi ezi a tambura. Ngapi omu natu vhura kuyirugana eyi twa hana kukwata egano eyi azi rongo Bibeli kuhamena ekanderero? Ya kara mulyo kwetu mokudiva eyi aga uyunga Matjangwa kosirongwa esi, yeeyi ekanderero kutuvatera mokuhedera pepi naJehova.

3. Konda musinke zimwe zomulyo zeyi twa hepera kukanderera kwaJehova?

³ Konda zimwe zomulyo eyi twa hepera kukanderera kwaJehova kuna kara asi age kuna kutukorangeda tu yi rugane. Nonkango dendi kutukorangeda asi: “Walye omu kara nosinka soyuma. Nye momakanderero geni omu hundire nkenye eyi muna hepa kwaKarunga. Omu yi hundire nkenye apa nonomutjima dompandu. Ano mbili zaKarunga, ezi za pitakana unene nondunge nadinye, ngazi kungira nomwenyo deni nomagazaro geni mwaJesus Kristusa.” (Vafilipi 4:6, 7) Yosili ose ngano kapi natu hara kuncenuna ewapaiko lyangoso lyeharo eli ga tu wapaikira Mupangeli Gomunene gwanayinye!

4. Ngapi omu kukanderera nkenye apa kwaJehova kunkondopeka elikwatakano lyetu kumwe nendi?

⁴ Konda zimwe hena zokukanderera kuna kara asi kukanderera nkenye apa kwaJehova azo nkedi zokunkondopeka elikwatakano lyetu kumwe nendi. Vakaume wousili kapi ava zogere tupu nsene vana hepa yuma. Nye, vakaume wovawa awo va litura mo moyihepwa yovakwawo, ntani elikwatakano lyawo kuyankondopara ngomu vana kuuyunga nemanguruko magano noyinka ntani nomalizuvho gawo.  Mononkedi dimwe, ukaro wa lifana kombinga zelikwatakano lyetu kumwe naJehova Karunga. Nevatero lyobuke ezi, wa lironga yoyinzi kweyi azi rongo Bibeli kuhamena Jehova nountu wendi ntani nositambo sendi. Ngesi o ya mu diva nawa-nawa. Ekanderero kukupa mpito mokuuyunga magano ntani nomalizuvho goge gomonda koGuho vemeguru. Moomu ono kuyirugana, ngo hedere pepi naJehova.—Jakopo 4:8.

5. Yinke ayi likida asi Jehova kapi a purakene komakanderero nagenye?

⁵ Jehova kupurakena komakanderero nagenye ndi? Tarurura kweyi ga tanterere Vaisraeli wovarwanesi momazuva gomuporofete Jesaya: “Nampili mu kanderere makanderero gomanzi, ame nokumupurakena si, yeeyi asi mawoko geni kuna zura honde.” (Jesaya 1:15) Yirugana yimwe kuvhura kuninkisa Karunga a dire kupurakena komakanderero getu. Yipo nye, mokuninka asi makanderero getu a ga zuvhe nawa Karunga, twa hepa kusikisa mo yihepwa yimwe yomulyo.

6. Mokuninka asi Karunga a purakene komakanderero getu, yisinke sihepwa somulyo, ntani ngapi omu natu vhura kusisikisa mo?

⁶ Sihepwa somulyo asi ose tu likide epuro. (Marukusa 11:24) Mupositoli Paurusa ga tjenge asi: “Nsene o pira epuro, nokuza si Karunga komutjima, yeeyi ogu a zi kwaKarunga, a pure ntani asi Karunga kweli, age hena asi yige a futu ava ava mu papara.” (Vahebeli 11:6) Kukara nepuro lyosili kwa pitakana tupu kudiva asi Karunga yipo ga kara ntani age kuzuvha nokulimburura makanderero. Epuro kulilikida moyirugana. Twa hepa kuyilikida nawa-nawa asi twa kara nepuro monkedi ezi atu paruka nkenye ezuva.—Jakopo 2:26.

7. (a) Morwasinke natu karera nefumadeko apa atu uyunga naJehova mekanderero? (b) Apa atu kanderere kwaKarunga, ngapi omu natu vhura kulikida elinunupiko nelituromo?

⁷ Jehova kwa hepa hena asi owo ava mu hedere mekanderero va yi rugane nelinunupiko nelituromo. Kapi twa kara nokonda mokulinunupika apa atu uyunga naJehova ndi? Vantu apa ava kara nompito zokuuyunga nahompa ndi peresidente,  awo narunye kuyirugana nefumadeko, mokudimburura sipundi sokuzeruka somupangeli. Eh, ngapi omu twa kona kukara nefumadeko apa atu hedere Jehova! (Episarome 138:6) Mousili, age “Karunga, Munankondo nadinye.” (Genesis 17:1) Apa atu kanderere kwaKarunga, nkedi ezi atu mu hedere ngano tazi likida asi ose twa linunupika mokudimburura ukaro wetu komeho zendi. Elinunupiko lyangoso ngali tu ninkisa hena mokukanderera kutundilira komutjima gwetu melituromo, nokunyokera nkareso zomakanderero gokurugurura.—Mateusa 6:7, 8.

8. Ngapi omu natu vhura kurugana kuliza neyi atu kanderere?

⁸ Sihepwa simwe mokutuzuvha Karunga kwa kara asi ose atu rugane kuliza nomakanderero getu. Jehova kutundindira tu rugane paapa twa hulira mokusikisa mo eyi atu kanderere. Pasihonena, nsene tu kanderera asi: “Tu pa naina nondya detu dankenye ezuva,” twa hepa kurugana unene kwankenye sirugana sina kara po esi natu vhura kurugana. (Mateusa 6:11; 2 Vatesaronika 3:10) Nsene tatu kanderere mokukandana po madowo gopanyama, twa kona kunyokera maukaro ndi yihorokwa eyi ngano nayi tu twaredesa keheteko. (Vakorosi 3:5) Megwedereroko koyihepwa eyi yoyinene, pwa kara mapuro kuhamena makanderero aga twa hepera elimbururo.

9. Kwalye natu kanderera, ntani kupitira mwalye?

⁹ Kwalye natu kanderera? Jesus ga rongere vasikuli vendi mokukanderera ‘kwaGuhyetu gemeguru.’ (Mateusa 6:9) Yipo nye, makanderero getu, twa hepa kugavyukisira tupu kwaJehova Karunga. Nampili ngoso, Jehova kwa hepa asi ose tu dimburure ukaro waMunwendi a huru, Jesus Kristusa. Moomu twa yi lirongere mEgaununo 5, Jesus kwa mu tumine pevhu a ya kare sizoweseso mokutuparura kononzo nokonomfa. (Johanesa 3:16; Varoma 5:12) Age yige va tura po ngoMupristeli goMunene ntani noMupanguli. (Johanesa 5:22; Vahebeli  6:20) Yipo nye, Matjangwa kutulikida tu gave makanderero getu kupitira mwaJesus. Age mwene ga uyungire asi: “Nyame nzira nousili nomwenyo. Nagumwe si a wiza kwaTate, age ga hana kupitira pwange.” (Johanesa 14:6) Mokugazuvha makanderero getu, twa hepa kukanderera tupu kwaJehova kupitira mwaMunwendi.

10. Morwasinke asi kapi twa hepa kutura marutu getu pomukaro gokulikarera apa atu kanderere?

¹⁰ Pokukanderera, marutu getu twa kona kugatura pomukaro gokulikerera ndi? Hawe. Jehova kapi ga hepa nkenye mukaro, gu kare asi gomawoko ndi gorutu narunye. Bibeli kuronga asi ya wapera mokukanderera momukaro gokulisiga-siga. Eyi kukwatera mo kuhingira nokunyogama nokutogamena ntani nokusikama. (1 Histoli 17:16; Nehemiya 8:6; Ndaniyera 6:10; Marukusa 11:25) Yomulyo po, kapisi mukaro gokulikerera ogu nava vhura kumona vapeke, nye nkareso zomutjima zouhunga. Mousili, moyirugana yetu yankenye ezuva ndi apa atu ligwanekere noudigu wohararasi, ose kuvhura tu gave ekanderero lyokulimwenena nkenye oku tuna kara. Jehova kuzuvha makanderero gangoso nampili va dire kugazuvha ava vana kara pepi nose.—Nehemiya 2:1-6.

11. Yinka musinke yanyamwetu eyi ya wapa mekanderero?

¹¹ Kosinke natu vhura kukanderera? Bibeli kufaturura asi Jehova “ta tu zuvhu ntene tu mu hundira eyi yokuliza nompango zendi.” (1 Johanesa 5:14) Yipo nye ose kuvhura tu kanderere kwankenye eyi yokuliza nompango zaKarunga. Azo nye mpango zendi asi tu kanderere kuhamena yinka yetu ndi? Yosili! Kukanderera kwaJehova kwa lifana ngwendi kuuyunga nakaume gomunene. Kuvhura tu uyunge nemanguruko, ‘mokutanta maudigu getu nagenye’ kwaKarunga. (Episarome 62:8) Ya wapa kwetu mokuhundira mpepo zokupongoka, morwa azo ngazi tu vatera mokurugana youhunga. (Rukasa 11:13) Kuvhura hena tu hundire evyukiso mokutura po matokoro gomawa ntani nononkondo mokulididimikira maudigu. (Jakopo 1:5) Apa atu zono, twa kona kuhundira edongwenenopo  kupitira monzambo zaKristusa. (Vaefeso 1:3, 7) Nye, yinka yanyamwetu ngano kapisi yi kare yelike momakanderero getu. Kapisi tu kanderere tupu kuhamena nyamwetu, nye hena kuhamena vantu vapeke—vekoro ntani novakereli vakwetu.—Yirugana 12:5; Vakorosi 4:12.

12. Yuma yokuhamena Guhyetu gemeguru, ngapi omu nayi vhura kukara yomulyo po momakanderero getu?

¹² Yuma yokuhamena kwaJehova Karunga ya kona kukara yomulyo po momakanderero getu. Yosili ose twa kara nokonda zokumuhamberera nokumupandura nomutjima nagunye komauwa gendi nagenye. (1 Histoli 29:10-13) Jesus ga geve ekanderero lyosihonena, eli va tjanga mwaMateusa 6:9-13, omu ga tu rongere mokukanderera asi edina lyaKarunga va li pongore. Ntani kwa kweme ko asi Uhompa waKarunga u wize ntani mpango zendi va zi sikise mo pevhu ngwendi meguru. Konyima zokutumbura yininke eyi yomulyo yokuhamena kwaJehova ntani nye Jesus ga ya tumbwire yinka yetu. Mokulifana apa atu gava kwaKarunga evango lyomulyo po momakanderero getu, ose kulikida asi kapi twa litura mo tupu moukalinawa wanyamwetu.

13. Yinke aga likida Matjangwa kuhamena ure womakanderero?

¹³ Siruwo sokuhura kupi naga gusa makanderero getu? Bibeli kapi za tura asi papi naga hagera makanderero ganyamwetu ndi gomombunga. Kuvhura ga kare gomasupi komeho zokulya ndi gomare gopwanyamwetu omu atu uyunga maudigu getu nagenye kwaJehova. (1 Samwere 1:12, 15) Nampili ngoso, Jesus ga nyokerere ava wokukanderera makanderero gomare mokulimonekesa komeho zava wopeke. (Rukasa 20:46, 47) Makanderero gangoso kapi aga hafesa Jehova. Yomulyo po yeeyi yokukanderera kutundilira komutjima gwetu. Nye ure womakanderero kuvhura kulisiga kuliza noyihepwa nonomukaro.

14. Yinke azi tanta Bibeli apa azi tu korangeda asi tu “kanderere narunye,” ntani ngapi omu ayi hengagwida eyi?

¹⁴ Rungapi twa kona kukanderera? Bibeli kutukorangeda asi tu “kanderere narunye.” (Varoma 12:12; 1 Vatesaronika 5:17)  Kapi ayi tanta asi twa hepa kukanderera kwaJehova ezuva mudima. Nye, Bibeli kuna kututumangeda mokukanderera nkenye ezuva, kupandura Jehova nkenye apa kouwa wendi kwetu, ntani kupapara evyukiso nehengagwido ntani nononkondo dendi. Kapisi ehengagwido mokudiva asi Jehova kapi ga tura po asi papi naga hagera makanderero getu ndi asi yikando yingapi natu vhura kuuyunga nendi? Nsene tu pandwira sili situmbukiro sekanderero, ngatu papara nompito dononzi mokukanderera kwaGuhyetu gemeguru.

15. Morwasinke natu uyunga asi “Amen” kehagero lyomakanderero ganyamwetu ntani naga gomombunga?

¹⁵ Morwasinke natu uyunga asi “Amen” kehagero lyekanderero? Nkango “amen” kutanta asi “yosili” ndi “yi kare ngorooro.” Yihonena yopatjangwa kulikida asi ya wapa mokuuyunga asi “Amen” kehagero lyomakanderero ganyamwetu ntani naga gomombunga. (1 Histoli 16:36; Episarome 41:13) Pokuuyunga asi “Amen” pehagero lyekanderero lyanyamwetu, ose kulikida asi mauyungo getu kuna ga tura po nousili. Apa atu uyunga asi “Amen”—yi kare asi momutjima ndi kuziguruka—kehagero lyekanderero lyomombunga, ose kulikida asi tuna kwatesa ko magano aga vana uyunga.—1 Vakolinte 14:16.

16. Ehuguvaro musinke natu vhura kukara nalyo kuhamena ekanderero?

¹⁶ Jehova sili kulimburura makanderero ndi? Yosili, yimo! Twa kara nepamo lyenene lyokuhuguvara asi ‘Muzuvhi gomakanderero’ kulimburura makanderero gosili aga ava gava mamiliyona govantu. (Episarome 65:2) Jehova kuvhura kulimburura makanderero getu mononkedi dokulisiga-siga.

17. Morwasinke nava vhulira kuuyunga asi Karunga kuruganesa vaengeli vendi ntani novakareli vendi vepevhu mokulimburura makanderero getu?

¹⁷ Jehova kuruganesa vaengeli vendi ntani novakareli vendi  vepevhu mokulimburura makanderero. (Vahebeli 1:13, 14) Pwa kara yihorokwa yoyinzi yavamwe ava va kanderere kwaKarunga kevatero mokukwata egano Bibeli ntani konyima zoyo tava ligwanekere nagumwe govakareli vaJehova. Yihorokwa yangoso kulikida asi vaengeli kupitisira yirugana yezuvhiso lyoUhompa. (Ehororo 14:6) Mokulimburura makanderero getu gokugava mosiruwo sohepero, Jehova kuvhura kutumangeda Mukriste mokuyatuvatera.—Yisewe 12:25; Jakopo 2:16.

18. Ngapi omu a ruganesa Jehova mpepo zendi zokupongoka ntani noNonkango dendi mokulimburura makanderero govakareli vendi?

 ¹⁸ Jehova Karunga hena kuruganesa mpepo zendi zokupongoka ntani noNonkango dendi, Bibeli, mokulimburura makanderero govakareli vendi. Kuvhura a limburure makanderero getu kevatero mokulididimikira mahepeko pokutupa evyukiso nononkondo kupitira mompepo zendi zokupongoka. (2 Vakolinte 4:7) Rorunzi elimbururo komakanderero getu kevyukiso kutundilira moBibeli, omu Jehova a tu pe evatero mokutura po matokoro gomawa. Matjangwa gokuvatera kuvhura kugagwana melirongo lyanyamwetu lyoBibeli ntani moomu tuna kuresa yimbapiratjangwa yoSikriste, ngwendi buke ezi. Yitwa yopatjangwa eyi twa hepa mokutarurura kuvhura kuyireta momagano getu kweyi va uyungire mepongo lyoSikriste ndi kupitira mononkango domukuronambungakriste ogu ga litura mo moukalinawa wetu.—Vagarata 6:1.

19. Yinke twa hepa kudiworoka nsene makanderero getu pamwe kumoneka asi kapi vana kugalimburura?

¹⁹ Nsene Jehova kumoneka ngwendi kuliranga mokulimburura makanderero getu, eyi narumwe si asi age kapi a vhuru kugalimburura. Twa hepa kudiworoka asi Jehova kulimburura makanderero kuliza nompango zendi ntani posiruwo samwene. Age ga diva yihepwa yetu nomu na yi pakera sinka kupitakana nyamwetu. Pamwe age kutupulisira ‘tu hundire, nokupapara, ntani nokungongora.’ (Rukasa 11:5-10)  Ekovekedo lyangoso kulikida Karunga asi ose twa kara nelituromo nepuro lyosili. Mokugwederera ko, Jehova kuvhura a limburure makanderero getu monkedi ezi twa dira kudiva. Pasihonena, age kuvhura a limburure ekanderero lyetu kuhamena ehepeko limwe, pokudira kugusa po udigu, nye pokutupa nonkondo mokulilididimikira.—Vafilipi 4:13.

20. Morwasinke natu ruganesa monaruwa situmbukiro sosiwa sekanderero?

²⁰ Rupandu musi natu vhura kukara naro asi Musiti goyininke nayinye kwa kara pepi nanavenye ava ava mu zigida mouhunga mekanderero! (Episarome 145:18) Ngano tu ruganese monaruwa situmbukiro sosiwa sekanderero. Nsene tu yi rugana, ngatu kara nomeho zoruhafo mokuhedera narunye pepi naJehova, Muzuvhi gomakanderero.