1, 2. Ekuma tufwete badikila e sambu nz’elau diampwena? Ekuma tufwete zayila dina kelonganga Nkand’a Nzambi mu kuma kia sambu?

NTOTO wakete kikilu muna tezanesa wo yo nsema wawonso. O Yave ‘Mvangi ezulu ye nza,’ otezanesanga e zula ya wantu nze etonsi dia maza muna nkalu. (Nkunga 115:15; Yesaya 40:15) Nkand’a Nzambi uvovanga vo: “O Yave ofinamene awonso bekumbokela, ana bekumbokelela kuna ziku. Olunganisa luzolo lu’awana bekumvumina; owa kazu kiau yo kubavuluza.” (Nkunga 145:18, 19) Yindula e nsas’a mvovo miami! O Mvangi una vo Mpungu-ngolo okutufinama yo wá kazu kieto, avo ‘tumbokele kuna ziku.’ Kieleka, o samba kwa Nzambi i’lau diampwena tuvwidi.

² Avo tuzolele vo Yave kawanga e sambu yeto, tufwete samba muna mpila ina ketondanga. Aweyi tulenda wo vangila kele vo ke tuzeye ko dina kelonganga Nkand’a Nzambi? Diamfunu twazaya dina kelonganga Nkand’a Nzambi mu kuma kia sambu, kadi dikutusadisa mu finama Yave.

3. Nkia kuma kiantete tufwete sambilanga kwa Yave?

³ Ekuma kiantete tufwete sambilanga kwa Yave, kadi yandi kibeni okutubokelanga mu vanga wo. O Nkand’a Nzambi okutuvovesanga vo: ‘Ke nutokani ntima muna konso diambu ko; kansi muna mambu mawonso, muna sambu yo ludodokelo yo matondo, e ndomba zeno, yambula zazayiswa kwa Nzambi. O luvuvamu lua Nzambi, luna luviokele nyindu wawonso, luyingila ntima mieno, yo makani meno muna Kristu Yesu.’ (Filipi 4:6, 7) Ka tufwete vezanga ko elau diadi diampwena katukubikila Mpungu-ngolo, wa Mfumu a nsema wawonso.

4. O samba kwa Yave aweyi dilenda siamisina ngwizani eto yo yandi?

⁴ O samba ntangwa zawonso kwa Yave disiamisanga e ngwizani eto yo yandi. E kiaki i kuma kiazole tufwete sambilanga. Akundi akieleka ke bemokenanga kaka mu ntangwa yavava lusadisu ko. Kansi ekolo bemokenanga yo salaziana e kikundi kiau kisikilanga. Diau adimosi mpe dilenda vangama muna ngwizani eto yo Yave wa Nzambi. Muna lusadisu lwa nkanda wau, olongokele mambu  mayingi kelonganga Nkand’a Nzambi mu kuma kia Yave, fu ye makani mandi. Tomene kunzaya vo Muntu akieleka. E sambu kikuvana elau dia zayisa ngindu ye makani maku kwa S’aku ezulu. Avo ovangidi wo, ofinama Yave.—Yakobo 4:8.

5. Adieyi disonganga vo Yave ke wanga e sambu yawonso ko?

⁵ Nga Yave owanga e sambu yawonso? Tala mana kavovesa Aneyisaele vava bakolama muna lumbu ya Yesaya wa ngunza: “Ovo nusamba nsamba zayingi, kiwa kwame ko: o moko meno mazele yo menga.” (Yesaya 1:15) Ozevo, mambu makaka tuvanganga malenda fila Nzambi mu lembi wá e sambu yeto. Ozevo, o Nzambi muna wá e sambu yeto, vena ye mambu makaka mamfunu tufwete lungisa.

6. O Nzambi muna wá e sambu yeto, nkia diambu diantete divavwanga? Aweyi tulenda dio lungisila?

⁶ Kala ye lukwikilu i diambu diantete divavwanga. (Tanga Maku 11:24.) O ntumwa Paulu wasoneka vo: “Ovo vakondelo lukwikilu, ke dilendakana ko, edi dia kunyangidika [Nzambi]: okala vo kadi, ndion’okwiza kwa Nzambi, okwikila kaka vo wina, yo kala nsendi awana bekumvavanga.” (Ayibere 11:6) Mayingi mevavwanga muna kala yo lukwikilu lwakieleka, ke kwikila kaka ko vo Nzambi wina ye owanga e sambu. O lukwikilu mu mavangu lusongelwanga. Muna zingu kieto kia lumbu ke lumbu tufwete songanga vo tuna ye lukwikilu.—Yakobo 2:26.

7. (a) Ekuma tufwete songelanga vumi vava tusambanga kwa Yave? (b) Vava tusambanga kwa Nzambi, aweyi tulenda songela lembama ye ziku?

⁷ Yave ovavanga mpe vo awana besambanga kwa yandi bavanganga wo kuna lembama ye ziku kiawonso. Tuvwidi kuma yayingi mu kisakidika vava tusambanga kwa Yave. Vava wantu bekalanga y’elau dia vovana ye nyadi a nsi  au, bevanganga wo ye luzitu lwawonso. Muna kuma kiaki, vava tusambanga kwa Yave tufwete wo vangilanga ye vumi wawonso. (Nkunga 138:6) Kadi yandi i “Nzambi wa Mpungu-ngolo.” (Etuku 17:1) Vava tusambanga kwa Nzambi, tufwete wo vangilanga mu mpila yisonganga vo tuzeye tezo kieto vana ndose andi. O lembama kukutufila mu samba ye ziku kiawonso. Kukutufila mpe mu venga e fu kia vovololanga mambu muna sambu.—Matai 6:7, 8.

8. Aweyi tulenda sadila mana tulombanga muna sambu yeto?

⁸ O Nzambi muna wá e sambu yeto divavanga vo twasadilanga mana tulombanga muna sambu. O Yave ovavanga vo twavanga una tulenda mu zingila ngwizani ye sambu yeto. Muna bong’e nona: Kele vo olombele muna sambu, ‘utuvana o dia kweto kwa lumbu ke lumbu o unu,’ ofwete sia ngolo za sala konso salu kina olenda. (Matai 6:11; 2 Tesalonika 3:10) Avo tulombele lusadisu mu sunda lutovoko lwa nitu, tufwete kuyikenga muna konso diambu dilenda kututonta. (Kolosai 3:5) Vana ntandu a mambu mama, tufwete zaya mpe mvutu za yuvu iyuvulwanga mu kuma kia sambu.

9. Kwa nani tufwete sambanga ye mu nkumbu a nani?

⁹ Kwa nani tufwete sambanga? Yesu walonga alongoki andi basambanga ‘kw’e S’eto koko’zulu.’ (Matai 6:9) E sambu yeto kwa Yave wa Nzambi kaka yifwete filwanga. Kansi, Yave ovavanga mpe vo twazaya e fulu kia Mwan’andi amosi, Yesu Kristu. Nze una twalongoka muna Kapu kia 5, Yesu wafilwa ova nza muna kutukula mu masumu ye lufwa. (Yoane 3:16; Roma 5:12) Wasolwa se Ngang’ambuta ye Mfundisi. (Yoane 5:22; Ayibere 6:20) Muna kuma kiaki, o Nkand’a Nzambi ukutuvovesanga vo twafilanga e sambu yeto kwa Nzambi muna nkumbu a Yesu.  Yandi kibeni wavova vo: “Mono kwame i nzila, i ludi, i moyo mpe: ke ven’on’okwiza kwa Se ko, ovo ke mu mono ko.” (Yoane 14:6) E sambu yeto muna wakana, tufwete sambanga kaka kwa Yave muna nkumbu a Mwan’andi.

10. Ke vena mpila yasikidiswa ko ina tufwete kala vava tusambanga, ekuma?

¹⁰ Nga vena ye mpila yasikidiswa ina tufwete kala vava tusambanga? Ve. O Yave kasikidisa ko una ufwete kala moko yovo nitu eto vava tusambanga. Nkand’a Nzambi ulonganga vo diambote kwandi mu kalanga mu mpila zaswaswana vava tusambanga. Ediadi disongele vo olenda kala wavwanda, wafukama, bokeka ntu yovo watelama. (1 Tusansu 17:16; Nekemiya 8:6; Daniele 6:10; Maku 11:25) Edi disundidi o mfunu i makani mambote ma ntima, ke mpila ina ke kalanga ko o muntu vava kesambanga. Muna salu yeto ya lumbu ke lumbu yovo vava tubwilwanga konso diambu kuna kinsalukisa, kana nkia fulu tuna tulenda lomba e sambu kia nsi a ntima. Yave owanga e sambu yayi kana una vo awana bena yeto ke batuwidi ko.—Nekemiya 2:1-6.

11. Nkia mambu ma yeto kibeni mena vo mambote kwandi muna lombanga mo muna sambu?

¹¹ Nkia mambu tufwete lombanga? O Nkand’a Nzambi uvutulanga vo: ‘Konso una tulombela mun’owu wa luzolo luandi, [Yave] wa kekutuwá.’ (1 Yoane 5:14) Ikuma vo tufwete lombanga konso diambu dina ngwizani ye luzolo lwa Nzambi. Nga i luzolo lwandi vo twasambanga mu kuma kia mambu mekututokanesanga? Elo! O samba kwa Yave dilenda tezaniswa yo mokena ye nkundi eto. Muna ‘ziula ntima mieto’ kwa Nzambi tufwete vovanga kondwa wonga. (Nkunga 62:8) Disundidi o mfunu twalombanga mwand’avelela, kadi ukutusadisa mu vanga oma mansongi. (Luka 11:13) Tulenda lomba luludiku mpasi vo twabakanga nzengo zambote yo zizidila muna  ntangw’ampasi. (Yakobo 1:5) Vava tusumukanga, tufwete lombanga luloloko muna kimenga kia Yesu. (Efeso 1:3, 7) Kansi, ke tufwete sambanga kaka ko mu kuma kia mambu ma yeto kibeni. Tufwete yikanga mpe mambu m’akaka muna sambu yeto nze ma yitu ye ampangi zeto z’Akristu.—Mavangu 12:5; Kolosai 4:12.

12. Aweyi tulenda songela vo nkumbu a Yave ye Kintinu kiandi tusianga va fulu kiantete muna sambu yeto?

¹² Nkumbu a Yave ye Kintinu kifwete siwanga va fulu kiantete muna sambu yeto. Tuvwidi kuma yayingi muna kunkembelela yo kumvutula matondo muna wete wandi kevanganga. (1 Tusansu 29:10-13) Muna sambu kia S’eto ezulu kiasonama muna Matai 6:9-13, o Yesu watulonga mu sambanga vo e nkumbu a Nzambi yazitiswa, ediadi disongele vo ifwete veleleswa. (Tanga.) I bosi wavova vo e Kintinu kia Nzambi kiza, o luzolo lwandi lwavangama ova nza nze koko ezulu. Vava kamana vova oma ma Yave, Yesu wayika mana tuvwanga o mfunu mu zingu. Oyeto mpe avo tusianga Nzambi va fulu kiantete muna sambu yeto, tusonga vo ke wete dieto kaka ko tuvwanga o mfunu.

13. O Nkand’a Nzambi adieyi uvovanga mu kuma kia ntangwa ifwete zingila e sambu?

¹³ Ola kwa ifwete zingila e sambu yeto? O Nkand’a Nzambi kasikidisa ntangwa ko ifwete zingila e sambu. E sambu kia nkufi tusambanga muna ntangwa ya dia kiaswaswana ye sambu kia ndá tusambanga vava tulombanga mambu ma yeto kibeni kwa Yave. (1 Samuele 1:12, 15) Yesu watumba awana bayibadikilanga vo asongi, ana bayisonganga kw’akaka muna sambanga sambu ya ndá. (Luka 20:46, 47) O Yave ke yangalelanga e sambu yayi ko. Edi disundidi o mfunu e sambu kieto kifwete tukanga muna nsi a ntima. E ntangwa ifwete zingila e sambu iswaswananga muna mpila nsatu za muntu ye fulu kena.

14. O Nkand’a Nzambi adieyi usonganga vava kekutuzayisanga vo ‘nukwamanana muna sambu’? Ekuma dinina diakiese?

 ¹⁴ Nkumbu kwa tufwete sambanga? O Nkand’a Nzambi ukutukasakesanga vo ‘nukwamanana muna sambu’ ye “nuzizila muna sambu.” (Matai 26:41; Roma 12:12; 1 Tesalonika 5:17) E mvovo miami ke misonganga ko vo tufwete sambanga ola zawonso. Nkand’a Nzambi ukutukasakesanga vo twasambanga ntangwa zawonso kwa Yave mu vutula matondo muna wete kevanganga kwa yeto, mu lomba luludiku lwandi, lufiaulwisu ye nkum’andi. Nga ke diakiese ko wau tuzeye vo Yave kasikidisa ntangwa ko tufwete vovana yandi muna sambu? Avo tuzeye o mfunu a sambu, tusadila malau mawonso mekutulwakila muna samba kwa S’eto ezulu.

15. Ekuma tufwete vovelanga “amen” kuna mfoko a sambu kia yeto kibeni ye ki’akaka vana vena ndonga?

¹⁵ Ekuma tufwete vovelanga “amen” kuna mfoko a sambu? E mvovo wau “amen” usonganga vo “i wau kikilu” yovo “yambula diakala wowo.” (1 Tusansu 16:36; Nkunga 41:13) Vava tuvovanga vo “amen” kuna mfoko a sambu kia yeto kibeni, tusonganga vo e ndomba zeto za ziku. Vava tuvovanga vo “amen” mu ndinga a ngolo yovo kuna nsi a ntima muna sambu kia konso muntu vana vena ndong’ayingi, tusonganga vo tutondele mawonso kavovele.—1 Korinto 14:16.

16. Nkia vuvu tulenda kala kiau mu kuma kia sambu?

¹⁶ O Yave nga ovananga e mvutu za sambu? Elo. Tuvwidi kuma yayingi mu kala ye vuvu vo Yave “Owanga sambu” yo vana e mvutu za sambu ya mafunda ma wantu ilombwanga ye ziku kiawonso. (Nkunga 65:2) Yave ovananga mvutu za sambu yeto mu mpila za swaswana.

17. Ekuma tulenda vovela vo Nzambi osadilanga ambasi ye selo yandi ova nza mu vana mvutu za sambu yeto?

 ¹⁷ O Yave osadilanga mbasi ye selo yandi ova nza mu vana mvutu za sambu. (Ayibere 1:13, 14) Vena ye wantu ayingi balomba lusadisu kwa Nzambi muna sambu, mpasi vo babakula Nkand’a Nzambi ye ke kolo ko bakingulwa kwa selo ya Yave. Ekiaki i ziku kisonganga vo ambasi befilanga e salu kia samuna e nsangu za Kintinu. (Lusengomono 14:6) Muna vana mvutu za sambu yeto, o Yave nanga ofilanga Nkristu mosi mu kutusadisa muna  ntangw’ampasi.—Ngana 12:25; Yakobo 2:16.

18. O Yave aweyi kesadilanga mwand’andi avelela ye Nkand’a Nzambi muna vana mvutu za sambu ya selo yandi?

¹⁸ Yave osadilanga mpe mwand’andi avelela yo Nkand’a Nzambi mu vana mvutu za sambu ya selo yandi. Okutuvananga mpe tuludiku ye nkuma muna mwand’andi avelela vava tulombanga lusadisu mu zizidila e ntonta. (2 Korinto 4:7) Nkumbu miayingi ovananga mvutu za sambu yeto muna malongi ma Nkand’a Nzambi, kadi muna malongi mama o Yave okutusadisanga mu baka nzengo zambote. Lusadisu lwa Nkand’a Nzambi tulenda lo tambula mun’elongi dia yeto kibeni dia Nkand’a Nzambi ye vava tutanganga nkanda mia ntaudi akwikizi yo lulungalalu, nze i nkanda wau. Elongi dia Nkand’a Nzambi tuvwanga o mfunu nanga tulenda dio wila muna lukutakanu yovo muna mvutu za nkuluntu ona ovavanga sadisa ampangi muna nkutakani.—Ngalatia 6:1.

19. Adieyi tufwete sungamenanga vava e mvutu za sambu yeto zizingilanga?

¹⁹ Avo Yave ozingidi mu vana mvutu za sambu yeto, ke disongele ko vo kalendele yo vanina mvutu ko. Kansi, tufwete sungamenanga vo Yave ovananga e mvutu za sambu muna luzolo lwandi ye muna ntangw’andi. Ozeye nsatu zeto ye una kalenda zo lungisila ke mu yeto kibeni ko. Nkumbu miayingi ovavanga vo ‘twakwamanana  lomba yo dodela.’ (Luka 11:5-10) Muna kwamanana lombanga mu mpila yayi tusonganga kwa Nzambi vo e nsatu zeto za ziku ye lukwikilu lweto lwakieleka. Vana ntandu, o Yave olenda vana mvutu za sambu yeto mu mpila ina ke tubakulanga ko. Kasikil’owu, kalenda tambulwila e sambu kieto mu kuma kia ntonta, ke mu fokola zo ko, kansi muna kutukumika mu zizidila zo.—Tanga Filipi 4:13.

20. Ekuma tufwete toma sadilanga elau dia sambu?

²⁰ Nkia matondo tulenda vutula wau vo Mvangi a nsema wawonso ofinamanga awonso bekumbokelanga kuna ziku muna sambu! (Tanga Nkunga 145:18.) Wau vo tuvwidi elau diadi diampwena mu vovana yo Yave, yambula twasambanga ntangwa zawonso. Avo tuvanga wo, tukala ye kiese kia finama Yave Owanga e sambu.