1, 2. ¿Tiquʼn jun tbʼanel qoklen aju tuʼn qnaʼn Dios, ex tiquʼn ilxix tiʼj tuʼn tok qojtzqiʼn aju in tzaj t-xnaqʼtzaʼn Tyol Jehová tiʼj naʼj Dios?

TAL chʼinx in nela txʼotxʼ qa ma tzʼok qmojbʼan tukʼil tkyaqil tbʼinchbʼen Dios twitz kyaʼj. Ik in che ela qe tnam toj twitz Jehová, «aju bʼinchante kyaʼj ex txʼotxʼ», ik tzeʼn jun txut (txʼat) aʼ t-xeʼ jun kubʼet (Salmo 115:15; Isaías 40:15). Pero in tzaj tqʼamaʼn Xjan Uʼj (Biblia) qa «niqayin taʼ Qman kyiʼj qeju in che kubʼsan twitz, aqeju axix tok kyuʼn» ex kjapunel tuʼn «aju in kyqanin qeju in che niman te, ex ok t-xi kyqanin onbʼil te in che tzaj tbʼiʼn» (Salmo 145:18, 19). Ximana kyiʼj yol lu. Nqa (qayni) taʼ qMan Dios qiʼj, aju at tipumal tuʼn tbʼent tkyaqil tuʼn ex ok qo tzajel tbʼiʼn qa ma qo «kubʼsan twitz» ex qa «axix tok» (bʼanax) quʼn. ¡Tbʼanel qoklen at tuʼnju jaku qo yolin tukʼe Dios!

² Pero qa qaj (qgan) tuʼn ttzaj tbʼiʼn Jehová qnaʼj Dios, qo naʼl Dios ik tzeʼnj in tzaj tqʼamaʼn qe. Pero qa mitiʼ (tiloʼ) ojtzqiʼn quʼn tiʼ in tzaj t-xnaqʼtzaʼn Tyol Jehová tiʼj naʼj Dios, ¿alkye tten kbʼantel jlu quʼn? Tuʼntzunju, ilxix tiʼj tuʼn qxnaqʼtzan tiʼj naʼj Dios, quʼn in qo tzaj tonin tuʼn qxi laqʼeʼ ttxlaj Jehová.

3. Qʼamantza jun tiquʼn qo naʼl Dios te Jehová.

³ Jun tiquʼn qo naʼl Dios te Jehová tuʼnju a in tzaj qʼamante tuʼn tbʼent jlu quʼn. In tzaj tqʼamaʼn Tyol kyjalu: «Mi jun tuʼn tbʼaj kykʼuʼje tiʼj; tkyaqil kymanxe te Dios tuj kynaʼj Diose; kyqaninxe te, ax ikx kyqʼonxe chjonte te. Kyjaʼtzun kqebʼil kykʼuʼje tuʼn Dios; mas maʼ t-xilen jlu twitz tkyaqil kynabʼl xjal, tuʼn jlu kʼokel kwentin kyanmiye ex kyximbʼetze, tuʼnju at kymojbʼabʼl kyibʼe tukʼil Jesucrist» (Filipenses 4:6, 7). Mlayxle tzʼel qikʼen jun tbʼanel txokbʼil in tzaj tqʼoʼn Dios aju in Kawin tibʼaj tkyaqil.

4. ¿Tiquʼn in xi qqʼamaʼn qa kukx xqo naʼn Dios, jaku tzʼonin tuʼn tchʼiy qamiwbʼel tukʼe Jehová?

⁴ Juntl tiquʼn qo naʼl Dios, tuʼnju jaku chʼiy qamiwbʼel tukʼe Jehová. Aʼyeju xjal kyamiwxix kyibʼ in che yolin toj alkyexku ambʼil, tuʼnju at kykʼujlabʼil kyxol ex nya oʼkx qa kyaj jun onbʼil. In chʼiy kyamiwbʼel qa ma che yolin tiʼjju in kubʼ kyximen, tiʼjju in kynaʼn ex tiʼjju in tzaj bʼaj kykʼuʼj tuʼn. Chʼixme ax t-xilen qamiwbʼilju tukʼe Jehová. Tuʼnju onbʼil in tzaj tqʼoʼn uʼj lu ma tzʼok tojtzqiʼna tiʼ in tzaj t-xnaqʼtzan Xjan Uʼj tiʼj tmod ex t-xim Jehová. Ik in nelatl  Jehová toj twitza ik tzeʼn jun xjal tok ttxlaja. Aju naʼj Dios in najbʼen tuʼn t-xi tqʼamaʼna tkyaqil t-xima ex tkyaqilju tkuʼx toj tanmiya te qMan Dios. A jlu kʼonil tiʼja tuʼn tok laqʼeʼya mas ttxlaj (Santiago 4:8).

5. ¿Alkye yekʼbʼil at qa mitiʼ in che tzaj tbʼiʼn Jehová tkyaqil naʼj Dios?

⁵ ¿In tzaj tbʼiʼn Jehová tkyaqil naʼj Dios? Qbʼinx aju tzaj tqʼamaʼn kye aj Israel aʼyeju in kubʼtaq kybʼinchaʼn nya bʼaʼn toj tqʼijlal Isaías: «Ok tjaw kyqʼoʼn kyqʼabʼe twitz kyaʼj tuʼn kynaʼne Dios, mlay che tzaj nbʼiʼne, porque nojni kyiʼj kyqʼabʼe tuʼn chikʼ» (Isaías 1:15). A jlu in tzaj tyekʼun qa mitiʼ xkubʼ qbʼinchen aju tbʼanel toj twitz Jehová, mlayx tzaj tbʼiʼn qnaʼj Dios. Tuʼntzunju, qa qaj tuʼn qtzaj tbʼiʼn Jehová, ilxix tiʼj tuʼn tjapun junjun kawbʼil quʼn.

6. Tuʼn ttzaj tbʼiʼn Jehová qnaʼj Dios, ¿tiʼ ktel qe ex alkye tten kbʼel qyekʼun qa at jlu qe?

⁶ Tnejel ilxix tiʼj tuʼn tten qʼuqbʼil qkʼuʼj (kjawil uʼjit Marcos 11:24). Kubʼ ttzʼibʼen apóstol Pablo jlu: «Pero qa mintiʼ qokslabʼl mlayx tzalaj Dios qiʼj, porque qa taj xjal tuʼn tpon laqʼeʼ ttxlaj Dios, ilxix tiʼj tuʼn tokslan qa at Dios, ex qa a Dios in tzaj qʼonte jun oyaj kye qeju in che jyon tiʼj» (Hebreos 11:6). Pero tuʼn tten axix qʼuqbʼil qkʼuʼj nya oʼkx tuʼn tok qojtzqiʼn qa at Dios ex qa in che tzaj ttzaqʼweʼn qnaʼj Dios. Aju qʼuqbʼil qkʼuʼj in kubʼ qyekʼun tuʼn qbʼinchbʼen. Toj tkyaqil tten qanqʼibʼil kbʼel qyekʼun qa at qʼuqbʼil qkʼuʼj (Santiago 2:26).

7. a) ¿Tiquʼn kbʼel qiʼn qibʼ aj qyolin tukʼil Jehová? b) ¿Alkye tten in kubʼ qyekʼun qa in kubʼ qiʼn qibʼ ex qa in qo naʼn Dios tuʼn tkyaqil qkʼuʼj?

⁷ Tkabʼ ilxix tiʼj tuʼn tkubʼ qiʼn qibʼ aj qnaʼn Dios ex tuʼn t-xi qqʼamaʼn aju tkuʼx toj qanmi. Qa ma qo ximen, at nim (bʼampo) tiquʼn kbʼel qiʼn qibʼ aj qyolin tukʼil Dios. Qa ma yolin jun xjal tukʼe jun ajkawil, in kubʼ tiʼn tibʼ  tuʼnju ojtzqiʼn tuʼn qa at-xix toklen ajkawil lu. A jlu in tzaj tyekʼun qa mas kbʼel qiʼn qibʼ aj qyolin tukʼil Jehová (Salmo 138:6). Ax ikx tuʼnju ‹at tipumal tuʼn tbʼant tkyaqil tuʼn› (Génesis 17:1). Kbʼel qyekʼun tuʼn qyol qa mas chʼin qoklen twitz Jehová. Qa ma kubʼ qiʼn qibʼ atzenju kʼonil qiʼj tuʼn qnaʼn Dios tuʼn tkyaqil qkʼuʼj, ax ikx qo tzajel tonin tuʼn miʼ t-xi qqʼamaʼn ax qyolju (Mateo 6:7, 8).

8. ¿Tiʼ kbʼantel quʼn qa ma txi qqanin jun tiʼ toj qnaʼj Dios?

⁸ Toxin, qa qaj tuʼn ttzaj tbʼiʼn Jehová qnaʼj Dios, ok kʼokel tilil quʼn tuʼn tkubʼ qbʼinchaʼn aju in xi qqanin te. Jun techel, qa ma txi qqanin te Jehová: «Qʼontza qwaye jaʼlo», ok kʼokel tilil quʼn tuʼn tkubʼ qbʼinchaʼn alkyexku aqʼuntl qa bʼaʼn ex qa jaku bʼant quʼn (Mateo 6:11; 2 Tesalonicenses 3:10). Ax ikx, qa ma txi qqanin te Jehová tuʼn tkyaj qtzaqpiʼn jun nya bʼaʼn, il tiʼj tuʼn tel qpan qibʼ tiʼjju jaku qo kubʼ tzʼaq tuʼn (Colosenses 3:5). Pero nya oʼkx tuʼn tok qojtzqiʼn tiʼ kbʼantel quʼn tuʼn ttzaj bʼiʼn qnaʼj Dios, ax ikx qaj tuʼn tok qbʼiʼn tzaqʼwebʼil kyiʼj xjel (pregunta) che ul qanin tiʼj naʼj Dios.

9. ¿Alqe qo naʼl Dios ex al toj qbʼi?

⁹ ¿Alqe qo naʼl Dios? Kyaj t-xnaqʼtzaʼn Jesús naʼj Dios lu kye t-xnaqʼtzbʼen: «A[ya] Qman ata tuj kyaʼj» (Mateo 6:9). A jlu in tzaj tyekʼun qa oʼkx te Jehová qo naʼl Dios. Pero ax ikx taj Jehová tuʼn tok qojtzqiʼn alkye toklen Jesucristo aju oʼkxku jun tkʼwaʼl. Ik tzeʼnj o qo xnaqʼtzan tiʼj toj xnaqʼtzbʼil 5, tzaj t-samaʼn Jehová tkʼwaʼl tzalu twitz Txʼotxʼ tuʼn qtzaqpaj tiʼj il ex kyimen (Juan 3:16; Romanos 5:12). Ax ikx o tzʼok tqʼoʼn toklen te Tnejel Pal ex te Jwes (Juan 5:22; Hebreos 6:20). Tuʼntzen jlu, in tzaj tqʼamaʼn Tyol Dios tuʼn qnaʼn Dios toj tbʼi Jesús. Tqʼama Jesús qa ate bʼe, ate axix tok, ex ate chwinqlal, ax ikx tqʼama  jlu: «Mi aʼl jun xjal jaku pon tukʼil Dios Mambʼaj, qa mya wuʼne» (Juan 14:6). Tuʼn ttzaj bʼiʼn qnaʼj Dios, oʼkx qo naʼl Dios te Jehová ex toj tbʼi Jesús.

10. ¿Tiquʼn nya il tiʼj aju alkye tten tuʼn qkubʼ tten naʼl Dios?

¹⁰ ¿In tzaj qʼamaʼn alkye tten tuʼn qkubʼ ten naʼl Dios? Mitiʼ. Mitiʼ in tzaj tqʼamaʼn Jehová alkye ten tuʼn qkubʼ ten naʼl Dios. In tzaj tqʼamaʼn Tyol Dios qa at nim tten tuʼn qkubʼ ten naʼl Dios. Jaku bʼant tuʼn tnaʼn Dios jun xjal qʼuqli, mokʼle, mejli ex waʼl (Nehemías 2:4; 8:6; Daniel 6:10). Nya mas nim toklen aju alkye tten tuʼn qkubʼ ten naʼl Dios, quʼn aju mas nim toklen aju qa in qo naʼn Dios tuʼn tkyaqil qkʼuʼj. Axpe ikx jaku qo naʼn Dios naq toj qanmi, jaxku tumel, qa in qo aqʼunan toj qaqʼen moqa aj ttzaj jun nya bʼaʼn qiʼj. At maj nya qʼanchaʼl toj kywitz xjal aj qnaʼn Dios, pero in qo tzaj tbʼiʼn Jehová (Nehemías 2:1-6).

11. ¿Tiʼ kxel qqanin toj qnaʼj Dios?

¹¹ ¿Tiʼ kxel qqʼamaʼn toj qnaʼj Dios? In tzaj tqʼamaʼn Tyol Dios jlu: «Qa at jun ma txi qqanin te Dios ik tzaʼnx ju tajbʼil, in qo tzaj tbʼiʼn» (1 Juan 5:14). A jlu in tzaj tyekʼun qa jaku txi qqʼamaʼn tiʼxku toj qnaʼj Dios, pero aju at toklen tukʼe tajbʼil Dios. Jun techel, taj Jehová tuʼn t-xi qqʼamaʼn aju in tzaj bʼaj qkʼuʼj tuʼn. Aj qyolin tukʼe Jehová toj naʼj Dios, ikxix tten jlu ik tzeʼn aj qyolin tukʼe jun tbʼanel qamiw. Jaku txi qqʼamaʼn ‹tuʼn tkyaqil qkʼuʼj› aju in qnaʼn› (Salmo 62:8). Ax ikx jaku txi qqanin xewbʼaj xjan te Jehová tuʼn qtzaj tonin tuʼn tkubʼ qbʼinchen aju tbʼanel (Lucas 11:13). Ax ikx kxel qqanin tuʼn ttzaj tyekʼun alkye kbʼantel quʼn ex tuʼn ttzaj tqʼoʼn qipun (qbʼalor) tuʼn tikʼx tkyaqil nya bʼaʼn quʼn (Santiago 1:5). Qa ma kubʼ qbʼinchaʼn jun il, kxel qqanin te Jehová tuʼn tkubʼ tnajsaʼn qil tuʼnju qʼuqle qkʼuʼj tiʼj tkyimlen Jesucristo (Efesios 1:3, 7). Pero nya oʼkx qo naʼl Dios qiʼjx, ax ikx qo naʼl Dios kyiʼj txqantl xjal, ik tzeʼn qeju at kyxilen  qukʼe ex kyiʼj txqantl qerman (Hechos 12:5; Colosenses 4:12).

12. ¿Tiʼ kbʼantel quʼn tuʼn tkubʼ qqʼoʼn aju at toklen tukʼe Jehová tnejel toj qnaʼj Dios?

¹² Aju mas tuʼn t-xi qqanin toj qnaʼj Dios aju at toklen tukʼe Jehová. At nim tiquʼn kjawil qnimsaʼn tuʼn tkyaqil qanmi ex tuʼn t-xi qqʼoʼn chjonte te tuʼnju tbʼanelxix te qukʼil (1 Crónicas 29:10-13). Toj naʼj Dios kyaj t-xnaqʼtzaʼn Jesús, kyaj tqʼamaʼn tuʼn t-xi qqanin tuʼn tok tbʼi Dios te xjan, moqa tuʼn tok te saq, ax ikx tuʼn t-xi qqanin tuʼn tul tKawbʼil Dios ex tuʼn tbʼant tajbʼil tzalu twitz Txʼotxʼ ik tzeʼnj in bʼent toj kyaʼj (kjawil uʼjit Mateo 6:9-13, ATM). Qa ma tzʼok qqʼoʼn qwiʼ tiʼj, tnejel xi tqʼamaʼn Jesús aju at toklen tukʼil Jehová ex yajxitl xi tqʼamaʼn aju at toklen qukʼe. Qa a Jehová mas nim toklen toj qnaʼj Dios, ax ikx kbʼel qyekʼun qa nya oʼkx in qo ximen tiʼjju at tajbʼen qe.

13. ¿Tiʼ in tzaj tqʼamaʼn Tyol Dios tiʼj jniʼ ambʼil kxel tiʼn tuʼn qnaʼn Dios?

¹³ ¿Jniʼ ambʼil kxel tiʼn tuʼn qnaʼn Dios? Mitiʼ in tzaj tqʼamaʼn Tyol Dios jniʼ ambʼil qo naʼl Dios, qa qjunalx moqa kyxol txqantl. At maj naq chʼin tqan, ik tzeʼn aj qwaʼn, moqa nim tqan, ik tzeʼn aj t-xi qqʼamaʼn qjunalx tkyaqilju tkuʼx toj qanmi te Jehová (1 Samuel 1:12, 15). Tqʼama Jesús qa nyataq bʼaʼn in bʼent kyuʼn xjal aʼyeju nimtaq toj in che naʼn Dios naq tuʼn tok kyqʼoʼn xjal kywitz kyiʼj (Lucas 20:46, 47). Nya nim toklen jlu toj twitz Jehová. Aju mas nim toklen aju qa ma qo naʼn Dios tuʼn tkyaqil qkʼuʼj. Kyjuʼtzun, aju jniʼ ambʼil kxel tiʼn tuʼn qnaʼn Dios at toklen tukʼilju at tajbʼen qe ex tukʼilju jatumel atoʼ.

14. Qʼamantza tiʼ t-xilenju yol «[kukx] che naʼne Dios» ex tiʼ qoklen at.

¹⁴ ¿Jteʼ maj qo naʼl Dios? In tzaj tqʼamaʼn Tyol Dios qe: «[Kukx] che naʼne Dios», ex «miʼn che qʼajene tuʼn kynaʼne Dios» (Mateo 26:41; Romanos 12:12; 1 Tesalonicenses 5:17). A jlu mitiʼ in tzaj tyekʼun qa qo naʼl Dios  enter qʼij ex enter qonikʼan. Quʼn ate jlu t-xilen qa qo naʼl Dios tkyaqil qʼij tuʼn t-xi qqʼoʼn chjonte te Jehová tuʼnju in tzaj tqʼoʼn tkyaqil tbʼanel qe ex tuʼn t-xi qqanin tuʼn ttzaj tyekʼun qbʼe, tuʼn ttzaj tqʼuqbʼaʼn qkʼuʼj ex tuʼn ttzaj tqʼoʼn qipun tuʼn tikʼx tkyaqil nya bʼaʼn quʼn. ¡Tbʼanelxix te jlu! In tzaj tqʼoʼn Jehová ambʼil qe tuʼn qyolin tukʼil toj tkyaqil maj ex jniʼxku ambʼil. Qa nim toklen qe aju tuʼn qyolin tukʼe qMan Dios, ok kkanetel ambʼil quʼn tuʼn qnaʼn Dios.

15. ¿Tiquʼn kxel qqʼamaʼn «ikxwitju» aj qbʼaj naʼn Dios qjunalx moqa kyxol txqantl?

¹⁵ ¿Tiquʼn kxel qqʼamaʼn «ikxwitju» aj qbʼaj naʼn Dios? At yekʼbʼil tkuʼx toj Tyol Dios qa bʼaʼn tuʼn t-xi qqʼamaʼn «ikxwitju» aj qbʼaj naʼn Dios qjunalx moqa kyxol txqantl xjal (1 Crónicas 16:36; Salmo 41:13). Aj t-xi qqʼamaʼn «ikxwitju» qjunalx, in kubʼ qyekʼun qa ax tok aju ma txi qqʼamaʼn toj qnaʼj Dios. Aj t-xi qqʼamaʼn kyxol txqantl xjal (qa naq toj qanmi moqa tukʼe tqʼajqʼajel qwiʼ) in kubʼ qyekʼun qa bʼaʼn in nela toj qwitz aju ma txi qanin toj naʼj Dios.

16. ¿Tiʼ qʼuqbʼil qkʼuʼj at aj qnaʼn Dios?

¹⁶ ¿In che tzaj ttzaqʼweʼn Jehová qnaʼj Dios? ¡In che tzaj ttzaqʼweʼn! At nim tiquʼn kʼokel qʼuqeʼ qkʼuʼj qa ‹in tzaj tbʼiʼn Dios aju qnaʼj Dios›, in tzaj ttzaqʼweʼn kynaʼj Dios nimxix xjal aju ax tok kyuʼn (Salmo 65:2). At nim tiʼ in najbʼen tuʼn, tuʼn kytzaj ttzaqʼweʼn qnaʼj Dios.

17. ¿Tiquʼn jaku txi qqʼamaʼn qa in che ajbʼen qe anjel tuʼn Jehová ex qe xjal aʼyeju in che ajbʼen te tuʼn ttzaj ttzaqʼweʼn qnaʼj Dios?

¹⁷ Jun tten tzeʼn in che tzaj ttzaqʼweʼn Jehová qnaʼj Dios aju in che ajbʼen qe anjel tuʼn ex qe xjal aʼyeju in che ajbʼen te (Hebreos 1:13, 14). Aʼyeju xjal in che naʼntaq Dios tuʼn tok Tyol Dios toj kywiʼ, yajxi chʼintl, pon jun ajbʼel te Jehová onil kye. A jlu in tzaj tyekʼun qa aʼye anjel nejniqe  tuʼn t-xi pakbʼet aju tbʼanel tqanil tiʼj tKawbʼil Dios (Apocalipsis 14:6). Ax ikx qa ma qo ok weʼ twitz jun nya bʼaʼn ex qa qaj onbʼil, jaku tzʼajbʼen jun qerman tuʼn Jehová tuʼn ttzaj ttzaqʼweʼn qnaʼj Dios (Proverbios 12:25; Santiago 2:16).

18. ¿Alkye tten in najbʼen xewbʼaj xjan ex Xjan Uʼj tuʼn Jehová tuʼn kytzaj ttzaqʼweʼn kynaʼj Dios qeju in che ajbʼen te?

¹⁸ Ax ikx in najbʼen xewbʼaj xjan ex Xjan Uʼj tuʼn Jehová tuʼn kytzaj ttzaqʼweʼn qnaʼj Dios. Qa ma txi qqanin onbʼil te tuʼn tkyaj jun nya bʼaʼn quʼn toj tbʼanel,  jaku tzʼajbʼen xewbʼaj xjan tuʼn qtzaj tonin ex tuʼn ttzaj tqʼoʼn qipumal (2 Corintios 4:7). Ex aj qnaʼn Dios tuʼn tkubʼ qximen tiʼ kbʼantel quʼn, nim maj in najbʼen Xjan Uʼj tuʼn Jehová tuʼn ttzaj ttzaqʼweʼn aju in xi qqanin. Aj qxnaqʼtzan qjunalx tiʼj Tyol Dios atle maj jaku che kanet texto quʼn aju jaku qo tzaj kyonin, ax ikx jaku kanet onbʼil quʼn qa ma che kubʼ quʼjin uʼj o che etz tuʼn tnam Jehová, ik tzeʼn uʼj lu. Ax ikx jakulo che tzaj naʼn junjun kawbʼil qe aʼyeju ateʼkux toj Tyol Dios, jakule che tzaj naʼn jlu qe toj jun chmabʼil moqa aj qtzaj kawin tuʼn jun ansyan aju kʼujlaʼn qoʼ tuʼn (Gálatas 6:1).

19. ¿Tiʼ tzul qnaʼn qa at maj in kubʼ qximen qa mitiʼ in tzaj ttzaqʼweʼn Jehová qnaʼj Dios?

¹⁹ At maj jakulo kubʼ qximen qa yaj in tzaj ttzaqʼweʼn Jehová qnaʼj Dios, pero mitiʼ in tzaj tyekʼun jlu qa mitiʼ in bʼant tuʼn ttzaj ttzaqʼweʼn qnaʼj Dios. Bʼaʼn tuʼn ttzaj qnaʼn qa ktzajel ttzaqʼweʼn Jehová qnaʼj Dios toj ambʼil aju mas tbʼanel in nela toj twitz. Ojtzqiʼn tuʼn alkye qaj ex tzeʼn jaku tzaj tqʼoʼn aju at tajbʼen qe. At maj taj tuʼn kukx t-xi ‹qqanin, tuʼn kukx qjyon ex tuʼn kukx tok qqʼajtzaʼn›, moqa qtukʼchaʼn (Lucas 11:5-10). Qa ma bʼent jlu quʼn, ok kbʼel qyekʼun qa qajxix tuʼn qtzaj ttzaqʼweʼn Jehová ex qa  ax tok qʼuqbʼil qkʼuʼj. Ax ikx at maj nya qʼanchaʼl aj ttzaj ttzaqʼweʼn Jehová qnaʼj Dios. Jun techel, qa ma txi qqanin te tuʼn qtzaj tonin aj qok weʼ twitz jun nya bʼaʼn, at maj mlay tzʼel tiʼn pero jaku tzaj tqʼoʼn qipun tuʼn tikʼx quʼn (kjawil uʼjit Filipenses 4:13).

20. ¿Tiquʼn kukx qo naʼl Dios?

²⁰ In xi qqʼoʼn chjonte teju Bʼinchel tkyaqil, tuʼnju nqa taʼ kytxlaj kykyaqil qeju in che naʼn Dios ik tzeʼn taj (kjawil uʼjit Salmo 145:18). Tuʼntzunju, kukx qjyom ambʼil tuʼn qnaʼn Dios. Qa ma bʼent jlu quʼn, ok qo tzalajel quʼn ok kʼelel qnikʼ qa kukx qo okel laqʼeʼ ttxlaj Jehová aju in tzaj Tbʼiʼn qnaʼj Dios.