1, 2. ¿Tiko mëj nnayjäˈäwëm ko mbäädë Jyobaa nmënuˈkxtakëm, ets tiko jyëjpˈamëty nnijäˈäwëm wiˈixë Biiblyë tyukniˈˈixë nuˈkxtakëm?

TYÄˈÄDË Naxwinyëdë mä ntsënäˈäyëm tim mutsk kyëxëˈëky ko yaˈijxkijpxyë mët tukëˈëyë diˈibë Dios të dyajkojy. Jyobaa diˈib “yajkoj ja tsäjp, [etsë] naxwinyëdë”, duˈun tˈixyë may jyaˈay abëtsemy nyaxwinyëdë extëm tuk tsunyë nëë mä tuˈugë kubetë (Diˈibʉ Jatanʉp o Apocalipsis 14:7; Isaías 40:15). Perë Biiblyë jyënaˈany: “Jyobaa wingon yajpääty mä pënaty mmëgäjpxëp, mä pënaty mmëgäjpxëp tëyˈäjtën myëët. Pënaty tsëˈkëdëp myoˈoyaampy tijaty tsyojkënyëˈäjttëp, ets myëdowaampy ko yaˈˈamdowët ja naybyudëkë” (Salmo 145:18, 19). Okwinmay wiˈixë tyäˈädë tekstë nyikejy. Jyobaa diˈib tukëˈëyë mëkˈäjtën myëdäjtypy wingon yajpääty mä ëtsäjtëm, ets “myëdowaampy ko yaˈˈamdowët ja naybyudëkë”. ¡Mëj njantsy nyayjäˈäwëm ko mbäädë Jyobaa nmënuˈkxtakëm!

² Per pën ntsojkëm etsë Jyobaa tmëdowëdë nuˈkxtakën, tsojkëp nmëgäjpxëm extëm yëˈë ttseky. Per ¿wiˈix  nmënuˈkxtakëm extëm yëˈë ttseky pën kyaj nnijäˈäwëm wiˈixë Biiblyë tyukniˈˈixë? Wenë, jëjpˈam ets nnijäˈäwëm, pes net niˈigyë Jyobaa nmëwingoˈonëm ko nmënuˈkxtakëm.

3. Oknigäjpx tuk pëky tiko jyëjpˈamëty nmënuˈkxtakëmë Jyobaa.

³ Tuk pëky tiko jyëjpˈamëty nmënuˈkxtakëmë Jyobaa, yëˈko yëˈë duˈun xyˈanmäˈäyëm. Mä yˈAyuk jyënaˈany: “Katë may mdäjtë ninäˈä. Niˈigyë bom bom xyˈamdow xypyëjktsowëdë Dios diˈibë mdëgoyˈäjtxëdëp. Es anëëmë nandëˈën, “dyoskujuyëp”. Pes, netë Dios moˈoyëdët yëˈë tiˈigyëˈat diˈibë waanë niˈigë myëjëty, këdiinëm diˈibë jäˈäy mbäät tjaygyukë. Esë tyäˈädë tiˈigyëˈat kyuwäˈänëbë mjot mwinmäˈäny tiˈigyë mëdë Jesukristë” (Filipʉs 4:6, 7, OTJ). Seguurë ko mijts mënuˈkxtäˈägaambyë Jyobaa diˈib tukëˈëyë të dyajkojtäˈäy, pes yëˈë diˈib duˈun xyˈanmäˈäyëm.

4. ¿Tiko mbäät njënäˈänëm ko pën nuˈkxtakëm xëmë ta niˈigyë Jyobaa nmëwingoˈonëm?

⁴ Jëjpˈam nanduˈun ets xëmë nmënuˈkxtakëmë Jyobaa, pes ko duˈun nduˈunëm ta niˈigyë kyëktëkëdë naymyayë mët yëˈë. Diˈibë jäˈäy oy naymyaayëdëp kyaj jaayë nyaymyëgäjpxëdë ko ti ttsoktë, janäämëty nyaymyëgäjpxëdë, pes naynyijawëyanëdëp nixim niyam. Ets niˈigyë kyëktëkë nyaymyayë ko nyaytyukmëtmaytyäˈägëdë ti wyinmääytyëp, ti jyäˈäwëdëp ets ti myëmääy myëdäjtëp. Nanduˈunën jyaty ko mëdë Jyobaa nnaymyaˈayëm. Mët yëˈëgyëjxmë tyäˈädë liibrë etsë Biiblyë mijts të xynyijawë kajaa wiˈixë Jyobaa jyaˈayˈaty ets ti tyuknibëjtakëp. Mˈijxypyë netë Jyobaa Dios extëm tuˈugë jäˈäy. Pääty ko mnuˈkxtäˈägët mbäädë  Jyobaa xytyukmëtmaytyaˈaky ti mwinmaapy ets ti mjäˈäwëp mä mjot mgorasoon. Ets duˈuntsoo niˈigyë xymyëwingonët (Santya̱ˈa̱gʉ 4:8).

5. ¿Tiko njënäˈänëm ko Jyobaa kyaj tmëdoowdäˈäy tukëˈëyë nuˈkxtakën?

⁵ ¿Myëdoowˈijtypyë Jyobaa tukëˈëyë nuˈkxtakën? Okˈix wiˈix ojts yaˈˈanëëmëdë ja israelitëty diˈib kyaj ojts myëdowdë mä jyukyˈajtyë Isaías: “Oy kanäkˈok mjanuˈkxtäˈäktët, kyajts nmëdoy; të mˈääw mgëˈë pyatäˈäyëdë nëë neˈpyny” (Isaías 1:15). Pën kyaj njukyˈäjtëm extëmë Dios ttseky, ta kyaj tmëdowëdë nuˈkxtakën. Pääty min nˈokˈijxëm tijaty tsojkëp parë Dios tmëdowëdë nuˈkxtakën.

6. Parë Dios tmëdowëdë nuˈkxtakën, ¿ti tsojkëp nmëdäjtëm, ets wiˈix nyajnigëxëˈkëm?

⁶ Tuk pëky diˈib jëjpˈam mbäät nmëdäjtëm yëˈë mëbëjkën parë Jyobaa tmëdowëdë nuˈkxtakën (käjpxë  Markʉs 11:24). Apostëlë Pablo ojts tkujayë: “Kyaj pën mbäät ttukjotkëdaˈaky ja Dios pën kyaj tmëbeky, jaˈa ko pën myëwingeempy ja Dios, koonëm tmëbëkët ko jyaaty ja Dios es ko kyuniˈxypy diˈibaty yˈëxtääytyëp” (Ebreeʉsʉty 11:6). Per kyaj jeˈeyë tsyekyëty nmëbëjkëm ko jyamëtyë Dios diˈib myëdoowˈijtypyë nuˈkxtakën ets yˈatsoowëmbijtypy. Tsojkëp yajxon nyigëxëˈëgët mä jukyˈäjtën ko nmëdäjtëmë mëbëjkën (Santya̱ˈa̱gʉ 2:26).

7. 1) ¿Tiko mbäädë Jyobaa nmëgäjpxëm mëdë wintsëˈkën? 2) ¿Wiˈix nyaˈijxëm ko nuˈkxtakëm mët tukëˈëyë jot korasoon ets mëdë tudaˈakyˈat?

⁷ Ja tuk pëky diˈibë Jyobaa tsyejpy parë tmëdowëdë nuˈkxtakën, yëˈë ets nmëgäjpxëm yujy tudaˈaky ets amumduˈukjot. Kanäk pëky jyaˈˈaty tiko mbäät nmëgäjpxëmë Dios yujy tudaˈaky, ¿këdii? Extëm ko tuˈugë jäˈäy tmëgajpxy mëdë wintsëˈkën tuˈugë presidentë o yajkutujkpë, pes yˈëxkajpy ko këjxmë kutujkën tmëdaty. Nanduˈunë Jyobaa yëˈë niˈigyë pyaatyëty ets nmëgäjpxëm mëdë wintsëˈkën (Salmo 138:6). Pes yëˈë duˈunë “Dios diˈibë tëgekyë mëkˈäjtën myëdäjtypy” (2 Korintʉ 6:18). Wiˈix nmëgäjpxëmë Jyobaa ja nyigëxëˈëgäˈäny ko nˈëxkäjpëm ko yëˈë niˈigyë myëjjëty. Ets pën nmëjˈijxëm, ta nmënuˈkxtakëm mët winë jot korasoon ets kyaj agëbajky nmëgäjpxëm o natim yëˈëyëm nnijëmbijt niˈadëjëm (Matewʉ 6:7, 8).

8. ¿Wiˈix mbäät nguytyuˈunëm diˈibë Jyobaa nˈamdoˈowëm?

⁸ Ja tuk pëky parë Dios tmëdowëdë nuˈkxtakën, tsojkëp nduˈunëmë mëjääw parë nguytyuˈunëm ti nˈamdoˈowëm. Extëm nˈokpëjtakëm, pën të Jyobaa nˈanmäˈäyëm “mmooytyëgëts mä tyäˈädë xëëw tijëts ngaytyëp”, tsojkëbë net mëk nduˈunëm ko tuunk nbatëm diˈib mbäät nduˈunëm (Mateo 6:11, TNM;  2 Tesalónikʉ 3:10). Nanduˈun pën nˈanmäˈäyëmë Jyobaa parë xypyudëjkëm ets kyaj nekytyuˈunëm diˈib xëmë xyajtëgoˈoyëm, ta net njëjpkudijëm tukëˈëyë diˈib mbäät xyajkäˈäjëm (Kolosʉ 3:5). Të net nnijäˈäwëm ti tsojkëp nduˈunëm parë Dios tmëdowëdë nuˈkxtakën, minë net nˈaknijäˈäwëm wiˈix yˈoyëty nuˈkxtakëm.

9. ¿Pën diˈib mbäät nmënuˈkxtakëm, ets pën xyëëgyëjxm mbäät nmëgäjpxëm?

⁹ ¿Pën diˈib mbäät nmënuˈkxtakëm? Yëˈëyë Jyobaa Dios diˈib mbäät nmënuˈkxtakëm. Jesus duˈun ojts ttukniˈˈixë yˈëxpëjkpëty ets nyuˈkxtäˈäktët: “NDeetyˈäjtëm mä mˈity jam tsäjpotm” (Mateo 6:9, TNM). Perë Jyobaa tsyejpy ets nˈëxkäjpëm ja kutujkën diˈibë Jesukristë myëdäjtypy. Pes extëm të nˈijxëm mä kapitulo 5, Jyobaa ojts tkexyë yˈUˈunk yä Naxwiiny parë xyaˈˈawäˈätspëtsëˈëmëm mä poky ets mä oˈkën (Fwank 3:16; Romanʉs 5:12). Jyobaa nan ojts tmoˈoyë Jesusë kutujkën ets tyunët Saserdotë Wintsën ets Fes parë tijaty tpayoˈoyët (Fwank 5:22; Ebreeʉsʉty 6:20). Päätyë Biiblyë jyënaˈany ets nuˈkxtakëm xyëëgyëjxmë Jesus. Pes yëˈë ojts jyënaˈany: “Ëjtsë dëˈën extëm tuˈugë tuˈu, ëjtskyëjxmë jäˈäy jyäˈttë mä Dios teety, ëjtskyëjxmë jäˈäy tnijawëdë ja tëyˈäjtën, ëjtskyëjxmë jäˈäy jyikyˈattë. Nipën kyajäˈty mä Dios Teety pën kyajts ëj xymyëbeky” (Fwank 14:6). Pääty parë Jyobaa tmëdowëdë nuˈkxtakën, tsojkëp yëˈëyë nmënuˈkxtakëm ets nmëgäjpxëm xyëëgyëjxmë Jesus.

10. ¿Tiko kyaj nyaˈˈanmäˈäyëm wiˈix naybyëjtakëm ko nmëgäjpxäˈänëmë Jyobaa?

¹⁰ ¿Yajnigäjpxp wiˈix mbäät naybyëjtakëm ko nmëgäjpxäˈänëmë Jyobaa? Kyaj, Jyobaa kyaj tnigajpxy  wiˈix nbëjtakëmë ääw këˈë o niniˈkx këbäjk ko nmënuˈkxtäˈägäˈänëm. Biiblyë tyukniˈˈixë ko kanäk pëky jyaˈˈaty wiˈix mbäät nuˈkxtakëm, mbäät tanë, uˈunyë, windäˈäk o koxtanë (1 Crónicas 17:16; Nehemías 8:6; Daniel 6:10). Diˈib niˈigyë tsobatp yëˈë ko oyë jot winmäˈäny nmëdäjtëm ko nmënuˈkxtakëmë Dios, ets kyaj yëˈëjëty wiˈix naybyëjtakëm parë jeˈeyë jäˈäy ndukˈijxëm. Mbäät nuˈkxtakëm jodoty winmäˈänyoty ets oy tyim määjëty, extëm mä tuunk ayoˈon nˈijxëm o ko ajotkumonë ayoˈon jotmay nbatëm. Jyobaa myëdoopy ko nmënuˈkxtakëm oy nipën tkapëkëdë kuentë ko nmëgäjpxëm (Nehemías 2:1-6).

11. ¿Tijaty mbäät ninuˈkxtakëm?

¹¹ ¿Tijaty mbäät ninuˈkxtakëm? Mä Biiblyë jyënaˈany: “Kyaj ntsëˈk njäˈäm ko nˈamdoˈom ti ja Dios, mët ko nijäˈäm ko ti nˈamdoˈom diˈibë ijtp tiˈigyë diˈibë yëˈë tsyejpy, yëˈë xymyëdoˈom” (1 Fwank 5:14). Pääty mbäät nˈamdoˈowëm tijatyë Jyobaa, per yëˈë diˈib tuˈugyëp mëdë tsyojkën. Extëm nˈokpëjtakëm, ¿tsyejpyëdaa Dios ets ndukmëtmaytyakëmë amay jotmay? ¡Tiko këdii! Ko nmënuˈkxtakëmë Jyobaa duˈunxyëp extëm nmëtmaytyakëm tuˈugë mëtnaymyaayëbë diˈib mëk ntsojkëm. Mbäät ndukmëtmaytyakëm tukëˈëyë diˈib njäˈäwëm (Salmo 62:8). Oy ko nanduˈunë Jyobaa nˈamdoˈowëmë myëjääw parë xypyudëjkëm ets nduˈunëmë oyˈäjtën (Lukʉs 11:13). Nanduˈun parë xywyinmäˈänymyoˈoyëm ets oy tijaty nduˈunëm, ets xymyoˈoyëmë mëkˈäjtën parë nmëmadakëmë amay jotmay (Santya̱ˈa̱gʉ 1:5). Ko nbokytyuˈunëm, nan tsojkëbë Jyobaa nmënuˈkxtakëm parë xypyokymyaˈkxëm mët yëˈëgyëjxm ja mëbëjkën diˈib nmëdäjtëm ko Jesukristë  ojts xykyuˈoˈkëm (Éfesʉ 1:3, 7). Per kyaj jeˈeyë nnaynyinuˈkxtakëm, tsojkëp ets nanduˈun ninuˈkxtakëmë wiink jäˈäy, extëmë jiiky mëguˈuk o diˈib mëët tuˈugyë nDiosmëduˈunëm (Apostʉlʉty 12:5; Kolosʉ 4:12).

12. ¿Wiˈix nyaˈijxëm mä nuˈkxtakën ko nbëjtakëm jëjpˈam diˈibë Jyobaa jyaˈäjtypy?

¹² Diˈib niˈigyë jëjpˈam mbäät ninuˈkxtakëm yëˈë diˈibë Jyobaa jyaˈäjtypy. Kanäk pëky jyaˈˈaty tiko mbäädë Jyobaa nmëjkumäˈäyëm mët tukëˈëyë jot korasoon, ets nmoˈoyëmë dyoskujuyëm mët ko yˈoyjyaˈayëty (1 Crónicas 29:10-13). Jesus yajxon ojts tnigajpxy wiˈix mbäät nuˈkxtakëm. Diˈib jawyiin ojts tnigajpxy yëˈë ets yajninuˈkxtäägëdë Diosë xyëëw ets wyäˈätsët o yajwintsëˈëgët (käjpxë Mateo 6:9-13, TNM). Ta net yaˈˈamdowët ets myinët ja Diosë yˈAnaˈam Kyutujkën ets yajtunët ja tsyojkën yä Naxwiiny duˈun extëm jam tsäjpotm. Extëm nbëjkëmë kuentë, Jesus jawyiin ojts tnigajpxy ets yaˈˈamdowët tijatyë Jyobaa tsyojkënyëˈajtypy, ets ok tijaty xytyëgoyˈäjtxëm. Pën ëtsäjtëm yëˈë jawyiin ninuˈkxtakëm diˈibë Jyobaa jyaˈäjtypy, yëˈë nety nyaˈijxëm ko kyaj jeˈeyë nˈamdowäˈänëm tijaty ëtsäjtëm ndukˈoyˈäjtëm.

13. ¿Wiˈix tnigajpxyë Biiblyë nuˈun mbäät jyekyë nuˈkxtakën?

¹³ ¿Nuˈun mbäät jyekyë nuˈkxtakën? Mä Biiblyë kyaj tnigajpxy nuˈun mbäät jyekyë nuˈkxtakën diˈib nduˈunëm naytyuˈuk o mëdë mayjyaˈay. Mbäät kon extëm ko ngayäˈänëm o jeky extëm ko anaytyuˈuk ndukmëtmaytyakëmë Jyobaa tukëˈëyë ti njäˈäwëm mä jot korasoon (1 Samuel 1:12, 15). Jesus axëëk ojts tˈixy ko nääk ja jäˈäyëty jantsy jeky nyuˈkxtaktë jeˈeyë parë jäˈäy yˈixëdët (Lukʉs 20:46, 47). Jyobaa  kyaj tmëjpëjtaˈagyë duˈumbë nuˈkxtakën. Diˈib niˈigyë tsobatp, yëˈë ko nuˈkxtakëm mët winë jot korasoon. Niduˈuk niduˈuk nnijäˈäwëm nuˈun nuˈkxtäˈägäˈänëm, mbäät jeky o mbäät kon, pes wiˈixëm nyaˈijx nyajpatëm.

14. Oknigäjpx tidën yˈandijpy ko Biiblyë jyënaˈany “mˈawdattëbë Dios janääm jatsojk”, ets ti jotkujkˈäjtën mbäät njäˈäwëm.

¹⁴ ¿Winnäˈäjaty mbäät nuˈkxtakëm? Mä Biiblyë jyënaˈany: “Bom bom niduˈuk niduˈuk miits mbäät mgäjx mmaytyäˈäktë mëdë Dios”. Ja tuk pëky jyënaˈany: “Mˈawdattëbë Dios janääm jatsojk oytyim määty mˈittët” (Kolosʉ 4:2, OTJ; 1 Tesalónikʉ 5:17, OTJ). Tyäˈädë kyaj yëˈë tmaytyaˈaky ko xënaxyë net ndimnuˈkxtakëm. Yëˈë duˈun yˈandijpy ko jabom jabomë Jyobaa nmënuˈkxtakëm parë nmoˈoyëmë dyoskujuyëm mët ko yˈoyjyaˈayëty, ets nˈanmäˈäyëm parë xynyëˈëmoˈoy xytyuˈumoˈoyëm, xyjotkujkmoˈoyëm ets xymyoˈoyëmë jot mëjääw. ¡Jantsy jotkujk nnayjäˈäwëm ko mbäädë Jyobaa nmënuˈkxtakëm näkˈok ndimtsojkëm ets nuˈun ndimˈyajakäˈänëm! Pën nmëjjäˈäwëm ko mbäät duˈunë Jyobaa nmëgäjpxëm, ta njuˈtëmë tiempë parë nmënuˈkxtakëm.

15. ¿Tiko mbäät njënäˈänëm “amen” ko nyajkëjxëmë nuˈkxtakën diˈib nduˈunëm naytyuˈuk ets diˈib yajtuump mëdë mayjyaˈay?

¹⁵ ¿Tiko mbäät njënäˈänëm “amen” ko nyajkugëjxëmë nuˈkxtakën? Tyäˈädë ayuk “amen” nyikejy “duˈunˈatëbë duˈun” o “waˈan duˈunëty”. Mä Biiblyë tap dyakyë ijxpajtën ko oy ko njënäˈänëm “amen” ko nyajkugëjxëmë nuˈkxtakën, oyë nety të nmëgäjpxëmë Dios naytyuˈuk o mëdë mayjyaˈay (1 Crónicas 16:36; Salmo 41:13). Ko naytyuˈuk nuˈkxtakëm ets njënäˈänëm “amen”, yëˈë nety nyaˈijxëm ko winë ääw winë  jot të nuˈkxtakëm. Ets ko njënäˈänëm “amen” mä të kyexy tuˈugë nuˈkxtakën diˈib të yajtuny mëdë mayjyaˈay, yëˈë nety nyaˈijxëm ko nanduˈun njënäˈänëm (1 Korintʉ 14:16).

16. Ko nmënuˈkxtakëmë Jyobaa, ¿mä ti mbäät nˈijtëm seguurë?

¹⁶ ¿Jyantsy yˈatsoowëmbijtypyë Diosë nuˈkxtakën? ¡Tiko këdii! Ets mbäät nˈijtëm seguurë ko Jyobaa diˈib  “myëdoowˈijtypyë nuˈkxtakën”, yˈatsoowëmbijtypy ko mayjyaˈay myënuˈkxtaˈagyëty winë ääw winë jot (Salmo 65:2). Ets wiˈixëm tˈatsoowëmbity.

17. ¿Tiko mbäät njënäˈänëm ko Dios yëˈë yajtuumbyë anklës etsë naxwinyëdë jäˈäy parë tˈatsoowëmbityë nuˈkxtakën?

¹⁷ Jyobaa mbäät dyajtunyë anklës o naxwinyëdë jäˈäy diˈib mëduunëp parë tˈatsoowëmbitëdë nuˈkxtakën (Ebreeʉsʉty 1:13, 14). Extëm nˈokpëjtakëm, mayë jäˈäy tˈamdowdë Diosë naybyudëkë parë tjaygyukëdë Biiblyë, ets ok, ta pyaatyëty tuˈugë Dios mëduumbë. Tyäˈädë yëˈë xytyukˈijxëm ko anklëstëjk yëˈë duˈun diˈib yajtuˈuyeˈebyë tyäˈädë tuunk mä yaˈëwaˈkxy yajkäjpxwaˈkxyë Diosë yˈAyuk (Diˈibʉ Jatanʉp 14:6). Ja tuk pëky, ko näˈäty xytyëgoyˈäjtxëmë naybyudëkë Jyobaa mbäät tˈatsoowëmbityë nuˈkxtakën ko dyajkëxëˈëky tuˈugë Dios mëduumbë diˈib mbäät xypyudëjkëm (Proverbios 12:25; Santya̱ˈa̱gʉ 2:16).

18. ¿Wiˈixë Jyobaa dyajtunyë myëjääw etsë Biiblyë parë tˈatsoowëmbityë nyuˈkxtakën pënaty mëduunëp?

¹⁸ Jyobaa Dios nan yˈatsoowëmbijtypyë nyuˈkxtakën pënaty mëduunëp mët yëˈëgyëjxmë myëjääw etsë Biiblyë. Extëm ko nˈamdoˈowëmë nyaybyudëkë  mä nbatëmë amay jotmay, mbäät xytyuˈumoˈoyëm ets xyjotmëkmoˈoyëm mët yëˈëgyëjxmë myëjääw (2 Korintʉ 4:7). Ets ko nmënuˈkxtakëmë Jyobaa parë xywyinmäˈänymyoˈoyëm wiˈix tijaty nduˈunëm, näˈäty mbäät tˈatsoowëmbity mët yëˈëgyëjxmë Biiblyë. Extëm ko naytyuˈuk nˈëxpëjkëmë Biiblyë o ko ngäjpxëmë wiinkpë ëxpëjkpajn extëmë tyäˈädë liibrë, mbäät nbatëmë tekstë diˈib mbäät xypyudëjkëm. Nan mbäät nyajtukjamyajtsëmë tekstë diˈib mbäät xypyudëjkëm ko nëjkxëm mä nduˈukmujkëm o ko tuˈugë mëjjäˈäy diˈib tuump mä Diosë kyäjpn xykyäjpxwijëm mët ko xytsyojkëm (Galasyʉ 6:1).

19. ¿Ti mbäät nmëdäjtëm winmäˈänyoty ko näˈäty njäˈäwëm ko Dios kyaj tˈatsoowëmbityë nuˈkxtakën?

¹⁹ Näˈäty mbäät njäˈäwëm ko Dios kyaj tsojk tˈatsoowëmbityë nuˈkxtakën. Per kyaj yëˈë tˈandijy ko kyaj mbäät tˈatsoowëmbity. Nˈokmëdäjtëm winmäˈänyoty ko Jyobaa yëˈë nyijäˈäwëp wiˈix tˈatsoowëmbitäˈäny ets näˈä. Pes yëˈë yˈijxypy yajxon ti xytyëgoyˈäjtxëm ets niˈigyë tnijawë ti mbäät xyajjotkujkˈäjtëm. Näˈäty mbäät tnaˈixy ets nˈamdoowˈadëtsëm, nˈëxtääyˈadëtsëm ets ngojxˈadëtsëmë jënˈääw tëjkˈääw (Lukʉs 11:5-10). Ko xëmë nˈamdoˈowëm, ta nyaˈijxëm ko njantsy tsyojkëm diˈib të nˈamdoˈowëm ets ko njantsy myëdäjtëmë mëbëjkën. Mbäät näˈäty kyaj nˈijxëm wiˈixë Jyobaa tˈatsoowëmbityë nuˈkxtakën. Extëm nˈokpëjtakëm, pën nmënuˈkxtakëmë Jyobaa ko  nbatëmë amay jotmay, mbäät jeˈeyë xymyoˈoyëmë jot mëjääw parë nmëmadakëm ets kyaj ttimˈyajëgaˈagët (käjpxë Filipʉs 4:13).

20. ¿Tiko net mbäät nmënuˈkxtakëmë Jyobaa?

²⁰ Mëjwiin kajaa njantsy myëjjäˈäwëmë Jyobaa diˈib tukëˈëyë të dyajkojtäˈäy, pes wingon yajpääty mä niˈamukë jäˈäy diˈib mënuˈkxtakëp extëm yëˈë ttseky (käjpxë Salmo 145:18). Oy njantsy nyayjäˈäwëm ko mbäät nmëgäjpxëmë Jyobaa, pääty min nˈokmënuˈkxtakëm. Pën nduˈunëm duˈun, ta nnayjäˈäwëm agujk jotkujk ko nnijäˈäwëm ko mbäät niˈigyë nmëwingoˈonëmë Jyobaa diˈib myëdoobyë nuˈkxtakën.