1, 2. ¿Kenke tijpiaj se ueyi tlateochiualistli pampa tiuelij timomaijtouaj, uan kenke moneki tijmatisej kej kinamiki tijchiuasej?

TLALTIPAKTLI tlauel pilsiltsi, amo kej ueyi iluikaktli. Yeka Jehová, “tlen kichijki iluikaktli uan Tlaltipaktli” kinita nochi altepemej kej se tlachipintli atl (Salmo 115:15; Isaías 40:15). Biblia kiijtoua: “ToTeko [Jehová] itstok ininnechka nochi tlen kinotsaj. Kena, itstok ininnechka nochi tlen kitemouaj ika nochi ininyolo. Yajaya kinmaka tlen kinekij nochi tlakamej tlen kiimakasij uan kitlepanitaj. Kintlakakilia kema kitsajtsiliaj ma kinpaleui” (Salmo 145:18, 19). Uajka, toTeotsij katli techchijki uan kipia Nochi tetikayotl, itstok tonechka uan techtlakakilis tlaj ‘tijtemosej ika nochi toyolo’ uan tlaj amo kema tijtlauelkauasej. ¡Tijpiaj se ueyi tlateochiualistli pampa tiuelij timomaijtouaj!

² Tlaj tijnekij ma techtlakakili Jehová moneki tijnojnotsasej kej ya kipaktia. Yeka moneki tijmatisej kenijkatsa kiijtoua Biblia ma timomaijtokaj, pampa kema timomaijtouaj tijnechkauiaj Jehová.

3. ¿Kenke tlauel moneki ma tijnojnotsakaj Jehová?

³ Moneki ma tijnojnotsakaj Jehová pampa yaya techtlaneui ma tijchiuakaj. Biblia kiijtoua: “Ayok ximotekipachokaj ika niyon se tlamantli. Más kuali ximomaijtokaj ika toTeko ika nochi tlen inmechpanotiuala. Xijtlajtlanikaj ma inmechmaka nochi tlen moneki uan xijtlaskamatikaj [...]. Intla keja nopa inkichiuaj, toTeko inmechmakas tlaseuilistli ipan inmoyolo tlen tlakamej axuelis kimachilisej. Uan nopa tlaseuilistli kiyaualtsakuas inmoyolo uan inmotlalnamikilis” (Filipenses 4:6, 7). Uajka moneki timomaijtosej pampa toTeotsij techtlaneui ma tijchiuakaj.

4. ¿Kenke nojua timonechkauijtiasej iuaya Jehová tlaj nochipa timomaijtosej?

⁴ Tlaj nochipa timomaijtosej kuali timouikasej iuaya Jehová. Katli kuali mouampojchijtokej nochipa mokamanaljuiaj pampa moikneliaj uan amo san pampa kinpoloua se tlenijki. Uan kema mopouiliaj tlen kiyolmatij, tlen kinkuesoua o tlen moyoliljuiaj, tlauel  kuali mouampojchijtiauij. Nojkia kej nopa pano kema timonojnotsaj iuaya Jehová. Ipan ni amochtli tikitak tlake tlamachtia Biblia tlen Jehová, kenijkatsa ya uan tlake mosentlalijtok kichiuas. Ni mitspaleuik xijneltoka Jehová nelia itstok. Uajka, kema timomaijtos xikiljui tlen timoyoliljuia uan tlen tijyolmati. Tlaj kej nopa tijchiuas, nojua timonechkauijtias iuaya (Santiago 4:8).

5. ¿Kenke tijmatij Jehová amo kintlakakilia nochi katli momaijtouaj?

⁵ ¿Kintlakakilia Jehová nochi katli momaijtouaj? Kema itstoya Isaías toTeotsij kiniljuik nopa tlaijixnamikinij: “Yonke inmomaijtosej miak ueltas, na axniinmechtlakakilis pampa inmoma eltok espoltik ika inineso tlakamej tlen inkinmiktijkej” (Isaías 1:15). Uajka, tlaj timomaijtouaj uan nojua titlajtlakolchiuaj, Jehová amo techtlakakilis. Tlaj tijnekij ma techtlakakili moneki tijchiuasej se keski tlamantli.

6. ¿Tlake moneki tijchiuasej tlaj tijnekij ma techtlakakili toTeotsij, uan kenijkatsa tijnextiaj?

⁶ Moneki kuali ma titlaneltokakaj (xijpoua Marcos 11:24). Nopa apóstol Pablo kiijtok: “Se tlakatl axueli kiyolpaktis toTeko intla axkineltoka temachtli tlen toTeko kiijtoua. Pampa aki ueli tlen kineki monechkauis kampa toTeko, moneki kineltokas para toTeko itstok, uan para yajaya kintlaxtlauia tlakamej tlen nelia kitemouaj” (Hebreos 11:6). Tlaj tijnekij tijnextisej nelia titlaneltokaj, amo san moneki tijmatisej itstok toTeotsij, techtlakakilia uan technankilia kema timomaijtouaj, nojkia moneki tijnextisej ika tlen tijchiuaj (Santiago 2:26).

7. 1) ¿Kenke moneki tijnojnotsasej Jehová ika miak tlatlepanitakayotl? 2) ¿Kenijkatsa tijnextiaj timomaijtouaj ika nochi toyolo uan amo timoueyimatij?

 ⁷ Moneki timomaijtosej ika nochi toyolo, uan amo ma timoueyimatikaj. Kema maseualmej kinojnotsaj se tlanauatijketl kikamanaljuiaj ika miak tlatlepanitakayotl, pampa kimatij yaya tekichiua. Uajka, Jehová nojkia kej nopa kinamiki ma tijnojnotsakaj (Salmo 138:6). Uan kinamiki tijchiuasej pampa ya ‘toTeko tlen kipia nochi Chikaualistli’ (Génesis 17:1). Yeka, kema tijnojnotsasej toTeotsij moneki tijmajtosej san ya tlauel ueyi uan tojuantij amo. Ni techpaleuis ma tijnojnotsakaj ika nochi toyolo uan amo tikiljuisej nochipa san tlen ipa tikiljuiaj (Mateo 6:7, 8).

8. ¿Kenijkatsa tijnextiaj nelia tijnekij tlen tijtlajtlaniaj toTeotsij?

⁸ ToTeotsij techtlakakilis tlaj tijnextisej nelia tijnekij tlen tijtlajtlaniaj. Yeka, tlaj tikiljuisej ma techmaka “tlakualistli tlen moneki mojmostla”, moneki ma titekitikaj (Mateo 6:11; 2 Tesalonicenses 3:10). Uan tlaj tikiljuisej ma techpaleui amo titlajtlakolchiuasej, moneki amo tijchiuasej yon tikitasej tlen techyoltilanas ma titlajtlakolchiuakaj (Colosenses 3:5). Maske tikitakej se keski tlamantli tlen moneki tijchiuasej kema timomaijtosej, nojkia moneki tijmatisej sekinok tlamantli.

9. ¿Ajkia moneki tijnojnotsasej kema timomaijtosej, uan ika ajkia itoka moneki tijchiuasej?

⁹ ¿Ajkia moneki tijnojnotsasej kema timomaijtosej? Jesús technextilik ajkia kema kiijtok: “ToTeko toTata tlen tiitstok nepa iluikak” (Mateo 6:9). Uajka, san Jehová moneki tijnojnotsasej, uan moneki ma tijchiuakaj  ika Jesús itoka. ¿Kenke? Ipan tlamachtili makuili tikitakej Jesús kititlankej ipan Tlaltipaktli pampa techmakixtiskia tlen tlajtlakoli uan mikilistli (Juan 3:16; Romanos 5:12). Nojkia pampa kitekimakakej kej Sumo Sacerdote uan tetlajtolsenkajketl (Juan 5:22; Hebreos 6:20, TNM). Yeka, Biblia kiijtoua moneki ma timomaijtokaj ika Jesús itoka. Jesús kiijtok: “Nochi tlen inkitlajtlanisej noTata ipan notoka yajaya inmechmakas” (Juan 15:16). Uajka, tlaj san Jehová tijnojnotsasej uan tijchiuasej ika Jesús itoka, ya techtlakakilis.

10. ¿Kenijkatsa moneki ma tiitstokaj kema timomaijtosej?

¹⁰ ¿Kenijkatsa moneki tiitstosej kema timomaijtosej? Jehová amo techiljuia kenijkatsa moneki ma tijtlalikaj toma o totlakayo. Biblia kiijtoua se uelis moseuijtos, moixtoktos, motlankuaketstos o ijkatos (1 Crónicas 17:16; Nehemías 8:6; Daniel 6:10). Moneki timomaijtosej ika nochi toyolo uan amo san pampa tijnekij ma techitakaj. Uelis tijchiuasej ichtakatsi uan kampa ueli, kema titekititosej o kema techpano se kuesoli. Maske amo aka kiitas kema timomaijtosej, Jehová kena techtlakakilis (Nehemías 2:1-6).

11. ¿Tlake uelis tijtlajtlanisej toTeotsij kema timomaijtosej?

¹¹ ¿Tlake uelis titlajtlanisej? Biblia kiijtoua: “Intla tijtlajtlaniaj toTeko [Jehová] tlen kinamiki ika tlen yajaya kineki, yajaya techtlakakilia” (1 Juan 5:14). Uajka, kema timomaijtosej uelis tijtlajtlanisej toTeotsij tlen ueli tlamantli katli kuali kiita. ¿Uelis tijpouilisej Jehová tlen techtekipachoua? Kena, pampa ya eliskia kej se touampo katli tijnojnotsaj. Uelis ‘tikiljuisej nochi tlen tijyolmatij’ (Salmo 62:8). Kualtiaskia tikiljuisej ika itonal ma techpaleui tijchiuasej tlen kuali (Lucas 11:13). Uelis tijtlajtlanisej ma techpaleui tikijiyouisej tlaouijkayotl  uan kuali tijtlapejpenisej tlen tijchiuasej (Santiago 1:5). Uan tlaj titlaixpanosej, moneki tikiljuisej ma techtlapojpoljui ika Cristo inemilis tlen temaktilik (Efesios 1:3, 7). Nojkia uelis tijtlajtlanisej toTeotsij tlen techpoloua, ma kinpaleui tochampoyouaj, toikniuaj uan sekinok (Hechos 12:5; Colosenses 4:12).

12. ¿Kenijkatsa tijnextiaj kema timomaijtouaj tijpatiitaj tlen toTeotsij mosentlalijtok kichiuas?

¹² Kema timomaijtosej moneki nesis tijpatiitaj tlen Jehová kineki kichiuas. Onka miak tlamantli tlen techyololinia ma tijueyichiuakaj uan ma tijtlaskamatilikaj ika nochi toyolo (1 Crónicas 29:10-13). Ipan Mateo 6:9-13 (xijpoua) Jesús technextilik kenijkatsa timomaijtosej. Ya kiijtok moneki titlajtlanisej ma moueyichiua toTeotsij itoka, ma tekichiua toTeotsij iTlanauatijkayo uan ma mochiua tlen toTeotsij kineki ipan Tlaltipaktli kej mochiua ne iluikak. Uajka, Jesús kinextik achtoui moneki titlajtlanisej tlen Jehová kineki kichiuas uan teipa tlen tojuantij techpoloua. Tlaj kej nopa tijchiuasej, tijnextisej amo techtekipachoua san tlen tojuantij techpoloua.

13. ¿Kiijtoua Biblia moneki tiuejkauasej kema timomaijtosej?

¹³ ¿Uelis tiuejkauasej kema timomaijtosej? Biblia amo kiijtoua tlaj moneki tiuejkauasej kema timomaijtosej toselti o kampa itstokej miakej. Kema titlakuasej uelis amo tiuejkauasej uan kema toselti tijnojnotsasej Jehová ika nochi toyolo uelis kena (1 Samuel 1:12, 15). Jesús amo kipaktik kema tlauel uejkauayayaj san pampa kinekiyayaj ma kinitakaj (Lucas 20:46, 47). Jehová nojkia amo kipaktia. Ya kineki ma tijnojnotsakaj ika nochi toyolo. Uelis tlen techtekipachoua kichiuas ma tiuejkauakaj kema timomaijtosej.

14. ¿Tlake kiijtosneki kema Biblia kiijtoua ‘Xijsenuikilikaj ximomaijtokaj’, uan tlake tlateochiualistli tijpiaj?

 ¹⁴ ¿Sampatsi moneki timomaijtos? Biblia kiijtoua: ‘Xijsenuikilikaj ximomaijtokaj’, “mojmostla ximomaijtokaj” uan “ximomaijtojtinemikaj ika toTeko ajachika” (Lucas 18:1; Romanos 12:12; 1 Tesalonicenses 5:17). Ni amo kiijtosneki timomaijtojtosej tonali uan youali. Kiijtosneki mojmostla tijtlaskamatilisej Jehová pampa techiknelia uan tijtlajtlanisej ma techyakana, ma techyolchikaua uan ma techpaleui. ¡Nelia tijpiaj se ueyi tlateochiualistli, pampa Jehová kineki ma tijnojnotsakaj kema tijnekisej maske tiuejkauasej o amo! Uajka, nochipa ma timomaijtokaj tlaj tijpatiitaj kema timonojnotsaj iuaya.

15. ¿Kenke moneki tikijtosej “amén” kema titlamij timomaijtouaj?

¹⁵ ¿Kenke moneki tikijtosej “amén” kema titlamij timomaijtouaj? Amén kiijtosneki “keja nopa ma eli” o kej nopa ma mochiua. Biblia kiijtoua kema se akajya tlamiyaya momaijtoua iselti o kampa miakej itstoyaj kiijtouayaya “amén” (1 Crónicas 16:36; Salmo 41:13). Kema tikijtouaj “amén”, tijnextiaj timomaijtojkej ika nochi toyolo. Uan tlaj kampa itstokej miakej tikijtosej amén, tijnextisej nelia tijnekij ma mochiua tlen moijtok (1 Corintios 14:16).

16. ¿Tlake kichiua Jehová kema timomaijtouaj?

¹⁶ ¿Technankilia Jehová kema timomaijtouaj? Biblia kiijtoua kena. Yeka, moneki timotemachisej ya techtlakakilis kema timomaijtosej ika nochi toyolo (Salmo 65:2). ¿Kenijkatsa technankilia toTeotsij? Ma tikitakaj.

17. ¿Kenke tikijtouaj Jehová technankilia ika iluikaeuanij o ika itekipanojkauaj?

 ¹⁷ Kemantika Jehová technankilia ika iluikaeuanij o ika itekipanojkauaj (Hebreos 1:13, 14). Kema sekij kitlajtlaniaj toTeotsij ma kinpaleui momachtisej Biblia, nimantsi kinpaxalojtokej Jehová itekipanojkauaj. Ni kinextia iluikaeuanij techyakanaj kema titlajtolmoyauaj (Apocalipsis [Revelación] 14:6). Kema tijpiaj tlaouijkayotl, kinyololinia toikniuaj ma techpaleuikaj,  uan kej nopa Jehová technankilia kema timomaijtouaj (Proverbios 12:25; Santiago 2:16).

18. ¿Kenijkatsa kinnankilia Jehová itekipanojkauaj ika itonal uan ika Biblia?

¹⁸ Jehová nojkia kitekiuia itonal uan Biblia tlen ika technankilia. Kema tikiljuiaj ma techpaleui tikijiyouisej se kuesoli, techyakana uan techyolchikaua ika itonal (2 Corintios 4:7). Uan kema tikiljuiaj ma techpaleui kuali tijtlapejpenisej tlen tijchiuasej, technankilia ika iTlajtol. Yeka kema tijpouaj Biblia o se amatlajkuiloli, kej ni amochtli, tijpantiaj textos tlen techpaleuia. Kemantika nojkia techilnamikiliaj tlen tetlajtolmaka Biblia, uelis ika tlamachtili tlen mopanoltia ipan tlanechikoli o kema se ueuejtlakatl techtlajtolmaka pampa kineki techpaleuis (Gálatas 6:1).

19. ¿Tlake moneki tikilnamiktosej tlaj timoiljuisej Jehová amo nima technankilia?

¹⁹ Maske timoiljuiaj Jehová amo nima technankilia, amo kiijtosneki amo ueli kichiua. Jehová technankilis kema monekis. Ya kimati tlake techpoloua uan kimati kenijkatsa techmakas. Uan kineki miakpa ma ‘tijtlajtlanikaj’, ma ‘tijtemokaj’ uan ma ‘tijnojnotsakaj’  (Lucas 11:5-10). Tlaj kej nopa tijchiuasej, kiitas nelia tijnekij ma techpaleui uan nelia kuali titlaneltokaj. Kemantika amo tikitaj kenijkatsa technankilia, kej kema tijpiaj se tlaouijkayotl, maske amo techkixtilia, kena techpaleuia ma tikijiyouikaj (xijpoua Filipenses 4:13).

20. ¿Kenke tlauel moneki nochipa ma timomaijtokaj?

²⁰ Tlauel tijtlaskamatiliaj Jehová katli Kichijtok nochi, pampa itstok ininnechka tlen kinojnotsaj kej ya kipaktia (xijpoua Salmo 145:18). Uajka, tlaj nochipa timomaijtosej, tlauel tiyolpakisej pampa ni techpaleuis tijnechkauijtiasej Jehová katli techtlakakilia kema timomaijtouaj.