1, 2. Omolwashike tu na okutala ko egalikano li li uuthembahenda uunene, nomolwashike twa pumbwa okutseya shoka Ombiimbeli tayi ti kombinga yalyo?

MOKUYELEKANITHA evi newangandjo enenenene, evi eshona noonkondo. Odhoshili kutya kuJehova, “omushiti gwegulu nogwevi,” iigwana yaantu oya fa eta eshonashona lyomeya meyemele. (Episalomi 115:15; Jesaja 40:15) Nonando ongaaka, Ombiimbeli otayi ti: “OMUWA oku li popepi naayehe mboka taye mu galikana moshili. Mboka haye mu simaneke, ote ya pe ashihe shoka ye shi pumbwa, notu uvu omaindilo gawo e te ya hupitha.” (Episalomi 145:18, 19) Dhiladhila owala kutya shoka otashi ti shike. Otashi ti kutya Omushiti omunankondo adhihe oku li popepi natse note ke tu uva ngele otatu “mu galikana moshili.” Katu na tuu uuthembahenda okupopya naKalunga megalikano!

² Ihe ngele otwa hala Jehova a pulakene komagalikano getu, otu na okugalikana kuye momukalo ngoka a hokwa. Mbela ongiini tatu vulu oku shi ninga ngele katu shi shoka Ombiimbeli tayi ti kombinga yokugalikana? Osha simanenena okutseya shoka Omanyolo taga popi kombinga yaashoka, molwaashoka egalikano ohali tu kwathele tu hedhe popepi naJehova.

3. Etompelo limwe lya simana molwaashoka tu na okugalikana kuJehova olini?

³ Etompelo limwe lya simana molwaashoka tu na okugalikana  kuJehova, olyo kutya ote tu lombwele tu shi ninge. Oohapu dhe otadhi tu ladhipike tadhi ti: “Inamu kala mu na nando oshimpwiyu shasha, ihe oompumbwe dheni dhi tseyithileni Kalunga momagalikano geni agehe. Ihe indileni aluhe nomwenyo gu udha ehambelelo. Nombili yaKalunga, ndjoka yi vule uunongo auhe wopantu, otayi gamene oomwenyo dheni nomadhiladhilo geni muKristus Jesus.” (Aafilippi 4:6, 7) Inatu hala nando okukala kaatu na ko nasha nesiloshimpwiyu lyopahole ndyoka twa pewa kOmupangeli Omunenenene gweshito alihe.

4. Okugalikana pandjigilile kuJehova ohaku koleke ngiini ekwatathano lyetu naye?

⁴ Etompelo limwe natango molwaashoka tu na okugalikana olyo kutya okugalikana kuJehova pandjigilile oko omukalo moka tatu koleke ekwatathano lyetu naye. Ookuume kashili ihaya kundathana owala ngele ye na shoka ya pumbwa. Pehala lyaashono, ookuume kopothingo ohaya kala ye holathane nuukuume wawo ohau ende tau kolo noonkondo sho taya lombwelathana omadhiladhilo gawo, iimpwiyu yawo nomaiyuvo gawo ya manguluka. Miinima yimwe, onkalo oya faathana shi na ko nasha nekwatathano lyetu naJehova Kalunga. Embo ndika olye ku kwathela wi ilonge oshindji shoka Ombiimbeli tayi  ti kombinga yaJehova, yuukwatya we nomalalakano ge. Owi ilonga kutya oku li omuntu gwolela. Egalikano otali ku pe ompito okulombwela Ho gwomegulu omadhiladhilo goye nomaiyuvo goye gomuule. Sho to shi ningi, oto hedha popepi naJehova.—Jakob 4:8.

5. Oshike tashi ulike kutya Jehova iha pulakene kegalikano kehe?

⁵ Mbela Jehova oha pulakene kegalikano kehe? Tala kwaashoka a li a lombwele Aaisraeli aanashipotha pethimbo lyomupolofeti Jesaja a ti: “Nando mu galikane olule ngiini, itandi ka pulakena, oshoka iikaha yeni oya nika ombinzi.” (Jesaja 1:15) Onkee ano, oonkatu dhontumba otadhi vulu okuningitha Kalunga kaa pulakene komagalikano getu. Ano opo omagalikano getu gu uvike kuKalunga, otu na okugwanitha po iitegelelwa yontumba ya simanenena.

6. Opo Kalunga a pulakene komagalikano getu, oshitegelelwa shini sha simanenena, nongiini tatu vulu oku shi gwanitha po?

⁶ Oshitegelelwa sha simanenena osho okukala tu na eitaalo tali longo. (Markus 11:24) Omuyapostoli Paulus okwa nyola a ti: “Kapu na ngoka ta hokiwa kuKalunga, ngele ke na eitaalo. Oshoka ngoka te ya kuKalunga, oku na okukala i itaala kutya Kalunga oko e li nota futu ayehe mboka taye mu kongo.” (Aahebeli 11:6) Okukala neitaalo lyashili kashi shi owala okukala tu shi kutya Kalunga oko e li nohu uvu omagalikano e te ga yamukula. Ihe eitaalo ohali ulikwa kiilonga yetu. Otu na okuulika thiluthilu kutya otu na eitaalo monkalamwenyo yetu yesiku kehe.—Jakob 2:26.

7. (a) Omolwashike tu na okupopya naJehova nesimaneko ngele tatu galikana kuye? (b) Ngele tatu galikana kuKalunga, ongiini tatu vulu okuulika kutya otatu shi ningi neifupipiko notashi zi komutima?

⁷ Jehova ota pula wo mboka taya popi naye megalikano ye shi ninge neifupipiko notashi zi komutima. Mbela katu na etompelo lyokukala twi ifupipika ngele tatu popi naJehova? Ngele aantu ya mono ompito yokupopya nomukwaniilwa nenge nomupresidende, ohaye shi ningi nesimaneko, ya zimina ondondo yopombanda yomupangeli ngoka. Ngele osho  shi li ngawo, tse katu na tuu okupopya naJehova nesimaneko enenenene! (Episalomi 138:6) Odhoshili kutya oye “Kalunga Omunankondoawike.” (Genesis 17:1) Ngele tatu galikana kuye, omukalo moka tatu popi naye ogu na okuulika kutya otwa zimina neifupipiko kutya oku tu vule kokule. Eifupipiko lya tya ngaaka otali ke tu inyengitha wo tu galikane tashi zi komutima nokuyanda okugalikana omagalikano ga faathana ethimbo kehe.—Mateus 6:7, 8.

8. Ongiini tatu vulu okukatuka metsokumwe naashoka tatu galikana?

⁸ Oshitegelelwa shimwe natango shoka twa pumbwa okugwanitha po opo tu uvike kuKalunga osho okukatuka metsokumwe nomagalikano getu. Jehova okwa tegelela tu ninge ashihe shoka tatu vulu opo tu kale metsokumwe naashoka tatu galikana. Pashiholelwa, ngele otatu galikana tatu ti: “Tu pa wo nena oshithima shetu shesiku kehe,” otu na okulonga nuudhiginini iilonga kehe mbyoka tatu longo. (Mateus 6:11; 2 Aatessalonika 3:10) Ngele otatu galikana tu kwathelwe tu sinde uunkundi wopanyama, otu na okukambadhala okuyanda oonkalo ndhoka tadhi vulu oku tu fala momamakelo. (Aakolossa 3:5) Kakele kiitegelelwa mbyoka ya simanenena, opu na wo omapulo kombinga yegalikano ngoka twa pumbwa okutseya omayamukulo gago.

9. Okulye tu na okugalikana, nokupitila mulye?

⁹ Okulye tu na okugalikana? Jesus okwa longa aalanduli ye ya galikane ‘kuTate yetu, ngu e li megulu.’ (Mateus 6:9) Onkee ano, omagalikano getu oge na okuukithwa owala kuJehova Kalunga. Ihe Jehova okwa tegelela tu kale twa zimina ondondo yOmwana epona, Jesus Kristus. Ngaashi twi ilonga mOntopolwa onti-5, Jesus okwa li a tumwa kombanda yevi opo a gandje ekulilo oku tu mangulula muulunde neso. (Johannes 3:16; Aaroma 5:12) Oye Omusaaseri Omukuluntu nOmupanguli a tulwa po. (Johannes 5:22; Aahebeli 6:20) Onkee ano, Omanyolo otage tu lombwele tu galikane okupitila muJesus. Jesus okwe shi popi a ti: “Ongame ondjila noshili nomwenyo. Kape  na ngoka ta vulu okuya kuTate, okuninga ta pitile mungame.” (Johannes 14:6) Opo omagalikano getu gu uvike, otu na owala okugalikana kuJehova okupitila mOmwana.

10. Omolwashike twaahe na okukala tu li momukalo gwontumba gwokondandalunde ngele tatu galikana?

¹⁰ Mbela otu na okukala tu li momukalo gwontumba ngele tatu galikana? Hasho. Jehova ita pula tu kale momukalo gwontumba gwokondandalunde ngele tatu galikana, kutya nduno oshi na ko nasha niikaha yetu nenge nolutu lwetu aluhe. Ombiimbeli otayi ti kutya osha taambwa ko okugalikana tu li momikalo dhi ili nodhi ili, kutya nduno otwa kuutumba, otwa sizimana, otwa tsa oongolo nenge otwa thikama. (1 Ondjalulo 17:16, OB-1954; Nehemia 8:6; Daniel 6:10; Markus 11:25) Shoka sha simanenena kashi shi omukalo moka tu li opo tu monike kuyalwe, ihe iikala yokomutima yu uka. Miilonga yetu yakehe esiku nenge ngele twa taalelwa koshiponga, otatu vulu okugalikana momitima dhetu, kehe mpoka tu li. Jehova ohu uvu omagalikano ga tya ngaaka, nonando mboka ye li po kaye shi shi ngele otatu galikana.—Nehemia 2:1-6.

11. Iinima yopaumwene yini yu uka okugalikana kombinga yayo?

¹¹ Otu na okugalikana kombinga yashike? Ombiimbeli otayi yelitha tayi ti: “Ngele tatu mu indile sha shoka she mu opalela, [Jehova] ote tu uvu.” (1 Johannes 5:14) Onkee ano, otatu vulu okugalikana kombinga yoshinima kehe shoka shi li metsokumwe nehalo lyaKalunga. Mbela oshi li ngaa metsokumwe nehalo lye okugalikana shi na ko nasha niipwiyu yopaumwene? Eeno, osho lela. Okugalikana kuJehova okwa fa naanaa okupopya nakuume kopothingo. Otatu vulu okupopya twa manguluka, ‘tatu pukumunine oomwenyo dhetu koshipala shaKalunga.’ (Episalomi 62:9, OB-1954) Oshu uka kutse okupula ombepo ondjapuki, opo yi tu kwathele tu longe shoka shu uka. (Lukas 11:13) Otatu vulu wo okupula ewiliko opo tu ninge omatokolo gopandunge nosho wo oonkondo opo tu pondole omaudhigu. (Jakob 1:5) Ngele twa yono, otu na okupula edhiminopo pakankameno lyeyambo lyaKristus. (Aaefeso 1:3, 7) Ihe katu na owala okugalikana shi na ko nasha niinima yopaumwene. Otu na okukwatela mo yamwe momagalikano getu, ngaashi iilyo  yomaukwanegumbo naalongelikalunga ooyakwetu.—Iilonga 12:5; Aakolossa 4:12.

12. Ongiini tatu vulu okupititha komeho iinima yi na ko nasha naTate yetu gwomegulu momagalikano getu?

¹² Iinima yi na ko nasha naJehova Kalunga oyi na okupitithwa komeho momagalikano getu. Otu na shili omatompelo okutanga nokupandula Jehova tashi zi komutima omolwuuwanawa we auhe. (1 Ondjalulo 29:10-13) Jesus okwa gandja oshiholelwa shegalikano, shoka sha nyolwa muMateus 6:9-13, moka e tu longa tu galikane opo edhina lyaKalunga li yapulwe, Uukwaniilwa waKalunga u ye nopo ehalo lye li gwanithwe kombanda yevi ngaashi megulu. Tango, Jesus okwa popi iinima ya simana yi na ko nasha naJehova, opo nduno okwa popi iinima yopaumwene. Sha faathana, ngele tatu pititha komeho momagalikano getu iinima yi na ko nasha naKalunga, otatu ulike kutya inatu itula owala miinima mbyoka yi na ko nasha nuulinawa wetu.

13. Omanyolo otagu ulike shike kombinga yuule womagalikano ngoka haga taambwa ko kuJehova?

¹³ Omagalikano getu oge na okukala omale shi thike peni? Ombiimbeli inayi tula po ongamba kutya egalikano lyopaumwene nenge lyomontaneho oli na okukala ele li thike peni. Egalikano lyokugalikanena iikulya otashi vulika li kale efupi, ihe egalikano lyopaumwene moka hatu pukumunine Jehova omitima dhetu otali vulu okukala ele. (1 Samuel 1:12, 15) Ihe Jesus okwa pangulile oohandimwe mboka ya li yi ishi uuyuuki, mboka ya li haya galikana omagalikano omale okwiimonikitha kuyalwe. (Lukas 20:46, 47) Jehova iha hokwa omagalikano ga tya ngaaka. Shoka sha simana osho okugalikana tashi zi komutima. Onkee ano, uule womagalikano ngoka haga taambwa ko kuJehova otashi vulika u kale wa yoolokathana shi ikolelela koompumbwe nokoonkalo.

14. Ombiimbeli oya hala okutya shike sho tayi tu ladhipike tu ‘galikane aluhe,’ nomolwashike eladhipiko ndyoka tali hekeleke?

¹⁴ Otu na okugalikana lungapi? Ombiimbeli otayi tu ladhipike tu ‘galikane aluhe,’ tu ‘dhiginine okugalikana,’ nosho wo tu ‘galikane twaa na ezimbuko.’ (Aaefeso 6:18; Aaroma 12:12;  1 Aatessalonika 5:17, OB-1954) Ihe osha yela kutya omanyolo ngoka itaga ti kutya otu na okugalikana kuJehova uule wesiku alihe. Pehala lyaashono, Ombiimbeli otayi tu ladhipike tu galikane pandjigilile, tatu tsikile okupandula Jehova omolwuuwanawa we mboka e tu ningila nokukonga ewiliko lye, ehekeleko lye noonkondo kuye. Mbela itashi hekeleke okutseya kutya Jehova ina tula po ongamba kutya otu na okupopya naye megalikano uule wethimbo li thike peni nenge kutya olungapi tu na okupopya naye? Ngele otu na shili olupandu okupandula uuthembahenda wetu wokugalikana, otatu ka konga oompito odhindji dhokugalikana kuTate yetu gwomegulu.

15. Omolwashike tu na okutya “Amen” pehulilo lyomagalikano gopaumwene nenge gomontaneho?

¹⁵ Omolwashike tu na okutya “Amen” pehulilo lyegalikano? Oshitya “amen” otashi ti “eeno” nenge “nashi kale ngawo.” Iiholelwa yopamanyolo otayi ulike kutya oshu uka okutya “amen” pehulilo lyegalikano lyopaumwene nenge lyomontaneho. (1 Ondjalulo 16:36; Episalomi 41:13) Uuna tatu ti “amen” pehulilo lyomagalikano getu gopaumwene, otatu koleke kutya shoka twa popya oshoshili. Ngele tatu ti “amen,” kutya nduno omomutima nenge omokule, pehulilo lyegalikano lyagumwe lyomontaneho, otatu ulike kutya otwa tsa kumwe nomadhiladhilo ngoka ga popiwa.—1 Aakorinto 14:16.

16. Einekelo lini tatu vulu okukala tu na kombinga yomagalikano?

¹⁶ Mbela Jehova oha yamukula ngaa shili omagalikano? Eeno, ohe ga yamukula shili! Otu na etompelo lya kola lyokukala twi inekela kutya ye ngoka ‘hu uvu omagalikano’ oha yamukula omagalikano gaantu omamiliyona ngoka taga zi komutima. (Episalomi 65:2) Jehova ota vulu okuyamukula omagalikano getu momikalo dhi ili nodhi ili.

17. Omolwashike taku vulu okutiwa kutya Kalunga oha longitha aayengeli ye nosho wo aapiya ye yokombanda yevi okuyamukula omagalikano getu?

¹⁷ Jehova oha longitha aayengeli ye nosho wo aapiya ye yokombanda  yevi okuyamukula omagalikano getu. (Aahebeli 1:13, 14) Opu na iimoniwa oyindji yoohandimwe mboka ya li ya galikana kuKalunga e ya kwathele yu uve ko Ombiimbeli, ihe nziya konima yokugalikana oya talelwa po kugumwe gwomaapiya yaJehova. Iimoniwa ya tya ngaaka otayi gandja uunzapo kutya iilonga yokuuvitha Uukwaniilwa ohayi wilikwa kaayengeli. (Ehololo 14:6) Jehova ota vulu okuyamukula omagalikano getu ngoka taga galikanwa pethimbo lyeulumompumbwe mokwiinyengitha Omukriste gwontumba e tu kwathele.—Omayeletumbulo 12:25; Jakob 2:16.

18. Jehova oha longitha ngiini ombepo ye ondjapuki nOohapu dhe okuyamukula omagalikano gaapiya ye?

 ¹⁸ Jehova Kalunga oha longitha wo ombepo ye ondjapuki nOohapu dhe, Ombiimbeli okuyamukula omagalikano gaapiya ye. Ota vulu okuyamukula omagalikano getu ngoka hatu galikana tu kwathelwe tu idhidhimikile omamakelo, moku tu pa ewiliko noonkondo okupitila mombepo ye ondjapuki. (2 Aakorinto 4:7) Olundji omayamukulo gomagalikano getu opo tu mone ewiliko ohaga zi mOmbiimbeli, moka Jehova he tu pe ekwatho opo tu ninge omatokolo ge li pandunge. Omanyolo taga kwatha otaga vulu okumonika pethimbo lyekonakonombiimbeli lyopaumwene nosho wo sho tatu lesha iileshomwa yopaKriste, ngaashi embo ndika. Iitsa yopamanyolo mbyoka twa pumbwa okudhiladhila otashi vulika tu yi uve okupitila mwaashoka tashi kundathanwa pokugongala kwopaKriste nenge okupitila momatyokosha gomukuluntugongalo ngoka e na ko nasha nonkalonawa yegongalo lyetu.—Aagalati 6:1.

19. Oshike tu na okudhimbulukwa ngele omagalikano getu omathimbo gamwe oga fa itaaga yamukulwa?

¹⁹ Ngele Jehova ota monika a fa itaa yamukula omagalikano getu nziya, hamolwaashoka nando itaa vulu oku ga yamukula. Pehala lyaashono, otu na okudhimbulukwa kutya Jehova oha yamukula omagalikano shi ikolelela kehalo lye nosho wo pethimbo lye lyo opala. Oku shi oompumbwe dhetu nonkene e na oku dhi gwanitha po e tu vule kokule. Olundji ohe etha tu tsikile ‘okwiindila, okukonga nokukonkola.’ (Lukas 11:5-10)  Uudhiginini wa tya ngaaka otau ulukile Kalunga kutya otwa halelela shoka tatu pula megalikano nonokutya otwi itaala shili kutya ote ke tu yamukula. Niishewe, Jehova ota vulu okuyamukula omagalikano getu momukalo moka itaatu shi dhimbulula nuupu. Pashiholelwa, ota vulu okuyamukula egalikano li na ko nasha nemakelo lyontumba, moku tu pa oonkondo opo tu li idhidhimikile, ihe haku li kutha po.—Aafilippi 4:13, OB-1954.

20. Omolwashike tu na okulongitha thiluthilu uuthembahenda u na ondilo wegalikano?

²⁰ Inatu pandula tuu sho Omushiti gwewangandjo enenenene e li popepi naayehe mboka haye mu galikana momukalo gu uka! (Episalomi 145:18) Natu longitheni ano thiluthilu uuthembahenda u na ondilo wegalikano. Ngele tatu shi ningi, otatu ka kala tu na etegameno linyanyudha lyokukala tatu hedha popepi lela naJehova, Omuuvi gwomagalikano.