1, 2. ¿Tleka noneki tikitaskej ken se ueyi tlateochiualistli tiknotsaskej toTajtsin, niman tleka noneki tikmatiskej tlen kijtoua Biblia itech kenon tiknotsaskej?

IJKUAK tikitaj melak miyek sitlalimej tlen onka ipan iluikak, tikitaj ika tlaltikpaktli melak pitentsin. Niman Jehová, “akin okichijchiu cielo, niman in tlaltikpaktli”, kimita kalpamej kentla se tlachipintli ipan se uakajli (Hechos 14:15; Isaías 40:15). San ika, Biblia kijtoua ika “Jehová nisiuj nemi itech nochimej akin kinotsaj, nochimej akin yemelak kinotsaj”, niman kichiuas “tlen melak kinekij akin kimojkaitaj, yejua kinkaki akin kitlatlaujtiaj makinpaleui” (Salmo 145:18, 19). Xtlanemili itech tlen kijtosneki yejuin tlajtoltin. Tlachijchiujketl akin nochi ueli kichiua nemi nisiuj niman techkakis tla “[tik]notsaj ika nochi [to]yojlo”. ¡Se ueyi tlateochiualistli ika ueli tiknotsaj toTajtsin!

² San ika, tla tiknekij matechkaki Jehová ijkuak tiknotsaj, noneki tikchiuiliskej teoyotl ken yejua kuelita. Aman, tla xtikmatij tlenon kijtoua Biblia itech teoyotl, ¿kenon uelis tikchiuaskej? Noneki matikmatikan, pampa tla tikchiuiliaj teoyotl tonisiuiskej itech.

3. Xkijto tleka melak noneki matiknotsakan Jehová.

³ Kachtopa pampa Jehová yejua akin kineki matiknotsakan.  Ipan iTlajtol kijtoua: “Ma ka itlaj xkomatstiakan, yej nochipa xchiuakan oración, niman xtlajtlanilikan Dios ikan tlaxtlauijli nochi tlen mechpoloua. Ijkon Dios mechmakas yolseuilistli on yejuan más ueyi de nochi kech se tlakatl uelis kajsikamatis. Niman in yolseuilistli kejeuas nemoyojlo niman nemotlamachilis pampa itechkopa Cristo Jesús nennemij san sekan iuan” (Filipenses 4:6, 7). Kuajli tikmatstokej, ika xtiknekij tikmapeuaskej tlen Tekiuaj akin Ueyixtika ipan iluikak niman ipan tlaltikpaktli techtlajtlanilia matikchiuakan.

4. ¿Tleka uelis tikijtos ika tla nochipa tiknotsa Jehová melak kuajli iuan timouikas?

⁴ Niman okse tleka noneki matiknotsakan, pampa ijkuak tikchiuaj chikaui ken iuan touikaj Jehová. Akin kuajli nouikaj xsan nonotsaj ijkuak itlaj kinpoloua, nonotsaj nochipa pampa najmanaj itech tlen inpan nochiua. Niman ijkuak noijliaj tlen kinemiliaj, tlen kinmajmana niman tlen kimachiliaj, melak kuajli nouikaj. Iuan Jehová noijki ijkon panoua. Yejuin amoxtli yomitspaleui xkasikamati tlen melauak temachtia Biblia itech Jehová, ikualneskayouan niman tlenon kineki kichiuas ika tlayekapan. Tejua  yotimomachti ika yejua yemelak yoltika. Kema, ipan teoyotl uelis tikijlis moTajtsin iluikakchane tlen tiknemilia niman tlen yemelak tikmachilia. Ijkon melak kuajli timonisiuis itech (Santiago 4:8).

5. ¿Kenon tikmatij ika Jehová xnochimej kinkaki?

⁵ ¿Kikaki Jehová nochi teoyomej? Xkita tlenon okimijli israelitas xtetlakamatkej akin nemiyaj ipan itonaluan Isaías: “Maski miyekpa nenkichiuaj teoyotl, xnijkaki; nemomauan yotenkej ika yestli” (Isaías 1:15). Kuakon, tla tikchiuaj tlen toTajtsin xkuelita, yejua xkikakis ijkuak tiknotsaskej. Tla tiknekij matechkaki, noneki matikchiuakan tlen techtlajtlanilia.

6. Tla tiknekij toTajtsin matechkaki, ¿tlenon noneki tikpiyaskej, niman kenon tikteititiaj?

⁶ Kachtopa noneki matikpiyakan tlaneltokijli (xpoua Marcos 11:24). Pablo, itlatitlankauj Cristo, okijkuilo: “Pero Dios xuelis tikpaktiskej tla xitech tikpiaj totlaneltok, pampa para se uelis kinisiuis, ika onkaj kineltokas ika yejua melauak nemi, niman ika Dios kimakas tlaxtlauijli on yejuan melauak kitejtemouaj” (Hebreos 11:6). San ika, tikpiyaskej melauak tlaneltokijli xsan kijtosneki matikmatikan ika toTajtsin yoltika, ika techkaki niman technankilia ijkuak tiknotsaj. Tlaneltokijli noteititia ika tlen tikchiuaj. Itech ken tinemij noneki nesis ika tikpiyaj tlaneltokijli (Santiago 2:26).

7. a) ¿Tleka noneki matiknotsakan Jehová ika ueyi tlakaitalistli? b) ¿Kenon tikteititiaj ika tiknotsaj toTajtsin ika nochi toyojlo niman ika yolyemanilistli?

⁷ Jehová noijki kineki ika ijkuak tiknotsaskej matikchiuakan ika yolyemanilistli niman ika nochi toyojlo. ¿Xmelak ika miyek onka tleka noneki tiknotsaskej ika yolyemanilistli? Ijkuak yakaj tlajtoua iuan se tekiuaj noso tlanauatijketl, kichiua ika tlakaitalistli, pampa kimatstika  ika yejon tlakatl ueyixtika. Jehová noijki kinamiki matiknotsakan ika ueyi tlakaitalistli (Salmo 138:6). Noneki ijkon matikchiuakan pampa yejua “nochi ueli kichiua” (2 Corintios 6:18). Ken tiknotsaskej noneki manesi ika tiyolyemankej niman xtoueyimatij. Tla tiyolyemankej yejon kichiuas matiknotsakan ika nochi toyojlo niman xsan tikijliskej tlen yotiktsontekontlalijkej (Mateo 6:7, 8).

8. ¿Tlenon noneki tikchiuaskej ijkuak itlaj tiktlajtlanij ipan teoyotl?

⁸ ToTajtsin kineki matikchiuakan okse tlemach tla tiknekij matechkaki. Kineki matokojtilikan tikchiuaskej tlen tiktlajtlanij. Xtlanemili itech yejuin, tla tiktlajtlaniliaj Jehová “tlen tikuaskej”, noneki titekitiskej chikauak maski san katlejua tekitl tiknextiaj, tla ueli tikchiuaj yejuin tekitl (Mateo 6:11; 2 Tesalonicenses 3:10). Noijki, tla tiktlajtlaniliaj matechpaleui matijkauakan se tlajtlakojli, noneki maka tinemiskej kampa uelis techyoltilanas matitlajtlakokan (Colosenses 3:5). San ika, maski tla tikmatij tlenon noneki tikchiuaskej ijkuak tiknotsaskej toTajtsin, noneki tikmatiskej okseki tlemach itech teoyotl.

9. ¿Akinon noneki tiknotsaskej, niman ipampa akinon?

⁹ ¿Akinon tikchiuiliskej teoyotl? Jesús okinmachti inomachtijkauan ijkin makichiuakan teoyotl: “ToTajtsin akin tinemi ne iluikak” (Mateo 6:9). Kuakon, noneki matikchiuilikan teoyotl san toTajtsin Jehová. San ika, Jehová kineki matikchiuakan ipampa itokayo Jesús. ¿Tleka? Pampa ken otikitakej ipan capítulo 5, Jehová okuajtitlan Jesús ipan tlaltikpaktli matechmakixtiki itech tlajtlakojli niman mikilistli (Juan 3:16; Romanos 5:12). Noijki, okitlali kentla Ueyi Teopixki niman Teyolkuitijketl (Juan 5:22; Hebreos 6:20). Ika yejon, iTlajtol toTajtsin techijlia ika matikchiuakan teoyotl ipampa itokatsin Jesús. Niman Jesús okijto: “Nejua niojtli, niman nitlin melauak, niman no ninemilistli. Tej, san nejua notechkopa uelis ajsiskej ne itech on  Tajtli” (Juan 14:6). Tla tiknekij makinkakikan toteoyouan, noneki tiknotsaskej san Jehová ipampa itokatsin iKoneuj.

10. ¿Tleka xsan se onka kenon tinentoskej ijkuak tikchiuaskej teoyotl?

¹⁰ ¿Onka san se kenon noneki tinentoskej? Jehová xkitlajtlani kenon noneki matinentokan noso kenon matikintlalikan tomauan ijkuak tikchiuaj teoyotl. Biblia temachtia ika ijkuak se kichiuas teoyotl, uelis notlalijtos, notlankuaketstos noso ijkatos (1 Crónicas 17:16; Mateo 26:39; Hechos 21:5; Marcos 11:25). Xnoneki matechitakan kenon tinentokej ijkuak tikchiuaj teoyotl, tlen kema noneki, matikchiuakan ika nochi toyojlo. Uelis tikchiuaskej san ichtaka niman maski san kanon, ijkuak mojmostla tikchiuaj totekiyo noso ijkuak panoua tlen xtiknemiliayaj panos. Kemantika nion xakaj kitas tla tikchiujtokej teoyotl, san ika, Jehová kema techkaki (Nehemías 2:1-6).

11. ¿Tlenon uelis tikijtoskej ipan toteoyouan?

¹¹ ¿Tlenon uelis tikijliskej ipan toteoyouan? Biblia kijtoua: “San tlinon tejuamej tiktlajtlaniliskej”, nochipa ijkuak tiktlajtlanij “ijkon ken yejua [Jehová] kineki, yejua techkakis” (1 Juan 5:14). Kuakon uelis tiktlajtlaniliskej maski san tlenon tla tiktlajtlanij itech tlen yejua kineki manochiua. ¿Kineki matikijlikan tlen techajmana? ¡Kema! Tikchiuilis teoyotl Jehová kentla titlajtos ken se akin iuan timouika. Uelis ‘tiktlapouiliskej toyojlo’, kijtosneki, yemelak tikijliskej tlen tikmachiliaj (Salmo 62:8). Uelis tiktlajtlaniliskej matechpaleui ika iespíritu santo matikchiuakan tlen kuajli (Lucas 11:13). Noijki, uelis tiktlajtlaniliskej matechpaleui kuajli matiktlapejpenikan tlen tikchiuaskej niman matechpaleui matikijyouikan tlen tikixnamikij (Santiago 1:5). Ijkuak tikchiuaj se tlajtlakojli, noneki tiktlatlaujtiskej matechtlapopolui, niman matikneltokakan ika uelis kichiuas pampa Cristo okitemakak inemilis (Efesios 1:3, 7). Maka san matikchiuakan teoyotl topampa, noijki inpampa oksekimej, tochanejkauan niman akin tlaneltokaj ijkon ken tejuamej (Hechos 12:5; Colosenses 4:12).

12. Ipan toteoyouan tlen tikchiuiliaj toTajtsin iluikakchane, ¿kenon uelis tikteititiskej ika tiknekij kachtopa manochiua tlen yejua kineki?

 ¹² Ipan toteoyouan noneki tikteititiskej ika techajmana nochi tlen noteneua itech Jehová. Onka miyek tleka tikueyichiuaskej niman tiktlasojkamachiliskej toTajtsin ika nochi toyojlo ipampa itlasojtlalis (1 Crónicas 29:10-13). Ipan Mateo 6:9-13 tiknextiaj teoyotl tlen okichiuj Jesús kampa otechititi matiktlajtlanikan manochipaua itoka toTajtsin (xpoua). Sakin kitlajtlani mauajla iTekiuajyo niman manochiua tlen kineki toTajtsin ipan tlaltikpaktli ijkon ken nochiua ne iluikak. Tikitaj ika Jesús kachtopa kitlajtlani manochiua tlen melak noneki itech Jehová niman sakin, kitlajtlani tlen yejua kipoloua. Tla noijki kachtopa tiktlaliaj tlen kineki toTajtsin ipan toteoyouan, tikteititiskej ika xsan techajmana tlen topan nochiua.

13. ¿Tlenon techijlia Biblia itech kech kipiya ika tiuejkauiskej ipan toteoyouan?

¹³ ¿Kech kipiya ika uejkauiskej toteoyouan? Biblia xtechijlia kech kipiya ika uejkauis toteoyouan tlen tikchiuaj san toselti noso ijkuak tikchiuaj imixpan oksekimej. Ijkuak tikchiuaskej teoyotl, uelis tiuejkauiskej noso xtiuejkauiskej, ken ijkuak titlakuaskej uelis xtiuejkauiskej, san ika, ijkuak tiktlapouiliaj toyojlo Jehová san toselti kema uelis tiuejkauiskej (1 Samuel 1:12, 15). Jesús xkuajli otlajto intech akin nomatiyaj yolmelaujkej niman melak uejkauiyaj ijkuak kichiuayaj teoyotl pampa san kinekiyaj makimitakan (Lucas 20:46, 47). Teoyomej ken yejon xkuelita Jehová. Tlen melak noneki, matiknotsakan toTajtsin ika nochi toyojlo. Kuakon, san ijkuak nonekis, uelis tiuejkauiskej tiknotsaskej Jehová.

14. ¿Tlenon kijtosneki ijkuak ipan Biblia kijtoua “nochipa xchiuakan oración” niman tleka techyolchikaua yejon?

¹⁴ ¿Kemanon noneki matiknotsakan toTajtsin? Biblia techijlia: “Ma ka keman xkajkauakan ika nenkichiuaj oración” niman “nochipa xchiuakan oración” (Romanos  12:12; 1 Tesalonicenses 5:17). Yejon xkijtosneki tla noneki matiknotstokan toTajtsin nochi tonajli. Kijtosneki, ika mojmostla kipiya ika tikchiuiliskej teoyotl kampa tiktlasojkamachiliskej tlen kuajli techmaka niman tiktlajtlaniliskej matechyekana, matechyolseui niman matechyolchikaua. ¡Melak ueyi tlateochiualistli! Jehová techkauilia matiknotsakan san kemanon niman matiuejkauikan kech tejuamej tiknekiskej. Tla tiktlasojkaitaj ika ueli tiknotsaj toTajtsin iluikakchane, tiknekiskej tiknotsaskej maski san kemanon.

15. Ijkuak tikchiuaj teoyotl toselti niman imixpan oksekimej, ¿tleka kuajli tla tikijtouaj “amén” ijkuak tontlamij?

¹⁵ ¿Tleka kuajli tla tikijtouaj “amén” ijkuak tontlamij? Yejon tlajtojli kijtosneki “ijkon manochiua” noso “yemelak”. Ipan Biblia techititia ika kuajli tla tikijtouaj “amén” ijkuak tontlamij tikchiuaj teoyotl san toselti niman ijkuak tikijtouaj imixpan oksekimej (1 Crónicas 16:36; Salmo 41:13). Ijkuak tiknotsaj toTajtsin niman tikijtouaj “amén”, tikijtotokej ika totlajtoluan yemelak okiskej ipan toyojlo. Niman ijkuak tikijtouaj imixpan oksekimej (ichtaka noso chikauak), tikteititiaj ika tiknekij manochiua ijkon ken onoijto (1 Corintios 14:16).

16. ¿Tlenon uelis tikmatstoskej ijkuak tiknotsaj toTajtsin?

¹⁶ ¿Yemelak kinnankilia toteoyouan Jehová? ¡Kema! Onka miyek tlen ika uelis tikneltokaskej ika akin “kinkaki toteoyouan” kema kinnankilia melak miyek tlaltikpakchanejkej ijkuak kinotsaj (Salmo 65:2). Niman uelis tlatlamantik noso sesejneka ken technankilis.

17. ¿Tleka uelis tikijtoskej ika toTajtsin kintekitiltia iluikaktekitkej niman itekipanojkauan ijkuak kinnankilia toteoyouan?

¹⁷ Jehová kintekitiltia iluikaktekitkej niman tlaltikpakchanejkej ijkuak kinnankilia toteoyouan (Hebreos 1:13, 14). Miyekej ijkuak kitlajtlaniliaj toTajtsin makinpaleui makasikamatikan Biblia, xuejkaujtipan se itekipanojkauj  Jehová komintlapaloua. Itech yejuin tlen panoua, techititia ika iluikaktekitkej tlayekanaj ijkuak tlajtolmoyauaj itech iTekiuajyo toTajtsin (Apocalipsis [Revelación] 14:6). Niman ijkuak yemelak itlaj tiknekij, Jehová uelis kiyolmapeuas se akin kichiua ken Cristo matechpaleui niman ijkon technankilia (Proverbios 12:25; Santiago 2:16).

18. ¿Kenon kitekitiltia Jehová iespíritu santo niman iTlajtol ijkuak kinnankilia iteoyouan itekipanojkauan?

¹⁸ Jehová noijki kitekitiltia iespíritu santo niman  iTlajtol, Biblia, ijkuak kinnankilia inteoyouan itekipanojkauan. Ijkuak tiktlajtlaniliaj matechpaleui matikyektlalikan se tlauejli, yejua uelis techyekanas niman techyolchikauas ika iespíritu santo (2 Corintios 4:7). Niman ijkuak tiknotsaj matechpaleui kuajli matiktlapejpenikan tlen tikchiuaskej, miyekpa technankilia ika iTlajtol. Kanaj ijkuak tomachtijtoskej Biblia toselti, uelis tiknextiskej seki tlajtoltin tlen techpaleuis. Noijki uelis techpaleuis amatlajkuiloltin noso amoxtin ken yejuin tlen tikpiyaj. Niman, kemantika uelis techtlalnamiktiskej seki tlajtolpaleuilistin tlen melak noneki ipan matitlanemilikan. Yejuin uelis panos ijkuak tiauej ipan se tlanechikojli noso ijkuak se tlayekanketl akin najmana topampa techtlajtolpaleuiya (Gálatas 6:1).

19. ¿Tlenon noneki tikmatstoskej tla kemantika tiknemiliaj ika toTajtsin xnimantsin technankilia?

¹⁹ Kemantika kanaj uelis tiknemiliskej ika Jehová xnimantsin technankilia, san ika, yejuin xkijtosneki tla xueli kichiua. Matikilnamikikan ika Jehová technankilis ken yejua kinekis niman ijkuak yejua kitas kuajli kichiuas. Yejua kuajli kimatstika tlenon techpoloua niman kenon techpaleuis. Miyekpa techkauilia ika ‘matiktlajtlanilijtokan’, ‘matiktejtemojtokan’ niman ‘matiktetepinijtokan’ (Lucas 11:5-10). Tla ijkon tikchiuaj, tikititiskej ika kema  yemelak tiknekij tlen tiktlajtlanij niman tikneltokaj ika uelis kichiuas. Noijki, kanaj kemantika nion xtikitaj kenon Jehová technankilia. Xnemili itech yejuin, tla tiknotsaj pampa itlaj tikixnamiktokej, kanaj xtechpaleuis mapopoliui, san ika, kema uelis techmakas chikaualistli tlen ika titlaxikoskej (xpoua Filipenses 4:13).

20. ¿Tleka noneki tiktlasojkaitaskej ika ueli tiknotsaj toTajtsin?

²⁰ Melak tiktlasojkamachiliaj akin okichijchiuj iluikak niman tlaltikpaktli ika ueli nemi nisiuj intech akin kinotsaj ken yejua kineki (xpoua Salmo 145:18). Matiktlasojkaitakan yejuin tlateochiualistli niman matikchiuakan teoyotl. Tla tikchiuaj, tipakiskej pampa tikmatij ika uelis kuajli tiknisiuiskej akin kinkaki toteoyouan.