1, 2. Akin et nibaga tayon baleg a pribilehyo so pikakasi, tan akin et kaukolan tayon amtaen no antoy ibabangat na Biblia nipaakar ed satan?

SAY planetan dalin et melmelag no ikompara ed maaw-awang ya uniberso. Diad tua, parad si Jehova, “say Dios a nanggawa na tawen tan dalin,” saray bansa et singa labat tedter na danum ed timba. (Salmo 115:15; Isaias 40:15) Balet, siansia nin ibabaga na Biblia: “Si Jehova et asingger ed amin ya ontatawag ed sikato, amin ya ontatawag ed sikato diad katuaan. Pepeneken to so pirawat na saramay ontatakot ed sikato; dedengelen to so ikekerew day tulong.” (Salmo 145:18, 19) Isip mo pa labat itan! Say makapanyarin-amin ya Manamalsa et asingger ed sikatayo tan ondedengel no ‘ontatawag itayo ed sikato diad katuaan.’ Talagan baleg a pribilehyo so onasingger ed Dios diad pikakasi!

² Balet pian dengelen nen Jehova iray pikakasi tayo, kaukolan ya manpikasi tayo diad paraan ya labay to. Agtayo itan nagawaan no agtayo amta so ibabangat na Biblia nipaakar ed pikakasi. Kanian importantin amtaen tayo no antoy ibabaga na Biblia, ta say pikakasi et makatulong pian lalon onelet so relasyon tayod si Jehova.

3. Antoy sakey ed saray importantin rason no akin a nepeg itayon manpikasi ed si Jehova?

³ Say sakey ya importantin rason no akin a nepeg ya manpikasi tayod si Jehova et lapud pagagawa to itan ed sikatayo. Ibabaga na Salita to ya oniay gawaen tayo: “Agkayo mapagpaga ed antokaman, noagta diad amin a bengatla et ipaamta yo ed Dios iray kerew yo diad panamegley na pikakasi tan masimoon a pikekerew tekep na pisasalamat; tan say kareenan na Dios a palumbasan toy amin a pakatalos so manbantay ed saray puso tan nonot yo diad panamegley nen Kristo Jesus.” (Filipos 4:6, 7) Seguradon agtayo labay ya ibaliwala itan a pribilehyo ya maaron inter ed sikatayo na Sankatagyan a Manuley ed uniberso!

4. Panon ya makatulong so regular ya pikakasi pian onelet so relasyon tayod si Jehova?

⁴ Sakey ni, no regular itayon manpipikasi ed si Jehova, onelet so relasyon tayod sikato. Say tuan sankaaro et aglabat mantongtong no walay kaukolan da. Imbes, say maong a sankaaro et interesado ed balang sakey, tan mas onelet so pankakaaro da no ibaga dan amin so nalilikna, nononoten, tan pakakaaburidoan da. Mipadpara itan ed relasyon  tayod si Jehova a Dios. Diad tulong na sayan libro, dakel lay naaralan mon ibabangat na Biblia nipaakar ed si Jehova, ed personalidad to, tan ed panlabayan to. Naamtaan mo ya sikatoy sakey ya tuan Persona. Lapud pikakasi, pankanawnawam ya ibaga so nononoten tan naliliknam ed Ama tayon walad tawen. Diad ontan, lalon onelet so relasyon mod si Jehova.​—Santiago 4:8.

5. Antoy mangipapanengneng ya aliwan amin ya pikakasi et dedengelen nen Jehova?

⁵ Dedengelen kasi nen Jehova so amin a pikakasi? Imanoen pay imbaga tod saray rebelyoson Israelita diad panaon nen propeta Isaias: “Anggano dakerakel so pikakasi yo, agko dedengelen iratan, saray lima yo et napnoy dala.” (Isaias 1:15) Kanian no wala ray makapuy a kagagawa tayo, nayarin agdengelen na Dios iray pikakasi tayo. Pian dengelen na Dios sirin iray pikakasi tayo, wala ray pigaran kaukolan tayon gawaen.

6. Pian dengelen na Dios iray pikakasi tayo, antoy manunan kaukolan tayon ipanengneng, tan panon tayon nipanengneng itan?

⁶ Unona, kaukolan tayon ipanengneng so pananisia. (Basaen so Marcos 11:24) Insulat nen apostol Pablo: “No anggapoy pananisia et imposiblin napaliket so Dios, ta siopaman ya onaasingger ed Dios et nepeg a manisia a sikatoy wala tan tumangan to iramay masimoon a manaanap ed sikato.” (Hebreo 11:6) No tuay pananisia tayo, agti labat basta manisia ya walay Dios, noagta kombinsido tayo met ya dengelen tan ebatan to ray pikakasi. No walay pananisia tayo, nanengneng itan ed kagagawa tayo. Kada agew et nepeg tayon paneknekan itan.​—Santiago 2:26.

7. (a) Akin et kaukolan tayoy magmaliw ya marespeto no mitongtong tayod si Jehova diad pikakasi? (b) No manpikasi itayo, panon tayon nipanengneng ya mapaabeba tan marespeto tayo?

⁷ Labay met nen Jehova ya mapaabeba tan marespeto tayon manpikasi ed sikato. Agta nepeg labat ya mapaabeba  tayon mitongtong ed si Jehova? No saray totoo et naikday tsansa ya mitongtong ed ari odino presidente, seguradon marespeto rad sikato tan bibidbiren da so atagey a posisyon to. Lalo lan ipanengneng tayoy respeto no mitotongtong tayod si Jehova diad pikakasi! (Salmo 138:6) Sikato so “Dios a Makapanyarin-amin.” (Genesis 17:1) No manpikasi tayod Dios, kaukolan ya nanengneng ed paraan na pitotongtong tayod sikato ya mapaabeba tayon bibidbiren ya abebbeba tayo no ikomparad sikato. Ontulong met itan pian say pikakasi tayo et manlapud puso tan napaliisan tayoy apasakey tan paulit-ulit ya pikakasi.​—Mateo 6:7, 8.

8. No walay ipipikasi tayo, anto met so kaukolan tayon gawaen?

⁸ Say sakey nin kaukolan pian dengelen na Dios iray pikakasi tayo et gawaen tayo no antoy ipipikasi tayo. Iilaloan nen Jehova ya pankimeyan tayo so impikasi tayo. Singa bilang, no ipipikasi tayon, “Ikdan mo kami na kanen mi ed sayan agew,” nepeg ya makuli tayo tan agtayo mapili na trabaho. (Mateo 6:11; 2 Tesalonica 3:10) No ipipikasi tayon nalabanan tayo komon iray kakapuyan tayo, nepeg tayon paliisan iray situasyon ya pakatuksoan tayo. (Colosas 3:5) Niarum nid sarayan taloran kaukolan tayon gawaen, wala ray tepet nipaakar ed pikakasi ya nepeg tayon ebatan.

9. Siopay nepeg tayon pampikasian, tan diad panamegley na siopa?

⁹ Siopay nepeg tayon pampikasian? Imbangat nen Jesus iray patumbok to ya manpikasi ed ‘Ama tayon walad tawen.’ (Mateo 6:9) Kanian si Jehova a Dios labat so nepeg ya pampikasian tayo. Balet, labay nen Jehova ya bidbiren tayo so posisyon na saksakey ya Anak to, si Jesu-Kristo. Singa naaralan tayo lad Kapitulo 5, imbaki si Jesus diad dalin pian nadondon itayo manlapud kasalanan tan patey. (Juan 3:16; Roma 5:12) Sikato so pinilin Atagey a Saserdote tan Ukom. (Juan 5:22; Hebreo 6:20) Kanian ibabaga na Biblia ya manpikasi itayo panamegley nen Jesus. Ta imbagan mismo  nen Jesus: “Siak so dalan tan say katuaan tan say bilay. Anggapoy makasabi ed Ama no aliwan diad panamegley ko.” (Juan 14:6) Pian dengelen sirin nen Jehova iray pikakasi tayo, nepeg ya sikato labat so pampikasian tayo panamegley na Anak to.

10. Akin et anggapoy espisipikon posisyon ya kaukolan no manpikasi tayo?

¹⁰ Wala kasi kaukolan ya posisyon no manpikasi itayo? Anggapoy igaganggan nen Jehova ya espisipikon posisyon na laman odino lima tayo no manpipikasi. Ibabangat na Biblia ya aawaten na Dios so nanduruman posisyon no manpipikasi ed sikato. Nayari manpikasi ya akayurong, akatuek, akatalimukor, tan akaalagey. (1 Awaran 17:16; Nehemias 8:6; Daniel 6:10; Marcos 11:25) Aliwan say posisyon tayo so importante, noagta say dugan motibo na puso tayo. Diad tua, anggan iner so kawalaan tayo, anggan antoy gagawaen tayo, odino no walay emergency, sarag tayoy manpikasin makalna o diad isip labat. Dedengelen nen Jehova iratan a pikakasi anggano ag-iratan naiimano na arum.​—Nehemias 2:1-6.

11. Antoy arum ed saray pampapagaan tayo ya sarag tayon ipikasi?

¹¹ Antoy nayarin ipikasi tayo? Oniay ibabaga na Biblia: “Antokaman so kekerewen tayo unong ed linawa to, dedengelen to itayo.” (1 Juan 5:14) Kanian nayarin ipikasi tayo so antokaman ya unong ed linawa o panlabayan na Dios. Kasin linawa to ya ipikasi tayo ray pakakaaburidoan tayo? On! Say pampikasi ed si Jehova et singa pitongtong ed sakey a kaaro. Nayarin ibaga tayoy amin ya nalilikna tayo, ya ‘ibalikas tayod sikato so amin a walad puso tayo.’ (Salmo 62:8) Duga labat ya onkerew tayoy masanton espiritu, ta ontulong itan pian nagawaan tayoy duga. (Lucas 11:13) Sarag ti’ met so onkerew na panangigiya pian makapandesisyon tayoy duga, tan onkerew na biskeg pian nasarag tayo ray irap. (Santiago 1:5) No akagawa tayoy kasalanan, kaukolan ya onkerew itayo na panamerdona base ed bagat nen Kristo. (Efeso 1:3, 7) Siempre, aliwa labat lan saray personal a pankaukolan  tayo so ipikasi tayo. Nepeg ya ipikasi tayo met so arum, saray kapamilya tayo tan saray kaagian tayo.​—Gawa 12:5; Colosas 4:12.

12. Panon tayon nipanengneng diad saray pikakasi tayo ya importante ed sikatayo iray bengatlan nipaakar ed Ama tayo?

¹² Nepeg ya manunan ipikasi tayo so nipaakar ed si Jehova a Dios. Seguradon dakel so rason pian ibalikas so impapuson panangidayew tan pisasalamat ed sikato lapud amin ya kaabigan to. (1 Awaran 29:10-13) Angiter si Jesus na pangaligan a pikakasi ya nabasad Mateo 6:9-13. (Basaen.) Ditan et imbangat to tayon ipikasi ya napasanto komon so ngaran na Dios. Labay ton ibaga, ipasen tayo itan ya sagrado odino masanto. Insan imbaga to met ya onsabi la komon so Panarian na Dios tan nagawa komon so linawa to diad dalin a singa ed tawen. Kayarin binitla nen Jesus iratan ya importantin bengatla nipaakar ed si Jehova, insan to imbaga iray personal ya pankaukolan. No iyuna tayo met ya ipikasi so nipaakar ed Dios, nipanengneng tayo ya aliwan say pankaabigan tayo labat so nononoten tayo.

13. Antoy ipapanengneng na Biblia nipaakar ed karukey na saray pikakasi ya makapaliket ed si Jehova?

¹³ Panon karukey so pikakasi tayo? Anggapoy ibabaga na Biblia no panoy karukey na pikakasi tayo diad pribado odino diad publiko. Nayarin antikey so pikakasi antis ya mangan, balet nayarin andukey so personal ya pikakasi tayo, ya ibaga tayod si Jehova so amin ya walad puso tayo. (1 Samuel 1:12, 15) Balet, kabusol nen Jesus iray mankunkunwarin matunong, ya no manpikasi ra et andukdukey tan mapasirayew. (Lucas 20:46, 47) Say ontan iran pikakasi et agmakapaliket ed si Jehova. Say importante et manpikasi itayo a manlapud puso. Kanian, nayarin nandurumay karukey na pikakasi ya makapaliket ed si Jehova depende ed pankaukolan tan situasyon.

14. Antoy labay ya ibaga na Biblia nen bibilinen itayo na satan ya ‘agtayo ontutundan manpikasi,’ tan akin ya makapalikliket itan?

¹⁴ Panon kabetbet so nepeg tayon pampikasi? Bibilinen itayo  na Biblia ya ‘agtayo ontutundan manpikasi,’ ‘manseet tayon manpikasi,’ tan ‘naynay tayon manpikasi.’ (Mateo 26:41; Roma 12:12; 1 Tesalonica 5:17) Siempre, aglabay ya ibaga na satan ya sanagew itayo lan manpikasi ed si Jehova. Imbes, bibilinen itayo na Biblia ya regular tayon manpikasi, naynay tayon pisalamatan si Jehova lapud kaabigan tod sikatayo tan ipikasi tayon igiya, ligliwaen, tan pabiskegen to itayo. Agta makapaliket a naamtaan ya ag-angiter si Jehova na espisipikon karukey o kabetbet na pampikasi ed sikato? No talagan papablien tayoy pribilehyo ya manpikasi, dakel so pankanawnawa tayon manpikasi ed Ama tayon walad tawen.

15. Akin et kaukolan tayon ibagay “Amen” diad sampot na personal tan publikon pikakasi?

¹⁵ Akin et kaukolan tayon ibaga so “Amen” diad sampot na pikakasi tayo? Say labay ya ibaga na “amen” et “segurado,” odino “nagawa pa komon.” Ipapanengneng na saray alimbawa ed Biblia ya duga so pangibagay “Amen” diad sampot na saray personal tan publikon pikakasi. (1 Awaran 16:36; Salmo 41:13) No ibaga tayoy “Amen” diad sampot na pikakasi tayo, ipapanengneng tayon manlalapud puso so pikakasi tayo. No ibaga tayoy “Amen,” balanglan diad nonot labat odino imbalikas itan diad sampot na pikakasi na arum, nipanengneng tayon mipapakna itayo ed saray imbaga to.​—1 Corinto 14:16.

16. Talaga kasin eebatan na Dios iray pikakasi?

¹⁶ Talaga kasin eebatan nen Jehova iray pikakasi? On! Walay prueba tayo ya talagan eebatan na “Dumerengel na pikakasi” iray impapuson pikakasi na minilyon a totoo. (Salmo 65:2) Tan eebatan nen Jehova iray pikakasi tayo diad nanduruman paraan.

17. Akin et nibagan uusaren na Dios iray anghel to tan saray lingkor to diad dalin pian ebatan iray pikakasi tayo?

¹⁷ Uusaren nen Jehova iray anghel to tan saray lingkor to  diad dalin pian ebatan iray pikakasi. (Hebreo 1:13, 14) Dakel lay akaeksperiensya ya nen impikasi dad Dios ya natalosan da komon so Biblia, agnambayag et walay akatongtong dan sakey ya lingkor nen Jehova. Ipapanengneng na saratan ya eksperiensya ya igigiya na saray anghel so pangipupulong ed Panarian. (Apocalipsis 14:6) Pian naebatan iray pikakasi tayo diad panaon ya mankakkaukolan tayo, nayarin pakiwasen nen Jehova so sakey a Kristiano pian tulongan itayo.​—Proverbio 12:25; Santiago 2:16.

18. Panon ya uusaren nen Jehova so masanton espiritu to tan say Salita to pian ebatan iray pikakasi na saray lingkor to?

 ¹⁸ Uusaren met nen Jehova a Dios so masanton espiritu to tan say Salita to, say Biblia, pian ebatan iray pikakasi na saray lingkor to. No ipipikasi tayon nasarag tayo komon iray subok, nayarin ebatan to itan diad pangigiya tan pamabiskeg ed sikatayo panamegley na masanton espiritu to. (2 Corinto 4:7) No onkekerew itayo na panangigiya, mabetbet ya eebatan to iratan manlapud Biblia. Panamegley na satan et tutulongan itayo nen Jehova pian makapanggawa tayoy dugan desisyon. Nayarin naromog tayo ray teksto ya makatulong ed sikatayo legan tayon aaralen so Biblia tan babasaen iray based Biblia ya publikasyon, a singa sayan libro. Saray importantin punto ed Biblia ya kaukolan tayon naamtaan et nayarin nipaimano ed sikatayo diad saray aral odino diad komento na sakey ya maaron elder ed kongregasyon.​—Galacia 6:1.

19. Antoy nepeg tayon tandaan no singa agnaeebatan iray pikakasi tayo?

¹⁹ Balet, no singa mabayag ya ebatan nen Jehova iray pikakasi tayo, agto labay ya ibaga ya agto nayarian ya ebatan iratan. Imbes, tandaan tayo ya eebatan nen Jehova iray pikakasi unong ed linawa to tan diad dugan panaon. Mas amta to nen say sikatayo no anto ray kaukolan tayo tan no panon to iratan ya iter. Mabetbet, labay ton itultuloy tayoy ‘onkerew, mananap, tan ontoktok.’ (Lucas 11:5-10) No gawaen tayo itan, nipanengneng tayod Dios ya talagan labalabay  tayon ebatan to itan tan mabiskeg so pananisia tayo. Sakey ni, nayarin ebatan nen Jehova iray pikakasi tayo diad paraan ya agtayo naliklikas. Singa bilang, no nasusubok tayo, nayarin ebatan toy pikakasi tayo diad pangiter toy biskeg pian nasarag itan, aliwan diad pangekal ed saray naeeksperiensya tayon irap.​—Basaen so Filipos 4:13.

20. Akin et nepeg ya regular tayon manpikasi ed si Jehova?

²⁰ Talagan misalsalamat tayo ta say Amalsa ed sayan maaw-awang ya uniberso et asingger ed amin ya manpipikasid sikato diad dugan paraan! (Basaen so Salmo 145:18.) Komon ta regular itayon manpikasi ed si Jehova ta mabmabli itan ya pribilehyo. No ontan so gawaen tayo, lalon ombiskeg so relasyon tayod si Jehova, say Dumerengel na pikakasi.