1, 2. Ngera me a nglunguuch a kmal ileakl el techall? E ngera me ngkired el mo medengei a osisecheklel a Biblia el kirel?

A DOMEKESIU er a beluulechad er tia el klou el melidiul, e ngkmal imis el kekerei. Ngngar er a osengel a Jehovah, el “ngikel milebii a eanged ma chutem,” e a rechad a di ua ngimech el ralm. (Psalm 115:15; Isaia 40:15) Me nguaisei, engdi a Biblia a kmo: “Ng kmeed er tirkel rokui el omekedong er ngii, el tirkel mera er a rengrir omekedong er ngii. Ng mesterir a lousbech tirkel rokui el meluu er ngii; ng orrenges ongterir.” (Psalm 145:18, 19) Ka di molatk er tiang! Ngike el mesisiich el Ulemeob a kmeed er kid e orrenges er kid a lsekum e kede mera el ngara rengud e “omekedong er ngii.” Ngmera el ileakl el techall a dobang el sebeched el meluluuch el mo er a Dios!

² Me nguaisei, engdi a lsoad a Jehovah a lorrenges a nglunguched e ngkired el meluluuch el ngar er a rolel el kengei er ngii. Ngmekerang a doruul er tiang a lsekum e ngdiak dodengei a osisecheklel a Biblia  el kirel a nglunguuch? Ngklou a ultutelel a bo dodengei a lolisechakl a Biblia el kirel a nglunguuch e le nglunguuch a ngosukid el mo kmeed er a Jehovah.

3. Ngera ta er a klou el uchul me kede meluluuch el mo er a Jehovah?

³ A ta er a klou el uchul e ngkired el meluluuch el mo er a Jehovah, a ngii el melisiich er kid el mo meruul el uaisei. A Tekingel a kmo: “Lak el sebek a rengmiu er a ngii di le ngerang, e bai molengit er a Rubak er a bek el nglunguchiu, a ikel mousbech, el di blechoel el mereng a sulel. E a budech er a Dios, el diak el sebechel a chad el mo cherrungel el medengelii, a mo mtebechel a rengmiu ma uldesuiu el oltirakl er a Kristus Jesus.” (Filipi 4:6, 7) Me kede ulterekokl el kmal oba klou el omereng el saul el kirel tia el ileakl el tekoi el bla leketmeklii Ngike el Kot el Ngarbab el Merreder!

4. Ngmekera e mo kmes a deleuill er kid me a Jehovah a deblechoel el meluluuch?

⁴ A lmuut el ta er a klou el uchul me kede meluluuch a kmo, a deblechoel el meluluuch el mo er a Jehovah e ngsmisichii a deleuill er kid me Ngii. A remera el kausechelei a diak di el chadecheduch sel lebo er ngii a lousbech. Te bai kelatk, e sel leblechoel el kaiuecholt aike el ngar er a uldesuir me a rengrir e nglmuut el mo mesisiich a deleongel er tir. Me nguaisei, a deleuill er kid me a Jehovah a kmeed el osisiu. Ngoeak tia el babier, e ke mla suub a betok el osisecheklel a Biblia el kirel a Jehovah me a blekerdelel me a moktek er Ngii. Me a Jehovah a mla mo  mera el chad er a rengum. A nglunguuch a meskau a techall el mo olecholt a uldesuem me aike el ngar er a rengum el mo er a Demam el ngar er a eanged. Sel omoruul el uaisei, e ke olekeed er kau er a Jehovah.​—Jakobus 4:8.

5. Ngera ochotii el kmo a Jehovah a diak el orrenges a rokui el nglunguuch?

⁵ A Jehovah ngorrenges a rokui el nglunguuch? Ka momtab a tekoi el lullekoi er a temel a profet el Isaia el mo er a rulemtok el chad er a Israel. Ngdilu el kmo: “Cho msal kmal meluluuch, me ngak a di diak bo kurrenges, ele chimomiu a chelsechusem er a klengit.” (Isaia 1:15) Me a tekoi el doruul a sebechel el mo uchul me a Dios a diak el orrenges a nglunguched. Me nguaisei, ngar er ngii a kired el meruul a lsoad a Dios a lorrenges a nglunguched.

6. A bo lorrenges a nglunguched a Dios, e ngngera kired el meruul er ngii? E mekerang a dolecholt er ngii?

⁶ Me a kot e ngkirel el ngar er ngii a klaumerang  er kid. (Monguiu er a Markus 11:24.) A apostol el Paulus a milluches el kmo: “Ng diak a chad el diak loumerang e sebechel el odeuir a rengul a Dios, ele ngii di le chad el mor a Dios a kirel el oumerang el kmo ng ngar ngii a Dios, e ngii a omesterir omeksullir tirkel osiik er ngii.” (Hebru 11:6) Me a doba mera el klaumerang a diak el belkul a kmo, kede di oumerang el kmo ngmera el ngar er ngii a Dios e ngii a orrenges e onger a nglunguched. A klaumerang a mocholt el ngar er a omerelled. Me a blekerdelel a klengar er kid er a bek el sils a kirel olecholt er a klaumerang el dobang.​—Jakobus 2:26.

7. (a) Ngera me ngkired el olecholt a omengull a doluluuch el mo er a Jehovah? (b) Sel doluluuch e kede mekera e ochotii a klengariourreng e melekoi aike el mera el ngar er a rengud?

⁷ A Jehovah a dirrek el soal tirke el meluluuch el mo er Ngii a lolecholt er a klengariourreng e lolekoi aike el mera el ngar er a rengrir. Ngdiak el kired el olecholt er a klengariourreng a dongedecheduch er a Jehovah? A rechad sel lebo er ngii a techellir el mo mengedecheduch er a king me a lechub e ng president, e te kmal olecholt er a omengull e le ngngarbab a deruchellir. Me ngkmal kired el lolecholt er a dmolech el omengull sel doluluuch el mo er a Jehovah! (Psalm 138:6) Ngii a “Dios el Olab a Bek el Klisiich.” (Genesis 17:1) Me a rolel a doluluuch el mo er a Dios a kirel el ochotii el kmo a domekesiu er kid er Ngii e kede kmal diak dengerang. Tia el klengariourreng a rullid el mo meluluuch el mera el ngar er a rengud, el diak di domelekl a nglunguched.​—Mateus 6:7, 8.

8. Ngmekerang a doruul a tekoi el oltirakl a nglunguched?

⁸ A lmuut el ta er a kired el meruul er ngii me  lemorenges a nglunguched, a kired el oureor el oltirakl er a nglunguched. El uai tiang, a doluluuch el kmo, “Beskemam a kelam el ikel kim ousbech er chelechal sils,” e ngkired el mo er a tkurrebab el klisiched el meruul a ngii di el ureor el sebeched. (Mateus 6:11; 2 Thesalonika 3:10) E a lsekum e kede meluluuch el mo mesisiich er a chelitechetud, e ngkired el kerekikl el mengeroid er kid er a tekoi el sebechel choitikikid. (Kolose 3:5) Me nguaisei, ngdirrek el dirk ngar er ngii a ker el kirel a nglunguuch el kirel el monger.

9. Kede meluluuch el mo er techang? E okiu a techang?

⁹ Kede meluluuch el mo er techang? A Jesus a ullisechakl er a rulebengkel el mo meluluuch el mo er a ‘Demad el ngar er a eanged.’ (Mateus 6:9) Me ngdi kired el meluluuch el mo er a Jehovah el Dios. A Jehovah a dirrek el mengerechir er kid el mo medengelii a deruchellel a di ta el ngelekel el Jesus Kristus. Me ngua dulsuub er a 5 el Bliongel, a Jesus a mlei er a beluulechad el me melubet er kid er a klengit me a kodall. (Johanes 3:16; Rom 5:12) Ngii a mla metutk el mo Ngarbab el Prist e Chad er a Kerrekeriil. (Johanes 5:22; Hebru 6:20) Sei a uchul, me a Biblia a omekrael er kid el mo meluluuch el okiu a Jesus. A Jesus a dilu el kmo: “Ngak a rael, e klemerang, e klengar; ng diak a chad el mor a Chedam, a lak lokiu ngak.” (Johanes 14:6) Me a lsoad a bo lemorenges a nglunguched, ngdi kired el meluluuch el mo er a Jehovah el loeak a Ngelekel.

10. Ngera me ngdiak a ileakl el teletelel a doluluuch?

 ¹⁰ Ngkirel el ngar er ngii a ileakl el teletelel a doluluuch? Ngdiak. A Jehovah a diak longerechir er a ulterekokl el teletelel a doluluuch. A Biblia a olisechakl el kmo ngsebeched el dengchokl, e terrob, e outubuach, me a lechub e kede dechor e meluluuch. (1 Kronika 17:16; Nehemia 8:6; Daniel 6:10; Markus 11:25) A klou a ultutelel a diak el sel teletelel a doluluuch e ngbai sel melemalt el uldasu el dobang. Me sel doruul a tekoi er a bek el sils me a lechub e bo dechebangel a bkaischemrungel el tekoi, e kede blechoel el di ngar er aike el dengar er ngii e meluluuch er a chelsel a rengud. Me alta e ngdimlak a chad el medengei, engdi a Jehovah a remenges a nglunguched.​—Nehemia 2:1-6.

11. Ngera bebil er a tekoi el sebeched el meluluuch el kirel?

¹¹ Ngera sebeched el meluluuch el kirel? A Biblia a kmo: “A dolengit a ngiidi le ngeral tekoi el oltirakl a uldesuel a Dios e ngrongesii ngiil ongtid.” (1 Johanes 5:14, BT) Me ngsebeched el meluluuch el kirel a ngii di el tekoi el oltirakl er a soal a Dios. A Dios ngsoal a doluluuch el kirel a tekoi el suebek a rengud er ngii? Chochoi! A doluluuch el mo er a Jehovah e ngdi ua dongedecheduch er a kmeed el sechelid, el sebeched el ouchais er ngii ‘a ikel ngar a rengud.’ (Psalm 62:8) Ngungil a dolengit er a chedaol reng er a Dios me lengesukid el mo meruul a llemalt. (Lukas 11:13) Ngdirrek el sebeched el olengit a ulekrael el mo ungil melilt a tekoi me a klisiich el mo outekangel a ringel. (Jakobus 1:5) Me a debo er a klengit, e ngkired el olengit a klausubes el loeak a tengetengel a Kristus. (Efesus 1:3, 7) Engdi ngdiak el soad el meluluuch el di kired. Ngdirrek el kired el  meluluuch el kirir a rebebil, el ua telungalek er kid me a rekldemed er a klaumerang.​—Rellir 12:5; Kolose 4:12.

12. Ngmekerang a tekoi el kirel a Demad el ngar er a eanged e mo kot er a nglunguched?

¹² A Jehovah me a moktek er Ngii a kirel el mo kot el meklou a ultutelel el tekoi er a nglunguched. Ngkmal ngar er ngii a ungil el uchul e kede oldanges er Ngii e oureng a sulel er aike el rokui el ungil el bla el rruul el kired. (1 Kronika 29:10-13) A Jesus a ulechotii a rolel a doluluuch el ngar er a Mateus 6:9-13. Ngdilu el kmo, a ngklel a Dios bo lemechedaol. (Monguiu.) A Rengedel a Dios lemei me a uldesuel a rengul lemeruul er a chutem el uai a omerellel er a eanged. E a uriul er a loluluuch el kirel aika el meklou a ultutelel el tekoi, e ngmiluluuch el kirel aike el dousbech. Me sel lsekum a Jehovah me a moktek er Ngii a mo kot el meklou a ultutelel el tekoi er a nglunguched, e kede ochotii el kmo ngdiak di dolatk er kid.

13. Ngera ngmelekoi a Biblia el kirel a klemengetel a nglunguuch el kengei er ngii a Dios?

¹³ Ngkirel el mo ua ngera klemengetel a nglunguched? A Biblia a diak loluk er a klemengetel a nglunguuch. Ngsebechel el di kekedeb el nglunguuch er a uchei er a blengur, me a lechub e ngkemanget el nglunguuch el louchais aike el ngar er a rengud el mo er a Jehovah. (1 Samuel 1:12, 15) Me nguaisei, engdi a Jesus a uluuketui er a rechad el mekemanget a nglunguchir el di meruul a ues. (Lukas 20:46, 47) A Jehovah a diak el kengei a chouaisei el nglunguuch. Sel klou a ultutelel a kmo, kede meluluuch el ngar er a rengud. A klemengetel a  nglunguuch el kengei er ngii a Dios a di mo ultuil er a blekeradel el ngar er ngii.

14. Ngera belkul sel lolisiich er kid a Biblia el kmo, “di blechoel el meluluuch”? E ngera me tia el tekoi a mengelaod a rengud?

¹⁴ Ngkirel ua ngera ildisel a taem el doluluuch? A Biblia a melisiich er kid el “di blechoel el meluluuch” e ‘lak demekimd el meluluuch.’ (Rom 12:12; 1 Thesalonika 5:17, BT) Nguaisei, engdi aika el tekoi a diak el belkul a kmo ngkired el ta el sils el di doluluuch el mo er a Jehovah. A Biblia a bai mengelechel er kid el mo bek el sils el doluluuch el oureng a sulel a Jehovah, el kirel aike el ungil el tekoi el bla el rruul el kired, e dosiik a ulekrael me a ongelaod me a klisiich er Ngii. Ngungil a rengud e le kede medengei el kmo a Jehovah a diak loluk er a klemengetel me a ildisel a taem el sebeched el mengedecheduch er Ngii el oeak a nglunguuch. Me a lsekum e kede mera el oba omereng el saul el kirel a nglunguuch, e kede mo osiik a techall el meluluuch el mo er a Demad el ngar er a eanged.

15. Ngera me ngkired el dmu “Amen” er a ulebengelel a nglunguched me a nglunguuch el ngar er a buai?

¹⁵ Ngera me ngkired el dmu “Amen” er a ulebongel er a nglunguuch? A tekoi el “amen” a belkul a kmo “nguaisei” me a lechub e ng “bo leuaisei.” A tekoi el deues el ngar er a Biblia a ochotii el kmo ngmelemalt a dedu “Amen” er a ulebengelel a nglunguched me a nglunguuch el ngar er a buai. (1 Kronika 16:36; Psalm 41:13) Sel dedu “Amen” er a ulebengelel a nglunguched, e kede melisiich el kmo a tekoi el dullekoi a mera el mla er a rengud. Me a dedu “Amen” me a lechub e kede di melekoi er ngii er a  rengud er a ulebengelel a nglunguchel a chad el ngar er a buai, e kede ochotii el kmo kede kongei aike el tekoi el meldung.​—1 Korinth 14:16.

16. Ngera sebechel el mo ulterekokl a rengud er ngii el kirel a nglunguuch?

¹⁶ A Jehovah ngmera el longer a nglunguuch? Chochoi! Ngulterekokl a rengud el kmo Ngike el ‘Onger  a nglunguuch’ a onger a nglunguchir a rebetok el miliol el chad el mera el ngar er a rengrir e meluluuch el mo er Ngii. (Psalm 65:2) Me a Jehovah a onger a nglunguched el oeak a kakerous el rolel.

17. Ngera me ngsebeched el melekoi el kmo, a Jehovah a ousbech er a rechanghel er ngii me a remesiungel er tia el chutem el mo onger a nglunguched?

¹⁷ A Jehovah a ousbech er a rechanghel er ngii me a remesiungel el ngar er tia el chutem el mo onger a nglunguuch. (Hebru 1:13, 14) Te betok a milluluuch el kirel a ngeso el mo medengelii a Biblia e di mle telkib el taem er a uriul e a remesiungel a Jehovah a mlo metik er tir. A chouaisei el chais a meketeklii el kmo, a rechanghel a omekrael er a ureor er a berkel a klumech. (Ocholt 14:6) Me sel doluluuch el mo er a Jehovah er a taem el desal ousbech a ngeso, e ngsebechel el mo mekrolii a ta er a Kristiano el mo olengeseu er kid.​—Osisechakl 12:25; Jakobus 2:16.

18. Ngmekerang a Jehovah a lousbech er a chedaol reng me a Tekingel el onger a nglunguchir a remesiungel?

¹⁸ A Jehovah el Dios a dirrek el ousbech er a chedaol reng me a Tekingel el Biblia, el onger  a nglunguchir a remesiungel. Ngsebechel el onger a nglunguched el mo outekangel a omelsemai sel lomeskid a ulekrael me a omelisiich el okiu a chedaol reng er ngii. (2 Korinth 4:7) A nger er a nglunguched el kirel a ulekrael a blechoel el ngar er a Biblia, el oeak ngii e a Jehovah a ngosukid el mo ungil melilt a tekoi. Ngsebeched el metik a bades el ngosukid sel dosuub er a Biblia me aike el babier el mlengai er a Biblia, el uai tia el babier. Ngdirrek el sebeched el ngmai a ngeso er a uldasu el oeak a tekoi el medung er a miting er a Rekristiano me a lechub e ngtekingir a remechuodel er a ongdibel.​—Galatia 6:1.

19. Ngera kired el melatk er ngii a lsekum a nglunguched a kora ua lak lemonger?

¹⁹ A lsekum a Jehovah a kora ua lemeoud el onger a nglunguched, e ngdiak el belkul a kmo ngdiak el sebechel el onger. Ngbai kired el melatk el kmo, ngonger a nglunguched el oltirakl er a moktek er Ngii el ngar sel ungil el temel. Ngkmal ungil medengei aike el dousbech me a rolel a lomekerreu er kid. Ngblechoel mechikid me kede melemolem ‘el olengit, e osiik, e melngod.’ (Lukas 11:5-10) A doruul el uaisei e ngochotii el mo er a Dios el kmo, ngkmal mesisiich a urunguled e ulterekokl a klaumerang er kid er Ngii. Me nguaisei, a lebebil e ngdiak el sebeched el bleketakl el mesa nger er a nglunguched. El uai tiang, a Jehovah a sebechel el  onger a nglunguched el kirel a omelsemai el dechelebangel, el oeak sel lak lecheridii ngii el omelsemai, e ngbai di meskid a klisiich el mtekengelii.​—Monguiu er a Isaia 12:2.

20. Ngera me ngkired el mo ungil ousbech er tia el ileakl el techelled el sebeched el mengedecheduch er a Dios?

²⁰ Kede oba klou el omereng el saul e le Ngike el Ulemeob a kmeed er tirke el meluluuch el omekedong er Ngii! (Monguiu er a Psalm 145:18.) Me bo dungil el ousbech er tia el ileakl el techelled el sebeched el mengedecheduch er a Dios. A deuaisei, e ngmo dmeu a rengud el olekeed er kid er a Jehovah, el Ngike el Onger a nglunguuch.