1, 2. a) ¿Diosta mañanaca imamantataj sumaj bendición can? b) ¿Ima shina mañana cashcataca imamantataj Bibliapi yachana canchij?

JAHUA pachapi tiyaj achca luzerocunahuan chˈimbapurajpica Allpa pachaca uchillami can. Shinallataj “jahua pachata, cai pachata ruraj” Diospaj ñaupajpica “llajtacunaca, baldemanta yacu shutushca shinallami” can (Salmo 115:15; Isaías 40:15). Shinapish Bibliapica: ‘Mandaj Diosca tucui shunguhuan paita mañajcunapaj cˈuchullapimi’. “Paita manchajcuna imata yuyarishcataca pajtachingami. Paicuna mañashcata uyangami. Paicunataca quishpichingami” ninmi (Salmo 145:18, 19). Shinashpaca Tucuita Rurai Tucuj Diosca ñucanchij cˈuchullapimi can. ‘Tucui shunguhuan paita mañajpica’ ñucanchijta uyangami. Chaimantami Diosta mañanaca sumaj bendición can.

² Jehová Dios uyachunca pai munashca shinami mañana canchij. Dios ima shina mañachun munashcataca Bibliapimi yachachin. Chaimantami Biblia imata yachachishcata yachana canchij. Alli mañashpaca ashtahuanmi Diospajman cˈuchuyashun.

3. ¿Puntapica imamantataj Jehová Diosta mañana canchij?

³ Shujpica. Jehová Diosmi paita mañachun invitan. Bibliapica cashnami nin: “Imamantapish ama llaquilla canguichij. Ashtahuanpish Diosta mañacushpaca paiman tucuita huillaichij. Tucui imamantapish Diosta mañashpaca pagui nichij. Chashna rurajpimi pipish mana yachaipaj Diospaj sumaj causaica, cancunapaj shungucunata, cancunapaj yuyaicunatapish Cristo Jesuspi huaquichinga” (Filipenses 4:6, 7). Shinashpaca Tucuita Mandaj Dios invitashcamantami tucui shunguhuan paita mañana canchij.

4. ¿Cutin cutin Diosta mañashpaca ima shinataj paipaj alli amigocuna tucunchij?

⁴ Ishquipica. Cutin cutin Diosta mañashpaca paipaj alli amigocunami tucunchij. ¿Alli amigocunaca minishtishca horasllachu parlanacuncuna? Mana, ashtahuanpish imata yuyashcata, ima shina sintirishcata, imamanta preocupado cashcatami cutin cutin parlanacuncuna. Chaimantami ashtahuan alli amigocuna tucun. Jehová Dioshuanpish chashnallatajmi can. Cai librohuan Bibliamanta yachashcamantami,  Dios ima shina cashcata, pai imata rurasha nishcata yachashcangui. Chashnami paita rijsi chayashcangui. Chaimantami mañacushpaca cambaj shungupi ima shina sintirishcata, imata yuyashcatapish jahua pacha Yaya Diosman parlai tucungui. Chashnami Diospajman ashtahuan cˈuchuyangui (Santiago 4:8).

5. ¿Jehová Diosca imamantataj mana tucui mañaicunata uyan?

⁵ ¿Jehová Diosca tucui mañaicunatachu uyan? Profeta Isaiaspaj punllacunapi mana cazuj israelitacunataca Diosca cashnami nirca: ‘Cancunapaj maquicunaca yahuarhuan jundamari. Cancuna achcata mañacujpipish, manataj uyanichu’ nircami (Isaías 1:15). Shina cajpica Diospaj ñaupajpi mana allita rurajpica, paica ñucanchij mañaicunataca mana uyangachu. Ñucanchij mañaicunata Dios uyachunca cai catij yuyaicunatami pajtachina canchij.

6. a) ¿Ñucanchij mañaicunata Dios uyachunca imataj minishtirin? b) ¿Crishcataca ima shinataj ricuchina canchij?

⁶ Shujpica. Crinami minishtirin (Marcos 11:24-ta rezai). Apóstol Pabloca cashnami quillcarca: “Mana crishpaca, Dios munashcataca ima shina mana rurai tucuipajmi. Diospajman maijanpish cˈuchuyangapajca pai tiyashcatapish crina, paita mashcajcunamanca ima illashcata cuj cashcatapishmi crinataj can” nircami (Hebreos 11:6). Shinapish tucui shunguhuan crishcataca ñucanchij ruraicunahuan, ñucanchij causaihuanmi ricuchina canchij. Diosca tiyanmi, mañashcata uyanmi, paica cutichinmi nishpallaca mana saquirinachu canchij (Santiago 2:26).

7. a) ¿Imamantataj Jehová Diostaca respetohuan mañana canchij? b) ¿Ima shinataj humilde shunguhuan mañashcata ricuchinchij?

⁷ Ishquipica. Jehová Diosca imata mana pacashpa, humilde shunguhuan mañachunmi munan. ¿Manachu Diosca achca allicunata cushca? Ari, chaimantami humilde  shunguhuan mañana canchij. Shuj llajtata mandaj presidentehuan parlana cashpaca respetohuanmi parlanguiman. Jatun mandaj cashcamantami chashna parlanguiman. Jehová Diosca ‘Tucuita Rurai Tucuj Diosmi can’ (Génesis 17:1). Chaimantami achca respetohuan parlana canchij (Salmo 138:6). Diosta mañacushpaca ñucanchij shimicunahuanmi ñucanchijca uchilla cashcata ricuchina canchij. Chashna humilde shunguhuan mañashpaca imata mana pacashpa, mana cutin cutin chaillatataj nishpami mañashun (Mateo 6:7, 8).

8. ¿Ima shinataj ñucanchij mañashca shina causana canchij?

⁸ Quimsapica. Ñucanchij mañaicunata Dios uyachunca ñucanchijpish imata mañashca shinallatajmi rurana canchij. Por ejemplo, Jehová Diosta “cunan punlla micunata ñucanchijman cuhuai” nishpa mañashpaca, imapi trabajanalla cajpica sinchitami trabajana canchij (Mateo 6:11; 2 Tesalonicenses 3:10). Shinallataj mana alli ruraicunapi ama urmangapaj ayudahuai nishpaca, chai mana alli ruraicunapi urmachij ruraicunamanta caruyanami canchij (Colosenses 3:5). Dios ñucanchijta uyachun imata ruranata yachashca qˈuipapish, mañaicunamantaca huaquin tapuicunatami cutichina canchij.

9. ¿Pitataj mañana canchij, pipaj shutipitaj mañana canchij?

⁹ ¿Pitataj mañana canchij? Jesusca cashna mañanguichij nishpami paita catijcunaman yachachirca: “Jahua pachapi caj ñucanchij Yaya” nircami (Mateo 6:9). Chaimantami Jehová Diosllata mañana canchij. Shinapish Jehová Diosca Jesuspaj shutipi mañachunmi munan. Capítulo 5-pi ricushca shinaca, Jehová Diosmi ñucanchij juchacunamantapish, huañuimantapish quishpichichun paipaj Churi Jesusta cai Allpaman cacharca (Juan 3:16; Romanos 5:12). Shinallataj ñucanchij “juez” cachun, ñucanchijta  ayudaj “sumo sacerdote” cachunmi Jesusta agllarca (Juan 5:22, NM; Hebreos 6:20, NM). Chaimantami Bibliapica Jesuspaj shutipi mañachun yachachin. Jesusllatajmi cashna nirca: “Ñuca shutipi tucui imatapish Yayata mañajpica, Paica cungallami” nircami (Juan 15:16, NVI). Shinashpaca ñucanchij mañaicunata Dios uyachunca, Jehová Diosllatami Jesuspaj shutipi mañana canchij.

10. ¿Ima shinataj mañana canchij?

¹⁰ ¿Ima shinataj mañana canchij? Jehová Diosca paita mañangapaj maquicunata, cuerpota ima shina churanataca mana yachachinchu. Shinapish Bibliapi ricuchishca shinaca, huaquin gentecunaca tiyarishpa, shayarishpa, cumurishpa, cungurishpami Diosta mañashca (1 Crónicas 17:16; Nehemías 8:6; Daniel 6:10). Ima shina mañashpapish mana shujtajcuna ricuchunllachu mañana canchij. Ashtahuanpish shungumantami mañana canchij. Maipi cashpapish, shungu ucullapi mañashpapish, imata ruracushpapish, ima llaqui japijpipish mañanallami canchij. Mañacushcata gentecuna mana ricujpipish, Jehová Diosca ñucanchij mañaicunata uyanmi (Nehemías 2:1-6).

11. ¿Imallatataj Diosta mañai tucunchij?

¹¹ ¿Imatataj mañana canchij? Bibliapica cashnami nin: ‘Pai munashca shina imatapish mañajpica, [Diosca] uyangami’ ninmi (1 Juan 5:14). Shinashpaca Diospaj munaita yuyarishpaca tucui imatapish mañallami canchij. ¿Llaquilla sintirishcata Diosca huillachun munanchu? ¡Ari! Jehová Diosta mañanaca alli amigohuan parlacushca shinami can. Chaimantami ima shina sintirishcata “tucui shunguhuan” parlai tucunchij (Salmo 62:8). Shinallataj allita rurangapaj cambaj jucha illaj espirituhuan ayudahuai nishpami mañai tucunchij (Lucas 11:13). Alli yuyarishpa imatapish agllangapaj, llaquicunata ahuantangapajpish ayudahuai nishpami mañai tucunchij (Santiago 1:5). Juchapi urmashca cashpapish Jesús huañushcata  crishpami perdonahuai nishpa mañai tucunchij (Efesios 1:3, 7). Shinapish mana ñucanchijllamantachu mañana canchij. Ñucanchij familiamantapish, huauqui panicunamantapishmi mañana canchij (Hechos 12:5; Colosenses 4:12).

12. ¿Mañashpaca ima shinataj Diospaj munaitaraj puntapi churana canchij?

¹² Mañacushpaca Jehová Diospaj munaitami puntapi churana canchij. Paica achcatami bendiciashca. Chaimantami paita alabana canchij. Cˈuyaita ricuchishcamantapish pagui ninami canchij (1 Crónicas 29:10-13). Mateo 6-pica ima shina mañana cashcatami Jesusca yachachirca (Mateo 6:9-13-ta rezai). Diospaj shuti jucha illaj cachun, Diospaj Mandana shamuchun, Diospaj munai jahua pachapipish, cai pachapipish pajtarichun nishpa mañanguichij nircami. Diospaj munaita puntapi churashca qˈuipami Jesusca cada uno imata minishtishcata mañachun yachachirca. Diosta mañacushpaca paipaj munaita puntapi churashpami mana ñucanchijllapi yuyashcata ricuchishun.

13. ¿Mashna tiempota mañanamantaca Bibliaca imatataj nin?

¹³ ¿Mashna tiempotataj mañana canchij? Ñucanchijlla cashpa, taucapurapi cashpapish mashna tiempota mañana cashcataca Bibliaca mana yachachinchu. Micucushpa ashallata mañana, cutin ñucanchijlla cashpa shunguta pascashpa achca tiempota mañanaca allimi can (1 Samuel 1:12, 15). Shinapish nij tucushpalla achca tiempota mañajcunataca Jesusca mana allita rurajcuna nircami (Lucas 20:46, 47). Chaita rurajpica Jehová Diosca mana cushicunchu. Shungumanta mañanami ashtahuan alli can. Cutin huaquinpica imata ruracushcata, imata minishtishcata ricushpami mashna tiempota mañanata ricuna canchij.

14. a) ¿“Mañaraichij” nishpaca Bibliaca imatataj yachachin? b) ¿Ñucanchijca ima bendiciontataj charinchij?

¹⁴ ¿Mashna cutintaj mañana canchij? Bibliapica cashnami  nin: “Mañaraichij”, “mañaracuichijlla”, “mañanataca ama shaicunguichij” ninmi (Mateo 26:41; Romanos 12:12; 1 Tesalonicenses 5:17). Cai versocunaca mana tuta y punlla mañacuchunlla yachachinchu. Ashtahuanpish tucui punllacuna ima horas cajpipish Jehová Diosta pagui ningapaj, ayudahuai, cushichihuai, fuerzata cuhuai ningapaj mañanalla cashcatami yachachin. ¡Jehová Diosta mañanaca sumaj bendicionmi can! Mashna cutin cashpapish, mashna tiempota cashpapish paita mañachunmi Diosca munan. Paihuan parlanacuna bendicionta charisha nishpaca, ima horas cashpapish paita mañanallami canchij.

15. ¿Diosta mañacushpaca imamantataj ñucanchijlla cashpapish, taucapurapi cashpapish “chashna cachun” nishpa tucuchina canchij?

¹⁵ ¿Imamantataj “chashna cachun” nishpa tucuchina canchij? Bibliapica ñucanchijlla cashpa, taucapurapi cashpa “chashna cachun” nishpa mañaita tucuchina cashcatami yachachin (1 Crónicas 16:36; Salmo 41:13). Ñucanchijlla cashpa “chashna cachun” nishpaca shungumanta mañashcatami ricuchinchij. Taucapurapi sinchita cashpa o shungu ucullapi cashpa “chashna cachun” nishpaca ñucanchijpish chaillatataj yuyashcatami ricuchinchij (1 Corintios 14:16).

16. ¿Diosca ñucanchij mañaicunata cutichinchu?

¹⁶ ¿Diosca ñucanchij mañaicunata cutichinchu? ¡Ari! Achca gentecunami tucui shunguhuan Diosta mañan. ‘Mañashcata uyaj’ Jehová Diosca chai mañaicunataca cutichinmi (Salmo 65:2). ¿Ima shinataj chaita yachanchij? Paica chˈican chˈican ayudacunahuanmi cutichin.

17. ¿Jehová Diosca ima shinataj angelcunahuanpish, paita servijcunahuanpish ñucanchij mañaicunata cutichin?

¹⁷ Mañaicunata cutichingapajca, Jehová Diosca paipaj  angelcunata, paita servij gentecunatami cachan (Hebreos 1:13, 14). Achca gentecunami Bibliata entendingapaj ayudahuai nishpa Diosta mañashcacuna. Chai qˈuipallami Jehová Diosta servijcunaca paicunata visitanaman chayashca. Chaita ricushpami alli huillaicunata angelcuna ñaupajman pushacushcata entendinchij (Apocalipsis 14:6). Cutin ima llaqui japijpica Jehová Diosca paita servijcunata ayudanaman cachashpami ñucanchij mañaicunata cutichin (Proverbios 12:25; Santiago 2:16).

18. ¿Jehová Diosca ima shinataj paipaj espirituhuan, Bibliahuanpish ñucanchij mañaicunata cutichin?

 ¹⁸ Shinallataj Jehová Diosca paipaj espirituhuan, Bibliahuanpishmi ñucanchij mañaicunata cutichin. Ima llaqui japijpi ayudahuai nishpa mañajpica, paipaj espirituhuanmi imata ruranata yuyachin, fuerzatapish cun (2 Corintios 4:7). Cutin imata alli agllangapaj ayudahuai nishpa mañajpica Bibliahuanmi ñucanchijta ayudan. Huaquinpica Bibliata estudiacushpa, cai libro laya publicacioncunata rezacushpami shuj alli versota japinchij. Shinallataj huaquinpica ima versocuna alli cashcatami Diosca yuyachin. ¿Ima shinataj yuyachin? Tandanacuicunaman rijpi o ñucanchijta cˈuyaj ancianocuna cunajpimi alli versocunata yuyachin (Gálatas 6:1).

19. ¿Ñucanchij mañaicunata Dios mana utca cutichijpica imatataj yuyarina canchij?

¹⁹ Huaquinpica ñucanchij mañaicunata Jehová Dios mana utca cutichij shinami ricurin. Shinapish mana cutichisha nishcataca mana yuyanachu canchij. Jehová Diosca pai munashca horaspi, pai munashca shinami cutichinga. Paica ñucanchijtapish yallimi ñucanchij imata minishtishcata, ñucanchijta ima shina ayudanata yachan. Huaquinpica ‘mañashpa’ catichun, ‘mashcashpa’ catichunmi saquin (Lucas 11:5-10). Chashna rurashpaca  shungumanta mañacushcata, tucui shunguhuan crishcatami ricuchishun. Cutin huaquinpica Jehová Diosca mana ñucanchij yuyashca shinachu cutichinga. Por ejemplo, llaquicunahuan cashpa ayudahuai nishpa mañajpica, llaquicunata anchuchinapaj randica llaquicunata ahuantangapaj fuerzata cushpami ñucanchij mañaita cutichinga (Isaías 40:29-ta rezai).

20. ¿Imamantataj mañanataca mana saquina canchij?

²⁰ Tucuita Ruraj Diosca pai munashca shina mañajcunapaj cˈuchullapimi can. Chaimantami paitaca diosolopagui ninchij (Salmo 145:18-ta rezai). Shinashpaca mañanataca amataj saquishunchijchu. Mañanata mana saquishpami ‘mañashcata uyaj’ Jehová Diospajman ashtahuan cˈuchuyashun.