1, 2. Huuccatto dancha kaayyo gede assine laˈˈa hasiissannonkehu mayiraati? Qullaawu Maxaafi huuccatto lainohunni rosiisannore afa hasiissannonkehu mayiraati?

LOWO geeshsha halaˈlado ikkitinote kalqete alame ledo heewisiinsiro, uulla lowo geeshsha shiimate. Isinni ‘iiminna uulla Kalaqaanchira’ Yihowara albaanni mannu ooso baala gambayichchu giddo noo wayi cophpho geeshshite. (Faarso 115:15; Isayyaasi 40:15) Ikkeennano, Qullaawu Maxaafi togo yaanno: “Yihowa woshshidhannosirira baalaho mule no; halaalunni woshshidhannorira baalaho mule no. Iso waajjitannorira hasattonsa wonshanno; qoleno kaaˈlo afiˈrate raartanno raare macciishshanno.” (Faarso 145:18, 19) Hanni hatto yaa mayyaatero huwati! Duuchchanka dandaanno Kalaqaanchi ninkera mule no yaatenna ‘halaalunni woshshiˈnummoro’ macciishshannonke yaate. Togoo Maganiwa huuccattotenni shiqa dancha kaayyo diˈˈikkitino?

² Yihowa huuccattonke macciishshara hasiˈneemmoha ikkiro, isi hasiˈranno garinni huucciˈra hasiissannonke. Qullaawu Maxaafi huuccatto lainohunni rosiisannore anfummokki Maganu hasiˈranno garinni huucciˈra dandiineemmo? Huuccatto Yihowa ledo noonke fiixooma seekkine cuˈmiˈneemmo gede assitannonkehura, Qullaawa Borro huuccatto lainohunni rosiissannore afa lowo geeshsha hasiissannonke.

3. Yihowa huucciˈneemmohu mittu qaru korkaati maati?

³ Yihowa huucciˈneemmohu mittu qaru korkaati, Yihowa umisi iso huucciˈneemmo gede koyisinonkehuraati. Qaalisi togo yaannonke: ‘Coyi duuchchunni huuccattotenninna eeggotenni galatu ledo Maganoho hasattoˈne kulle ikkinnina mittu coyinnino [yaaddinoonte]. Mannu [wodancha] duuchchate aleenni ikkinohu Maganu keeri wodanaˈneno hedoˈneno Kiristoosi Yesuusinni agarannoˈne.’ (Filiphphisiyusi 4:6, 7) Kalqete alamera Aliidi Gashshaanchi uyinonketa tenne kaayyo shotinse laˈˈa dihasiissannonke!

4. Ganynyine huucciˈra Yihowa ledo roore fiixoommeemmo gede kaaˈlitannonkehu hiittoonniiti?

⁴ Huuccatto assiˈneemmohu wolu korkaati, ganynye Yihowa huucciˈra isi ledo noonke jaalooma kaajjishshannohuraati. Lubbo baxantanno jaalla mimmitu ledo hasaabbannohu mitore hasidhuro calla diˈˈikkino. Isinni togoo jaalla lowo geeshsha baxantannohura hedonsa, huluullisannonsarenna giddonsata mimmitoho fushshite hasaaphphitanno. Maganinke Yihowa ledo noonke fiixoomino mito ragaanni hattooho. Qullaawu Maxaafi Yihowa lainohunni rosiisannore, yaano isi ayeetironna alaamasi konni maxaafi kaaˈlonni halaˈladunni  rosootto. Konni daafira Yihowa jaalooˈma dandiinanni Magano ikkinota xa buuxootto. Huuccatto hedokkinna giddokkita iimi Annikkira hasaaphphate faro fantannohe. Hatto assattoha ikkiro, Yihowawa albinni roore shiqatto.—Yaaqoobi 4:8.

5. Yihowa baalanta huuccatto macciishshannokkita mayinni anfeemmo?

⁵ Yihowa baalanta huuccatto macciishshannoni? Isi masaalaanchu Isayyaasi yannara finqilaasine Isiraeele yiinore lai: “Batissine huuccidhiniro nafa dimacciishsheemmoˈne; angaˈne mundeetenni battaabbino.” (Isayyaasi 1:15) Konni daafira Maganu huuccattonke macciishshannokki gede assannori no yaate. Maganu huuccattonke macciishshara hasiˈnummoro assa hasiissannonkehu mitu mitu qaru coyi no.

6. Maganu huuccattonke macciishshanno gede umihunni mayi heeˈrankera hasiisanno? Ammana noonketa leellisha dandiineemmohu mayinniiti?

⁶ Umihunni ammana heedhankera hasiisanno. (Maarqoosi 11:24) Hawaariya Phaawuloosi togo yee borreessino: ‘Ammana nookkiha Magano hagiirsiisa didandiinanni; [korkaatuno] Maganunniwa shiqanno manchi Maganu nootanna iso hasiˈranno mannira elto aannoha ikkinota ammana hasiissannosi.’ (Ibiraawuyaani 11:6) Halaalaancho ammana, Maganu nootanna huuccatto macciishshannota hattono dawaro qolannota ammana calla diˈˈikkitino. Ammana assineemmorinni leeltanno. Barru baala heeˈneemmo heeshshonni ammana noonketa leellisha hasiissannonke.—Yaaqoobi 2:26.

7. (a) Yihowa huucciˈneemmo wote ayirrinynyunni huucciˈra hasiissannonkehu mayiraati? (b) Magano huucciˈneemmo wote rambaoota ikkankenna huuccattonke giddota ikkitinota leellinsheemmohu hiittoonniiti?

⁷ Qoleno Yihowa, huuccattotenni isiwa shiqannohu ayiino rambaˈnetenninna giddonni kae huucciˈrasira hasiˈranno. Yihowa ledo hasaawate rambaoota ikkineemmohu ikkadu korkaati noonke. Mannu nugusa coyishiishate faro afiˈriro coyishiishannohu silxaanesi ayirrisanno garinniiti. Yihowawa shinqeemmo wote hakkiinni roorsine ayirrinynyunni shiqa hasiissannonke! (Faarso 138:6) Isinni Yihowa “Duuchchanka  Dandaanno Maganooti.” (Kalaqo 17:1) Magano huucciˈneemmo wote, rambaˈnetenninna isi albaanni anjoommore ikkanke ammanneemmota leellishanno garinni huucciˈra hasiissannonke. Togoo rambaˈne huucciˈneemmo wote yinoommota yaantenni wodaninkenninna giddonkenni huucciˈneemmo gede assitannonke.—Maatewoosi 6:7, 8.

8. Huuccattonke ledo sumuu yaate ma assa dandiineemmo?

⁸ Assa hasiissannonkehu wolu coyi, Maganu huuccattonke macciishshanno gede huuccattonke ledo sumuu yaannore assate. Yihowa, huucciˈneemmo coye afiˈrate wolqanke dandiitannore baala assinammora hasiˈranno. Lawishshu gedera, “Barru sagale techcho uyinke” yine huucciˈnummoro, dandiinummo geeshsha heeˈri looso baala jawaante loosa hasiissannonke. (Maatewoosi 6:11; 2 Teselonqe 3:10) Shamu maalinke abbannore qeelate fatanu giddora eessannonke coyinni horonta xooqa hasiissannonke. (Qolasiyaasi 3:5) Kore assa hasiissannonkere agurranna, huuccatto lainohunni dawaro qola hasiissannonketi wole xaˈmo no.

9. Huucciˈra hasiissannonkehu ayeeti? Huucciˈneemmohuna ayee widoonniiti?

⁹ Huucciˈra hasiissannonkehu ayeeti? Yesuusi rosaanosi “iima heeˈranno Annanke” huuccidhanno gede rosiisinonsa. (Maatewoosi 6:9) Konni daafira huucciˈra hasiissannonkehu Magano Yihowa callaati. Ikkeennano, Yihowa Beettisi Yesuusi Kiristoosi silxaane ayirrinsammora hasiˈranno. Fooliishsho 5 aana ronsummonte gede, Yesuusi uullara dayinohu ninkera wodo ikke cubbunninna reyotenni gatisankeraati. (Yohaannisi 3:16; Roomu Sokka 5:12) Isi Kakkalaanote Biilonna Daanynya assine shoommoonniho. (Yohaannisi 5:22; Ibiraawuyaani 6:20) Konni daafira Qullaawa Borro huuccattonke Yesuusi widoonni huucciˈra hasiissannonketa xawissanno. Yesuusi umisi togo yiino: ‘Doogonna halaalu heeshshono aneeti. Ane widoonni agurranna mittuno Anniˈyawa shiqannohu dino.’  (Yohaannisi 14:6) Huuccattonke macciishshantanno gede huucciˈra hasiissannonkehu Beettisi widoonni qolle Yihowa callaati.

10. Huucciˈneemmo wote baxxino gari heeˈra hasiissannosikkihu mayiraati?

¹⁰ Huucciˈneemmo wote ikka hasiissannonkehu addi gari no? Dino. Yihowa huucciˈneemmo wote angankenni ikko woˈma mannimmankenni baxxitino ikkito ikkinammora dihasiˈranno. Qullaawu Maxaafi Maganu macciishshannohu huucciˈnannihu duuchchu gari noota rosiisanno. Konni gari giddo gamu, ofollate, albunni gombisamate, guluphphatenna uurrate. (1 Zeena 17:16; Nehimiya 8:6; Daanieeli 6:10; Maarqoosi 11:25) Qaru coyi wolu manni laˈˈankera baxxitino ikkito leellisha ikkikkinni suwashshu wodaninni huucciˈrate. Isinni barru baali diinagge assiˈneemmo wote woyi hedeweelcho jajjarsannori iillinkero ayeewano heeˈne qoonqo fushshinummokki huucciˈra dandiineemmo. Togoo huuccatto mulenke noo manni nafa wodancha hoogara dandaanno; Yihowa kayinni macciishshanno.—Nehimiya 2:1-6.

11. Gillenkera maa maa huucciˈra dandiineemmo?

¹¹ Huucciˈra hasiissannonkehu maahooti? Qullaawu Maxaafi togo yee xawisanno: “Ayee coyeeno isi fajjo gede huucciˈnummoro [Yihowa] macciishshannonke.” (1 Yohaannisi 5:14) Konni daafira Maganu fajjo ledo sumuu yaannore baala huucciˈra dandiineemmo. Gillete hasiisannonkerira huucciˈra Maganu fajjo ikkitino? Ee Maganu fajjooti! Yihowa huucciˈra lubbote jaali ledo hasaawate gedeeti. Huxuxxi yinummokki Maganoho ‘wodaninketa fushshine duna’ dandiineemmo. (Faarso 62:8) Gara ikkinore assate kaaˈlo afiˈneemmo gede qullaawa ayyaana afiˈrate huucciˈra hasiissannonke. (Luqaasi 11:13) Qoleno biddishsha afiˈne dancha wussaane wossaˈnatenna babbaxxino qarra dandee heeˈrate huucciˈra dandiineemmo. (Yaaqoobi 1:5) Cubbo loonsummoro Kiristoosi kakkalo widoonni maaro xaˈmira hasiissannonke. (Efesooni 1:3, 7) Kayinnilla huucciˈra hasiissannonkehu gillete hasiisannonkerira calla diˈˈikkino. Kunino uminkera calla ikkikkinni wolu mannirano, maatenkeranna ninke gedee ammanaanorano  huucca hasiissannonke.—Soqqamaanote Looso 12:5; Qolasiyaasi 4:12.

12. Huuccattonke giddo iimi Anninke ledo xaado afiˈrinore balaxisiinseemmota leellinsheemmohu hiittoonniiti?

¹² Roorenkanni huucciˈra hasiissannonkehu Yihowa ledo noonke fiixoomiraati. Danchummasira baalate Yihowa giddonkenni galatanna guwisa hasiissannonke. (1 Zeena 29:10-13) Yesuusi Maatewoosi 6:9-13 aana huucciˈneemmo gara rosiisanni Maganu suˈmi maassamara huucciˈneemmo gede rosiisino. Aancheno Maganu Mangiste dagganno gedenna fajjosi iima ikkitinonte gede uullano ikkitanno gede huucciˈnammora rosiisino. Yesuusi gillete hasiisannore qummi assinohu umo Yihowa ledo xaado afiˈrinore xawisi gedensaanniiti. Ninkeno huucciˈneemmo wote Magano balaxisiinseemmoha ikkiro, ninke keerinni roore Maganunniri huluullisannonketa leellinsheemmo.

13. Maganu macciishshanno huuccatto seendille lainohunni Qullaawa Borro marichcho qummi assitanno?

¹³ Huuccattonke mageeshsha seeda hasiissannose? Qullaawu Maxaafi gillete ikko mannu gamba yinowa assiˈneemmo huuccatto seendille diwossanino. Sagale intara kaˈne assiˈnannite harancho huuccattonni kayise wodaninke xisso Yihowara kuˈlate assiˈneemmo huuccatto geeshsha deerrise babbaxxinoho. (1 Saamueeli 1:12, 15) Ikkollana leellamate yite mannu albaanni seeda huuccatto assidhannore umonsa keereensitanno mannoota Yesuusi mishino. (Luqaasi 20:46, 47) Togoo huuccatto Yihowa dimacciishshanno. Qaru coyi, wodaninkenninna giddonkenni huucciˈrate. Konni daafira, Maganu macciishshanno huuccatto seendilli, hasiˈneemmo coyinna ikkitote garinni babbaxxara dandaanno.

14. Qullaawu Maxaafi ‘woˈma wote huucciˈneemmo’ gede uyinonke amaale mayi tiro afidhino? Tenne hajo lainohunni sheshifachchishanno coyi maati?

¹⁴ Mamoote mamoote huucciˈra hasiissannonke? Qullaawu Maxaafi, ‘[agurrummokki] woˈma wote huucciˈneemmo’ gede, ‘huuccattotenni kaajjineemmo’ gedenna ‘duuchcha wote huucciˈneemmo’ gede amaalannonke. (Luqaasi 18:1;  Roomu Sokka 12:12; 1 Teselonqe 5:17) Togo yaa kayinni, mittu barri giddo saˈˈaatete kiiro Yihowa huucciˈra hasiissannonke yaa diˈˈikkitino. Hatteentenni, assinonke danchummara Yihowa galatatenna isiwiinni biddishsha, sheshonna jawaante afiˈrate ganynyine huucciˈneemmo gede Qullaawu Maxaafi amaalannonke. Yihowa iso mageeshshi yanna huucciˈra hasiissannonkeronna meˈˈe hinge huucciˈneemmoro wossaninokkita afanke sheshifachchishshannota diˈˈikkitino? Yihowa iso huucciˈneemmo gede uyinonke kaayyora galatu noonkeha ikkiro, iimi Anninkewa huucciˈrate ayeewoteno faro hasiˈneemmo.

15. Gillete huuccattora woyi mannu ledo huuccattora jeefote “Hamiiˈni” yaa hasiissannonkehu mayiraati?

¹⁵ Huuccattote jeefora “Hamiiˈni” yaa hasiissannonkehu mayiraati? “Hamiiˈni” yaanno qaali, “addinta” woyi “ikkona” yitanno tiro afiˈrino. Qullaawa Borro giddo noo lawishshi, gillete huuccattora woyi mannu ledo huuccattora jeefote “Hamiiˈni” yaa hasiissannota xawisanno. (1 Zeena 16:36; Faarso 41:13) Gillenke huuccattora jeefote “Hamiiˈni” yineemmoha ikkiro, huuccattonke wodanitanna giddota ikkitinota leellinshanni heeˈnoommo. Mittu manchi mannu mereero huuccatto asse kaeenna, sununni woyi qoonqonke fushshine “Hamiiˈni” yineemmoha ikkiro, hattee huuccatto giddo yinoonnire ninkeno banxoommota leellinshanni heeˈnoommo yaate.—1 Qorontoosi 14:16.

16. Huuccatto lainohunni huluullammeemmokki coyi maati?

¹⁶ Yihowa huuccattote dawaro qolanno? Mitte huluullo nookkiha qolanno! “Huuccatto macciishshanno Magani” miliyoonetenni kiirranni manni giddonsanni assiˈranno huuccattora dawaro qolanno yineemmo gede assannonkehu ikkadu korkaati noonke. (Faarso 65:2) Yihowa huuccattonkera babbaxxitino doogonni dawaro qolankera dandaanno.

17. Maganu huuccattonkera dawaro qolate sokkaanosinna uullate aani soqqamaanosi horoonsiˈranno yineemmohu mayiraati?

 ¹⁷ Yihowa huuccattonkera dawaro qolate sokkaanosinna uullate aana noo soqqamaanosi horoonsiˈranno. (Ibiraawuyaani 1:13, 14) Qullaawa Maxaafa buuxate kaaˈlannonsa gede Magano huuccidhe kaˈe, hakkawotenni Yihowa soqqamaano giddo mittu ledo xaaddino mannootire kultannoti haammata xagge no. Togoo xagge sokkaano Maganu Mangistere sabbakate looso marraˈanni noota leellishshanno tajeeti. (Ajuu[j]a 14:6) Lowo geeshsha mitiiˈmine huucciˈneemmo huuccattora dawaro qolate, Yihowa mittu Kiristaanchi ninke kaaˈlanno gede assara  dandaanno.—Lawishsha 12:25; Yaaqoobi 2:16.

18. Yihowa soqqamaanosi huuccattora dawaro qolate qullaawa ayyaanasinna Qaalesi horoonsiˈrannohu hiittoonniiti?

¹⁸ Maganu Yihowa soqqamaanosi huuccattora dawaro qolate, qullaawa ayyaanasinna Qaalesi yaano Qullaawa Maxaafano horoonsiˈranno. Iillannonke fatana dandiine heeˈrate kaaˈlannonke gede assiˈneemmo huuccattora Yihowa qullaawu ayyaanisinni biddishshanna jawaante oye dawaro qolannonke. (2 Qorontoosi 4:7) Biddishsha afiˈrate huucciˈneemmo huuccattora duuchcha wote Yihowa Qullaawu Maxaafinni dawaro qolannonke; Qullaawu Maxaafi qole gara ikkino coye wossaˈnineemmo gede kaaˈlannonke. Gilletenni Qullaawa Maxaafa xiinxallineemmo wotenna konni maxaafi gedeere wole Kiristaanu borro nabbambeemmo wote, kaaˈlitanno xiqissa afiˈnammora dandiineemmo. Kiristaanu gambooshshiwa coyiˈnoonni assaawenni woyi ninkera mitiiˈmannohu mittu songote cimeessi aannonke amaalenni dancha assaawe afiˈnammora dandiineemmo.—Galatiya 6:1.

19. Maganu huuccattonkera dawaro qolikki keeshshinoha lawinkero hawa hasiissannonkekki coyi maati?

¹⁹ Yihowa huuccattonkera dawaro qola keeshshinoha lawinkero, keeshshinohu dawaro qolate wolqa hoogino daafira diˈˈikkino. Yihowa huuccattote dawaro qolannohu fajjosi garinninna wossanino yannara ikkinota qaaga hasiissannonke. Isi hasattonkenna hattee hasattonke wonshanno gara ninkenni roore afino. Qoleno Yihowa duuchcha wote, ‘xaˈmiˈranke, hasiˈrankenna waalcho gangananke’ agurreemmokki gede hasiˈranno. (Luqaasi  11:5-10) Togo assa agurreemmokkiha ikkiro, hasattonke iimi addita ikkitukki giddota ikkitinotanna ammananke goowi alita ikkitinokkita Maganoho leellinshanni heeˈnoommo yaate. Hakkiinni saeno, Yihowa ninkera leellinokki garinni huuccattonkera dawaro qolara dandaanno. Lawishshaho, fatanu iillannonke wote huucciˈneemmo huuccattora hakkonne fatana hoolikkinni dandiine heeˈneemmo gede jawaante oye huuccattonkera dawaro qolara dandaanno.—Filiphphisiyusi 4:13.

20. Yihowa ganynyine huucciˈra hasiissannonkehu mayiraati?

²⁰ Halaˈlado kalqete alame Kalaqaanchi, gara ikkitino doogonni woshshitannosirira baalaho muliha ikkino daafira lowo geeshsha galanteemmore ikka hasiissannonke! (Faarso 145:18) Yihowa huucciˈranke lowo kaayyo ikkitino daafira ganynyine iso huucciˈno. Hatto assineemmoha ikkiro, huuccatto macciishshannohuwa Yihowawa bashshonni roore shinqeemmo.