1, 2. Manino ro tokony horambesintsika ho voninahitsy bevata ty vavaky? Manino tsika ro mila mahay ze ampianary ty Baiboly mikasiky ty vavaky?

ANAKA raha kelikely avao tany toy, laha ampitovizy amy ty habè ty raha misy iaby. Amy Jehovah, azy “Mpanao ty lanitsy noho ty tany” iny, le manahaky rano kelikely mitè indraiky baka amy sajoa, ty firenena amy tany toy iaby. (Salamo 115:15; Isaia 40:15) Fe hoy ty Baiboly: “Anila ze olo iaby mikaiky ty anarany Jehovah, le ze mikaiky azy araky ty fahamarina. Hotanterahiny ty faniria ze olo matahotsy azy. Hojanjininy rozy lafa mikoiky vonjy, ka hovonjeny.” (Salamo 145:18, 19) Mba eritsereto tse moa raha zay! Anilantsika eo azy Mpamoro farany ze mahery iny, sady hijanjy antsika ie laha “mikaiky azy araky ty fahamarina” tsika. Voninahitsy bevata vatany ty hoe afaky mivavaky amy Jehovah!

² Fe laha teantsika hojanjininy ty vavaky ataontsika, le tsy maintsy mivavaky aminy araky ty itiavany azy tsika. Manao akory ty anaovantsika raha zay, laha tsy haintsika ze ampianary ty Baiboly mikasiky ty vavaky? Mila haintsika raha zay, satria hahavy antsika hihamarìny Ndranahary ty vavaky.

3. Ino ty antony raiky bevata tokony hivavahantsika amy Jehovah?

³ Mampirisiky antsika hivavaky aminy Jehovah, ka zay ty antony raiky bevata tokony hanaovantsika raha zay. Ho zao ty fampirisihany antsika amy safàny ao: “Ka miasa loha marè ndre amin’ino ndre amin’ino, fa amy ty raha iaby, le ambarao a Ndranahary amy vavaky noho fisolohoa voho fisaora ty fangatahanareo. Le ty fiadana Ndranahary azy bevata marè mandilatsy ty eritseritsy iaby iny ro hiamby ty fonareo noho ty sainareo amy alala Kristy Jesosy.” (Filipianina 4:6, 7) Azo antoky fa tsy teantsika ty tsy hidaridary ty tombontsoa hivavaky. Vokatsy ty hasoam-panahy azy Mpanday ty raha misy iaby iny ro nahazoantsika any raha io!

4. Manino ty vavaky ro mahavy antsika hihamarìny Jehovah?

⁴ Mila mivavaky koa tsika, satria manjary mihamariny azy tsika lafa miresaky aminy tsy tampaky. Tsy lafa mila raha avao ty mpinàma vo mifampiresaky. Mifanao soa rozy. Manjary mpinama marè koa rozy lafa tsy mifampihafahafa, mifampivola ty raha am-po noho an’eritseritsin-drozy any na ty raha mampiasa loha an-drozy. Mitovy amy zay koa ty  fifandrambesantsika amy Jehovah Ndranahary. Nianatsy raha maro mikasiky Jehovah noho ty toetsiny, voho ty raha teany hatao voaresaky amy Baiboly ao iha tamy boky toy ato. Hainao henanizao hoe azo atao ty mifandramby aminy. Midika zay fa lafa mivavaky amy Babanao an-danitsy any iny iha, le azonao ambara azy ty raha an’eritseritsinao any noho ty fihetseham-po an’ainao any. Hihamarìny azy soa iha amy zay.—Jakoba 4:8.

5. Ino ty mampiseho hoe tsy ty vavaky iaby ro janjiny Ndranahary?

⁵ Janjiny Ndranahary iaby va lafa kila vavaky? Eritsereto ty raha nivolaniny tamin’Israelita nanohitsy, tamin’andron’Isaia mpaminany. Hoy ty asany: “Ndre manao vavaky maro nareo le tsy hijanjy aho, satria feno lion’olo ty tananareo.” (Isaia 1:15) Hita baka amy zay fa mety tsy hijanjy ty vavaky ataontsika Ndranahary, vokatsy ty raha sisany nataontsika. Midika zay fa misy raha teany hataontsika, mba hijanjinany noho hamaleany ty vavakintsika.

6. Ino ty raha voalohany tsy maintsy ataontsika, mba hijanjina Ndranahary ty vavakintsika, le manao akory ty anaovantsika raha zay?

⁶ Voalohany, tsy maintsy mampiseho finoa tsika. (Vakio Marka 11:24.) Hoy ty apostoly Paoly: “Laha tsy amy finoa, le tsy misy azo atao mba hampifalea any Jehovah, satria ze mamonjy azy le tsy maintsy mino fa misy ie sady mpamaly soa any ze sahira mila azy.” (Hebreo 11:6) Ty atao hoe mana ty finoa marina, le tsy midika avao hoe mahay fa misy Ndranahary sady mijanjy noho mamaly vavaky. Atoro amy ty raha atao ty finoa. Tsy maintsy atorontsika amy ty raha ataontsika sanandro fa manam-pinoa tsika.—Jakoba 2:26.

7. a) Manino tsika ro tokony hanaja Jehovah lafa mivavaky aminy? b) Manao akory ty ampisehoantsika, fa miambany noho miresaky baka am-po tsika lafa mivavaky?

⁷ Mivola koa Jehovah hoe tsy maintsy miambany noho  miresaky aminy baka amy fo ty olo, lafa mivavaky aminy. Tsy rariny va laha miambany tsika lafa miresaky aminy? Matetiky ty olo ro manaja ty mpanjaka noho ty prezidà, lafa miresaky aminy, satria olo reo mitanjaky pilasy anabo. Tsy tokony handilatsy zay va ty fanajantsika Jehovah, lafa miresaky aminy tsika? (Salamo 138:6) Ie ro Ndranahary Farany Ze Mahery. (Genesisy 17:1) Tokony ho hita amy ty resaky ataontsika aminy, fa miambany tsika sady maneky ty pilasy misy antsika laha ampitovizy aminy. Laha miambany koa tsika, le tsy hanao vavaky ampahazara, na hampiasa safà mimpolimpoly avao, fa hivola ty raha am-pontsika ao.—Matio 6:7, 8.

8. Ino ty dika ty hoe manao raha mifanaraky amy vavaky ataontsika?

⁸ Tsy maintsy manao raha mifanaraky amy vavaky ataontsika koa tsika, laha teantsika hijanjy antsika Jehovah. Mitamà ie, fa hiezaky hanao raha mifanaraky amy ze raha angatahintsika amy vavaky tsika. Laha mivavaky, ohatsy, tsika hoe: “Ameo anay androany ze hany ampy anay androany”, le tsy maintsy miezaky tsika manao ze asa azontsika atao. (Matio 6:11; 2 Tesalonianina 3:10) Laha mivavaky mba handresea fahalemea tsika, le tsy maintsy mitandrina soa sady manalavitsy ty raha mety hitariky antsika amy fakam-panahy. (Kolosianina 3:5) Ndre eo raha tsy maintsy ataontsika reo, le mbo misy fanontanea mikasiky ty vavaky tokony hovaleantsika retoa.

9. Ia ro tokony hivavahantsika, le amy alalan’ia?

⁹ Ia ro tokony hivavaha? Nampianatsy ty mpanori-dia azy, mba hivavaky amy ‘Babantsika an-danitsy any’ Jesosy. (Matio 6:9) Midika zay, fa Jehovah Ndranahary raiky avao ro tokony hivavahantsika. Fe ilàny tsika haneky ty pilasy Jesosy Kristy, azy Anakilahiny toka iny. Nianarantsika tamy Toko faha-5 tao fa nirahy tan-tany etoy Jesosy, mba  ho vilim-panavota, hanafaha antsika amy ty ota noho ty fahafatesa. (Jaona 3:16; Romanina 5:12) Voatendry ho Mpisorobe noho Mpitsara ie. (Jaona 5:22; Hebreo 6:20) Zay mahavy ty Baiboly hampirisiky antsika hivavaky amy alala Jesosy. Ho zao vatany ty volaniny ao: “Zaho ro lala noho fahamarina voho fiaina. Tsy misy olo mandeha amy Baba any laha tsy amy alalako.” (Jaona 14:6) Laha teantsika hojanjiny Ndranahary ty vavaky ataontsika, le tsy maintsy mivavaky amy Jehovah raiky avao tsika fa amy alala Jesosy.

10. Manino ro tsy takỳ hoe tokony hanao akory ty tana na ty vata lafa mivavaky?

¹⁰ Tokony hanao akory ty vatantsika noho ty tanantsika, lafa mivavaky? Tsy takỳ Jehovah amintsika raha zay. Mivola, ohatsy, ty Baiboly hoe azo atao ty mipetraky, miondriky, mandohaliky, mitsanga, na manao fihetsiky hafa, lafa mivavaky. (1 Tantara 17:16; Nehemia 8:6; Daniela 6:11; Marka 11:25) Ty fanana fo mahity, ro ilà, fa tsy ty fihetsiky hitan’olo. Azontsika atao ty mivavaky an’aintsika ao ndre aia ndre aia ty misy antsika, ndre lafa manao ty asantsika andavanandro, ndre lafa misy loza tsy ampoizy. Janjiny Jehovah avao vavaky rey, ndre mety tsy haharè azy aza ty olo manodidy antsika.—Nehemia 2:1-6.

11. Ino ty raha sisany mikasiky antsika, azontsika resahy amy vavaky?

¹¹ Ino iaby ty azo resahy lafa mivavaky? Hoy ty Baiboly: “Ndre ino ndre ino angatahintsika, ka mifanaraky amy ty sitrapony, le mijanjy antsika ie [Jehovah].” (1 Jaona 5:14) Azontsika resahy amy vavaky iaby, lafa kila raha mifanaraky amy ty sitrapo Ndranahary. Teany hiresaky ty raha mampiasa loha antsika koa va tsika lafa mivavaky? Eka! Mitovy amy ty miresaky amy nama marìny, ty miresaky amy Jehovah. Afaky miresaky soa aminy tsika, ka ‘aboakintsika aminy ty raha am-pontsika ao.’ (Salamo 62:8) Azontsika atao ty mangataky ty fanahy masy, mba hanampy antsika hanao raha soa avao. (Lioka 11:13) Azo atao koa ty mangataky  tari-dala, mba handrambesa fanapahan-kevitsy soa noho hahazoa hery hialia amy raha manahira. (Jakoba 1:5) Tokony hangataky fanengà hadisoa mifototsy amy soro natao Kristy tsika, lafa nanao fahotà. (Efesianina 1:3, 7) Fe tsy ty raha mikasiky antsika avao ro tokony horesahintsika. Tokony hivavaky ho ahin’olo hafa koa tsika, tafilitsy amy zay ty fianakaviantsika noho ty olo finoa raiky amintsika.—Asan’ny Apostoly 12:5; Kolosianina 4:12.

12. Manao akory ty ampisehoantsika fa ty raha mikasiky Babantsika an-danitsy any iny ro ataontsika voalohany amy ty vavaky ataontsika?

¹² Ty raha mikasiky Jehovah Ndranahary ro tokony ho voalohany amy ty vavaky ataontsika. Maeva hoderà noho hisaorantsika ie, amy ty raha soa iaby ataony. (1 Tantara 29:10-13) Nampianary Jesosy antsika tamy vavaky modely amy Matio 6:9-13 ao, fa tokony hivavaky tsika mba hohamasìny ty anara Ndranahary. (Vakio.) Bakeo nampirisihiny tsika, mba hangataky ty hiavia ty Fanjakà Ndranahary noho ty hanaova ty sitrapony an-tany etoy manahaky ty an-danitsy any. Lafa baka niresaky raha bevata mikasiky Jehovah reo Jesosy, zay vo niresaky ty raha mikasiky ty olo kiraidraiky. Lafa Ndranahary ro ataontsika voalohany amy ty vavaky ataontsika, le hita fa tsy ty hahasoa antsika avao ro ilàntsika.

13. Araky ty Baiboly, manao akory ty halava ty vavaky ekè Jehovah?

¹³ Tokony hanao akory ty halava ty vavaky ataontsika? Tsy volany ty Baiboly ty mikasiky ty halava ty vavaky atao mitoka, na atao an-kavoria. Mety ho boribory ty vavaky sakafo, fa mety ho lavalava ty vavaky ampiboaha ty raha am-po ao amy Jehovah. (1 Samoela 1:12, 15) Fe nihelofa Jesosy ty olo nanao ty vatany ho marina noho nanao vavaky lava mba ho fisehosehoa avao rey. (Lioka 20:46, 47) Tsy ahoa Jehovah ino ty vavaky ho zay. Mila manao vavaky baka amy ty fontsika tsika. Midika zay fa mianky amy ty raha miseho noho ty raha ilàntsika, ty halava ty vavaky ekè Jehovah.

14. Ino ty dika ty hoe “mivavaha avao”, le manino raha zay ro mampahery?

 ¹⁴ Saky ombia tsika ro tokony hivavaky? Mampirisiky antsika ty Baiboly hoe: “Mivavaha avao”, “mahareta amy vavaky”, noho “ka mieny mivavaky.” (Matio 26:41; Romanina 12:12; 1 Tesalonianina 5:17) Tsy midika raha reo hoe hivavaky amy Jehovah avao tsika manomboky maray zisiky hariva. Fa ampirisihy ty Baiboly tsika mba hivavaky tsy tampaky, na hoe, hisaotsy any Jehovah avao amy ty soa ataony ho antsika, noho hila tari-dala, fampahereza noho hery baka aminy. Tsy mampahery va ty mahay hoe tsy mamaritsy ty halava ty vavaky Jehovah, sady tsy mivola hoe saky ombia avao tsika vo afaky mivavaky? Laha teantsika vatany ty tombontsoa hivavaky, le hahita antony maro hivavaha amy Babantsika an-danitsy any iny tsika.

15. Manino tsika ro tokony hanao “Amena” amy fara ty vavaky ataontsika mitoka na ataon’olo hafa?

¹⁵ Manino tsika ro tokony hivola hoe “Amena” amy fara ty vavaky? Ty hoe “amena” le midika hoe “marina zay” na “mba ho zay vatany.” Hita amy Soratsy Masy ao, fa mety ty mivola hoe “Amena”, amy fara ty vavaky atao mitoka na atao an-kavoria. (1 Tantara 16:36; Salamo 41:13) Lafa manao “Amena” tsika amy fara ty vavaky ataontsika, le mampiseho fa baka am-pontsika ao vatany vavaky iny. Lafa manao hoe “Amena” an’aintsika any na mivola marè tsika afara ty vavaky ataon’olo hafa, le mampiseho koa fa maneky ty raha nivolaniny tsika.—1 Korintianina 14:16.

16. Ino ty azontsika antoky lafa mivavaky tsika?

¹⁶ Mamaly vavaky vatany va Jehovah? Zay vatany! Azontsika atokisa, fa mamaly ty vavaky baka am-po ataon’olo an-tapitrisany, azy “Mpijanjy vavaky” iny. (Salamo 65:2) Mety ho samby hafa ty amalea Jehovah ty vavaky ataontsika.

17. Ino ty porofo fa mampiasa ty anjeliny noho ty mpanompony an-tany etoa Ndranahary, mba hamalea ty vavaky ataontsika?

 ¹⁷ Mampiasa ty anjeliny noho ty mpanompony an-tany etoa Jehovah, mba hamalea vavaky. (Hebreo 1:13, 14) Maro, ohatsy, ty nivola fa nisy mpanompo Jehovah nandalo taminy ao, laha vo baka nivavaky ie mba hisy hanampy azy hahay ty raha volany ty Baiboly. Porofo zay, fa mitariky ty asa fitoria mikasiky Fanjakà iny ty anjely. (Apokalypsy 14:6) Mety hampiasa Kristiana raiky Jehovah, mba hanampea antsika amy fotoa ilàntsika raha zay.—Ohabolana 12:25; Jakoba 2:16.

18. Manao akory ty ampiasa Jehovah ty fanahiny masy noho ty Safàny mba hamalea ty vavaky atao ty mpanompony?

 ¹⁸ Mampiasa ty fanahiny masy noho ty Safàny koa Jehovah, mba hamalea ty vavaky ty mpanompony. Mety hanome antsika tari-dala na hery amy alala ty fanahiny masy ie, lafa mangataky aminy tsika mba hampeany hiatriky fitsapà. (2 Korintianina 4:7) Lafa mivavaky mba hahazo tari-dala tsika, le matetiky ro hitantsika amy Baiboly ao raha zay. Mampiasa ty Baiboly koa Jehovah mba hanampea antsika handramby fanapahan-kevitsy soa. Mety hanampy antsika ty andinin-teny hitantsika lafa manao fianara am-bata noho mamaky boky mifototsy amy Baiboly, manahaky boky toy tsika. Mety haharè hevitsy mahasoa baka amy Baiboly ao tsika am-pivoria any, na baka amy anti-panahy raiky soa fanahy.—Galatianina 6:1.

19. Ino ty mila tiarovintsika laha tsy voavaly ty fahitàntsika ty vavaky ataontsika?

¹⁹ Laha taratara ty fahitantsika ty famalea Jehovah ty vavaky ataontsika, le tsy midika zay hoe tsy voavaliny vavaky iny. Tsy maintsy tiarovintsika fa araky ty sitrapony noho amy fotoa itiavany azy ro amaleany vavaky. Mahay ty raha ilàntsika noho ty fomba hanomeza raha zay, mandilatsy lavitsy antsika ie. Matetiky tsika ro engàny ‘hangataky noho hila voho hamaipaiky avao.’ (Lioka 11:5-10) Lafa mahaliny  manahaky zay tsika, le hitany fa maniry marè noho manam-pinoa vatany. Fe mety tsy hazava soa amintsika koa ty famalea Jehovah vavaky. Laha mivavaky mikasiky ty fitsapà mahazo antsika ohatsy tsika, le mety tsy halàny raha zay, fa hery handesy miaritsy ro ameany.—Vakio Filipianina 4:13.

20. Manino tsika ro tokony hivavaky tsy tampaky?

²⁰ Manao mahavelo bevata tsika, satria marìny ze olo iaby mivavaky aminy araky ty itiavany azy, azy Mpamoro ty raha misy iaby iny! (Vakio Salamo 145:18.) Tokony hivavaky tsy tampaky tsika, satria voninahitsy bevata ho ahintsika raha zay. Ho falifaly tsika amy zay, satria hihamarìny Jehovah, azy Mpijanjy vavaky iny.