1, 2. Tanbasá orasaun mak oportunidade ida neʼebé furak? Tanbasá mak ita tenke hatene saida mak Bíblia hanorin kona-ba ida-neʼe?

ITA-NIA mundu neʼe kiʼik liu se kompara ho lalehan neʼebé nakonu ho fitun. Tuir loloos, Maromak Jeová neʼebé “kria lalehan no rai”, haree nasaun sira iha mundu neʼe hanesan bee uitoan neʼebé turuk husi balde. (Salmo [Mazmur] 115:15; Isaías [Yesaya] 40:15) Maski nuneʼe, Bíblia hatete: “Jeová besik ba ema neʼebé bolu nia, ba sira neʼebé bolu nia ho laran loos. Ema neʼebé taʼuk nia, nia sei kumpre sira-nia hakarak, no nia sei rona ba sira-nia halerik atu husu ajuda.” (Salmo [Mazmur] 145:18, 19) Hanoin toʼok, ida-neʼe katak sá? Kriadór neʼebé boot liu sei besik ho ita no rona ita, se ita bolu nia “ho laran loos”. Neʼe duni, atu bele koʼalia ba Maromak liuhusi orasaun mak oportunidade furak tebes!

² Maibé, se ita hakarak Maromak Jeová rona ita-nia orasaun, ita tenke halo orasaun tuir nia hakarak.  Oinsá mak ita bele halo ida-neʼe se ita la hatene saida mak Bíblia hanorin kona-ba orasaun? Tan neʼe, importante atu ita hatene saida mak Eskritura hatete kona-ba orasaun, tanba ida-neʼe sei ajuda ita atu hakbesik liután ba Maromak Jeová.

3. Tanbasá mak ita tenke halo orasaun ba Maromak Jeová?

³ Tanbasá mak ita tenke halo orasaun ba Maromak? Razaun importante ida mak Maromak Jeová konvida ita atu halo ida-neʼe. Maromak nia Liafuan hatete mai ita: “Keta laran-taridu kona-ba buat ida, maibé iha buat hotu hatoʼo imi-nia laran-susar ba Maromak liuhusi orasaun no harohan no mós fó-agradese; no Maromak nia dame neʼebé aas liu ema nia hanoin hotu sei proteje imi-nia laran no imi-nia kbiit atu hanoin liuhusi Kristu Jesus.” (Filipe 4:6, 7) Nuneʼe, ita hakarak duni simu konvite furak neʼe husi Ukun-Naʼin neʼebé Aas Liu iha lalehan no raiklaran tomak!

4. Oinsá mak halo orasaun beibeik ba Maromak Jeová bele hametin ita-nia relasaun ho nia?

⁴ Razaun importante seluk atu halo orasaun beibeik ba Maromak Jeová mak atu hametin liután ita-nia relasaun ho nia. Hanoin toʼok, belun sira neʼebé diʼak la koʼalia ba malu deʼit bainhira sira ida presiza buat ruma. Maibé, belun neʼebé diʼak hanoin kona-ba ninia belun nia hakarak, hanoin no sentimentu. Hodi halo ida-neʼe, sira-nia relasaun sai metin liu tanba sira koʼalia ho livre ba malu kona-ba buat hotu. Hanesan neʼe mós ho ita-nia relasaun ho Maromak  Jeová. Hodi uza livru neʼe, ita aprende barak ona saida mak Bíblia hanorin kona-ba Maromak Jeová nia hahalok no ninia hakarak. Ita rekoñese katak Maromak iha duni. Orasaun mak oportunidade ida atu fó-hatene buat neʼebé iha ita-nia hanoin no laran ba ita-nia Aman iha lalehan. Bainhira ita halo ida-neʼe, ita sai besik liu ba Maromak Jeová.—Tiago 4:8.

5. Oinsá mak ita hatene katak Maromak la rona ba orasaun hotu?

⁵ Maromak Jeová rona ba orasaun hotu ka lae? Hanoin toʼok kona-ba saida mak Maromak hatete ba ema Izraél neʼebé sempre kontra Maromak iha profeta Isaías nia tempu. Nia hatete: “Maski imi halo orasaun beibeik, haʼu la rona; imi-nia liman nakonu ona ho raan neʼebé fakar.” (Isaías [Yesaya] 1:15) Entaun, atu Maromak rona ba ita-nia orasaun,  depende ba ita-nia hahalok. Tan neʼe, ita tenke halo tuir buat neʼebé Maromak husu ita atu halo kona-ba orasaun.

6. Atu Maromak rona ba ita-nia orasaun, importante atu hatudu saida? Oinsá mak ita bele halo ida-neʼe?

⁶ Bainhira halo orasaun, importante tebes atu ita hatudu fiar. (Marcos 11:24) Apóstolu Paulo hakerek: “Se fiar la iha, ita la bele halo Maromak nia laran kontente. Basá ema neʼebé hakbesik ba Maromak tenke fiar katak Maromak iha, no fiar mós katak Maromak sei fó kolen ba sira neʼebé buka nia ho laran.” (Ebreu 11:6) Fiar neʼebé loos, laʼós deʼit ita fiar katak Maromak iha no nia sei rona no hatán ita-nia orasaun. Maibé ita hatudu fiar neʼebé loos liuhusi ita-nia hahalok iha ita-nia moris loron-loron.—Tiago 2:26.

7. (a) Tanbasá mak ita tenke hatudu respeitu ba Maromak Jeová kuandu halo orasaun? (b) Oinsá mak ita hatudu haraik-an no laran-moos kuandu halo orasaun ba Maromak?

⁷ Bainhira ita hakbesik ba Maromak Jeová liuhusi orasaun, nia hakarak ita atu halo ida-neʼe ho haraik-an no laran-moos. Iha razaun diʼak atu haraik an bainhira ita koʼalia ba Maromak Jeová, loos ka lae? Bainhira ema koʼalia ba liurai ka prezidente, sira koʼalia ho respeitu tanba sira rekoñese ninia pozisaun neʼebé aas. Nuneʼe mós, bainhira ita halo orasaun ba Maromak Jeová, ita tenke hatudu respeitu liután. (Tiago 4:6) Tuir loloos, nia mak “Maromak Aas Liu Hotu”. (Gênesis [Kejadian] 17:1) Bainhira halo orasaun ba Maromak, ita tenke haraik an hodi rekoñese ita-nia pozisaun iha nia oin. Halo hanesan neʼe, sei book ita atu halo orasaun husi ita-nia  laran, no la dekór ka repete deʼit ita-nia orasaun.—Mateus 6:7, 8.

8. Tanbasá mak ita-nia hahalok tenke tuir buat neʼebé ita husu iha orasaun?

⁸ Maromak mós sei rona ba ita-nia orasaun se ita-nia hahalok tuir buat neʼebé ita husu ba nia. Maromak Jeová hakarak ita hakaʼas an atu halo buat neʼebé ita husu ba nia. Porezemplu, se ita husu: “Fó mai ami ai-han ba ohin nian”, ita tenke hakaʼas an atu halo serbisu saida deʼit neʼebé ita bele halo atu hetan ai-han neʼe. (Mateus 6:11; 2 Tesalónika 3:10) Se ita harohan ba Maromak atu ajuda ita atu manán hasoru hakarak isin nian neʼebé sala, ita tenkesér kuidadu no sees husi situasaun hotu neʼebé bele halo ita monu ba tentasaun. (Koloso 3:5) Maibé laʼós buat hirak-neʼe deʼit mak ita tenke halo, ita mós presiza buka-hatene resposta ba pergunta balu kona-ba orasaun.

9. (a) Ita halo orasaun ba sé? No liuhusi sé-nia naran? (b) Halo orasaun liuhusi Jesus nia naran katak sá?

⁹ Ita halo orasaun ba sé? Jesus hanorin nia dixípulu sira atu harohan ba ita-nia “Aman iha lalehan”. (Mateus 6:9) Entaun, ita halo orasaun ba Maromak Jeová deʼit. Maibé, Maromak Jeová hakarak atu ita rekoñese nia Oan-Mane mesak, Jesus Kristu, nia pozisaun. Iha Kapítulu 5, ita aprende ona katak Maromak haruka Jesus toʼo mundu atu fó nia moris nuʼudar sakrifísiu atu salva ita husi sala no mate. (João 3:16; Roma 5:12) Maromak hili tiha nia nuʼudar Amlulik Boot no Tesi-Lia Naʼin. (João 5:22;  Ebreu 6:20) Nuneʼe, Bíblia hatudu katak bainhira ita hatoʼo orasaun, ita halo ida-neʼe liuhusi Jesus nia naran. Jesus rasik hatete: “Haʼu mak dalan no lia-loos no moris. Ema ida la bele hakbesik Aman se nia la liu husi haʼu.” (João 14:6) Atu Maromak hatán ita-nia orasaun, ita tenke harohan ba Maromak Jeová liuhusi nia Oan-Mane nia naran.

10. Saida mak importante liu bainhira hatoʼo orasaun?

¹⁰ Bainhira ita halo orasaun, ita tenkesér hakruʼuk, ka hakneʼak deʼit ka lae? Lae. Tuir loloos, Bíblia hanorin katak ita bele halo orasaun ba Maromak Jeová hodi tuur, hakruʼuk, hakneʼak, no hamriik. (1 Crônicas [Tawarikh] 17:16; Neemias 8:6; Daniel 6:10; Marcos 11:25) Buat neʼebé importante liu mak ita harohan ho laran neʼebé loos, laʼós atu ema haree ita hanesan ema santu neʼebé sempre hakneʼak atu reza. Tuir loloos, iha ita-nia moris loron-loron nian ka bainhira ita hasoru perigu ruma, ita bele halo orasaun iha ita-nia laran iha fatin neʼebé deʼit. Maski ema ida la haree ita halo orasaun, maibé Maromak Jeová rona ba ita-nia orasaun.—Neemias 2:1-6.

11. Ita bele halo orasaun kona-ba buat saida deʼit?

¹¹ Ita bele halo orasaun kona-ba saida deʼit? Bíblia esplika: “Buat naran deʼit neʼebé ita husu hodi tuir ninia hakarak, nia [Maromak Jeová] rona ita.” (1 João 5:14) Nuneʼe ita bele halo orasaun kona-ba buat saida deʼit neʼebé tuir Maromak nia hakarak. Maromak hakarak ita atu harohan kona-ba ita rasik nia problema ka lae? Sin! Ita bele halo ida-neʼe ba Maromak Jeová hanesan ita koʼalia ba belun neʼebé diʼak. Ita bele koʼalia hodi ‘fakar sai ita-nia laran’  ba Maromak. (Salmo [Mazmur] 62:8) Ita mós bele husu nia espíritu santu atu ajuda ita halo buat neʼebé loos. (Lucas 11:13) Ita mós bele husu matadalan atu halo desizaun neʼebé loos no fó ita kbiit atu tahan hasoru susar ruma. (Tiago 1:5) Bainhira ita halo sala, ita tenke husu perdua ba Maromak liuhusi Kristu nia sakrifísiu. (Éfeso 1:3, 7) Maibé, ita la hatoʼo deʼit orasaun kona-ba ita rasik nia presiza. Ita mós bele halo orasaun kona-ba ema seluk hanesan ita-nia família no maluk kristaun.—Apóstolu 12:5; Koloso 4:12.

12. Iha orasaun, oinsá mak ita hatudu katak ita tau ulukliu ita-nia Aman iha lalehan nia hakarak?

¹² Iha ita-nia orasaun, ulukliu harohan kona-ba buat neʼebé importante ba Maromak Jeová. Ita iha razaun barak atu fó hahiʼi no agradese ba buat diʼak hotu neʼebé nia halo mai ita. (1 Crônicas [Tawarikh] 29:10-13; Filipe 4:19, 20) Iha Mateus 6:9-13, Jesus hatudu ezemplu atu halo orasaun. Nia hanorin ita atu halo orasaun hodi Maromak nia naran sai santu, ka moos. Tuirmai, husu atu Maromak nia Ukun toʼo mai no Maromak nia hakarak sai loos iha rai hanesan iha lalehan. Jesus hanorin ita atu harohan ulukliu kona-ba Maromak Jeová nia hakarak no depois mak ita husu kona-ba ita rasik nia hakarak ka presiza. Bainhira ita halo tuir buat sira-neʼe, ita hatudu katak ita la hanoin liu kona-ba ita rasik nia hakarak.

13. Tuir Bíblia, ita-nia orasaun tenkesér naruk ka lae?

¹³ Ita-nia orasaun tenkesér naruk ka lae? Bíblia la dehan katak orasaun neʼebé ita hatoʼo iha ema nia oin ka ita rasik nia orasaun tenkesér naruk. Ita bele  hatoʼo orasaun badak deʼit bainhira atu han, no kuandu mesak ita bele hatoʼo orasaun neʼebé naruk atu fó-hatene Maromak Jeová buat neʼebé iha ita-nia laran. (1 Samuel 1:12, 15) Maibé, Jesus la gosta ema neʼebé gaba an hodi halo orasaun naruk atu ema seluk haree sira halo ida-neʼe. (Lucas 20:46, 47) Maromak Jeová la simu orasaun hanesan neʼe. Importante liu mak atu hatoʼo orasaun husi ita-nia laran. Nuneʼe, ita-nia orasaun bele naruk ka badak deʼit, depende ba ita-nia presiza no situasaun.

14. Kuandu Bíblia hatete atu ita “harohan beibeik”, ida-neʼe katak sá? Tanbasá mak ita sente kontente kona-ba ida-neʼe?

¹⁴ Ita tenke halo orasaun beibeik ka lae? Bíblia fó konsellu atu ita “harohan beibeik”, “la kole atu halo orasaun” no atu “halo orasaun nafatin”. (Mateus 26:41; Roma 12:12; Lucas 18:1) Tuir loloos, eskritura sira-neʼe la hatudu katak ita tenkesér hatoʼo orasaun ba Maromak Jeová durante loron tomak. Maibé, Bíblia fó konsellu atu ita halo orasaun beibeik, hodi fó-agradese ba Maromak Jeová tanba ninia laran-diʼak no atu buka nafatin ninia matadalan no ajuda, no husu nia atu fó forsa mai ita. Ita sente kontente ka lae, atu hatene katak Maromak Jeová rona ba ita-nia orasaun hotu, maski orasaun neʼe naruk ka badak? Se ita hafolin ida-neʼe, ita sei buka oportunidade atu hatoʼo orasaun ba ita-nia Aman iha lalehan.

15. Tanbasá mak ita tenke dehan “Amen” iha ita rasik nia orasaun no orasaun neʼebé hatoʼo iha ema barak nia oin?

¹⁵ Iha orasaun nia rohan, tanbasá mak ita tenke dehan “Amen”? Liafuan “Amen” katak “loos duni” ka “sai nuneʼe bá”. Tuir ezemplu balu iha Bíblia,  bainhira ita halo orasaun mesak ka iha ema barak nia oin, diʼak atu dehan “Amen” iha orasaun nia rohan. (1 Crônicas [Tawarikh] 16:36; 1 Timóteo 1:17) Bainhira ita halo orasaun mesak no ita dehan “Amen” iha orasaun nia rohan, ita hatudu katak buat neʼebé ita dehan ba Maromak, nuneʼe duni. Bainhira ema ida hatoʼo orasaun no ita dehan “Amen” iha laran ka ho lian iha orasaun nia rohan, ita hatudu katak ita apoia buat  neʼebé ema neʼe hatoʼo iha orasaun.—1 Korinto 14:16.

16. Ita bele fiar katak Maromak sei hatán ita-nia orasaun ka lae?

¹⁶ Maromak Jeová hatán duni ema nia orasaun ka lae? Sin, nia hatán duni! Ita bele fiar duni katak Maromak Jeová rona no hatán orasaun neʼebé ema rihun ba rihun hatoʼo ba nia. (Salmo [Mazmur] 65:2; 1 João 5:14) Maromak Jeová hatán ita-nia orasaun iha dalan oioin.

17. Oinsá mak Maromak uza nia anju no ninia atan sira iha mundu atu hatán ita-nia orasaun?

¹⁷ Atu hatán ema nia orasaun, Maromak Jeová uza anju sira no ninia atan sira iha mundu. (Ebreu 1:13, 14) Porezemplu, iha esperiénsia barak kona-ba ema neʼebé harohan ba Maromak atu ajuda sira komprende Bíblia no lakleur deʼit Maromak Jeová nia atan ida hasoru sira. Istória hanesan neʼe hatudu katak anju sira hola parte iha serbisu atu haklaken kona-ba Maromak nia Ukun. (Apokalipse 14:6) Hodi hatán ita-nia orasaun bainhira ita presiza loos Maromak nia ajuda, karik nia sei uza ema kristaun ida atu ajuda ita.—Provérbios (Amsal) 12:25; Tiago 2:16.

18. Oinsá mak Maromak Jeová uza nia espíritu santu no ninia Liafuan atu hatán nia atan sira-nia orasaun?

 ¹⁸ Maromak Jeová mós uza nia espíritu santu no ninia Liafuan, Bíblia, atu hatán nia atan sira-nia orasaun. Bainhira ita hasoru problema ruma no husu ajuda, Maromak bele hatán ita-nia orasaun hodi fó matadalan no kbiit ba ita liuhusi ninia espíritu santu. (2 Korinto 4:7) Baibain Maromak Jeová hatán ita-nia orasaun hodi fó matadalan mai ita liuhusi Bíblia, atu bele ajuda ita foti desizaun neʼebé loos. Ita bele hetan eskritura sira-neʼe liuhusi estuda Bíblia rasik no lee livru sira-neʼebé esplika kona-ba Maromak nia Liafuan, hanesan livru ida-neʼe. No mós, ita bele rona informasaun husi Bíblia liuhusi reuniaun kristaun sira ka husi katuas kongregasaun nian neʼebé hanoin ita.—Galásia 6:1.

19. Se ita sente katak Maromak seidauk hatán ita-nia orasaun, saida mak ita tenke hanoin-hetan?

¹⁹ Dala ruma ita sente katak Maromak Jeová seidauk hatán ita-nia orasaun. Maibé ida-neʼe laʼós katak nia la iha kbiit atu hatán. Ita tenke hanoin-hetan katak Maromak Jeová hatán ita-nia orasaun tuir ninia hakarak no tempu neʼebé loos ba nia. Nia hatene diʼak liu kona-ba buat neʼebé ita presiza no dalan atu kumpre ida-neʼe. Dala ruma nia hakarak ita atu ‘kontinua husu, buka, no tuku odamatan’. (Lucas 11:5-10) Harohan beibeik ba Maromak hatudu katak ita hakarak duni ninia ajuda no hatudu  katak ita iha fiar neʼebé boot ba nia. Liután neʼe, karik Maromak Jeová hatán ita-nia orasaun iha dalan neʼebé ita la hatene. Porezemplu, atu hatán ita-nia orasaun kona-ba problema ruma, karik nia sei la halakon susar neʼe, maibé nia fó kbiit mai ita atu tahan hasoru susar ida-neʼe.—Filipe 4:13.

20. Tanbasá mak ita tenke aproveita oportunidade furak atu halo orasaun?

²⁰ Ita agradese tebes ba Kriadór neʼebé halo buat hotu tanba nia besik ho sira neʼebé harohan ba nia iha dalan neʼebé loos! (Salmo [Mazmur] 145:18) Ita tenke aproveita oportunidade furak neʼe hodi halo orasaun beibeik ba Maromak Jeová. Se ita halo ida-neʼe, ita iha oportunidade furak atu hakbesik liután ba Maromak Jeová, neʼebé rona ba orasaun.