1, 2. Kanukinyo ibusakinitor oni asesen ailip kwape arereng naepol noi, ido kanukinyo ibusakinitor oni ajenun nuisisianakini Ebaibuli nuikamunitos ailip?

EDIT akwap itiriani kaiboro kere luesubitai. Ido kama ejai Yawe “Lokesubi akuj ka akwap,” esubito atekerin nuka itunga bala aidonakinet naka akipi kamot. (Isabulin 115:15; Isaia 40:15) Konye ebala Ebaibuli ebe: “Eapie EJAKAIT kama ejaas luiwoneete ŋes kere, kama kaŋul kere luiwoneete ŋes kabeit. Itodoli eimiel loka ŋul kalueyoŋito ŋes; epupuni da aimonyokec, itajari kes.” (Isabulin 145:18, 19) Komom ber ijo apolou kangun! Eapie Lokasuban loapedor kere kama ijai oni ido kiirari nges oni arai ‘kiwonei ngesi kabeit.’ Erai teni arereng naepol noi einer kede Edeke kotoma ailip!

² Konye arai ikoto oni Yawe apupun alipasinei wok, ibusakinit oni ailip ngesi koipone loitojokit ngesi. Epone ani kiswama oni nu arai mam oni ijeni nuisisianakini Ebaibuli nuikamunitos ailip? Eraasi nuepolok oni ajenun nu ebalas awaidikaeta nuka Ebaibuli kakiro kanu, naarai ingarakini oni ailip adukun eidicane loegogong ka Yawe.

3. Anyoin bo adiope akirot naepol naibusakinitor oni ailip nejai Yawe?

³ Adiope kakiro naepol naibusakinitor oni ailip nejai Yawe nges na ebe ingisit ngesi oni aswam kwangin. Isinyikokinit oni akekirot: “Siriyaloŋoŋoete akirot kere, konye kotoma akiro kere toma ailip ka aiŋaiŋa nepepe kaimal, kitejenut Edeke nuikotosi. Ainapakin da naka Edeke naedeparit ajenun kere, kidarenenei itauonokus ka aomisiokus kotoma Kristo Yesu.” (Ipilipin 4:6, 7) Kabeit mam oni ikoto aitapalaun ainakinet naka asianut kwape kana, naijakit oni Epugan Loeyait akwap kere!

4. Epone ani itogogonga ailip eidicane wok kede Yawe?

⁴ Acekirot naibusakitor oni ailipenen duc nejai Yawe, erai ebe kingarakin oni ailip aitogogong eidicane wok kede ngesi. Ipapero lukabeit mam inerenanas kapak bon nejaar ibore yen ekotosi kanejai idiopet. Konye ipapero lukabeit eminanara bonik, ido epaperonekec iyatakin agogongor neinerananatar kesi aitijenikin nginidiopet nujaasi otau. Kwape kwangin, eputos aanyunet na ka eidicane wok kede Edeke Yawe. Kingarakinete ijo eitabo lo, idau ijo  aijenun nuipu nuisisianakini Ebaibuli nuikamunitos Yawe, iponesio, ka alosikinetake. Idau ijo ajenun ngesi kwape etunganan obe. Ijaikinit ailip ijo arereng naka aitijenun aomisio ka nuejaasi otaukon nejai Papakon lokokuju. Nepe iswama ijo kwangin, ibuni ijo aikunyakin nejai Yawe.​—Yakob 4:8.

5. Inyo itodunit ebe mam Yawe iiranari ailipasinei kere?

⁵ Iiranari kereka Yawe ailipasinei kere? Koany nuabu ngesi kolimok Isiraelin luemengeraka kapaarasia nuka enabi Isaia: “Eebo nailipenenata nuipu, mam eiranari, imodimoda akusikanin aokot.” (Isaia 1:15) Kanukangun, epoderete ace aswamisio ainakin Edeke mam iirari alipasinei wok. Kanu Edeke acamun aiirar ailipasinei wok, ibusakinit oni aitodolikin nuekoto ngesi.

6. Inyoin bo ibore yen epol yen ekoto oni kajaatar kanu Edeke aiirar ailipasinei wok, ido inyoin epedori aitodun ebe kijaatar oni kanges?

⁶ Ibore yen epol yen ekoto Edeke oni aitodun nges aiyuun. (Marako 11:24) Abu ekiyakia Paul kiwadikate ebe: “Konye neemamea aiyuun mam epedor aitelel ŋes. Naarai yenikunyakini Edeke ibusakinit aiyuun ebe ejai ŋesi, ido ebe eropi ŋul luemoete ŋes.” (Iburanian 11:6) Ajaut kede aiyuun nabeit mam erai aijen aijen bon ebe ejai Edeke ido da ebe iirari ngesi ka abongonokin ailipasinei wok. Itoduni oni aiyuun kotoma aswamisio wok. Ekoto oni aitodun kaidelel ebe ijaatar oni kede aanyun kaswamisio wok nuka nginiparaaran.​—Yakob 2:26.

7. (a) Kanukinyo ibusakinitor oni aitodun ayongit neinerar oni ka Yawe kotoma ailip? (b) Neilipia oni nejai Edeke, epone ani ipedoria oni aitodun aiyapapara kabeit?

⁷ Ekoto bobo Yawe ngul luilipete nges aswam kwangin kotoma aiyapapara ka abeit. Kanukinyo ibusakinitor oni ayapapara neinerar kede Yawe? Nedumuniata itunga arereng naka ainerakin kede ekabaka araibo epuresident,  iswamaete kesi kwangin kede ayongit naepol, kijaikitos epugan ngol aibuses. Koipone kalo edeparit, ibusakinit oni aijaikinit Yawe angosibib naepol noi neinerar ka ngesi kotoma ailip! (Isabulin 138:6) Kabeit, erai ngesi “Edeke Lokapedor Kere.” (Ageun 17:1) Neilipia oni nejai Edeke, eipone loinerar oni kanges, ibusakinit kitodunite ebe imisikinit oni kaiyapara ebe epol akedoketait adepar naok. Aiyapara kwape kangin einakin bobo oni ailip kabeit kotaoun wok, ainyekin ainyongong ailipasinei.​—Matayo 6:7, 8.

8. Epone ani ipedoria oni aswam nuiriamara nepepe kailip wok?

⁸ Ibore ice yen ibusakinit oni aswam tetere Edeke iirar ailipasinei wok ngesi oni aswam nuiriamara nepepe kede alipasinei wok. Ekoto Yawe oni aitam nuipedori kere aitodolikin akiro nuilipi oni. Kwape aanyunet, arai ilipi oni ebe: “Koinakinai sio lolo ikosinyamat luka lolo,” ibusakinit oni aswam kagogong noi adioswam kere naetakani naipedori oni aswam. (Matayo 6:11; 2 Isesalonikan 3:10) Arai ilipi oni aingarakinio kanu aipikor anonoku nakakuan, ibusakinit ido oni acoikinit kenacitos da ejautene ka aiboisio nuepedorete ayaun oni toma acodunio. (Ikolosain 3:5) Aiyatakin toma oboro ngul luidau oni aanyun tetere Edeke ebongokin ailipasinei wok, ejaasi bobo aingiseta nuikamunitos ailip nuekoto oni adumun abongokineta kec.

9. Nebejaingai ibusakinit oni ailip, ido ketoritos nejai ngai?

⁹ Nebejaingai ibusakinit oni ailip? Abu Yesu kisisianak atupitok ke ailipenen ebe, “Papakosi loejai toma akuj.” (Matayo 6:9) Kanukangun, ibusakinit oni ailipenen nejai Edeke Yawe bon. Konye ekoto Yawe oni amisikin adoketait naka Okokuke loteluna, Yesu Kristo. Kwape isisiator oni kosula 5, aponi kijukunai Yesu toma akwap araun alucet kanu alakun oni kotoma adiakar ka atwanare. (Yokana 3:16;  Iromayon 5:12) Erai nges Esaseredoti Lopeti kede Ekatubon loeseunitai. (Yokana 5:22; Iburanian 6:20) Kanukangun, icorakinitos oni aiwadikaeta nuka Ebaibuli aitoritor ailipasinei wok nejai Yesu. Abu ngesi elopet kobala ebe: “Arai eoŋ erot, ka abeit, ka aijar da; emamei yenebuni mama ejai Papa, dimikito itorit tomakaŋ.” (Yokana 14:6) Kanu ailipasinei wok apupunio, ibusakinit oni ailip nejai Yawe bon ketoritos nejai Okokuke.

10. Kanukinyo emameor epone loitegelikina loebeitor oni ajaikinor neilipia oni nejai Edeke?

¹⁰ Ejai kereka ediopone loitegelikina loekotore oni ajaikinor neilipia? Mam. Emamei ediopone kere loitegelikina loekotor Yawe oni ajaikinor neilipia. Isisianakini Ebaibuli ebe ecamakitai oni ailip kajaasi odiopone kere. Imoriaritos nu aiboi, ailur, akukokin ka aibwo. (1 Aisiitonokin 17:16; Nekemia 8:6; Daniel 6:10; Marako 11:25) Nuepolok, mam erai eipone loijaikinor oni tetere icetunga epedorete aanyun oni ilipi, konye ejautene loka etau loejok. Arai ejaasi nuiswamai oni, araibo kegesakin oni ationis adio, ipedori oni ailip kaililing kadioboisit kere. Iirari Yawe ailipasinei kwapengun da, karaida mam aticepak luidunyasi kaoni ejenete ebe ilipi oni.​—Nekemia 2:1-6.

11. Inyoika iboro luejokuka luikamunitos oni nuibusakinit oni ailip?

¹¹ Anyoika bo nuibusakinit oni ailip? Itetemit Ebaibuli ebe: “Arai kilip ibore kwape ejaar akoteke, kipupuni ŋesi oni.” (1 Yokana 5:14) Aso ibusakinit do oni ailipi idiobore kere yeni iriamara nepepe kakote naka Edeke. Konye ekoto kereka Edeke oni ailipi kanu eipud araibo atiokisio wok? Eebo cut! Ailip nejai Yawe eputosi bala eineri kede epapero obe. Ipedori oni einer kailajara, ‘abukokin etau wok’ nejai Edeke. (Isabulin 62:8) Ibusakinit oni ailip Edeke ajaikin oni emoyo lokalaunan, naarai kingarakini oni aswam nuedolitos. (Luka 11:13) Ipedori bobo oni ailip aigarenikinio kanu aseun aswam nukacoa ka agogong na atitingikin  atiokisio. (Yakob 1:5) Neidiakara, ibusakinit oni ailip aisionio kotoma alucet naka Kristo. (Ipeson 1:3, 7) Konye, mam ibusakinit oni ailip nuikamunitos oni bon. Ekoto oni ailipenen kanu icetunga da​—itunga luka okale kangul luemaete kaoni.​—Aswamisio 12:5; Ikolosain 4:12.

12. Epone ani ipedoria oni aitopolor iboro luikamunitos Papawok lokokuju kotoma ailip wok?

¹² Iboro luepolok luibusakinit oni aitege kotoma ailip wok kesi luikamunitos Edeke Yawe. Ibusakinit oni aiturit ka aisilamikin ngesi kanu ajokisio ke kere nueswamaiki ngesi oni. (1 Aisiitonokin 29:10-13) Abu Yesu koinak aanyunet naka ailip, naiwadikatai Matayo 6:9-13, ne esisianakina ngesi oni ailip ebe kitalaunai Ekiror loka Edeke, apolou kangun erai ebe koyaitete Ekekiror kwape lokalaunan. Katupakin, abu ngesi kolimok oni ailip Ajakanut naka Edeke kobu, nuikoto ngesi kiswamasi kakwapin kwape iswamaere kotoma akuj. Akaulo naener nuepolok nu nuikamunitos Yawe, abu Yesu kinere nuikamunitos nuwok. Neitegeia oni iboro luikamunitos Edeke kotoma ailip wok, itoduni oni ebe mam oni itopolorit nuikamunitos nuwok.

13. Anyoika bo itodunitos awadikaeta nuka Ebaibuli nuikamunitos aojau naka ailipasinei nuecamunitai?

¹³ Ibusakinit ailipasinei wok kotia aojaukec ai? Mam Ebaibuli ijaikinit adiowojau kere naka ailipasinei wok, neilipi oni bon araibo neibwoikitor oni lucetunga kotoma ailip. Epedori ailip araut naeuriana kwape nat eriko enyama araibo naewoja kanoi noi neitijenikina oni Yawe atiokisio wok. (1 Samuel 1:12, 15) Konye, abu Yesu kitoron itunga luetodolikina bonik, luejanakinete ailipasinei nu aojak noi, ido kitodiar koingaren kaluce. (Luka 20:46, 47) Ailipasinei kwape kangun mam isialamikitos Yawe. Nuepolok ngesi oni ailip kotoma otauon wok. Kanukangun, aojau naka ailipasinei wok elomuni kwape ejaatar iboro luipuda oni araibo toma ojautene loijai oni.

14. Anyoin bo apolou naisinyikokitor oni Ebaibuli ‘ailipenen tiritir,’ ido anyoika bo nuitalakaritos oni kakiro kanu?

 ¹⁴ Ibusakinit oni ailip irwan mwasai? Isinyikokinit oni Ebaibuli ‘ailip duc,’ “kicebokinito ailip,” “kilipenenete tiritir.” (Matayo 26:41; Iromayon 12:12; 1 Isesalonikan 5:17) Konye mam akiro nu itodunitos ebe ebeit oni ailipenen kangin dakika. Isinyikokinit oni Ebaibuli ailipenen duc, aimalainen Yawe duc kanu ajokisike kanuwok, ido kasesenete ngesi kanu aitetenio, aitalakario ka agogong. Mam kereka oni ilakara ajenun ebe, mam Yawe ibwaikinit ediosange kere loka aojau naka ailipasinei wok araibo irwan mwasai ibusakinitor oni ailip nejai ngesi? Arai cut isimarit oni arereng naka ailip, ibuni oni adumunun apak nailipenen nejai Papawok lokokuju.

15. Kanukinyo ibusakinitor oni alimun “Amen” kangeset naka ailip wok bon araibo neilipia oni kede lucetunga?

¹⁵ Kanukinyo ibusakinitor oni alimun ‘Amen’ kangeset naka ailip? Akirot ‘Amen’ erai akepolou ebe “ikote nepepen,” araibo “kojaunos kwangin.” Itodunitos aanyuneta nuka awadikaeta ebe edolit alimun ‘Amen’ kangetakinet naka ailip nailipia oni bon araibo kaluce tunga. (1 Aisitonokin 16:36; Isabulin 41:13) Alimun ‘Amen’ kangeset naka ailip wok, itodunit oni ebe, kere nuilipit oni kilipit kotoma amunonut. Neilimunia oni “Amen,”​—arai kaililing araibo kopupo​—kotoma ailip naeinakin ice, itoduni do oni ebe, icamunit oni akiro nuilipitai.​—1 Ikorinton 14:16.

16. Anyoin amunokina naijaar oni naikamunit ailip?

¹⁶ Konye ebongonokin cut Yawe ailipasinei? Eebo! Ijaatar oni abwoetait naitigogongikit ebe ebongonokini “loiirari ailip” ailipasinei nuenakinete imillionin luka itunga kamunonut. (Isabulin 65:2) Epedori Yawe abongokin ailipasinei wok koponesio luegelegela.

17. Kanukinyo ipedoria atemar ebe itosomai Edeke ikemalaikan, ka ikejanakinak luka kakwap kanu abongonokino ailipasinei wok?

 ¹⁷ Itosomai Yawe ikemalaikan ka ikejanakinak luka akwap kanu abongonokino ailipasinei. (Iburanian 1:13, 14) Ejaasi aitijenareta nuipu nuka itunga luapotu kilipitos nejai Edeke aingarakinio amisikin Ebaibuli ido katipet kodumuni kesi ediopet Ajenak luka Yawe. Aitijenareta kwangun itodunitos ebe ingarenikinitos imalaikan aswam naka alimonokin Ajakanut. (Apukokinio 14:6) Kanu abongokin ailipasinei wok nuinakinio kapak naka eipud,  epedori Yawe aisinyikokin Ekristayot abunere aingarakin oni.​—Awaragasia 12:25; Yakobo 2:16.

18. Epone ani itosoma Yawe ekemoyo lokalaunan ka Akirot ke kanu abongonokina ailip naka ikejanakinak?

¹⁸ Itosomai bobo Edeke Yawe ekemoyo lokalaunan ka Akirot ke, Ebaibuli, abongonokino ailipasinei nuka ejanakinak ke. Neilipia oni aigangakinio kanu atitingikin acoduneta, ebongokin ngesi ailip wok neinakina oni aitetenio ka agogong kitosomai akemoyo lokalaunan. (2 Ikorinton 4:7) Epote duc abongonokineta nuka ailipasinei wok kanu aingarekinio kotoma Obaibuli, neijakina Yawe oni aingarakino kanu aseun aswam nuka acoa. Ipedori oni adumun awadikaeta nuingarakinete oni neisisia Ebaibuli bon ka neisiomia oni itabon luka Ikristayon, kwapenat eitabo lo. Akiro nuka Ebaibuli nuipuda oni aticepak ipedori adumakin aurianeta nuka Ikristayon araibo kanejai ekimat loka atukot loepodokinit kanuwok.​—Igalatian 6:1.

19. Anyoika nuibusakinit oni aiitun ne esubitor bala mam ailipasinei wok ebongokitai?

¹⁹ Arai esubit bala iyapi Yawe abongokin ailipasinei wok, mam erai kanu ebe mam ngesi epedori abongokin kesi. Konye, ibusakinit oni aiitun ebe, ebongokini Yawe ailipasinei kwape ejaar akekote ido kotoma apakike. Ejeni ngesi eipud wok ido epodokinit kanuwok adepar oni. Ecamakinit ngesi oni duc, ‘anyikokin ailip; aimo ka aikungukung.’ (Luka 11:5-10) Ainyikokinit kwangin itodikin Edeke ebe,  epol eipud wok ido aiyuun wok erai nakabeit. Epedori bobo Yawe abongokin ailipasinei wok koipone lomam oni imisikinit. Kwape aanyunet, epedori ngesi ebongokin ailip wok naikamunit ationis neitakanikin oni mere alemar nges, konye aijaikin oni agogong natitingikin nges.​—Ipilipin 4:13.

20. Kanukinyo ibusakinitor oni aitosom ejok arereng naepol noi naka ailip?

²⁰ Epol teni oni alakara ajenun ebe Lokasuban akwap kere eyapie kane ejaasi ngun kere luiwoneete ngesi koipone loibusakinit kotoma ailip! (Isabulin 145:18) Ibusakinit oni ailipenen duc nejai Yawe kwape erari arereng naepol noi oni ailip nejai ngesi. Arai iswama kwangin, idumuni oni alakara naka adukun eidicane loegogong noi nepepe ka Yawe, loiiranar ailipasinei.