1, 2. Мөргүл — чүге улуг хүндүткел бооп турар база Библия мөргүл дугайында чүнү өөредип турарын билип алыры чүге чугула?

 КЫЗЫГААР чок Октаргайга бодаарга, бистиң Черивис азарганчыг элезинчигеш дег. «Дээр биле черниң Чаяакчызы» Иегованың мурнунда шупту чоннар «хумуңда сугнуң дамдызы дег» (Ырлар 113:23; Исаия 40:15). Ындыг-даа болза Библияда чугаалаан: «Дээрги-Чаяакчы Ону кый деп мөргүүр бүгү улуска — шынныы-биле Ону кый деп мөргүүрлерге — чоок. Оон коргар улустуң күзээн чүүлүн Ол күүседип бээр, оларның дуза дилээн кыйгызын дыңнап кааш, камгалаар» (Ырлар 144:18, 19). Чүгле бодап көр даан: бир эвес бүрүн күчүлүг Чаяакчыны шынныы-биле кый деп мөргүүр болзувусса, ол биске чоок болгаш бисти дыңнап турар. Бурганга мөргүүрү — кайы-хире улуг хүндүткел-дир!

² Иегова бисти дыңнап каарын күзээр болзувусса, аңаа таарымчалыг кылдыр мөргүүр ужурлуг бис. Библия мөргүл дугайында чүнү өөредип турарын билип албайн чыткаш, шын мөргүүрү болдунар бе? Ол айтырыгны шыңгыызы-биле кичээнгейге алыры чугула, чүге дээрге мөргүл Иеговага чоокшулаарынга биске дузалыг.

3. Иеговага мөргүүр ужурлуг чугула чылдагааннарның бирээзи кандыгыл?

³ Бодунга мөргүүр кылдыр, Иегова бисти боду чалап  турар, ынчангаш мөргүүрүнүң бир чугула дээн чылдагааны ол-дур. «Чүү-даа дээш, сагыш човаваңар, харын боттарыңарның дилег-човааңарны Бурганга ажыдып берип, мөргүңер, Аңаа үргүлчү өөрүп четтириңер. Ынчан улустуң угаап-билиптер шаандан ажа бээр Бурганның амыр-тайбыңы чүректериңер болгаш угаан-сарыылыңарны Христос Иисуска башкартканыңар дамчыштыр кадагалаар» — деп, ооң Сөзү кыйгырып турар (Филиппийжилерге 4:6, 7). Октаргайның Дээди Чагырыкчызының кайгамчык белээн кичээнгей чок арттырарын күзевес болгай бис.

4. Иегова-биле найыралывысты мөргүл канчаар быжыктырып турар?

⁴ Иеговага мөргүүр ужурлуг бис, чүге дизе ооң-биле чугаалажыры — аравыста найыралды быжыктырар арга-дыр. Ёзулуг өңнүктер чүгле бир-ле чүүл херек апаарга чугаалажыр эвес, а харын-даа олар үени кады эрттиреринге ынак. Олар бодалдарын, минниишкиннерин база дүвүрелдерин ажыы-биле үлежир болза, оларның найыралы быжыгар. Иегова Бурган-биле найырал база шак-ла ынчаар сайзыраар. Библия Иегованың дугайында, ооң шынарларының болгаш күзел-соруунуң дугайында чүнү өөредип турарын бо номнуң дузазы-биле хөйнү билип алган сен. Бурган херек кырында бар хуу-бот деп, ам-на билир апарган  сен. Мөргүл биске дээрде Адавыс-биле эң-не чажыт бодалдарывысты болгаш сеткил-сагыжывысты үлежир арганы берип турар. Ол биске Иегова-биле чоокшулажырынга дузалап турар (Иаковтуң 4:8).

5. Иегова шупту мөргүлдерни дыңнавайн турар деп, чүүден көстүп турар?

⁵ Иегова шупту мөргүлдерни дыңнап турар бе? Исаия медээчиниң үезинде дыңнангыр эвес израильчилерге ол чүнү чугаалааныл, эскерип көрем: «Хөй мөргүп турар-даа болзуңарза, мен дыңнавайн тур мен. Холдарыңар куруг хан апарган-дыр» (Исаия 1:15). Бурган чамдык кижилерниң алдынып турарын көргеш, оларның мөргүлдерин дыңнавайн турар деп көскү-дүр. Бурганга бистиң мөргүлдеривисти дыңнаары тааланчыг болур кылдыр, каш кол негелделерни күүседири чугула.

6. Бурган бистиң мөргүлдеривисти дыңнаар кылдыр, кандыг чугула негелдени сагыыры чугула база ону канчаар күүседирил?

⁶ Чүрээвистиң ханызындан бүзүрел — чугула негелдениң бирээзи (Марктың 11:24). Павел элчин бижээн: «А бүзүрел чок болза, Бурганның сеткилинге кирери канчап болдунарыл? Бурганче чоокшулап кел чыдар кижи бүрүзү Ол бар деп база Ону дилеп чоруур улуска Ооң шаңналы турар деп бүзүрээр ужурлуг болгай» (Еврейлерге 11:6). Ынчалза-даа ёзулуг бүзүрелдиг болуру оон-даа ханы уткалыг. Бурган бар деп база ол бистиң мөргүлдеривисти дыңнап, аңаа харыылап турар деп билири эвээш. Бүзүрел ажыл-херектер-биле бадыткаттынар. Чуртталгавыстың хүн бүрүзү бисте бүзүрел бар деп херечилээр ужурлуг (Иаковтуң 2:26).

7. а) Иеговага мөргүп тура, чүге ханы хүндүткелди илередири чугула? б) Бурганга мөргүп тургаш, биче сеткиливисти болгаш чүрээвистиң ажыт-чажыт чогун канчаар көргүзүп болур бис?

⁷ Оон ыңай биче сеткилдиг болгаш чүрээвистиң ханызындан мөргүүрү Иеговага чугула. Ооң-биле чугаалажып тургаш, биче сеткилдиг болурувуска Бурган төлептиг эвес-тир бе? Кижилер президентиниң бедик байдалын утпайн,  ооң-биле ханы хүндүткелдиг чугаалажыр болгай. Ынчаарга Иегова-биле кайы-хире ханы хүндүткелдиг чугаалажыр ужурлуг деп бис! (Ырлар 137:6). Ол «Күчүлүг Бурган» болгай (Эге дөс 17:1). Мөргүп тура, Бурганның мурнунда кандыг байдалда турарывысты биче сеткиливис-биле миннири чугула. Ындыг хөөн чаңгыс ол-ла сөстерни катаптавайн, мөргүлдерни шээжи-биле чугаалавайн, а чүүрээвистиң ханызындан мөргүүрүнче бисти оттуруп турар (Матфейниң 6:7, 8).

8. Ажыл-херектеривис мөргүлдеривиске канчаар дүгжүр ужурлуг?

⁸ Оон аңгыда, Бурган бисти дыңнаар кылдыр, ажыл-херектеривис мөргүлдеривиске дүгжүр ужурлуг. Бар-ла шаавыс-биле кызарывысты Иегова бистен манап турар. Чижээ, бир эвес: «Амыдыраар хлеб-тараавысты бөгүн биске хайырла» деп Бургандан дилээн болзувусса, кызымаа-биле ажылдап, ажылывыска ак-сеткилдиг хамаарылгалыг болур ужурлуг бис (Матфейниң 6:11; 2 Фессалоникажыларга 3:10). А бир эвес мага-боттуң кошкак талазын ажып эртип алыры-биле мөргүп турар болзувусса, бисти күткүлгеге киирип болур байдалдардан дезери чугула (Колоссчуларга 3:5). Ооң ыңай Бурганга шын мөргүүр кылдыр, чүнү билип алыры чугула?

9. Кымга мөргүүр ужурлуг бис база кымның адын таварыштыр?

⁹ Кымга мөргүүр ужурлуг бис? Иисус бодунуң өөреникчилерин «Дээрде Адавыска» мөргүүрүн өөредип чораан (Матфейниң 6:9). Ынчангаш чүгле Иегова Бурганга мөргүүр ужурлуг бис. Ынчалзажок ооң эр чаңгыс Оглунуң, Иисус Христостуң, бедик байдалын хүлээп алырывысты Иегова бистен манап турар. 5-ки эгеден билип алганывыс дег, Иисус бодун төлевир кылдыр берип, бисти бачыттың болгаш өлүмнүң кулданыышкынындан хостаар дээш, чер кырынче келген (Иоанның 3:16; Римчилерге 5:12). Ол Дээди бараалгакчы болгаш Шииткекчи кылдыр томуйлаттырган (Иоанның 5:22; Еврейлерге 6:20). Ынчангаш Бурганның  Сөзү Иисустуң адын таварыштыр мөргүүр кылдыр бисти өөредип турар. Ол бодунуң дугайында чугаалаан: «Мен дээрге орук, алыс шын база амыдырал-дыр мен. Чүгле Мени таварты дээрден башка, кым-даа Адамга кээп шыдавас» (Иоанның 14:6). Бистиң мөргүлдеривисти дыңназын дээш, чүгле Иеговага, Иисус Христостуң адын таварыштыр мөргүүр ужурлуг бис.

10. Чүге бир-ле тускай туруп алгаш, мөргээн ажыы чок?

¹⁰ Бир-ле тускай туруп алгаш, мөргүүр ужурлуг бис бе? Чок. Иегова ону бистен негевейн турар. Библиядан алырга, янзы-бүрү байдалда: олуруп-даа, туруп-даа, башты доңгайып алгаш азы дис кырынга туруп алгаш-даа мөргүп болур (1 Летопись 17:16; Неемия 8:6; Даниил 6:10; Марктың 11:25). Долгандыр улус эскерзин дээш эвес, а чүректиң шын хөөнү эң-не чугула бооп турар. Хүн бүрүнүң ажыл-херээн кылып чорааш азы айыылга таваржы бергеш, каяа-даа иштивисте мөргүп болур бис. Өске улус бистиң ол үеде мөргүп турарывысты билбейн турар-даа болза, Иегова ол мөргүлдерни дыңнап турар (Неемия 2:1—6).

11. Хууда кандыг дилеглер дугайында мөргүп болур бис?

¹¹ Чүү дугайында мөргүп болур? Библияда чугаалап турар: «Ооң [Иегованың] күзел-соруунга чүүлдештир кандыг-бир чүүлдү Оон мөргүп дилээр болзувусса, Ол бисти дыңнаар» (1 Иоанның 5:14). Ынчаарга Бурганның күзел-соруунга чүүлдештир шупту чүве дугайында мөргүп болур бис. Бистиң хууда дүвүрелдеривис дугайында мөргүлдер ооң күзел-соруунга дүгжүп турар бе? Чугаажок! Иеговага мөргүл хөй кезиинде чоок өңнүк-биле чугааны сагындырар. Бис ажыт-чажыт чокка, «сеткил-чүрээвисти Аңаа ажыдып, мөргүп» болур бис (Ырлар 61:9). Бургандан ыдыктыг сүлдени дилээри чугула, чүге дээрге ол күш биске шын алдынарынга дузалаар (Луканың 11:13). Ол ышкаш мерген угаанныг шиитпирлер хүлээп алыр удуртулганы база бергелерни ажып эртип алырда, Иеговадан дузаны дилеп болур бис (Иаковтуң 1:5). Бир эвес бачыт кылыпкан болзувусса, Христостуң өргүлүнге даянып, өршээлди дилээри чугула (Ефесчилерге  1:3, 7). Ынчалзажок чүгле боттарывыстың хууда сагышсыралдарывыс дугайында мөргүвес ужурлуг бис. Оон ыңай чоок улузувус болгаш кады чүдүп турар ха-дуңмавыс дээш, мөргүүрү чугула (Ажыл-чорудулга 12:5; Колоссчуларга 4:12).

12. Бир дугаарында чүнүң дугайында мөргүүр ужурлуг бис?

¹² Бир дугаарында Иегова Бурганга дорт хамаарылгалыг чүүл дугайында мөргүүрү чугула. Ону чүрээвистиң ханызындан алгап-йөрээр база ооң бүгү ачы-буяны дээш четтиргенивисти илередир хөй чылдагааннар бисте бар (1 Летопись 29:10—13). Матфейниң 6:9—13-те Иисустуң үлегерлиг мөргүлүн бижээн. Ында Бурганның ады алдаржыыр кылдыр, азы ханы хүндүткелдиг болур кылдыр, мөргүүрүн ол өөредип турган. Дараазында дилег Бурганның Чагыргазы чедип кээр кылдыр база Бурганның күзел-соруу дээрге дег, черге база чогуп бүдериниң дугайында турган. Чүгле ол чугула айтырыгларның соонда Иисус хууда дилеглерни чугаалаан. Бир эвес үлегерлиг мөргүлге дүүштүр мөргүүр болзувусса, чүгле бодувустуң дугайында бодавайн турарывысты көргүзер бис.

13. Бурганга тааржыр мөргүлдер кайы-хире үе дургузунда уламчылаарының дугайында Библия чүнү чугаалап турар?

¹³ Кайы-хире үе дургузунда мөргүүр ужурлуг? Хууда азы ниити мөргүлдер кайы-хире үе дургузунда уламчылаарын Библияда чугаалаваан. Ол дээрге чемненириниң мурнунда кыска мөргүлдер азы Иегованың мурнунга ишти-хөңнүвүс ажыдып турар үр мөргүлдер бооп болур (1 Самуила 1:12, 15). Ынчалзажок Иисус улус мурнунга үр мөргүп, менээргенир кижилерни шиидип турган (Луканың 20:46, 47). Ындыг мөргүлдер Иегованың сеткилинге дегбес. Мөргүл чүректен үнүп турар болза аңаа чугула. Бурганга тааржыр мөргүлдерниң узуну азы кысказы бистиң байдалывыстан база хереглелдеривистен хамааржыр.

14. «Соксаал чок мөргүлдээр» дээрге чүү дээни ол, база ол бисти канчаар өөртүп турар?

¹⁴ Кайы-хире хөй мөргүүр болза эки? Библия «мөргүлден черле салдынмаңар» база «соксаал чок мөргүлдеңер»  деп бисти кыйгырып турар (Римчилерге 12:12; 1 Фессалоникажыларга 5:17; 1 Тимофейниң 5:5). Ол дээрге дүн-хүн чок мөргүүр ужурлуг дивээни ол. Болдунар-ла болза, үргүлчү мөргүүрүнче Библия деткип турар: Иегованың буяны дээш, катап-катап четтиргенивисти илередип, оон удуртулганы болгаш деткимчени дилеп болур бис. Ооң-биле кайы-хире үр үе дургузунда база каш катап чугаалажырын, Иегова кызыгаарлавайн турар деп билири дыка-ла өөрүнчүг-дүр! Бир эвес мөргүүр арганы үнелеп турар болзувусса, бистиң дээрде Адавыска мөргүүр үени албан тып алыр бис.

15. Хууда азы ниити мөргүлдүң төнчүзүнде чүге «аминь» деп чугаалаар херек?

¹⁵ Мөргүлдүң төнчүзүнде чүге «аминь» деп чугаалаар херек? «Аминь» деп сөс «шын», азы «ындыг-ла болзун» дээн уткалыг. Библейжи үеде Бурганның бараалгакчылары бодунуң мөргүлдерин колдуунда «аминь» деп сөс-биле төндүрер турган (1 Летопись 16:36; Ырлар 40:14). Хууда мөргүлдүң соонда «аминь» деп сөстү адап тура, шын сеткиливистен чугаалаан сөстеривисти бадыткап турар бис. А ниити мөргүлдүң төнчүзүнде ыыткыр азы иштивисте «аминь» деп тура, чугаалаан чүүл-биле чөпшээрежип турарывысты көргүзүп турар бис (1 Коринфичилерге 14:16).

16. Мөргүп тургаш, чүге бүзүрелдиг бооп болур бис?

¹⁶ Иегова мөргүлдерге харыылап турар бе? Кандыг-даа чигзиниг чок! «Мөргүлдү дыңнап турар» Иегова миллион-миллион кижилерниң сеткилиниң ханызындан чугаалаан дилег-човаанга харыылап турар деп, долузу-биле бүзүреп болур бис (Ырлар 64:3). Ол мөргүлге янзы-бүрү аргалар-биле харыылап турар.

17. Иегова мөргүлдеривиске дээрниң төлээлери болгаш черде бараалгакчыларының дузазы-биле харыылап турар деп, чүге чугаалап болур?

¹⁷ Иегова мөргүлдерге дээрниң төлээлери болгаш черде  бараалгакчыларының дузазы-биле харыылап турар (Еврейлерге 1:13, 14). Кажан кижилер Библияны билип алыр дээш, Бургандан дуза дилээрге, удаваанда Иегованың бараалгакчыларынга олар таваржып турган. Ындыг таварылгалар хөй. Ол таварылгалардан Бурганның Чагыргазының дугайында суртаал ажылынга дээрниң төлээлери киржип турар деп илдең (Ажыдыышкын 14:6). Оон ыңай Иегова бистиң мөргүлүвүске харыы кылдыр, бүзүреливис чаңгыс аай ха-дуңмавысты биске дузалаар кылдыр база оттуруп болур (Чугаалар 12:25; Иаковтуң 2:16).

18. Иегова Бурган мөргүлдерге ыдыктыг сүлде болгаш Библия дузазы-биле канчаар харыылап турар?

 ¹⁸ Оон аңгыда, Иегова Бурган мөргүлдерге ыдыктыг сүлде болгаш Библия дузазы-биле харыылап турар. Күткүлгеге алыспас деп дилегге харыы кылдыр, Иегова бодунуң ыдыктыг сүлдези таварыштыр эргежок чугула удуртулганы болгаш күштү берип болур (2 Коринфичилерге 4:7). Оон ыңай мөргүлге харыыны Бурганның Сөзү база берип болур, ооң дүрүмнери мерген угаанныг шиитпирни хүлээп алырынга дузалыг. Библияны хууда шинчилеп тургаш, база бо ном ышкаш, христиан ном-дептерлерни номчуп тургаш, херектиг шүлүктерни тып ап болур. Оон Бурганның Сөзүнден херектиг сүмени христиан хуралдардан, чок болза хуралдың сагыш-човаңгыр удуртукчулары-биле чугаалажып тургаш, дыңнап болур (Галатчыларга 6:1).

19. Бистиң мөргүлдеривис харыы чок арткан ышкаш сагындырар болза, чүнүң дугайында сактыры чугула?

¹⁹ Иегованың харыызы озалдап турар ышкаш сагындырар болза, Бурган бистиң мөргүлүвүске харыылап шыдавас дивээни ол. Иегова мөргүлдерге бодунга таарымчалыг кылдыр, база кажан шын деп санаар үеде харыылап турарын утпас болза эки. Бистиң чүнү хереглеп турарывысты база биске канчаар дузалаарын ол бистен артык эки билир. Колдуунда биске кызып дилээр, тывар база соктаар арганы ол берип турар (Луканың 11:5—10). Ынчаар  кылып тура, шын сеткиливистен бүзүреливисти илередип, дилээвистиң биске кайы-хире чугулазын көргүзер бис. Чамдыкта Иегова бистиң мөргүлдеривиске манап турарывыс ышкаш эвес, а өскээр харыылап болур. Чижээ, бир эвес шенелдеге таваржып турар болзувусса, Иегова бисти бергелерден хоставас чадавас, ынчалзажок шупту чүвени шыдажып эртер күштү ол албан бээр (Филиппийжилерге 4:13, ЧД).

20. Мөргүүр арганы чүге үнелээр болза эки?

²⁰ Эгээртинмес Октаргайның Чаяакчызы ону шынныы-биле кый деп мөргүүрлерге чоок болганында, бис кайы-хире аас-кежиктиг-дир бис! (Ырлар 144:18). Мөргүүр арганы кезээде үнелеп чоруулу. Ол биске Иегова-биле оон-даа артык чоокшулажырынга дузалажып болур.