1, 2. Немә үчүн дгуа қилиш биз үчүн чоң шан-шәрәп? Немә үчүн Муқәддәс Китапниң дуа тоғрисида үгитидиғанлиғини билишимиз муһим?

ЧӘКСИЗ аләм бошлуғиға селиштурғанда, йәр шари зәрричилик чоңлуқта. Әмәлиятта, “асман зиминни пәйда қилған” Пәрвәрдигар Йәһвәниң көз алдида йәр йүзидики барлиқ милләтләр худди челәктики бир кичик су тамчисиға охшаш (Зәбур 115:15; Йәшая 40:15). Шундақ болсиму, Муқәддәс Китап: “Худавәндә униң өзигә дуа қилип турғанларға йеқинлишип туруп чин көңүл билән [униңға] ялвуруп турғанларниң һәммисигә йеқин болуп тәқвадарларниң хаһишини бәҗа кәлтүрүп пәриядини аңлап уларни қутқузар” дәйду (Зәбур 145:18, 19). Ойлап көрүң, бу немә дегән гәп! Әгәр биз “чин көңүл билән ялвуруп” уни чақирсақ, һәммигә қадир Яратқучи бизгә йеқинлишиду вә бизниң дуалиримизни аңлайду. Дуга қилиш арқилиқ Худаға йеқинлишиш биз үчүн немә дегән чоң шан-шәрәп, һә!

² Әгәр биз Пәрвәрдигар Йәһвәниң дуалиримизни аңлишини халисақ, чоқум у қобул қилидиған усулда униңға дуга қилишимиз керәк. Муқәддәс Китапниң дуга тоғрисида немә үгитидиғанлиғини билмәй туруп, қандақму дуа қилалаймиз? Муқәддәс Китапниң дуга тоғрисида немә дәйдиғанлиғини билиш, биз үчүн интайин муһим. Чүнки, дуа бизниң Йәһвәгә йеқинлишишимиз үчүн ярдәм бериду.

3. Йәһвәгә дгуа қилишмизниң муһим бир сәвәви немә?

³ Немә үчүн Йәһвә Худаға дуга қилишимизниң муһим бир сәвәви: у бизни шундақ қилишқа чақирған. Худаниң сөзи болған Муқәддәс Китап бизни мундақ илһамландуриду: “Һеч нәрсидин ғәм қилмаңлар. Әксичә һәр қандақ тәливиңлар болса, дуа-тилавәт арқилиқ Худадин тиләңлар вә шүкүр ейтиңлар. Шундақ қилсаңлар, Худаниң кишиләрниң ойлиғинидинму ешип чүшидиған тиничлиғи силәрниң қәлбиңларни вә ой-пикриңларни Әйса Мәсиһ арқилиқ тиничландуриду” (Филипиликләр 4:6, 7). Чәксиз аләмниң алий һөкүмрани меһриванлиқ билән биз үчүн дуа қилишни орунлаштурған екән, биз Униңға пәрвасизлиқ қилмаслиғимиз керәк, әлвәттә!

4. Дайим Тәңри Йәһвәгә дгуа қилиш бизниң униң билән болған мунасивитимизни қандақ күчәйтиду?

⁴ Дуга қилишниң йәнә бир сәвәви: дайим Тәңри Йәһвәгә дуа қилиш бизниң униң билән болған мунасивитимизни күчәйтишимизниң бир хил усули. Һәқиқий достлар пәқәт бир нәрсигә муһтаҗ болғандила бир-бири билән алақә қилишмайду. Әксичә, яхши достлар бир-биригә көңүл бөлүп, өз ой-хияллирини, ғәм-әндишилирини һәм һис-туйғулирини әркин-азадә ипадиләйду. Бундақ қилиш уларниң достлуқ мунасивитини техиму күчәйтиду. Бизниң Йәһвә Худа билән болған мунасивитимизму  шуниңға охшап кетиду. Сиз мошу китапниң ярдими билән: “Йәһвә ким? Униң хисләтлири вә мәхсити қандақ?” дегәнләр тоғрисида Муқәддәс Китап қандақ һәқиқәтләрни үгитидиғанлиғи һәққидә аз болмиған билимләрни үгинип өттиңиз вә Пәрвәрдигар Йәһвә билән хусусий мунасивәт қилишни башлидиңиз. Дуа қилиш сизгә өз ой-пикриңизни вә ички жүрәк сирлириңизни асмандики атиңизға ейтип көңлиңиздикини ипадилишиңиз үчүн пурсәт ата қилиду. Шундақ дуа қилиш арқилиқ сиз Тәңри Йәһвәгә йеқинлишисиз (Яқуп 4:8).

5. Пәрвәрдигар Йәһвәниң һәр қандақ дугаларға қулақ салмайдиғанлиғини немә көрситиду?

⁵ Пәрвәрдигар Йәһвә һәр қандақ дуаларға қулақ саламду? Йәшая пәйғәмбәрниң күнлиридә Йәһвә өзигә қарши чиққан Исраил хәлқигә немә дегәнлигини көрүп бақайли: “Дуайиңизни тола қилсиңизму аңлимасмән чүнки қоллириңиз қан билән толғандур” (Йәшая 1:15). Буниңдин көрүвелишқа болидуки, биз қилған бәзи ишлар Худаниң бизниң дуалиримизға қулақ салмаслиғиға сәвәп болиду. Шуңа, Униң дуалиримизға хурсәнлик билән қулақ селиши үчүн биз бәзи асасий тәләпләргә чоқум мас келишимиз керәк.

6. Худаниң бизниң дугалиримизға қулақ селиши үчүн бир асасий тәләп немә? Биз у тәләпкә қандақ мас келәләймиз?

⁶ Бир асасий тәләп иман-етиқатни әмәлдә көрситиш (Маркус 11:24). Әлчи Павлус: “Ишәнч болмай туруп, Худани хурсән қилиш мүмкин әмәс. Чүнки Худаниң алдиға келидиған киши Униң бар екәнлигигә вә Уни издигәнләргә издәш әҗрини қайтуридиғанлиғиға ишиниши керәк” дегән (Ибранийлар 11:6). Ишәнч көрситиш у Худаниң болғиниға вә дуалиримизни аңлап уларға җавап қайтуридиғинидин техиму көп нәрсини билдүриду. Иман-етиқатни әмәлий иш-һәрикәт испатлайду. Күндилик турмушта иш-һәрикәтлиримиз арқилиқ иман-етиқатимизни ениқ испатлишимиз керәк (Яқуп 2:26).

7. а) Дуга арқилиқ Йәһвә билән сөзләшкәндә немә үчүн һөрмәт көрситишимиз керәк? ә) Йәһвәгә дуга қилғанда, қандақ қилип кәмтарлиғимиз вә сәмимийитимизни көрситәләймиз?

⁷ Тәңри Йәһвә йәнә өзигә дуа арқилиқ йеқинлишидиған кишиләрниң кәмтарлиқ вә сәмимийлик билән дуа қилишни тәләп қилиду. Биз Йәһвә билән параңлашқанда кәмтар болушимиз керәк. Шундақ әмәсму? Әгәр адәмләрдә дөләт башлиғи билән  көрүшүш пурсити болса, улар һемишәм у һөкүмранларниң алий орниға чоңқур иззәт-еһтирам билән һөрмәт билдүриду. Шундақ екән, биз Пәрвәрдигар Йәһвәгә йеқинлашқанда, техиму чоңқур иззәт-еһтирам билән һөрмәт билдүрүшимиз керәк әмәсму, әлвәттә?! (Зәбур 138:6). Әмәлиятта, у “һәммигә қадир Худа” (Яритилиш 17:1). Биз дуа қилип Худаға йеқинлашқанда, биз өз орнимизни униң алдида кәмтарлиқ билән тонуп йәткәнлигимизни көрситиши керәк. Шундақ кәмтарлиқ бизни һәргизму охшаш гәпләрни тәкрарлимастин, бәлки чин қәлбимиздин сәмимийлик билән Униңға дуа қилишқа рәғбәтләндүриду. Шуңа, биз өзимиз чүшәнмәйдиған тилда дуа қилмаслиғимиз яки дуа китаплиридин оқумаслиғимиз лазим (Мәтта 6:7, 8).

8. Биз дуга қилип тилигән нәрсиләр үчүн қандақ әмәлий иш-һәрикәт қилишимиз лазим?

⁸ Худаниң дуалиримизға қулақ селиши үчүн башқа бир тәләп, дуайимизға маслашқан әмәлий иш-һәрикәтни қилиш. Йәһвә бизниң дуа қилип тилигән барлиқ нәрсиләр үчүн әмәлий күч чиқирип иш қилишимизни күтиду. Мәсилән, әгәр биз: “Күндилик йемәклигимизни бәргәйсән” дәп дуа қилсақ, биз қандақ иш тапалисақ, шу ишни чоқум тиришип қилишимиз керәк (Мәтта 6:11; Салоникилиқларға 2-хәт 3:10). Әгәр биз өз аҗизлиғимиздин ғалиб келиш үчүн ярдәм сорап дуа қилсақ, биз чоқум еһтиятчан болуп, аздурлушқа башлайдиған һәр қандақ муһит вә шараиттин хали болушимиз лазим (Колосилиқлар 3:5). Жуқурида баян қилинған бир нәччә асасий тәләпләрдин башқа, төвәндә йәнә җавап беришимизгә тегишлик дуаға мунасивәтлик соаллар бар.

9. Кимгә дуга қилишимиз керәк? Кимниң васитиси билән?

⁹ Кимгә дуга қилишимиз керәк? Һәзрити Әйса өз әгәшкүчилиригә “асмандики Атимиз”ға дуга қилишни үгәткән (Мәтта 6:9). Шуңа, биз пәқәт Тәңри Йәһвәгила дуга қилишимиз керәк. Бирақ, Йәһвә өзи тайинлиған Мәсиһ Әйсаниң орнини етирап қилишимизни тәләп қилиду. Биз мошу китапниң 5-бабида үгинип өткәндәк, Мәсиһ бизни гуна вә өлүмдин қутқузуш үчүн төләм қурванлиғи сүпитидә йәр йүзигә әвәтилгән (Юһанна 3:16; Римлиқлар 5:12). У баш роһаний вә һөкүм қилғучи болуп тайинланған (Юһанна 5:22; Ибранийлар 6:20). Шуңлашқа, Муқәддәс Китап  бизни Әйса Мәсиһ арқилиқ Худаға дуга қилишқа йетәкләйду. Әйса у өзи: “Йол, һәқиқәт вә һаятлиқ Өзәмдурмән. Мениңсиз һеч ким Худа Атамниң йениға баралмайду” дегән (Юһанна 14:6). Йәһвәниң дугалиримизға қулақ селиши үчүн, биз чоқум Пәрвәрдигар Йәһвәгә дуга қилғанда Мәсиһ Әйса васитиси билән қилишимиз керәк.

10. Немә үчүн дуга қилғанда бизниң бәдинимиз алаһидә қияпәттә яки йөнилиштә болуш тәләп қилинмайду?

¹⁰ Дуга қилғанда бәдинимиз чоқум алаһидә қияпәттә яки йөнилиштә болуши зөрүрму? Яқ. Йәһвә Худа, биз униңға дуа қилғинимизда, қоллиримиз яки пүтүн бәдинимизниң һеч қандақ алаһидә қияпәттә болушини тәләп қилмайду. Муқәддәс Китап: көп хил қияпәттә мәсилән, олтуруп, егилип тазим қилип, тизлинип вә өрә туруп қилинған дуалар қобул қилиниду дәп үгитиду (Тарихнамә 1-язма 17:16; Нәһәмия 8:6; Даниял 6:10; Маркус 11:25). Әң муһим болғини, башқиларға алаһидә қияпәтни көрситиш яки мәлум йөнилишкә қарап дуа қилиш әмәс. Бәлки, чин қәлбимиздин тоғра һалитидә болуш. Әмәлиятта, биз күндилик иш-паалийәтләр билән шуғулланғанда яки җиддий ишларға дуч кәлгәндә, мәйли қандақ җайда болайли көңлимиздә үнсиз дуа қилсақ болиду. Әтрапимиздики адәмләр бизниң дуа қиливатқанлиғимизға пүтүнләй диққәт қилмиған һаләттиму, Йәһвә Худа бизниң үнсиз дуалиримизни аңлайду (Нәһәмия 2:1—6).

11. Қайси шәхсий ишлиримиз үчүн дуга қилсақ мувапиқ болиду?

¹¹ Немиләрни тиләп дуга қилсақ болиду? Муқәддәс Китап: “Худаниң ирадисигә уйғун немини тилисәк, У дуа-тилавитимизни чоқум аңлайду” дәйду (Юһаннаниң 1-хети 5:14). Шуңа Худаниң ирадисигә мас келидиған һәр қандақ нәрсиләр үчүн дуга қилсақ болиду. Ундақта, өзимизниң ғәм-әндишилири тоғрисида дуа қилсақ, у Худаниң ирадисигә мас келәмду? Әлвәттә мас келиду! Пәрвәрдигар Йәһвәгә дуга қилиш худди йеқин бир достимиз билән параңлашқанға охшап кетиду. Биз Худаға ич бағримизни төкүп көңлимиздики барлиқ сөзлиримизни очуқ ейталаймиз (Зәбур 62:8). Худадин муқәддәс роһни тилишимиз наһайити мувапиқ. Чүнки, муқәддәс роһ бизниң тоғра иш қилишимизға ярдәм бериду (Луқа 11:13). Йәнә биз дана қарар чиқириш үчүн йетәкчилик; қийинчилиқ әһвалға бәрдашлиқ беришимиз үчүн күч-қувәт тиләп дуа қилсақ болиду (Яқуп 1:5). Әгәр биз гуна өткүзсәк, Әйса Мәсиһниң төләм қурванлиғи  асасида кәчүрүм тиләп дуга қилишимиз керәк (Әфәсликләр 1:3, 7). Әлвәттә, биз өзимиз үчүнла дуга қилмай, башқилар үчүнму йәни аилимиздикиләр вә етиқатчи қериндашлиримиз үчүнму дуа қилишимиз лазим (Әлчиләр 12:5; Колосилиқлар 4:12).

12. Биз қандақ дуга қилсақ, асмандики Атимизға мунасивәтлик ишларни әң муһим орунға қойған болимиз?

¹² Дуга қилғинимизда Йәһвә Худаға мунасивәтлик ишларни әң муһим орунға қоюшимиз лазим. Йәһвәниң яратқан барлиқ гөзәл нәрсилири үчүн чин қәлбимиздин мәдһийә оқуп тәшәккүримизни билдүрүшимизгә көп сәвәпләр бар (Тарихнамә 1-язма 29:10—13). Мәтта 6:9—13 айәттә, һәзрити Әйсаниң үлгилик дуаси хатириләнгән. Шу дуада Әйса бизгә Худаниң исминиң муқәддәс болуши; Худаниң Падишалиғи келиши; Худаниң ирадисиниң асманда әмәлгә ашқиниға охшаш йәр йүзидиму әмәлгә ешиши үчүн дуга қилип тиләшни үгәткән. Мәсиһ Әйса авал Йәһвәгә мунасивәтлик муһим ишларни тилға алғандин кейин, андин өзиниң шәхсий ишлириға көңүл бөлгән. Шуниңға охшаш, биз дуа қилғанда Худани әң муһим орунға қоюшимиз лазим. Бу бизниң пәқәтла өз ишлиримизға көңүл бөлмәйдиғанлиғимизни көрситиду.

13. Дугаларниң узун-қисқа болуши тоғрисида Муқәддәс Китап немиләрни көрсәтти?

¹³ Биз қанчә узун вақит дуга қилишимиз керәк? Мәйли өзимиз ялғуз дуа қилайли яки көпчилик билән биргә дуга қилайли, қанчә узун вақит дуа қилиш тоғрисида Муқәддәс Китап һеч қандақ чәклимә йоқ екәнлигини көрситиду. Дуганиң узун яки қисқа вақит чәклимиси йоқ. Тамақ йейишниң алдида қисқа дуга қилсақ яки шәхсий дуада болғанда Йәһвә Худаға ич бағримизни төкүп қәлб сөзимизни ейтип узун дуа қилсақ болиду (Самуилниң 1-язмиси 1:12, 15). Бирақ, һәзрити Әйса башқилар алдида узун дуга қилип өзини һәққаний адәм дәп көрсәткәнләрни әйиплигән (Луқа 20:46, 47). Шундақ дуалар Пәрвәрдигар Йәһвәни тәсирләндүрәлмәйду. Әң муһими, дугаларни чин қәлбидин чиқирип қилиш. Шуниң үчүн, дуаларниң узун-қисқа болуши еһтияҗ һәм әмәлий әһвал билән мунасивәтлик.

14. Муқәддәс Китап бизни “һемишәм дуга қилиңлар” дәп илһамландуриду дегәнлик немә дегән гәп? Немә үчүн қәлбимизгә тәсәлла бериду?

¹⁴ Қанчә узақ вақитта бир қетим дуга қилиш керәк? Муқәддәс Китап: “Һәр вақит дуада болуңлар”, “һемишәм дуа қилиңлар” дәп бизни илһамландуриду (Римлиқлар 12:12; Салоникилиқларға 1-хәт 5:17). Әлвәттә, бу дегәнлик биз чоқум Йәһвә  Худаға һәр саат, һәр минут дуа қилишимиз керәк дегәнни билдүрмәйду. Амма, Муқәддәс Китап бизни Худаниң бизгә қилған меһир-шәпқитигә тәшәккүр ейтиш; униң йол көрситишигә егә болуш; тәсәлла тепиш һәм күч-қудрәткә егә болуш үчүн дайим дуга қилишқа дәвәт қилиду. Йәһвә Худа бизниң қанчә узун вақитта бир қетим дуа қилиш, һәр қетим дуга қилғанда қанчә узақ вақит униң билән параңлишишимизға һеч қандақ чәклимә қоймайду. Буларни билиш қәлбимизгә тәсәлла бериду, шундақ әмәсму? Әгәр биз растинла дуа қилиш шан-шәрипи үчүн миннәтдар болсақ, асмандики атимизға һәр-дайим дуга қилимиз.

15. Шәхсий дуга қилғанда яки көпчилик билән дуада болғанда, дуга ахирлашқанда немә үчүн “амин” дейишимиз керәк?

¹⁵ Дуга ахирлашқанда биз немә үчүн “амин” дейишимиз керәк? “Амин” дегән сөзниң мәнаси “шундақ болсун”. Муқәддәс Китаптики мисаллар шуни көрситидуки, ялғуз шәхсий дуа қилғанда яки көпчилик билән биргә дугада болғанда болсун “амин” дейиш наһайити мувапиқ (Тарихнамә 1-язма 16:36; Зәбур 41:13). Бизниң шәхсий дуалиримиз ахирлашқанда “амин” дейиш арқилиқ бизниң һазир қилған дуалиримизниң сәмимийлик билән қилинғанлиғини тәстиқләймиз. Көпчилик билән дуга болғанда вәкил болуп дуга қилған қериндишимизниң дугаси ахирлашқанда, үн чиқармай яки аваз чиқирип “амин” дейиш дуада ейтилған сөзләргә қошулғанлиғимизни көрситиду (Коринтлиқларға 1-хәт 14:16).

16. Дуга тоғрисида биздә қандақ ишәнч бар?

¹⁶ Йәһвә расттинла бизниң дуалиримизға җавап берәмду? Растинла, җавап бериду! Дуниядики миллионлиған кишиләрниң сәмимий дуа-тиләклиригә, “дуани мустәҗаб [қобул] қилғучи” җавап қайтуридиғанлиғиға биз қәтъий ишәнч қилалаймиз (Зәбур 65:2). Йәһвә бизниң дуалиримизға һәр хил усул билән җавап қайтуриду.

17. Худа, пәриштәлири вә йәр йүзидики хизмәткарлири арқилиқ дугалиримизға җавап қайтуридиғанлиғини қандақ билимиз?

¹⁷ Тәңри Йәһвә периштәлирини вә йәр йүзидики хизмәткарлирини ишлитип дуаларға җавап қайтуриду (Ибранийлар 1:13, 14). Нурғун кишиләр мундақ вақиәләрни баштин кәчүргән. Йәни Муқәддәс Китаптики мәзмунларни чүшиниш үчүн дуа қилип Худадин ярдәм тилигәнләр, дуа қилип узун вақит өтмәй  Пәрвәрдигар Йәһвәниң хизмәтчилиридин бирси билән учиришип қалған. Мошундақ вақиәләр пәриштәләрниң Падишалиқ хуш хәвирини вәз ейтиш ишлириға йетәкчилик қиливатқанлиғини испатлайду (Вәһийләр 14:6). Биз растинла мәлум нәрсигә еһтияҗ болуп дуга қилғанда, Тәңри Йәһвә мәлум бир Йәһвә Гувачисини ярдәм беришкә әвәтиш арқилиқ дуалиримизға җавап қайтуриду (Пәнди-нәсиһәт 12:25; Яқуп 2:16).

18. Йәһвә Худа өзиниң муқәддәс роһи вә өз сөзи болған Муқәддәс Китапни ишлитиш арқилиқ өз хизмәткарлириниң дугалириға қандақ җавап қайтуриду?

¹⁸ Йәһвә Худа йәнә өзиниң муқәддәс роһи һәм өз сөзи болған  Муқәддәс Китап арқилиқ хизмәткарлириниң қилған дугалириға җавап қайтуриду. Биз синақларға тақабил туруш үчүн ярдәм тиләп дуга қилғинимизда, У бәлким өзиниң муқәддәс роһини ишлитип бизгә йетәкчилик қилиш вә күч-қувәт бериш арқилиқ дуалиримизға җавап қайтуруши мүмкин (Коринтлиқларға 2-хәт 4:7). Биз мәлум ишни қилишта көрсәтмигә муһтаҗ болуп қилған дугалиримизға Йәһвә һемишәм Муқәддәс Китап арқилиқ җавап қайтуруп, бизниң дана қарар чиқиришимиз үчүн ярдәм бериду. Биз ялғуз олтирип Муқәддәс Китапни тәтқиқ қилип үгәнгәндә яки Муқәддәс Китап асасида йезилған китап-журналларни көргәндә болсун, өзимизгә ярдими бар айәтләрни учритип қелишимиз мүмкин. Бундин башқа, Йәһвә Гувачилириниң Муқәддәс Китап үгиниш жиғилишлирида тәлимләрни аңлиғанда яки көйүмчан җамаәт ақсақилиниң сөзлиригә қулақ салғинимизда, бәлким биз ойлинишқа тегишлик Муқәддәс Китаптики мәслиһәтләргә еришәлишимиз мүмкин (Галатиялиқлар 6:1).

19. Әгәр бәзидә бизниң дугалиримизға җавап қайтуруш қаримаққа кечиктүрүлгәндәк қилса, немини әстә сақлишимиз керәк?

¹⁹ Әгәр Пәрвәрдигар Йәһвә қаримаққа бизниң дугалиримизға җавап қайтурушни кечиктүрсә, бу һәргизму униң дугалиримизға җавап қайтурушқа қадир болалмиғанлиғи сәвәплик әмәс. Биз чоқум шуни әстә сақлишимиз керәкки, Йәһвә дуаларға өз ирадиси бойичә, мувапиқ пәйт йетип кәлгәндә җавап қайтуриду. Биз немигә муһтаҗ, шу муһтаҗлиғимизни қандақ қандуруш керәк? Буларни У биздин яхширақ билиду. Һәр-дайим У бизни тохтимастин “тиләңлар, издәңлар, қеқиңлар” дәп иҗазәт бәргән (Луқа 11:5—10). Шундақ изчил давамлаштуруш бизниң арзу-үмүтимизниң  күчлүк вә иман-етиқатимизниң мустәһкәм екәнлигини Худаға көрситиду. Бундин башқа, Йәһвә дуалиримизға биз көз билән көрәлмәйдиған йоллар билән җавап қайтуруши мүмкин. Мәсилән, биз ойлимиған бир синаққа дуч келип Худаға дуа қилғинимизда, у дугалиримизға қийинчилиқни йоқ қилип җавап қайтурмастин, бәлки бизниң синаққа бәрдашлиқ беришимиз үчүн күч-қувәт берип җавап қайтуруши мүмкин (Филипиликләр 4:13).

20. Немә үчүн Йәһвәгә дуга қилиш биз үчүн алаһидә шан-шәрәп? Немә үчүн Униңға дайим дуга қилишимиз керәк?

²⁰ Чәксиз аләмниң Яратқучиси дуалирида уни чақирғанларға йеқинлишишни халайду. Бу бизниң көп тәшәккүр ейтишимизға тегишлик әмәсму һә!? (Зәбур 145:18). Йәһвәгә дуа қилиш биз үчүн алаһидә шан-шәрәп болғач, униңға һәр дайим дуа қилишимиз керәк. Әгәр биз шундақ қилсақ, дуани қобул қилғучи Пәрвәрдигар Йәһвәгә техиму йеқинлишип қәлбимиз хошаллиқ вә арзу-үмүтләргә толиду.