KAPITE HOGOFULU-MA-FITU
Koutou Fakaōvi Ki Te ’Atua ’i Te Faikole
He ko’e ’e tonu ke tou faikole ki te ’Atua?
Koteā ’aē ’e tonu ke tou fai ke logo’i tatatou ’u faikole e te ’Atua?
’E tali feafea’i mai e te ’Atua ki tatatou ’u faikole?
’E VELIELI ’aupito te kele mokā fakatatau ki te ’atulaulau. ’I tona fakahagatonu, kiā Sehova ’aē ko “te Tupu’aga ’o te lagi mo te kele,” ko te ’u pule’aga ’e nātou hage ko he mosi’i vai ’i he pākete. (Pesalemo 115:15; Isaia 40:15) ’E ’ui ’i te Tohi-Tapu: “’E ōvi ia Sehova kiā nātou fuli ’aē ’e fetapā kiā te ia, ia nātou fuli ’aē ’e fetapā kiā te ia ’i te agatonu. ’E ina fakahoko anai te me’a ’aē ’e loto kiai ia nātou ’aē ’e manavasi’i kiā te ia, pea ’e logo anai ki tanatou pāui ’aē ke tokoni age.” (Pesalemo 145:18, 19) Koutou fakakaukau’i age mu’a! Ko te Tupu’aga māfimāfi ’e ōvi mai kiā tatou pea ’e logo anai ki ’atatou faikole mo kapau ’e tou “fetapā kiā te ia ’i te agatonu.” Ko he toe pilivilesio ’e tou ma’u, ’aē ko te fakaōvi ki te ’Atua ’i te faikole!
2 Kae kapau ’e tou loto ke fagono ia Sehova ki ’atatou faikole, pea ’e tonu ke tou fai te ’u fa’ahiga faikole ’aē ’e ina tali lelei’i. ’E tonu mu’a ke tou mahino ki te me’a ’aē ’e ako’i mai ’i te Tohi-Tapu ’o ’uhiga mo te faikole pea ’e hoki feala ai leva ke tou fai he ’u kole ’e ina tali lelei’i. ’E ma’uhiga kiā tatou ke tou ’ilo’i te me’a ’aē ’e ’ui ’i te Tohi-Tapu ’o ’uhiga mo te faikole, kote’uhi ’e tokoni mai kiā tatou ke tou fakaōvi kiā Sehova.
HE KO’E ’E TONU KE TOU FAIKOLE KIĀ SEHOVA
3 Ko te ’uluaki tupu’aga tāfito ’aē ’e tonu ai ke tou faikole kiā Sehova, he ne’e ina kole mai ke tou fai ia te fa’ahi ’aia. ’E fakaloto mālohi’i fēnei tatou ’i tana Folafola: “Aua naa koutou tuania i he mea, kae i te meafuape aki te faikole mo te lauga fakatahi mo te u fakafetai, koutou fakaha ki te Atua autou u kole. Pea ko te tokalelei o te Atua aia e fakalaka i te atamai fuape, e ina malui anai outou loto mo autou fakakaukau ia Kilisito Sesu.” (Filipe 4:6, 7) ’E mahino ia ’e mole tou fia me’a noa’i te ta’i fakatu’utu’u ’aia ne’e fai ma’a tatou e te Pule Lahi Tokotahi ’o te ’atulaulau!
![Ko te fafine ’e faikole](https://assetsnffrgf-a.akamaihd.net/assets/l/bh/bh_WA/165.jpg)
’E fia fagono “te Tupu’aga ’o te lagi mo te kele” ki ’atatou faikole
4 Ko te lua tupu’aga ’aē ke tou faikole tu’uma’u ai kiā Sehova, he’e ko he fa’ahi ’e ina fakamālohi’i tatatou ’u felogoi mo ia. Ko te ’u kaume’a mo’oni ’e mole nātou felogoi pe mokā ’e ’aoga age he me’a kiā nātou. Kae ’e nātou fetokaga’aki, pea ’e mālohi tonatou fakakaume’a kote’uhi ’e nātou fakahā fa’ifa’italiha tanatou ’u manatu, mo te ’u me’a ’aē ’e nātou hoha kiai, pea mo te ’u me’a ’aē ’i tonatou loto. ’I ’ihi ’alu’aga, ’e feiā tatatou ’u felogoi mo Sehova ’Atua. ’Aki te tokoni ’o te tohi ’aenī, kua lahi te ’u me’a kua koutou ako ’i te Tohi-Tapu ’o ’uhiga mo Sehova, mo tona ulugaaga, pea mo tana ’u fakatu’utu’u. Kua koutou ’ilo’i ’e ko he ’Atua ’e ma’uli mo’oni. ’Aki te faikole ’e feala ai ke koutou fakahā ki takotou Tāmai ’aē ’e ’i selo takotou ’u manatu, pea mo te ’u me’a ’aē ’e koutou logo’i ’i tokotou loto. Kapau ’e koutou fai te ’u fa’ahi ’aia, ’e koutou fakaōvi lahi anai kiā Sehova.—Sakopo 4:8.
TE ’U FAKAMA’UA ’AĒ ’E TONU KE TOU MULI’I
5 ’E fakalogo koa ia Sehova ki te ’u faikole fuli? Koutou tokaga’i age mu’a te me’a ’aē ne’e ina ’ui ki te kau Iselaele agatu’u ’i te temi ’o te polofeta ko Isaia: “Logo aipe te lahi ’o te ’u kole ’aē ’e koutou fai, mole au fakalogo; kua liliu ’okotou nima ’o fonu ’i te fakapō.” (Isaia 1:15) Koia ’e feala ke mole logo’i e te ’Atua tatatou ’u faikole ’uhi ko hatatou ’u aga. Kapau ’e tou loto ke ina logo’i tatatou ’u faikole, ’e tonu ke tou muli’i ’ihi fakama’ua tāfito.
6 Ko te me’a ’aē ’e fakama’ua tāfito mai ’o ’uhiga mo te faikole, ’e ko tatatou tui. (Maleko 11:24) Ne’e tohi fēnei e te ’apositolo ko Paulo: “E mole feala ki he tahi ke lelei ki te Atua, kapau e mole ina mau te tui, he ko ae e laka ki te Atua, e maua ke tui, e mauli pea e ina fakapale natou e natou kumi ia’ia.” (Hepeleo 11:6) Ko te ma’u ’o te tui mo’oni ’e mole gata ’aki pe tatatou ’ilo’i ’e ma’uli mo’oni te ’Atua pea ’e logo ki te ’u faikole pea mo tali kiai. Ko te tui ’e fai ’aki tatatou ’u gāue. ’E tonu ke hā ’i totatou fa’ahiga ma’uli ’o te ’aho fuli, ’e tou ma’u te tui.—Sakopo 2:26.
7 ’E toe fakama’ua e Sehova kiā nātou ’aē fakaōvi age kiā te ia ’i te faikole ke nātou agavaivai pea mo fakamalotoloto. ’E tonu ke tou agavaivai mokā tou palalau kiā Sehova. Ka tou ma’u te faigamālie ’aē ke tou palalau ki he hau pe’e ki he pelesita, ’i te agamāhani ’e tou palalau faka’apa’apa, he’e tou tokaga’i te tu’ulaga mā’oluga ’o te pule ’aia. Koia ’e tonu ai ke tou faka’apa’apa lahi mokā tou fakaōvi kiā Sehova! (Pesalemo 138:6) ’I tona fakahagatonu, ko ia “te ’Atua Māfimāfi.” (Senesi 17:1) Ka tou faikole ki te ’Atua, ’e tonu ke hā ’i tatatou fa’ahiga fakaōvi kiā te ia ’e tou tali ’aki he agavaivai totatou ’uhiga haha’i fakalogo kiā te ia. ’E uga anai tatou e te ta’i agavaivai ’aia ke tou faikole fakamalotoloto, ’o mole tou fai he ’u kole ’e lau faka’atamai pe’e lau liuliuga.—Mateo 6:7, 8.
8 Ko te tahi fakama’ua ke logo’i tatatou faikole e te ’Atua, ko te ma’uli’i ’o te ’u me’a ’aē ’e tou kole ’i tatatou ’u faikole. ’E faka’amu e Sehova ke tou fai te ’u me’a fuli ’aē ’e tou lava fai mo’o ma’uli’i te ’u me’a ’aē ’e tou kole. Ohage la, kapau ’e tou kole fēnei, “Foaki mai kia matou tamatou meakai i te aho-nei,” pea ’e tonu ke tou gāue kinakina ’i he fa’ahiga gāue pe ’e tou lava fakahoko. (Mateo 6:11; 2 Tesalonika 3:10) Kapau ’e tou faikole ki te ’Atua ke tokoni mai mo’o tau’i ’o he vaivai’aga fakasino, pea ’e tonu ke tou tōkakaga ’o fakamama’o mai te ’u ’alu’aga ’aē ’e tou lava tō ai ki te fakahala. (Kolose 3:5) ’O hilifaki ki te ’u fakama’ua ’aenī, ’e ’i ai te ’u fehu’i ’o ’uhiga mo te faikole ’e tonu ke tou tali kiai.
TE ’U TALI KI TE ’U FEHU’I ’O ’UHIGA MO TE FAIKOLE
9Ko ai ’aē ’e tonu ke tou faikole ki ai? Ne’e ako’i e Sesu tana ’u tisipulo ke nātou faikole ki ‘tanatou Tāmai ’aē ’e ’i selo.’ (Mateo 6:9) Koia ’e tonu aipe ke tou fai tatatou ’u kole kiā Sehova ’Atua tokotahi pe. Kae ’e fakama’ua mai e Sehova ke tou tokaga’i te tu’ulaga ’o tona ’Alo ’ulu tokotahi, ko Sesu Kilisito. Ohage ko te me’a ’aē kua tou ako ’i te Kapite 5 ’o te tohi, ne’e fekau’i mai ia Sesu ki te kele ke ina foaki tona ma’uli mo’o totogi ’o tatou mai te agahala pea mo te mate. (Soane 3:16; Loma 5:12) Kua fakanofo ia ia ke Pelepitelo Lahi pea mo Tu’i Fakamāu. (Soane 5:22; Hepeleo 6:20) Koia ’e fakahā mai ai ’i te Tohi-Tapu ke tou momoli tatatou ’u kole ’aki ia Sesu. Ne’e ’ui totonu e Sesu: “E ko au te Ala, mo te Mooni pea mo te Mauli; e mole he tahi e haù ki te Tamai, kapau e mole fakalaka ia te au.” (Soane 14:6) Ke logo’i tatatou ’u kole, ’e tonu ke tou faikole kiā Sehova tokotahi pe, ’o momoli ’aki tona ’Alo.
10Ka tou faikole, ’e tonu koa ke tou heheka, pe’e tou tu’utuli, pe’e tou tu’upou pe’e ke tou tutu’u totonu? Kailoa ia. Ko Sehova ’e mole ina fakama’ua mai ia he me’a feiā, pe’e ’o ’uhiga mo te faka’aoga’i ’o te ’u nima pe’e ko he ’u fa’ahi ’o totatou sino kātoa. ’E hā mai ’i te Tohi-Tapu ko te faikole kae tou heheka, pe’e tou tu’utuli, pe’e tou tu’upou pe’e tou tutu’u totonu, ’e lelei pe ia. (1 Fakamatala 17:16; Nehemia 8:6; Taniela 6:10; Maleko 11:25) Ko te me’a ’aē ’e takimu’a, ’e mole ko takita faikole heka, pe’e tu’utuli, pe’e tu’upou pe’e tu’u totonu, kae ’e ko te lelei ’o te loto. Ohage la, lolotoga tatatou ’u gāue ’aē ’i te ’aho fuli pe’e ka hoko fakapunama’uli mai he faigata’a’ia, ’e feala pe hakita faikole fakalogologo ’i he potu pe ’e tou ’i ai. Ko Sehova ’e fakalogo ki te fa’ahiga faikole ’aia, tatau aipe mo kapau ’e mole tokaga’i he tahi iā nātou ’aē ’i ’otatou tafa’aki.—Nehemia 2:1-6.
11Koteā ’aē ’e feala ke tou kole ’i tatatou ’u faikole? ’E fakamahino fēnei ’i te Tohi-Tapu: “Kapau e tou kole he mea o fai ki tona finegalo, [ko Sehova] e ina fakalogo tatou.” (1 Soane 5:14) Ko tona faka ’uhiga, ko me’a fuli ’aē ’e tou kole ’e tonu ke ’alutahi mo te finegalo ’o te ’Atua. ’E ’alutahi koa mo tona finegalo ke tou faikole age kiā te ia ’o ’uhiga mo te ’u me’a ’aē ’e tou tu’ania kiai? Ei! Ko te faikole ki te ’Atua ’e hage pe hakita fai palalau mo hokita kaume’a lelei. ’E feala hatatou palalau fa’ifa’italiha, ‘ ’o ’avahi totatou loto’ ki te ’Atua. (Pesalemo 62:8) ’E lelei hatatou kole te laumālie ma’oni’oni, kote’uhi ’e tokoni mai anai ke tou fai te me’a ’aē ’e totonu. (Luka 11:13) ’E tou toe lava kole foki ke ina takitaki tatou mo’o fai ’o he ’u tonu ’e fakapotopoto pea mo ina foaki mai te mālohi mo’o tau’i ’o te ’u fihifihia. (Sakopo 1:5) Ka tou agahala, ’e tonu ke tou kole ki te ’Atua ke ina fakamolemole mai ’o fakatafito ki te sākilifisio ’a Kilisito. (Efeso 1:3, 7) ’E mahino ia, ’e mole tonu pe ke tou manatu ki te ’u me’a ’aē ’e ’aoga kiā tatou totonu mokā tou faikole. ’E tou lava faikole ma’a ni’ihi kehe—ohage ko totatou famili pe’e ko totatou ’u tēhina mo tuaga’ane.—Gaue 12:5; Kolose 4:12.
![Ko te ’u haha’i ’e natou faikole ’i te ’u ’alu’aga kehekehe](https://assetsnffrgf-a.akamaihd.net/assets/l/bh/bh_WA/171.jpg)
’E fagono te ’Atua ki ’akotou faikole ’i te ’u ’alu’aga fuape
12 Ka tou faikole, ’e tonu ke takimu’a te ’u me’a ’o ’uhiga mo Sehova ’Atua. ’E mahino ia ’e tāu mo fe’auga ke tou fakavikiviki fakamalotoloto kiā te ia pea mo fakafeta’i ’o ’uhiga mo tona ’u ’ofa fuli ’aē kiā tatou. (1 Fakamatala 29:10-13) Ne’e tuku e Sesu ia te faikole fa’ifa’itaki, ’aē ’e tu’u iā Mateo 6:9-13, ’aē ne’e ina ako’i mai ke tou faikole ke tāpuhā te huafa ’o te ’Atua, ko tona faka ’uhiga ke liliu ko he me’a ’e taputapu. Pea ’e hoko atu te faikole ’o talanoa ki te ha’u ’o te Pule’aga ’o te ’Atua pea ke hoko tona finegalo ’i te kele ohage ko selo. ’I te ’osi ’o tana talanoa ki te ’u me’a ma’uhiga ’aia ’o ’uhiga mo Sehova, pea hoki palalau ai leva ia Sesu ’o ’uhiga mo te ’u me’a ’aē ’e tou hoha kiai. ’O toe feiā pe, mokā tou fakamu’amu’a ia Sehova ’i ’atatou faikole, ’e tou fakahā ai ’e lahi age tatatou tokaga ki ai ’i hatatou tokaga kiā tatou totonu.
13E feafea’i te loaloaga ’o tatatou ’u faikole? ’E mole fakatu’u mai he tu’akoi ’o te loaloaga ’o tatatou ’u faikole takitokotahi pe’e ko te ’u faikole ma’a te kaugamālie. ’E lagi feala ke tou fai he kole nounou ’i mu’a ’o te temi kai, pe’e ko he kole loaloaga atu mokā tou tokotahi, ’o fakahā ai kiā Sehova te ’u me’a ’aē ’i totatou loto. (1 Samuele 1:12, 15) Kae ne’e tautea’i e Sesu te haha’i ’aē ne’e nātou manatu ’e nātou faitotonu age ’i te haha’i ’aē, pea mo nātou fai he ’u kole fakahāhā pea mo loaloaga ’i mu’a ’o te haha’i. (Luka 20:46, 47) Ko te ’u ta’i faikole ’aia ’e mole ma’uhiga kiā Sehova. Ko te me’a ’aē ’e ma’uhiga, ko tatatou ’u faikole ’aē ’e ha’u mai totatou loto. Koia ’e mole lau’ia te loaloaga ’o te ’u faikole ’aē ’e lelei’ia e te ’Atua, he’e tahi mulimuli pe ki te ’u me’a ’e ’aoga kiā kita pea mo te ’u ’alu’aga ’o kita.
14’E tonu ke tu’a fia tatatou faikole? ’E fakaloto mālohi’i tatou ’i te Tohi-Tapu ke tou “kataki… i te faikole,” pea mo tou “faikole tuumau.” (Mateo 26:41; Loma 12:12; 1 Tesalonika 5:17) ’E mo’oni ia, ’e mole fia ’ui ’i te ’u vaega ’aenī ke tou faikole kiā Sehova ’i te temi fuli ’o te ’aho. Kailoa ia, kae ’e uga tatou ’i te Tohi-Tapu ke tou faikole tu’uma’u, ’o fakafeta’i tu’uma’u kiā Sehova ki tona loto’ofa mai kiā tatou, pea mo tou haga kiā te ia ke ina takitaki tatou, mo fakaloto fīmālie’i tatou pea mo fakaloto mālohi’i tatou. Ko he me’a fakaloto fīmālie hatatou ’ilo’i ne’e mole fakatu’akoi mai e Sehova ia te loaloaga pea mo te temi ’aē ’e tou lava palalau age kiā te ia ’i te faikole! Kapau ’e tou lelei’ia te pilivilesio ’o te faikole, ’e tou ma’u lahi anai he ’u faigamālie ke tou faikole ki tatatou Tāmai ’aē ’e ’i selo.
15He ko’e ’e tonu ke tou ’ui “Ameni” ’i te faka’osi ’o te faikole? Ko te kupu “ameni” ko tona faka ’uhiga ’e kita “’io,” pe’e kita ’ui “ke fai kiai.” ’E hā ’i te ’u fa’ifa’itaki faka Tohi-Tapu ’e lelei hata ’ui “Ameni” ’i te faka’osi ’o hakita ’u faikole ’āteaina pe’e ko he ’u faikole iā mu’a ’o te kaugamālie. (1 Fakamatala 16:36; Pesalemo 41:13) Ka kita ’ui “Ameni” ’i hata ’osi faikole tokotahi, ’e kita fakamo’oni ai ne’e kita fai fakamalotoloto tata ’u palalau, pea kita ’ui “Ameni”—le’o veliveli pe’e le’o lahi—’i te ’osi ’o he faikole ne’e fai ma’a te kaugamālie, ’e kita fakahā ai ’e kita ’io ki te ’u manatu ’aē ne’e tala ’i te faikole ’aia.—1 Kolonito 14:16.
TE TALI ’A TE ’ATUA KI ’ATATOU FAIKOLE
16 ’E tali mo’oni koa ia Sehova ki te ’u faikole? Ei! ’E tou tui papau ‘’e fagono ki te faikole’ ’o tali ki te ’u faikole fakamalotoloto ’aē ’e fai e te toko lau’i miliona haha’i. (Pesalemo 65:2) ’E lahi te ’u fa’ahiga tali mai ’a Sehova ki ’atatou faikole.
17 Mo’o tali ki te ’u faikole, ’e faka’aoga’i e Sehova ia te kau ’āselo pea mo tana ’u kaugana ’i te kele. (Hepeleo 1:13, 14) ’E lahi te ’u fakamatala ’o te ’u haha’i ne’e nātou faikole ki te ’Atua ke tokoni age kiā nātou ke nātou mahino ki te Tohi-Tapu, pea hili pe tanatou faikole pea nātou felāve’i atu aipe mo te ’u kaugana ’a Sehova. Ko te ’u ta’i fakamatala ’aia ’e nātou fakamo’oni ki te takitaki ’a te kau ’āselo ia te gāue fai faka mafola ’o te Pule’aga. (Apokalipesi 14:6) Mo’o tali ki ’atatou faikole ’aē ne’e tou fai ’i he temi ne’e ’aoga mo’oni mai he tokoni kiā tatou, ’e lagi uga e Sehova he Kilisitiano ke ha’u ’o tokoni mai kiā tatou.—Tā’aga Lea 12:25; Sakopo 2:16.
18 ’E toe faka’aoga’i foki e Sehova ’Atua tona laumālie ma’oni’oni pea mo tana Folafola, ia te Tohi-Tapu, mo’o tali ki te ’u faikole ’o tana ’u kaugana. ’E feala hana tali mai mokā tou faikole age ke tokoni mai mo’o tau’i ’o he ’u ’ahi’ahi, ’o ina foaki mai te mālohi pea mo te takitaki ’o tona laumālie ma’oni’oni. (2 Kolonito 4:7) ’I te agamāhani, ka tou kole kiā Sehova ke ina takitaki tatou, pea ’e tou ma’u te tali ki tatatou ’u faikole ’i te Tohi-Tapu, mo’o fai he ’u tonu ’e fakapotopoto. ’E feala ke tou ma’u he ’u vaega faka Tohi-Tapu ’aoga lolotoga tatatou ako Tohi-Tapu takitokotahi, pea mokā tou lau he tohi ’i te ’u tohi faka Tohi-Tapu ohage ko te tohi ’aenī. Ko te ’u manatu faka Tohi-Tapu ’aē ’e ’aoga mai kiā tatou ’e lagi tou logo anai kiai ’i he akonaki lolotoga te fono faka Kilisitiano pe’e ’i he ’u tali ’a he tagata ’āfea ’e taupau ki te lelei ’o te kokelekasio.—Kalate 6:1.
![Ko te taumātu’a ’e natou tokoni ki tonā kaume’a kua matu’a](https://assetsnffrgf-a.akamaihd.net/assets/l/bh/bh_WA/172.jpg)
Mo’o tali ki ’atatou faikole, ’e lava uga e Sehova he Kilisitiano ke ha’u ’o tokoni mai kiā tatou
19 Ka hage ’e tou matatuai’ia te tali mai ’a Sehova ki tatatou ’u faikole, ’aua na’a tou manatu ’e mole ina lava tali mai. Kae ’e tonu ke tou manatu’i ko Sehova ’e tali ki te ’u faikole ’o mulimuli ki tona finegalo pea ’e hoki ina tali pe anai ’i tona temi totonu. ’E ina ’ilo’i te ’u me’a ’aē ’e ’aoga kiā tatou pea mo te pule’aki ’aē ’e lelei age ki totatou ’u fihifihia. ’E ina tau tuku ke tou ‘haga kole, mo kumi, pea mo fisifisi.’ (Luka 11:5-10) Kapau ’e tou haga kole ki te ’Atua, pea ’e ina ’ilo’i ai anai totatou loto mo’oni ki te me’a ’aia pea mo tatatou tui mo’oni. Pea tahi ’aē me’a, ’e lagi tali mai ia Sehova ki tatatou ’u faikole ’i he fa’ahiga ’alu’aga ’e lagi mole tou sio mata kiai. Ohage la, ’e lagi tali mai ki tatatou ’u faikole ’o ’uhiga mo he fa’ahiga ’ahi’ahi, ’o mole ina pulihi te fihifihia ’aia, kae ’e ina foaki mai te mālohi mo’o kātaki’i te ’ahi’ahi ’aia.—Filipe 4:13.
20 ’E tou lava fakafeta’i ki te Tupu’aga ’o te ’atulaulau ’i tana fakaōvi kiā nātou fuli ’aē ’e faikole age kiā te ia ’i he ’alu’aga ’e tāu mo fe’auga! (Pesalemo 145:18) ’Ofa pe ke tou faka’aoga’i kātoa te pilivilesio ma’uhiga ’aē ko te faikole. Kapau ’e tou fai feiā, ’e tou fiafia anai ’i tatatou toe fakaōvi ’aupito kiā Sehova, ia Ia ’aē ’e fagono ki ’atatou faikole.
KOTEĀ ’AĒ ’E AKO’I MAI ’I TE TOHI-TAPU?
- Ko te faikole tu’uma’u kiā Sehova ’e tokoni mai kiā tatou ke tou fakaōvi age kiā te ia.—Sakopo 4:8.
- ’E tonu ke tou faikole ’aki te tui mo te agavaivai pea mo tou fai fakamalotoloto, mo kapau ’e tou loto ke fagono te ’Atua ki tatatou ’u faikole.—Maleko 11:24.
- ’E tonu ke tou faikole kiā Sehova tokotahi pe ’o momoli ’aki tona ’Alo.—Mateo 6:9; Soane 14:6.
- Ko Sehova ‘’aē ’e fagono ki te faikole’ ’e ina faka’aoga’i tana kau ’āselo, mo tana ’u kaugana ’i te kele, mo tona laumālie ma’oni’oni, pea mo tana Folafola mo’o tali ki te ’u faikole.—Pesalemo 65:2.
Te ’u Fehu’i Ako
1, 2. He ko’e ’e tonu ke tou faka ’uhiga te faikole ohage ko he pilivilesio lahi, pea he ko’e ’e tonu ke tou ’ilo’i pe’e koteā ’aē ’e ako’i mai ’i te Tohi-Tapu ’o ’uhiga mo te fa’ahi ’aia?
3. Koteā te ’uluaki tupu’aga tāfito ’aē ’e tonu ai ke tou faikole kiā Sehova?
4. ’E fakamālohi’i feafea’i e te faikole ia takotou ’u felogoi mo Sehova?
5. Koteā ’aē ’e hā mai ’e mole fakalogo ia Sehova ki te ’u faikole fuli?
6. Ke fagono te ’Atua ki ’atatou faikole, koteā ’aē ’e fakama’ua tāfito mai, pea ’e tou lava ma’u feafea’i?
7. (a) He ko’e ’e tonu ke tou faka’apa’apa mokā tou palalau kiā Sehova ’i te faikole? (b) Ka tou faikole ki te ’Atua, e feafea’i hatatou fakahā te agavaivai pea mo te fakamalotoloto?
8. E feafea’i hatatou ma’uli’i te ’u me’a ’aē ’e tou kole?
9. Ko ai ’aē ’e tonu ke tou faikole ki ai, pea ’e tonu ke tou momoli ’aki ia ’ai?
10. He ko’e mole fakama’ua mai ke tou tu’utuli, pe’e tou tu’upou, pe’e ke tou tutu’u totonu mokā tou faikole?
11. Koteā ’aē ’e feala ke tou kole ’i tatatou ’u faikole?
12. ’E tou lava fakahā feafea’i ’i tatatou ’u faikole ’e takimu’a kiā tatou te ’u me’a ’o ’uhiga mo tatatou Tāmai ’aē ’e ’i selo?
13. Koteā ’aē ’e fakahā mai ’i te Tohi-Tapu ’o ’uhiga mo te ’u faikole ’aē ’e lelei’ia e te ’Atua?
14. Koteā te faka ’uhiga ’o te fakaloto mālohi’i ’o tatou ’i te Tohi-Tapu ke tou “faikole tu’uma’u,” pea he ko’e ’e fakaloto fīmālie ia te manatu ’aia?
15. He ko’e ’e tonu ke tou ’ui “Ameni” ’i te faka’osi ’o hata faikole ’āteaina pe’e ’i te faka’osi ’a he ’u faikole ’e fai iā mu’a ’o te kaugamālie?
16. Koteā ’aē ’e feala ke tou tui papau kiai ’o ’uhiga mo te faikole?
17. He ko’e ’e tou lava ’ui ’e faka’aoga’i e te ’Atua tana kau ’āselo pea mo tana kau kaugana ’i te kele mo’o tali ki ’atatou faikole?
18. ’E faka’aoga’i feafea’i e Sehova tona laumālie ma’oni’oni pea mo tana Folafola mo’o tali ki te ’u faikole ’o tana ’u kaugana?
19. Koteā ’aē ’e tonu ke tou manatu’i mo kapau ’e hage mai ’i ’ihi temi ’e mole tali tatatou ’u faikole e Sehova?
20. He ko’e ’e tonu ke tou faka’aoga’i kātoa te pilivilesio ma’uhiga ’aē ko te faikole?