1, 2. Mang fan nthingar da ted ni meybil e ba tow’ath? Mang fan nthingar da nanged ko mang e ri be fil e Bible u murung’agen e meybil?

RIB achig e fayleng rodad ni faan ga ra taarebrogonnag ko urngin ban’en ni bay u lan e lang. Jehovah ni ir e En ni “Sunumiy” e tharmiy nge fayleng e ke taarebrogonnag e pi nam nu fayleng nga ba waangchal i ran u lan ba pakit. (Psalm 115:15; Isaiah 40:15) Machane be gaar e Bible: “Ba chugur ngak urngin e piin ni yad ma non ngak, ni yad be non ngak u fithik’ e yul’yul’. Piin ni bay madgun u wun’rad e ma pi’ ngorad e tin ni nge yog ngorad; ma rung’ag e tin ni yad ma wenignag ngak me ayuwegrad.” (Psalm 145:18, 19) Am lemnag fan e re thin nem! En ni Tasunumiy ni Gubin Ma Rayog Rok e ba chugur ngodad, ma ra rung’ag lamdad ni faan gad ra ‘non ngak u fithik’ e yul’yul’.’ Ri gad ba tow’ath ni bochan e rayog ni ngad chugurgad ku Got u daken e meybil!

² Machane faanra gad baadag ni nge motoyil Jehovah ko pi meybil rodad ma thingar da meybilgad ngak  u rogon ni baadag. Uw rogon ni ngad meybilgad ngak u rogon ni baadag ni faanra dad nanged e n’en ni be yog e Bible u murung’agen e meybil? Thingar da nanged e n’en ni ke yog e Bible u murung’agen e meybil, ya meybil e ma chugurnagdad ku Jehovah.

3. Mang reb i fan nthingar da meybilgad ngak Jehovah?

³ Reb i fan ni ngad meybilgad ku Jehovah e bochan ni ke yog ngodad ni ngad meybilgad ngak. Be gaar e Thin Rok: “Dariy ban’en ni nge magafan’med ngay, machane faan gimed ra meybil ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med. Ma gapas rok Got ndabi chuchugur ni nge nang e girdi’ fan e ra yororiy gum’ircha’med nge tafinay romed ngi i par rok Kristus Jesus.” (Filippi 4:6, 7) Ere, dab da darifannaged e re tow’ath nem ni ke pi’ e En ni Th’abi Ga’ ngodad ni aram Jehovah!

4. Uw rogon nra fel’ thildad Jehovah ni bochan e gad ma meybil ngak?

⁴ Ku reb i fan ni ngaud meybilgad ngak Jehovah e bochan e nge fel’ thildad. Tin riyul’ e fager e yad ma non ngorad. Gathi kemus ni ngar nonad ngorad ko ngiyal’ ni nge yag ban’en ngorad. Ya tin riyul’ e fager e yad ma lemnag e piin ni fager rorad, mar fal’eged thilrad u nap’an ni yad ra non ni yad be weliy e tin ni bay u lanin’rad, ngu gum’ircha’rad nge tin ni be magafan’rad ngay. Ku arrogodad nthingar da fal’eged thildad Jehovah Got. Re ke babyor ney e ke ayuwegem ni  ngam nang e machib nu Bible u murung’agen Jehovah, nge rarogon, nge tin nib m’agan’ ngay. Ma kam fil ni ma motoyil Jehovah ko meybil. Ere, rayog ni ngam meybil ngak e Chitamangidad ni bay u tharmiy ni ngam weliy ngak e tin ni bay u lanin’um. Ma nap’an ni ga ra rin’ ma ga ra chugur ku Jehovah.​—James 4:8.

5. Mang e be dag nder ma motoyil Jehovah ko urngin e meybil?

⁵ Ma motoyil Jehovah ko urngin e meybil, fa? Nap’an ndaki fol piyu Israel ma aram me non Jehovah ngorad u daken Isaiah ni profet ni gaar: “Demtrug gelngin e meybil ni gimed ra tay ma dab gu telig ngomed, ya ba sug e racha’ u pa’med.” (Isaiah 1:15, BT) Ere, dabi motoyil Got ko meybil rodad nfaanra ba kireb e ngongol rodad. Ere, thingar da folgad ko pi n’en nib t’uf ni ngad rin’ed ya nge motoyil Got ko meybil rodad.

6. Mang ban’en nib t’uf ni faanra nge motoyil Got ko meybil rodad? Uw rogon ni nge m’ug ni bay e michan’ rodad?

 ⁶ Thingari mich Got u wan’dad ma aram e ra motoyil ko meybil rodad. (Mu beeg e Matthew 21:22) Be gaar apostal Paul: “Dariy be’ nra fel’ u wan’ Got ni faanra de mich Got u wan’. Ya en nra yib ngak Got e thingari mich u wan’ ni ba’ Got ma ra tow’athnag e piin ni yad be gayiy Got.” (Hebrews 11:6) Bin riyul’ e michan’ e gathi kemus ni ngan nang nriyul’ ni bay Got, ma ma rung’ag e meybil rodad ma ma fulweg taban. Ya bin riyul’ e michan’ e ba chagil e ngongol ngay. Pi n’en ni gad ma rin’ u reb e rran ngu reb e thingari m’ug riy nriyul’ nib gel e michan’ rodad.​—James 2:26.

7. (a) Mang fan ni thingar da meybilgad ku Jehovah u fithik’ e tayfan? (b) Uw rogon nrayog ni nge m’ug ni gad ba sobut’an’ ma gad ba yul’yul’ u nap’an ni gad be meybil ku Got?

⁷ Ki tay Jehovah chilen ni piin nra chugur ngak u daken e meybil e thingar ra rin’ed u fithik’ e sobut’an’ nge yul’yul’. Ere, thingari sobut’an’dad u nap’an ni gad ra non ngak Jehovah. Ma non e girdi’ ngak e pilung, ara president u fithik’ e tayfan ni bochan e liw rok fare pilung. Ere, rib ga’ fan ni ngad ted fan Jehovah u nap’an ni gad ra meybil ngak! (Psalm 138:6) Ya ir e ‘Got ni Gubin ma Rayog Rok.’ (Genesis 17:1) Nap’an ni gad ra meybil ngak Got ma thingari m’ug ni gad be meybil u fithik’ e sobut’an’. Faanra ba sobut’ lanin’dad ma aram e gad ra meybil u fithik’ e yul’yul’ ma dab da sulod u daken taab meybil nde un lanin’dad ngay.​—Matthew 6:7, 8.

8. Uw rogon ni nge puluw e ngongol rodad ko pi n’en ni gad ma yibilay?

⁸ Kan tay chilen ngodad ni faanra nge motoyil Got ko meybil rodad ma nge puluw e ngongol rodad ko pi  n’en ni gad ma yibilay. Baadag Jehovah ni ngad rin’ed urngin ban’en nrayog rodad ya nge yag ngodad e pi n’en ni gad ma yibilay. Susun, nfaanra kad meybilgad ni ke lungudad, “Mpi’ ngomad e daba’ e ggan ni nge yog ngomad’,” ma thingar da maruwelgad nib elmerin ni yugu demtrug e maruwel ni bay ni rayog rodad. (Matthew 6:11; 2 Thessalonika 3:10) Ma faan gad ra yibilay e ayuw ni nge dab da rin’ed e kireb, ma thingar da paloggad ko pi n’en nra waliydad ko kireb. (Kolose 3:5) Ereray boch ban’en ni kan tay chilen ni ngad rin’ed ni faanra nge motoyil Got ko meybil rodad. Machane ka bay boch e deer ni ngad weliyed e fulweg riy.

9. Mini’ e ngad meybilgad ngak, ma u daken mini’?

⁹ Mini’ e thingar da meybilgad ngak? I fil Jesus ngak pi gachalpen rogon ni ngar meybilgad ni gaar, “Chitamangimad ni ga bay u tharmiy.” (Matthew 6:9) Ere, kemus ni Jehovah Got e ngad meybilgad ngak. Machane i tay Jehovah chilen ni ngad ted fan e liw rok Jesus Kristus ni Fak ni kari maagirag rok. Kad filed ko Guruy ni 5 ni ke l’og Got Jesus nga fayleng ni nge biyuliydad ko denen nge yam’. (John 3:16; Roma 5:12) Ke dugliy ni nge mang Jesus e Prist nib Th’abi Tolang nge Tapufthin. (John 5:22; Hebrews 6:20) Ere, be yog e Bible ni ngad meybilgad ngak Got u daken Jesus. Be gaar Jesus: “I gag e kanawo’, me gag e tin riyul’, me gag e yafos; dariy be’ nrayog ni nge yan ngak e en ni Chitamangiy ya ke mus ni gag e ra yan rog ngak.” (John 14:6) Ere, faanra nge motoyil Got ko meybil rodad ma thingar da meybilgad ngak u daken Fak.

10. Mang fan ni demtrug rogon ni ngad pired u nap’an ni gad be meybil?

 ¹⁰ Ba mudugil rogon ni ngad pired u nap’an ni gad ra meybil, fa? Dariy e motochiyel rok Jehovah u rogon ni ngad pired u nap’an e meybil. Be yog e Bible nrayog ni ngan meybil ni demtrug rogon ni yibe par. Rayog ni ngan meybil ni yibe par nga but’, ara yibe ragbug, ara yibe sak’iy. (1 Kronicles 17:16; Nehemiah 8:6; Daniel 6:10; Mark 11:25) N’en nib ga’ fan e rogon gum’irchaey ma gathi rogon ni nge guy e girdi’. Bin riyul’ riy e rayog ni ngad meybilgad u nap’an ni gad be rin’ e maruwel rodad, ara nap’an ni ke yib e riya’ ngodad nib tomgin ara ngad meybilgad u lanin’dad ni yugu demtrug e gin ni gad bay riy. Ra motoyil Jehovah ko pi meybil nem ni mus ko ngiyal’ ni de nang e girdi’ u chardad ni gad be meybil.​—Nehemiah 2:1-6.

11. Mang boch ban’en nrayog ni ngad yibilayed?

¹¹ Mang boch ban’en nrayog ni ngad yibilayed? Be gaar e Bible: “Mmudugil u wun’dad nra rung’ag [Jehovah] e tin ni gadad be yog ni faan gadad ra ning ban’en ngak ni ban’en nib m’agan’ ngay.” (1 John 5:14) Ere, demtrug ban’en nrayog ni ngad yibilayed nib puluw ko tin nib m’agan’ Got ngay. Mm’agan’ ngay ni ngad yibilayed e tin nib t’uf ko par rodad, fa? Rib m’agan’ ngay! Ga ra meybil ngak Jehovah ma bod ni ga be non ngak be’ nib fel’ e thin romew. Rayog ni ngad “weliyed” e pi n’en ni bay u gum’ircha’dad ngak Got. (Psalm 62:8, BT) Bpuluw ni ngad ninged gelngin Got nib thothup, ya nge ayuwegdad ni ngad rin’ed e tin nib mat’aw. (Luke 11:13) Ku rayog ni ngad ninged e ayuw u nap’an ni ngad turguyed ban’en u fithik’ e gonop, ma ngki yag ni ngad k’adedan’dad u fithik’ e  magawon. (James 1:5) Faan gad ra denen ma rayog ni ngad weniggad ni nge n’ag fan e denen rodad u daken e maligach rok Kristus. (Efesus 1:3, 7) Machane gathi kemus ni ngad yibilayed e tin nib t’uf rodad ya ku rayog ni ngad yibilayed boch e girdi’, nib muun ngay girdien e tabinaw rodad nge girdi’ u lan e ulung.​—Acts 12:5; Kolose 4:12.

12. Uw rogon ni ngad m’oneged e tin nib ga’ fan u wan’ e Chitamangidad nu tharmiy u lan e meybil rodad?

¹² Som’on e thingar da ted nrib ga’ fan ni ngad yibilayed e tirok Jehovah ban’en. Rayog ni ngad pininged e sorok ngak ni bochan e tin nib fel’ ni ma pi’, ma ngad pininged e magar ngak. (1 Kronicles 29:10-13) Bay kenggin e meybil ni ke fil Jesus ngodad u Matthew 6:9-13. (Mu beeg.) Ke yog ni ngan mathengeluwolnag ara ngan thothupnag fithingan Got. Ma ki fil ngodad ni ngad yibilayed ni nge yib Gil’ilungun Got min rin’ e tin nib m’agan’ ngay u fayleng ni bod rogon ni yibe rin’ u tharmiy. Tomuren ni ke yog Jesus ni ngan  yibilay e tirok Jehovah ma aram mfini yog ni ngad yibilayed e tirodad ban’en. Nap’an ni gad ra tay ni rib ga’ fan e tirok Got ban’en u lan e meybil rodad, ma ra m’ug riy ni gathi kemus ni tirodad ban’en e gad be lemnag.

13. Mang e be yog e Bible u murung’agen n’umngin e meybil nib m’agan’ Jehovah ngay?

¹³ Uw n’umngin e meybil rodad? De yog e Bible n’umngin e meybil ni gad ra tay ndemtrug ko goo gadad u bang fa u fithik’ e girdi’ ni yoor. Rayog ni nge ngoch e meybil rodad ni bod e meybil u m’on ko abich, maku rayog ni nge n’uw ni bod e meybil u lanin’dad ni gad be weliy e pi n’en ni bay u lanin’dad ngak Jehovah. (1 Samuel 1:12, 15) Machane i yog  Jesus nib kireb e piin ni yad ma dake yad ba mat’aw nib n’uw e meybil rorad ni yad be fek u fithik’ e girdi’ ya nge guyrad e girdi’. (Luke 20:46, 47) Der ma felfelan’ Jehovah ko pi meybil nem. N’en nib ga’ fan e nge yib e meybil rodad u gum’ircha’dad. Ere, ra thilthil n’umngin e meybil rodad ma ra yan u rogon e pi n’en nib t’uf rodad ni ngad weliyed.

14. Mang fan fare thin nu Bible ni be yog ni ngad “meybilgad ni gubin ngiyal’”? Mang fan ni gad ma felfelan’ ko re n’ey?

¹⁴ Uw urngin yay ni ngad meybilgad? Be yog e Bible ni ‘nguud meybilgad ngak Got’ ni “gubin ngiyal’.” (Matthew 26:41; Roma 12:12; 1 Thessalonika 5:17) Gathi be yip’ fan ni ngad meybilgad ku Jehovah u polo’ reb e rran. Ya be yog e Bible ni dab da paged e meybil, ma ngad pininged e magar ngak Jehovah ni bochan e tin nib fel’ ni ke rin’, ma nge pagan’dad ngak ni nge pow’iydad ma nge fal’eg lanin’dad, me gelnagdad. Ere, gathi gad ba felfelan’ ngay ni de dugliy Jehovah n’umngin nap’an e meybil rodad ara urngin yay ni rayog ni ngad meybilgad ngak? Ri gad ba tow’ath ni bochan e demtrug e ngiyal’ nrayog ni ngad meybilgad ku Got, ma boor ban’en nrayog ni nga dogned ngak e Chitamangidad nu tharmiy.

15. Mang fan ni gad ma yog e “Amen” u tungun e meybil rodad ara meybil ni ke fek be’?

¹⁵ Mang fan ni gad ma yog e “Amen” u tungun e meybil? Fan fare bugithin ni “amen” e “riyul’” ara “arrogon.” Bay boch e thin u lan e Bible ni be micheg nib puluw ni nga mog e “Amen” u tungun e meybil rom ni demtrug ko yigoo gur fa u fithik’ e girdi’. (1 Kronicles 16:36, BT; Psalm 41:13, BT) Nap’an ni gad ra yog e “Amen” u tungun e meybil rodad ma gad be micheg  ni gad be meybil u fithik’ e yul’yul’. Ma nap’an ni gad ra yog e “Amen” u tungun e meybil ni ke fek be’, ma gad be dag ni ke tamilang ara ke m’agan’dad ko fare meybil.​—1 Korinth 14:16.

16. Mang e rayog ni nge pagan’dad ngay u murung’agen e meybil rodad?

¹⁶ Ma fulweg Jehovah taban e meybil, fa? Ri ma  fulweg! Ba pagan’dad ngay ni En ni Ma Motoyil ko meybil e ma fulweg taban e meybil rok bokum milyon e girdi’. (Psalm 65:2) Ma fulweg Jehovah taban e meybil rodad u boor e kanawo’.

17. Mang fan nrayog ni nga nog ni ma fanay Got e pi engel rok nge pi tapigpig rok ni nge fulweg taban e meybil rodad?

¹⁷ Ma fanay Jehovah e pi engel rok nge pi tapigpig rok u fayleng ni nge fulweg taban e meybil. (Hebrews 1:13, 14) Bay murung’agen boor e girdi’ ni kar meybilgad ku Got ni nge ayuwegrad ni ngar nanged fan e machib nu Bible ma de n’uw nap’an nga tomuren me yib reb e tapigpig rok Jehovah nga taferad. Pi n’ey e ma micheg ni ma gagiyegnag e pi engel e machib ni yibe wereg u murung’agen Gil’ilungun Got. (Revelation 14:6) Nap’an nra t’uf e ayuw rodad ma rayog ni nge n’igin Jehovah reb e Kristiano ni nge yib nge ayuwegdad ya aram rogon ni ma fulweg Jehovah taban e meybil rodad.​—Proverbs 12:25; James 2:16.

18. Uw rogon ni ma fanay Jehovah gelngin nib thothup nge Thin rok ni nge fulweg taban e meybil ko pi tapigpig rok?

¹⁸ Ku ma fanay Jehovah Got gelngin nib thothup  nge Thin rok ni aram e Bible ni nge fulweg taban e meybil rok e pi tapigpig rok. Rayog ni nge gagiyegnagdad ara nge gelnagdad u daken gelngin nib thothup ma aram rogon nra fulweg taban e meybil rodad ya nge yag ni ngad athamgilgad u fithik’ e gafgow. (2 Korinth 4:7) Nap’an ni gad ra meybil ni nge pow’iydad Jehovah ma ba ga’ ni ma yib e ayuw ngodad u daken e Bible, ma aram rogon nra ayuwegdad Jehovah ni ngad turguyed e bin nib fel’ e kanawo’. Thin nu Bible e ra ayuwegdad u nap’an ni gad be fil e Bible, nge pi babyor ni fan ngak e piin Kristiano ni bod e re ke babyor ney. Maku rayog ni ngad rung’aged reb e thin nu Bible u nap’an e muulung ko piin Kristiano ara nap’an nra pi’ reb e piilal e fulweg nra ayuwegdad ko magawon rodad.​—Galatia 6:1.

19. Mang e dab da paged talin ni faanra dawori fulweg Got taban e meybil rodad?

¹⁹ Faanra dawori fulweg Jehovah taban e meybil rodad, ma aram e gathi be yip’ fan ni dabiyog rok ni nge fulweg taban e meybil rodad. Thingari tamilang u wun’dad ni ma fulweg Jehovah taban e meybil ko ngiyal’ nib m’agan’ ngay nge ngiyal’ ni ke dugliy. Manang e tin nib t’uf rodad nge rogon ni nge ayuwegdad. Boor yay ni ma pagdad ni ‘nguud ninged, ara nguud gayed, ara nguud tugtuguyed e mab.’ (Luke 11:5-10) Faan gad ra yibilay ban’en ni boor yay ma gad dag ngak Got nrib t’uf rodad ma thingari mich u wun’dad  nra pi’. Ma ku rayog ni nge aw nra fulweg Jehovah taban e meybil rodad u reb e kanawo’ ni gathi ir e gad be lemnag. Sana gad be yibilay ni nge ayuwegdad u reb e magawon, machane gathi ra chuweg fare magawon ya ra pi’ gelngidad ni ngad gelgad ngay.​—Mu beeg e Filippi 4:13.

20. Mang fan ni nguud meybilgad?

²⁰ Ri gad be pining e magar ngak Jehovah ko urngin ban’en ya ba chugur ngak urngin e girdi’ ni yad be meybil ngak u fithik’ e yul’yul’! (Mu beeg e Psalm 145:18.) Ere, thingar da meybilgad ngak Jehovah ni gubin ngiyal’ ya bay rogon ni ngan pining e sorok ngak. Faan gad ra rin’ ma rayog ni ngad chugurgad ngak ni ir e En ni Ma Motoyil ko meybil.