1, 2. Tipagine si aida ani naabi kparakpee ti ni ni bakere pa momu, na tipagine si aida ani ini gupai ti ni Ziazia Kekeapai ayugoho tipa kparakpee?

YEKOVA, nga gu Mbori “nafu ngbangbaturũ na kpotosende,” arikaaboro bangiriko wakina gu ime natoga akoro yo. (Atambuahe 115:15; Yesaya 40:15) Ono wa vura duhe wo, Ziazia Kekeapai naya: “Yekova du mbembedi na agu yo dunduko nakpara fu ko, na agu yo dunduko ninakpara fu ko ni rengo. Ko nadigisa gu nyemuahe nga ga agu yo nagunde ti ko; ko nagia gayo kpe ku ari a.” (Atambuahe 145:18, 19) Mo berẽnga kurii gipai re! Mbori nga Bakusiahe du na tandu apai dũ, ko mbembedi na ani na ko nagia gaani akpee agia ka ani ‘akpara fuko ni rengo.’ Si ni bakere pa momu furani ani mbedi na Mbori rogo kparakpee yo!

² Ono ka ani aida Yekova nigi gaani akpee, si naida ani nikpari fuko ngba gu gene ko aidaha. Si du si aida gupai aida ti ni nga ani ini gupai Ziazia Kekeapai  ayugoho tipa kparakpee. Si ni nyanyakipa pai ani inihe bambiko kparakpee nasa rani ani mbedi na Yekova.

3. Gini nyanyaki ndupai duho si aida ti ni ani nikpari fu Yekova?

³ Nyanyaki ndupai sa si aida ani naakpara ti ni fu Yekova nga ko naya furani ani kpari fuko. Sangbako nga Ziazia Kekeapai naya furani wẽ: “Ka oni ídi nga fu pai si fudi roni wa sa ya; ono oni yúgu gaoni sanahe fu Mbori dunduko rogo kpe na zungaditise ni tambuahe. Na gu zereda nga ga Mbori nagasi rugatinapai dunduko, si abánda kpotoroni yo na gaoni berã rogo Kristo Yesu yo.” (AFiripoio 4:6, 7) Si nirengo nga, ani arengbanga ka basapa gi mbakadapai Mbori amangihe tipa rani re te!

4. Wai pa kpara ani fu Yekova dedede anyakasa gaani pabakure na ko?

⁴ Gu kura ndupai si aida ani naakpara ti ni fu Yekova nga, ka ani akpara fuko dedede, gaani pagume na ko nika du ni nyanyakihe. Wene abakure naafuranga dagbayo kinaho du guni ni na zingo te. Ono i nidu na nyemu tiyo, na gayo pabakure nanyaka gbe ho i afura ni, guni kini gumba gani apai fu kurani. Kina gu bangisapai re a du tipa gaani bakure na Yekova Mbori. Gi buku re ima undoro mo ini dungu apai tipa Yekova, tipa asinoko, na tipa gako aringbisapai. Mo ima inoko awere wenengai. Kparakpee nafu momu foro mo gumba gamo apai fuko na ki kusi agu apai du ngbaduroyo fuko, nga Bamo. Ka mo amangaha wo, mo nika mbeda ambeda na Yekova gbe.—Yakoba 4:8.

5. Ginipai nayugo gupai nga Yekova agianga akpee dunduko te?

⁵ Ya mo Yekova nagia akpee dunduko? Mo bingo gupai ko agumbaha fu agu aYisaraere nasamungu kutiko ti rago gu nebi nangia Yesaya. Ko aya: “Ho oni ka nitaĩ beroni ni, mi aóka bangire be roni; ii, ho oni ka nikpári kpe ni ni dungu he, mi ayé nga ture sa ni te; [bambiko] beroni yo hi be kure.” (Yesaya 1:15) A wa bi ani he re, apai kinaho rengbe ani kaa mangaha si ki sa gupai nga ka Mbori ginga gaani akpee ya. Sidu tie, tipa Mbori nigi gaani akpee, apai kinaho si aida ani mangihe.

6. Tipa Mbori nigi gaani akpee, gini bambatapai si aidaha berani, na wai rengbe ani ka mangaha?

⁶ Gu bambatapai si aida ani mangihe nga ani du na idapase kutiko. (Mo gedi Marako 11:24.) Gu mokedi nangia Pauro akepai ki ya: “Zanga idapase ga boro pai arengba nga na ngba bangiri Mbori te, bambiko gu ni naye koyo du Mbori ni gani pai nga ida ya Mbori kina ho, ko nafu mosoro fu agu yo  nagbata ko.” (AEbere 11:6) Anga ndikidi idapase nga ka ida kuti gupai gbua nga Mbori kina ti ni na ko nagia gaani akpee agia te. Ani nayugo gaani idapase rogo mangaapai yo. Si naida ani yugu gupai nga ani na idapase rogo agu apai ani amangaha rogo gaani raka.—Yakoba 2:26.

7. (a) Tipagine si aida ani du ti ni na umbasitise ho ani akpara ni fu Yekova? (b) Ho ani akpara ni fu Mbori, wai rengbe ani ka yugo gupai nga ani na umbasitise na ani nagumba kina rengo?

⁷ Yekova naida gupai berani a nga ani kpari fuko ni umbasitise na rengo. Wene nduapai kinaho si aida ti ni ani du na umbasitise. Ho aboro agbia momu ni ka ndu ka fura na bakindo watadu bazogo, i naamangaha rogo irisa, bambiko i ima ino nga kikiipa boro du nga ní. Ka si du tie nga kungbo bazogo aboro airisa ní, angbatika Yekova tigako! (Atambuahe 138:6) Yekova nga “Mbori du na tandu apai dũ.” (Bambata Pai 17:1) Ho ani akpara ni fu Mbori, si naida gu gene ani akpara ngbaha yugu gupai ayugo nga ani ima ino nga ani du parani kusende gbe ti gako. Gu umbasitise re nika sa rani a ani naagumba kina boro agu apai du ngbaduraniyo, ki mbu agu akpee i agumba kina bangisapai rogoho kindi.—Matayo 6:7, 8.

8. Wai rengbe ani ka mangapai ka gbia gupai ani akpara tipaha?

⁸ Gu kurapai si aidaha tipa Mbori gi gaani kpee nga, si naida ani asadi aˈasada ka gbia gupai ani akpara tipaha. Yekova naida ani mangi gupai amanga rengbe omerani na ni tipa ka gbia gupai ani akpara tipaha. Ni kpiapai, ka ani akpara kini ya, “Mo fú gaani riahe fu rani areme,” si naida ani gbata gupai agbata rengbe ani ka mangaha tipa ka  gbia riahe. (Matayo 6:11; 2 ATesaroniko 3:10) Ka ani akpara tipa undo tipa ka diabe gu nyemuhe nga ga borose, si naida ani bandatirani abanda ti agu apai rengbe ka rimiso rani ku rogo asada. (AKorosaio 3:5) Kurii agi apai wisigi ani he tie re, asanahe kinaho tipa kparakpee nga gu si aida ani ini akaragapai sani.

9. Da si aida ani kpari funi, na rogo da yo?

⁹ Da si aida ani kpari funi? Yesu arugu apefuoko ki ya i nikpari fu “Barani du ngbangbaturũ yo.” (Matayo 6:9) Si naida ani fu gaani kpee fu kina Yekova Mbori sa. Ono Yekova naida gupai nga ani tingidipa gu bangiriba atingida nga ga Wiriko nga Yesu Kristo a. A wa ani awirikihe rogo Kapita 5, Mbori akedi Yesu ku sende no ko ye ka tumo rii aboro ki batasiyo be ingapai na kpio. (Yoane 3:16; ARomo 5:12) Ko nga gu Gbiamotumo na Basapungbanga Mbori asia ní. (Yoane 5:22; AEbere 6:20) Si du Ziazia Kekeapai aya ti ni ani nikpari fu Mbori rogo Yesu yo. Yesu aya ni ngbako wẽ: “Mi nga gene, nga rengo, nga unga a; a nga boro sa ka ye koyo du Buba ni gbua te, kina mbiko re.” (Yoane 14:6) Tipa Yekova gi gaani kpee, si naida ani kpari fu kinako sa rogo Wiriko yo.

10. Tipagine adunga ha ti ni nga ani ruaru kuari, ani sungu asungo, ani kuku akuko, ani ya berani ku ariyo, watadu ani mangi kurapai na kpotorani ho ani akpara ni ya?

¹⁰ Ya mo si naida ani ruaru kuari, ka sungo asungo, watadu ka kuko akuko ho ani akpara ni? Yekova ayanga furani ani ruaru, ani sungu asungo,  ani kuku akuko, watadu ani ya berani ku ariyo te. Ziazia Kekeapai nayugo gupai nga ani rengbe arengba ka manga agi apai re dunduko. (1 Pekapai 17:16; Nemaya 8:6; Daniere 6:10; Marako 11:25) Ono gupai nyakipaha gbe nga ani du na wene ngbaduraniyo, angianga ka manga kina gupai rengbe aboro ka bihe ya. Kura aregbo kinaho a rengbe ani ka kpara kukiri, singia ho du ani ni rogo tunguotunguopai watadu ani tingba kura sunge. Yekova nagia ngbatunga agi akpee re agia ka si vura du vurũ nga aboro abingo rani ani nikpari te.—Nemaya 2:1-6.

11. Gini apai duho rengbe boro ka kpara tipaha fu Yekova?

¹¹ Gini apai rengbe ani ka kpara tipaha? Ziazia Kekeapai naya: “Ka ani ho gu he ku sangba [ga Yekova] nyemuhe yo, ko gi pa rani agia.” (1 Yoane 5:14) Sidu, ani rengbe ka kpara tipa ai gupai du na ngbanya dagbaha na gupai Mbori akpinyemuhe. Ya mo ko nakpinyemu gupai nga ani kpari tipa agu apai nabi rani? Ii. Kpara fu Yekova wakina fura na bawene bakure. Si naida ani fura na ko kini ‘uka kpotoraniyo’ fuko. (Atambuahe 62:8) Si ngbaangba ani sanako tipa ziazia toro, bambiko si nika undo rani ani mangi gupai du ni ruruhe. (Ruka 11:13) Ani rengbe arengba ka kpara fu Yekova a ko undo rani ani mangi wene adiaberã na ko nyakasi rani ani hi fudifudiapai. (Yakoba 1:5) Ho ani amanga ingapai ni, si naida ani sanako asana ko mbupai furani mbiko gu motumo nga ga Kristo. (AEfeso 1:3, 7) Ono anga si naida ani nikpari tipa kina agu apai nabi kina rani te. Si naida aida a ani  naakpara tipa kura aboro, singia gaani aborokporo watadu agu akuarani ani airiso Yekova na yo.—Amokedi 12:5; AKorosaio 4:12.

12. Wai rengbe ani ka peresapa agu apai nabipa gu Barani du ngbangbaturũ yo mbatayo rogo gaani akpee?

¹² Agu apai nabipa Yekova Mbori si aida ani peresipaha mbatayo rogo gaani akpee. Si naida aida ani naatambua ko rogo gaani akpee yo tipa gako weneapai. (1 Pekapai 29:10-13) Yesu ayugu kpia kparakpee furani nga gudu ni kekehe rogo Matayo 6:9-13, nga gu ko agumba gupai rogoho nga ani nikpari tipa rimo Mbori si du ni irisiirisihe. (Mo gedihe.) Fuo gure, ko aya ani kpari tipa ga Mbori Kindo ye na gupai Mbori akpinyemuhe mangi auru kpotosende wa duhe ngbangbaturũ yo. Yesu agumba agi apai re mbata ko kini ru ka ya ani kpari tipa agu apai nabi rani. Ho ani aperesa pa Mbori ni mbatayo rogo gaani akpee, ani nayugo gupai na ni nga ani aberãnga kina pa tirani kisusi te.

13. Ginipai Ziazia Kekeapai ayugoho nibipa bagizo agu akpee Mbori aida na ni?

¹³ Si naida bagizo gaani akpee du wai? Ziazia Kekeapai ayugongo pa wai si aida bagizo kpee du nga gu boro amangaha nisani watadu gu ní amangaha tipa dungu aboro barabangiriyo te. Kpee rengbe kadu ni wiri guruhe wa ngbatunga gu boro afuhe mbata fu ririahe, watadu ni gbangaha nga gu boro afuhe nisani. (1 Samuere 1:12, 15) Ono tie, Yesu aima bisirapa agu aboro naabi tiyo ni ruru aboro i kini zi kpee ni bagbangaha tipa aboro biyo na ni. (Ruka 20:46, 47) Pa ngbatunga agu akpee re anyakanga bangiri Yekova mbiko gupai nga si ni  gbangaha te. Gupai nyakipaha bangiriko nga ani pe gupai naye ngbaduraniyo. Sidu, bagizo kparakpee nabipa gupai boro asanahe tipaha watadu agu apai du tipa ní ti gu regbo re.

14. Gupai Ziazia Kekeapai agumbaha ki ya ‘ka ani piriginga ti kpee ya,’ rogoyo nga gine, na ginipai ngbaha ti ni wo?

¹⁴ Si naida ani naakpara tifuo regbo wai? Ziazia Kekeapai naya furani wẽ ani ‘nikpari dedede, ka ani mbunga behe ya,’ ani ‘kpatagara kuti kpee kindi,’ na ‘ka ani piriginga ti kpee ya.’ (Ruka 18:1; ARomo 12:12; 1 ATesaroniko 5:17) Ono agi apai re ayugongo gupai nga si naida ani naakpara na uru pitipiti watadu na yuru sasasa te. Gupai Ziazia Kekeapai agumbaha nga ani naakpara dedede, kini tambua Yekova atambua kindi tipa gu weneapai ko amangaha furani, kini kpari fuko ko niyugu gene furani, ko fu wasa furani, na ko nyakasi rani. Ya mo si ni bawenepai ka ino gupai nga Yekova aringbisanga pa wai si aida bagizo gaani kpee du watadu bara wai si aida ani nikpari rogo uru sa te? Ka si du nga ani nabipa kparakpee na nyanyakipaha, ani nikpari akpara fu Yekova dedede.

15. Tipagine si aida ani ya ti ni “Amina” ti digido kpee?

¹⁵ Tipagine si aida ani ya ti ni “Amina” ti digido kpee? Gu fugo nga “amina” rogoyo nga “nirengo,” watadu “si mangi kinawo.” Ziazia Kekeapai nayugo gupai nga si daada ani ya “Amina” ti digido gu kpee ani afuhe nisarani watadu gu ani afuhe barabangiri aboro. (1 Pekapai 16:36; Atambuahe 41:13) Ho ani ayani “Amina” ti digido gu kpee ani afuhe nitirani, ani nayugo gupai na ni nga kina boro rengo du ani nagumbaha, gupai re ye kina boro  ngbaduraniyo. Ho ani ayani “Amina,” singia kukiri watadu na fugo kuari ho boro nanyasi kpee ni nga gu fu ní he kuba rani, ani nayugo gupai nga ani ima ida na gupai ní nagumbaha re.—1 AKorindo 14:16.

16. Gini kido si aida ani du na ni nibipa kparakpee?

¹⁶ Ya mo Yekova nakaragapai sa akpee? Ii. Si naida  ani du na gu kido nga Yekova ‘ninaagia kpee,’ ko nakaragapai akaraga sa agu akpee amirioni aboro afuhe fuko. (Atambuahe 65:2) Yekova rengbe ka karagapai sa gaani akpee rogo dungu agene.

17. Tipagine rengbe ani ka ya ti ni Mbori namangasunge amanga na gako amaraika gbiati gu gako amoyambu du auru kpotosende ka karagapai sa gaani akpee?

¹⁷ Yekova namangasunge na gako ama­raika ka karagapai sa agu akpee nga ga gako amoyambu. (AEbere 1:13, 14) Badungu aboro duho nakpari fu Mbori ko undoyo tipa i girogo Ziazia Kekeapai yo, na fuo gure ngbutuko, ga Yekova moyambu ki ye fuoyo. Ngbatunga agu apai re nayugo gupai nga amaraika naundo aboro aundo i gi gu pangbanga nga ga Kindo. (Yugoti 14:6) Na berewe a, Yekova rengbe arengba ka sa kpoto Kristano yo ní undo rani ho du ani ni rogo zingo ani ki kpari fuko.—Asanza 12:25; Yakoba 2:16.

18. Wai Yekova amangasunge na gako ziazia toro gbiati Ziazia Kekeapai ka karagapai sa gaani akpee?

¹⁸ Yekova Mbori namangasunge amanga a na gako ziazia toro gbiati Sangbako nga Ziazia Kekeapai ka karagapai sa gaani akpee. Ka ani kpari fuko  ko undo rani ani dibe gu asada du ani rogoho, ko rengbe arengba ka fu gako ziazia toro furani si nyakasi rani na ki yugu gupai furani si aida ani mangihe. (2 AKorindo 4:7) Akaragapai naye gbe furani rogo Ziazia Kekeapai yo kuti gu kpee ani akparaha tipa ka ino gupai ka ani mangihe. Ziazia Kekeapai naundo rani ani mangi wene adiaberã. Ani rengbe ka gbia agu averesi rengbe ka undo rani ho ani ageda Ziazia Kekeapai ni watadu ho ani ageda agu awaraga ni nga ga aKristano, wa gi buku re. Ani rengbe ka gbia agu apai rengbe ka undo rani ti regbo agu adunguratise nga ga aDezire Yekova watadu rogo gupai kura bakumba nagumbaha.—AGaratio 6:1.

19. Ginipai si aida ani tingidihe ka ani bihe wa Yekova akaraganga pai sa gaani kpee te?

¹⁹ Ka ani bihe wa Yekova akaraganga pai sa gaani kpee ni ipo te, anga si wo mbiko ko arengbanga ka karagapai sani te te. Ono si naida ani tingidi gupai nga, Yekova nakaragapai sa gaani akpee ringbisihe kuti gupai ko akpinyemuhe na ti gako regbo. Ko ima ino gaani azingo na wai ka mangapai sani susi gu ini ani he. Gupai ko amangaha gbe nga, ko nambu rani ani ‘naasanahe asana kindi, kini gbata he kindi, na kini ngoka ngbadimo kindi’ ko kini ru ka karagapai sa gaani kpee. (Ruka 11:5-10) Gu kpatagara kuti kpee re nayugo gupai fu Mbori nga, ani gu duadu na nyemu gupai ani asanako tipaha na  gaani idapase nga ndikidi idapase. Kurigure, Yekova rengbe arengba ka karagapai sa gaani akpee ka ani abingo ho abi ziazia ya. Ni kpiapai, ko rengbe ka karagapai sa gu kpee ani nafuhe nibi gu fudifudipai du ani rogoho, angianga ni dia ko ho kusayo ya, ono ni fuko ome furani ani hihe.—Mo gedi AFiripoio 4:13.

20. Tipagine si aida ti ni ani naakpara akpara dedede fu Yekova?

²⁰ Nairiwo gu tambuahe si aida ani du na ni mbiko gupai nga Bakusi zegino dunduko mbembedi na agu aboro dunduko nakpara fuko ngba ruru gene! (Mo gedi Atambuahe 145:18.) Si naida ani naakpara akpara dedede fu Yekova bambiko si nga gu momu kinako nafuhe furani. Ka ani amangaha wo, ani mbedi ambeda na Yekova gbe, nga gu Mbori ninaagia akpee.