Dul me Apar Wiye Aboro

Batija ki Dok Wat i Kin In ki Lubanga

Batija pa Lukricitayo kitimo nining?

Yo ango ma omyero ikwany me wek ibed ma iporre pi batija?

Ngat moni twero dyere bot Lubanga nining?

Tyen lok ango ma pire tek ma weko dano nongo batija?

1. Pingo Laco me ot kot me Etiopia-ni okwayo ni kibatija en?

LADIT mo me ot kot me Etiopia openyo ni: “Nen pii dong ene! Gin ango ma genga limo batija?” Lakricitayo ma nyinge Pilipo onyuto bote ni Yecu aye obedo Meciya ma giciko pire-ni. Laco me Etiopia-ni otiyo gin  ma mitte pien gin ma en okwano ki i Ginacoya-ni ogudo cwinye. En onyuto ni emito nongo batija!​—Tic pa Lukwena 8:26-36.

2. Pingo omyero itam matek pi nongo batija?

² Ka onongo dong ikwano dul mogo mukwongo me buk man maber ki ngat mo acel i kin Lucaden pa Jehovah, ci weko itwero penyo ni, ‘Gin ango ma gengo an ki nongo batija?’ Kombeddi dong ityeko kwano lok i kom kwo ma pe tum ma Baibul ociko pire i Paradic. (Luka 23:43; Niyabo 21:3, 4) Dok ikwano bene lok kom kit ma jo muto gitye kwede ki dok lok me gen me nicer. (Latitlok 9:5; Jon 5:28, 29) Gwok nyo dong itye ka ribbe ki Lucaden pa Jehovah i cokkegi dok ineno ki wangi kit ma gilubo kwede dini me ada. (Jon 13:35) Ma dong pire tek loyo aye ni, gwok nyo dong icako dongo wat i kin in ki Lubanga Jehovah.

3. (a) Cik ango ma Yecu omiyo bot jo ma lubbe? (b) Batija me pii mono gitimo nining?

³ In itwero nyutone nining ni imito tic pi Lubanga? Yecu owaco ki jo ma lubbe ni: ‘Dong wuciti wucilok jo me rok ducu gudok jo ma luba, kun wubatijagi.’ (Matayo 28:19) Yecu kikome onyuto lanen maber ki nongo batija i pii. En pe oweko kikiro pii akira nyo kionyo aonya i wiye. (Matayo 3:16) Nyig lok ni “batija” ni oa ki i leb Grik ma gonye ni “lutu.” Pi meno, batija pa Lukricitayo obedo lutu ngat moni i te pii.

4. Batija me pii nyuto gin ango?

⁴ Batija me pii obedo gin ma mitte pi jo ducu ma gimito moko wat ki Lubanga Jehovah. Batija nyuto mitini i dye lwak ni in imito tiyo tic pa Lubanga. Nyuto ni cwinyi yom me timo miti pa Jehovah. (Jabuli 40:7, 8) Ento, me bedo ngat ma oporre me nongo batija, omyero ikwany yo mogo ma pigi tego.

 NGEC KI NIYE MITTE

5. (a) Yo mukwongo me bedo ngat ma oporre me nongo batija obedo ngo? (b) Pingo cokke pa Lukricitayo pire tek?

⁵ In dong icako kwanyo yo me acel. Ki timo ngo? Ki nongo ngec i kom Lubanga Jehovah ki Yecu Kricito, gwok nyo i yo me kwano Baibul kore ki kore. (Jon 17:3) Ento pud tye jami mapol me angeya. Lukricitayo gimito “[niang] matut i gin ma en [Lubanga] mito.” (Jo Kolocai 1:9) Pi meno, bedo tye i cokke pa Lucaden pa Jehovah obedo gin me kony madit tutwal i yo man. Pire tek me bedo tye i cokke mapol ma kit meno. (Jo Ibru 10:24, 25) Bino i cokke kare ducu bikonyi me meddo ngecci i kom Lubanga.

6. Omyero mono ibed ki ngec me Baibul ma rom mene ka wek ibed ma iporre pi batija?

⁶ Pe tye kono ni omyero inge jami ma i Baibul ki pete tere ka wek ibed ma iporre pi batija. Ladit me ot kot me Etiopia-ni onongo tye ki ngec mo, ento en onongo mito kony me niang but Ginacoya mogo. (Tic pa Lukwena 8:30, 31) Kit meno, in bene pud itye ki jami mapol ma omyero inge. Ki lok ada kwano lok i kom Lubanga pe gik. (Latitlok 3:11) Ento ma nongo peya kibatija in, mitte ni kong ibed ki ngec dok i ye i kom pwony ma pigi tego me Baibul. (Jo Ibru 5:12) Pwony ma kit meno kwako lok ada ma dok i kom jo muto ki gin ma miyo nying Lubanga ki Kerre pigi tego.

7. Kwano Baibul omyero owek itim gin ango?

⁷ Ento bedo ki ngec keken kono pe romo, pien “labongo niye pe twerre me yomo cwiny [Lubanga].” (Jo Ibru 11:6) Baibul tittiwa ni i kare ma jo mogo ma onongo gibedo i boma macon me Korint guwinyo kwena ma Lukricitayo gutito, “guye bene, ci gibatijagi.” (Tic pa Lukwene 18:8) I yo acel-li, kwano Baibul myero owek ibed ki niye ni Baibul obedo Lok ma teko pa cwiny pa Lubanga aye omiyo kicoyo. Kwano Baibul  omyero owek ibed ki niye i kom cikke pa Lubanga ki dok i kom teko me lar ma a ki i gityer pa Yecu.​—Yocwa 23:14; Tic pa Lukwena 4:12; 2 Temceo 3:16, 17.

NYWAKO LOK ADA ME BAIBUL KI JO MUKENE

8. Ngo ma biweko inywako jami ma ikwano ki jo mukene?

⁸ Ka niye dong ocako dongo i cwiny, ci ibinongo ni pe ber me ling alinga ki jami ma itye ka kwanone. (Jeremia 20:9) Cwinyi bicwali me tito lok i kom Lubanga ki yubbe bot jo mukene.​—2 Jo Korint 4:13.

9, 10. (a) In iromo cako nywako lok ada me Baibul ki angagi? (b) Omyero itim ngo ka imito donyo i tic me pwony kacel ki Lucaden pa Jehovah?

⁹ Iromo cako nywako lok ada me Baibul ki jo mukene kun iloko pire ki diro bot wadini, luremi, jirani-ni, ki lutic luwoti. Inge kare mo, ibimito ni idony i tic me pwony kacel ki Lucaden pa Jehovah. I kare meno, bed agonya me waco mitini-ni bot Lacaden ma tye ka pwonyi ki Baibul-li. Ka kinongo ni dong iporre me donyo i tic me pwony kacel ki Lucaden, ci kibiyubo ni in ki lapwonnyi-ni kong wurwatte ki luelda aryo me kacokke.

¹⁰ Man weko ibingeyo Lukricitayo ma gubedo luelda mogo maber, ma gikwayo romi pa Lubanga. (Tic pa Lukwena 20:28; 1 Petero 5:2, 3) Ka luelda magi guneno ni dong iniang dok itye ki niye i kom pwony ma pigi tego me Baibul, dok ni itye ka kwo i yo ma rwatte ki cik ma igi lac pa Lubanga, kun ada imito bedo ngat acel i kin Lucaden pa Jehovah, ci gibiye ni in dong itwero donyo i tic me pwony kacel ki Lucaden macalo latit kwena maber ma peya kibatija.

11. Jami ango ma jo mukene omyero kong guwek timone ma nongo peya gupenyo pi cako tic me pwony kacel ki Lucaden?

¹¹ Kare mukene, oromo mitte ni omyero kong ilok yo me kwoni ka wek ibed ma iporre me cako nywako  tic me pwony ki Lucaden. Man mitte ni ka tye kit tic mogo maraco ma onongo itimo i mwung, ci omyero iweki. Pi meno, ma nongo pud pe ipenyo pi bedo latit kwena ma peya kibatija, omyero kong inen ni iweko timo bal mogo maraco calo tim me tarwang, mero ki kongo, nyo tic ki yadi maraco calo taa, nyo jayigi.​—1 Jo Korint 6:9, 10; Jo Galatia 5:19-21.

NGUT PI BAL KI DOK LOKKE

12. Pingo ngut pi bal obedo gin ma pire tek?

¹² Tye yo mukene ma pire tek ma omyero ikwany ma nongo peya inongo batija. Lakwena Petero owaco ni: “Iyo, wungut, wudwog cen, wek balwu gijwa woko.” (Tic pa Lukwena 3:19) Ngut pi bal obedo koko ange pi gin marac ma nongo itimo. Ngut pi bal obedo gin ma rwatte tutwal ka ce onongo ngat moni obedo ka tero kwone i yo marac, ento pud mitte bene kadi bed ni en onongo otero kwone i yo maber. Pingo? Pien dano ducu gudoko lubal dok gimito kica pa Lubanga. (Jo Roma 3:23; 5:12) Ma peya icako kwano Baibul, onongo pe ingeyo miti pa Lubanga. Dong onongo iromo tero kwoni i yo ma rwatte ki mitine nining? Pi meno, ngut pi bal obedo gin ma pire tek.

13. Lokke obedo gin ngo?

¹³ Inge ngut pi bal lokke omyero obed tye. Omyero itim gin ma kato koko ange keken. Mitte ni ikwer yo me kwoni macon ca, ci imok tammi me cako timo jami ma tye atir cakke i kare-ni. Ngut pi bal ki lokke gubedo yo ma omyero ikwany ma nongo peya kibatija in.

DYERE PIRI KENI

14. Yo ma pire tek ango ma omyero ikwany ma nongo peya kibatija in?

¹⁴ Tye yo mukene ma pire tek ma omyero ikwany ma  nongo peya kibatija in. Omyero idyere bot Lubanga Jehovah.

15, 16. Dyereni bot Lubanga tyen lokke ngo, dok ngo ma miyo ngat moni timo man?

¹⁵ Ka idyere bot Lubanga Jehovah i lega ki cwiny ducu, nongo icikke me miye woro ma iye pe opokke pi nakanaka. (Nwoyo Cik 6:15) Ento pingo omyero ngat moni otim kumeno? Me laporre, ka laco mo ocako nyuto miti i kom dako moni. Ka ce en bedo ka ngiyo ki neno kit dako-ni, ce en onongo ni kite ber, ci en cako marre. Mot mot en binongo ni omyero epeny ka ce etwero nyomone. Ki lok ada, nyom kelo tic mukene mapol. Ento mar aye miyo en kwanyo yo ma pire tek-ki.

¹⁶ In bene ka dong ingeyo dok imaro Jehovah, ci cwinyi bicwalli me tic bote ki cwinyi ducu nyo ijalo kareni pi worre. Ngat mo keken ma mito lubo kor Yecu Kricito, Wod pa Lubanga, myero “okwong kwerre kekene.” (Marako 8:34) Wakwerre kekenwa i yo ni pe waweko miti ki yubwa me gengowa woko ki woro Lubanga. Timo miti pa Lubanga Jehovah omyero obed gin ma pire tek loyo i kwoni ma nongo pud peya kibatija in.​—1 Petero 4:2.

JUKO KIT LWORO MONI NI IN PE ITWERO TIMO JAMI MA MITTE

17. Pingo jo mukene gikwero dyere bot Lubanga?

¹⁷ Jo mukene gikwero dyero kwogi bot Jehovah pi lworo. Nongo gitamo ni ka gidyero kwogi bot Lubanga ci en bimito ni gicob dyeregi macalo Lukricitayo. Gilworo ni kare mukene pe giromo timo gin ma nongo mitte ci weko gileyo wi Jehovah. Dong weko gitamo ni bedo ber ka pe gidyere bote.

18. Ngo ma bimiyo cwinyi cwali me dyere bot Jehovah?

¹⁸ Ka dong itye ka pwonnye me maro Jehovah,  cwinyi bicwali me dyere bote ki me yelle ki tekki ducu me kwo i yo ma rwatte ki dyereni. (Latitlok 5:4) Inge dyereni bote, ibimito ni ibed “ma myero bot Rwot, ma yomo cwinye maber.” (Jo Kolocai 1:10) Pi marri i kom Lubanga, pe ibitamo ni obedo gin matek mada me timo mitine. Labongo akalakala mo, ibiye lok pa lakwena Jon ma ocoyo ni: “Maro Lubanga en aye gwoko cikke. Dok cikke pe nurowa.”​—1 Jon 5:3.

19. Pingo omyero pe ilwor dyere bot Lubanga?

¹⁹ Pe ni omyero kong ibed dano ma pe ki roc ka wek idyere bot Lubanga. Jehovah ngeyo goroni dok en pe mito ni itim gin ma pe itwero timone. (Jabuli 103:14)  En mito ni timone pe oloyi, pi meno en bikonyi dok bijingo cwinyi bene. (Icaya 41:10) Bed labongo akalakala ni ka igeno Jehovah ki cwinyi ducu, ci en “bitiro yo ma iwoto iye bedo atir.”​—Carolok 3:5, 6.

NYUT DYERENI KI NONGO BATIJA

20. Pingo lok me dyereni bot Jehovah pe omyero obed gin me mwung?

²⁰ Bedo ka tamo i kom jami ma wa a ka kwanone-ni  romo konyi me dyere bot Jehovah i lega. Ngat ma maro Lubanga ada omyero bene ‘otuc lok me larre ki doge.’ (Jo Roma 10:10) In iromo timo meno nining?

21, 22. In itwero ‘tuco niyeni i dye lwak’ nining?

²¹ Wek won kom pa luelda onge ni in imito nongo batija. En biketo yub mo pi luelda me nyamo lapeny mogo ma mako pwony ma pigi tego me Baibul kwedi. Ka ce luelda magi gunongo ni iporre, ci gibiniangi ni dong iromo nongo batija teke karene oromo. * Gibimiyo pwony ma nyamo tyen lok me batija bene i nino meno. Lami pwony bipenyo jo ma mito nongo batija me gamo lapeny aryo mogo macalo yo me ‘tuco niyegi i dye lwak.’

²² Batija aye obedo gin ma nyuto in i dye lwak ni dong ityeko dyere bot Lubanga dok ni ityeko doko ngat acel i kin Lucaden pa Jehovah. Kiluto kom jo ma gitye ka nongo batija mwony woko i te pii me nyuto ka maleng ni gin dong gutyeko dyere bot Jehovah.

TYEN LOK ME BATIJANI

23. Tyen lok me batija ‘i nying Won ki Wod ki cwiny maleng’ tye ningo?

²³ Yecu owaco ni gibibatija lulub kore ‘i nying Won ki Wod ki cwiny maleng.’ (Matayo 28:19) Man te lokke ni ngat ma mito nongo batija-ni ye twero pa Lubanga Jehovah ki pa Yecu Kricito. (Jabuli 83:18; Matayo 28:18) Dok ye bene tic pa cwiny maleng nyo teko me tic pa Lubanga.​—Jo Galatia 5:22, 23; 2 Petero 1:21.

24, 25. (a) Batija nyuto gin ango? (b) Lapeny ango ma mito kinong lagamme?

²⁴ Ento, batija pe obedo lutte i pii mere keken. Obedo  lanyut me gin mo ma pire tek tutwal. Lwiny i te pii nyuto ni ityeko to woko i yo me kwoni macon. Kati ki i te pii nyuto ni in dong idoko kwo me timo miti pa Lubanga. Wii omyero opo bene ni in idyere bot Lubanga Jehovah kikome, ento pe pi tic, yub, dano, nyo dul moni. Dyere kacel ki batijani gubedo acakki me bedo larem Lubanga​—wat macok atika ki en.​—Jabuli 25:14.

²⁵ Batija aye pe moko ni dong ibilare. Lakwena Paulo ocoyo ni: “Wuti tic me cobo larwu kenwu ki lworo kacel ki myelkom.” (Jo Pilipi 2:12) Batija obedo mere acakki keken. Pi meno, lapeny dong tye ni, In iromo bedo i mar pa Lubanga nining? Dulwa me agikki bimiyo lagam me lapeny man.

[Lok ma tye piny]

GIN MA BAIBUL PWONYO

▪ Batija pa Lukricitayo obedo lute i te pii, ento pe kiro pii akira.​—Matayo 3:16.

▪ Yo ma tero dano me nongo batija cakke ki nongo ngec, nyuto niye ngut pi bal, ki lokke, ka dong dyere bot Lubanga.​—Jon 17:3; Tic pa Lukwena 3:19; 18:8.

▪ Me dyere bot Jehovah, omyero kong ikwere keni, kit macalo dano gikwere ken-gi me lubo kor Yecu.​—Marako 8:34.

▪ Batija obedo lanyut me to pa ngat moni i yo me kwone macon, ki doko kwo me cako timo miti pa Lubanga.​—1 Petero 4:2.

[Peny me Kwan]

[Cal ma tye i pot karatac 180]

Nongo ngec ma tye atir i Lok pa Lubanga obedo yo ma pire tek pi bedo dano ma oporre me nongo batija

[Cal ma tye i pot karatac 180]

Niye omyero ocwali me nywako niyeni ki jo mukene

[Cal ma tye i pot karatac 180, 181]

In dong mono ityeko dyere bot Lubanga i lega?

[Cal ma tye i pot karatac 181]

Batija obedo to i yo me kwowa macon ki doko kwo me timo miti pa Lubanga