1. ¿Chumngelu (chemu) kiñe funsionario Etiopia tuwlu ayüy ñi fawtisangeal?

‘¡TÜFA mew müley ta ko! ¿Kümepelayafuy may ñi fawtisangeael ta iñche?’, pi kiñe ülmen funsionario Etiopia mapu tuwlu wünen siglo mu. Kiñe kristiano Felipe pingelu,  ti Wirintukun mu kimeltufi feychi funsionario, fey Jesus ti feypikünuelchi Mesia ngerkey. Feymu tati funsionario fente afmatulu am ñi kimeltungeel, feymu ayüy ñi fawtisangeal (Hecho 8:26-36).

2. ¿Chumngelu müley tami rakiduamal ti fawtisawün mu?

² Küme ngüneduamfilmi tati wüneleyechi chillkatun tüfachi lifru mu, kiñe Dungukelu Iney Ngen Jewba eymu, ka pepikawkülelmi chi tami ramtual: “¿Kümepelayafuy may ñi fawtisangeael ta iñche?”. Dew kimürpuymi Biblia ñi feypikünuel tati pu che afnoachi mongen nieayngün ti Küme Mülewe mew (Luka 23:43; Apokalipsi 21:3, 4). Kafey kimimi chumleketuy tati pu layelu ka tati maneluwün ñi wiñomongetual engün (Eclesiastés 9:5; Juan 5:28, 29). Ka trawüluwmekelmi tati pu Dungukelu Iney Ngen Jewba ñi trawünche mu, fey kimtukuymi ñi inanieken engün ti rüfngechi religion (Juan 13:35). Ka doy falintufal-lu eymi weniyerpufimi chi Chaw Ngünechen.

3. a) Jesus, ¿chem werküfi tañi pu inanieetew? b)Kiñe kristiano fawtisangelu, ¿chumngechi femngekey?

³ ¿Chumngechi pengelafuymi tami küpa poyeafiel ta Chaw Ngünechen? Jesus werküfi tañi pu inanieetew: “Amumün, kom chüf mapu müleyechi pu che mew. Ka kimeltuafimün femngechi tañi kimaetew engün ka iñche ñi disipulungeael engün. Fawtisayafimün” (Matew 28:19). Jesus elkünuy kiñe inayentufal tüfa mu, kidu ka fawtisangey. Welu pachügkongelay ka wütrukongelay ñi longko mew rume (Matew 3:16). Griego dungun mu “fawtisawün”, tüfa feypi “ñamüntukungekey tati che ko mew”. Feymu kiñe kristiano fawtisangelu, kom ñi kuerpu ñamüntukungekey ko mew.

4. Kiñe che fawtisangelu, ¿chem pengeli?

⁴ Kom che küpa weniyefilu ta Chaw Ngünechen Jewba, müley ñi fawtisangeal engün. Feymu kiñe che fawtisangelu fentren che ñi adkiñ mu, pengeli ñi küpa poyeafiel ta Ngünechen, ka ayüwküley ñi femal tañi ayükeelchi dungu (Salmo 40:7, 8). Welu ñi fawtisangeal müley ñi femal kiñeke dungu.

5. a) ¿Chem wünen dungu müley tami femal tami fawtisawal? b)¿Chumngelu fente falin-ngey tati kristiano trawün?

⁵ Dew femkeymi ti wünen dungu. ¿Chumngechi? Kimürpufimi ta Chaw Ngünechen Jewba ka Jesukristo, fey llowkeymi chi kiñe chillkatun Biblia fill semana mu (papeltunge Juan 17:3). Welu petu doy kimürpuafuymi. Tati pu kristiano ayüniey ‘tañi fente küme kimafiel ta Ngünechen ñi ayükeelchi dungu’ (Kolosense 1:9). Tati pu Dungukelu Iney Ngen Jewba ñi trawün mu müna kelluafeymu. Feymu falin-ngey tami trawüal (Ebrew 10:24, 25). Fill semana mu trawülmi, doy kimürpuafimi ta Chaw Ngünechen.

6. Tami fawtisawal, ¿tunte müley tami kimal Biblia mu?

⁶ Tami fawtisawal duamfalngelay tami kimal kom dungu Biblia mu mülelu. Tukulpaymi tati funsionario Etiopia tuwlu, niekefulu rume kiñeke kimün ti Wirintukun mu, ka duamniefuy kellu ñi kimal kiñeke dungu wirikonkülelu (Hecho 8:30, 31). Ka femngechi petu müley tami kimafiel kiñeke dungu. Feymu turpu aflayay tami kimnierpuafiel ta Chaw Ngünechen ñi Dungu (Eclesiastés 3:11). Welu tami fawtisangeal, müley tami kimal ka llowal tati doy duamfalngechi kimeltun Biblia mu mülelu (Ebrew 5:12). Feymu duamfali tami kimal kiñeke dungu, tüfa ta chumleketuy tati pu layechi che ka chumngelu doy falin-ngey Ngünechen ñi üy ka tañi Ngünenien.

7. ¿Chem am nierpuaymi tami chillkatukeel Biblia mu?

⁷ Welu duamfalngelay ñi nieal kimün müten, fey ‘turpu ngelay ñi tutengeael ta Ngünechen, ngenole mupiltun ta kidu mew’ (Ebrew 11:6). Biblia pengeli kuyfi mülekefuy kiñeke che Korinto waria mu, allkütufilu engün tati pu kristiano ñi amuldungukeel, fey “feyentuy ka fawtisangey engün” (Hecho 18:8). Ka femngechi rupayafuymi. Tami chillkatukeel Biblia mu, müley tami nieal mupiltun Ngünechen ñi Dungu mu. Kafey müley tami mupiltuafiel Ngünechen ñi femürpual tañi feypikünuel, ka kidu montulaeymu Jesus ñi chalintukuwün mu (Josué 23:14; Hecho 4:12; 2 Timotew 3:16, 17).

8. ¿Chem kelluaeymu tami nütramkayafiel pu che Biblia tami kimeltukeetew?

⁸ Doy tremkülele tami mupiltun, küdawngelayay tami nütramkayal Biblia tami kimeltukeetew (Jeremías 20:9). Femngechi doy ayüwaymi tami nütramkayafiel tati pu che, Ngünechen mu ka tañi ayükeelchi dungu (papeltunge 2 Korintio 4:13).

9, 10. a) ¿Iney am amuldungulelafuymi tati rüf dungu Biblia mu? b)Küpa koneltulmi tati amuldungun küme adkünukelu pu Dungukelu Iney Ngen Jewba, ¿chumafuymi kay?

⁹ Wünelu mu, müley tami küme dunguafiel tami pu che, weni, karukatu ka tami kompañ küdaw mu kiñeke rüf dungu Biblia mu mülelu. Ka rupachi antü mu, ayüafuymi tami koneltual tati amuldungun mu, küme adkünukelu pu Dungukelu Iney Ngen Jewba. Feymu akule feychi antü, maneluwün mu dunguafimi tati Dungukelu Iney Ngen Jewba tami kimeltumekeetew ta Biblia. Kidu trokielmu tami pepikawkülen ñi amuldungual, feymu küme adkünungeay ñi trawüal eymi, tami kimeltufe ka epu longkolelu ti trawünche mu.

¹⁰ Femngechi küme kimafuymi kiñeke kristiano longkolelu, ti pu kamañ reke felelu Chaw Ngünechen ñi elkünuel (Hecho 20:28; 1 Pedro 5:2, 3). Fey ngüneduamkeyngün eymi küme kimülmi doy duamfalngechi kimeltun Biblia mu ka feyentukeymi tüfa, ka inanielmi Ngünechen ñi ngülam, kafey rüf ayülmi kiñe Dungukelu Iney Ngen Jewba ngerpual. Femülmi tüfa, feypiaeymu tami pepikawkülen kiñe amuldungukelu petu fawtisawnolu tati kümeke dungu mu, femngechi eluñmayaeymu tami amuldungual.

11. Kiñeke che petu ñi amuldungukenon, ¿chem müley ñi femal tañi mongen mu?

¹¹ Kafey kiñeke rupa tati pu longkolelu ngüneduamkeyngün tati che müley ñi kakünutual tañi mongen ñi amuldungual. Tüfa ta kiñe, niefule kiñe ellkalechi weda femün müley ñi elkünungetual. Feymu lle petu tañi üytungenon kiñe  amuldungukelu petu fawtisawnolu, duamfali tañi koneltuwenoal chem weda femün no rume tañi mongen mew, tüfa ta podngechi dungu, ngollikawün ka droga no rume (papeltunge 1 Korintio 6:9, 10; Galata 5:19-21).

12. ¿Chumngelu duamfali ñi wiñorakiduamtual?

¹² Tami fawtisangeal eymi müley tami femal ka kiñeke dungu. Feymu apostol Pedro feypi: ‘Wiñotumün ta Ngünechen mew ka wiñorakiduamtumün, feymew Ngünechen wiñoduamatuaeymünmew tamün kulpan mew’ (Hecho 3:19). Kiñe che rüf wiñorakiduamtukelu, fey rüf weñangkülkeeyew tañi weda femün. Feychi pu che yeniekefulu kiñe weda mongen, duamfali ñi wiñorakiduamtual, welu tati che yeniekelu kiñe lif mongen ka müley ñi wiñorakiduamtual. ¿Chumngelu? Kom pu che kulpakelu am, feymu duamniey ta Chaw Ngünechen tañi wiñoduamtuaetew (Romanu 3:23; 5:12). Petu tami chillkatunofiel ta Biblia, kimlafuymi Chaw Ngünechen ñi ayükeelchi dungu. Feymu lle yekelafuymi kiñe mongen chumngechi Chaw Ngünechen ñi ayükeel, ¿feyngelay am chi? Feymu duamfali ñi wiñorakiduamtual.

13. ¿Chem am ta wiñotun Chaw Ngünechen mu?

¹³ Rupan ñi wiñorakiduamtun duamfali ñi wiñotual ta Ngünechen mu. Fey wiñotulu eymi ta Ngünechen mu, elkünutuymi tami inaniekefelchi rüpü kuyfi. Femngechi weñangküymi tami weda femün mu, kafey kiñepülekünutufimi tami kuyfi mongen. Feychi antü mu, piwkentukunieymi tami femal kümeke dungu. Feymu petu ñi fawtisangenon müley ñi femal epu dungu: Ti wiñorakiduamtun ka wiñotun Chaw Ngünechen mu.

14. Petu tami fawtisawnon, ¿chem falin dungu müley tami femal?

¹⁴ Ka kiñe falin dungu müley tami femal petu fawtisawnon: wülaymi tami mongen Chaw Ngünechen mu.

15, 16. ¿Chem pifel am wülal tami mongen Chaw Ngünechen mu, ka chem kelluaeymu tami femal?

 ¹⁵ Wülal tami mongen Chaw Ngünechen mu, tüfa ta rüf piwke mu ngillatuafimi ka feypikünuafimi ta Chaw Jewba, fentekünulayaymi tami poyeafiel kidu müten (Deuteronomio 6:15). Welu, ¿chumngelu kiñe che küpa femafuy tüfa? Rakiduamnge tüfa, kiñe wentru feypifile kiñe domo “doy küpa kimnieeyu”. Fey doy küme kimfile ka kimafuy ñi kümeke chumngen, fey doy ayüay ñi fülküleal kidu mu. Femngechi puway ti antü ñi feypiafiel “küpa nieeyu eymi iñche tañi domongeal”. Fey llemay, niele domo doy elfal küdaw nieafuy. Welu fente ñi piwkeyeniefiel mu, tüfa kelluaeyew tañi femürpual tüfachi falin dungu.

¹⁶ Kimfilu ka piwkeyefilu iñchiñ ta Chaw Jewba, tüfa kellukeeiñmew taiñ poyefiel kidu kom taiñ mongen mew, fentepuwlayay taiñ femal tüfa. Feymu tati che küpa inanieafilu Chaw Ngünechen ñi Fotüm, Jesukristo, müley ñi ‘ngüyünentuwal’ reke (Marku 8:34). Ngüyünentuwkeiñ iñchiñ eluñmawkenolu am kidu taiñ ayükeel ka taiñ duam katrütuñmayaetew taiñ inaniefiel Chaw Ngünechen ñi dungu. Feymu petu tami fawtisawnon, doyümaymi tami femal Jewba ñi ayükeelchi dungu tami mongen mu (papeltunge 1 Pedro 4:2).

17. ¿Chumngelu kiñeke che küpa wülkelay tañi mongen Ngünechen mu?

¹⁷ Kiñeke che petu wülkelay tañi mongen Chaw Ngünechen mu, llükanielu engün am ñi femal tüfachi falin dungu. Llükaniepefingün may ta Ngünechen ñi ramtukadunguaetew ñi kristiano fawtisangen mu. Rakiduamkepeyngün may ñi welulkawal, fey weñangkülelafiel ta Jewba, feymu pilay ñi wülal tañi mongen Ngünechen mu.

18. ¿Chem kelluaeymu ñi wülal tami mongen ta Jewba mu?

¹⁸ Amulele tami piwkeyeafiel ta Chaw Jewba, tüfa kelluaeymu ta wülal tami mongen kidu mu, ka newentuaymi ñi femürpual tami feypikünuel (Eclesiastés 5:4). Feymu dewma wülülmi tami  mongen ta Ngünechen mu, ‘femaymi ta kümeke dungu chumngechi feley ñi femael tüfey engün ta Jewba mew feyentulelu, fey ka femngechi rumel tami femael tüfeychi dungu kidu tañi tutekeetew’ (Kolosense 1:10). Piwkeyefilmi ta Ngünechen, doy küdawtulayaymi tami femal kidu ñi ayükeelchi dungu. Feymu rakiduamaymi chumngechi feypi apostol Juan: ‘Tati rüf dungu mew piwkeyefilu ta Ngünechen ka feley tañi allkütuñmayafiel kidu ñi werkün dungu. Fey kidu tañi werkün dungu afeluwün-ngelay’, fanetungelay llemay (1 Juan 5:3).

19. ¿Chumngelu llükakelayaymi wülal tami mongen Chaw Ngünechen mu?

¹⁹ Wülal tami mongen ta Ngünechen mu, duamfal-lay tami kulpanchengenon. Jewba kimnieeymu tami pepilnien ka tami pepilnienon, ka dikümtukulayaeymu tami femal kiñe  pepilkenoelchi dungu (Salmo 103:14). Welu may Jewba kellunieaeymu, fey ayüniey ñi kümelkaleal tami mongen mu (papeltunge Isaías 41:10). Feymu eymi rüf maneluwülmi ta Jewba kom tami piwke mu, fey “ka kidu norümaeymu chew tami miyawal” (Proverbios 3:5, 6).

20. Dew wülkünuel tami mongen Ngünechen mu, ¿chumngelu fentepuwlay tami wülkünuwün?

²⁰ Dew tami ngüneduamfiel kom tüfachi dungu, eluwimi tami wülkünual mi mongen kiñe ngillatun Chaw Jewba eymu.  Feymu kom tati rüf piwkeyefilu ta Ngünechen, müley ñi femal ka kiñe dungu: ‘Wüldungual tañi feyentulen fentren che ñi adkiñ mew’ (1 Timotew 6:12). ¿Chumngechi femngekey tüfa?

21, 22. ¿Chumngechi ‘wüldunguafuymi tami feyentulen fentren che ñi adkiñ mew’?

²¹ Ayülmi tami fawtisawal nütramkafinge tati adkünukelu ti trokiñ longkolelu tami trawünche mu. Kidu elfalkünuay kiñeke longkolelu ñi trawüal eymi engu, fey ñi ngüneduamal fillke ramtun doy duamfalngechi kimeltun Biblia mu. Feymu tüfachi pu longkolelu ngüneduamle engün tami pepikawkülen tami fawtisawal, fey feypingeaymi küpalechi fütra trawün mu femafuymi. * Fawtisawün mu, wülngekey kiñe wewpin ñi feypial chem am tüfachi falin dungu. Afchi wewpin mu, ti wewpife femkey epu ramtun pu küpa fawtisawlu mu, ka tüfa engün newentu dungun mu wiñoldungukeeyew. Femngechi ‘wüldungukey tañi feyentulen fentren che ñi adkiñ mew’.

²² Fawtisawün mu, pengelimi wülkünuel tami mongen Ngünechen mu, fey kiñe Dungukelu Iney Ngen Jewba ngerpuymi. Feymu pu küpa fawtisawlu ñamüntukungekey ko mew kom ñi kuerpu, femngechi pengelkey tati pu che ñi adkiñ mu, dew wülkünuel ñi mongen Chaw Jewba mu.

23. ¿Chem pifel am fawtisangeal Chaw tañi üy mew, Fotüm ka Ngünechen ñi newen mew?

²³ Jesus feypi tañi pu disipulo ñi fawtisangeal tañi Chaw ñi üy mew, Fotüm ka Ngünechen ñi newen mew (Matew 28:19). Tüfa feypi ti pu che fawtisangealu kimtukunieyngün Chaw Ngünechen Jewba ka Jesukristo ñi ngünenieel (Salmo 83:18; Matew 28:18). Kafey kimtukunieyngün Chaw Ngünechen tañi newen ñi femkeel (Galata 5:22, 23; 2 Pedro 1:21).

24, 25. a) ¿Chem pengeli ti fawtisawün mu? b)¿Chem ramtun müley taiñ wiñoldungual?

²⁴ Fawtisangeyüm ta che, tüfa kiñe falin dungu tati, re ñamüntukungekelay  müten ko mew. Feymu ñamüntukungelmi ko mew, tüfa pengeli “lalu” reke, elkünuymi tami kuyfi mongen. Fey tripatulu eymi ko mu, tüfa pengeli feychi antü mu mongeleymi tami femal Ngünechen ñi ayükeelchi dungu. Feymu müley tami tukulpayal ta Chaw Ngünechen Jewba mu müten wülkünuymi tami mongen, femlafimi tüfa kiñe küdaw mu, kiñe che ka kiñe trokiñche no rume. Femngechi wülimi tami mongen Ngünechen mu ka tami fawtisawün mu, eluwimi tami fülkonküleal Chaw Ngünechen mu ka tami doy weniyerpuafiel kidu (Salmo 25:14).

²⁵ Welu fawtisawün mu, montufemkelay ta che. Feymu Jesukristo feypi: “Welu kom tati newenkülelu Ngünechen ñi dungu mew tuntepule ñi mongen, fey ta montuay” (Matew 24:13). Fawtisawün mu, ellakonküley taiñ montual. Feymu llemay ramtuwiyiñ: ¿Chumngechi kiñewküleafuiñ ta Ngünechen ka müleafuiñ kidu ñi piwkeyen mu? Inalechi chillkatun mülelu tüfachi lifru mu wiñoldunguaeiñmew.