1. Mun na Etiopi kuntigi dɔ y’a ɲini ka batise?

“JI FILƐ, mun bɛ ne bali ka batise?” O ɲininkali kɛra san kɛmɛ fɔlɔ la, Etiopi kuntigi dɔ de fɛ. Krecɛn dɔ, min tun tɔgɔ ko Filipe, o y’a jira a la ko Yesu de tun ye Masiya kofɔlen ye. O Etiopika tun ye faamuyali min sɔrɔ Sɛbɛnniw kɔnɔ, o donna a la kosɛbɛ, k’a bila ka wale kɛ o yɔrɔnin bɛɛ la. A y’a fɔ ko a b’a fɛ ka batise.—Kɛwalew 8:26-36.

2. Mun na i ka kan ka miiri kosɛbɛ batɛmu ko la?

 ² Ni e ni Jehova Seere dɔ ye kalan kɛ koɲuman nin gafe tilayɔrɔba tɛmɛnenw kan, laala i y’a ye sisan ko i labɛnnen bɛ k’a fɔ ko: ‘Mun bɛ ne bali ka batise?’ Sisan i b’a dɔn ko Bibulu ye layidu ta ɲɛnamaya banbali ko la alijinɛ kɔnɔ. (Luka 23:43; Jirali 21:3, 4) Mɔgɔ salenw cogoya ye min ye tigitigi, ani jigiya min bɛ suw ye ka lakunun, i bɛ o fɛnw fana dɔn. (Waajulikɛla 9:5; Yuhana 5:28, 29) A ka ca a la ko i bɛ ka Jehova Seerew sirataama, u ka jɛkulu ka lajɛw la. U bɛ diinɛ lakika sirataama cogo min na, i yɛrɛ y’o ye. (Yuhana 13:35) Min nafa ka bon n’a bɛɛ ye, a ka c’a la ko i y’a daminɛ ka cɛsira don e yɛrɛ ni Jehova Ala cɛ. Nka min nafa ka bon kosɛbɛ, o ye ko sisan b’a sɔrɔ jɛɲɔgɔnya bɛ e ni Jehova Ala cɛ.

3. (a) Yesu ye ci jumɛn fɔ a ka kalandenw ye? (b) Ka batise ji la, o bɛ kɛ cogo jumɛn na?

³ I bɛ se k’a jira cogo jumɛn na ko i b’a fɛ ka baara kɛ Ala ye? Yesu y’a fɔ Krecɛnw ye ko: “A’ ye taa siyaw bɛɛ la ka u kɛ ne ka kalandenw ye, ka u batise.” (Anw de ye daɲɛw sɛbɛn k’a jɛgɛn; Matiyu 28:19) Yesu yɛrɛ ye misali jira an na a kɛlen ka batise ji la. U ma ji seri-seri a kan dɔrɔn, walima ka ji bɔn a kunkolo kan dɔrɔn. (Matiyu 3:16) Daɲɛ min ye ko “batɛmu,” o bɛ bɔ Gɛrɛkikan daɲɛ na min kɔrɔ ye k’a “su”. O la sa, Krecɛn batɛmu kɔrɔ ye ka mɔgɔ kuuru bɛɛ su siɲɛ kelen ji la.

4. Ka batise ji la, o bɛ mun de jira?

⁴ Mɔgɔ minnu b’a fɛ ka jɛɲɔgɔnya sira don olu ni Jehova Ala cɛ, a wajibiyalen bɛ olu bɛɛ ka batise. Batɛmu b’a jira kɛnɛ kan, mɔgɔ bɛɛ ɲɛ na, ko i b’a fɛ ka kɛ Ala ka baarakɛla ye. O b’a jira fana ko i b’a fɛ ka Jehova sago kɛ. (Zaburu 40:8, 9) Nka, walisa ka se ka batise, fo i ka fɛn dɔw de kɛ.

5. (a) I ka kan ka fɛn fɔlɔ jumɛn kɛ walisa ka se ka batise? (b) Mun na jɛkulu ka lajɛw nafa ka bon kosɛbɛ?

⁵ I ye fɛn fɔlɔ daminɛ ka ban. Cogo jumɛn na? I bɛ ka Bibulukalan kɛ walisa ka Jehova ni Yesu Krisita dɔn, laala Bibulukalan sababu fɛ min bolodala ka kɛ cogo basigilen ni cogo labɛnnen na. (Yuhana 17:3) Nka, fɛn caman wɛrɛ bɛ yen i ka kan ka minnu dɔn. Krecɛnw b’a fɛ ka “fa [Ala] sago dɔnniya la.” (Kolosekaw 1:9) N’i bɛ taa Jehova Seerew ka jɛkulu ka lajɛw la, o bɛna i dɛmɛ kosɛbɛ o sira la. (Heburuw 10:24, 25) N’i bɛ taa lajɛw la tuma bɛɛ, o bɛna i dɛmɛ ka caman fara i ka Ala dɔnniya kan.

6. I ka kan ka Bibulu dɔnniya hakɛ jumɛn sɔrɔ walisa i ka se ka batise?

⁶ A jɛlen don ko a ɲininen tɛ i fɛ i ka Bibulu kɔnɔ kuma bɛɛ dɔn i kun fɛ fɔlɔ ka sɔrɔ ka batise. Dɔnniya dɔ tun bɛ Etiopika la, nka a tun mago bɛ dɛmɛ na walisa ka Sɛbɛnniw yɔrɔ wɛrɛw faamu. (Kɛwalew 8:30, 31) O cogo kelen na, halibi fɛn caman bɛ yen i ka kan ka minnu dɔn. Nka, walisa ka dɔnniya sɔrɔ Ala ko la, i tɛna tila abada o kalan na. (Waajulikɛla 3:11) Nka, sani i ka batise, Bibulu kalansira minnu dɔnniya wajibiyalen don, i ka kan ka olu dɔn, ka sɔn olu la. (Heburuw 5:12) Misali la, mɔgɔ salenw cogoya ye min ye tigitigi ani nafa min bɛ Ala tɔgɔ n’a ka Masaya la, i ka kan k’o dɔn, ka sɔn o ma.

7. Bibulukalan ka kan ka mun kɛ i la?

⁷ Nka, dɔnniya dɔrɔn tɛ wasa kɛ, bawo “ni dannaya tɛ, mɔgɔ si ko tɛ se ka diya Ala ye.” (Heburuw 11:6) Bibulu b’a fɔ an ye ko tuma min na Kɔrɛnteka dɔw ye Yesu ka kalandenw ka waajuli kuma mɛn, u ye “dannaya kɛ ka batise.” (Kɛwalew 18:8) O cogo kelen na, Bibulukalan ka kan ka i fa dannaya la ko Bibulu ye Ala ka Kuma fyɛlen ye. Bibulukalan ka kan ka i dɛmɛ ka da Ala ka layidu talenw na, ani ka  da a la ko Yesu ka saraka bɛ se ka i kisi.—Josue 23:14; Kɛwalew 4:12; 2 Timote 3:16, 17.

8. Mun bɛna i bila ka kuma i ka fɛn kalannenw kan mɔgɔw ye?

⁸ Ni dannaya bɛ ka bonya i dusukun na, i bɛna a ye ko a ka gɛlɛn ko i kana kuma i ka fɛn kalannenw kan mɔgɔw ye. (Jeremi 20:9) Ka kuma Ala ni a sagonata kan mɔgɔw ye, o wale negeba bɛ don i la.—2 Kɔrɛntekaw 4:13.

9, 10. (a) Tiɲɛ minnu bɛ Bibulu kɔnɔ, i bɛ se ka fɔlɔ ka olu fɔ jɔni ye? (b) Waajulibaara min labɛnna Jehova Seerew fɛ, n’i b’a fɛ ka i sen don o la, i ka kan ka mun kɛ?

⁹ Tiɲɛ minnu bɛ Bibulu kɔnɔ, i bɛ se ka fɔlɔ ka olu fɔ i somɔgɔw ni i teriw ni i sigiɲɔgɔnw ni i baarakɛɲɔgɔnw ye. I ka o kɛ cogo la min b’a to i tɛ don u gasi la. Waajulibaara min labɛnna Jehova Seerew fɛ, a bɛna diya i ye kɔfɛ ka fara u kan o baara la. I kana siga k’o fɔ Jehova Seere ye min bɛ Bibulukalan kɛ i kun. Ni a yera ko i bɛ mankutuw dafa walisa ka kɛnɛkan cidenyabaara kɛ, fɛɛrɛ bɛna tigɛ walisa e ani i ka karamɔgɔ ani jɛkulu maakɔrɔ fila ka ɲɔgɔn ye.

¹⁰ O bɛn’a to i ka se ka Krecɛn diinɛ maakɔrɔ dɔw dɔn kosɛbɛ, minnu bɛ u janto Ala ka sagakulu la. (Kɛwalew 20:28; 1 Piɛrɛ 5:2, 3) Ni o maakɔrɔw y’a ye ko Bibulu kalansira minnu dɔnniya wajibiyalen don, i ye olu faamu ani ko i dalen bɛ olu la, ko i bɛ ka i ka ɲɛnamaya kɛ fana ka bɛn Ala ka sariyakolow ma ani ko i b’a fɛ tiɲɛ na ka kɛ Jehova Seere ye, u bɛna i ladɔnniya ko i bɛ mankutuw dafa walisa ka kɛnɛkan cidenyabaara kɛ i ko kibaru duman weleweledala min ma batise fɔlɔ.

11. Mɔgɔ dɔw ka kan ka yɛlɛma jumɛnw kɛ walisa ka se ka kɛnɛkan cidenyabaara kɛ?

¹¹ Nka, a bɛ se ka kɛ fana ko i ka kan ka yɛlɛma dɔw don i ka ɲɛnamaya kɛcogo la ani i delinako dɔw la walisa ka se ka kɛnɛkan cidenyabaara kɛ. O yɛlɛmaw bɛ se ka kɛ ko dɔw dabilali ye, i ye minnu dogolen to mɔgɔw la. O la sa, sani i  k’a ɲini ka kɛ weleweledala ye min ma batise, i man kan tun ka jurumubaw kɛ i n’a fɔ jɛnɛya, dɔlɔtɔya ani dɔrɔguta.—1 Kɔrɛntekaw 6:9, 10; Galasikaw 5:19-21.

12. Mun na nimisa ye ko ye min ka kan?

¹² I ka kan ka ko wɛrɛw kɛ walisa ka se ka batise. Ciden Paul ko: “A’ ye nimisa aw ka jurumuw la ka segin Ala ma walisa aw ka jurumuw ka jɔsi ka bɔ yen.” (Kɛwalew 3:19) Ka nimisa, o ye k’a jira tiɲɛ na ko i ye kojugu minnu kɛ, u kɛli ma diya i ye. A jɛlen don ko nimisa bɛnnen don ni mɔgɔ dɔ y’a ka ɲɛnamaya kɛ Ala ka sariya kansɔsɔli la. Nka, hali ni mɔgɔ dɔ y’a ka ɲɛnamaya kɛ jogoɲumanya kɔnɔ cogo dɔ la, a ka kan fana o tigi ka nimisa. Mun na? Bawo hadamadenw bɛɛ ye jurumutɔw ye, wa u bɛɛ mago b’a la Ala ka yafa u ka jurumuw ma. (Romɛkaw 3:23; 5:12) Sani i tun ka Bibulukalan kɛ, i tun t’a dɔn Ala sago ye min ye. O kosɔn, i tun bɛ se k’i ka ɲɛnamaya kɛ cogo jumɛn na walisa k’o bɛn tigitigi Ala sago ma? O la sa, nimisa ye ko de ye min ka kan.

13. N’a fɔra ko ka tuubi, o kɔrɔ ye mun ye?

¹³ I kɛlen kɔ ka nimisa i ka jurumuw na, i ka kan ka tuubi walima ka ‘segin Ala ma.’ I man kan ka dan nimisa dɔrɔn ma. I ka kan ka ban pewu i ka ɲɛnamaya kɛcogo kɔrɔ ma, wa i jɔlen ka kan ka to o kan tigitigi, ko k’a ta bi la, i bɛna tilennenya de sirataama kudayi. Nimisa ni tuubi ye kow ye i ka kan ka minnu kɛ sani i ka batise.

14. I ka kan ka ko nafama jumɛn kɛ sani i ka batise?

¹⁴ Ko nafama wɛrɛ bɛ yen i ka kan ka min kɛ sani i ka batise. O ye ka i yɛrɛbakun di Jehova Ala ma.

15, 16. Ka i yɛrɛbakun di Ala ma, o kɔrɔ ye mun ye? Mun bɛ mɔgɔ bila ka o kɛ?

¹⁵ N’i bɛ i yɛrɛbakun di Jehova Ala ma tuma min na, i bɛ delili sɛbɛ dɔ de kɛ min kɔnɔna na, i bɛ layidu ta Jehova ye  ko i bɛna ale kelenpe dɔrɔn de bato fo abada (Dutɛrɔnɔmɛ 6:15, NW). Nka, mun dun bɛ mɔgɔ dɔ bila k’a yɛrɛbakun di Jehova ma? An ka misali ta cɛ dɔ kan min ɲɛbɔra muso dɔ fɛ. Ni cɛ bɛ ka muso dɔn ka taa a fɛ ani k’a jogo ɲumanw dɔn fana ka taa a fɛ, muso ko bɛ diya a ye ka taa a fɛ. A bɛna se yɔrɔ dɔ la, a bɛna a ɲini o muso fɛ k’a furu, i ko a bɛnnen don cogo min na. Tiɲɛ don ko furu bɛna doni wɛrɛw bila a kunna. Nka, kanuya bɛna a bila ka o ko nafama kɛ.

¹⁶ N’i nana dɔnniya sɔrɔ Jehova ko la, ani k’a kanu, o bɛna i bila ka baara kɛ a ye k’a sɔrɔ i ma i tɔ to walima ka dan sigi a batoli la. Mɔgɔ o mɔgɔ b’a fɛ ka tugu Ala Denkɛ Yesu Krisita kɔ, o ka kan ka “ban a yɛrɛ la.” (Marka 8:34) Mɔgɔ bɛ ban a yɛrɛ la ni a b’a ka kow kɛ cogo la min b’a to a yɛrɛ kuntilennaw ni a nidungɔw t’a bali ka Ala kan minɛ cogo dafalen na. O la sa, sani i ka se ka batise, fɛn min ka kan ka kɛ i kuntilennaw bɛɛ la belebele ye i ka diɲɛlatigɛ kɔnɔ, o ye Ala sago kɛli de ye.—1 Piɛrɛ 4:2.

17. Mun na dɔw bɛ siga-siga ka u yɛrɛbakun di Ala ma?

¹⁷ Dɔw bɛ siga-siga ka u yɛrɛbakun di Jehova ma, bawo u bɛ siran ka u kun don o ko sɛbɛ sugu kɔrɔ. Olu bolo, ni u ye u yɛrɛbakun di Ala ma, u bɛ kɛ Krecen ye minnu ka kan k’u ka kɛwalew jate Ala ɲɛkɔrɔ, ni u ye kojugu dɔ kɛ. Ikomi u bɛ siran ka ko kɛ min man ɲi ani ka Jehova dusukasi, olu fɛ, a ka fisa u kana u yɛrɛbakun di Ala ma.

18. Mun de bɛ se k’i bila ka i yɛrɛbakun di Jehova ma?

¹⁸ Ikomi i bɛ k’a ɲini ka Jehova kanu, o bɛna i bila ka i yɛrɛbakun di a ma ani ka i seko damajira bɛɛ kɛ walisa ka i ka ɲɛnamaya kɛ ka bɛn o ma. (Waajulikɛla 5:3) I kɛlen kɔfɛ ka i yɛrɛbakun di Ala ma, siga t’a la ko i bɛna a ɲiɲi i ‘taama cogo ni Matigi [Jehova] cogo ka bɛn, ani . . . ka a diyaɲɛko kɛ tuma bɛɛ.’ (Kolosekaw 1:10) Ikomi i bɛ Ala kanu, i tɛna miiri ko a sago kɛli ka gɛlɛn kojugu. Siga t’a la  ko ciden Yuhana ye kuma min fɔ, i bɛna sɔn o ma. A ko: “Ka Ala kanu, o ye nin de ye, ka a ka ci fɔlenw mara. A ka ci fɔlenw man gɛlɛn.” (1 Yuhana 5:3)

19. Mun na i man kan ka siran k’i yɛrɛbakun di Ala ma?

¹⁹ A wajibiyalen tɛ i ma ko i ka kɛ mɔgɔ dafalen ye fɔlɔ, ka sɔrɔ k’i yɛrɛbakun di Ala ma. I dan ye min ye, Jehova bɛ o dɔn. A sigilen tɛ n’a ye abada ko i ka fɛn kɛ min bɛ tɛmɛ i seko kan. (Zaburu 103:14) A b’a fɛ i ka i yɛrɛbakun di a ma, wa a bɛna i kɔkɔrɔdon ani ka i dɛmɛ walisa i ka se k’o kɛ. (Esayi 41:10) I bɛ se ka da a la ko n’i ye i ka dannaya da a kan n’i dusukun bɛɛ ye, “a na i ka siraw labɛn.”—Ntalenw 3:5, 6.

20. K’i yɛrɛbakun di Jehova ma, mun na o dogolen tɛ se ka to?

²⁰ An tilatɔ filɛ nin ye ka kuma fɛn minnu kan, n’i miirila olu la, o bɛ se ka i dɛmɛ i ka i yɛrɛbakun di Jehova ma delili kɔnɔ. Mɔgɔ o mɔgɔ bɛ Ala kanu tiɲɛ na, o ka kan fana ka “jɔ a la a da la ka kisili sɔrɔ.” (Romɛkaw 10:10) I bɛ se ka o kɛ cogo di?

21, 22. I bɛ se ka jɔ i ka dannaya la i da la cogo jumɛn na?

²¹ I ka jɛkulu kɔnɔ, mɔgɔ min bɛ wele tubabukan na ko coordinateur du collège des anciens (maakɔrɔ min bɛ  maakɔrɔw ka baara labɛn jɛkulu kɔnɔ), i ka kan ka o ladɔnniya ko i b’a fɛ ka batise. A bɛna fɛɛrɛw tigɛ walisa e ni maakɔrɔ dɔw ka ɲininkali dɔw lajɛ ɲɔgɔn fɛ. O ɲininkaliw sinsinnen bɛ Bibulu kalansiraw kan minnu dɔnniya wajibiyalen don. Ni o maakɔrɔw y’a ye ko i bɛ mankutuw dafa, u bɛn’a fɔ i ye ko i bɛ se ka batise jamalajɛ nata la. * Tuma caman na, sani mɔgɔ ka batise, jɛmu dɔ de bɛ kɛ fɔlɔ min bɛ batɛmu kɔrɔ ɲɛfɔ. O jɛmu bantuma na, jɛmukɛbaga b’a ɲini batɛmu ɲinibagaw bɛɛ fɛ u ka ɲininkali nɔgɔman fila jaabi. U bɛ jaabi min di, o ye cogo dɔ ye min fɛ, u bɛ jɔ u ka dannaya la u da la.

²² Batɛmu de b’a jira kɛnɛ kan jama la, ko i ye mɔgɔ ye min y’a yɛrɛbakun di Ala ma ani ko i kɛra Jehova Seere ye sisan. Batɛmu ɲinibagaw fari bɛɛ bɛ su ji la siɲɛ kelen ka tunun pewu waati kunkurunnin kɔnɔ walisa k’a jira jama la ko u ye u yɛrɛbakun di Jehova ma.

23. Ka batise “Fa, ani Den ani hakili senu tɔgɔ la”, o kɔrɔ ye mun ye?

²³ Yesu y’a fɔ a ka kalandenw ye k’u ka mɔgɔw batise “Fa, ani Den, ani Hakili Senu tɔgɔ la.” (Mace 28:19, LK) O kɔrɔ ye ko mɔgɔ min bɛna batise, o tigi bɛ sɔn Jehova Ala ani Yesu Krisita la i ko a kuntigiw. (Zaburu 83:19, BS; Matiyu 28:18) Hakili senu ye Ala barika walekɛbaatɔ de ye. O la sa, ka batise hakili senu tɔgɔ la, o ye ka sɔn hakili senu jɔyɔrɔ n’a ka baara ma.—Galasikaw 5:22, 23; 2 Piɛrɛ 1:21.

24, 25. (a) Batɛmu ye mun taamasyɛn ye (b) Ɲininkali jumɛn ka kan ka jaabi?

²⁴ O la sa, batɛmu tɛ dɔrɔn ka mɔgɔ su ji la k’a bɔ. Batɛmu ye fɛn nafamaba dɔ de taamasyɛn ye. N’i tununnen bɛ  ji la tuma min na, o b’a jira ko i sara i ka ɲɛnamaya kɛcogo kɔrɔ ta fan fɛ. N’i tununnen bɔra ji la tuma min na, i bɔra ɲɛnamaya kura de kama, n’o ye ka Ala sago kɛ sisan. I kana ɲinɛ fana ko i ye i yɛrɛbakun di Jehova Ala yɛrɛ de ma. I ma o di baara dɔ kama, walima ko dɔ kosɔn, walima hadamadenw kama, walima tɔnba dɔ kosɔn. I ka yɛrɛbakun dili ani i ka batɛmu ye e ni Ala ka teriya sɛbɛ daminɛ de ye, n’o kɔrɔ ye ko ka jɛɲɔgɔnya ɲuman don i ni ale cɛ.—Zaburu 25:14.

²⁵ Batɛmu dɔrɔn t’a to mɔgɔ bɛ se ka kisi. Ciden Paul y’a sɛbɛn ko: “A’ ye aw kisili ko baara kɛ ni siran ni yɛrɛyɛrɛ ye.” (Filipekaw 2:12) Batɛmu ye ko dɔ daminɛ dɔrɔn de ye kisili kama. O bɛ na ni nin ɲininkali ye ko: I bɛ se ka to Ala ka kanuya la cogo jumɛn na? An ka gafe in tilayɔrɔba laban bɛna o jaabi.