1. Amu jé mon Éthiopien a nga sili mbaptizô?

“TAME yen! Mendim me ne va; jé je akame me me aye baptizôban?” Mon Ethiopien, beta évete njô bôt Candace, nye a nga sili nsili te ntete mimbu ôsusua. Éyoñe te Kristen é to jôé na Philippe é ndeme liti nye na Yésus a  mbe Messie be nga kak. Mbôle mam a nga yé’é, me so’o Mintilan, me nga nambe mon Éthiopien ate nlem, ane a nga tyi’i na a bo aval ane mam mete me né. Ane a nga jô na a yi na a duban!​—Mam minlôman 8:26-36.

2. Jé j’aliti na éyoñ é nto na ô fas ajô ya nduane nya mfasane?

² Nge ô nga tu’a yé’é bekabetôlô b’ ataté kalate nyi a Ngaa Yéhôva éziñ, ô tu’a fe wô’ô be, wo yiane bo ngule ya sili womiene na ‘Jé j’akamane ma na me bo te duban?’ Éyoñ ji, ô nga yeme na Kalate Zambe a kak ényiñe ya nnôm éto Paradis. (Luc 23:43; Nlitan 21:3, 4) Ô nga yeme fe vôme bewu be né, a ndi nleme ya ñwômane miñwuan. (Ecclésiaste 9:5; Jean 5:28, 29) Ô yianeya fe tabe bisulan a Bengaa be Yéhôva akônda dap, a womien ô yianeya fe yen a mise môé aval avé be ajalé mame ya nya nyebe. (Jean 13:35) Jame da dañe mfi é ne na, womien ô yianeya taté na wo yemete amvôé zañe mia Yéhôva Zambe.

3. (a) Abendé avé Yésus a nga ve bôte be mbe be tôñe nye? (b) Ndubane mendim wo bobane aya?

³ Aval avé ô ne liti na wo kômbô bo Zambe ésaé? Yésus a nga jô bôte be mbe be vô’ôlô nye na “Kelan, mi bo meyoñe mese beyé’é, a baptizô be.” (Matthieu 28:19) Yésus émien a nga li’i éve’ela amu a nga dubane mendim. Be nji miame nye mendime nyôl, nge ki e tolé nye bone metoé mendime nlô. (Matthieu 3:16) Éfia “mbaptizô” j’aso éfia Grek be akôñelane na e “du.” Nde ñhe, mbaptizô Bekristen wo tinane na e dubane mendim été a nyôl ése, nge ki e nyiine mendime si a nlô ôse.

4. Ndubane ya mendim wo tinane jé?

⁴ Ndubane mendim ô ne ñyiane bôte bese ba kômbô bo amvôé a Yéhôva Zambe b’ayiane jalé. Éyoñe wo dubane mendim bôt été, wo liti nkômban ô bili na wo bo Zambe ésaé. Wo liti fe na wo wô’ ava’a ya bo nkômbane Yéhôva. (Besam 40:7, 8) Ve jame da, asu na ô bo ngumba  nkômesan asu mbaptizô, wo yiane taté bo mam méziñ me ne wo mfi.

5. (a) Jam ôsu wo yiane taté bo asu na ô bo nkômesan asu nduban é ne avé? (b) Amu jé é ne mfi na ô ke bisulane Bengaa be Yéhôva?

⁵ Ô tatéya na wo bo jam ôsu. Aval avé? Amu wo yé’é yeme za a ne Yéhôva Zambe a Yésus Krist, a zene ya mban ayé’é Kalate Zambe mia Ngaa Yéhôva éziñ. (Jean 17:3) Ve mam mefe ô ne ngule ya yem me ne. Bekristen ba yi na be bo njalan a “ñyemane ya . . . nkômbane [Zambe].” (Becolossien 1:9) Wo ye yene beta mvolane mfa’a te nge wo ke ôsu a tabe bisulane Bengaa be Yéhôva. É ne beta mfi na ô ke ôsu a tabe bisulane bite. (Behébreu 10:24, 25) Mbane nkeane bisulan wo ye volô wo na ñyemane wo yeme Zambe ô ke ôsu a nañ.

6. Abime ñyemane ya Kalate Zambe avé wo yiane taté bi ôsusua na wo duban?

⁶ Ve é ne été na, ô vo’o taté yeme mam mese ya Kalate Zambe ôsusua na wo bo nkômesan asu nduan? Évete ya Éthiopie é mbe é bili abime ñyeman éziñ, ve a mbe a yi mvolan na a tu’a beta wô’ô mam mefe ya Mintilan. (Mam minlôman 8:30, 31) Avale te, wo fe ô ngenan ô bili abui mame ya yé’é. Ve mfubane njôan, wo ye ke télé môs éziñe na wo yé’é mam ma lat a Zambe. (Ecclésiaste 3:11) Ve da, ôsusua na wo duban, wo yiane taté yem, ô kañese fe mintene miñye’elane ya Kalate Zambe été. (Behébreu 5:12) Bi tame nyoñ éve’an, wo yiane yeme benya mejôô mfa’a ya bewu; mfi ya éyôlé Zambe a Éjôé jé.

7. Ayé’é Kalate Zambe da yiane tindi wo na ô bi jé?

⁷ Ve ñyeman étam ô nji yian, amu, “mbunane momo, môt a vo’o bo nya mvo’é mise me [Zambe].” (Behébreu 11:6) Kalate Zambe a kañete bia na, éyoñe bôte béziñe ya nnôm étisone ya Corinthe be nga wô’ô foé Bekristen, ane “be nga buni a baptizôban.” (Mam minlôman 18:8)  Avale te fe, ayé’é Kalate Zambe é ne volô wo na ô bi mbunane na a ne fo’o Mejô me ne nsoane be Zambe. Ayé’é Kalate Zambe d’ aye fe volô wo na ô bi mbunan mfa’a mengaka’a me Zambe, a na metuna’a me Yésus me ne ngule ya nyii wo.​—Josué 23:14; Mam minlôman 4:12; 2 Timothée 3:16, 17.

8. Jé j’ aye tindi wo na ô kañete bôte bevo’o mam ô yé’éya?

⁸ Avale mbunane wo nañe nleme wôé été, avale te fe mam mese wo yé’é ma ye bo wo adite nlem nge wo ba’ale me fo’o ve asu dôé étam. (Jérémie 20:9) Wo ye bi édo’o nkômbane ya kañete bôte bevo’o mam wo yeme mfa’a Zambe a nsôñane wé.​—2 Becorinthien 4:13.

9, 10. (a) Ô ne taté na wo kañete za benya mejôô ya Kalate Zambe? (b) Jé ô ne bo nge wo kômbô nyoñe ngap nkañetane mbamba foé a Bengaa be Yéhôva?

⁹ Ô ne taté na wo kañete benya mejôô ya Kalate Zambe e be bivuvumane biôé, bemvôé bôé, bôte ba nyiñe wo mefefel a bôte mia be be mia saé vôme wua. Melu ma zu ô ne jalé ñyiane ya kañete mbamba foé a nsamba Bengaa be Yéhôva. Éyoñe te nje, te ko woñe ya sili môt a bo wo ayé’é ya Kalate Zambe na ô nga kômbô kui nkañete. Nge d’akui na ô nto ngule ya kui nkañete, bemvendé bebaé ya akônda ba ye bo ékôan a wo. Môt a ye’ele wo mejô me Zambe fe a ye tabe.

¹⁰ Nde nkômbane te wo ye volô wo na ô kôme yeme bemvendé ya akônda, bôte ba ba’ale mbam mintômba Zambe. (Mam minlôman 20:28; 1 Pierre 5:2, 3) Nge bemvendé ba yene na wo wôk a buni mintene miñye’elane ya Kalate Zambe, na wo nyiñ aval ane metiñe me Zambe me a liti, a na wo kômbô fo’o bo Ngaa Yéhôva, b’aye kate wo na ô nto ngule ya ke nkañete ane nkañete mbamba foé a ngenane te duban.

11. Mam mevé me bôte béziñ ba yiane taté jô’é ôsusua na ba kañete mbamba foé?

 ¹¹ Bemvendé be ne viane yene na, wo yiane taté tyendé abo dulu dôé a mefulu môé asu na ô bo ngule ya taté a nkeane nkañete. Nalé a tinane na e telé mame méziñe wo too ô bo’o asoé. Ve ôsusua na wo sili na ô nga kômbô bo nkañete mbamba foé a ngenane te duban, wo yiane taté jô’é minsem mi adañe ngul, bebé ane mvite mboane mame ya bisôk, nso’ane meyok, bebé ane nyuane ta’a a biôm bife.​—1 Becorinthien 6:9, 10; Begalate 5:19-21.

12. Amu jé njôban ô ne mfi?

¹² Ôsusua na wo duban wo yiane fe bo mam mefe. Nlômane Pierre a nga jô na: “[jôba’an, a kôñela’ane minlem, NW], nde mam abé menan me aye bo ngule ya vas.” (Mam minlôman 3:19) E jôban, a ne e singi abé ô nga bo. Njôbane wo sili fo’o asu môt a nga nyiñ mvite été, ve wo sili fe asu môt a nga nyiñ abo da kindik, da avo’ éngas. Amu jé? Amu na bôte bese be nga bo abé; a bese ba yiane bi njamane mam abé ô so’o be Zambe. (Beromain 3:23; 5:12) Ôsusua na wo yé’é Kalate Zambe, ô mbe teke yeme nkômbane Zambe. Nde aval avé ô mbe ngule ya bo nkômbane wé? Ajô te, njôban ô ne mfi.

13. Jé é ne nkôñelane nlem?

¹³ Éyoñ ô maneya jôban, wo yiane kôñelane nlem. Ô nji yiane singi ve nsingan, wo yiane fe jô’é nnôm ényiñ ô mbe ô bili a jeñ a ngul ése na ô nyiñ avale da yian ataté éyoñe ji. Njôban a nkôñelane nlem be ne mam wo yiane taté bo ôsusua na wo duban.

14. Jé é ne mfi ya bo ôsusua na ô duban?

¹⁴ Jam afe é ne mfi ôsusua na ô duban. Wo yiane ve womiene ngumba be Yéhôva Zambe.

15, 16. E ve womiene be Zambe a tinane jé, a jé ja tindi môte na a bo de?

 ¹⁵ Éyoñe wo ve womiene be Yéhôva Zambe meye’elane môé été, wo ka’a nye na wo ve ényiñe jôé ése asu na ô bo fo’o ve nkômbane wé. Ve jé é ne tindi môte na a bo avale ngaka’a te? Asu na bi bi éyalane ya nsili te bi ne nyoñe mon éve’an: tame simesane na fam ja bo minga éziñ ayas. Nté ôse a ye laan a nye a yeme mbamba mefulu mé, nne fe édiñe ja ye nañe nalé. Avale melu ma lôt, é kômbô jeñe na a ke nsili aluk. Nya ajô a ne na, aluk da ye so nye mimbe’e mife. Ve édiñ a diñe minga ate ja ye tindi nye a nyoñe beta ntyi’an ate.

¹⁶ Éyoñe bia yé’é yem a nye’e Yéhôva, nleme wongane wo tindi bia na bi bo nye ésaé teke nné. Môt ase a kômbô tôñe Yésus Krist, Mone Zambe, a yiane ‘nyum émiene mam.’ (Marc 8:34) Môt a nyum émiene mam éyoñ a bo na minkômbane mié a minsôñane mié mi bo te tindi nye na a kate bo Zambe mewôk avale da yian. Nde ñhe, ôsusua na wo duban, ntene nsôñane ya ényiñe jôé wo yiane bo na ô bo nkômbane Yéhôva Zambe.​—1 Pierre 4:2.

17. Amu jé bôte ba dutu mebo si éyoñe ba jô be na be ve bebiene be Zambe?

¹⁷ Bôte bevo’o ba dutu mebo si éyoñe ba jô be na be ve bebiene be Yéhôva; amu ba ko woñe ya kobetan mvuse ya valé. Be ne ko woñe na mbôle be ntoo Bekristen, nge ba bo nsem, ba ye yalane mise me Zambe. Nde mfa’a wop, asu na be bo te sôé Yéhôva ôsone nyôl, mvo’é é ne na be bo te ve bebiene be Zambe.

18. Jé é ne tindi wo na ô ve womiene be Yéhôva?

¹⁸ Éyoñ wo yé’é nye’e Yéhôva, wo ye bi nkômbane ya ve womiene be nye a bo jam ése da sili na ényiñe jôé é tôban a ngaka’a ô nga bo. (Ecclésiaste 5:4) Éyoñ ô veya womiene be nye, wo ye kômbô “wulu avale de a  yiane be Tate [Yéhôva], aval ése a nye’e.” (Becolossien 1:10) Amu nye’an wo nye’e Zambe, wo ye bo te yene na é ne ayaé ya bo nkômbane wé. Teke bisô, wo ye kañese jame nlômane Jean a nga tili na: “Amu jame dina nde é ne nye’ane Zambe, ane bi aba’ale metiñ: a metiñe mé me nji bo adit.”​—1 Jean 5:3.

19. Amu jé ô nji yiane ko woñe ya ve womiene be Zambe?

¹⁹ É nji sili na ô bo teke nsem asu na ô ve womiene be Zambe. Yéhôva a yeme minné miangan, a a nji jô na bi bo mam alôté abim bi bili ngule ya bo. (Besam 103:14) A yi na ô dañe minju’u miôé, a émien a ye su’u wo a volô wo. (Ésaïe 41:10) Tuka’a yeme na, nge ô tabe mebun a  nye a nleme wôé ôse, “a ye sôane mezene môé.”​—Minkana 3:5, 6.

20. Amu jé mveane biabebiene be Yéhôva ô nji yiane bo jame da yiane tabe nsolan?

²⁰ E fase mam bi ndeme mane yene ma a ye volô wo na ô ve womiene be Yéhôva a zene ya meye’elan. Môt ase a nye’e Zambe a yiane bo “mmeman wo atoteban anyu  [mengana bôt été] mfa’a ya ényiñ.” (Beromain 10:10) Nne ô ne bo mmemane wo atoteban anyu mengana bôt été aya?

21, 22. Nne ô ne bo “mmemane wo atoteban anyu [mengana bôt été]” asu mbunane wé aya?

²¹ Kate mvendé ja ta’a mame bemvendé ya akônda dôé, na wo kômbô duban. A ye jô abim bemvendé éziñ be zu beta yene minsili ya mintene miñye’elan ya Kalate Zambe a wo. Nge bemvendé bete ba yene na ô nto ngule ya duban, b’ aye jô wo na wo ye duban assemblé a zu. * Assemblé ate, ba ye bo mba’alane mesikôt a ve atinane ya mbaptizô. Môt a bo mesikôt a ye jô bôte ba te zu dubane na be yalane minsili mibaé. Nalé ate nye ba ye bo “mmemane wo atoteban anyu [mengana bôt été]” asu mbunane wop.

²² A ne mbaptizô ôbien ñwô wo liti mengana bôt été na, ô nto nyi a nga ve émiene be Zambe; a na ô nto éyoñe te ngaa Yéhôva. Be wô’ô fo’o dupe môt a te zu dubane mendim été, a liti bôt été na a veya émiene be Yéhôva.

23. E dubane “jôé Ésa a Mon a mbamba nsisim” a tinan aya?

²³ Yésus a nga jô na beyé’é bé b’ aye dubane “jôé Ésa a Mon a mbamba nsisim.” (Matthieu 28:19) Nalé a tinane na nyô a ke nyoñe mbaptizô, a yemelan éto Yéhôva Zambe, a éto Yésus Krist. (Besam 83:18; Matthieu 28:18) A yemelane fe ésaé mbamba nsisim, nge ngul Zambe a bo je mam.​—Begalate 5:22, 23; 2 Pierre 1:21.

24, 25. (a) Nduan ô ne ndeme ya jé? (b) Nsili ôvé wo yi éyalan?

²⁴ Ve jame da nduban ô nji bo zezé mewoban. A ne ndeme ya jôm é ne mfi abui. E ke dubane mendim été a  tinane na ‘ô wuya’, nge na ô jô’éya aval ényiñ ô nga to ô nyiñi ôsusua. E kui mendime yôp a tinane na, ô nyiñeya na wo zu bo nkômbane Zambe. Simesa’ane fe na ô nga ve womiene be Yéhôva Zambe émien, sa ke amu ésaé éziñ, nge môt éziñ, nge ékôan éziñ. Mveane womien, a nduan bi ne atata’a ya beta amvôé mia Zambe​—édo’o amvôé mia Zambe.​—Besam 25:14.

²⁵ Nduan ô nji ve bia ndi nleme na bi nyiñeya. Yésus a nga jô na: “Môt aye jibi akekui melu ya asu’ulan, nnye a ye yen ényiñ.” (Matthieu 24:13) Nduan ô ne fo’o ve, atata’a abo dulu ya nyiban. Asu na bi nyoñ ényiñe Zambe a ve, bia yiane ‘ba’ale biabebiene nye’ane Zambe été.’ (Jude 21) Nalé a tinan aya? Nne ô ne ba’ale womien aya nye’ane Zambe été? Kabetôlô a su’ulan e kalate nyi a ye yalane nsili te.