1. Ka uagu lamuriaha wügüri etiopíana lun labadiseirun?

“ANIHÁNTIA duna, siñati san nabadiseirun?”, liña lálügüdahan aban wügüri wéiriguti le nadagimeinbei luma urúei etiopíana lidan furumiñeti sígulu. Sun liña larufuduni aban  kristiánu gíriti Felipe lun tidan Bíbülia luagu Hesusu lan Mesíasibei le füramase waalibei. Hanarimeti taweiridun lanigi wügüri ligía luagu le lafurendeirubei darí lun lamuriahan labadiseirun (Adügaü 8:26-36).

2. Ka uagu lunti lubéi hasaminarun luagun badisei lau seriu?

² Anhein aturiaha humaali lubéi kapítulu burí le lubaragiñebei le luma aban gefenti luagu Heowá, gayarati giñe sandigua humá hungua aransedün lan lun hálügüdahan: “Siñati san nabadiseirun?”. Furendei humaali füramase tan Bíbülia habagariduba lan gürigia lidan Paraísu lun súnwandan (Sálumu 37:29; Arufudúni 21:3, 4). Subudi humaali giñe inarüni hawagu hilaaña luma emenigini luagu águyuguni (Apurichihati 9:5; Huan 5:28, 29). Másiñati barühadün lan fiú dan adamuridagua hama gefentiña luagu Heowá ani ariha humaali winwan hamani relihión le inarüniti (Huan 13:35). Le súdinitimabei, gayarati gumesedün lan adüga aban lubuidun umadaguaü luma Heowá Bungiu.

3. a) Ka gumadi líchugubei Hesusu houn lani disipulugu? b) Ida liña ladügǘn badisei kristiánu?

³ Ida luba harufuduni busén humá heseriwidun lun Bungiu? Ariñagati meha Hesusu houn ha afalarubalin: “Heiba lubeiti habügürü gürigia ha lílana sun fulasu adüga humaña nánime disipulugu; badisei humaña” (Matéu 28:19). Hesusu íchugubalin hénpulu woun, lugundun badiseiti giñe. Gama lumoun, mama bahiwarügüti ni sewarügüti duna lábulugun (Matéu 3:16). Dimurei badisei lídangiñe güriegu liabin, mini lan “abulucha dúnarugun”. Ligíati, adügǘwati badisei le hani kristiánu lau habuluchún gürigia dúnarugun sunsuinagubei.

4. Ka warufudubei dan le wabadiseirun?

⁴ Sun ha busenbaña aban umadaguaü buiti luma Heowá mosu habadiseirun. Dan le labadiseirun gürigia, arufuda lumuti hagibugiñe amu busén lan leseriwidun lun Bungiu ani gunda lan lau lagunfuliruni lugundan (Sálumu 40:7, 8). Lubá habadiseirún mosu híchugun fiú pasu.

5. a) Ka san furumiñetibei pasu lun gayara lan habadiseirun? b) Ka uagu súdini lubéi adamuridaguni hani kristiánu?

⁵ Gumesedün íchigei furumiñeti pasu. Ida? Lau hasubudiruni Heowá Bungiu luma Hesukrístu, gayaraati lau lan külase tídangiñeti Bíbülia (aliiha huméi Huan 17:3). Gama lumoun, gayarati hafurendeirun lanwoun. Busentiña kristiánugu lun “lasubudiragüdüni [Bungiu] lugundan hun buidu” (Kolosana 1:9). Gayarati líderagunün hadamuridagun gefentiña luagu Heowá saragu. Ligía súdini lubéi meferidirun humá ni aban lídangiñe (Ebüréu 10:24, 25). Anhaün abasiha lidoun adamuridaguni buídutimabei hasubudiruni Bungiu.

6. Átiriñein katei lunti hasubudiruni tuagu Bíbülia lun gayara lan habadiseirun?

⁶ Furanguti mama lan mosu hafurendeirunu sun Bíbülia lubá gayara lan habadiseirun. Subuditi meha somu katei lun etiopíana tídangiñe Bíbülia, ani mégeigiliha ídemuei lun gunfuranda lani (Adügaü 8:30, 31). Ítarameme, anihagua saragu katei lunti hafurendeiruni. Le linarün aban katei, magumubei hafurendeirun luagu Bungiu (Apurichihati 3:11). Gama lumoun, lun gayara lan habadiseirun mosu hasubudiruni ani anha hugíame lun arufudahani méiniti le tídanbei Bíbülia (Ebüréu 5:12). Mosu hasubudiruni ka lan asuseredubei houn hilaaña ani ka lan uagu súdini lubéi liri Bungiu luma Larúeihan.

7. Ka lunbei hadügüni dan le haturiahanu Bíbülia?

⁷ Úati buídurügü lan subudi, lugundun “siñati lagundaarun Bungiu wau anhein mafiñen wabéi luagu” (Ebüréu 11:6). Abahüdaguatu Bíbülia luagu le hadügübei fiú lílana binadu uburugu Korintu: dan le haganbunbalin le hapurichihabei kristiánugu, “aba giñe hafiñerun, badiseiwa hagía” (Adügaü 18:8). Lunti lagurabahouniwa ligiaméme lan asusereda hun. Dan le haturiahanu Bíbülia lunti hafiñerun sunsuinagubei luagu Lererun lan Bungiu. Lunti giñe hafiñerun lagunfulirubei  lan Bungiu sun lani füramasei ani gayara lan lesefuruniwa seremei lani Hesusu sákürifisiu (Hosué 23:14; Adügaü 4:12; 2 Timotéu 3:16, 17).

8. Kaba ínchahadün lun hadimurehan luagu le furendei humaalibei?

⁸ Eibume laweiridun hafiñen, hénrengutimabei hun hamanichun lau le furendei humaalibei (Heremíasi 20:9). Hasandiruba busén humá hadimurehan houn amu luagu Bungiu luma lisuuni (aliiha huméi 2 Korintuna 4:13).

9, 10. a) Ka burí san un gayara lan hagumeserun adimureha luagu inarüni le tídanbei Bíbülia? b) Ka lunbei hadügüni anhein busén hubéi hapurichihan lidan aransehani le hadügübei gefentiña luagu Heowá?

⁹ Gayarati hatatirun adimureha luagu inarüni tídangiñeti Bíbülia lau inebesei houn hiduheñu, humadagu, hubesinanigu hama hánigu paaná lidan wadagimanu. Lau lásügürün dan, gayarabei busén humá hapurichihan hama gefentiña luagu Heowá. Danme lachülürün dan ligía, libürelá hasandiragun hungua lun hadimurehan luma Gefenti le arufudahabei hun tuagu Bíbülia. Anhein lariha gúnfuli humá lau le mégeiwabei lun háfuridun apurichiha, ladügüba lun hóundaragun hugía biángubei hama bián wéiyaaña lidan damuriguaü.

¹⁰ Ítara, hasubudiruba fiú wéiyaaña lidan afiñeni, hóuniri lumutuniña Bungiu (Adügaü 20:28; 1 Féduru 5:2, 3). Harihibei anhein gunfuranda hubalin arufudahani méiniti le tídanbei Bíbülia afiñe hugía luagu, anhein hawinwanduña lubéi según lilurudun Bungiu, busén hugía tídangiñe sun hanigi lun aban huma gefenti luagu Heowá. Anhein ítara liña lubéi, hariñagubei hun gúnfuli humá lau le mégeiwabei lun aban humá apurichihati uganu buiti le mabadiseirungili, lun gayara lan hapurichihan hagibugiñe gürigia.

11. Ka burí san asansiruni lunbei hadügüni gürigia lun gayara lan háfuridun apurichiha?

 ¹¹ Anihein dan mégei lan gürigia ladügün fiú asansiruni lidan libagari lun gayara lan lapurichihan. Másiñati, mosu lan hígirun somu échuni le meha hakipurubei aramudañu. Ligíati, lubaragiñe hamuriahan hiridún kei apurichihati le mabadiseirungili, mosu haruma lan habagaridun luéi figóu le hanarimeburiti keiburi magíaguni, bacharuaü luma tayusurún düroga (aliiha huméi 1 Korintuna 6:9, 10; Galasiana 5:19-21).

12. Ka uagu mosu lubéi hasakürihan?

¹² Lubá habadiseirun mosu giñe híchugun amu burí pasu. Ariñagati apostolu Féduru: “Asaküriha humá; giribu huguyame [...] chibawa láamuga hifigoun” (Adügaü 3:19). Dan le lasakürihan aban gürigia lau linarün, wuribati lasandiragun lungua. Mámarügüñanu gürigia ha anügübaña aban ibagari lánina magíaguni lun hasakürihan, íbini giñe ha maweirinbei liwiye hanügüni habagari. Ka uagu? Ladüga súngubei wagía gafigountiwa ani mégei wamuti ferudun lúmagiñe Bungiu (Rómana 3:23; 5:12). Lubaragiñe haturiahanu Bíbülia ibidiñeti meha hun ka lan lugundanbei Bungiu. Ligíati, siñati meha hanügün aban ibagari le úarati luma lugundan Bungiu, adián? Kei harihini mégeiwati asakürihani.

13. Ka asansirunibei?

¹³ Lárigiñe asakürihani liabin asansiruni. Dan le hasansirun aba hígiruni binadu hémeri. Mama wuribarügüti hasandiragun hungua luagu le meha hadügübei, ígira humuti binadu hibagari. Mosu desidírü humá hadügüni le buidubei lúmagiñe oura ligía lun lubaruaguoun. Asakürihani luma asansiruni mosu hadügüni lubaragiñe habadiseirun.

14. Ka amu pasu súdiniti lunbei híchuguni lubaragiñe habadiseirun?

¹⁴ Anihein amu pasu súdiniti lun híchuguni lubaragiñe habadiseirun: hederegeragun hungua lun Heowá Bungiu.

15, 16. Ka mini lubéi ederegeraguni unguaü lun Bungiu ani kaba ínchahawa lun wadügüni?

 ¹⁵ Ederegeraguni unguaü, ligía aban furiei tídangiñe sun wanigi le idanbei füramase wamá lun Heowá lúnrügüba lan weseriwida (2 Lúrudu 6:15). Kaba uagu labusenra aban gürigia ladügün aban daradu ítarati? Samina wamá luagun aban wügüri le adarihati aban würi. Eibume lasubudirunu ani arihalei lubuidun tigaburi, abantima tínsiñedun lun. Darí lun lachülürün dan lun lamuriahan tuma lun hamarieidun. Íbini gíbetimabei lan lani buligasion, ínsiñeni le lasandirubei tuagu adügati lun líchuguni pasu súdiniti le.

¹⁶ Dan le wasubudiruni Heowá hínsiñe ligía woun, línchahabadiwa ínsiñeni ligía lun weseriwidun lun sunsuinagubei ani míchutiwa lebeha wahuduragun lun. Le busenti lasigiruni Hesukrístu, le Liráü Bungiu, mosu ‘labulieiduni káteiñein lan’ (Márükosu 8:34). Buliei wamuti katañadiwa lan dan le mígirun wamá lun leberesehani wayumahan luma le wasaminarubei wadügün, waganbadi lun Bungiu. Lubaragiñe habadiseirun, mosu ru humaali lan ladügǘn lugundan Heowá kei le méinitimabei lidan hibagari (aliiha huméi 1 Féduru 4:2).

17. Ka uagu ua lubéi desidírü hamá fiú gürigia hederegeragun houngua lun Bungiu?

¹⁷ Añahein gürigia úati desidírü hamá hederegeragun houngua lun Heowá ladüga hanufude híchuguni pasu sériuti le. Háfuga hanufudetiña luéi mosu lan híchugun fe lun Bungiu luagu le hadügübei kei kristiánu ha deregeguaña houngua lun. Saminatiñu gayara lan hachararun ani barü hagía magundani lun Heowá, ligía lan buitima lubéi mederegeragun hamá houngua lun.

18. Kaba ánhigichoun hanigi lun hederegeragun hungua lun Heowá?

¹⁸ Eibume lahulilidun ínsiñeni le hasandirubei luagu Heowá, lánhigichuboun hanigi lun hederegeragun hungua lun,  luma lun háfaagun lun hagunfulirun lau füramasei le (Apurichihati 5:4). Lárigiñe hederegeragun hungua chóuruti busenbadün lan “hagaburidun keisi lunti lan hagaburidun lánigu Wabureme, adügei le aubei lagundaara súnwandan” (Kolosana 1:10). Ínsiñeni luagu Bungiu ladügüba lun ménrengun lan harihini hagunfulirun lau le labusenrubei. Chóuruti úara humá luma le lariñagubei apostolu Huan: “Ladügǘniwa le lubeibei Bungiu, ligía ínsiñehabunibei lun; ani ménrenguti lagunfulirúniwa lugumadin” (1 Huan 5:3).

19. Ka uagu moun lumuti lubéi hanufudedun hederegeragun hungua lun Bungiu?

¹⁹ Mama mosu mafigoun lan gürigia le ederegeragubei lungua lun Bungiu. Subudi lumuti Heowá leben katei le wayaarabei adüga ani maweiyasunti aguraba lun wadügün lóugiñe  (Sálumu 103:14). Líchugubei sun lídehan hun ladüga busenti lun buidu lan lidin hun lidan hibagari (aliiha huméi Isaíasi 41:10). Chouru huméi anhadün lan afiñera luagu Heowá tau sun hanigi, “lanügübadün luéigiñe üma le surubei” (Ariñawagúni 3:5, 6).

20. Lárigiñe hederegeragun hungua lun Heowá, ka uagu mosu lubéi hasubudiragüdüni houn sun gürigia?

²⁰ Dan le hasaminarun luagu le akutiha wamaalibei, gayarati desidírü humá hederegeragun hungua lun Heowá  lau aban furíei. Sun ha hínsiñehabubaña lun Bungiu tídangiñe sun hanigi, mosu hasubudiragüdüni houn sun gürigia le desidírü habéi (Rómana 10:10). Ida liña ladügǘn le?

21, 22. Ida liña gayara lan hasubudiragüdüni hafiñen houn sun gürigia?

²¹ Ariñaga humá lun aransehati hawadigimari wéiyaaña lidan damuriguaü busen humá habadiseirun. Ladügüba lun háguyuguagüdüni fiú wéiyaaña álügüdahani burí luáguti arufudahani méiniti le tídanbei Bíbülia huma. Anhaña ariha gúnfuli humá lau le megeiwabei, hariñagubei hun gayara lan habadiseirun lidan leweñegua adamurini. * Dan le ladügǘn badisei ruati aban yanu le ídanbei lafuranguagüdawa le mini lubéi. Lárigiñe agunbiraha lumutiña le íchugubalin yanu ha lunbaña habadiseirun, lun hóunabun bián álügüdahani sensiyuti. Ítara liña hasubudiragüdüni hafiñen houn sun gürigia.

²² Badisei arufudubalin deregeguadün lan hungua lun Bungiu ani abanhadün lan gefenti luagu Heowá. Ha lunbaña habadiseirun bulugudawatiña dúnarugun lun harufuduni hagibugiñe gürigia deregeguaña lan houngua lun Heowá.

23. Ka mini lubéi badisei ‘lidan liri Bungiu Úguchili, liri Irahü, luma liri sífiri sandu’?

²³ Ariñagati Hesusu habadiseiruba lan lani disipulugu ‘lidan liri Bungiu Úguchili, liri Irahü, luma liri sífiri sandu’ (Matéu 28:19). Mini lan le subudi hamani ha lunbaña habadiseirun lilurudun Heowá luma Hesukrístu (Sálumu 83:18; Matéu 28:18). Subudi hamuti giñe luadigimari lani Bungiu sífiri sandu o erei gabafuti (Galasiana 5:22, 23; 2 Féduru 1:21).

24, 25. a) Ka lani sínbolu badisei? b) Ka álügüdahani lunbei lounabún?

²⁴ Mámarügü abuluchuni dúnarugun badiseibei. Aban  sínbolu súdiniti. Dan le habuluchún dúnarugun, aban sínbolu luagu “hilá humá”, o ígira humaali binadu higaburi. Ani dan le háfuridun dúnarugugiñe, arufudati lúmagiñe lan oura ligía hawinwanduña lun hadügüni lugundan Bungiu. Haritagua humá lun lan Heowá Bungiu hederegeragua hungua, mama lun aban wadagimanu, aban gürigia o lun aban oundaruni. Hederegeragun hungua luma habadiseirun, ligía lagumesehabei aban umadaguaü buiti luma Bungiu (Sálumu 25:14).

²⁵ Machoururun lumuti badisei asalbaruni. Ariñagati Hesukrístu: “Le áfaaguti darí lumoun lagumuhóun, ligíaba asalbara” (Matéu 24:13). Badisei lagumeseharügüñein. Guento gayarati wálügüdahan, ida luba san wasigirun yarafa lun Bungiu, ani redei wagíame lidan línsiñehabu? Lóunabubei lagumuhóun kapítulu.