1. ¿Achike ruma ri jun samajel pa Etiopía xubʼij chi nrajoʼ nqasäx pa yaʼ?

¡TATZʼETAʼ! «Waweʼ kʼo yaʼ. ¿La kʼo ta kami ri nbʼanon chwe chi [...] man ta ütz [...] yibʼan bautizar?», xchaʼ jun achin ri xsamäj pa qʼatbʼäl tzij pa Etiopía, pa kiqʼij kan  ri apóstoles. Ri Felipe, jun runimanel ri Jesús, kʼa riʼ ok tuqʼalajrisaj qa chuwäch rikʼin ri Ruchʼabʼäl ri Dios, chi ja ri Jesús ri Mesías bʼin pe. Ri achin kan xqa chuwäch ri xretamaj, ruma riʼ xubʼij chi nrajoʼ nqasäx pa yaʼ (Hechos 8:26-36, CO).

2. ¿Achike ruma ütz chik nayaʼ rikʼin awanima ri yaqasäx pa yaʼ?

² We rat atijon pe awiʼ rikʼin jun ruqʼalajrisanel ri Jehová chi rij re wuj reʼ, rikʼin bʼaʼ rat chuqaʼ nanaʼ chi yatikïr chik nabʼij: «¿Kʼo ta kami jun nbʼanon chwe chi man ütz ta yibʼan bautizar?». Awetaman chik chi ri Biblia nubʼij chi ri winäq xkekʼojeʼ chuwäch ri Kotzʼijaläj Ulew (Salmo 37:11; Apocalipsis 21:3, 4). Chuqaʼ awetaman chik achike kibʼanon ri kaminaqiʼ chuqaʼ chi xkekʼasöx (Eclesiastés 9:5; Juan 5:28, 29). Chuqaʼ rikʼin bʼaʼ kʼïy yan mul kabʼe pa kimolojriʼïl ri ruqʼalajrisanelaʼ ri Jehová chuqaʼ atzʼeton chi rijeʼ e kʼo chupam ri qitzij religión (Juan 13:35). Man xa xe ta riʼ, rat xatikirisaj yan ri awachibʼilanïk rikʼin ri Jehová.

3. a) ¿Achike xubʼij ri Jesús chi ke ri rutzeqelibʼey? b) ¿Achike rubʼanik yeqasäx pa yaʼ runimanelaʼ ri Jesús?

³ ¿Achike rubʼanik nakʼüt chi nawajoʼ nabʼän ri nrajoʼ ri Jehová? Ri Jesús xubʼij chi ke ri rutzeqelibʼey: «Kixbʼiyin [...] ronojel re ruwachʼulew, keʼitijoj kʼa ri winäq» richin yeʼok nutzeqelibʼey chuqaʼ «keʼibʼanaʼ kʼa bautizar» (Mateo 28:19, CO). Chi rij reʼ kan ja ri Jesús xyaʼon kan ri tzʼetbʼäl, rijaʼ xqasäx pa yaʼ. Rijaʼ man choj ta xkiräx o xyaʼöx yaʼ pa ruwiʼ (Mateo 3:16, CO). Ri tzij bautizar petenäq chi rij jun tzij griego ri nubʼij «jumul njuʼüx qa pa yaʼ». Ruma riʼ toq ri runimanelaʼ ri Jesús yeqasäx pa yaʼ jumul yejuʼüx qa.

4. ¿Achike nukʼüt jun winäq toq nqasäx pa yaʼ?

⁴ Konojel ri nkajoʼ yeʼok rachibʼil ri Jehová kʼo chi yeqasäx pa yaʼ. Toq jun winäq nqasäx pa yaʼ, nukʼüt chi qitzij  nrajoʼ ri Dios chuqaʼ nkikot nubʼän ri nqa chuwäch rijaʼ (Salmo 40:7, 8). Ja kʼa, richin yaqasäx pa yaʼ kʼo najowatäj chi nabʼän.

5. a) ¿Achike nabʼey kʼo chi nabʼän richin yaqasäx pa yaʼ? b) ¿Achike ruma kʼo rejqalem yabʼe pa molojriʼïl?

⁵ Ri nabʼey, ja ri nkʼojeʼ awetamabʼal. Rat xatikirisaj yan retamaxik ruwäch ri Jehová chuqaʼ ri Jesús, rikʼin bʼaʼ rikʼin jun tijonïk chi rij ri Biblia (tasikʼij Juan 17:3). Ri etamabʼäl man nkʼis ta raqän. Ri qitzij taq nimanelaʼ nkajoʼ chi ri Jehová nuyaʼ «ronojel naʼoj y etamabʼäl» chi ke chi rij ri nrajoʼ rijaʼ pa kiwiʼ ri winäq (Colosenses 1:9). Ri kimolojriʼïl ri ruqʼalajrisanelaʼ ri Jehová yojkitoʼ richin nqabʼän riʼ. Ruma riʼ kʼo rejqalem ri yojbʼe (Hebreos 10:24, 25). We rat yabʼe ronojel molojriʼïl xtawetamaj más ruwäch ri Dios.

6. ¿Nkʼatzin nawetamaj ronojel ri nubʼij ri Biblia richin yaqasäx pa yaʼ?

⁶ Richin yaqasäx pa yaʼ man nkʼatzin ta nawetamaj ronojel rupam ri Biblia. Ri achin aj Etiopía kʼo wi retamabʼal chi rij ri Ruchʼabʼäl ri Dios, stapeʼ ke riʼ, rijaʼ kʼo tanaj ri kʼa xqʼalajrisäx na chuwäch (Hechos 8:30, 31). Rat chuqaʼ kʼa kʼïy na achike kʼo chi nawetamaj. Ri etamabʼäl chi rij ri Dios majun xtkʼis ta (Eclesiastés 3:11). Richin yaqasäx pa yaʼ xa xe nkʼatzin nawetamaj chuqaʼ nanimaj ri nabʼey taq naʼoj ri yerukʼüt ri Biblia (Hebreos 5:12). Achiʼel ri rubʼiʼ ri Dios, ri Rajawaren chuqaʼ ri kibʼanon ri kaminaqiʼ.

7. Toq natijoj awiʼ chi rij ri Biblia, ¿achike kʼo ta chi nkʼojeʼ awikʼin?

⁷ Ja kʼa man xa xe ta etamabʼäl nkʼatzin, «we manäq ri kuqubʼabʼäl kʼuʼx qikʼin, ri Dios man xtkikot ta ri ranima qikʼin» (Hebreos 11:6). Ri Biblia nubʼij chi ri ojer kan, e kʼo jujun winäq aj Corinto ‹xkinimaj ri Jesucristo toq xkakʼaxaj ruchʼabʼäl ri Dios. Y kan xebʼan kʼa chuqaʼ bautizar›  (Hechos 18:8, CO). Rikʼin bʼaʼ ja riʼ chuqaʼ xtabʼän rat. Toq natijoj awiʼ chi rij ri Biblia kʼo ta chi nkʼojeʼ akuqubʼabʼäl kʼuʼx, chi ri Biblia kan Ruchʼabʼäl wi ri Dios. Chuqaʼ kʼo ta chi nakuqubʼaʼ akʼuʼx chi ri Dios xtubʼän ri rusujun chuqaʼ chi xkaruköl ruma ri Jesús xuyaʼ rukʼaslem pa kamïk (Josué 23:14; Hechos 4:12; 2 Timoteo 3:16, 17).

8. ¿Achike xtbʼanon chawe chi xtawajoʼ xtatzijoj ri awetaman?

⁸ Toq nkʼiyïr ri akuqubʼabʼäl kʼuʼx man yatikïr ta nawewaj ri awetaman (Jeremías 20:9). Xtawajoʼ xtatzijoj ri Dios chuqaʼ ri nrajoʼ rijaʼ pa qawiʼ (tasikʼij 2 Corintios 4:13).

9, 10. a) ¿Achoj chi ke ütz natikirisaj rutzijoxik ri Biblia? b) ¿Achike nabʼän we nawajoʼ natzijoj ri Biblia?

⁹ Richin natikirisaj, pa rubʼeyal tatzijoj ri Biblia chi ke ri awachʼalal, awachibʼil pa samaj o ri a-vecinos. Ke riʼ jun qʼij xtawajoʼ xtatzijoj ri Biblia junan kikʼin ri ruqʼalajrisanelaʼ ri Jehová. Toq rat xtawajoʼ xtabʼän riʼ, tatzijoj chi re ri nyaʼon atijonïk. We rijaʼ xtutzʼët chi abʼanon chik ronojel ri najowatäj richin natzijoj ri Biblia, xtkanöx rubʼanik chi kaʼiʼ ukʼwäy taq bʼey pa congregación xketzijon iwikʼin.

¹⁰ Ke riʼ xtawetamaj más kiwäch ri ukʼwäy taq bʼey, ri yekitijoj ri rusamajelaʼ ri Jehová (Hechos 20:28; 1 Pedro 5:2, 3). Rijeʼ xtkitzʼët we nqʼax chawäch ri nukʼüt ri Biblia, we nanimaj ri nubʼij, we abʼanon chi re ri akʼaslem achiʼel nrajoʼ ri Dios, chuqaʼ we qitzij nawajoʼ yatok ruqʼalajrisanel ri Jehová. We rijeʼ xtkitzʼët chi ronojel ütz rubʼanon, xtkibʼij chawe chi ütz chik natzijoj ri Biblia stapeʼ majani kaqasäx ta pa yaʼ.

11. ¿Achike najowatäj richin yatikïr yatok publicador?

¹¹ Kʼo mul ri ukʼwäy taq bʼey nkitzʼët chi ri winäq nkʼatzin chi nujäl na ri rukʼaslem richin ntikïr nutzijoj ri Biblia. Rikʼin bʼaʼ kʼo na chi nuyaʼ kan jun bʼanobʼäl ri nubʼän pa ewatäl. Ruma riʼ richin yatok publicador nkʼatzin  nakʼwaj jun chʼajchʼöj kʼaslem. Man yaqʼabʼär ta, man yeʼabʼän ta tzʼiläj taq bʼanobʼäl chuqaʼ man natïj ta drogas (tasikʼij 1 Corintios 6:9, 10; Gálatas 5:19-21).

12. ¿Achike ruma nkʼatzin ntzolin pe qakʼuʼx?

¹² Richin yaqasäx pa yaʼ kʼo más najowatäj. Ri apóstol Pedro xubʼij: «Titzolij kʼa pe ikʼuʼx rikʼin ri Dios, y tjalatäj ri ikʼaslem, richin ke riʼ nkuyutäj y nsachatäj ri imak» (Hechos 3:19). Toq jun winäq qitzij ntzolin pe rukʼuʼx, nqʼaxon ranima ruma ri mak xubʼän. Ja kʼa man xa xe ta ri kibʼanon pe tzʼil taq bʼanobʼäl ri kʼo chi ntzolin pe kikʼuʼx, chuqaʼ ri kikʼwan jun chʼajchʼöj kʼaslem. ¿Achike ruma? Ruma qonojel oj ajmakiʼ y nkʼatzin chi ri Dios yojruküy (Romanos 3:23; 5:12). Toq majani tatijoj awiʼ chi rij ri Biblia, majun wi awetaman ta achike nrajoʼ ri Dios chi nabʼän. Chuqaʼ man awetaman ta nabʼän chi re ri akʼaslem achiʼel nrajoʼ rijaʼ. Ruma riʼ kan nkʼatzin wi chi ntzolin pe akʼuʼx.

13. ¿Achike nel chi tzij ri najäl akʼaslem?

¹³ Toq ntzolin pe akʼuʼx nkʼatzin chuqaʼ najäl rubʼanik ri akʼaslem. Reʼ man choj ta nqʼaxon awanima rikʼin ri abʼanon pe, kʼo chi nayaʼ kan ri itzel taq bʼanobʼäl abʼanon pe. Ke riʼ nayaʼ rikʼin awanima chi xtakʼwaj jun kʼakʼaʼ kʼaslem chuwäch ri Dios. Richin yaqasäx pa yaʼ nabʼey kʼo chi ntzolin pe akʼuʼx chuqaʼ najäl ri akʼaslem.

14. ¿Achike chik jun najowatäj richin yaqasäx pa yaʼ?

¹⁴ Jun chik ri najowatäj richin yaqasäx pa yaʼ ja ri najäch awiʼ pa ruqʼaʼ ri Jehová.

15, 16. ¿Achike ri najäch awiʼ pa ruqʼaʼ ri Jehová, chuqaʼ achike nbʼanon chi nqajoʼ nqabʼän riʼ?

¹⁵ Ri najäch awiʼ pa ruqʼaʼ ri Jehová, nel chi tzij, chi rikʼin  jun chʼonïk nabʼij chi re ri Jehová chi xa xe rijaʼ xtayaʼ ruqʼij ronojel ri akʼaslem (Deuteronomio 6:15). ¿Achike ruma nrajoʼ jun winäq nupabʼaʼ riʼ nubʼän reʼ? Reʼ achiʼel toq jun alaʼ nubʼij chi re jun xtän chi nrajoʼ nchʼon chi reʼ. Toq más xttzijon rikʼin ri xtän chuqaʼ toq más xtretamaj ruwäch, xtbʼe más ranima chi rij. Ke riʼ jun qʼij xtubʼij na wi chi re chi nrajoʼ nkʼuleʼ rikʼin. Qitzij na wi, toq xtkʼuleʼ, kʼïy samaj xtpe pa ruwiʼ. Ja kʼa ruma ri rajowabʼäl chi rij ri xtän, xtkʼuleʼ na wi rikʼin.

¹⁶ Toq nqetamaj ruwäch ri Jehová chuqaʼ nkʼiyïr ri qajowabʼäl chi rij, nqajoʼ nqabʼän ri nrajoʼ rijaʼ chuqaʼ rikʼin ronojel qanima nqajoʼ nqayaʼ ruqʼij. Ri winäq ri nrajoʼ nok rutzeqelibʼey ri Jesucristo nkʼatzin chi man «nubʼän ta chik ri nurayij» rijaʼ (Marcos 8:34, CO). Nqakʼüt chi man nqabʼän ta chik ri nqajoʼ röj, toq nqabʼän ri nrajoʼ ri Dios. Ruma riʼ nabʼey nayaʼ rikʼin awanima chi xtabʼän chi jun akʼaslem ri nrajoʼ ri Dios, kʼa riʼ xkaqasäx pa yaʼ (tasikʼij 1 Pedro 4:2).

17. ¿Achike ruma e kʼo winäq man nkijäch ta kiʼ pa ruqʼaʼ ri Jehová?

¹⁷ E kʼïy winäq nkixibʼij kiʼ nkijäch kiʼ pa ruqʼaʼ ri Jehová, ruma ketaman chi riʼ man choj ta jun etzʼanem. Nkixibʼij kiʼ ruma kʼo chi xtkijäch chuwäch ri Dios ri achike xtkibʼän pa kikʼaslem. Nkinaʼ chi rikʼin bʼaʼ xkebʼemakun pe, ruma riʼ nkibʼij chi xa ütz choj ke riʼ kibʼanon.

18. ¿Achike xtbʼanon chawe chi xtajäch awiʼ pa ruqʼaʼ ri Jehová?

¹⁸ Toq más xtawajoʼ ri Jehová, xtubʼän chawe chi xtawajoʼ xtajäch awiʼ pa ruqʼaʼ chuqaʼ chi xtabʼän rikʼin ronojel awanima ri xtasüj chi re (Eclesiastés 5:4). Toq xajäch yan awiʼ pa ruqʼaʼ ri Jehová xtawajoʼ na wi ‹xtakʼwaj jun kʼaslem ri nqa chuwäch› rijaʼ (Colosenses 1:10). Ri awajowabʼäl chi rij ri Dios xtubʼän chawe chi man kʼayew ta  xtanaʼ xtabʼän ri nrajoʼ rijaʼ. Ri apóstol Juan xubʼij: «We kan nqajoʼ ri Dios, kʼo chi nqataqej ri nubʼij chi qe. Reʼ xa man kʼayew ta richin nqabʼän» (1 Juan 5:3).

19. ¿Achike ruma man ütz ta chi rat naxibʼij awiʼ najäch awiʼ pa ruqʼaʼ ri Jehová?

¹⁹ Ri Jehová man yerukanoj ta winäq ri majun kimak ta richin nkijäch kiʼ pa ruqʼaʼ. Rijaʼ retaman achike yojtikïr nqabʼän, ruma riʼ man nukʼutuj ta ri retaman rijaʼ chi man yojtikïr ta nqabʼän (Salmo 103:14). Ri Jehová kan xkarutoʼ wi, ruma nrajoʼ chi rat ütz yabʼe pa akʼaslem (tasikʼij Isaías 41:10). Tkʼojeʼ kʼa pa awanima chi toq nakuqubʼaʼ akʼuʼx rikʼin, ‹rijaʼ xtukʼwan ri abʼey chupam ri akʼaslem› (Proverbios 3:5, 6).

20. Toq xajäch yan awiʼ pa ruqʼaʼ ri Dios, ¿achike más kʼo chi nabʼän?

²⁰ Rikʼin ronojel ri qabʼin pe, rikʼin bʼaʼ xtawajoʼ xtabʼän jun chʼonïk richin xtabʼij chi re ri Jehová pa ayonil chi xtajäch awiʼ pa ruqʼaʼ. Konojel ri qitzij nkajoʼ ri Dios kʼo chi nkiqʼalajrisaj rikʼin ri kichiʼ chi kiniman rijaʼ (Hebreos 13:15). ¿Achike rubʼanik nkibʼän riʼ?

21, 22. ¿Achike rubʼanik naqʼalajrisaj ri akuqubʼabʼäl kʼuʼx?

²¹ Tabʼij chi re ri coordinador kichin ri ukʼwäy taq bʼey  pa congregación chi nawajoʼ yaqasäx pa yaʼ. Rijaʼ xtubʼij kʼa chi ke ri más ukʼwäy taq bʼey chi tkibʼanaʼ kʼutunïk chawe chi rij ri nabʼey taq naʼoj ri nukʼüt ri Biblia. We rijeʼ xtkitzʼët chi ronojel ütz rubʼanon, xtkibʼij chawe chi xkaqasäx pa yaʼ chupam ri nimamolojriʼïl xtbʼan yan apo. * Chupam ri nimamolojriʼïl riʼ, xtyaʼöx jun tzijonem ri xtuqʼalajrisaj achike nukʼambʼej tzij ri yaqasäx pa yaʼ. Pa rukʼisibʼäl chi re ri tzijonem, ri tzijonel xtubʼän kaʼiʼ kʼutunïk chi ke ri xkeqasäx pa yaʼ. Rijeʼ rikʼin nïm kichʼabʼäl xtkitzolij apo ruwäch ri kʼutunïk. Ja riʼ jun rubʼanik nkiqʼalajrisaj rikʼin kichiʼ ri kikuqubʼabʼäl kʼuʼx.

²² Ri yaqasäx pa yaʼ nukʼüt chi xajäch yan awiʼ pa ruqʼaʼ ri Jehová, chuqaʼ chi wakami xatok ruqʼalajrisanel ri Jehová. Ri yeqasäx pa yaʼ jumul yejuʼüx qa richin nkikʼüt chi xkijäch yan kiʼ pa ruqʼaʼ ri Jehová.

23. ¿Achike nel chi tzij ri yaqasäx pa yaʼ pa rubʼiʼ ri Dios, pa rubʼiʼ ri Kʼajolaxel chuqaʼ pa rubʼiʼ ri loqʼoläj espíritu?

²³ Ri Jesús xubʼij chi ri rutzeqelibʼey xkeqasäx pa yaʼ «pa rubʼiʼ ri Dios Tataʼixel, pa nubʼiʼ rïn ri Kʼajolaxel y pa rubʼiʼ ri Loqʼoläj Espíritu» (Mateo 28:19). Reʼ nel chi tzij chi ri yeqasäx pa yaʼ nqʼax chi kiwäch chi xa xe ri Jehová kʼo más ruqʼij chuqaʼ achike rusamaj ri Jesús (Salmo 83:18; Mateo 28:18). Y nqʼax chi kiwäch achike rubʼanik nukusaj ri Jehová ri loqʼoläj ruchuqʼaʼ (Gálatas 5:22, 23; 2 Pedro 1:21).

24, 25. a) ¿Achike nel chi tzij yaqasäx pa yaʼ? b) ¿Achike kʼutunïk xtyaʼöx apo ruqʼalajrisaxik?

²⁴ Ri yaqasäx pa yaʼ man choj ta achiʼel ri yatatin, reʼ kʼo rejqalem. Ri yajuʼüx qa pa yaʼ achiʼel ta «yakäm», nel chi  tzij, nayaʼ kan rubʼanik ri akʼaslem abʼanon pe. Ja kʼa toq yatel pe chuxeʼ ri yaʼ nubʼij chi yakʼaseʼ chik pe richin nabʼän ri nrajoʼ ri Dios. Majun bʼey tamestaj chi rat pa ruqʼaʼ ri Jehová xajäch wi awiʼ, man pa ruqʼaʼ ta jun winäq, jun samaj o jun moloj. Ri awachibʼilanik rikʼin ri Jehová ntikïr el toq najäch awiʼ pa ruqʼaʼ chuqaʼ toq yaqasäx pa yaʼ (Job 29:4).

²⁵ Man ruma ta yaqasäx pa yaʼ xachʼäk yan ri akolotajik. Ri apóstol Pablo xubʼij: «Titijaʼ iqʼij chi rij ri kolotajïk, y kan tixibʼij kʼa iwiʼ chi yixmakun chuwäch ri Dios» (Filipenses 2:12, CO). Ri yaqasäx pa yaʼ ja riʼ ri rutikirisabʼäl ri xtabʼän apo pa akʼaslem. Wakami nel pe re kʼutunïk reʼ: ¿Achike rubʼanik yojkʼojeʼ pa rajowabʼäl ri Dios? Ri rukʼisibʼäl tanaj chi re re wuj reʼ xtuqʼalajrisaj chi qawäch.