1. Pwata ei néúwisin Itiopia a tingor pwe epwe papatais?

“NENGENI, a wor koluk ikei! Met a epeti ai üpwe papatais?” Lón fansoun ekkewe aposel, emén néúwisin Itiopia a eáni ena kapas eis. Emén Chón Kraist itan Filip a fen ánneta ngeni ewe re Itiopia pwe Jesus, i ewe Messaia mi pwonetiw. A chúng letipen ena re Itiopia ren minne a káé seni Paipel, iwe a mochen epwe papatais.​—Föför 8:26-36.

2. Met popun kopwele ekieki usun papatais?

² Ika ka fen káéfichi ekkewe sópwun me mwen ei ren álillisin emén Chón Pwáraatá Jiowa, eli kopwe eis: ‘Itá met a pinei ai upwe papatais?’ Iei ka fen silei án Paipel we pwon usun manaw esemuch lón Paratis. (Lukas 23:43; Pwärätä 21:3, 4) Ka pwal weweiti enletin napanapen ekkewe mi máló me  ewe ápilúkúlúkún manawsefál. (Än Salomon Afalafal 9:5; Johannes 5:28, 29) Neman ka fiffiti án Chón Pwáraatá Jiowa kewe mwich me kúna ifa usun ra féfféri féfférún ewe lamalam mi enlet. (Johannes 13:35) Nge ewe a kon lamot, ese mwáál a fen poputá óm ririéch ngeni Jiowa Kot.

3. (a) Met Jesus a allúkú ngeni néún kewe chón káé? (b) Ifa napanapen án Chón Kraist papatais?

³ Ifa usun kopwe pwári pwe ka mochen angang ngeni Kot? Jesus a ereni néún kewe chón káé: “Oupwe feila o asoulängala chon ekewe mwü meinisin, oupwe papataisiir.” (Mateus 28:19) Jesus a isetiw eú leenien áppirú ren an papatais lón konik. Nge sap minne emén a ninatiw are osupwusupwatiw konik wóón mékúran. (Markus 1:10) Ewe kapas “papatais” a popu seni eú kapasen Krik mi wewe ngeni “otuetiw.” Ina minne, papatais me ren Chón Kraist a wewe ngeni án aramas unusen mwootiw are kokoló lón konik.

4. Met papatais lón konik a pwári?

⁴ Meinisin mi mochen riri ngeni Jiowa Kot repwe papatais lón konik. Óm papatais a pwár ngeni aramas pwe ka mochen angang ngeni Jiowa me pwapwa le féfféri letipan. (Kölfel 40:7, 8) Iwe nge, mi wor fitu mettóch kopwe féri pwe kopwe fich ngeni papatais.

5. (a) Ifa ewe áeúin mettóch kopwe féri pwe kopwe fich ngeni papatais? (b) Pwata a lamot án Chón Kraist kewe mwich?

⁵ Iei ka fen poputá le féri ewe áeúin mettóch. Ifa  usun? Ren óm sissileeló Jiowa Kot me Jesus Kraist, neman pokiten eú kókkótun káéén Paipel. (Álleani Johannes 17:3.) Nge a chúen wor chómmóng mettóch ka tongeni káé. Chón Kraist ra mochen ar repwe ‘ur ren ar sinei letipen [Kot].’ (Kolose 1:9, TF) Óm fiffiti án Chón Pwáraatá Jiowa kewe mwich epwe fókkun álisuk le féri ena mettóch. A lamot kopwe fiffiti ekkena mwich. (Ipru 10:24, 25) Óm fiffiti mwich epwe álisuk le alapaaló óm silei Kot.

6. Epwe ifa úkúkún óm silei Paipel pwe kopwe fich ngeni papatais?

⁶ Nge esap weween pwe kopwe silei mettóch meinisin lón Paipel fán iten óm kopwe fich ngeni papatais. Ewe néúwisin Itiopia a mwaren wor an sile nge a lamot ngeni álillis pwe epwe tufichin weweiti ekkóch kinikin lón án Kot we Kapas. (Föför 8:30, 31) Iwe, a chúen wor chómmóng mettóch  kopwe pwal káé. Ese fókkun wor lemuchún óm kákkáé usun Kot. (Än Salomon Afalafal 3:11) Iwe nge, me mwen kopwe papatais, a lamot kopwe silei me áchiféúa ekkewe afalafalen lepopun lón Paipel. (Ipru 5:12) Áwewe chék, kopwe silei me lúkú lamoten iten Kot we me an we Mwú me pwal ewe enlet usun napanapen ekkewe mi máló.

7. Ifa usun óm kákkáé Paipel epwe álisuk?

⁷ Iwe nge, ese chék naf sile pún “esap wor eman a tongeni apwapwai Kot are esap wor an lükü.” (Ipru 11:6) Paipel a apasa pwe lupwen ekkóch aramasen Korint lóóm ra rong án Chón Kraist afalafal, ra lúkú o papatais. (Föför 18:8) Epwe itá pwal ina chék usum, óm kákkáé Paipel epwe apéchékkúlaló óm lúkú pwe ina ewe Kapasen Kot. Epwe pwal álisuk le lúkú án Kot kewe pwon me án Jesus amanawók ren an we asoren méén kepich.​—Josua 23:14; Föför 4:12; 2 Timoty 3:16, 17.

8. Met epwe amwékútuk le kakkapas ngeni aramas usun minne ka fen káé?

⁸ Atun óm lúkú a mámmááritá lón letipom, a weires ngonuk óm kosap apwóróusa minne ka fen káé. (Jeremaia 20:9) Iwe, óm lúkú epwe fókkun amwékútuk le kakkapas usun Kot me minne a tipeni.​—Álleani 2 Korint 4:13.

9, 10. (a) Ié kewe kopwe tongeni poputá le kapas ngeniir usun ekkewe pwóróus mi enlet lón Paipel? (b) Met kopwe féri ika ka mochen fiti án Chón Pwáraatá Jiowa kókkótun angangen afalafal?

⁹ Neman ka tongeni poputá ren óm kapas fán  súfél ngeni márárum, chienom, chón órum me chienom kewe chón angang usun ekkewe pwóróus mi enlet lón Paipel. Mwirin och fansoun, kopwe mochen fiti án Chón Pwáraatá Jiowa kókkótun angangen afalafal. Iwe, lón ena atun, kopwe ereni ewe mi wisen káé ngonuk. Ika usun nge ka fich ngeni óm kopwe fiti ewe angangen afalafal, epwe wor kókkót fán itom me ewe a wisen káé ngonuk pwe oupwe mwich me rúúemén mwán mi ásimaw lón ewe mwichefel.

¹⁰ Ena epwe atufichiuk pwe kopwe sissilei ekkóch mwán mi ásimaw mi wisen mammasa néún Kot kewe aramas. (Föför 20:28; 1 Petrus 5:2, 3) Ika ra kúna pwe ka weweiti me lúkú ekkewe popun afalafal lón Paipel, ka fen etipeeú manawom ngeni án Kot kewe allúk me ka wesewesen tipeni óm kopwe emén Chón Pwáraatá Jiowa, iwe repwe esile ngonuk pwe ka tongeni fiti ewe angangen afalafal usun chón afalafal esaamwo papatais.

11. Met sókkun siwil ekkóch mi mochen fiti ewe angangen afalafal repwe féri?

¹¹ Iwe nge, eli a lamot óm kopwe siwili ekkóch féfférum pwe kopwe fich ngeni ewe angangen afalafal. Áwewe chék, eli mei wor ekkóch féffér ka fen túkúmi seni aramas nge a lamot kopwe úkútiw seni. Ina minne, kopwe limeliméch seni tipis watte, áwewe chék, lisowumwáál, únnúpuch me úkkún sáfei mi efeiengaw me mwen kopwe eis ika mi fich ngonuk le wiliti chón afalafal esaamwo  papatais.​—Álleani 1 Korint 6:9, 10; Kalatia 5:19-21.

12. Pwata a lamot aier?

¹² Kopwe féri pwal ekkóch mettóch me mwen kopwe fich ngeni papatais. Iei alon ewe aposel Petrus: “Oupwe aier o kullusefal, pwe epwe tolu senikemi ami kewe tipis.” (Föför 3:19, TF) Aier a wewe ngeni ach wesewesen niamamesini och mettóch sia fen féri. Iwe, a ffat pwe mi fich án emén epwe aier ika a ngaw manawan nge a pwal lamot aier inaamwo ika a usun itá nge a eáni manaw mi liméch. Pwata? Pún aramas meinisin chón tipis, iwe a lamot pwe Kot epwe omusaaló tipisiir. (Rom 3:23; 5:12) Me mwen óm káé Paipel, kese mwo silei letipen Kot. Iwe, itá epwe ifa usun ka tongeni unusen etipeeúfengeni manawom ngeni letipan? Ina popun aier a lamot.

13. Met weween kulsefál?

¹³ Mwirin án emén aier, epwe kulsefál. Ese naf óm kopwe chék niamam. Nge kopwe pwal likitaló napanapom me lóóm me tipeppós le féri minne mi pwúng lón lusun ránin manawom. Kopwe aier me kulsefál me mwen óm kopwe papatais.

14. Ifa ewe mettóch mi lamot kopwe féri me mwen kopwe papatais?

¹⁴ A wor pwal eú mettóch mi lamot kopwe féri me mwen óm kopwe papatais. Kopwe fangóló manawom ngeni Jiowa Kot.

15, 16. Met weween óm kopwe fangóló manawom ngeni Kot? Met a amwékútú emén le féri ena?

 ¹⁵ Atun ka fangóló manawom ngeni Jiowa Kot lón iótek seni letipom, ka pwon pwe kopwe fel ngeni me angang ngeni i chék tori feilfeiló. (Tuteronomi 6:15) Iwe nge, met popun emén epwe mochen wiliti néún Kot chón angang? Iei eú kapas áwewe. Lupwen emén alúwél a sani emén fépwúl, an sissileeló neminna me kúna napanapan kewe mi múrinné, epwe alapaaló an sani. Mwirin och fansoun, epwe tingor pwe repwe pwúpwúlú. Pwúngún, epwe chómmóngóló wisen ena alúwél ika epwe pwúpwúlú. Nge, epwe chék féri pokiten an tong.

¹⁶ Iwe, atun kopwe sileeló me tongei Jiowa, kosap amwéchú och seni are aúkúkú óm angang ngeni. Ié a mochen tapweló mwirin Néún Kot we, Jesus Kraist, epwe “pölükü manauan.” (Markus 8:34) Sia pennúkú manawach ren ach túmúnú pwe minne sia tipeni me achocho ngeni esap eppeti ach álleasochisi Kot lón mettóch meinisin. Ina minne, me mwen óm kopwe papatais, a lamot pwe óm féfféri letipen Jiowa Kot epwe ina populapen manawom.​—Álleani 1 Petrus 4:2.

17. Pwata ekkóch ra tipemwaramwar le fangóló manawer ngeni Kot?

¹⁷ Ekkóch ra tipemwaramwar le fangóló manawer ngeni Jiowa pún ra niwokkus le féri ena mettóch mi aúchea. Ra niwokkus le etittin mwen mesen Kot usun emén Chón Kraist mi fangóló  manawan. Ra niwokkus le elichippúngú Jiowa ika rese apwénúetá wiser. Ina popun, ra ekieki pwe epwe fen éch resap fangóló manawer ngeni Kot.

18. Met epwe amwékútuk le fangóló manawom ngeni Jiowa?

¹⁸ Óm alapaaló óm tongei Jiowa epwe amwékútuk pwe kopwe fangóló manawom ngeni me achocho le apwénúetá wisom. (Än Salomon Afalafal 5:4) Mwirin óm fangóló manawom, kopwe tipeni le ‘manaueni eu manau mi fich ngeni ach Samol o kopwe föri mine epwe pwapwa ren.’ (Kolose 1:10) Pokiten ka tongei Kot, kese ekieki pwe a fókkun weires óm féfféri letipan. Kopwe tipeeú ngeni alon ewe aposel Johannes ei mi erá: “Pun wewen ach echeni Kot pwe sia aleasochisi an kewe allük. Nge an kewe allük resap weires ngenikich.”​—1 Johannes 5:3.

19. Pwata itá kosap niwokkus le fangóló manawom ngeni Kot?

¹⁹ Kosap ekieki pwe óm fangóló manawom ngeni Kot a alóngólóng wóón unuséchum. Jiowa a silei aúkúkún óm tufich, iwe esap kútta sonuk minne kese tufichin féri. (Kölfel 103:14) A mochen kopwe sópwéch, iwe epwe atufichiuk me álisuk. (Álleani Aisea 41:10.) Ika kopwe lúkú Jiowa ren unusen letipom, iwe “epwe aiti ngonuk ewe al mi pwüng.”​—Än Salomon Fos 3:5, 6.

20. Pwata án emén fangóló manawan ngeni Jiowa esap monomonoló?

²⁰ Óm ekieki ekkena mettóch sia kerán káé  epwe álisuk le fangóló manawom ngeni Jiowa lón iótek. Meinisin mi enletin tongei Kot repwe pwal ‘pwarata ren auer’ o kúna manaw. (Rom 10:10, TF) Ifa usun kopwe féri ena?

21, 22. Ifa usun kopwe ‘pwarata ren auom’ óm lúkú?

²¹ Kopwe ereni ewe chón akkót lón ewe kúmiin mwán mi ásimaw lón óm mwichefel pwe ka mochen papatais. Iwe, epwe akkóta pwe ekkóch mwán mi ásimaw repwe eisinuk ekkóch kapas eis  usun ekkewe afalafalen lepopun lón Paipel. Ika ekkena mwán mi ásimaw ra tipeeú pwe ka fich ngeni papatais, iwe repwe erenuk pwe ka tongeni papatais atun epwe fis eú mwichelap. * A kan kakkatowu lón ekkewe mwichelap eú afalafal usun papatais. Mwirin, ewe chón afalafal epwe etiwa  chókkewe repwe papatais le pélúweni ruu kapas eis le ‘pwarata ren auer’ ar lúkú.

²² Óm papatais a affata ngeni aramas pwe ka fen fangóló manawom ngeni Kot, iwe iei ka wiliti emén Chón Pwáraatá Jiowa. Ekkewe repwe papatais repwe unusen mwootiw lón konik pwe epwe pwári pwe ra fangóló manawer ngeni Jiowa.

23. Met weween án emén epwe papatais fán ásengesin iten ewe Sam, ewe Nau me ewe manaman mi fel?

²³ Jesus a apasa pwe néún kewe chón káé repwe papatais fán ásengesin iten ewe Sam, ewe Nau me ewe manaman mi fel. (Mateus 28:19) Weween pwe aramas mi fich ngeni papatais ra silei án Jiowa Kot me Jesus Kraist nemenem. (Kölfel 83:18; Mateus 28:18) Ra pwal silei angangen án Kot we manaman mi fel.​—Kalatia 5:22, 23; 2 Petrus 1:21.

24, 25. (a) Papatais a liosuetá met? (b) Menni kapas eis epwe pélú?

²⁴ Iwe nge, papatais ese chék wewe ngeni mwootiw lón konik. Nge a liosuetá eú mettóch mi fókkun lamot. Óm tutiw lón konik a liosuetá óm máló seni manawom me lóóm. Tusefálitá seni konik a liosuetá óm manawsefálitá le féri letipen Kot. Kopwe chechchemeni pwe ka fangóló manawom ngeni Jiowa Kot nge esap ngeni aramas, och angang, och kókkót are eú mwicheich. Óm fangóló manawom  me papatais, iei poputáán ámi chiechifengen me Kot, weween kopwe wesewesen pacheéch ngeni.​—Kölfel 25:14.

²⁵ Sisap kúna manaw ren chék ach papatais. Iei makkeien ewe aposel Paulus: “Oupwe achocho le anganga püsin ämi küna manau fän niuokus me chechech.” (Filipi 2:12) Papatais, ina chék poputáán ach feffetál ngeni manaw. A pwal lamot sipwe “chok nom non ewe tongen God.” (Jutas 21, Ewe Kapasen God) Nge epwe ifa usun kopwe nónnóm lón án Kot tong? Ena sáingoon sópwun epwe pélúweni ena kapas eis.