1. ¿Chucoch tsiʼ cʼajti chaʼan miʼ yʌjqʼuel ti chʼʌmjaʼ jiñi wiñic wen ñuc bʌ i yeʼtel yaʼ ti Etiopía?

«¡QʼUELE! Wʌʼan jaʼ. ¿Am ba chuqui miʼ mʌctañon chaʼan mic chʼʌm jaʼ?», cheʼ tsiʼ yʌlʌ juntiquil wiñic chʼoyol bʌ ti Etiopía wen ñuc bʌ i yeʼtel (troñel). Juntiquil xñoptʼan i cʼabaʼ Felipe tsaʼ ujti i pʌsben yaʼ ti Tsʼijbujel chaʼan Jesús jiñʌch jiñi Mesías wʌn albilix bʌ. Ili wiñic ñuc bʌ i yeʼtel tsaʼ toj sajti i pusicʼal chaʼan jiñi tsaʼ bʌ i cʌñʌ yicʼot tsiʼ cʼajti chaʼan miʼ yʌjqʼuel ti chʼʌmjaʼ (Hechos 8:26-36).

2. ¿Chucoch wen ñuc i cʼʌjñibal cheʼ yom maʼ ñaʼtan jiñi chʼʌmjaʼ?

² Mi tsaʼix a wen tsaji jiñi yan tac bʌ cʌntesʌntel ti ili libro yicʼot i testigojob Jehová, tajol maʼ wubin a bʌ chaʼan chajpʌbiletix chaʼan maʼ melben a bʌ ili cʼajtiya: «¿Chuqui miʼ mʌctañon chaʼan mic chaʼlen chʼʌmjaʼ?». Tsaʼix a cʌñʌ chaʼan yaʼ ti Biblia mi yʌl chaʼan jiñi wiñicob xʼixicob (quixtañujob) mi caj i chumtʌlob tiʼ pejtelel ora ti jumpʼejl Paraíso (Mateo 5:5; Apocalipsis [Revelación] 21:3, 4). Cheʼ jaʼel, a wujilix tiʼ sujm baqui añob jiñi tsaʼix bʌ chʌmiyob yicʼot chaʼan mi caj i chaʼ aqʼuentelob i cuxtʌlel (Eclesiastés 9:5; Juan 5:28, 29). Tajol añix ora a cajel a tempan a bʌ a  wicʼotob jiñi i testigojob Jehová yaʼ ti congregación yicʼot tsaʼix a qʼuele chaʼan añobʌch tiʼ sujm bʌ ñopbalʌl (Juan 13:35). Pero ñumen ñuc bʌ i cʼʌjñibal jiñʌch cheʼ woli (choncol) a ñumen lʌcʼtesan a bʌ ti Jehová.

3. a) ¿Chuqui bʌ mandar tsiʼ sube Jesús jiñi xcʌntʼañob i chaʼan? b) ¿Bajcheʼ miʼ chaʼleñob chʼʌmjaʼ jiñi xñoptʼañob?

³ ¿Bajcheʼ miʼ mejlel a pʌs chaʼan a wom a melben i yeʼtel Dios? Jesús tsiʼ sube jiñi xcʌntʼañob i chaʼan: «Cucula [...]. Sutqʼuiñob ti xcʌntʼañob wiñicob xʼixicob ti pejtelel pañimil. Aqʼuenla chʼʌmjaʼ» (Mateo 28:19). Jesús tsiʼ pʌsbeyonla chaʼan bajcheʼ yom miʼ mejlel jiñi chʼʌmjaʼ come tsiʼ mele jaʼel. Pero mach tsaʼic jach tsijcʌbenti jiñi jaʼ tiʼ jol mi tsaʼic jach mulbenti (Mateo 3:16). Jiñi tʼan chʼʌmjaʼ tilem ti jumpʼejl tʼan griego, yom i yʌl: «Sujpʼel ti jaʼ». Jiñi chʼʌmjaʼ muʼ bʌ i melob jiñi isujm bʌ xñoptʼañob jiñʌch cheʼ miʼ sujpʼelob tiʼ pejtelel i bʌcʼtal jiñi muʼ bʌ i chaʼlen chʼʌmjaʼ.

4. ¿Chuqui miʼ pʌs cheʼ bʌ juntiquil miʼ chaʼlen chʼʌmjaʼ?

⁴ Tiʼ pejtelel yom bʌ i lʌcʼtesañob i bʌ ti Jehová yom miʼ  chaʼleñob chʼʌmjaʼ. Cheʼ bʌ juntiquil miʼ chʼʌmjaʼ, miʼ pʌs tiʼ wut yañoʼ bʌ chaʼan yom i melben i yeʼtel Dios yicʼot chaʼan tijicña cheʼ miʼ mel chuqui yom Dios (Salmo 40:7, 8). Chaʼan juntiquil quixtañu miʼ mejlel ti chʼʌmjaʼ an cabʌl chuqui yom miʼ mel.

5. a) ¿Chuqui ñaxam bʌ yom maʼ mel chaʼan maʼ mejlel ti chʼʌmjaʼ? b) ¿Chucoch wen ñuc i cʼʌjñibal jiñi tempa bʌ tac?

⁵ Jatet an tsaʼix bʌ a teche a mel. ¿Baqui bʌ? Jiñʌch cheʼ woli (yʌquel) a cʼotel a cʌn Jehová Dios yicʼot Jesucristo, tajol tsaʼ cʌñʌ yaʼ ti cʌntesʌntel chaʼan i tʼan Dios (pejcan Juan 17:3). Pero muʼto mejlel a ñumen taj a ñaʼtʌbal. Jiñi xñoptʼañob yomob chaʼan ‹miʼ bujtʼesʌntelob ti wem bʌ i ñaʼtʌbal Dios yicʼot chuqui yom bʌ› (Colosenses 1:9). Jiñi tempa bʌ tac chaʼan i testigojob Jehová miʼ mejlel i wen coltañet chaʼan jiñi. Jin chaʼan wen ñuc i cʼʌjñibal cheʼ maʼañic maʼ sʌt mi jumpʼejlic tempa bʌ (Hebreos 10:24, 25). Mi mucʼʌch a majlel tiʼ pejtelel jiñi tempa bʌ tac, mi caj a cʼotel a cʌn Dios.

6. ¿Bajcheʼ cʼamel yom maʼ chʼʌmben isujm jiñi Biblia chaʼan maʼ mejlel ti chʼʌmjaʼ?

⁶ Chaʼan maʼ mejlel ti chʼʌmjaʼ, mach wersajic maʼ cʌy ti a jol tiʼ pejtelel jiñi am bʌ ti Biblia. Yom miʼ cʼajtiyel a chaʼan, jiñi wiñic ñuc bʌ i yeʼtel ti melobʌjʌl maxto añic cabʌl i ñaʼtʌbal chaʼan jiñi Biblia, tsiʼ cʼajti i coltʌntel chaʼan miʼ chʼʌmben isujm jiñi yaʼ bʌ an ti Tsʼijbujel (Hechos 8:30, 31). Jatet jaʼel anto cabʌl chuqui yom maʼ cʌn. Maʼañic baqui ora mi caj i yujtel a cʌn i chaʼan bʌ Dios (Eclesiastés 3:11). Chaʼan maʼ mejlel ti chʼʌmjaʼ, yom maʼ cʌn yicʼot maʼ jacʼ jiñi ñaxam bʌ cʌntesa tac am bʌ yaʼ ti Biblia (Hebreos 5:12). Yom maʼ chʼʌmben isujm baqui an jiñi tsaʼix bʌ chʌmiyob, chucoch ñucʼ i cʼʌjñibal i cʼabaʼ Dios yicʼot i Yumʌntel.

7. Cheʼ maʼ tsajin jiñi Biblia, ¿chuqui mi caj a taj?

 ⁷ Pero mach jasʌlic jach yom an a ñaʼtʌbal, come «mi maʼañic mi lac ñop Dios, mach mejlic i qʼuelonla ti utsʼat» (Hebreos 11:6). Jiñi Biblia miʼ subeñonla chuqui tsiʼ meleyob ti wajali jiñi quixtañujob ti jiñi tejclum Corinto cheʼ bʌ tsiʼ yubiyob jiñi woli bʌ i subob jiñi xñoptʼañob: «Tsiʼ ñopoyob. Tsiʼ chʼʌmʌyob jaʼ» (Hechos 18:8.) Cheʼʌch yom miʼ yujtel ti a tojlel jaʼel. Cheʼ maʼ pejcan jiñi Biblia, mi caj a taj jiñi a ñopoñel (chʼujbiya) ti Dios chaʼan jiñi Tʼan tilemʌch ti Dios. Cheʼ jaʼel, yom an a ñopoñel ti Dios chaʼan mucʼʌch caj i tsʼʌctesan jiñi albil bʌ i chaʼan yicʼot chaʼan tiʼ tojlel jiñi i cuxtʌlel Jesús mucʼʌch i mejlel i coltañonla (Josué 23:14; Hechos 4:12, Jini wen bʌ tʼan; 2 Timoteo 3:16, 17).

8. ¿Chuqui mi caj i ñijcañet chaʼan maʼ suben yañoʼ bʌ jiñi cʌmbil bʌ a chaʼan?

⁸ Mi ñumen pʼʌtʌl jiñi a ñopoñel ti Dios, ñumen wocol mi caj a cʌy a sub jiñi cʌmbil bʌ a chaʼan (Jeremías 20:9). Mi caj i ñijcañet chaʼan maʼ suben yañoʼ bʌ chuqui cʌmbil bʌ a chaʼan ti Dios yicʼot chuqui yom bʌ (pejcan 2 Corintios 4:13).

9, 10. a) ¿Majqui ñaxan yom maʼ tech a suben jiñi cʌmbil bʌ a chaʼan ti Biblia? b) ¿Chuqui yom maʼ mel mi a womix loqʼuel ti subtʼan yicʼot i testigojob Jehová?

⁹ Ñaxan teche a suben chuqui lamital cʌmbil bʌ a chaʼan yaʼ ti Biblia jiñi a familia, a wamigojob yicʼot yaʼ bʌ chumulob ti a tʼejl, i cheʼ jaʼel jiñi a piʼʌlob ti eʼtel, pero yom tsajilet cheʼ maʼ subeñob. Tajol ti wiʼil, mi caj a mulan loqʼuel ti subtʼan cheʼ bajcheʼ miʼ mel i testigojob Jehová. Mi tsaʼix cʼoti i yorajlel maʼ mel jiñi, suben jiñi woli bʌ i yʌqʼueñet cʌntesa loqʼuem bʌ ti Biblia. Mi tsaʼ i qʼuele chaʼan chajpʌbiletix chaʼan maʼ loqʼuel ti subtʼan, mi caj i chajpʌntel chaʼan jatet yicʼot jiñi woli bʌ i cʌntesañet mi  laʼ tempan laʼ bʌ yicʼot chaʼtiquil ancianojob yaʼ ti congregación.

¹⁰ Cheʼ bajcheʼ jiñi mi caj a ñumen cʌn jiñi ancianojob muʼ bʌ i cʌntañob i tiñʌmeʼ Dios (Hebreos 13:17; 1 Pedro 5:2, 3). Mi caj i qʼuelob jaʼel jiñi ancianojob mi woliyʌch a chʼʌmben isujm jiñi tsaʼ bʌ a ñaxan cʌñʌ yaʼ ti Biblia yicʼot mi woliyʌch a ñop tiʼ sujm, i cheʼ jaʼel mi woliyʌch a chumtan bajcheʼ mi yʌl jiñi principio tac tilem bʌ ti Dios yicʼot mi a womʌch ochel bajcheʼ juntiquil i testigo Jehová. Mi cheʼʌchi, mi caj i subeñetob chaʼan chajpʌbiletix chaʼan maʼ wochel bajcheʼ xsubtʼan maxto bʌ i chaʼle chʼʌmjaʼ yicʼot muqʼuix a mejlel ti loqʼuel ti subtʼan.

11. ¿Chuqui yom miʼ ñaxan mel juntiquil mi woliyix i ñaʼtan loqʼuel ti subtʼan?

¹¹ An i tajol jaʼel jiñi ancianojob miʼ qʼuelob chaʼan anto chuqui yom maʼ cʌy a mel chaʼan maʼ mejlel ti loqʼuel ti subtʼan. Junchajp, cʼʌñʌl maʼ sub tiʼ pejtelel mi an a mul mucul bʌ a chaʼan. Cheʼ muʼto caj a wochel bajcheʼ xsubtʼan maxto bʌ i chaʼle chʼʌmjaʼ, yom chaʼan tsaʼix a cʌyʌ tiʼ pejtelel a mul, cheʼ bajcheʼ jiñi tsʼiʼlel, yʌcʼajel (qʼuixñijel) yicʼot tiʼ cʼʌñol jiñi droga tac (pejcan 1 Corintios 6:9, 10; Gálatas 5:19-21).

12. ¿Chucoch ñuc i cʼʌjñibal cheʼ mi laj cʌy jiñi lac mul?

¹² Chaʼan maʼ mejlel ti chʼʌmjaʼ, anto yambʌ chuqui yom maʼ mel. Jiñi apóstol Pedro tsiʼ yʌlʌ: «Cʌyʌ laʼ mul. Sutqʼuin laʼ bʌ chaʼan miʼ yajpel laʼ mul» (Hechos 3:19). Cheʼ bʌ juntiquil miʼ cʌy i mul, yom i yʌl chaʼan cʼux miʼ yubin tiʼ pusicʼal chaʼan jiñi tsaʼ bʌ i mele. Pero mach jiñic jach am bʌ i meleyob tsʼiʼlel yom miʼ cʌyob i mul, cheʼ jaʼel, jiñi sʌcoʼ bʌ miʼ yʌlob i bʌ. ¿Chucoch? Come ti lac pejtelel xmulilonla, i la com chaʼan miʼ ñusan lac mul Dios (Romanos 3:23; 5:12). Cheʼ maxto a pejca jiñi Biblia, maxto a wujilic chuqui yom bʌ Dios. Jin chaʼan maxto  cheʼic chumulet cheʼ bajcheʼ yom Dios, ¿mach ba isujmic? Cheʼ bajcheʼ woli a cʌn, yom maʼ cʌy jiñi a mul.

13. ¿Chuqui yom i yʌl jiñi sujtesan a bʌ?

¹³ Cheʼ tsaʼix a cʌyʌ a mul, sujtesan a bʌ. Cheʼ maʼ sujtesan a bʌ, maʼ chʼʌm jiñi wem bʌ bij. Mach jiñic jach mi caj i yʌqʼueñet a chʼijiyemlel tsaʼ bʌ a mele ti wajali, cheʼ jaʼel, yom maʼ junyajlel locʼsan tiʼ a pusicʼal jiñi jontol bʌ o bibiʼ bʌ a melbal. Ili ora yomix maʼ tech a mel jiñi wem bʌ. Cheʼ maʼ cʌy a mul yicʼot cheʼ maʼ sujtesan a bʌ jiñʌch jiñi chaʼpʼejl yom bʌ maʼ mel cheʼ muʼto a caj ti chʼʌmjaʼ.

14. ¿Chuqui yambʌ ñuc bʌ i cʼʌjñibal yom maʼ mel cheʼ muʼto caj a chaʼlen chʼʌmjaʼ?

¹⁴ Anto yambʌ chuqui yom maʼ mel cheʼ muʼto a caj ti chʼʌmjaʼ: Jiñʌch cheʼ maʼ wʌqʼuen a bʌ tiʼ wenta Jehová Dios.

15, 16. ¿Chuqui yom i yʌl cheʼ mi la cʌqʼuen lac bʌ Dios yicʼot chuqui mi caj i ñijcañonla chaʼan mi lac mel jiñi?

¹⁵ Cheʼ maʼ wʌqʼuen a bʌ Dios yom i yʌl chaʼan mi caj a mel jumpʼejl oración baqui mi caj a wʌqʼuen a tʼan Jehová chaʼan cojach mi caj a chʼujutesan (Deuteronomio 6:13). ¿Chucoch jiñi yom bʌ sujtel tiʼ wiñic Dios yom miʼ yʌcʼ i tʼan bajcheʼ jiñi? Laʼ cu la cʌl chaʼan juntiquil wiñic miʼ suben juntiquil xʼixic chaʼan yom i ñumen cʌn. Cheʼ bʌ miʼ ñumen pejcan yicʼot miʼ ñumen cʌmben jiñi wem bʌ i melbal, mi caj i ñumen mulan. Ti wiʼil mi caj i suben chaʼan miʼ ñujpuñel yicʼot. Cheʼ bʌ miʼ ñujpuñel, ñumen cabʌl mi cajel i yeʼtel yaʼ tiʼ yotot. Pero come miʼ wen cʼuxbin jiñi xʼixic, jin chaʼan miʼ ñujpuñel yicʼot.

¹⁶ Cheʼ bʌ miʼ cʼotel laj cʌn Jehová yicʼot mi laj cʼuxbin jiñʌch muʼ bʌ caj i ñijcañonla chaʼan mi lac ñumen melben i yeʼtel, i mi lac chʼujutesan cʼʌlʌl baqui jaxʌl miʼ mejlel lac mel. Jiñi quixtañu yom bʌ i sajcan i Yalobil Dios, Jesucristo, ‹laʼ i cʌy muʼ bʌ i bajñel mulan› (Lucas 9: 23, Jini wen bʌ tʼan). Woli laj cʌy muʼ bʌ lac bajñel mulan cheʼ maʼañic mi laj cʌcʼ chaʼan jiñi chuqui jach bʌ bajñel la com mi mʌctañonla cheʼ mi lac melben chuqui yom bʌ Dios. Jin mecu chaʼan, cheʼ muʼto caj a chʼʌmjaʼ, yom tsaʼix a ñaʼta chaʼan cojach a wom a melben i yeʼtel Jehová tiʼ pejtelel a cuxtʌlel (pejcan 1 Pedro 4:2).

17. ¿Chucoch an cabʌl maʼañic bʌ miʼ yʌcʼob i bʌ tiʼ wenta Dios?

¹⁷ Cabʌl wiñicob xʼixicob maʼañic miʼ yʌcʼob i bʌ tiʼ wenta Jehová come mach jumpʼejl jach alas iliyi, miʼ bʌcʼñañob i mel. Tajol miʼ ñaʼtañob chaʼan mi caj i melob i bʌ tiʼ tojlel Dios come tsaʼix i yʌqʼueyob i bʌ. Cheʼ jaʼel miʼ ñaʼtañob chaʼan miʼ mejlel i tajob jumpʼejl sajtemal muʼ bʌ i yʌqʼuen i chʼijiyemlel Jehová, jin chaʼan miʼ yʌlob chaʼan ñumen wen cheʼ maʼañic miʼ yʌcʼob i bʌ tiʼ tojlel.

18. ¿Chuqui mi caj i ñijcañet chaʼan maʼ wʌqʼuen a bʌ tiʼ wenta Jehová?

¹⁸ Cheʼ bʌ maʼ ñumen cʼuxbin Jehová mi caj a ñumen mulan a wʌcʼ a bʌ tiʼ tojlel yicʼot mi caj a chaʼlen wersa a tsʼʌctesan jiñi a tʼan tsaʼ bʌ a wʌqʼue (Eclesiastés 5:4). Cheʼ bʌ tsaʼix a wʌcʼʌ a bʌ tiʼ wenta Jehová, mi caj a mulan ajñel «bajcheʼ yom lac Yum, chaʼan tijicña miʼ» qʼuelet (Colosenses 1:10). Jiñi a cʼuxbiya mi caj i coltañet chaʼan mach wocolic maʼ wubin tiʼ melol chuqui yom bʌ Dios. Tajol lajal mi caj a ñaʼtan cheʼ bajcheʼ tsaʼ bʌ i yʌlʌ jiñi apóstol Juan: «Come i cʼuxbintel Dios jiñʌch i chʼujbibentel i mandar. Mach wocolic i mandar» (1 Juan 5:3).

19. ¿Chucoch mach yomic maʼ bʌcʼñan a wʌcʼ a bʌ tiʼ wenta Dios?

¹⁹ Dios maʼañic miʼ cʼajtin chaʼan juntiquil quixtañu muʼ bʌ i yʌcʼ i bʌ tiʼ wenta yom chaʼan junyajlel toj tiʼ wut. Jehová i cʌñʌ baqui jaxʌl an lac pʼʌtʌlel chaʼan mi lac mel chuqui yom bʌ yicʼot maʼañic miʼ cʼajtin ti lac tojlel mach bʌ mejlic lac mel (Salmo 103:14). Jiñʌch mi caj i coltañet come yom chaʼan wen maʼ chumtʌl (pejcan  Isaías 41:10). Cheʼ mucʼʌch a ñop Jehová tiʼ pejtelel a pusicʼal, mi «caj i chajpʌbeñet a bijlel» (Proverbios 3:5, 6).

20. ¿Chucoch cheʼ bʌ maʼ wʌqʼuen a bʌ Jehová mach yomic chaʼan jatet jach a wujil?

²⁰ Cheʼ bʌ mi lac wen ñaʼtan chaʼan jiñi tsaʼ bʌ laj cʌñʌ, tajol mi caj a wʌqʼuen a bʌ Jehová yicʼot jumpʼejl oración. Pero tiʼ pejtelel jiñi muʼ bʌ i cʼuxbiñob Dios tiʼ sujm, anto yambʌ chuqui yom bʌ miʼ melob: Yom miʼ subob i bʌ «tiʼ tojlel cabʌlob» (1 Timoteo 6:12). ¿Bajcheʼ miʼ mejlel jiñi?

21, 22. ¿Bajcheʼ miʼ mejlel a pʌs chaʼan maʼ sub a bʌ «tiʼ tojlel cabʌlob» chaʼan añʌch a chʼujbiya ti Dios?

 ²¹ Suben jiñi coordinador i chaʼan ancianojob yaʼ ti a congregación chaʼan a womix chʼʌmjaʼ. Jiñʌch mi caj i chajpan chaʼan jiñi ancianojob mi caj i melbeñetob cʼajtiya tac chaʼan jiñi ñaxam bʌ cʌntesa tac tsaʼ bʌ a cʌñʌ yaʼ ti Biblia. Mi jiñi ancianojob miʼ qʼuelob chaʼan muqʼuix a mejlel ti chʼʌmjaʼ, mi caj i subeñetob chaʼan mi caj mejlel a mel ti jiñi colem tempa bʌ lʌcʼʌlix bʌ miʼ cajel. * Cheʼ  bʌ miʼ cʼotel i yorajlel jiñi chʼʌmjaʼ, miʼ ñusʌntel jumpʼejl discurso baqui miʼ tsictesʌntel i sujmlel jiñi. Cheʼ miʼ yujtel i ñusan discurso jiñi hermano, miʼ mejlel chaʼpʼejl cʼajtiya, baqui jiñi muʼ bʌ i cajelob ti chʼʌmjaʼ yom tsʌts miʼ yʌcʼob i jacʼbal. Cheʼ bajcheʼ jiñi miʼ subob i bʌ «tiʼ tojlel cabʌlob» chaʼan añobʌch i ñopoñel ti Dios.

²² Jiñi chʼʌmjaʼ jiñʌch baqui maʼ pʌs tiʼ wut cabʌlob chaʼan jatet tsaʼix a wʌcʼʌ a bʌ tiʼ wenta Dios yicʼot chaʼan juntiquiletix i testigo Jehová. Jiñi muʼ bʌ i chaʼleñob chʼʌmjaʼ miʼ sujpʼelob ochel yaʼ ti jaʼ tiʼ pejtelel i bʌcʼtal baqui miʼ pʌsob chaʼan tsaʼix i yʌcʼʌyob i bʌ tiʼ wenta Jehová.

23. ¿Chuqui yom i yʌl cheʼ miʼ yujtel chʼʌmjaʼ «tiʼ cʼabaʼ lac Tat, tiʼ cʼabaʼ i Yalobil, tiʼ cʼabaʼ Chʼujul bʌ Espíritu»?

²³ Jesús tsiʼ sube jiñi xcʌntʼañob i chaʼan, chaʼan yom miʼ chaʼleñob chʼʌmjaʼ «tiʼ cʼabaʼ lac Tat, tiʼ cʼabaʼ i Yalobil, tiʼ cʼabaʼ Chʼujul bʌ Espíritu» (Mateo 28:19). Ili yom i yʌl chaʼan jiñi muʼ bʌ i cajelob ti chʼʌmjaʼ miʼ cʼotel i cʌmbeñob i pʼʌtʌlel Jehová Dios yicʼot Jesucristo bajcheʼ yumʌl (Salmo 83:18, TNM; Mateo 28:18). Cheʼ jaʼel, miʼ cʌñob chaʼan jiñi eʼtel muʼ bʌ i mel jiñi chʼujul bʌ i yespíritu Dios, yom i yʌl, jiñi i pʼʌtʌlel am bʌ i chaʼan (Gálatas 5:22, 23; 2 Pedro 1:21).

24, 25. a) ¿Chuqui yom i yʌl jiñi chʼʌmjaʼ? b) ¿Baqui bʌ cʼajtiya yom mi la cʌqʼuen i jacʼbal?

²⁴ Jiñi chʼʌmjaʼ mach jiñic jach yom i yʌl sujpʼel ochel ti jaʼ. Añʌch i sujmlel wen ñuc bʌ i cʼʌjñibal. Cheʼ bʌ maʼ sujpʼel ochel ti jaʼ, lajal bajcheʼ maʼ «chʌmel», ili yom i yʌl chaʼan maʼ cʌy jiñi a tsucu melbal am bʌ a chaʼan ti wajali. Cheʼ maʼ loqʼuel ti jaʼ, yom i yʌl chaʼan ti jiñi bʌ ora maʼ tech a mel chuqui yom bʌ Dios. Mach yomic miʼ ñajʌyel a chaʼan, chaʼan tsaʼix a wʌcʼʌ a bʌ tiʼ wenta Jehová i maʼañic woli a wʌcʼ a tʼan chaʼan jumpʼejl i eʼtel i chaʼan bʌ wiñicob.  Cheʼ bʌ tsaʼ wʌcʼʌ a bʌ tiʼ wenta Dios yicʼot cheʼ bʌ tsaʼ chaʼle chʼʌmjaʼ jiñʌch i tejchibal chaʼan maʼ ñumen lʌcʼtesan a bʌ ti Dios (Salmo 25:14).

²⁵ Pero jiñi chʼʌmjaʼ mach yomic i yʌl chaʼan tsaʼix a taja a cuxtʌlel tiʼ pejtelel ora. Jiñi apóstol Pablo tiʼ tsʼijbu: «Tiʼ tsiltsilñʌyel laʼ pusicʼal yicʼot bʌqʼuen yom mi laʼ chʌn chaʼlen chuqui utsʼat chaʼan miʼ tsictiyel woli laʼ coltʌntel» (Filipenses 2:12). Jiñi chʼʌmjaʼ cojax to i tejchibal chaʼan mi lac sujtel tiʼ yamigo Dios. Laʼ laj cʼajtiben lac bʌ: ¿Bajcheʼ mi lac mejlel ti chʌn ajñel laj quicʼot Dios yicʼot i cʼuxbiya? Ti cojix bʌ cʌntesʌntel ti ili libro miʼ yʌqʼuentel i jacʼbal ili cʼajtiya.