1. ¿Ibigala Etiopía dule bautizar sabi guali?

“DII naid be dagge, ¿ibigala geg an bautizar sasunna?” Weyobi ebbenne Etiopíagi dule dummad gudi gusad sogsad. Ar Cristo sorda Felipe nugadi we dule odurdasad, Jesús, Mesías daniggoye soglesadye. We dule Bab gardagi ibmar  sognaid mag iddo gunonisoggu bautizar sabi gualid. Aaga sogsad an ¡bautizar sabiye! (Gusmalad 8:26-36).

2. ¿Ibigala be Bautizar saedgi binsamogadi?

² Be nueggwa Jehovági sunmagmaladbo we libro durdasale, be binsadamogoed: “¿ibigala an geg bautizar samoga?”. Wesega be durdasad Bibliagi soglenaye yoowedse dulemar neg yeer daglegedgine sadegu gudi guoye (Lucas 23:43, TNM; Apocalipsis 21:3, 4). Be durdasbalid, dule burgwisale nue igi gusdae, geb burgwismaladi gannar odurgulemaloye (Eclesiastés 9:5; Juan 5:28, 29). Sun be Jehovági sunmagmalad igar iddoged negse bad nanagwissir nanagwismogad. Be sunnad be dagsabalid wemala Bab igar sunsogedbali ibmar imagmala (Juan 13:35). Sun be sunnadi bad be na Jehová e ai iddomogaled.

3. a) ¿Ibu imagmaloye Jesús e sordaganga sogsa? b) ¿Igi Cristo sordagan bautizar imagmala?

³ ¿Igi mag daglegoe be nue Babga arbabimoga? Jesús e sordaganga sogsad: “Degisoggu, [...] namar, bela dulemar yar baid baidgi buggwamalad an sabbinganga gued [...] imagnamar. Amar Bab Dummad nuggi, Bab Dummad Massi nuggi, degi, Bab Dummad Burba Isligwaled nuggi, Bab diigi ogleged igargi oglegega, [...] imagnamar” (Mateo 28:19). Ar Jesús bautizar sasmogad. Bautizar sasgu e nono birgi unnila dii dee dee imassurmalad, geb unnila e nonobii wara gussurbalir (Mateo 3:16). Griego gayaba bautizar saed obared, “dii yaggi oodos saed”. Degsoggu Cristo sordagan dulemar bautizar saega, dule dii yaggi odomarmogad.

4. ¿Ibu imagbi be daglegoe bautizar sasale?

⁴ Igar maid, dule Jehová aiga gubiele bin bautizar sagweler gebye. Dulemar be dagsale be bautizar sasa, mag daglegoed be Babga arbabimoga. Geb mag daglebaloed be Jehová ibmar abeged imagbibali (Salmo 40:7, 8). Auggi be bautizar saega igarmar mamaidba bin be ibmar imaggweler gebed.

5. a) ¿Bautizar saed idu ibu ibmar inso be imagger gebe? b) ¿Ibiga Jehovági sunmagmalad igar iddogedse nanaed nue abelege?

⁵ Bad be ibmar soggwen imagnaid. ¿Ibu be imagnai? Sun be Biblia durdagnaid Jehová igar durdaggega, geb Jesús igar durdagbaliga (Juan 17:3, TNM, absogo). Degi inigwale be anba nabbi ibmar durdagged abeleged. Ar bela Cristo sordagan abemalad “biddigi [be] Bab Dummad e binsamaid gaddiig magar iddosa[na] gadinye” (Colosenses 1:9). Jehovági sunmagmalad igar iddogedse nanaedi be bendaggoed we ibmar durdaggega. Aagala be, igar iddoged negse nanaed abeleged (Hebreos 10:24, 25). Be bali bali igar iddoged negse nanaele bur bule be Bab igar durdadoed.

6. Bautizar saed iduale, ¿bela be Biblia durdagged abeledibe?

⁶ Auggi soglesulid be bautizar saed iduale bela be Biblia wisgugoloye. Etíopia dule wis bibbi Bab igar wisinad, degsoggu dule e bendagged abesad Bab gaya burba mag iddo guega (Gusmalad 8:30, 31). Be anba nabbi ibmar durdagnadab gumogoed. Ar Bab igar durdagged geg bergued (Eclesiastés 3:11). Auggine be bautizar saed iduale abeleged be Biblia durdaggedi geb eba be ibmar imagbalidi (Hebreos 5:12). Be wisgued abeleged dule burgwisar igi gusdae, Bab Dummad igi nuga geb Bab Reino igar igi mabali.

7. ¿Ibigala nuedi be Biblia durdagmai guedi?

⁷ Auggi ibmar durdaggedbii unnisurbalid. “Ar dule Bab Dummad benele, geg Bab Dummad yeer iddo imagged” (Hebreos 11:6). Bibliagi soglenaid ebbenne Corintoginmaladi Cristo igar iddosmargu ‘egi bengussurmarye geb bautizar imasmarbarye’ (Gusmalad 18:8). Degsoggu Biblia durdadele be benguosulid Biblia Bab gaya burbaye. Biblia durdaggedi be bendaggoed mer be, Bab ibmar imaggoedgi benguega geb mer be, bengubaliga Jesús be bendaggega  burgwisye (Josué 23:14; Gusmalad 4:12; 2 Timoteo 3:16, 17).

8. ¿Ibu ibmar be imaggoe Bab igargi be emarga sunmagbi gudamogadi?

⁸ Bibliagi ibmar durdasadgi be bensulidbali, emarga sogbi be gudamogoed (Jeremías 20:9). Be na iddodagoed nue Bab igargi sunmagbie (2 Corintios 4:13 absogo).

9, 10. a) ¿Doamargar insogi gebbe be Bibliagi sunmadoe? b) Be Jehovági sunmagmaladba Bab igargi sunmagnabimogale, ¿ibu be imagger gebe?

⁹ Be gwenadgangar inso sun be Bibliagi sunmagged, geb be aimarga, be neg nagab mamaidga geb arbaedgi be sordagangardibe. Ibagwengi sun be Jehovági sunmagmaladba igar niggaa Bab igargi sunmagnabi gudamogoed. Degiile mer binge be odurdagnaidga sogo an bemarba nabimoye. Be odurdagnaid binsadibe nabir be Bab igargi sunmasmogarye, igar amilegoed, gwenagan idudimalad warbo bemarbo sunmaggega.

¹⁰ Degiile be mag dagge gunoniggoed doamala gwenagan idudimaladi, gwenadgan aggwedimaladi (Gusmalad 20:28; 1 Pedro 5:2, 3). Idudimalad dagdibe be, Bibliagi ibmar soglenaid mag iddoge, geb be egi bensurbali, geb be, Bab igar mamaidba gudibali, geb be nue Jehovági sunmaggedga gubimoga. Be owisomaloed emidi bautizar saed idu be nabir Bab igargi emarga sunmagnamoye.

11. Bab igargi sunmagged iduale dule ¿ibu ibmar indagger gebe?

¹¹ Inbaggwa idudimalad dagdamaloed dule bin e daed ogwaed abelegwerye emarga Bab igargi sunmagnaed idu. Sun dule odugguaggwa ibmar imagdiiled. Degsoggu bautizar saed idu dule Bab igargi sunmagnabiele, bin ibmar isgana imagdiid indaggweler gebed, sun dule neg sidsigi galagwensur gudiiled, gadi mungudibe geb sigali mummud ebudibe bela we ibmarmar indagged abelegweled (1 Corintios 6:9, 10 geb Gálatas 5:19-21 absogo).

12. ¿Ibiga nuedi mag be na iddoged, be bela belad nodii?

¹² Bautizar saed idu ibmar baid be imagbalir gebed. Apóstol Pedro sogsad: “Be[mar] isgued be[marga] elilemalaga, be[mar] isgudiidga ulubgi na [...] buggib binsamarsun. Be[mar] daed be[mar] ogwamarsun, Bab Dummadse gannar [...] dagmarsun” (Gusmalad 3:19). Dule mag na iddogele bela belad nosa, nunmag iddogoed ibmar isgana imasadba, binsadagoed ibiga an we ibmar imasdibeye. Auggi soglesulid unnila dule galagwensur neg sidsigi gudi gusadbii mag na iddogoye bela belad nosa, anba dule dogdar ibmar isgana imagdisulile mag na iddoged abelemogad noar ibmar imagdimoga. ¿Ibigala? Ar bela anmar Babgi yolegedbiid, degsoggu bela anmar abegedbiid Bab anmarga isgued ieged (Romanos 3:23; 5:12). Biblia durdagged idu be wissulinsoggu Bab ibu abemai, geg eba be igar imaggenad. Degsoggu nue abeleged anmar mag na iddogedi nue Babgi yoledii.

13. ¿Ibu obare be daed ogwaedi?

¹³ Mag na be iddogele nue be ibmar isgana imagdii gusa be daed be ogwabalir gebsunnad. Abeleged be ibmar isgana imasad mer bar imaggedi geb emisgindi ibmar nueganbi be imagged abeleged. Bautizar saed iduale abeleged mag na be iddogedi nue ibmar isgana imagdii be gusa geb be na daed ogwabalidi.

14. Bautizar saed iduale, ¿ibu ibmar be imagger gebe?

¹⁴ Bautizar saed iduale Jehovága be soger gebed an begarbii arbamogoye.

15, 16. ¿Ibu be imaggoe, Jehovága sogega an begarbii arbabimoye, geb ibu imaggega anmar imaggoe?

¹⁵ Be Jehovágarbii arbadii gubimogale, ese be goloed ega sogega unnila an begarbii ibmar imagdii gubimoye  (Deuteronomio 6:15). Auggine ¿ibiga dule weyob Jehovága soged abelege? Anmar sogoena igi dule, ome abealir, bali bali dagdi gudoedbali nue binar gudagoe. Ome nued dae daggedbali nabbis ega sogdagoed an be niggubiye. Ar wisindo ome niggusar arbaed ega bur bule nodagoe. Ar nue we ome binarsoggu binsaosulid an mer nigguo dagleye.

¹⁶ Be binna binna wisgudmogale, Jehová igi dae geb be sabgudbalile be ega bur bule arbabi gudamogoed. Ar dule Bab Massi Jesucristo e sordaga gubiele ‘na duggin isdar dagger gebed’ (Marcos 8:34). Degsoggu anmar ibmar abeged geb anmar ibmar niggubiedgine bar anmar binsasulile, bur anmar binsaele Bab sogedba ibmar imaggedgi, sogledo anmar na isdar dagye. Degsoggu dule Bautizar imagged iduale bad Jehovágarbii ibmar imagdiir gebed (1 Pedro 4:2 absogo).

17. ¿Ibigala abar dobe Babga sogdamala an begarbii ibmar imaggoye?

¹⁷ Abar dulemar, dobe Jehováse gordamalad ega sogega an begarbii ibmar imaggoye, ar binsamalad we ibmar dodogedsuliddeye. Binsadamarbalid an Cristo sordaga gumogosoggu yogasaar geg an bar ibmar imagdii guoeddeye. Abar binsamarbalid abaggar an Babgi yolederye, Jehová binsadagodolleye we dule gwen anga ibmarga gussurye, degsoggu binsadamalad mer bur an ega sogoye an begarbii ibmar imagdii guoye.

18. ¿Ibiga be, Jehovága sogbi gudagoe an begarbii ibmar imagbiye?

¹⁸ Be nue Jehová sabgudele ese be gorbi gudagoed ega sogega an begarbii ibmar imagbiye, geb ega sogsadba be ibmar imassunnoed (Eclesiastés 5:4). Be, Babga sogsad sorbali an begarbii ibmar imagdii guoye, emidi be “unnila Bab Dummad ibmar yeer daggedbi imagdii gu[oed]” (Colosenses 1:10). Be Bab Dummad sabele begala undar  guosulid eba igar imaggega. Degsoggu apóstol Juanyobi be binsamogoed: “Ar Bab Dummad sabgulegedi, E Igar Mamaidba nanalegedgi sabguleged, ar E Igar Mamaid duddusursulid” (1 Juan 5:3).

19. ¿Ibiga be dobguedsuli Babga sogega an begarbii ibmar imagbimoye?

¹⁹ Be, Babgarbii ibmar imagdii guega soglesulid be noosurdeye. Ar Jehová wisid anmar eyobi geg ibmar nueggwa imagge, degsoggu abiddomasulid anmar ibmar geg imaggedi imaggedse saed (Salmo 103:14). Jehová be bendagmai guoed, ar abeged be nued gudi gued (Isaías 41:10 absogo). Bela beladse be, Jehovági bensulile, “Bab Jehová bega igar nueganbi imaggoed” (Proverbios 3:5, 6).

20. Be Jehovága sogsad sorbali an begarbii arbaoye, ¿ibigala unnila bebii we ibmar wisi guedsuli?

²⁰ Bad be we ibmar durdassoggu sun be binsadagoed an Jehováse goloye ega sogega begarbii an arbabimoye. Auggi dule nue Bab sabele, nabbi ibmar baid imagbargweler gebed: Emar abargi ‘soger gebed Bab an benggoedye’ (Romanos 10:10, TNM). ¿Igi we imaglege?

21, 22. ¿Igi be dulemarse oyomogoe be ibmar durdasadgi bensuli?

 ²¹ Bia be nanagwissi Bab igar iddogega, aagi idudimaladga igar amidiidga be soge an bautizar sabiye. Aa igar amigoed idudimalad besega, be ibmar Bibliagi durdasad egisega. Wemar dagmardibe be ibmar durdasadba igar imagdii, bega sogmaloed, be igar iddoged bulaled gualir nabir bautizar saye. * Bautizar salesoggalile, bautismo igargi sunmagles dagweled. Sunmaglenaid bergudele bautizar samaloedse ibmar sogbo egislegoed, geb nabir iddomalale wemar binnasur abin sogmaloed. Weyobi emar abargi ‘sogmaloed ibmar durdasad an bensurye’.

²² Be bautizar imasadbali mag daglegoed be Babga sogsamoga an begarbii arbadii gubiye, geb emidi be Jehová igargi sunmaggedmoye. Bautizar samaloedi dii yaggi odolemaloed bela dulemar daggega we dule Jehovága arbadii gumogoe.

23. ¿Ibu ibmar mag iddogoe dule bautizar sasale “Bab Dummad nuggi, Bab Dummad Massi nuggi, degi, Bab Dummad Burba Isligwaled nuggi”?

²³ Jesús sogsad, e sordagan bautizar samaloye “Bab Dummad nuggi, Bab Dummad Massi nuggi, degi, Bab Dummad Burba Isligwaled nuggi” (Mateo 28:19). We sogledo bautizar samaloedi mag iddomarye Jehová bur dule dummad emarba maye, geb Jesucristo nagabali dule dummad simoye (Salmo 83:18; Mateo 28:18). Anba mag iddomarbarye igi Bab Dummad na e gangued ebumai (Gálatas 5:22, 23; 2 Pedro 1:21).

24, 25. a) Bautizar saedi, ¿ibuyobi gue? b) ¿Ibu ibmar anmar wisgubie?

²⁴ Bautizar saedi unnila binsa dudileged obarsulid. Dule  dii yaggine odolesale, “burgwisayobid”, sogledo, bar ebbennegwayobi daosurye. Geb dii yaggine onolegeddina obared, emidi unnila Jehovágarbii arbadi gudoye. Mer bibbisaar iego Jehovágala be sogsad, unnila begarbii an arbaoye, we arbaedi dulemargarsulid, ibmargarsulid geb neggwebur garsurbalid. Be, Bab Dummadga sogsale an begarbii arbadii gudoye geb be bautizar sasbalile, sogledo, emidi be, Bab Dummad ai nuedga gudmogoye (Salmo 25:14).

²⁵ Auggine be bautizar sasale soglesulid bad be bendaglesye. Ar apóstol Pablo sogsad ‘bendaglegega na be alamagnai samaloye’ (Filipenses 2:12). Be bautizar sasale sogledo be emidi Bab Dummadga arbadmoye. Degsoggu emidi anmar wisgubied: ¿Ibu anmar imagger gebe mer Bab Dummadgi banguega? Capítulo daniggidgi we ibmargi sunmaglegoed.