1. Mun na Etiyopi masaso kuntigi dɔ y’a ɲini ka batize?

‘JII filɛ, mun bɛ ne bali ka batise?’ Etiyopi jamana ka masaso kuntigi dɔ lo y’o ɲiningali kɛ saan kɛmɛkulu fɔlɔ la. Kerecɛn dɔ, min tɔgɔ ko Filipu, tun y’a yira ka gwɛ o cɛɛ la ko Yezu lo ye Masiya ye layidu tara  min koo la. Etiyopika ye koo minw faamu Bibulu kɔnɔ, o y’a dusu sɔrɔ minkɛ, a y’a latigɛ ka wale dɔ kɛ. A y’a yira ko a b’a fɛ ka batize.—Kɛwaliw 8:26-36, ABM.

2. Mun na i ka kan ka miiri kosɔbɛ batɛmu koo la?

² N’i ye gafe nin ka kalansen tɛmɛnenw kalan sɔbɛ la ni Jehova Seere dɔ ye, sisan kɔni, i be se k’i yɛrɛ ɲininga ko: “Mun bɛ ne bali ka batise?” Sisan, i b’a lɔn ko Ala ye layidu ta Bibulu kɔnɔ ko ɲɛnamaya banbali bena kɛ alijɛnɛ kɔnɔ (Luka 23:43; Yirali 21:3, 4). I fana y’a faamu Bibulu be min fɔ mɔgɔ salenw cogoya tigitigi koo la ani sukununi jigiya koo la (Waajulikɛla 9:5; Zan 5:28, 29). N’a sɔrɔ i be taga Jehova Seerew ka lajɛnw na ani i yɛrɛ y’a ye u be tiɲɛn diinan sira tagama cogo min na (Zan 13:35). N’a sɔrɔ i fana y’a daminɛ ka jɛnɲɔgɔnya kɛ ni Jehova Ala ye. O lo kɔrɔtalen lo kosɔbɛ.

3. (a) Yezu ye cikan juman di a ka kalandenw ma? (b) Ka mɔgɔ batize jii la, o be kɛ cogo di?

³ I be se k’a yira cogo di ko i b’a fɛ ka baara kɛ Ala ye? Yezu y’a fɔ a ka kalandenw ye ko: “Aw ye taga siyaw bɛɛ kɛ ne ka kalandenw ye k’u batize.” (Matiyo 28:19). Yezu yɛrɛ y’o ɲɛyira an na a kɛtɔ ka batize jii la. U ma jii seriseri a kan, wala u ma jii dɔɔni bɔn a kuun kan dɔrɔn (Matiyo 3:16). “K’a batize,” o ye gɛrɛkikan kumaden dɔ ye min kɔrɔ ko “k’a sun.” O kama, ka mɔgɔ batize ka kɛ kerecɛn ye, o kɔrɔ ko k’a tigi fari kuturu bɛɛ tunu jii la.

4. Ka batize jii la, o be mun lo yira?

⁴ Minw bɛɛ b’a fɛ ka jɛnɲɔgɔnya kɛ ni Jehova Ala ye, u ka kan ka batize jii la. Batɛmu fɛ, i b’a yira bɛɛ ɲɛɛ na ko i b’a fɛ ka baara kɛ Ala ye. Batɛmu b’a yira fana ko Jehova sago kɛli ka di i ye (Zaburuw 40:8, 9). Nka sanni i ka batize, fɔɔ i ka sarati dɔw dafa fɔlɔ.

5. (a) I ka kan ka sarati fɔlɔ juman lo dafa ka sɔrɔ ka batize? (b) Mun na a kɔrɔtalen lo i ka taga Jehova Seerew ka lajɛnw na?

⁵ I y’a daminɛ ka sarati fɔlɔ dafa ka ban. Cogo di do? I y’a ɲini ka lɔnniya sɔrɔ Jehova Ala ni Yezu Krista koo la. N’a sɔrɔ i y’o kɛ bibulukalan sen fɛ i kɛtɔ ka kalansenw lajɛ ka tugutugu ɲɔgɔn kɔ (Zan 17:3). Nka, koo caaman be yen i tɛ minw lɔn fɔlɔ. Kerecɛnw b’a fɛ ka Ala “sago [tigitigi] lɔn kosɔbɛ.” (Kɔlɔsikaw 1:9). Jehova Seerew ka lajɛnw bena i dɛmɛ kosɔbɛ k’o lɔnniya tigitigi sɔrɔ. A kɔrɔtalen lo i ka taga o lajɛnw na (Eburuw 10:24, 25). N’i be to ka taga o lajɛnw na, dɔ bena fara i ka lɔnniya kan Ala koo la.

6. Sanni i ka batize, i ka kan ka Bibulu lɔn ka se hakɛ juman ma?

⁶ Ayiwa, waajibi tɛ i ka Bibulu bɛɛ lɔn ka sɔrɔ ka batɛmu saratiw dafa. Etiyopi masaso kuntigi tun be ni lɔnniya dɔ ye nka a mako tun be dɛmɛ na walisa ka Bibulu yɔrɔ dɔw faamu (Kɛwaliw 8:30, 31). O cogo kelen na, fɛɛn caaman be yen hali bi i ka kan ka minw lɔn. Tiɲɛn na, i tɛ se ka koo bɛɛ lɔn ka ban Ala koo la (Waajulikɛla 3:11). Nka sanni i ka batize, i ka kan ka Bibulu ka kalan jɔnjɔnw kɔni lɔn ani ka sɔn u la fɔlɔ (Eburuw 5:12). O kalan jɔnjɔn dɔw ɲɛsinna suuw cogoya tigitigi ma ani fɛɛn min kama Ala tɔgɔ n’a ka Masaya kɔrɔtalen lo.

7. Bibulukalan ka ɲi ka nɔɔ juman to i kan?

⁷ Nka, lɔnniya dama t’a ɲɛ sabu “ni dannaya tɛ, mɔgɔ si ko tɛ se ka diya Ala ye.” (Eburuw 11:6, ABM ). Bibulu b’a fɔ an ye ko tuma min na Korɛntika dɔw ye Yezu ka kalandenw ka waajuli lamɛn, ‘u lara Matigi la, ani u batizera.’ (Kɛwaliw 18:8). O cogo kelen na, bibulukalan ka kan k’a to i ka limaniya ko Bibulu ye Ala ka Kuma senuman ye. Bibulukalan ka kan k’i  dɛmɛ ka limaniya Ala ka layiduw la ani ka la a la ko Yezu ka saraka be se ka i kisi.—Zozuwe 23:14; Kɛwaliw 4:12; 2 Timote 3:16, 17.

8. I ye koo minw kalan, mun lo bena i lasun k’u kofɔ mɔgɔw ye?

⁸ Limaniya mana barika sɔrɔ i dusukun na, i ye koo minw kalan, i tɛna se ka to n’i m’u kofɔ mɔgɔw ye (Zeremi 20:9). A nege bena kɛ i la kosɔbɛ ka kuma mɔgɔw fɛ Ala koo la ani a sagonataw koo la.—2 Korɛntikaw 4:13.

9, 10. (a) I be se k’a daminɛ ka Bibulu ka tiɲɛn kalan kofɔ jɔn lo ye? (b) N’i b’a fɛ ka jɛn ni Jehova Seerew ye u ka waajuli baara la, i ka kan ka mun lo kɛ?

⁹ I be se k’a daminɛ ka Bibulu ka tiɲɛn kalan kofɔ nɛmɛnɛmɛ i somɔgɔw, i teriw, i sigiɲɔgɔnw ani i baarakɛɲɔgɔnw ye. Wagati dɔ bena se, i bena a ɲini ka jɛn ni Jehova Seerew ye u ka waajuli baara la. O tuma na, Jehova Seere min be i kalan Bibulu la, i kana siran k’o ɲɛfɔ ale ye. N’i ka koow dafara waajuli baara kama, labɛn bena kɛ walisa diinan mɔgɔkɔrɔ fila ka baro kɛ e n’i ka kalanfa ye.

¹⁰ O bena kɛ sababu ye i fɛ ka kafo ka diinan mɔgɔkɔrɔ dɔw lɔn ka ɲɛ. Olu lo be Ala ka sagakulu mara (Kɛwaliw 20:28; 1 Piyɛri 5:2, 3). N’o diinan mɔgɔkɔrɔw y’a ye ko i be Bibulu ka kalan jɔnjɔnw faamu, ko i lanen b’u la, ko i tagamacogo bɛnnen lo ni Ala ka sariyaw ye, ani ko i b’a fɛ sɔbɛ la ka kɛ Jehova Seere dɔ ye, o la, u bena a fɔ i ye ko i ka koow dafara ka kɛ kibaro diiman waajulikɛla ye min ma batize fɔlɔ.

11. Mɔgɔ dɔw ka kan ka yɛlɛmani jumanw kɛ ka sɔrɔ ka waajuli baara daminɛ?

¹¹ Nka, diinan mɔgɔkɔrɔw be se k’a kɔrɔsi ko i ka  kan k’i ka ɲɛnamaya kɛcogo yɛlɛma ani ka delinanko dɔw dabila ka sɔrɔ ka waajuli baara daminɛ. O be se ka kɛ koo dɔw ye i be minw kɛra dogodogo la. Sanni i k’a ɲini ka kɛ weleweledala ye min ma batize fɔlɔ, i man kan ka jurumuba si kɛ tugun i n’a fɔ jatɔya, dɔlɔtɔya, sigarɛti min ani dɔrɔgi ta.—1 Korɛntikaw 6:9, 10; Galatikaw 5:19-21.

12. Mun na nimisali ye waajibiko ye?

¹² I ka kan ka sarati wɛrɛw dafa ka sɔrɔ ka batize. Ciden Piyɛri y’a fɔ ko: “Aw ye nimisa ka faran aw ka hakɛw la ka segi Ala ma, janko a k’aw ka hakɛw yafa.” (Kɛwaliw 3:19). Ka nimisa, o kɔrɔ ko tun-k’a-lɔn b’i sɔrɔ sɔbɛ la koo jugu dɔ kosɔn. Waajibi lo mɔgɔ ka nimisa sanko n’a tigi tun be kakalaya koow kɛ. Nka, hali ni mɔgɔ dɔ tagamacogo tun ka ɲi faan caaman fɛ, waajibi lo a ka nimisa fana. Mun na do? Katuguni adamadenw bɛɛ ye jurumutɔw ye ani u mako b’a la Ala ka yafa u ma (Ɔrɔmukaw 3:23; 5:12). Sanni i ka bibulukalan daminɛ, i tun tɛ Ala sago lɔn. O la do, i ka ɲɛnamaya kɛcogo tun be se ka Ala sago dafa a ɲɛɛ ma cogo di? O le y’a to nimisali ye waajibiko ye.

13. Ka tuubi, o kɔrɔ ko di?

¹³ I nimisanen kɔ, i ka kan ka tuubi, o kɔrɔ, “ka segi Ala ma.” Tun-k’a–lɔn dɔrɔn man kan k’i sɔrɔ. Nka, i ka kan k’i ka ɲɛnamaya kɛcogo fɔlɔ dabila ani k’i cɛsiri ka koo ɲuman kɛ sisan. Nimisali ni tuubili ye saratiw ye i ka kan ka minw dafa ka sɔrɔ ka batize.

14. I ka kan ka saratiba juman dafa ka sɔrɔ ka batize?

¹⁴ Saratiba wɛrɛ be yen i ka kan ka min dafa ka sɔrɔ ka batize. I ka kan k’i yɛrɛkun di Jehova Ala ma.

15, 16. K’i yɛrɛkun di Ala ma, o kɔrɔ ko di, ani mun lo be mɔgɔ lasun k’o kɛ?

 ¹⁵ I kɛtɔ k’i yɛrɛkun di Jehova Ala ma delili sɔbɛ dɔ la, i be i daa di a ma ko i bena i masiri ale dɔrɔn lo la fɔɔ abada (Deteronɔmu 6:15). Nka, mun lo be mɔgɔ lasun k’o kɛ do? Ayiwa, i ka miiri k’a filɛ: Cɛɛ dɔ be sunguru dɔ tigɛ furu kama. N’a b’a lɔnna ka ɲɛ, k’a ye ko jogo ɲumanw b’a la, a koo bena to ka diya a ye ka taga. Wagati dɔ bena se, a bɛnnen lo a k’a ɲini furu la. Tiɲɛn lo, furu be na ni kunkanbaara wɛrɛw ye. Nka, kanuya lo bena o cɛɛ lasun k’o kooba latigɛ.

¹⁶ N’i y’a ɲini ka Jehova lɔn ani k’a kanu, o lo bena i lasun k’i yɛrɛ bɛɛ di a ka baara ma ani a ka bato faan bɛɛ ma. Mɔgɔ o mɔgɔ b’a fɛ ka tugu Ala Dencɛ Yezu Krista kɔ, o tigi ka kan ka “ban a yɛrɛ la.” (Mariki 8:34, ABM ). An be ban an yɛrɛ la n’an b’an janto a la ko an negelakow n’an ɲɛnakow t’an bali ka Ala kaan minɛ koo bɛɛ la. O la, sanni i ka batize, Ala sago kɛli ka kan ka kɛ i ɲɛnako fɔlɔ ye.—1 Piyɛri 4:2.

17. Mun na dɔw be sigasiga k’u yɛrɛkun di Ala ma?

¹⁷ Dɔw be sigasiga k’u yɛrɛkun di Jehova ma sabu u be siran ka o kooba latigɛ. U be siran ko u kana na u ka koɲɛw ɲɛfɔ Ala ye. Komi u be siran ko u bena fili ani ka Jehova janfa, u b’a miiri ko a ka fisa u kana u yɛrɛkun di a ma.

18. Mun lo be se k’i lasun k’i yɛrɛkun di Jehova ma?

¹⁸ N’i y’a ɲini ka Jehova kanu, o bena i lasun k’i yɛrɛkun di a ma ani k’i seko bɛɛ kɛ k’i ka dajuru dafa (Waajulikɛla 5:4). I yɛrɛkundili kɔ Ala ma, siga t’a la i bena a ɲini i “taamacogo ka se ka bɛn ni Matigi [ Jehova, NW ] sago ye.” (Kɔlɔsikaw 1:10). Komi i be  Ala kanu, i bena a ye ko a man gwɛlɛ kojugu k’a sago kɛ. Siga t’a la, i be sɔn ciden Zan ka kuma na, a ko: “Ka Ala kanu, o ye nin de ye, ka a ka ci fɔlenw mara. A ka ci fɔlenw man gɛlɛn.”—1 Zan 5:3, ABM.

19. Mun na i man kan ka siran k’i yɛrɛkun di Ala ma?

¹⁹ Waajibi tɛ i ka kɛ mɔgɔ dafanen ye ka sɔrɔ k’i yɛrɛkun di Ala ma. Jehova b’i seko daan lɔn ani a tɛ koo si ɲini i fɛ min be tɛmɛ o kan abada (Zaburuw 103:14). A b’a fɛ i ka se k’i ka yɛrɛkundili dafa ani a bena i dɛmɛ k’o kɛ (Ezayi 41:10). I ka la a la ko n’i ye i jigi bɛɛ la Jehova kan, “a bena i ka sira gwɛya i ye.”—Talenw 3:5, 6.

20. N’i ye i yɛrɛkun di Jehova ma, mun na o koo man kan ka to e ni ale dɔrɔn cɛ?

²⁰ An ye koo minw lajɛ, i ka miiri o la. O be se k’i dɛmɛ k’i yɛrɛkun di Jehova ma delili la. Mɔgɔ o mɔgɔ be Jehova kanu sɔbɛ la, o tigi ka kan k’o ‘fɔ bɛɛ ɲɛɛ na ka kisili sɔrɔ.’ (Ɔrɔmukaw 10:10, NW ). O be kɛ cogo di do?

21, 22. I be se k’i ka limaniya “kofɔ bɛɛ ɲɛɛ na” cogo di?

 ²¹ I k’a fɔ diinan mɔgɔkɔrɔw jɛnkulu ka koow labɛnbaga ye ko i b’a fɛ ka batize. A bena labɛn kɛ walisa diinan mɔgɔkɔrɔ dɔw ka ɲiningali dɔw lajɛ n’i ye minw ɲɛsinna Bibulu ka kalan jɔnjɔnw ma. N’o diinan mɔgɔkɔrɔw sɔnna a la ko i ka koow dafara, u bena a fɔ i ye ko i be se ka batize lajɛnba nata la. * O lajɛnbaw sen fɛ, u ka teli ka kalan dɔ di min be mɔgɔ hakili jigi batɛmu kɔrɔ la. O kɔ, kalankɛla b’a ɲini batɛmu ɲinilaw bɛɛ fɛ u ka ɲiningali nɔgɔman fila jaabi walisa k’u ka limaniya “kofɔ bɛɛ ɲɛɛ na.”

²² Batɛmu lo b’a yira bɛɛ ɲɛɛ na ko i ye i yɛrɛkun di Ala ma ani ko i kɛra Jehova Seere dɔ ye sisan. Batɛmu ɲinilaw fari kuturu bɛɛ be tunu jii la walisa k’a yira bɛɛ ɲɛɛ na k’u ye u yɛrɛkun di Jehova ma.

23. Ka batize “Faa, ni Dencɛ ni hakili senu tɔgɔ la,” o kɔrɔ ko di?

²³ Yezu y’a fɔ ko a ka kalandenw tun bena batize “Faa, ni Dencɛ ni hakili senu tɔgɔ la.” (Matiyo 28:19, NW ). O kɔrɔ ko batɛmu ɲinila be sɔn Jehova Ala ni Yezu Krista ka kuntigiya ma (Zaburuw 83:19, ABM 1961; Matiyo 28:18). A fana be sɔn Ala ka hakili senu ka lɔyɔrɔ n’a ka baara la. O hakili senu ye Ala ka baarakɛ fanga lo ye.—Galatikaw 5:22, 23; 2 Piyɛri 1:21.

24, 25. (a) Batɛmu kɔrɔ ye mun ye? (b) Kalansen laban bena ɲiningali juman jaabi?

²⁴ Nka, batɛmu kɔrɔ tɛ ka ko jii la dɔrɔn. Fɛɛn dɔ  tagamasiɲɛ lo min kɔrɔtalen lo kosɔbɛ. I fari kuturu bɛɛ mana tunu jii la, a be komi i sara ani i ka ɲɛnamaya kɛcogo fɔlɔ banna. I mana bɔ jii la, a be komi i segira ɲɛnamaya la Ala sago kɛli kama. I hakili to a la fana ko i ye i yɛrɛkun di Jehova Ala yɛrɛ lo ma. I ma i yɛrɛkun di baara wala laɲinita dɔ kama, i fana m’a di jɛnkulu dɔ wala adamadenw ma. I ka yɛrɛkundili n’i ka batɛmu b’a to i b’a daminɛ ka teriya sɔbɛ kɛ ni Ala ye, o kɔrɔ, jɛnɲɔgɔnya ɲuman.—Zaburuw 25:14.

²⁵ Batɛmu tɛ garanti ye ko i bena kisi. Ciden Pol y’a sɛbɛ ko: “Aw ka jija ka baara kɛ aw ka kisili kosɔn ni Alaɲasiran ye kosɔbɛ.” (Filipikaw 2:12). Batɛmu ye kisiliko daminɛ lo ye. O be na ni ɲiningali nin ye: I be se ka to Ala ka kanuya la cogo di? An bena o ɲiningali jaabili sɔrɔ kalansen laban kɔnɔ.